الاثنين، 23 مايو 2011

حكم العسكر.. كلاكيت رابع مرة

علشان اتكلم عن المجلس العسكري (اللي بيدي أوامر للجنود والظباط)

لازم ابدأ من يوم 2 فبراير

كان فين واحنا عمالين نتدبح في الميدان.. هه؟؟؟ انا واحدة من الناس اللي كنت بضحك على نفسي واقول لا دول اكيد سايبينا نتقتل علشان تبقى حجة ويقدرو يقبضو على مبارك بتهمة قتلنا (اظن مفيش عبط اكتر من كدا).

وخلاص استشهد منا يومها اللى استشهد (في رحمة ربنا) وفضل اللي عايش كل ما يسمع كلمة المجلس العسكري بيحس بمرارة.. رغم انه بيقعد يهتف الجيش والشعب ايد واحدة.

خلاص مبارك اتخلى وسلم للمجلس العسكري سلطتة.. ومع انه وجودهم بالشكل ده ولا له شرعية دستورية.. ولا له شرعية ثورية.. وبردو طنشنا (قلنا نجاملهم اهم خلو زفت الطين يغور)..وحطيناهم على دماغنا وفضلنا نقول الجيش والشعب ايد واحدة.. لحد ما ايدهم انتفخت ومبقتش تنزل غير على قفانا

نيجي بقى لأول احتكاك بالجيش.. بعد ما الاعلام كله نام والثورة نجحت والف مبروك والملبن اللى كانو معيشينا فيه.. يوم ما شوية معتصمين قليلين قررو يعتصمو قدام مجلس الشعب وشوية تانيين في الميدان.. أنوار المنطقتين اتطفت تماما.. طبعا علشان أي تصوير ميبانش.. يومها البنات قبل الولاد اتسحلو وانضربو بالشلاليت ببيادات عسكر مصر (اللي المفروض يحموني من العدو في الحرب.. بيدوني على دماغي وفي بطني بالجزمة).. وبردو مصدقناش الناس اللي كانو هناك.. ومش الشرطة العسكرية بس اللى ضربتهم.. دي بيادات كل الرتب داست على دماغهم وكل حتة فى جسمهم بنات قبل الشباب

وبدأ بعدها مشوار سلخانة المتحف المصري.. لو نفتكر يوم 9 مارس.. أي ناشط يتقبط عليه يدخلوه عالمتحف (شغل على تقيل بقى ولا أمن دولة ولا يحزنون).. حتى البنات اللى اتقبض عليهم عملولهم كشف عذرية..ليه؟؟ وبأمارة ايه؟؟.. طب افتكرو رامي عصام وعلي صبحي وعمرو البحيري وحتى الصحفيين والصحفيات اللى كانو شهود.. منهم ستات بميت راجل.

لحد مجزرة 8 ابريل اللي الدم فيها غرق الميدان تاني.. دم على ماهر وظباط مهما اختلفت على موقفهم مقدرش انكر ان لولاهم مكنش طلع قرار (حتى ولو تمثيل) بحبس مبارك وعياله 15 يوم.. فاكرين يومها المجلس لما طلع بيان قال انه مضربش نار وان ابراهيم كامل هو السبب وبعد اكتر من شهر خد براءة؟؟؟

طب فاكرين كلام سيادة اللوا عتمان؟؟؟

وفضلنا بردو نكدب نفسنا

والثوار فضلو يتظاهرو ويقبض عليهم ويتظاهرو ويتقبض عليهم.. لحد ما السجون بقى فيها 10.000 شاب مصري.. دي محصلتش ايام مبارك الزفت يا مجلسنا الموقر

وفضلنا بردو نكدب نفسنا ونقول خط احمر وخط ازرق على عنيهم وخط الدفاع الاخير.. وسوزي تطلع ومبارك يعيط علشان ميتسجنش وعلاء وجمال مكتئبين ومنعزلين (انا عاوزة دليل واااااااااحد ان حد فيهم في مصر أصلا؟؟).. وكل اللي بيتحاكم الوقتي وبيتحقق معاه بتهم الكسب غير المشروع

طب وتهم الخيانة العظمى يا مجلسنا الموقر؟؟؟؟ وقتل الشعب المصري وسرطنته؟؟؟ وتفقيرة وتجهيله وتجويعه؟؟؟ وتقسيم السودان؟؟؟ ومية النيل اللي باعوها ولاد الكلب؟؟؟ كل ده فين حقوق المصريين فيه؟؟؟

هو انت يا مجلس فاكرنا عاوزين كام مليار نبيع بيهم شرفنا وكرامتنا؟؟؟؟ لا على فكرة مش هنبيعهم؟؟؟ احنا استنينا شورتكو وقوانينكو كتير.. والقادم هو محاكم الثورة لا محالة.. من الخونة للشعب بقى علطول

طب يا مجلسنا عملت ايه فى حكمك للبلد؟؟ 56 بيان ورسالة بتضرب فيهم بيد من حديد؟؟ هي الايد الحديد دي بتنزل على قفا مين غير الثوار والنشطاء؟؟؟ سايب يا مجلسنا الفتنة فى امبابة 5 ساعااااااااااات مات فيهم اللى مات واتصاب اللى اتصاب... ويوم ما شوية عيال سن 19 سنة راحو يتظاهرو قدام السفارة ويطالب وان علم الصهاينة ينزل تضربو عليهم نار في ثانية؟؟؟

مين اللي ليه سلطة رئيس الجمهورية وعين يحيى الجمل وسايبه لحد الوقتي يا مجلسنا؟؟ مين اللى عين محافظين لواءات أمن دولة وحزب وطني؟؟؟ مين اللي اختار الوزراء؟؟؟ مين اللى خد قرار باستناف تصدير الغاز للصهاينة قبل ما الانبوبة تتفجر تاني؟؟؟ مين اللي سايب التجار يلعبو في مصر من سولار لرز لقمح؟؟؟ مين اللى سايب ظباط الداخلية يتمرقعو وياخدو مرتبات على مرقعتهم (الا من رحم ربي)؟؟؟

مين يا مجلسنا الموقر اللى انتهك الحرم الجامعي وراح سحل طلبة ودكاترة إعلام السلميين؟؟؟ مين اللي سايب رؤساء الجامعات وعمداء الكليات لحد الوقتي؟؟؟ مين اللي شال السباعي وحط مكانه دراعه اليمين؟؟؟

مين اللي بيبيع الضمير ويشتري بيه الدمار؟

102 يوم واحنا بنمهل.. ومش لاقيين غير رصاص ودمار واعتقالات للثوار.. اما اللى فضلو يغتصبو مصر 30 سنة متواصل قاعدين في شرم الشيخ في مستشفى 7 نجوم (ده لو كانو هناك اصلا يعني).

وعلى فكرة شبابنا حرقتهم الشمس في الميدان وجسمهم اتملى عاهات ايام ما كنتو سايبين البلطجية يضربوهم بكل انواع الاسلحة (وانتو مستخبيين فى الدبابات والمدرعات.. والشريف منكو بيبكي علشان مخدش أوامر يحمينا).. شبابنا دول مش بلطجية على فكرة يا مجلسنا الموقر

وبمناسبة البلطجية.. مئات البلطجية اللى شبابنا فضلو يسلمهولكم لمدة 18 يوم راحو فين؟؟ اصل سبحان الله كنا بنسلمهولكم من هنا ونرجع نلاقي نفس الوشوش تيجي تضربنا تاني

انا زهقت

ونازلة يوم 27 مايو اطالب انكو ترجعو ثكناتكو..واللى هيقولي ان المطالبة بمجلس رئاسي تعدي على قرار الاغلبية ياريت يقولى الاول هو المجلس احترم قرار الاغلبية دول لما عمل اعلان دستوري من 60 مادة بعد ما استفتانا على 6 مواد بس؟؟؟

طب هل المجلس احترم ارادة الشعب في أي حاجة من الكلام اللي فات من تصدير الغاز للصهاينة لترك فتنة طائفية لضربنا بالنار

بص يا مجلسنا الموقر..اخر كلام واقف فى زوري..

ان الشرعية الآن هي الشرعية الثورية.. والشرعية للشعب فقط لا غير.. والشعب المصري العظيم أذا أمر فما عليكم غير الطاعة.. والشعب المصري الآن يأمركم بالعودة لثكناتكم والقيام بدوركم فى حماية الوطن والمواطنين في صمت.. بعيدا عن إدارة شئون البلاد

حفاظا على هيبتكم خارجيا وداخليا..

شفتو بقى احنا خايفين عليكو ازاي؟؟ يللا بقى اتوكلو على الله وللخلف در وعلى ثكاتكو يا مجلسنا الموقر

والله الموفق والمستعان

مواطنة مصرية مش بتخاف غير من اللى خلقها

منوووش

15 اللي عبروا منوووشة:

AbdelKhaleq El Bassiouny يقول...

مين اللى بيبيع الضمير ويشترى بيه الدمار ، تسلم أيدك

dodda15 يقول...

جامدة جامدة جامدة و كل كلمة مضبوطة و في محلها
تسلم الأيادي
بس ازاي ننشرها عشان توصل لأكبر عدد "مش عارفة انشرها على الfacebook مثلا"

MaNoOoSh يقول...

لسة ضايفة الامكانية دي حالا على الشريط الجانبي في المدونة

شهبندر التجار يقول...

الله عليكى يا منوووش هو ده الكلام ... بناتنا فعلا بميت راجل .. و الثوار راجعين يوم 27

dodda15 يقول...

شكرًا شكرًا
هانشرها على طول و ربنا يجعله بفايده على اللي قافل عنيه و ودانه بقى

Unknown يقول...

تفتكروا لما نعمل صفحه كلنا منوش المخنوقه نعملها على البلوج هنا ولا نعملها على الفيسبووك
بصى يا بنتى انتى ميه ميه المشكله بقى اننا نحاول نلحقك قبل ماتبقى الشهيده

Tears يقول...

ممتازة و بالف راجل

حلم بيعافر يقول...

وانا اللى فقدت الامل فى رجوعك ترجعى من ورايا؟....

مهندس مصري بيحب مصر يقول...

الله ينور

تامر علي يقول...

أنا مقتنع ان المجلس العسكري صعب جداً بعد ما داق السلطه يسبها تاني وهيحاول يلاقي الف سبب وعذر علشان يكون وجوده شرعي ,,, عموماً احنا نازلين التحرير وربنا يستر :)

غير معرف يقول...

حكم العسكر ..... وعسكره الحكم

غير معرف يقول...

نفسي يا اخت منوشة تبطلى ام الغباء والجهل الى جواكى وفكرة ان الشعب يريد والشعب بيقول وكان حضرتك واخدة توكيل من 85 مليون مصري
دة انتى مش ديكتاتورية دا انتى مستبدة طاغية مفيش فرق بينك انتى وشباب الثورة الطعم وبين مبارك والقذافي كلكم وجوة متعددة لنفس العملة
بس المشكلة ان مبارك كان حاكم البلد بقوة الشرطة والجيش والقانون الملاكى عشن كدة الشعب صبر واستحمل 30 سنة
لكن انتى وشوية الامامير الطعمين شباب الثورة الى اتعملهم مكتب في رئاسة الوزرا متملكوش لا شرطة ولا جيش ولا قانون بحذركو خدو بالكو من خنقة وثورة الشعب منكم عشن انا شايفها قربت اوى وساعتها الدمار للركب
افهمو بقي ان في ام 80 مليون بني ادم غيركو مطلبش حد منكو يتكلم باسمة
ومتقوليليش انكو اصحاب الثورة لان دى ثورة بلدنا وشعبنا وثورتنا كلنا
بس في شعرة بين حب الوطن وخيانة الوطن
ومن خلال متابعتي لمدونتك
اجزم انك مبتشوفيهاش مش بسبب نواياكي السيئة
لا
بسبب جهلك بالناس التانيين
عموما دة ايملي اتمنى انى اتخانق معاكى
ashk_masry@yahoo
والبقاء للاعقل

MaNoOoSh يقول...

غير معرف يقول...
نفسي يا اخت منوشة تبطلى ام الغباء والجهل الى جواكى وفكرة ان الشعب يريد والشعب بيقول وكان حضرتك واخدة توكيل من 85 مليون مصري
دة انتى مش ديكتاتورية دا انتى مستبدة طاغية مفيش فرق بينك انتى وشباب الثورة الطعم وبين مبارك والقذافي كلكم وجوة متعددة لنفس العملة
بس المشكلة ان مبارك كان حاكم البلد بقوة الشرطة والجيش والقانون الملاكى عشن كدة الشعب صبر واستحمل 30 سنة
لكن انتى وشوية الامامير الطعمين شباب الثورة الى اتعملهم مكتب في رئاسة الوزرا متملكوش لا شرطة ولا جيش ولا قانون بحذركو خدو بالكو من خنقة وثورة الشعب منكم عشن انا شايفها قربت اوى وساعتها الدمار للركب
افهمو بقي ان في ام 80 مليون بني ادم غيركو مطلبش حد منكو يتكلم باسمة
ومتقوليليش انكو اصحاب الثورة لان دى ثورة بلدنا وشعبنا وثورتنا كلنا
بس في شعرة بين حب الوطن وخيانة الوطن
ومن خلال متابعتي لمدونتك
اجزم انك مبتشوفيهاش مش بسبب نواياكي السيئة
لا
بسبب جهلك بالناس التانيين
عموما دة ايملي اتمنى انى اتخانق معاكى
ashk_masry@yahoo
والبقاء للاعقل
==================
==================

والله يا غير معرف مش فاهماك الحقيقة
لما انت شجاع قوي كده ما تورينا رأيك في مدونتك

وبعدين "الأدب" و"الاحترام" يقتضي عدم وصفك للآخرين بـ "ام" الغباء والجهل

وبعدين انا مبكلمش حد على ايميلات

المناقشة مفتوحة قدام الكل هنا في الردود
وبعدين ياريت "متجزمش" تاني ان صاحب المدونة بيتابعها وللا مبيتابعهاش

لما انت شجاع قوي كده ورينا ردودك في مدونة جناب حضرتك يا غير معرف

وعموما اسمك هو اكبر وصف ليك "غير معرف"

فوركس فيجين يقول...

فضلا ...
بتمنى ان نكون متفتحين اكثر من ذلك
http://www.4exvision.com

المتحدة لخدمات الانترنت يقول...

يااااااااارب نجى مصر واهلها من كل سوء
http://www.un4web.com