الاثنين، 30 مايو 2011

يوم الأربعاء 1/ 6 يوم التدوين ضد المحاكمات العسكرية

بمناسبة الخبر النهاردة عن استدعاء ريم ماجد وحسام الحملاوي ونبيل شرف الدين للقضاء العسكري بسبب انتقاد حسام الحملاوي للواء حمدي بدين.. وكلام نبيل شرف الدين عن تحالف ما بين العسكر والاخوان.. والحقيقة مش عارفة تهمة ريم ايه بالظبط
يسرني أن اعلن عن حملة
وفيه دعوات تانية للتدوين بالفيديو لانتقاد المجلس العسكري
كل واحد يحضر عدته
موبايلك قصادك
لخص كلمتين من تدوينتك
ودوس على زرار تسجيل

الاثنين، 23 مايو 2011

حكم العسكر.. كلاكيت رابع مرة

علشان اتكلم عن المجلس العسكري (اللي بيدي أوامر للجنود والظباط)

لازم ابدأ من يوم 2 فبراير

كان فين واحنا عمالين نتدبح في الميدان.. هه؟؟؟ انا واحدة من الناس اللي كنت بضحك على نفسي واقول لا دول اكيد سايبينا نتقتل علشان تبقى حجة ويقدرو يقبضو على مبارك بتهمة قتلنا (اظن مفيش عبط اكتر من كدا).

وخلاص استشهد منا يومها اللى استشهد (في رحمة ربنا) وفضل اللي عايش كل ما يسمع كلمة المجلس العسكري بيحس بمرارة.. رغم انه بيقعد يهتف الجيش والشعب ايد واحدة.

خلاص مبارك اتخلى وسلم للمجلس العسكري سلطتة.. ومع انه وجودهم بالشكل ده ولا له شرعية دستورية.. ولا له شرعية ثورية.. وبردو طنشنا (قلنا نجاملهم اهم خلو زفت الطين يغور)..وحطيناهم على دماغنا وفضلنا نقول الجيش والشعب ايد واحدة.. لحد ما ايدهم انتفخت ومبقتش تنزل غير على قفانا

نيجي بقى لأول احتكاك بالجيش.. بعد ما الاعلام كله نام والثورة نجحت والف مبروك والملبن اللى كانو معيشينا فيه.. يوم ما شوية معتصمين قليلين قررو يعتصمو قدام مجلس الشعب وشوية تانيين في الميدان.. أنوار المنطقتين اتطفت تماما.. طبعا علشان أي تصوير ميبانش.. يومها البنات قبل الولاد اتسحلو وانضربو بالشلاليت ببيادات عسكر مصر (اللي المفروض يحموني من العدو في الحرب.. بيدوني على دماغي وفي بطني بالجزمة).. وبردو مصدقناش الناس اللي كانو هناك.. ومش الشرطة العسكرية بس اللى ضربتهم.. دي بيادات كل الرتب داست على دماغهم وكل حتة فى جسمهم بنات قبل الشباب

وبدأ بعدها مشوار سلخانة المتحف المصري.. لو نفتكر يوم 9 مارس.. أي ناشط يتقبط عليه يدخلوه عالمتحف (شغل على تقيل بقى ولا أمن دولة ولا يحزنون).. حتى البنات اللى اتقبض عليهم عملولهم كشف عذرية..ليه؟؟ وبأمارة ايه؟؟.. طب افتكرو رامي عصام وعلي صبحي وعمرو البحيري وحتى الصحفيين والصحفيات اللى كانو شهود.. منهم ستات بميت راجل.

لحد مجزرة 8 ابريل اللي الدم فيها غرق الميدان تاني.. دم على ماهر وظباط مهما اختلفت على موقفهم مقدرش انكر ان لولاهم مكنش طلع قرار (حتى ولو تمثيل) بحبس مبارك وعياله 15 يوم.. فاكرين يومها المجلس لما طلع بيان قال انه مضربش نار وان ابراهيم كامل هو السبب وبعد اكتر من شهر خد براءة؟؟؟

طب فاكرين كلام سيادة اللوا عتمان؟؟؟

وفضلنا بردو نكدب نفسنا

والثوار فضلو يتظاهرو ويقبض عليهم ويتظاهرو ويتقبض عليهم.. لحد ما السجون بقى فيها 10.000 شاب مصري.. دي محصلتش ايام مبارك الزفت يا مجلسنا الموقر

وفضلنا بردو نكدب نفسنا ونقول خط احمر وخط ازرق على عنيهم وخط الدفاع الاخير.. وسوزي تطلع ومبارك يعيط علشان ميتسجنش وعلاء وجمال مكتئبين ومنعزلين (انا عاوزة دليل واااااااااحد ان حد فيهم في مصر أصلا؟؟).. وكل اللي بيتحاكم الوقتي وبيتحقق معاه بتهم الكسب غير المشروع

طب وتهم الخيانة العظمى يا مجلسنا الموقر؟؟؟؟ وقتل الشعب المصري وسرطنته؟؟؟ وتفقيرة وتجهيله وتجويعه؟؟؟ وتقسيم السودان؟؟؟ ومية النيل اللي باعوها ولاد الكلب؟؟؟ كل ده فين حقوق المصريين فيه؟؟؟

هو انت يا مجلس فاكرنا عاوزين كام مليار نبيع بيهم شرفنا وكرامتنا؟؟؟؟ لا على فكرة مش هنبيعهم؟؟؟ احنا استنينا شورتكو وقوانينكو كتير.. والقادم هو محاكم الثورة لا محالة.. من الخونة للشعب بقى علطول

طب يا مجلسنا عملت ايه فى حكمك للبلد؟؟ 56 بيان ورسالة بتضرب فيهم بيد من حديد؟؟ هي الايد الحديد دي بتنزل على قفا مين غير الثوار والنشطاء؟؟؟ سايب يا مجلسنا الفتنة فى امبابة 5 ساعااااااااااات مات فيهم اللى مات واتصاب اللى اتصاب... ويوم ما شوية عيال سن 19 سنة راحو يتظاهرو قدام السفارة ويطالب وان علم الصهاينة ينزل تضربو عليهم نار في ثانية؟؟؟

مين اللي ليه سلطة رئيس الجمهورية وعين يحيى الجمل وسايبه لحد الوقتي يا مجلسنا؟؟ مين اللى عين محافظين لواءات أمن دولة وحزب وطني؟؟؟ مين اللي اختار الوزراء؟؟؟ مين اللى خد قرار باستناف تصدير الغاز للصهاينة قبل ما الانبوبة تتفجر تاني؟؟؟ مين اللي سايب التجار يلعبو في مصر من سولار لرز لقمح؟؟؟ مين اللى سايب ظباط الداخلية يتمرقعو وياخدو مرتبات على مرقعتهم (الا من رحم ربي)؟؟؟

مين يا مجلسنا الموقر اللى انتهك الحرم الجامعي وراح سحل طلبة ودكاترة إعلام السلميين؟؟؟ مين اللي سايب رؤساء الجامعات وعمداء الكليات لحد الوقتي؟؟؟ مين اللي شال السباعي وحط مكانه دراعه اليمين؟؟؟

مين اللي بيبيع الضمير ويشتري بيه الدمار؟

102 يوم واحنا بنمهل.. ومش لاقيين غير رصاص ودمار واعتقالات للثوار.. اما اللى فضلو يغتصبو مصر 30 سنة متواصل قاعدين في شرم الشيخ في مستشفى 7 نجوم (ده لو كانو هناك اصلا يعني).

وعلى فكرة شبابنا حرقتهم الشمس في الميدان وجسمهم اتملى عاهات ايام ما كنتو سايبين البلطجية يضربوهم بكل انواع الاسلحة (وانتو مستخبيين فى الدبابات والمدرعات.. والشريف منكو بيبكي علشان مخدش أوامر يحمينا).. شبابنا دول مش بلطجية على فكرة يا مجلسنا الموقر

وبمناسبة البلطجية.. مئات البلطجية اللى شبابنا فضلو يسلمهولكم لمدة 18 يوم راحو فين؟؟ اصل سبحان الله كنا بنسلمهولكم من هنا ونرجع نلاقي نفس الوشوش تيجي تضربنا تاني

انا زهقت

ونازلة يوم 27 مايو اطالب انكو ترجعو ثكناتكو..واللى هيقولي ان المطالبة بمجلس رئاسي تعدي على قرار الاغلبية ياريت يقولى الاول هو المجلس احترم قرار الاغلبية دول لما عمل اعلان دستوري من 60 مادة بعد ما استفتانا على 6 مواد بس؟؟؟

طب هل المجلس احترم ارادة الشعب في أي حاجة من الكلام اللي فات من تصدير الغاز للصهاينة لترك فتنة طائفية لضربنا بالنار

بص يا مجلسنا الموقر..اخر كلام واقف فى زوري..

ان الشرعية الآن هي الشرعية الثورية.. والشرعية للشعب فقط لا غير.. والشعب المصري العظيم أذا أمر فما عليكم غير الطاعة.. والشعب المصري الآن يأمركم بالعودة لثكناتكم والقيام بدوركم فى حماية الوطن والمواطنين في صمت.. بعيدا عن إدارة شئون البلاد

حفاظا على هيبتكم خارجيا وداخليا..

شفتو بقى احنا خايفين عليكو ازاي؟؟ يللا بقى اتوكلو على الله وللخلف در وعلى ثكاتكو يا مجلسنا الموقر

والله الموفق والمستعان

مواطنة مصرية مش بتخاف غير من اللى خلقها

منوووش

السبت، 21 مايو 2011

الإنذار الأخير من الشعب المصري

الإنذار الأخير من الشعب المصري
بصو بقى.. مبدايا كده علشان الثورة دي تنجح المرة دي لازم نتعلم حاجتين
اول حاجة.. اننا منعملش صنم نقعد نعبد فيه ونديه سلطات إلهية وبعدين نقول محدش يقربلة ولا ينتقده
أي حد في السلطة ولا هو فوق الشعب ولا هو فوق القانون.. ومبدأيا كده.. الشعب فوق الجميع والشعب هو مصدر السلطة
تاني حاجة.. احنا عندنا مخ نفكر بيه في مطالبنا وحقوقنا ونعقل ونوزن بيه اللي بيحصل حوالينا.. ومش محتاجين ولا نخبة ولا تحالفات سياسية نمشي وراها.. وبعدين نرجع نلومها ونخونها في الاخر لو بعدت عن طلباتنا واهدافنا وطموحاتنا.. احنا لسة بنتنفس وصوتنا موجود وايدينا موجودة ونعرف ناخد حقوقنا من فم الأسد
المطالب معروفة وكلنا مش مختلفين عليها
أما بقى مطلب المجلس الرئاسي المدني وتنحية المجلس العسكري
فحنا لما قلنا نعم فى الاستفتاء قلنا نعم ل9 مواد مقلناش نعم لل60 مادة ولا للمجلس العسكري على فكرة
قام المجلس العسكري تجاوز ارادة الشعب ونزل اعلان دستوري فيه اكتر من 60 مادة.. وحط لنفسه فيهم سلطات تفوق سلطات رئيس الجمهورية
وقعد يلعب بينا الكورة من قانون احزاب لمباشرة حقوق سياسية لتاجيل انتخابات لتعيين لجنة لوضع دستور..قوم احنا يعني نقول الناس اللى عايزة مجلس رئاسي بتعارض ارادة الشعب... امال اللى المجلس العسكري بيعملو ده اسمو ايه؟؟؟؟؟
ناهيك بقى عن كل شوية الذل بتاع احمدو ربنا ان معملناش فيكو زي ليبيا وسوريا.. وكأنهم بيمنو علينا
ونغمة محدش ينتقد المجلس والكلام ده.. احنا على فكرة مشيلناش مبارك علشان يجيلنا 20 مبارك غيره
وللا بقى نبرة الاقتصاد وهنفلس والثورة بوظت الاقتصاد وهنشحت وهتحصل مجاعة ومفيش سولار ومفيش رز ومفيش قمح.. وبعدين لما تلاقو الناس فاهمة ومبيتضحكش عليها تسحبو كلامكو زي الاسفنجة ما بتسحب المية
وللا كله كوم وانكو تسيبو مسلمين ومسيحيين يتقتلو قدام كنايس وللا تحت ايد البلطجية وانتو عاملين فيها طرش بالخمس ساعات.. وتيجو ترفعو سلاحكو وتهينو الثوار وتركعوهم على ركبهم علشان تحمو الكيان الصهيوني
لا على فكرة.. ما عاش ولا كان اللي يخلي المصري يركع على ركبه تاني حتى لو كان لوا جيش.. حتى لو كان فريق وللا مشير
مش هنركع غير للي خلقنا.. علشان احنا منزلناش نتسحل ونموت ودمنا يروي أرض مصر علشان نركع لأي مخلوق تاني
واوعو تفكرو اننا مش شايفين ان الانعدام الأمني والازمة الاقتصادية كل ده لوي دراع.. عايزين تخلو الناس البسيطة تتقلب على الثورة والثوار.. طب ايه رأيكو ان الناس البسيطة دي كده كده مطحونة.. ومحيلتهاش في الدنيا غير شوية كرامة كانت مدفونة وظهرت بعد الثورة
فكروا كويس قبل ما تتخيلو انهم ممكن يفرطو في الكرامة دي
وعلي فكرة.. الشرعية هي شرعية الثورة والشعب مش شرعية المجلس.. يعني انتو تاخدو أوامركو من الشعب مش تأمروه.. يعني تحترمو الثوار.. يعني متحاكموش آلافات منهم محاكمات عسكرية.. يعني لما الشعب يقول قرار تجرو زي الشطار تجيبو خبراء يدرسو القرار ده ولو قابل للتنفيذ تنفذوه وانتو بتقولو تمام يا فندم.. ده طول منتو بتحكمو
مش عاجبكو الشعب بقى.. قدامكو حل من الاتنين
ياتشوفو شعب تاني تحكموه تعرفو تذلوه وتهينو كرامته
يا ترجعو ثكناتكو فورا بدون لف ودوران ولا لت وعجن كتير حفاظا على هيبتكو العسكرية.. وحفاظا على صورة ظابط الجيش في عقلنا.. وللا انتو مصممين انكو تبقو متفرقوش عندنا عن ظباط أمن الدولة
والله انتو في السلطة ومتصورين ان القرار في ايديكم
بس انا بقولكم ان القرار في ايد الشعب
اصل الشعب هياخد حقه بالذوق أو بالعافية
ولو وصلتوها لصدام هتبقو انتو الخسرانين هيبتكو
والمسكنات خلاص معدتش هتحوء
اما الناس اللي تعبانة وزهقانة.. ده مش وقت تعب وللا زهق.. ولا وقت فرجة.. ده وقت مطالبة بحقوق الشعب ومستقبل مصر الصح.. انزل مع الناس قول كلمتك يوم الجمعة الجاية 27 مايو.. متستناش حد يجيبلك حقك.. متستناش حد ياخد قرار بالنيابة عنك
افتكر دايما ان نص ثورة يعني مقبرة للشعوب.. افتكر ان مبارك متسجنش ولا اتحاكم على اوامره بقتل الناس.. ولا خيانته لمصر.. افتكر ان اللى أفسدو مصر عمالين ياخدو افراج وبراءة.. افتكر ان اللى قتلو الثوار هم كمان عمالين ياخدو براءة وتأجيلات.. افتكر المصابين اللى فقدو كتير قوي من صحتهم وانت ربنا لسة كارمك بالصحة
انزل قول الحق
لسة فيكي رجالة يامصر.. أشجع رجالة في الدنيا
لسة فيكي بنات يا مصر.. أجدع بنات في الدنيا
مش هيسيبو كرامتك ولا هيخلو ضهرك ينحني تاني
وعلى فكرة
مستنيينك في الميدان الجمعة 27 مايو يا د عصام شرف بناء على كلمتك
اكيد فاكرها
منوووش

الأربعاء، 18 مايو 2011

تعقيبا على بيان المجلس

واضح انى هبدأ بدري شوية عن يوم 23 مايو
ده مجرد تعقيب على البيان
انما ليه يسقط يسقط حكم العسكر هتكون ان شاء الله 23 مايو
والحقيقة دايما بتوجع وأحيانا بتكون مخفية وسط أكوام من قنوات وصحف فاسدة بتخضع لإرادة الموجود في السلطة واللي عاوز مسكنات مش هيلاقيها في المدونة دي
وتعقيبا على بيان المجلس
نهيب بمجلسنا العسكري الموقر
أولا..احنا مش عاوزين مجرد "تواصل" عبارة عن بيانات
----------------------------------------
-----------------------
لا احنا عاوزين اللى في السلطة يسمع آرائنا ويدرسها واللى يوافق عليه الخبراء يتنفذ
وبمناسبة آراءنا من 3 شهور اتقدملكم اقتراحات كتير لعودة الأمن للشارع
منها خريجين حقوق وتدريبهم ومنها عقاب الظباط اللي مش هتنزل عملها وقطع مرتب اللي يرفض تأدية عمله
ولا حياة لمن ينادي
والبلد لسة مولعة نار شوية يتهمو السلفيين وشوية يتهمو المسيحيين وشوية يتهمو الفلول وشوية يتهمو البلطجية
كفاية بقينا عاوزين تحقيقات وعدل مش جلسات صلح وطبطبة
ثانيا.. احنا مش عبط على فكرة
-------------------------------------
وعايزين اللي يقولنا في بيان انه غير مسئول عما ينشر في الصحف عن لسان أعضاؤه ميكونش طلع قرار قبل كده بمنع نشر أي أخبار أو صور او موضوعات أو تصريحات أو شكاوى تخص الجيش الا بعد الرجوع لأدارة الشئون المعنوية وإدارة المخابرات الحربية
ثالثا.. الحفاظ على أمن الوطن والمواطنين
----------------------------------------
----------
احنا عارفين كويس انها مسئولية حضراتكم اللى أقسمتم عليها ومسئولية الداخلية كمان
فبلاش بقى كل شوية نبرة الاستثمار بقى صفر والثورة بوظت الاقتصاد
مع ان وزارة المالية بتزود ميزانية التليفزيون مليار جنيه
بس مش لاقية تعمل توازن في الاجور وتنفذ الحد الادنى للأجور؟؟؟
يعني ازاي لحد الوقتي ممكن واحد في مؤسسة ما ياخد مرتبه بحوافزه بسلطاته ببابا غنوجه ملايين..وواحد تاني في نفس المؤسسة مرتبه مبيكملش 1000 جنيه؟؟؟؟
طيب الحاكم والحكومة معا اللى لا بيحققو أمن (اللى من غيره مفيش استثمار أصلا.. ولا سياحة ولا حتى شغل)... ولا عندهم رؤية اقتصادية واضحة تلغي الفوارق الرهيبة بين المرتبات وتدرس ميزانيات تحقق مردود في الانتاج (يعني تحط المليار في مرتبات او زراعة او صناعة مش تحطها للتليفزيون)ا
هم دول لو مش بيحاولو يوئدو الثورة..يبقو على الاقل فاشلين في تنفيذ اهدافها وحمايتها زي ما بيقولو؟؟؟؟؟؟؟؟؟؟؟؟؟؟؟؟؟
وللا انا غلطان؟
بصو بقى
الشعب المصري مش أهبل
الشعب صحيح مليان أمراض
صحية وأخلاقية
أمية وفقر ومرض
بس متنسوش ان 60 سنة قهر علمتو النصاحة
يعني متفكروش اننا علشان فقرا وأميين ومرضانين اننا بقى جهلة وهنقبل ناخد على قفانا تاني وتنداس كرامتنا تاني
ياريت يا مجلسنا الموقر ويا حكومتنا الموقرة تتذكرو دايما
الشعب المصري العظيم.. الشعب المصري ميموتش.. والمجد للشهداء.. الشعب المصري هياخد حقه
بالذوق هياخد حقه
بدراعه هياخدحقه
الشعب كان قاعد مستني القانون والعدل
بس زكريا عزمي افراج بكفالة (علشان مريض وكبير في السن)ا
وسوزان دفعت عشرين مليون وافرج عنها بدون كفالة (يعني بدوان إدانة).. يعني مفيش فلوس ليها برة هترجع زي ما قال دكتور حسام عيسى ليسري فودة
ومبارك كان هيعتذر بس طلع "لم يكن ينتوي" الاعتذار أصلا يعني
ما اسخم من سيدي الا ستي
وكل يوم بلوة جديدة
متوصلوش الشعب لدرجة ينزل ياخد حقه بإيده انتقاما لكرامته وحقوقه
والله الموفق والمستعان
منوووووووووووووووووووووووووش

الثلاثاء، 17 مايو 2011

دعوة

عارفة
انا ندلة
وبقالي شهور مظهرتش
ومش بزور حد
وناس كتير زعلانة مني اكيد
بس أول تدوينة ليا ان شاء الله هتكون يوم 23 مايو وهتكون ضد العسكر
انا راشقة على طويطر