كله بيعدي

بقالي حوالي ٣ سنين معديتش من هنا.. من ساعة متجوزت تقريبا.. ايوة اتجوزت الاسمراني حب ٨ سنين وربنا رزقنا بكتكوتين صغننين

مش عارفة انا بكتب هنا ليه غير اني هنا على راحتي وحقيقتي. 

معنديش اي فكرة الناس اللي بحبهم وبتابعهم في التدوين راحو فين ولا اخبارهم ايه ولا اصلا حد منهم هيشوف كلامي وللا لا.. بس بجد وحشتوني جداااا

مريت بانكسارات شديدة بعد وفاة بابا الله يرحمه.. ومريت بمطبات فى اخر ٣ سنين يمكن مش عارفة افوق منها لسة.. الناس بقت كئيبة واستغلاليه وتكره تشوف نعمة في ايد غيرها.. ربنا يكفينا شر سواد النفوس. 

اه وطلع فعلا الرجالة مبيملاش عينها الا التراب.

المهم.. الله يسامحك ياحمزة.. تعبتني ووجعت قلبي وقهرتني وكسرت ضهري لتاني مرة بعد كل حاجة حلوة بينا كسرت الثقة والامان بيننا. 

كل مبصلك احس اللي حبيته مات واني ببص لشبحه

يللا ربنا يمكن يسامحك بس انا مش هقدر

مراجعة

وحشتني قوووووووووي يا بابا
ضهري اتكسر من بعدك ومش عارفة اعيش ولا عارفة احب حتى اللي كنت هموت عليهم.. ولا عارفة حتى اصدق مشاعر حد.. قلبي بقى حتة صخرة ملهاش لون ولا طعم.. بس بعرف امثل ببراعة.. لكن كل لحظة تمثيل بتوجعني وبتقتل خلية جديدة جوايا
حتى الاحلام اللي كنت سنين بتمناها واتحققت.. مش طايقاها.. مش قادرة اعيش فيها
كنت بتفهم حقيقة الناس وتسكت ياريتك كنت فهمتني قبل متكسر كل كسرة مبقاش عارفة افوق منها
مبقتش عارفة حتى اتكلم ولا اقول ايه اللي واجعني.. مش جسمي ولا قلبي لا.. روحي بتوجعني وتتحرق كل يوم.. نفسي اقابلك واكلمك وقلبي يرتاح حتى لو هتقولي بطلي هبل يا بنت كذا.. تعالى واضربني عشان مكملتش الماجستير ولا رضيت اشتغل.. وللا اقولك.. استناني.

ساعات

ساعات الشوق بيقتل 

نفس الوجع والبعاد

نفس البحور والصحارى

...

نفس المحبة وأكتر