الثلاثاء، 30 ديسمبر 2008

سنة جديدة سعيدة عليكم وعلينا

خلاص.. كلها كام ساعة ويبقى عندى 25 سنة
فأفكارى هتبقى ملخبطة ومش منظمة.. معلش بقى استحملونى مليش ودن تانية تسمعنى
مش عارفة ليه كل ما الواحد يعيط الناس تقولة ان الدموع غالية قوى, طب الواحد لما يحس ان قلبة بيتعصر ومش قادر يتنفس يعمل إيه؟
أنا فعلا النهاردة مخنوقة قوى وكان نفسى حد قريب مني يكون موجود معايا دلوقتى
هو احنا ليه بنقعد نحط لنفسنا قواعد ونلاقي نفسنا اتخنقنا منها فى الاخر
انا اقصد بالتحديد القواعد اللى بتحكم علاقتنا بالآخرين.. زي بنات كتير انا كنت منهم لما بنقول
انا لايمكن احب واحد اقصر مني, مستحيل اوافق على حد اصغر مني, وحاجات كتير من دي
المشكلة ان احنا بنحط مقاييس مستحيلة ونقعد ندور عليها طول عمرنا ولما العمر يجرى بنحس ان احنا كنا بنضحك على نفسنا
وانا بعترف اني غلطت فى حق نفسى وفرطت فى حقها كتيرلكن النهاردة بتأسفلها وبوعدها إنى هعوضها وهعمل اللى يريحها, كفاية كبت بقى وقهر ما كفاية علينا الدنيا واللى بتعملة فينا, مش هنبقى احنا والدنيا على نفسنا
وبما ان السنة الجديدة جاية اتمنى فيها شوية خير وشوية سعادة ليا وللى بحبهم ولكل انسان طيب
اختى بتقوللى ان سنة 2000 دخلت هى والالفية برجلهم الشمال يارب 2009 تدخل برجلها اليمين بقى
اتمنى ان كلكوا امنيكو تتحقق وكل حد وحيد يلاقى اللى يونسة ويفهمة
أتمنى ان أنا وأسرتى حالنا يتصلح وربنا يهدينا ويسعدنا ويرزق الطيبين والطيبات بالأزواج والزوجات الصالحين
ويهدى كل الأزواج والزوجات اللى مش سعداء قوى
يارب فتح عنينا للخير وابعدنا عن الشر وازرع فى قلوبنا الرحمة من تانى
يارب ساعد كل مظلوم فى الأرض
يارب.. يارب.. يارب خرجنا من الدنيا بقلب صافى سعيد زى مادخلنا فيها

الاثنين، 29 ديسمبر 2008

قصة الصورة

تخيلوا ان البنت البريئة دى بتستفزنى لأقصى درجة ويمكن اكون بحسدها كمان
اوعوا حد يفكر ان عينى مدورة وللا حاجة لأزعل منكوا
هى بتستفزنى علشان لاقية حد يحضنها ويحتوهيا وهى بتعيط
ساعات بنلاقى ناس كتير حوالينا لكن مش لاقيين كتف نحط راسنا عليه علشان نرتاح
وساعات بنلاقى اهلنا حوالينا لكن برضة بنحس باليتم الشديد
ياترى كام واحد فيكم حس بالاحساس دة؟

الأحد، 28 ديسمبر 2008

يا أهلا وسهلا بيكم عندي

عايزة اشكر كل اللى هيشرفنى ويقرا موضوعاتى أو يتكرم ويحط تعليق
بكل صراحة كدة انا عاملة المدونة دى علشان انا مخنووووووقة على الاخر من الدنيا ومن أهلى ومن نفسي قبلهم, وزي كتيييير من المدونين بكتب هنا علشان مش لاقية حد يسمعنى حواليا (تحذير لكل اللى ودنة بتوجعة بلاش يدخل يا جماعة), وكمان انا كلها يومين ويبقى عدي ربع قرن بالتمام والكمال على وجودى فى الدنيا, متقلقوش هحط نعي أول ما عيد ميلادى ييجى.
انا بقى مضطرة استأذن علشان ألملم شتات أفكاري أصل بعيد عنكم اكتئاب فترة عيد الميلاد بدأ يهل عليا
إهىء إهىء إهىء ..عااااااااااااااااااااااااااااااااا مش عايزة ابقى 25 سنة, دة انا قلبى وعقلى لسة يادوب مكملين 11 سنة