الأربعاء، 22 يونيو 2011

ثورتنا المصرية

الثورة
======
طبعا كلنا فاكرينها
ثورة من اللى بيتصاب فيها زينة شباب البلد او يتحبسو دول
***
ايوة ثورة من اللي بيموت فيها شهداء دول.. شهداء في عمر الورد
***
طبعا علشان مصر مش زي أي بلد.. أكيد ثورتها غير
********
ثورتها كانت الناس عاوزة توقف التظاهر والاعتصام فيها علشان عجلة الانتاج.. في الوقت اللى وزارة المالية بتزود ميزانية التليفزيون مليار جنيه.. وبعد خمس شهور بتقول للموظفين الغلابة ان الحد الادنى للاجور بعد ما كان بحكم محكمة 1200 جنيه هيبقى 700 جنيه شاملة البدلات والحوافز.. ومفيش حد أقصى كمان ولا الحد الادني هيتم تطبيقه على القطاع الخاص
*************
ثورتنا كانت الناس بتاخد الرصاص في عيونها وصدرها وهي بتقول سلمية.. وتليفزيونا ووزرائنا وسفرائنا ورئيس مخابراتنا السابق بيقولو على المتظاهرين عملاء ليهم أجندات خارجية
**************
ثورتنا أول ثورة في التاريخ يمسك بعدها المجلس العسكري الحكم بلا أي شرعية.. وبعدين يعمل استفتاء بملايين علشان الاستفتاء ده يديله شرعية والناس تروح برجلها توافق علشان شيوخها وللا قساوستها قالولها قولو نعم أو قولو لا علشان دينكم.. وكأن نعم أو لا كانت هتنقذ الدين الاسلامي او الدين المسيحي
**************
ثورتنا اول ثورة قامت علشان الحرية.. وبعد ما المجلس العسكري مسك الحكم صدرت قوانين تمنع وتجرم التظاهر والاعتصام وتطبق على المعتصمين والمتظاهرين قوانين مكافحة الارهاب اللى عقوبتها بتوصل لمؤبد أو اعدام
**************
ثورتنا اول ثورة الجيش فيها بعد ما مسك الحكم عمل للمتظاهرات كشف عذرية.. واعتقل بمحاكمات عسكرية 9000 شاب وقال عليهم بلطجية مع ان معظمهم شهادات جامعية عالية.. واللى كان بيخرج منهم طبعا الصحفيين والنشطاء السياسيين المعروفين لان كان بيتعمل علشانهم ضجة
********************
ثورتنا اول ثورة المخلوع فيها بيتعالج على نفقة الدولة من الاكتئاب والمصابين حالتهم النفسية زي الزفت ومش لاقيين يتعالجو والحكومة بتستغلهم في عروض اعلامية وتلعب بيهم الكورة وفى الاخر تقول مفيش ميزانية
*****************
ثورتنا اول ثورة يكون فيها نار مستمرة لأكتر من خمس شهور.. مش النار اللي حرقت الحزب الوطني ولا الاقسام ولا مقار أمن الدولة ولا عربيات ومدرعات الامن المركزي
****
لا.. نار من اللى بتاكل قلب مصابين وأبهات وأمهات وأرامل وأيتام
********
بينما اللى عمل فيهم كدا من الشرطة.. مرتباتهم بحوافزهم بسلاطاتهم بباغنوجهم زادت 100% وجالهم عربيات ومدرعات جديدة مكيفة طبعا ومكاتبهم بقت مكيفة.. واللى مبيشتغلش منهم مرتبه بيوصل لحد البيت.. ده غير اللى اترقى وهو على ذمة قضايا قتل متظاهرين.. ده غير اللى اتكرمو فى مكتبة الاسكندرية منهم وهم بردو على ذمة قضايا قتل متظاهرين.. غير اللى خد براءة أو افراج طبعا
==================
خلاصة الكلام اللى أحب افكركم بيه..اب قلبه محروق كان بيقول جابولى اللى باقى من ابنى شوية لحم في حتة قماش.. والمخلوق في شرم بيتعالج من الاكتئاب
============================
واحب افكركم بحاجتين
اول حاجة اعتصام للمصابين يوم الجمعة ا يوليو قدام وزارة الدفاع
********
وتاني حاجة جمعة 8 يوليو هتكون اعتصام مفتوح مش مظاهرة وفض مجالس.. علشان كل القلوب المحروقة دي مخدتش حقها.. وعلشان أنصاف الثورات مقابر للشعوب
واحنا حتى مكملناش نصف ثورة
****************
مش عاوزة يجي جيل ولادنا يقولو مستقبلنا بقى اسود علشان رجالة مصر استشهدو في الثورة او اتصابو او اتسجنو
***
اكيد مصر لسة فيها رجالة يكملو الثورة
اكييييييييييد لسة فيها
منوووش

الاثنين، 6 يونيو 2011

اه يابلد العجايب كلنا فيكي خالد سعيد

النهاردة ذكرى سنة على وفاة خالد سعيد
في السنة اللى اتعذب فيها خالد سعيد حتى الموت
حصلت نفس الحكاية لسيد بلال
وغيرهم وغيرهم
وقامت ثورة.. مقدرش اقول بالظبط ثورة ضد ايه
***
قامت ضد مبارك؟
===========
طب ازاي وهو عايش في نعيم ومتحاسبش على جريمة الخيانة العظمى
***
قامت ضدحبيب العادلي؟
===============
طب ازاي واحنا من اربع شهور مشفناش خلقته في قفص الاتهام حتى
***
قامت ضد الظلم والتعذيب؟
================
طب ازاي ولسة من يومين سواق مات من التعذيب في قسم الشرطة
حتى لو كان مخالف.. حتى لو كان قليل الادب زي ما الداخلية بتقول
المفروض الشرطة تقدمه للعدالة مش للحانوتي
***********
ثورة؟
====
ايوة من اللي بيتحبس بعدها 9000 شاب بأحكام عسكرية دي
***
ثورة؟
====
ايوة من اللي مات فيها 1000 شهيد دي
واهاليهم قلوبهم محروقة
***
ثورة من اللي اتصاب فيها فوق الـ6000 مصاب.. من اللي فقدو عيونهم وأطرافهم دي
ومش لاقيين يتعالجو
ومبارك في مستشفى سبع نجوم في شرم الشيخ
والجابري المحبوس بتهمة قتل المتظاهرين اتنقل لمركز طبي متخصص
*********
واللي هرب هرب
واللى حرق الورق حرق
واللي بياخد افراج بياخد
واللي حول فلوسه حول
واللي بيقترض من البنك الدولي بيقترض
واللي بيمسك السلطة ويدي لنفسه سلطات مطلقة يمسك
واللى يقول الثوار بيقبضو بالدولار ويمارسو الفاحشة يقول
واللي يعمل لمتظاهرات كشف عذرية وهو المفروض بيحمي البلد يعمل
واللي يحول اي حد ينتقد المجلس العسكري للنيابة العسكرية يحول
***
*
***
انا آسفة اني أقول بعد مرور اكتر من اربع شهور على 25 يناير
اننا رجعنا لعصر صلاح نصر والقبضة الحديدية وما وراء الشمس
======================
والنهاردة تحبو تقولو ايه لخالد سعيد وكل ضحية تعذيب على يد الشرطة
وللشهداء وأهلهم والمصابين
المتفائلة ان شاء الله بيوم 23 يوليو القادم
منوووش

الأحد، 5 يونيو 2011

مش احنا اللى قمنا بالثورة.. انا لا اعلم مين اللي قام بيها اصلا

مش احنا اللي قمنا بالثورة.. ده الجيش يا جماعة هو اللي قام بيها وحرر مصر

والصورة اهي بتتكلم

شبكة 6 ابريل خاص| احد لافتات الأخوان المسلمين بمدينة اوسيم بالجيزة

***

حتى ولا كانت الدبابات موجهة مدافعها ناحية الميدان.. ولا حاولت تضيق على المتظاهرين فنامو جوة الجنازير ولا حاجة

ولا البنات اللى اتظاهرو اتعملهم كشف عذرية علشان الجيش يتأكد انهم بنات عائلات محترمات ولا حاجة

*************

ولا على ماهر اتقتل يوم 8 ابريل برصاص الجيش ولا حاجة.. ولا عاطف راقد في المستشفى برصاصة في راسه عملتله تهتك في اجزاء من المخ ولا حاجة علشان بيطالب ان علم الصهاينة ينزل فنزل هو على ركبه

*********

(الا صحيح يا جيشنا يا جيشنا يا جيش الحق هي المجازر دي اتحقق فيها وللا طرمختو؟)

**********

طب يا جيشنا سيبك من 25 يناير.. تعالى نتكلم عن 23 يوليو..مش انتو بردو طلع مجموعة منكم عملت انقلاب عسكري وبعدين الناس ساندتكم فسميتوها ثورة..مع انها وعزة جلال الله انقلاب عسكري مش ثورة

طب ايه اللي حصل مع الاخوان أيامها.. مش طلعتوهم من السجون واديتوهم مناصب في الوزارات لحد ما عبد الناصر وصل للسلطة وبعدين رجعتوهم السجون تاني؟

***************

طب يا جيشنا تعالى بقى نتكلم على 25 يناير.

. عملتو ايه للناس يوم موقعة الجمل؟؟ حميتوهم من القتل؟؟ منعتو دخول البلطجية والقناصة للميدان؟؟

***

لكن قدرتو تسيبو كنايس تولع وتتهد مع انكم متواجدين في المكان.. قدرتو تروحو في ثانية تقتلو شوية شباب بيتظاهرو قدام سفارة الكيان الصهيونى وتركعوهم

***

عملتو ايه كمان.. اعتقلتو 9.000 شاب واديتوهم احكام عسكرية وخرجتو معتقلين جنائيين من التيارات الاسلامية.. وسمحتو لكل التيارات الاسلامية والمسيحية اللي بتولع الدنيا انها تتكلم في التليفزيون وقت الاستفتاء

الا صحيح هو انتو اخترتو لجنة تعديل الدستور فيها كام واحد ينتمي لجماعة الإخوان؟؟

*******************

وقالت الصناديق للدين نعممممممممممممممممممممممممم

ثم قالت الصناديق للمجلس العسكري نعمممممممممممممممممم

****************

وبعدين دلوقتي!!.. حملة للهجوم على نفس التيارت الدينية اللى اتفتحت لهم الساحة تماما وقت الاستفتاء لما قالت الصناديق للدين نعمممممممممم

********************

**

****************

بص يا مجلسنا اصلك تعبت قلبي.. انت كمؤسسة عسكرية انا مليش افتح بقي معاك

لكن لما تيجي تقولى انك انت اللى حررت مصر في 25 يناير هقولك فوق يا مجلسنا الموقر

*******

انت من غير الشعب ولا حاجة

انت من غير الشعب ولا تسوى

*********

الناس هي اللى نزلت الشارع ونزفت ومات منها زينة شبابها وبناتها.. في الوقت اللى مدفعك كان متوجه للميدان

**************

هتقولى انت عزلت مبارك علشان خاطر عيون مصر.. هقولك لا.. كل اللى حصل ان مبارك اختفى وكل القرارات اللى بتتاخد من بعد ما اختفى بتحاول بكل طاقة ممكنة انها تخلى الناس تقول فين أيامك يا مبارك

بس بردو لا.. مش هنركع لمبارك ولا هنركعلك يا مجلسنا الموقر

***

وهقولك تاني يا مجلسنا الموقر

انتو من غير الشعب ولا حاجة

***

وزي ما عملنا الواجب مع الشرطة يوم 25 يناير 2011.. ان شاء الله ربنا يقدرنا نعمل معاك الواجب يوم 23 يوليو 2011 بردو.. لو معملتش احترام للشعب المصري العظيم اكتر من كدا وحققت مطالبه

هع هع هع

***

والله الموفق

المخنوقة

منوووش

السبت، 4 يونيو 2011

كلنا خالد سعيد.. كلنا سيد بلال.. كلنا محمد سعيد

موعدنا 23 يوليو بإذن الله

كلنا خالد سعيد.. كلنا سيد بلال.. كلنا محمد سعيد.. كلنا أي حد ضحية شوية شياطين مصغرة لا تعرف الآدمية ولا تحترمها على كتافهم نجوم ودبابير (إلا من رحم ربي)

اكيد كلنا فاكرين خالد سعيد

فاكرين لما طلعوه في تقارير قنواتنا المصرية اللى عمرها ما بتكدب ابدا وقالو انه حشاش وتاجر مخدرات؟

طب فاكرين السواق (محمد صباح سعيد) بتاع امبارح اللى اتقتل (بعد 25 يناير) على ايد مأمور قسم الأزبكية (العميد محمد مدكور

اكيد زي ما اتقال على خالد سعيد هيتقال على محمد سعيد.. سوابق وحشاش وبيقف مخالف.. اصل سواقين الميكروباص حاجة تقرف ومبيحترموش المرور

طب يللا كلنا بقى نقتل سواقين الميكروباص علشان بيقفو مخالف.. اصل احنا بلدنا مفيهاش قانون

ويللا بالمرة كل واحد ينزل ياخد حقة بإيده

اللى دكتور نسي في بطنه حاجة قبل كدا يروح يقتله.. ويللا بالمرة نقتل الدكاترة كلهم

واللى ليه عمارة وقعت قبل كدا يروح يقتل المقاول.. ويللا بالمرة نقتل كل المقاولين

واللي ليه ابن سقط قبل كدا يروح يقتل المدرس.. ويللا بالمرة نقتل كل المدرسين

واللى موظف وقفله ورقة في أي مصلحة حكومية يروح يقتل الموظف.. ويللا بالمرة نقتل كل الموظفين

مش هي بقت كدا؟؟ يللا نقتل بقى أي حد

يا أي حد شمتان في محمد سعيد اللى اتقتل وبتقول عليه سوابق ويستاهل علشان انت قرفت من سواقين الميكروباص اتقى الله

وافتكر حسني مبارك.. اللي خان مش بلده بس لا.. ده خان الأمة العربية.. خان الدين الاسلامي.. خان القسم اللى حلفه بحماية الشعب والوطن والدستور.. خلى قيمة المواطن ارخص من التراب.. وخلى تراب الوطن أرخص من الهوا.. وسمم الهوا..وسمم الأرض.. وسمم العقول كمان بالجهل

اتقو الله

يا مجلسنا العسكري الموقر اتق الله

احنا مش هبل وعارفين ان كل السلطات في ايدك.. وتقدر ترجع الأمن في ظرف شهر

واحنا بقالنا اربع شهور.. من خالد سعيد لمحمد سعيد

الأمن اللى مفيش استقرار بدونه ولا استثمار

ليه يا مجلسنا الموقر بتعمل كدا في مصر.. ألا تتق الله في مصر؟ أفلا تتفكرون؟

يوم 23 يوليو قرب.. ذكرى اليوم اللي الشعب وقف فيه بجانب مجموعة ظباط عملو انقلاب (فاكرين ظباط 9 ابريل هم كمان وللا نسيناهم؟) وخلى انقلابهم ثورة

انا بس عاوزة افكركم.. انتو صحيح كمؤسسة عسكرية نفخر بيكم.. لكن كحاكم للبلاد تسووا ايه من غير الشعب؟

يا مجلسنا العسكري الموقر.. تفرقو ايه عن مبارك غير انه كان ديكتاتور واحد وانتو 19 ديكتاتور؟

اللى يعرف الاجابة يبعتها في رساله للشهداء وهو رافع راسه للسما بيقولهم فيه ضحية تعذيب جديدة للشرطة جالكم امبارح من مصر (بعد 25 يناير)

موعدنا القادم يوم 23 يوليو بإذن الله

والله الموفق

المقهورة

منوووش

تخاريف ما بعد حكم العسكر

(المواطن المثالي من وجهة نظر الحاكم العسكري)
هو مش مبارك اللى كانو بيقولو عليه ابونا اختفى
والمجلس العسكري دلوقتي هو اللى ماسك مكان مبارك
طب قبل ما يبقى في شرطة ولا داخلية
اللي ابوها بيغتصبها كانت بتعمل ايه بالظبط؟
يعني ابوها هو اللي يسيب البيت وللا هي اللي تشوفلها بيت تاني وللا ايه بالظبط
مهو مينفعش ابويا يغتصبني واعيش بعدها معاه في بيت واحد
ومش اقل من انه يتسجن بقى يعني
دة لو لقدر الله مخدش إعدام
وانا اقول ياربي احنا في زمن انتشر فيه زنا المحارم ليه
اتاري اللي حاكمنا بالدف ضارب
فما شيمة اهل الدا
والله الموفق
المخنوقة
منوووش

الأربعاء، 1 يونيو 2011

مين اللي بيبيع الضمير.. ويشتري بيه الدمار؟؟؟

بالنسبة للمجلس العسكري

انا بمنتهى البساطة عاوزة اعرف انتماءاته الفكرية والسياسية ايه.. فرد فرد وعسكور عسكور.. من اول المشير لغاية اصغر لواء فيهم؟

ومش عايزة ننسى ابدا ايه سلطات المجلس العسكري
(مـــــادة 56)
يتولى المجلس الأعلى للقوات المسلحة إدارة شئون البلاد، ولـه فى سبيل ذلك مباشرة السلطات الآتية :
1ـ التشريع .
2ـ إقرار السياسة العامة للدولة والموازنة العامة ومراقبة تنفيذها .
3ـ تعيين الأعضاء المعينين فى مجلس الشعب .
4ـ دعوة مجلسى الشعب والشورى لانعقاد دورته العادية وفضها والدعوة لإجتماع غير عادى وفضه .
5ـ حق إصدار القوانين أو الاعتراض عليها .
6ـ تمثيل الدولة فى الداخل والخارج، وإبرام المعاهدات والاتفاقيات الدولية ، وتعتبر جزءاً من النظام القانونى فى الدولة.
7ـ تعيين رئيس مجلس الوزراء ونوابه والوزراء ونوابهم وإعفاؤهم من مناصبهم .
8ـ تعيين الموظفين المدنيين والعسكريين والممثلين السياسيين وعزلهم على الوجه المبين فى القانون، واعتماد ممثلى الدول الأجنبية السياسيين .
9ـ العفو عن العقوبة أو تخفيفها أما العفو الشامل فلا يكون إلا بقانون .
10ـ السلطات والاختصاصات الأخرى المقررة لرئيس الجمهورية بمقتضى القوانين واللوائح .
وللمجلس أن يفوض رئيسه أو أحد أعضائه فى أى من اختصاصاته .

وقالت الصناديق للمجلس العسكري نعمممممممممممممممممممممممممممممممم

بالنسبة للانتهاكات والتباطؤ والتواطؤ

وهقول ايه يعني جديد

هو انا مهما قلت هقدر اشرح دمعة ام مقهورة على ابنها المظلوم اللى اتسجن في محاكمة عسكرية علشان خرج يطالب بحق مصر؟

هو انا مهما قلت هقدر اشرح احساس بنت جسمها كله اتكشف واتعملها كشف عذرية علشان خرجت تطالب بحق مصر.. على ايدين الجنود اللى المفروض يحموها ويحمو عرضها؟

واللى هيجي يتكلم ويقولي هو في بنت محترمة تبات في الشارع او تحكي كلام زي ده حتى لو حصلها فعلا.. هقولة ايوة.. في بنات كده وارجل من ذكور كتير قوي فيكي يا بلد بتسيب بناتها يتهتك عرضها.. يابلد الذكر فيكي بيقف في عربية السيدات فى المترو ويجعر بعلو صوته ويقول الدكر يجي يخرجني من العربية

يا بلد البنت نزلت تطالب بحقك والذكور قاعدين في بيوتهم يتكلمو على شرف وعرض البنت دي

راجع اللينكات دي

الخبر على السي ان ان

انتهاكات المجلس العسكري

فيديو

فيديو من قناة سي ان ان

هقول ايه عن المصابين اللى مش لاقيين يتعالجو.. ومبارك بيتعالج على نفقة الدولة وبيتعالج كمان من الاكتئاب

هقول ايه عن أهالي الشهداء اللي بيتهددو؟

حد فيكو يقولي انا لو مكان حد من دول هعمل ايه والناس نسيتني ونسيت حقي؟؟؟

ياريت كل واحد فينا يبص في صور الناس دي.. وبعدين يقولى مين اللى بدمه حمى الثورة ومين اللي بقراراته بيضيعها

حد يقدر يصبر الست دي؟
حد يقدر يبص للست دي ويقولها ابنك حقه رجع؟
حد عنده الشجاعة يبص في عين الست دي ويقولها دلوقتي تقدري تاخدي عزا ابنك؟
(طبعا كلنا فاكرين العربية دي.. الى كانت بتمد قوات الشرطة بذخيرة بعد ما نفذت الذخيرة بتاعتها)
(وطبعا كلنا فاكرين الامن المركزي وبعض ظباط الجيش اللى سحلو شبابنا قدامسفارة الكيان الصهيوني)
****************
نقطة ومن أول السطر
*
(هو ده الجيش اللى ايد واحدة مع الشعب)
(هو ده الجيش اللي ايد واحدة مع الشعب)
(هو ده الجيش اللى ايد واحدة مع الشعب.. وبالمناسبة ياترى الراجل ده فين؟؟ اللى مظهرش على الجزيرة ولا اعرف اسمه للأسف)
وفي النهاية هننتصر.. تبيعو ضميركو.. تعيشونا في دمار بردو هننتصر.. بإذن الله هننتصر.. ده وعد الله للحق انه ينتصر.. والحق معانا مش مع اللى بيبيع الضمير ويشتري بيه الدمار
والله الموفق
منوووش