الأحد، 18 يناير 2009

ازيكم

ازيكم, وحشتونى بصراحة كدة أنا مش عارفة أنا اتكلمت عن موضوع الهبل بتاعى دة فى الموضوعين اللى فاتوا دول ليه يمكن علشان انا دايما احب اتكلم عن اللى مضايقنى علشان ابطل افكر فية أويمكن علشان حد يقوللى ايه الغلط اللى عملته علشان أتحاشاه بعد كدة بس يللا أدينى قلتلكم وخلاص, لكن أنا مش مضايقنى غير انى كل ما أعجب بحد يتجوز دى تفتكروا أنا اللى نحس وللا هم اللى متسرعين, أكيد طبعا كلكم هتقولوا هم اللى متسرعين يللا أنا مش هتكلم كتير النهاردة علشان عارفة ان كتير منكم عندة امتحانات ربنا معاكم ويوفقكم جميييييييعا ويحميكم يللا سلااااااااااااااام بقى وهستناكم بعد الامتحانات.

الاثنين، 12 يناير 2009

مــــش مخنوقة

ازيكم جميعا
عارفين انا حلمت بإيه النهاردة؟

حلمت ان حد كان بيدينى وردة حمرا جمالها ميتوصفش, وعلشان كدة انا بعلن رسميا انى النهاردة
مـــــــش مخنوقة
والحياه كان لونها بمبى (فى الحلم)
امتى بقى ياربى حد يهدينى الوردة المقندلة على عينها دى فى الحقيقة مش فى الحلم
وبالمناسبة الحمد لله عيد ميلادى الـ25 مر بسلام وأمان وجابولى حاجة حلوة كمان
وكلام فى سركم (قاللى كل سنة وانتى طيبة)
متقلقوش هبقى اقولكم مين هو دة اللى قاللى بس مش دلوقتى
المهم نرجع لموضوعنا
الوردة
ياترى كام بنت نفسها فى وردة زيي والوردة دى بتمثلها ايه
ويا ترى الولد كمان بيبقى متوقع رد فعل البنت ايه لما يهديلها ورد
أنا شخصيا الوردة بتمثلى امنية للسعادة
وبهدى الوردة الجميلة اللى فى الصورة دى لغزة
واتمنى اللى يهدينى الوردة ... طبعا الانسان اللى بيحبنى
ورد فعلى هيكون بوسة على خده.. بس طبعا الرقابة هتحذف البوسة متقلقوش.