الخميس، 31 ديسمبر، 2009

أول مرة


أول مرة

أول مرة أعمل مدونة
أول مرة ألاقي نفسي في المدونة دي
أول مرة أحس ان ليا أصدقاء كتير بحبهم وبيحبوني
أول مرة موقف حد منهم يواجهني بنفسي قدام المراية وأحس بندالتي وتقصيري بجد
أول مرة أزعل من جوة قلبي اني افتقدت حد منهم
أول مرة اعيط لما والدي مكنش بيقدر يتحرك
وأول مرة اعرف ان ممكن ديمواقراطية الأهل تبقى بلاستيك بيسيح مع اول موقف مزاجهم يمشوا رأيهم فيه
أول مرة أشوف حد وهو بيموت

أول مرة اتبسط جدا من الطفلة المتشردة.. قصدي البريئة اللي جوايا
أول مرة اعرف ازاي الحب بيدي للإنسان الشجاعة يمشي في الدنيا وهو فارد ضهره
اتغيرت كتير قوي السنة ونص اللي فاتو
** وتعبير عن الذات وصداقات جميلة أجمل وأغلى حاجات كسبتها في السنة دي
وكل الاوقات الرخمة والبايخة والحزينة والكئيبة اتمسحو بأستيكة
لأني قوية طول ما ليا حبيب حنين ياخد بإيدي وأصدقاء بينوروا أفكار الدنيا قدامي
===========
بعد الفاصل اللي فات دة
أعود برغيي المعتاد لأخبركم بأهم الأنباء
حيث تمت قراية فاتحة عبدة أنزحة وتشفيدة زوفاش وادعولهم ربنا يهديهم وتتم خطوبتهم الأجازة القادمة
(وعقبااااااااااااالي يارب انا وبنات المسلمين)
وبابا الحمد لله بقى أحسن كتييييييييير حيث عرفنا بالصدفة في المستشفي ان اللى كان عنده نزيف سبب جلطة فى المخ ومتوقع انها تدوب بالانتظام في العلاج
وحضرتي بعد زن متواصل من ماما وبابا نزلت اتدرب في مكان بمشيلة مشي بالهبل (واللي ميخسش بالرجيم هيخس غصب عنه بالمشي)
ودة اللي فاكراه دلوقتي
ونسيت أقول لنفسي كل سنة وانا طيبة ويارب أصغر يجي 1० سنين السنة الجاية يااااااااااااااارب
هع هع هع
والى اللوقاء في حلقة الرغي القادمة

الجمعة، 25 ديسمبر، 2009

أنا أسفة

بجد أنا اسفة يا بشمهندس أحمد أبو العلا
(لانك من الناس القليلين اللي قريبين ليا جدا وبحترمهم وبعزهم جدا في عالم التدوين)
موقفك حسسني فعلا انا قد ايه ندلة في حق أصدقائي
واعتذاري هيكون رجوعي وانتظامي في متابعة أصدقائي
(ملحوظة يمكن تشفعلي في حق كل اللي زعلتهم: انا قفلت المدونة علشان بعض الاشخاص في عائلتي اللي بحبها قووووووووي عرف المدونة وكانت رغبتي انهم ميقروش أفكاري, وانقطاعي بردو كان بسبب وجود بعض أفراد العائلة بشكل دائم في البيت وما يتبعه من وجود مشاكل وعدم وجود اي وقت للقعدة عالكمبيوتر)
يارب تقبل اعتذاري يا بشمهندس
ويارب محدش يكون زعلان مني

الاثنين، 26 أكتوبر، 2009

جيت أصدعكم من تاني

طبعا يعني اكيد مش محتاجة كلام ان كل المدونين وحشوني جدا
وحشني زيارتهم والدخول جوه دماغهم وأفكارهم
ووحشني التدوين واني اصدعكم برغيي
بقالي شهر كل كام يوم افتح تدوينة جديدة واقوم قافلاها تاني
واقوم قافة المدونة بحالها رغم اني مريت باحداث كتيرة جدا فى الفترة اللي فاتت ومواقف وحشة ومواقف موتتني من الضحك كان نفسي احكيلكم عليها (متقلقوش انا رغاية والتدوينات جاية كتير)
ومازلت بعتذر عن عدم الرد على التعليقات عندي لو متوفرليش الوقت
او التعليق عندكم رغم انى بتابعكم كلكم في صمت
كنت محتاجة اكلم واحدة واقولها اللى في قلبي نحيتها
................
............
...
عايزة اقولها
وجعتيني ووجعتي قلبي
كل ما بحلم بتكسري مئاديفي
كل ما يطلع لحلمي جناحات بتقصيها
كل ما ادور على الحب بتحطي قدامي عاهات على شكل رجالة

وناس اشوفهم طول عمري ملايكة وفي لحظة يطلعلهم انياب
وناس بديهم اسرار روحي واكتشف انهم حاطين اسوار حواليهم
ساعات بيأس ومببقاش عايزة اشوف وشك ولا اشوف وش حد من اللى عايشين فيكي
وساعات قلبي بيتكسر وروحي بتروح

وعلشان كل اللي فات يا دنيا بقولك طظ فيكي
طظ فى السنين اللي حطتيهم بيني وبين اللي بحبه
وطظ في اى حد يقول ان اتنين بيحبو بعض مينفعش يتجوزو لأي سبب كان
وطظ في كل حد فكرته ملاك وطلع وحش بأنياب
وطظ في كل عاهة دكر وقعني حظي فى معرفته او كان مشروع جواز فاشل لاي واحدة ست
وطظ في أي ام ربت ولد وطلعته عاهة من العاهات دي
وطظ فى كل ست نكدية مبتحاولش تسعد جوزها
وطظ في كل راجل فاكر مراته خدامة وعبد لمتعته فى الفندق بتاعه
وطظ فى كل اب بيربي ولاده على رعب ان محدش يكلمه وهو بيشتغل ولو اتقدم لبنته واحد معاه "دبلون" يقولها "السكافة مبتأكلش عيش" علشان يخلص من العار لو متجوزتش
وطظ فى كل ام بتكسر مئاديف بنتها وتحسسها انها هم على قلبها ولو متجوزتش الدنيا هتتهد علي دماغها وتبقى عجوز شمطاء وحيدة
وطظ في كل اللى اتجوزو وهم مش قد الجواز
وطظ في كل اللي خلفوا وهم مش عارفين يربو اصلا وبيسيبو الشارع يربي عيالهم
وطظ في اي كلب اتحرش ببنت اخته او اخوه او اي انثي فى الشارع حتى لو كانت انثي البطريق
وطظ في أي ام واب يعرفو ان ولادهم اتعرضو لتحرش ومخدولهمش حقهم من الكلب اللي اتحرش بيهم
وطظ فى البلد اللي ولادها مش عارفين يحلموا فيها لا بحب ولا نجاح ولا بيت ولا أي حاجة حلوة
وطظ في اى حد فاكر نفسه وصي على اللي حواليه وعامل نفسة عارف مصلحتهم او عامل نفسه قاضي وبيحاسبهم
طظ طظ طظ

طظ فيكي يا دنيا بالقوي
ومهما بكيت او قلبي نزف منك ومن اللي عايشين فيكي مش هيهمني طول ما "هو" حسه معايا
(ملحوسة صغنونة: انا "كنت" مخنوقة جامد فعلا من الدنيا الفترة اللي فاتت.. بس الوقتي حاسة ان ملهاش عندي هي او أي حد ضايقني أو خذلني غير طظ كبيرة جدا "ودي تبقى الطظ ال20 فى البوست").. هع هع هع هع

الخميس، 20 أغسطس، 2009

كل سنة وانتم بصحة ورضا وسعادة

كل سنة وانتم بصحة وسعادة ورضا
وربنا يكرمكم بتحقيق كل أحلامكم
ويرزقكم من خيره الواسع الحلال
طبعا بكرر لكم جدا جدا اعتذاري الصادق من قلبي على تقصيري فى متابعتكم وزيارتكم
نظرا لظروف اللخبطة فى البيت وعدم قدرتي على فتح الكمبيوتر زي زمان
انا الحمد لله نفسوياتي تمام جدا ووالدي الحمد لله اتحسن كتييييييييييييير وقارب على التماثل للشفاء
وربنا يكرمك لدعائكم ليه
ومش لاقية حاجة عارفة اقدمهالكم زي دعواتي الصادقة من قلبي ان ربنا يرزقكم بكل خير ويسعد قلبكم انتم واحبابكم دايما
سلامي الكبير ليكم بالاسم كل واحد وواحدة موجودين عندي فى الريدر واللى تابعوني وسالوا عليا
بجد زيارتكم وتعليقاتكم كانت بتخلي نفسوياتي تنشكح جدا

ويارب يارب اقدر فى اقرب وقت انزل موضوعات تاني واتابعكم

الاثنين، 10 أغسطس، 2009

انا بحكد عليكم عااااااااااااااااااااااااا

ايوة محدش يستغرب انا بحكد عليكم وبشد في شعوري وبعضعض صوابع الندم كمان علشان كان بجد نفسي اكون فى لقاء المدونين معاكم

بس كان في موضوع كده فى اسرتنا يوم السبت ده.. دعواتكم بقى ان ربنا يوفق صاحبة الموضوع للخير ان شاء الله
انتوا فعلا كلكم وحشتووووووووووووووووووني نفر نفر
ستوتة وبشمهندس احمد ابو العلا وابو على وسارة وموني(اللى نورت مصر اخيرا) ودودو(ربنا يتمم لها على خير ان شاء الله) وميمي واحمد وبدراوي وضايع (اللى رجع بعد غياب طويل) وليدي وايوشة ونوارة وبنجاواتي وأنوسة وسمكمك ورئيس التحرير وطبعا بقى طبعا يعني "الأزهري"
وكل اللى بحبهم واتابعهم وحشتني جدا متابعتهم.
انا جاية ارغي بقى وافضفض النهاردة عن حاجات كتير
اول حاجة والدي
من كتر الشغل وقلة النوم مرة واحدة جالة هبوط فى الدورة الدموية وارتفاع فى الضغط والسكر خلوه فقد القدره على الحركة والكلام وقتيا
بس الحمد لله هو بقى احسن بكتير الوقتي.. مش عارفة الراجل ده بقى كويس وبيتدلع علشان ندلعه شوية كمان وللا ايه
يللا مش خساره فيه شوية دلع
واهو اعزمة على السينما علي حسابه بردو مش خسارة فيه.. هع هع هع
تاني حاجة بقى
انا كنت بتابع كتير منكم فى الخباثة كدة لاني مقدرش متابعكوش اشاسا.. وببقى مفتقدة التعليق عندكوا والكلام معاكوا.. بس زي ميكون لساني اتخرس ومش عارفة اقول اى حاجة.. واكتر خبر لفت نظري مؤخرا هو خبر تحديد سرعة الانترنت.
الهي يجيهم ويحط عليهم بدري.. هي يعني المشرحة ناقصة قتله.. يعني الواحد معاه سرعة السلحفاة اساسا وبيحملله كام فيلم فى الشهر بالعافية يقوموا يدفعونا فلوس فوق اللى بندفعة اصلا.
والله يا مصر انا بحلف اني شفت فيكي العجب.. ومعدتش قادرة ادافع عنك من قلبي لما حد يجيب سيرتك.. دة البني ادم فيكي بقى بيتعصر علشان يخر طاقة أو فلوس.. خلاص الكرامة اتبعترت من زمااااااااااااان.. معدش فيه غير تكشيرة كبيرة على وشوش البشر.. وبعض القلوب اللي لسه فيها شوية أمل.
وحسبنا الله ونعم الوكيل
الحل بقى فى الموضوع دة زي ما قرينا عند مدونين كتير فيه رسلة وشوية ايميلات هنبعت لهم الرسالة دي والتفاصيل اكتر هتلاقوها هنا
وطبعا ننشر الوعي عند اللي ميعرفوش بالموضوع ده.. ولو محصلش نتيجة هنقطع اشتراكنا فى شركات النت.. وانا اول واحده هعمل كده رغم ادماني للنت ورغم اني متصورة انى مقدرش اعيش من غير نت.. بس حاجات كتير فى الدنيا بنتخيل اننا منقدرش نعيش من غيرها ولما تروح بنعيش بردو.
يللا سلام بقى يا اجمل بلوجارية ومدونين
وجايالكم تاني قريب قوي ان شاء الله

الأحد، 2 أغسطس، 2009

اعتذار واعلان وتهنئتين

بجد بجد يا جماعة انا بعتذر عن عدم متابعتكم الفترة اللي فاتت دي وفترة كمان قصيرة قادمة
والدي تعبان جدا وبتمني تدعوله ربنا يشفيه ويديله الصحة
كلام على جنب كده
(اللي بيشتغل طول الوقت ومش بياخد وقت راحة ابدا اتمني انه يعيد نظر فى الموضوع ده لان اجسادنا وارواحنا ليهم علينا حقوق فى الحفاظ عليهم من الارهاق وما يتبعه)
حاجة لازم انوه عنها ويارب يكون فى فرصة احضرها
هي لقاء المدونين اللي ستوتة اعلنت عنه واللي هيكون ان شاء الله يوم السبت 8 أغسطس فى حديقة الأزهر الساعة 10.30 صباحا ان شاء الله
بجد يارب اقدر احضرة واشوف كل الناس اللي بحبها هناك.
النهاردة عيد ميلاد واحد صاحبي معرفوش ولازم اقولة كل سنة وانت طيب يا عثل وربنا يرزقك بكل خير.
وكمان دودو عاشقة الرومانسية لازم اقولها الف مبروك يا قمر ويارب يارب يتمملك على خير ويسعدك.
بجد بعتذر لو قصرت فى حق حد او لو لسة مردتش على تعليقات ولا زرت حد
يارب ربنا يتم شفاء والدي واعود للتدوين اتابع مواضيعكم وانزل مواضيع جديدة بانتظام.

الاثنين، 20 يوليو، 2009

كيف تصنع من ابنك انسان منحرف وأنت على يقين انك عارف مصلحته وفاهم عنه

الموضوع دة نازل النهاردة علشان خاطر الأزهري (بس بردو أموت وأعرف مين اللي زئني)
بصوا بقى
من الاخر انا جاية اتخانق مع الامهات والابهات
(علشان انا مفقوعة منهم ومن عمايلهم.. بس ما علينا)
(وكالعادة الموضوع طويل وطبعا ليه تكملة فى البوست الجاي)
وممكن نعتبر ان المجتمع دة زي الام والأب.. دايما فاكرين ان كلامهم هو الصح ودايما فاكرين انهم عارفين مصلحة ولادهم
طب انا بقى هوريكوا ازاي الاهل بيطلعوا نشأ منحرف وجيل بايظ.. والغريبة انهم بيجوا يشتكوا فى الاخر
الأم والأب هم اللي بيصنعوا بني ادم وبيشكلوا وجدانه وبيكونوا اساس شخصيته.. هم المتحكمين فيه ماديا وبالتالى متحكمين فى رغباته ووقت فراغه وهواياته.. يعني من الاخر الام والاب هم الاساس فى ان ولادهم يطلعوا منحرفين وفيهم صفات وحشة او ناس محترمة وصفاتهم حميدة.
مش لازم ابدا الاهل يكونوا على حق ومش بالضرورة يكونوا ادرى بمصلحة ولادهم لمجرد انهم اكبر منهم بزعم انهم اكثر خبره او متحكمين فيهم ماديا بمقولة لما تبقى تصرف على نفسك ابقى اعمل اللى انت عاوزه.
1
(دول حرامية يا حبيبتي)
أب أو أم لظيظة وديموكراتية.. بس بتعز الفلوس زي عنيها.. الفلوس هي زادها وزوادها وأمانها وحضنها الدافي.. مش شايفة ان الفلوس تتصرف على ولادها غير في تعليم أو في سبيل الوصول لشغل.. انما الهدوم والاهتمام بالنفس اشباع بعض رغبات النفس المشروعة لأ.. دي بتعتبرهم كمان رفاهية.
عايزة ولادها يشتغلوا زي التيران في الساقية.. وميصرفوش كمان مليم على نفسهم.. لأ يدوها الفلوس في ايديها.. مش مهم ان كانوا شباب عايزين يتجوزوا ولا بنات كادوا ينسوا انوثتهم من كتر ما الام بتعتبرها رفاهية وقلة أدب.. ومش مهم ان كان ربنا مشرع للبنت أنها تكون مسئولية أهلها.. ومش مطلوب منها أساسا تتمرمط في الشغل ولا تتبهدل مع اللي يسوا واللي ميسواش وتضيع رقتها وخجلها وسط صراعات الدنيا (انا مش ضد الشغل.. لكن ضد اني أكون مجبرة اني اشتغل وانا مش عايزة علشان اجيب فلوس وخلاص.. او لان خسارة قعدتي فى البيت).
يا حجة عايشة فى دنيا تانية انتي؟؟.. مش علشان ظروفك كانت بتجبرك تشتغلي وتدي الفلوس لأهلك يبقى ولادك لازم هم كمان يعملوا كدة.
مش علشان الفلوس هي أمانك يبقى الاخرين لازم يعتبروكي حصالة متحركة.. مش علشان انتي شايفة ان كل حاجة في الدنيا رفاهية واللي بيعملوها حرامية يبقى انتي على صح.. لا يا حجة.. احب أبشرك انك بترتكبي ذنب كبير قوي.. لانك بمنتهي السهولة ممكن تدفي ولادك للانحراف.. ممكن من ضيق يدك تحوليهم لمسرفين او تطلعيهم زيك.
2
(انا عندي شغل)
الزوج اللي بيبقى اب ويتعود على طحنة الدنيا ليه ويشيل المسئوليات دايما.. بيتحول الشغل فى حياتة لمرتبة مقدسة.. بدل ما يكون مصدر رزق وأكل عيش.. حياته بتتحول لنغمة واحدة.. وانا بعمل علشان مين.. وانا سايبكم ومشغول علشان مين.. وواحدة فى واحدة بتتحول النغمة لشخط ونطر وكل ما حد يكلمه.. أنا مش فاضي انا ورايا شغل.. ده مش بيت.. دي مش عيشة.
فعلا عندك حق
لما الأب يتشغل بعملة بس وينسى يربي.. لا هيبقى دة بيت ولا هتبقى دي عيشة.. وسلملي على الاستاذ نفيسااااااااااااااااااا (والله معرفه نفيسا دة بس هو يمكن اخو الاستاذ خليفاااا).
3
(مهما عملت بردو قليل الأدب علشان انت مراهق وقاصر وأنا اللي بصرف عليك)
أب بيشتغل وأم متفرغة للبيت.. بتطبخ وتربي على قد ما تقدر.. ولادهم فى مراحل المراهقة.
لما الابن ينزل يلعب كورة وهدومة تتوسخ يبقى صايع وقليل الأدب وكمان موش نضيف.. لما يقعد في البيت ويفتح النت قدامهم يبقى بردو صايع ومعندوش دم.. لما يطلب يشترك في نادي رياضي (انشالله حتى مركز شباب جحر النملة) يبقى هيتعطل عن المذاكرة (مهما كان متفوق فى الدراسة).
طب وحياة طنط طاظا ابقوا خللوا المذاكرة تنفعكم وانتوا بتدفعوه دفع للانحراف.. لما يكون الشاب دة عنده طاقة مهولة.. فى عقله وجسمه.. ازاي متساعدوهوش يخرج الطاقة دي فى الرياضة.. ومن امتى كان لعب الرياضة بيعطل عن المذاكرة.. طب لما يلعب كورة وحيله يتهد فيها واهو بيخرج شوية طاقة.. فيها ايه يعني لما هدومة تتنيل تتوسخ.. هو انتى يعني كنتي بتغسليها على ايدك.. ما ربنا يخليلك الغسالة التوماتيكي.
ياناس اتقوا الله في ولادكم وخللوا في حياتهم منفذ للطاقة مش كل حاجة المذاكرة.. انتوا ليه مش مصدقين انهم لو لعبوا رياضة مع شوية اشراف منكم على أوقات المذاكرة هيكونوا ناس محترمة ومتفوقة وناجحة.
ربنا يهديكم يا عالم لحسن انتوا رفعتولى ضغطى والله.
4
(كوتوموتو يا حلوة يا بطة)
يعني "البكري" اللي مامته بتحطه كده فى مكانة اميتابتشان فى قلوب ستات زمان أو مهند وتامر حوستي في قلوب البنات الوقتي.. لو مكلش تنكد على البيت كله وتعمل أراجوز علشان ياكل.. ومش مهم بقى جوزها اللي جاي من الشغل عايز ياكل لقمة ويريح أو يقعد قعده حلوة مع اسرته.. وايه يعني مش مهم.
لو عمل نفسه زعلان علشان يبتزها بينجح طبعا وبياخد كل اللى هو عايزه وبيعمل كل اللى هو عايزه سواء كان صح او غلط.. مش مهم انها كدة بتمرعة وتنفخه.. ومش مهم لو ليها عيال تانيين مزبولين ومقهورين ومفيش عدل فى المعاملة مع انهم ممكن يبقوا برقبته.
طيب خليكي كدة.. وشوفي المر اللي هتشربيه لما سي كوتوموتو ده يكبر شوية ويبقى دظنانور مش بطة.. وهتكوني انتي أول واحدة يشوطها ويعاملها اسوأ معاملة.
5
(اشمعني انا يا ربي بتعمل فيا كده!!!)
ام بقي يا حلاوتها.. مش فاضية لعيالها اساسا خالص.. مقضية نص اليوم في التليفونات واشي شتايم على كدب على كلام ابيح على وصلة ردح.. ونص اليوم التاني في أي حاجة.. بتأكل ولادها احسن اكل وتلبسهم أحسن لبس.. بس بتعلمهم مع كدة الكذب والشتايم واللؤم وكل الخصال السيئة.. بتسيبهم لخدامة الله اعلم بتعلمهم ايه وللا بتعمل فيهم ايه.. وترجع تعيط وتقول ولادي مش ناقصهم حاجة.. ليه يا ربي بتعمل فيا كدة.
للأسف عمرك ما هتشوفي ليه بيحصلك كدة.. غير لو الدنيا ادتك قلم معتبر فى حد من ولادك علشان تفوقي.. وربنا ما يحكم على حد بالقلم ده.
6
(يا فاشل يا فاشل!!!)
اب بقى مش هنقول فيه عيوب كتيره.. لكن اسلوبة فى دفع ولاده انهم يعملوا حاجة كويسه بانه يحملهم ذنوب الكون.. هم السبب في كل البلاوي.. هم سبب خراب الكون.. كل زمايلهم واللى قدهم ناجحين وحلوين وطعمين.. و هم الفشلة اللي في الدنيا.. وفاكر انه كده بيشجعهم ويحفزهم علشان يتقدموا فى حياتهم.. بينما هو فى الحقيقة بيرسخ جواهم فكرة انهم فشلة وان حتى اقرب الناس ليهم مقتنعين بكده.
بلاااااااااااااااااااش.. لو ليك ابن او بنت بلااااااااش تستخدم معاهم الطريقة دي.. شجعهم وحمسهم لما يعملوا حاجة كويسة.. ونبههم لما يغلطوا وقولهم بمنتهى الهدوء انهم المرة الجاية يتحاشوا الغلط.. ولو كرروا الغلط امنع عنهم حاجة بيحبوها (ماعدا حضنك وحنانك) علشان يتعلموا هتخسر ايه يعني لو عملت كده.. صدقني ولا حاجة.
كفاية كدة النهاردة.. والبوست الجاي هيبقى عن تفاصيل صغيرة فى حياة الامهات والأبهات عن كيفية صنع ابن أو بنت منحرفين.. كدابين.. منافقين.. جبناء.. منعدمي الثقة فى نفسهم.. حاقدين.. كارهي الخير للآخرين..متأنزحين.. مايصين.. وبردو الاهل فاكرين انهم يعرفوا احسن من ولادهم وعارفين مصلحتهم اكتر منهم.
وسبحان الله في خلقه

الثلاثاء، 7 يوليو، 2009

شوية كلام فاضي عن هو وهي

انا عارفة اني عيلة وكل شوية أقول هكتب المرة الجاية عن معرفش ايه ومبعملش حاجة.. بس فعلا بعتذر عن عدم متابعتكم وعدم ردي على التعليقات.. وبرخامتي كالعادة مش عايزة أقول السبب.
سويت فيولت اوعي تزعلي يا قمر.. وسارة وأم أحمد وكل اللي سأل عليا.. أديني جيت أخنقكم أهو
والحوار الجاي دة مش مهم ولا مهم انا بتكلم فيه ليه.. أديني ببعبع بالكلام فى المدونة وخلاص.
بيلفت نظري ان النسبة الأكبر من الشباب (أو الأهل) بيرفض يتجوز بنت من سن ال30 او اكبر.. وبيعتبروا ان مدة صلاحيتها انتهت.
طب بالذمة على أى أساس يعني؟
وهو مين اصلا ضامن هيكمل يومه وللا لأ لما هيضمن شباب وللا صحة وللا جمال وللا مال.
يعني هل الشاب مثلا ضامن صحته للأبد علشان يضمن جمال البنت للأبد.
هي الناس بقت بتختار بناء على ايه؟
المال والجمال والصحة والدين المظهري بس
وللا الأخلاق والمعاملة الطيبة فى الاول وبعدين وراها يجي أي حاجة تانية.
وبعدين يعني هم الشباب اللي بيتأمروا على البنات دول وأن البنت سنها كبير.. على اساس يعني ان الواحد منهم فاكر نفسه براد بيت مثللا وللا توم كروز وللا حتى فى أخلاق حد من الخلفاء الراشدين ويستاهل ست الحسن والجمال ذات ينبوع الشباب الابدي.
يعني بالذمة مثلا واحد عنده 32 سنه مامته بتعرض عليه أمر بنت قده فى السن للجواز وبيستنكر قوي يعني على أساس ان مدة صلاحيتها انتهت ويدوب ممكن ترضي بحد عنده خمسين وللا ستين سنه.. احب أقوله يخي روح اتوكس وربنا بإذن الله يرزقها براجل بجد مش واحد زيك.
طيب نتكلم شوية فى فرق السن..
..
فرق السن لو الراجل أكبر الناس بتعتبره عادي جدا وان هو ده الطبيعي لأن الراجل المفروض عقله يبقى أكبر من عقل الست علشان يعرف يشد اللجام.. قصدي ياخد القرارات.. طب بذمتكوا مش ده اعتراف ضمني ان الرجالة اساسا عقلهم اصغر من عقل الستات اللي فى نفس سنهم
وده مش صحيح
ومننساش ان الرسول عليه الصلاة والسلام تزوج من تصغره فى السن بأعوام كتييييييره.. ومع ذلك كان قادر على احتوائها.
طيب لو الست أكبر من الراجل.. ناس كتير اساسا بتستنكر الموضوع ده لأسباب كتير.. أولها ان الست بتمر بمرحلة اليأس وانقطاع الدورة فى عمر مبكر شوية وهو ما بين الاربعينات والخمسينات.. وجهلهم بيصورلهم ان بعد المرحلة دي الست مش هتقدر تسعد زوجها (جنسيا).. طب بالذمة عمرهم ما سمعوا عن أدوية للحالات دي حتى بيستخدمها بعض حديثي الزواج اللي بتقابلهم مشاكل.
ناس بردو بتقول ان الست هتبقى غيورة قوي والطبيعي ان جوزها هيبص لستات تانية لما هي تعجز شوية.. دول بقى احب أقولهم ان طبع البصبصة فى الرجالة بوجه عام.. والراجل مش هيستنى لما مراته تعجز علشان يبص لحد تاني لانه بيبص أصلا.
ناس تانية بتقول ان الست ملامحها بتعجز اسرع من الراجل وده هيسبب مشاكل.. الحقيقة انا مبشوفش الحكاية دي غير فى مصر والمجتمعات اللي زيها.. اللي الست فيه بتقوم بدور الراجل والست وتتحمل المسئولية جوة البيت وبره البيت وفى كل حته لوحدها وجوزها مش فاضي غير لشغله وبس.. لا فاضي يربي العيال شوية ولا فاضي يقف مع كهربائي ولا اى صنايعي ولا فاضي حتى يرفه عن اهل بيته شوية.. مهو طبيعي ساعتها ان الست تشيب ويجيلها مناخوليا اساسا مش تعجز بدري عنه وبس.
ومننساش ان الرسول عليه الصلاة والسلام كانت أول زوجاته السيده خديجة.. أكبر منه بحوالي عشرين سنه.. وبردو كان قادر على احتوائها.
وللا هو احنا بناخد الرسول قدوه فى اللبس والمظهر وبتناسى الأمور الجوهرية في حياته من معاملات ورزانه ورجاحة عقل وصبر وحكمة.
أنا شخصيا رأيي فى موضوع السن ده انه ملوش أي علاقة بأساس الاختيار السليم للزوج أو الزوجة.. لأن الاساس هو القبول ثم الأخلاق ثم التفاهم والاحترام ثم الاختلافات الفردية اللي ممكن ناس تقبلها وتتحملها وناس تانية متقدرش عليها.
بس خلاص.. انتهى الكلام
دة انا رغاية قويييييي

الأحد، 28 يونيو، 2009

عووووووووووووووو

ازيكم يا حلوين وطعمين وعثاثيل
بشكر جدا جدا موني وسارة وأبو علي لسؤالهم عليا
وانا الحمد لله كويسة.. لكن كنت مكسلة عن النت خالث مالث.. وكمان كنت بنزل مشاوير كتير.. وبعزئت ال75 قرش اللي حيلتي.. دة غير ان وشي قرب يتفحم من الشمس
عاااااااااااااااااااااااااااااااااااااااا
والعاااااااااا دي على ال75 قرش على فكرة
هههههههههههه
اه.. وبجد بعتذر عن الرد على التعليقات فى الموضوع اللي فات
بس تأكدوا اني قريتها ومش ناسياها
واللي قالوا ان الستات بقت بتعمل نفس الحاجة
هيبقى ردي عليهم في البوست القادم
واللى اتكثفوا من كلامي.. لو بطلوا ثجاير هديلهم بطيخة هدية.. انما ايه اخر حلاوة
يللا اديني الحمد لله رجعت اتابعكم واتابع مواضيعكم.. بس كام يوم كدة وأبقى اكتب بوست جديد
يعني هروح فين يعني.. أنا قاعدة على قلبكم وهخنقكم يعني هخنقكم
هع هع هع هع
المهم
الموضوع ده مفيد جدا لأي مراهق ولأي أب وأم ليهم أولاد في مرحلة المراهقة
الموضوع للكبار فقط على فكرة.. يعني ممكن نقول للي فوق ال13 سنة
بس بجد هيدخلكم جوة عقل المراهق علشان تعرفوا تكونوا حماية ليه من أي شر
بس كده.. كفاية عليكم رغي
وأنا هرحمكم مني شوية واأنتخ شويتين وبعدين استكمل الهجوم على الردالة والستات
والمرة الجاية هجومى على بنات حواء
يا فرحتكم يللي فى بالي
هههههههههههههههههههه
يللا بقي سلااااااااااااااااام

الأحد، 21 يونيو، 2009

الأول.. (البانجو مش بتاعي.. والله برىء يا بيه)

توضيحا اكتر لموضوع الهجوم ده
انا قصدي منه اني هفصص الاسباب اللي من وجهة نظري شايفاها بتكون أهم الاسباب فى ان الذكر بقى مجرد ذكر.. والرجولة قربت تنقرض مع اللي انقرضوا.. وبأكد اكتر ان لسة فيه رجالة بجد يمكن بيقعوا فى ناس وحشة بتغير من نظرتهم للدنيا.. بس انا بردو مش بهاجم الرجالة دول..لأ.. انا بهاجم اى صفة وحشة بلاقيها فى اى ذكر قابلته فى حياتي او سمعت عنه.. (اى صفة وحشة بتنتقص من رجولة اللي قدامي من وجهة نظري هكتبها.)
نبدأ بقى بحته رومانسي كده على ما تفرج قبل الهجوم
أنت!!!!
نعم أنت.. ايها الكائن الليلي المتحشرج كخفافيش الظلام الزاحفة في أعماق الامبريالية المتزندقة فى عتامات الكون.
أنت!!!
نعم أنت.. يا مقندل على عينك.. يا حيلتهم يا خيبة بالويبة.
أنت!!!
ياااااااااااااااااااااااااااااااااه
أممكن!!!!!!!
أنت!!!
لا متخافوش كفاية عليكوا كدة.. هع هع هع
المهم.. قبل ما تناموا مني يعني ومن قصيدة أممكن دي
(صنف أشباه الرجال بتاع البانجو والكيف والحشيش والحاجات دي.. وبردو وجهة نظري بتضم السجاير معاهم.. لانها عاملة زي الرضعة بتاعة الطفل كده.. مبعرفش استرجل اللي بيشربها للاسف)
للأسف صنف الشباب اللي بيشرب سواء بانجو أو حشيش أو منكر أو أي حاجة تانية.. أو حتى من وجهة نظري (المتشدده شوية) سجاير كمان.. بقى موجود بشده وكمان للأسف بقى منتشر جداااااااا.. منهم اللي اهلهم عارفين ومطنشين.. ومنهم اللي اهلهم فاكرينهم ملايكة وولا داريانين بحاجة اساسا.
من أول الولد اللي لسة فى مرحلة الطفولة.. اللي بيجرب السجاير لما بيشوف باباه او مامته أو حتى حد من اخواته بيشربوها.. وبيقلدهم علشان يبقى راجل أو على الاقل يحس انه كبر زيهم (مش عارفة مستعجلين يكبروا على ايه.. بلا خيبة).
طب هنا ده هضطر اقول انه اساسا ملقاش حد يعلمه الصح من الغلط.. والذنب عليه مش كبير.. هو بس مجرد بيقلد.. الذنب على اللي خلفوه ورموه في الشارع من غير ما يعلموه أي حاجة.. عملوا زي الأرانب بالظبط.
وده كبيره لو معرفناش نبقى قدوه ليه اننا بنديه على قفاه علشان يبطل.. بس يا فرحتى.. مش لما يبقى اللي خلفه اساسا يبطل الأول.
مرورا بالشاب اللي شايف كل الشباب بيشربوا سجاير أو حشيش أوبانجو أوحاجات تانية كتير.. وعايز يبقى زيهم ويعيش شبابه.. عايز الحشيش يخليه راجل ويبقي سبع البرمبة هارون الرشيد محطم قلوب العذارى.. حتة الفسلة من الشباب السيس دول بيتفنن في شرب الحاجة اللي بيعمل بيه دماغ (دماغ قطران بعيد عنكم.. دمغة عايزة الحرق أساسا).
واللي يقول مشبره واللي يلف سوجارة.. وبعدها يشوف الناس حواليه أقزااااااااااام.. وحاسس انه أسد.. حاسس انه فحل (تقريبا فحل بصل بس الترجمة جتله غلط).
طب دة معلش بقى لازم الوم عليه.. لانه بالفعل اكيد عارف ان ده غلط.. وهو بيعمل كدة علشان عايز يحس بقدرات وهمية هتحصلة لما يشرب الهباب اللي بيشربه.
احب أقوله انك موهوم يا فننس.. الحاجات دي هتجيبك الارض.. وهتبقى قطة من غير ديل كمان.. دة لو حصلت القطة ومبقتش فار أصلا يا كوتوموتو (والحدق يفهم).
مهو لو انت اصلا كان عندك دماغ مكنتش ضيعتها بشرب الحاجات دي.. وللا محدش علمك ان الراجل اعز ما يملك هو (لأ لأ مش الولاعة.. شوفتوا نيتكوا راحت فين.. هع هع هع).. دماغة اللي بيفكر بيها.. اللي فيها الحكمة ورجاحة العقل.. اللي ربنا كرمه بمسئولية القوامة فى الحياة علشانها.
معذور يا فننس.. مهى بدل المخيخ اتقلبت بالوظة بالمكسرات من وانت صغير يخويا.
طب والرجالة بقى.. اللي المفروض خلاص وصلوا لمرحلة الخبره فى الحياة.. اللي عرف انه اتخدع ومطلعش أسد وطلع ........... (وللا بلاش استروا على ولاياكم احسن).. انت بتفضل تشربها ليه؟؟
الصونف ده بقى لاني مش لاقية كلام كفاية يوصف خيبته القوية.. أحب اقوله يا خسارة الرجالة اللي بينقرضوا انقراض الديناصور آكل العشب المبلول.. مش لاقية يا موكوس انت أي كلام يوصف خيبتك القوية الواضحة ومش مستخبيه.. أدعي عليك بإيه وانت فيك كل العبر.
وحسبى الله ونعم الوكيل
وليكم ربنا يا بنات مصر (والعالم العربي).. عااااااااااااااااااااااااااااا
ليه؟؟ ليه الذكور بيعملوا هلليلة على شرف الست وهم مبعزئين شرفهم (عقلهم يعني.. قلنا بلاش النية المهببة دي يا جودعان) مع شوية دخان بينفخوهم؟؟؟.. بيضيعوا حتة من عقلهم مع كل نفخة دخان.
ليه الذكور دول بيستهتروا بأكبر نعمة ربنا أنعم عليهم بيها (العقل والحكمة والرزانة).. النعمة اللي هي السبب فى انه يتولي القوامة.. ويخوض عراك الحياة؟
وليه بيضيعوا القوة الجسدية اللي ربنا ميزهم بيها عن الست.. اللي المفروض بيها يقدروا يدافعوا عن شرفهم.. وطنهم.. وأرضهم وعرضهم؟؟

أيها الرجل.. لقد شانتي افعالك.. حينما قررت قتل عقلك وتخديره.. حينما لم أجد سندي واعيا ليحميني. حينما نفخت ذلك الدخان من فمك وتطاير مع الهواء.. تطاير معه جزء كبير من احترامي لك.. لم تعد نظرتي لك تحمل ذلك الانبهار بقوتك.. لم تعد في تلك المكانة المهيبة في قلبي.. لم تعد قادرا علي حمايتي.. لا يمكنني الوثوق في قرارك الآن.. لا يمكنني الأخذ برأيك.. أين أنت لتحتويني.. لتتحمل تقلباتي.. لتشعرني بالأمان.. وأي أمان ذلك الذي اتخيله وأنت مغيب في عالم آخر (أو ممسكا بسيجارة ومتمسكا بها.. لا يهمك ان كانت تضرني أو تؤذيني.. ومازلت متمسكا بها لأنها عادة).

عفوا يا أنت (ايوة انت بردو بتاع أممكن اللي فوق خالص.. الحليوة اللي في أول صورة).. فليس لك مكان في حياتي بعد الآن.. لست ابن ولا أخ ولا أب ولا حبيب.

وإلى اللقاء في صفة تانية نهاجمكم فيها.. وأي خناقة يا جودعان ومتقلقوش يا بنات.. كل الصفات اللي بتضايقكم بجهز فيها بوستات.. ده هجوم يا جودعان مش أي كلام يعني.

الاثنين، 15 يونيو، 2009

بنات.. ولاد.. هيا الى الجمعية والجهاد.. هجووووووووووووم

الاول بقول للناس اللي لسة مزرتهمش اني اكيد جايالهم
بس اتاخرت فى الزيارة لان حالتي النفثاوية كانت كل شوية تتقندل من حاجة
شوية ماما.. وشوية بابا.. وشوية الاسمراني.
بس الحمد لله اول ما النفثويات اتظبطت.. هعرف انام اخيرا كويس واتابع الموضوعات وازور الناس الجديدة اللي شرفتنى اول مرة
واخيرا اتابع هجوم الجمعية بضمييييييييييييييير
استعنا على الشقى بالله
بيان استفتاح الجمعية
اخواااااااااااااااااااااااني..
لقد اتخذت قرارًا اريدكم جميعا أن تعينوني عليه..
لقد قررت أن أتنحي تمامًا ونوهائيًا عن أي منصب رسمي (فى أى سلبية بسمح لنفسي بيها).. وأى دور سياسي (فى تهدية النفوس برديك بيناتهم فى البيت.. او الوقوف متكتفة قدام الاعور من غير ما اخزقلة عينة التانية).. وأن أعود لصفوف الجماهير (فى جمعية المرأة المتوحشة) اؤدى دورى معها كأى مواطن اخر (من مواطنات الجميعة صديقاتشى العزيزات)
تشششششششششششششششششششششششششششششششششش
(دة مش صوت تحمير بطاطس وربنا يا جماعة.. دة صوت الجماهير اللى بتحييني).
ومن مميزات الجمعية دى ان كل واحدة فينا تقدر تختار شعار مختلف عن التانية لأن قلوبنا واحدة وتحمل نفس ذات الأهداف.
واحد هييجلي من مدرجات المخنشرين يسألنى وهى ايه أهدافكم دي؟.. هقولة لا تجادل ولا تناقش يا أخ علي (اسمع الكلام بقى مرة فى حياتك يمكن تفهم الستات عايزين ايه.. مع ان هم نفسهن مش عارفين عايزن ايه اساسا).
واحدة هتجيلى من مدرجات الحلوين تقوللي دول صنف مبيملاش عينهم الا التراب وناكرين الجميل.. هقولها صبرك بالله يا اوختشى.. احنا هنعمل اللى علينا ونرضى ربنا وندعية اننا نبقى سعداء ونعرف نسعد حبايبنا.. ونوصل للي قدامنا احساسنا بالخير اللي فيه ونعرفة كمان اللي بيضايقنا.
هنحاول نتفاهم.. وهنبدأ بإن كل مدرج يقول للتانى هو بيتضايق منه فى ايه.. هوصللك يا ادم احساسي ايه من هفوات نفسك اللي ممكن تفتكرها تافهة أو أمر مسلم بيه.. وهحاول أوصل لحواء وجهة نظر آدم (وطبعا محتاجة مساعدة أصدقائنا المدونين فى التعليقات) لحواء في هفواتها والامور اللي بتهملها وهي مهمة لآدم.. عايزين صراااااااااااحة تامة من غير كسوف ولا تجريح.. وللا أقولكم.. خلليها دم للركب علشان البلاوى المستخبية تطلع وتبان..
نياهاههاهاهاهههاهاهاها.
متسيبوش حاجة فى نفسكم يا بنات.. عايزاكوا تقطعوا فروة أى واحد مذكر مضايقكم.. قولوا على كل البلاوى.. ولو وصلت للفنلة والـ...... بردو مش مشكلة.. افضحيهم يا رفيكة الكفاح يمكن واحد منهم يتعظ ويتعدل ويبقى راجل بحق وحقيق.
وانتم يا شباب.. انا عارفة انكوا قرفانين من بنات حوا ونكدهم وتأميرهم وتقلباتهم وسلطاتهم وباباغنوجهم.. قول ياخويا قول متكتمش جوة نفسك كدة لتنقهر وللا يحصلك حاجة.. دة انت لسة فى عز شبابك يا ضونايا.
وبما اني فى مدونتى بقى فأنا اللى هبدأ الأول.. وكمان هنبدأ بتقطيع فروة الشيباب (برديك مش هقول رجالة لان المفروض الرادل الدد اللى على حق ميعملش الحركات القرعة اللى هنحكيها دي)..صحيح انا مش هسيب لا شباب ولا بنات ولا أبهات ولا أمهات الا لما اطلع غللي فيهم.. بس برديك هبدأ بالشيباب.. وتحية كبيرة قوووووووووووووووووي لجمعية المرأة المتوحشة وجميع العثلات اللى فيها.
مش هتكلم كتير في البوست دة.. لسه.. لسة دة انا هفششش غللى الدفين فى صنف ابن آدم وعمايلة المهببة.. بس فى البوستات الجاية بقى علشان مطولش عليكم.
والله ولي التوفيق والسلام عليكم ورحمة الله وبركاته.
تششششششششششششششششششششششششششش.
(ملحوظة: ياترى الراجل ده بيقول ايه فى عقل باله؟)

الاثنين، 8 يونيو، 2009

فتاة صغيرة حمقاء

(الكلام دة من كشكول قديم قوي من سنتين.. يعني محدش يعمل اسقاطات نفساوية عليا)
نعم.. لقد انتزعت ذلك الخاتم الذهبي الجميل من إصبعها
وسقط معه بعض من إيمانها به
عادت ذابلة
ربما امتص الطريق نضارتها
عادت ولا أحد يعلم لماذا
لقد عادت تلك الفتاة الصغيرة الحمقاء...
من نفس الطريق الذي ذهبت منه
ولكنها لم تعد تلك الفتاة الصغيرة.. كما لم تعد حمقاء
عادت والشيب يملأ قلبها
والعجز يملأ كل مشاعرها
نعم.. عادت.. ولكنها فقدت شيئا ما في الطريق
ربما فقدت براءة الطفولة
ربما أصابها غدر البشر ببعض اليأس
ولكنها أبدا.. لم تفقد إيمانها في غد أجمل
اااااااااااااااه هانت يا ربي.. كلها كام يوم وابدأ هجومي الشامل على البشر كلها (وأكيد هبدا بالهجوم على الرجالة طبعا.. نياهاهاهههاهاهاههاهاهاها)

الأحد، 7 يونيو، 2009

أكواد لمحاولة عرقلة جناب الناهب

بعد السلام وأحلي كلام
أعلن عن تراجعي عن كلامي.. وإني لما اكتب خواطر أو أشعار هنشرها هنا فى المدونة دي وأشارك أصدقائي البلوجارية فيها.
مش أنا يا سي حرامي أو يا ست حرامية اللي أبطل أعمل حاجة بحبها بسببكم
مش أنا اللي هفضيلكم عالم المدونات تبرطعوا فيه
اللي عنده ضمير عنده.. واللي معندوش ربنا بإذن الله منتقم جبار.. بيدي لأصحاب الحقوق حقهم في الدنيا والأخرة كمان.
ندخل بقى على الأكواد
طريقة منع التحديد اللى أنا عاملاها.. عرفتها من مدونة احترف التدوين.. اللي بعتلي وصلتها ضد التيار (سويت فيوليت) وإحساس طفلة وكمان (المصرية مسز رايتر) محدش اتاخر فيهم عليا بصراحة.
بس قبل ما تعمل اى تعديل لازم تتأكد انك معرب المدونة علشان مدونتك متعملش قلبان وتبهدلك زي ما مدونتى بهدلتني يا غلبان.
علشان تفهم التعريب وطريقة التعديل كويس ادخل هنا
شرحي العبيط بقى للتعريب اهو
احنا هنروح الأول على تخصيص.. ثم تحرير HTML
*****
وبعدين هننزل على كلمة تحرير القالب
*****
هنلاقى مربع مليان طلاسم عنجليزي كدة.. معلش اتعب نفسك شوية وحاول تركز فى الكلام لغاية ما توصل لجزء معين فى قالب المدونة لتعديله واللى هو اسمة
Variable definitions
*****
بيبقى تحتها كذا بند بيحدد الألوان للنص والخلفية والفونت والكلام دة
احنا بقى عاوزين نوصل للجزء دة
<Variable name="startSide" description="Side where text starts in blog language"type="automatic" default="left" value="left">
نخلي left تبقى right
وتحتها الجزء دة بردو
<Variable name="endSide" description="Side where text ends in blog language"type="automatic" default="right" value="right">
نخلي right تبقى left
****
وبكدة تبقى عربت المدونة ومتقلقش لاتجاهها يتشقلب مع أي تعديل ومتنساش تعمل حفظ...
*******
***
نيجي بقى لطريقة منع التحديد على الكلام
هنرجع تاني لتحرير قالب المدونة
ندور على الكلمة دي
body

ونخليها كدة
body ondragstart="return false" onselectstart="return false
(ومتقلقوش هحط الكلمة اللى فوق دي فى الشات بوكس علشان تبقوا تعلموا عليها وتنسخوها)
وبكدة نبقي منعنا التحديد على الكلام.. بس متفرحوش قوي لان بردو فيه حرامية بتقدر تتحايل على الحكاية دي.
ومتنسوش ان الحرامي أسهل ما عليه يجيب ورقة ويكتب اللى هيسرقه.. بس ادينا بنحاول نمنعه.
*******
***
اما بقى الكود اللي بيمنع الكليك يمين.. فده احساس طفلة بعتتهولى.. وأنا رفعته عى موقع رفع وحطاهولكم هنا..
مع اني مش حاطاه لاني بحب استخدم الكليك يمين.
***
يللا بقى كفاية رغي.. واللي محتاج اي مساعدة يقول ولو انا معرفتش أساعده فى اعدادات البلوج والحاجات دي يروح على موقع احترف التدوين اللى وصلته عندي علي الشمال وانت داخل كدة من باب المدونة.
المرة الجاية ان شاء الله شعر أو خاطرة من خواطري (هيبقى بوست قصير يعني)
وهأجل هجوم الجمعية علشان خاطر الناس اللي بتمتحن.

الجمعة، 5 يونيو، 2009

النهيبة ومواصفاتها.. والناهب والمنهوب

اكيد كلنا سامعين عن طاعون السرقة اللي داير فى التنترنت اليومين دول ودكهومن كمان. النهيبة...
تتميز النهيبة (اللي هي التدوينة المسروقة يعني) بأنها شعر أو خواطر نثرية في الغالب.. كما تتميز بعدد سطورها القصير نسبيا.
يعني من الاخر اللي بيكتب أشعار وخواطر بيتنهب أكتر من اللي بيكتبوا موضوعات عامة.
ونطلع من الحتة دي بإييييييييييييييه.. اني مش هكتب أشعار تاني غير في مدونة لكَ وحدك اللي انا أساسا قافلاها بالترباس.. هع هع هع.
نيجي بقي لانك ازاي تعرف انت مسروق وللا لأ.. أنا شخصيا بحثت علي عناوين المواضيع بتاعتي.. وحتت من جوة الموضوع.. لقيت بالصدفة ان الشعر الوحيد تقريبا اللي كتبته مسروق.. اتجننت وقعدت أدور على طريقة للحماية.. اكتشفت ان انت مهما حطيت من أكواد مش هتعرف تحمي كلامك.. لأن بسهولة جدا الحرامي هيجيب ورقة وقلم ويكتب.. ناهيك عن انك ممكن تعمل زي سيادتي وتبوظ قالب المدونة وتقعد ساعتين تعدل فيه (منك للي كل دراع مراته يللي سرقتي).
الحل بقي انك تفضل تدور على مواضيعك.. جمل منها أو عناوين.. وتفضل ورا المنتدي اللي موجود فيه المنهوب منك.. لغاية ما يشيلوه.
أو لو مش عايز كدة اقفل مدونتك وخليها لأصحابك اللي تعرفهم بس وابعتلهم دعوات للقراءة.
نيجي بقي للمهم...
المدونة دي هتعلمك شوية حاجات جميلة في محاولة عرقلة جناب الناهب باشا.. واعمل حسابك انك أساسا مش هتقدر تمنعة تماما..
ناس بقي عرفت انهم اتسرقوا غيري كتير من الموضوع اللي في مدونة أحمد (أسماء وأحلام في وجداني).
بعنوان ولا بيهمنا...
اقرأوا الموضوع بتاعة كويس وأقرأوا التعليقات.. هتعرفوا ان انت بالذوق تعرف ان شاء الله تجيب حقك وترتاح.
وانا هقتفس (أقتبس يعني) من موضوعة الجملة دي "كل اللى بيحصل ده مش بيهمنا لسبب بسيط جدا ان الانسان اللى ربنا بيهديه موهبة مش بتخلص زى البحر خد منه على اد ما تقدر.. تفتكر هياثر فيه؟؟ ابدا البحر مش هينتهى الا بيوم القيامة.. واحنا كمان الموهبة مش هتنتهى الا بموتنا.. خلى اللى ياخد ياخد لاننا مش هينفع نبطل كتابة.. ولا هنقدر نوقف الناس دى ابدا.. لان مفيش رقابة من اى نوع فياريت اللى اتسرق منه حاجة يقول يارب واكيد ربنا مش بيرضى بالظلم مهما طال الزمن"
واللي يعرف ومتأكد من أي مواضيع مسروقة يحطها لأحمد في التعليقات في موضوعه ربنا يجزي احمد كل خير على تعبه واهتمامه بالناس.
نيجي بقى لإحساس طفلة محبة للرومانسية بس واقعية هي الصراحة تعبت كتير قوي واتنهبت بالهبل تقريبا كل مواضيعها.. وبتشرح للناس فى الموضوع ده..
تجربتها في سرقة مواضيعها وازاي الناس تحاول تعرف هي اتسرقت وللا لأ.. وكما ربنا يجزيها كل خير هي كمان ويوفقها شارحة للناس الأكواد والطرق اللي بتحاول تمنع السرقة بيها.
والحقيقة هي اللي دخلت المنتدي اللي كان مسروق فيه موضوعي وكلمت الادارة علشان يحذفوه.
وأنا ليه تحفظ على كلمة نقل.. انا مصممة إنها سرقة مش نقل.. لإني أساسا مش عايزة حد ينقل أشعاري وخواطري الخاصة من مدونتي.. أنا بشارك فيها ناس بحبهم من البلوجارية ومش عايزاهم يبقوا مشاع على النت.
المهم يا جماعة ان أي حد اتسرق ميكتئبش بقى ويقفل مدونتة وكلام من دة..
لأ.. اكتب ان انت اتسرقت وروح للمكان اللي اتسرقت فيه وكلم الإدارة بكل ذوق.. وان شاء الله ربنا مش هيضيع حقك..
وبجد بجد حسبنا الله ونعم الوكيل في كل ناهب.. وأحب أقول للناهبين.. أوعوا تفتكروا انكم تفرقوا حاجة عن الحرامية.. مش علشان سرقتوا كلام يبقى حاجة هايفة.. مش علشان صاحب الكلام مشارك أصدقاءه فيه على النت يبقى تفتكر انه مشاع ومن حقك تاخده.. انت يللي بتسرق أي حد تبقى مجرم وحسابك عند ربنا.. اوعي تستتفه جرمك أبدا...
وبس كدة كفاية عليكم بقى كل الرغي دة.
اه نسيت أقول ان البنت اللي سرقت موضوعي سرقت كمان الموضوع دة.. اعلى درجات العشق
اللي هو أعتقد بتاع المدونة شباك موارب.. وموضوع شباك موارب أهه.. واللي نازل في نفس يومها بس الصبح.
وكمان موضوع اسمه.. الحب و الكره وجهان لعملة واحدة
النسخة المسروقة هنا
النسخة الأساسية على ما أعتقد هنا ولو اني معرفش صاحب أو صاحبة المدونة دي.

الاثنين، 1 يونيو، 2009

تاج نمبر تو+++ تحديث هاااام

يا جماعة احب ابشركم ان انا كمان اتسرقت.. اة والله قلت بمناسبة هوجة السرقة دي ابص اشوف حاجتى
لقيتني مسروقة
شعر مهدى للأسمراني وقالبين إهدائي محل حلويات.. بشكل غبي
حسبي الله ونعم الوكيل في اللي سرق أو سرقت
الموضوع المسروق فى منتدى هنا
طبعا ايميلي مكتوب فى البروفايل
اللى يعرف طريقة تمنع التعليم حتى على الكلام يبعتلى الكود بتاعها لو سمحتوا
سلام بقى لما اشوف بقيت المواضيع
*******
انا عرفت موضوع السرقة بإني دورت عشوائي فى جوجل علي جمل من مواضيعي للي حابب يكتشف هو كمان بيتسرق وللا لأ علشان مينفعش نسكت على الكلام دة
*****************
علي فكرة انا بعتذر للناس الحلوين اللى أهدوني التاج على التأخير
بس اديني بجاوب علشان خاطرهم
وبقول لكوكيتا يارب تكوني بخير
وحودة امبارح كان عمره عشرين يارب تكون امتحاناتك سهلة
ويارب كل اللى بيمتحنوا وخصوصا موني تكون امتحاناتهم سهلة
ودرجاتهم نهائية
وكل اللى ولادهم بيمتحنوا وخصوصا ستوتة.. يارب تقضوا بعد الامتحانات اجمل وأمتع أجازة في الدنيا
وكل المشغولين.. ربنا معاكم
******
****
**
*
نبدأ التاج بقي
من أنت ؟
منوش العفركوش..
وما الذى تفعله هنا ؟
بطلع خنقتي عليكم.. ليكم ربنا بقى يا مثاكين..
هع هع هع.
إسرائيل تقصف كل جنوب ممكن بحثا عنك، أى شمال ستقصد؟
(اذا كنت كابسة على نفس المدونين الغلابة وبطلع خنقتي عليهم.. هسيب اسرائيل تنفد بجلدها مني يعني!!!).. هفضل قاعدة فى مكاني اقعد اقرف فيها ويا اموتها يا تموتني.
أنت مكلف بحذف حرف من حروف اللغة العربية.. أيها ستختار ولماذا؟
ازاي احذف حرف من لغة القرآن؟.. لكن أحب امسح معاني كلمات كتييييييييييير.. زي (عادي- خليكي فريش احنا فى رحلة- الاستعباط- الاستهبال- المياصة- المرقعة- الأنزحة- الافتراء- البلادة- الظلم- القهر.. معاني كتير بتفرس منها عايزاها تختفي من حياتنا)
لو قدر لك أن تدخل السجن فما هي القضية التي تتمنى ان تدخل بها إليه؟
اممممممممممممممممم..
ولو اني مش هستحمل غلوة فى السجن.. بس لو اتسجنت ممكن تبقى قضية دفاع عن الشرف لان دى الحالة الوحيدة اللى ممكن اقتل فيها فعلا.
بالمناسبة.. منذ متى اكتشفت نفسك؟
هفضل اكتشف فى نفسي لغاية ما افلسع من الدنيا.
على مفترق طريق لافتتان، اليمنى تقول (إلى حلمك) واليسرى تقول: (إلى مالم يحلم به البشر)، أي الطرق ستسلك؟
لا دي ولا دي..
هفضل ادور على الطريق اللى فيه السعادة لاني مضمنش أي طريق فيهم فيه السعادة.
نحن لا نعيش حياتنا بل نتعلم فيها كيف نعيش ما تعليقك؟
احنا بنعيش حياتنا وبنتكعبل وبنتعلم وبنحاول تاني نعيش أحسن من الأول.
بجملة واحدة فقط أكتب تعريفاً لكل كلمة من الكلمات التالية:
الوطن
كلمة تحمل أجمل النغمات.. لكن للأسف تحولت فى الواقع الى لحن نشاز
الأم
عطاء بلا مقابل وحضن دافئ افتقده بشدة
الليل
هدوء استمتع بالسهر فيه
الحب
لو كانت الحياة زهرة فهو بالتأكيد رحيقها
أمريكا
زيها زي غيرها.. كان ليها بداية.. وبقى ليها سطوة.. وهييجي اليوم اللى تنتهي فيه
المرأة
لا تستوي حياة الرجل بدونها وكذلك لا تستوي حياتها بدون الرجل.
الصمت
التزمه وقت الغضب حتي لا أقذف الناس بكلمات جارحة.. أو حينما تعجز الكلمات عن ازاحة همي.
الانترنت
الطبيعي يعني.. بقى ادمان.
اختر منصبا واتخذ قرارا؟
امممممممممممم..
مش عارفة انا أصلا أخاف أمسك منصب لحسن استحلى الكرسى واتغرغر بيه..
بس ممكن أخترع منصب اسمة قاضى الشباب علشان أطلع غلّلي من الشباب والبنات المستهبلين اليومين دول يمكن ربنا ينفخ في صورتهم ويبقوا رجالة وستات بجد.
قيس، عنترة، جميل، هم الذين يقولون شعرا، وليلى وعبلة وعزة «صموت» لماذا هذا التغييب للمرأة؟
الست فى الغالب بتحب تبقى معززة ومرغوبة.. لكن دة لا يمنع انها بتعبر عن احساسها بالكلمات بردو.. لو بصيت كويس فى التاريخ والحاضر هتلاقي كلمات الأنثى وتعبيرها يملأ الكون.
(حتة توحش بقى من نفسي) »»»
هو فى الغالب الراجل المستفصطائي بيحب يبين ان الراجل انفرد بعلامات العبقرية كلها وهيقعد يقول ان عظماء التاريخ كلهم رجالة واعظم موسيقيين رجالة وأعظم رسامين رجالة وأعظم شعراء رجالة وان حتى الطباخين رجالة.. والسخص اللى بالشكل دة أحب اقولة (يخى روح اتوكس اكتر منت موكوس.. ويعني هدعي عليك بإييييييييييييييييه وانت فيك كل العبر.. يافرحة مامتك بيك يا كوتوموتو).
أن تكون مطلوبا لارتكابك جريمة، خير لك من ألا تكون مطلوباً مطلقاً، هل تتفق مع هذه العبارة ؟علل
لا أنا متفقش مع نظام أنا مجرم إذن أنا موجود.. وبعدين هى البلد ناقصة مجرمين وحرامية.
إلى أين تمضي كلمات الحب .. بعد أن نقولها؟
تخرج من القلوب لتستقر في قلوب أخرى.. وحتى إذا مراحتش للي يستاهلها فهي بتفضل في قلبنا إحنا.
هل تجد علاقة بشكل أو بآخر بين المرأة وقطاع الطرق؟
سيبوووووووووووووووووووني..
محدش يحوشني يا جماعة..
عجبت لمن يشبه قاطع الطريق "الغاصب السارق" بمن يسلمها (بكامل إرادته ووعيه) حصون قلبه وشرفه وسمعته واسمه وبيته وأمواله وفلذات أكباده وتكون له حضن رقيق حنون وبلسم لجراح الحياة.

(أنا راضية ذمتكم.. حد يشبه الحرامي الشرير أبو مسدس ده.. بالوردة دي؟؟؟؟)

هذا فراق بيني وبينك .. متى ولمن تقولها؟
لا أتردد فى قولها لمن يهينني أو يكسرني.
كيف هو غداً؟
في علم الغيب ورحمة الخالق.
لمن تمرر التاج؟
لكل اللي في الريدر عندي وكل اللي مش في الريدر وهيعلق على الموضوع.. مش هدبس حد بالاسم تاني منعا للزعل والاحراجات مع إن التاجات دي جميلة والله بس مش عارفة المدونين بيهربوا منها ليه.
وانتظروا فى المواضيع القادمة.. هجوووووووووووووووووووووووووم الجمعية الموقرة علي كل مفتري وفي أهله مش سائل.. ان كان ست وللا راجل..
بس خلاص.