الثلاثاء، 30 ديسمبر، 2008

سنة جديدة سعيدة عليكم وعلينا

خلاص.. كلها كام ساعة ويبقى عندى 25 سنة
فأفكارى هتبقى ملخبطة ومش منظمة.. معلش بقى استحملونى مليش ودن تانية تسمعنى
مش عارفة ليه كل ما الواحد يعيط الناس تقولة ان الدموع غالية قوى, طب الواحد لما يحس ان قلبة بيتعصر ومش قادر يتنفس يعمل إيه؟
أنا فعلا النهاردة مخنوقة قوى وكان نفسى حد قريب مني يكون موجود معايا دلوقتى
هو احنا ليه بنقعد نحط لنفسنا قواعد ونلاقي نفسنا اتخنقنا منها فى الاخر
انا اقصد بالتحديد القواعد اللى بتحكم علاقتنا بالآخرين.. زي بنات كتير انا كنت منهم لما بنقول
انا لايمكن احب واحد اقصر مني, مستحيل اوافق على حد اصغر مني, وحاجات كتير من دي
المشكلة ان احنا بنحط مقاييس مستحيلة ونقعد ندور عليها طول عمرنا ولما العمر يجرى بنحس ان احنا كنا بنضحك على نفسنا
وانا بعترف اني غلطت فى حق نفسى وفرطت فى حقها كتيرلكن النهاردة بتأسفلها وبوعدها إنى هعوضها وهعمل اللى يريحها, كفاية كبت بقى وقهر ما كفاية علينا الدنيا واللى بتعملة فينا, مش هنبقى احنا والدنيا على نفسنا
وبما ان السنة الجديدة جاية اتمنى فيها شوية خير وشوية سعادة ليا وللى بحبهم ولكل انسان طيب
اختى بتقوللى ان سنة 2000 دخلت هى والالفية برجلهم الشمال يارب 2009 تدخل برجلها اليمين بقى
اتمنى ان كلكوا امنيكو تتحقق وكل حد وحيد يلاقى اللى يونسة ويفهمة
أتمنى ان أنا وأسرتى حالنا يتصلح وربنا يهدينا ويسعدنا ويرزق الطيبين والطيبات بالأزواج والزوجات الصالحين
ويهدى كل الأزواج والزوجات اللى مش سعداء قوى
يارب فتح عنينا للخير وابعدنا عن الشر وازرع فى قلوبنا الرحمة من تانى
يارب ساعد كل مظلوم فى الأرض
يارب.. يارب.. يارب خرجنا من الدنيا بقلب صافى سعيد زى مادخلنا فيها

5 اللي عبروا منوووشة:

مش من هنا.... يقول...

اللهم امين
يارب السنة الجاية تكون امة محمد فاقت بقى

Ahmed Mubarak يقول...

كل سنه وانتي طيبه
هيا فعلا دخلت برجلها الشمال من اول احداث غزه .. بس فعلا مفيش حاجة اسمها "فات الوقت" .. واحنا بايدنا نصلح وبايدنا كمان منستناش الخير يجي ونحاول نروح له..

تحياتي .. وكل سنه وانتي طيبه

MaNoOoSh يقول...

مش من هنا

يارب...
مش كبيرة على ربنا.. وانا بردو مش هفقد الامل
اشكرك على زيارة المدونة ونورتيها.



Ahmed Mubarak
ان شاء الله الحال يتعدل وربنا هينصر اهل غزة, وحقيقى الواحد لو قعد يستنى الخيير ممكن يقضى عمرة وهو قاعد يستنى, احنا فعلا لازم احنا اللى ندور على سعادتنا ولو لقينا الخير نروحلة.

الجواز و سنينه يقول...

كل سنه و انتى طيبه يا قمر
و ربنا يارب يحققك كل اللى تتمنيه ان شاء الله
و تكون سنه سعيده عليكى

MaNoOoSh يقول...

الجواز و سنينه
يارب يحقق لكل الناس السعادة, وانتى نورتى مدونتى.