الخميس، 26 يوليو 2012

قلوب حمضانة





بعض الناس بيصورولك انهم قريبين منك
بيمثلو انهم اصحابك واخواتك واقرب قرايبك
بيضحكو فى وشك
يشكولك همهم
يطلبو مساعدتك علشان تحل سوء تفاهم بينك وبين احبابهم
وينسوك بعدها
المشكلة بقى لما تلاقى الناس دي بيقنعو احبابك يبعدو عنك

.......................


منتهى الأنانية

ورغم كدا الحياة بتمشي مبتقفش عندهم

الأربعاء، 18 يوليو 2012

علمني...

علمني...



ان الرجال مجرد بشر

..

وكيف أكون انثى

..

وكيف الشوق والوجع.

ملحوظة:(مفيش أأأأأي حاجة مقتبسة هنا خااااااااااالص على فكرة D: )

الثلاثاء، 17 يوليو 2012

توابع عبده أنزحة وتشفيدة زوفاش

حينما تتجسد الشيطنة وقلة الأصل نجد ((عبده انزحة وتشفيدة زوفاش هانم))
روح يا شيخ انت وهي الهي يارب يديكو على قد نيتكو
وانتو ادرى بنيتكو بقى



بس للتذكرة يا أنزحة.. اللى بتتكلم عنها دي نزلت فى عز نقحة الشمس وهي عندها 60 سنة علشان تعملك ورق التنسيق.. ونزلت تاني تعملك تحويل الرغبات.. ونزلت بردو بعدها بسنة فى عز نقحة الشمس لما سقطت فى سنة اولى تحولك لكلية تانية

انت قليل الأصل.. بس العيب مش عليك
العيب على اللي يفكرك بنى آدم
ربنا يديك على قد نيتك أيها الشيء الماسخ

السبت، 14 يوليو 2012

ربنا معاكي يا ام شافعي




سبحان الله
الدنيا دي غريبة قوي يا جدعان

الواحد يبقى عايش 28 سنه يناقر فى واحد زي القط والفار بالظبط
ويكون اكتر واحد يفرحله لما خلاص يكون على وشك يغور.. قصدي يمشي من البيت

مبروك يا ابو شافعي
واوعى تفكر ان هديتي لام شافعي هتبقى طقم سكاكين وسواطير ونص كيلو اكياس سودا
ابدااااااااااااااا
مش انا اللى اعمل كده

وبالمناسبة دي حد يدلني على بياع قلل قناوي من النوع اللى بيتكسر بسرعة يا جدعاااااااااااااااااااااااااااااااااااان

الأربعاء، 11 يوليو 2012

هيجننوني


الوضع مش مطمئن
والموضوع مش صراع بين رئيس منتخب ومجلس معين
لالالالالالا
بتاااااااااااااتا
الموضوع صراع هدفه توزيع السلطة بشكل يرضى العسكر ومكتب الارشاد علشان ماما امريكا متزعلش


يللا مش مشكلة

المهم ان البلد سليمة



من نحية سليمة
هي الحمد لله البلد كل حاجة فيها سليمة

بس لوحدها

الثلاثاء، 10 يوليو 2012

إيه.. مين.. فين.. ليه!!!!!!!!!!!!!!!!!!

انا مش عارفة هي البلد حصل فيها ايه بالظبط
مهو يا انا اللي كائن فضائي يا اما البلد هي اللي غزاها كائنات فضائية





امبارح كنت فى خطوبة منزلية.. أو هذا ما كنت أتصور
اكتشفت اني وقعت في بلاعة مجاري


وإذ فجأة اول ما اشتغل الدي جي.. أغاني التوكتوك هي الوحيدة اللي اشتغلت
مش أغاني عادية
لااااااااااااااااااااااااااااااا
ده حاجة كده ليها العجب


اذا دققتو قوي وعرفتو تفهمو حاجة اصلا من المحششين اللي المفروض بيغنو هتكتشفو انه يا اما اتنين بيفرشو الملاية لبعض (قصدي دويتو) بتاع آه يا بت يا مزة
يا اما واحد محشش بيندب حاله او بيتوعد للمزة بتاعته

ده كله كوم وماسورة البنات اللي طفحت فى البلاعة كوم تاني خااااااااالص
مش بنات بس
ده لا لون ولا جنس ولا سن ولا حجم فارق
بنات ستات رجالة عواجيز اطفال تخان رفيعين 

اييييييييييييييييييييه

هو فيه ايه
معقوله كل الناس دي مكبوته كده وبتحوش مخزون الرقص بتاع السنة كله فى الأفراح
ومش رقص عاتي كده لا.. رقص من بتاع حركات المطاوي والحاجات دي


وللا اللي بيقعدو على رجل واحد.. اتنح في وش الراجل
اني اعرف هو فيه ايه

ابتاااااا

ابوهم؟؟ لالالالا سنه صغير ميديش على ابوهم..
أخوهم؟؟ لا بردو شكله كبير شوية على انه يبقى اخوهم.. وبعدين دول 6 بنات واشكالهم غير بعض اساسا.. وهو شكله غيرهم.. جايز أخوهم في الرضاعة

وكلنا عارفين طبعا انه عاتي جدا نقعد على رجلين اخونا فى الرضاعة كدا فى أي حتة




كان معكم.. واحدة مش ناوية تروح أفراح تاني ولا تعمل فرح أشاسا لو اتجوزت.. ولو عملت فرح هعمل غرامه على الرقص وهطخ الدي جي لو شغل اغاني توكتوك

الأحد، 8 يوليو 2012

بدون مناسبة

بمناسبة التحرش 







أنا بطالب ان ده يكون الحذاء الرسمي للبنات فى المواصلات والشغل والجامعة
وأحيانا فى البيت لو فيه قريب عاوز قطع..... رقبته

وعيشوا بقة يا بناااااااااات

نياهاههاهاههههاهاهاها

الجمعة، 6 يوليو 2012

الدنيا







الدنيا قصيرة قوي على فكرة.. لمحة بصر

قصيرة على اننا نفضل نكره حد كتير

قصيرة على اننا نكتم كلمة حلوة لحد بنحبه

قصيرة على اننا نخبي مشاعرنا وتقديرنا للي بنحبهم

قصيرة على العند والكبر

قصيرة على التفريط في الحق وترخيص النفس

قصيرة على اننا نستسلم ونتخلى عن حقنا فى السعادة 

اصل احنا اتخلقنا وعشنا قد ما عشنا خلاص

راح اللي راح

بس اللي جاي قصير مهما طال

قصير بس قد ما ممكن يكون فيه حزن.. فيه سعادة وشقاوة وحب


ايوة الحياة قصيرة 

وزي ما الفرق بينها وبين الموت غمضة عين
الفرق بينا وبين السعادة بردو غمضة عين






الأربعاء، 4 يوليو 2012

جر شكل

التدوينة دي جر شكل من الآخر



وهجوم واضح وصريح على جنس الرجالة المصريين



مبدأيا نفسي أعرف ليه بيقولو على الست المصرية ب100 راجل
ياترى علشان بتشتغل وتربي العيال وتذاكرلهم وتتحمل مسئولية البيت من طبخ وتنضيف.. وفوق البيعه بتحاول تبقى "ست"


والراجل عايش "رجولته" "ملك" مع اصحابه على القهوة 
بيرجع البيت ياكل ويشخط وينطر ويعاير المدام بهيفا ونانسي وينام


وأحيانا بعضهم بتوصل بيه "الرجولة" لأحط مستوياتها لدرجة انه ميهمهوش بقى مراته بتصرف منين وللا بتتصرف في طلبات البيت والولاد منين



طب نسيبنا من الجيل القديم ده شوية
نيجي لجيل الثورة

طبعا البنات غير الجيل اللي فات ده خااااالص
دي اتعلمت كل خدع وحيل فاتنات المسلسلات المكسيكي
بقو بيعملو في نفسهم البدع وكل شغلهم الشاغل يتجوزو والسلام

لا عارفين هم بيتجوزو مين ولا بيتجوزو ليه


والشباب بينزل يثور ويشم الغازويقف قدام الرصاص
بس عادي معندوش مشكلة يقفل في وش امه الباب لما تصحيه علشان ينزل يجيب العيش وللا أي طلب للبيت
معندوش مشكلة يحلق لأمه أو أبوه لو محتاجينه يروح معاهم للدكتور لانهم مش قادرين ينزلو لوحدهم.. ويقعد يكمل اللعبة على الكمبيوتر وللا الشات على الفيسبوك


بقت حاجات كتير قوي مفتقدة في البيوت المصرية
بيوت كتيييييير قوي عيشت فيها وشوفتها أو سمعت عنها ناقصها السكن والمودة والرحمة
بيوت كتير قوي بلاقي فيها الست ب100 راجل والراجل ب100 جزمة

منووووووش المخنووووووووقة قوووي

الجمعة، 29 يونيو 2012

أنا يتحدد إقامتي بالشكل دا !!!!! :))


انا من ساعة ما اتولدت وأنا عارفة اني هفضل في عذاب بسبب أخويا



لكن توصل انه يجيب قطة في البيت


لأ ومش أي قطة

دي مستقصداني 












مش راضية تنام غير على سريري



وبتنام بعين مفتوحة



جايبلي قطة تحدد إقامتي في بيتي يا ناس

عاااااااااااااااااااااا

الأحد، 22 أبريل 2012

اللى يعرفني معرفة شخصية يعرف اني خارجيا هادية جدااااااااااااااااااااااا
ومسالمة جداااااااااااااااااااا
بتكسف حتى لو ليا باقي في الميكروباص اقول للسواق
وافضل اقنع نفسي ان هتحرجي نفسك على ايه يعني اسكتي اسكتي (كاني هطلب حاجة عيب وكخ مثلا)
زمان شوية وانا في الجامعة لما بركب اتوبيس او ميكروباص واحس بايد خنزير على جسمي بفضل اتلفت وابرق واقوم من مكاني وانزل واسيب المواصلة حتى لو فى نص الطريق
وبروح ابقى عاوزة اغسل جسمي بمية نار يمكن المكان اللى الخنزير لمسو ميوجعنيش
وافضل اعيط واصرخ ويجيلي هيستيريا يوم كامل
كنت بتوجع اكتر ان عمر ما حد اكبر مني كان بيعلمني اتصرف ازاي ولا بيقولي خدي حقك.. كل اللي ربنا بيقدرهم عليه معلش يا بنتي هنعمل ايه الدنيا بقت وحشة وكل الناس دلوقتي وحشة
واحدة في واحدة بطلت اخرج.. خلصت تعليم ومرضتش اشتغل.. مبرضاشش اخرج غير للضروووووووووووووورة القصوى
اتعلمت اركب فى الكرسي اللى جنب السواق وادفع نفرين
اتعلمت اي اتوبيس يبقى من اول الخط لآخره وعمري ما اقف في اتوبيس
اتعلمت اركب المترو علشان فيه عربية سيدات
بس لقيت بهايم ذكور بيركبو عربية السيدات غصب واقتدار
افضل ابرقلهم واسكت
لحد ما شفت قدامي بنت وقفت المترو اكتر من ربع ساعة
والظابط كان هيلطشها بالقلم ويتف فى وشها
والادهي انه بيقولها انا مش هقدر اقول للـ"رجالة" دي تنزل قوليلهم انتى
وبنات شتمتها علشان تسيب الباب والمترو يمشي
اللى دهشني انا شخصيا ان البهايم نزلو
بعد ما شتموها.. بعد ما الظابط رفع ايدو على وشها قبل ما الباب يقفل بثانية.. بعد ما بنات فى المترو شتموها شتايم قذرة
بردو البهايم نزلو
واللى دهشني كمان ان امي وابويا وقتها حاولو يمسكوني من ايدي لما دمي غلي وقمت اقف جنب البنت
بس من بعدها كل مرة بركب المترو والاقي دكر قاعد مجعوص في عربية السيدات بقف واصرخ بعلو صوتي وبمنتهي الذوق ان أي "راجل" يتفضل ينزل لان دي عربية الـ"سيدات"
اي ميكروباص بركبه والسواق يضرب عواف على الباقي بقوله عاوزة الباقي لو سمحت
اى حد بيحاول يمد ايده ببرقله بس بقيت بصرخ فيه بقلب جامد
كام مرة في عمرك وقفت مع الحق حتى لو كل اللى حواليك بيقنعوك تمشي المركب او بيشخطو فيك علشان مصالحهم واقفة
كام مرة سكت عن حقك علشان مليون سبب ومبرر بتقنع فيه نفسك
كام مرة سمحت للناس تهينك وسكت وانت بتقنع نفسك انك قليل الحيلة ومش عارف تتصرف ازاي
كام مرة سمحت للناس تهين مظلوم وخذلته ووقفت تتفرج عليه انت كمان
كام مرة قلبك بقى اسود وبقيت تجور على اللى اضعف منك وتفعصة علشان بتحس انك قوي
الكلام مش بس عن بنت بتتهان كرامتها وجسمها
الكلام كمان عن شباب وبنات على حق.. عن ثورة تم اغتصابها وتعريتها وفقء عيونها وقتلها وسحل جثتها في الزباله
و80 مليون وقفو يتفرجو على كل ده.. وشتمو ومرمطو كل اللى كان بيحاول ينقذها.. واللى قدر يخطف حتة منها كان بيخطف.. اللى خطف كرسي واللى خطف منصب واللى خطف قرشين واللى خطف شهرة
احنا عمرنا وعمر عيالنا هيضيع طول محنا ساكتين عن الحق.. لاننا رضعنا السكوت عن الحق

الثلاثاء، 10 أبريل 2012

...................

ببعد كتير عن التدوين وعن العالم الافتراضي
**********
بس لما بتخنق قووووووووي
*
لما احس ان عضمي بيتطحن
*
وان روحي بتفطس
***
باجي افضفض هنا
*****************
حتى الدموع بتوصل للجفون وتهرب لحد يشوفها
*
حتى الكتف اللى بتمنى اريح راسي عليه وابكي بيني وبينه سنين وبحور وصحرا
*
حتى الصوت اللى كان بيزعقلي فى كل مناقشة وكل نصيحة وكل حوار مبقاش عارف يتكلم ولا يمشي