الثلاثاء، 7 يوليو، 2009

شوية كلام فاضي عن هو وهي

انا عارفة اني عيلة وكل شوية أقول هكتب المرة الجاية عن معرفش ايه ومبعملش حاجة.. بس فعلا بعتذر عن عدم متابعتكم وعدم ردي على التعليقات.. وبرخامتي كالعادة مش عايزة أقول السبب.
سويت فيولت اوعي تزعلي يا قمر.. وسارة وأم أحمد وكل اللي سأل عليا.. أديني جيت أخنقكم أهو
والحوار الجاي دة مش مهم ولا مهم انا بتكلم فيه ليه.. أديني ببعبع بالكلام فى المدونة وخلاص.
بيلفت نظري ان النسبة الأكبر من الشباب (أو الأهل) بيرفض يتجوز بنت من سن ال30 او اكبر.. وبيعتبروا ان مدة صلاحيتها انتهت.
طب بالذمة على أى أساس يعني؟
وهو مين اصلا ضامن هيكمل يومه وللا لأ لما هيضمن شباب وللا صحة وللا جمال وللا مال.
يعني هل الشاب مثلا ضامن صحته للأبد علشان يضمن جمال البنت للأبد.
هي الناس بقت بتختار بناء على ايه؟
المال والجمال والصحة والدين المظهري بس
وللا الأخلاق والمعاملة الطيبة فى الاول وبعدين وراها يجي أي حاجة تانية.
وبعدين يعني هم الشباب اللي بيتأمروا على البنات دول وأن البنت سنها كبير.. على اساس يعني ان الواحد منهم فاكر نفسه براد بيت مثللا وللا توم كروز وللا حتى فى أخلاق حد من الخلفاء الراشدين ويستاهل ست الحسن والجمال ذات ينبوع الشباب الابدي.
يعني بالذمة مثلا واحد عنده 32 سنه مامته بتعرض عليه أمر بنت قده فى السن للجواز وبيستنكر قوي يعني على أساس ان مدة صلاحيتها انتهت ويدوب ممكن ترضي بحد عنده خمسين وللا ستين سنه.. احب أقوله يخي روح اتوكس وربنا بإذن الله يرزقها براجل بجد مش واحد زيك.
طيب نتكلم شوية فى فرق السن..
..
فرق السن لو الراجل أكبر الناس بتعتبره عادي جدا وان هو ده الطبيعي لأن الراجل المفروض عقله يبقى أكبر من عقل الست علشان يعرف يشد اللجام.. قصدي ياخد القرارات.. طب بذمتكوا مش ده اعتراف ضمني ان الرجالة اساسا عقلهم اصغر من عقل الستات اللي فى نفس سنهم
وده مش صحيح
ومننساش ان الرسول عليه الصلاة والسلام تزوج من تصغره فى السن بأعوام كتييييييره.. ومع ذلك كان قادر على احتوائها.
طيب لو الست أكبر من الراجل.. ناس كتير اساسا بتستنكر الموضوع ده لأسباب كتير.. أولها ان الست بتمر بمرحلة اليأس وانقطاع الدورة فى عمر مبكر شوية وهو ما بين الاربعينات والخمسينات.. وجهلهم بيصورلهم ان بعد المرحلة دي الست مش هتقدر تسعد زوجها (جنسيا).. طب بالذمة عمرهم ما سمعوا عن أدوية للحالات دي حتى بيستخدمها بعض حديثي الزواج اللي بتقابلهم مشاكل.
ناس بردو بتقول ان الست هتبقى غيورة قوي والطبيعي ان جوزها هيبص لستات تانية لما هي تعجز شوية.. دول بقى احب أقولهم ان طبع البصبصة فى الرجالة بوجه عام.. والراجل مش هيستنى لما مراته تعجز علشان يبص لحد تاني لانه بيبص أصلا.
ناس تانية بتقول ان الست ملامحها بتعجز اسرع من الراجل وده هيسبب مشاكل.. الحقيقة انا مبشوفش الحكاية دي غير فى مصر والمجتمعات اللي زيها.. اللي الست فيه بتقوم بدور الراجل والست وتتحمل المسئولية جوة البيت وبره البيت وفى كل حته لوحدها وجوزها مش فاضي غير لشغله وبس.. لا فاضي يربي العيال شوية ولا فاضي يقف مع كهربائي ولا اى صنايعي ولا فاضي حتى يرفه عن اهل بيته شوية.. مهو طبيعي ساعتها ان الست تشيب ويجيلها مناخوليا اساسا مش تعجز بدري عنه وبس.
ومننساش ان الرسول عليه الصلاة والسلام كانت أول زوجاته السيده خديجة.. أكبر منه بحوالي عشرين سنه.. وبردو كان قادر على احتوائها.
وللا هو احنا بناخد الرسول قدوه فى اللبس والمظهر وبتناسى الأمور الجوهرية في حياته من معاملات ورزانه ورجاحة عقل وصبر وحكمة.
أنا شخصيا رأيي فى موضوع السن ده انه ملوش أي علاقة بأساس الاختيار السليم للزوج أو الزوجة.. لأن الاساس هو القبول ثم الأخلاق ثم التفاهم والاحترام ثم الاختلافات الفردية اللي ممكن ناس تقبلها وتتحملها وناس تانية متقدرش عليها.
بس خلاص.. انتهى الكلام
دة انا رغاية قويييييي

80 اللي عبروا منوووشة:

ذكري رحيل قلم يقول...

السلام عليكم
اخيرا فتحتي المدونة طيب قفلتيها ليه المهم انك بخير يا قمر وحشتيني وحشتني شقوتك
الموضوع مهم ونصايحك غالية يارب يفهموا وتكون سبب في تغيير عقول كتيرة

انا شفت مثال للزوجة التي تكبر زوجها بخمس سنين وبالرغم من ذلك تقول بيننا الاحترام والاحتواء

متي بخير وسلام

yoyo يقول...

صباحك سكر يا منوووووووش

حمد لله على السلامة يا ريسة
بلاش نرجع فى كلامنا تانى بقى
و نسيب الحزب كدا يضرب يقلب يعنى
يالا بقى نروق كدا قدام الدكان ههههه
يوه قصدى المدونة
هههههههههه

yoyo يقول...

يا صباح السكر اللى دايب فى العسل
ايه الجمال دا
انا تانى تعليق
و التالت دا بقى عشان خاطر الحبايب

yoyo يقول...

ودا عشان انتى واحشانى اوى اوى
وفرصة بقى نعمل احتلال صغنن كدا عن مانو القمر
مش عارفة ايه اوشاعة انى محتلة دى
ناس غريبة و الله
ههههههههه
ايه الظلم دا

yoyo يقول...

لما نشوف اخرة سى هو دا ايه
وياترى عاوز ايه من الست هى
هو مش كلام فاضى و الله
دا كلام فى المليان كمان
وضرب نااااااااااااار لصباح الباكر
هو دا الكلام
اكمل وارجع تانى
االبيت بيتنا بقى

yoyo يقول...

هى يعنى ايه العيب ان البنت سنها يكون مقارب لسن جوزها هى جريمة ولا ايه
على العكس هيكون فى تفاهم و احترام متبادل
عقل واحد وفكر واحد وحب وروح واحدة
ياسيدى على كدا
انما الفرق الكبير بين الراجل و الست بيكون كارثة هى فى وادى وهو فى وادى تانى و النهاية السودة هى الاساس

وصباح الاكياس النيلون بقى والتقطيع
هههههههههه و الست فتاكات قتلت الحاج سليم ومعها عشيقها ابراهيم
هههههههههههههه
ونرجع نقول دا من ايه
هو فى الاساس معتقد واختيار خاطىء
ان لازم الست تكون اصغر وبكتير عن الراجل
هو يعنى هى هتعجز وهو هيكون عنتر بن شداد
يا شيخة ان الله حليم ستار
واحنا برده عندنا ولايه
هههههههههههه

لاسع افندى يقول...

مافيش مشكله لو الواحد اتجوز واحده اكبر منه ..بس يبقى ياخد ضمان ويعمل الصيانه الدوريه فى التوكيل



تحياتى اوافقك الرأى

yoyo يقول...

اه معليش حتة كمان صغننة كدا على الماشى
الست بتعجز و يبان عليها السن على راى تيتة من الشغل و الشقا
يعنى ام وزوجة و موظفة دى اكتر من سبة ارواح
ربنا يعينا بقى

تسلم ايدك ايوه كدا كلام تمام والله
بس موضوع ان الست تتجوز راجل اصغر منها بيكون صعب شوية واغلب المجتمع مش بيتقبل الوضع دا رغم ان فيه زيجات كتير ناجحة ومستمرة

مش تغيبى علينا بقى يا قمر
دمتى اختى بالف خير و سعادة
تحياتى
يويو

mohamed ghalia يقول...

الكلام كله له معنى
الحياة تكافؤ ملهاش علاقة بسن ولا اى حاجة
حمدا لله على السلامة

المهاجر يقول...

انا فى رايى لو البنت كبيرة سنتين أو تلاته بكون الحد معقول وده فى جميع الفئات العمرية أنا بتعجب ليه يرفض يتجوز واحده كبيره عنهسنة مثلا ولما يوصل ستين سنة ممكن يتجوز واحده عمرها أقل من نص عمره

المهاجر يقول...

شكرا على البوست الجميل والرائع

مصطفى أبوزيد يقول...

حمدا لله ع السلامه
العلاقه العاطفيه الناجحه لازم تمر ع العقل الاول

hasona يقول...

السلام عليكم

حمد لله علي السلامة

وان شاء الله تكون فترة جيدة
وكانت فترة مراجعة مع النفس
ووقفة للحياة

hasona يقول...

السلام عليكم

موضوع جميل ومهم

Me7'o يقول...

يومها بس عمل عبيط
مع اعتذارى

الظاهر إنه طول فى حكاية العبط دى شوية

علشان يقول لمراته كلمة زى دى

يانهار أسود على دى كلمة

ده الواحد تبقى مراته عندها سبعين سنة والمفروض إنه يكون لسه بيدلعا زيها زى بنت خمستاشر

مش يقولها كلمة زى دى
وقال يه ما تزعليش

إذا كنت انا أهوه اللى ولا أعرفه ولا أعرفها زعلت
أومال هى تعمل إيه

إيه العبط ده

معلش فى الشتايم دى

أنا والله ما أعرف حد خالص
وأول مرة كمان أعلق هنا
بس الصراحة دمى أتحرق من الكلمة دى

أصلها تقيلة قوى

Me7'o يقول...

ممكن بقى اعلق على البوست نفسه

أنا من رأيى السن المناسب يكون من 5 إلى 8 سنين لصالح الراجل

لإن ولا البنت السيدة خديجة ولا الراجل سيدنا محمد

يعنى بصريح العبارة الحكاية كلها حكاية قبول وتوافق أفكار وتواؤم أرواح

يعنى لو فيه حب وحسن عشرة يبقى خلاص إنسى حكاية السن دى لما الراجل بيكون زى الشحط كده وبيحب يعيط على صدر مراته
يعنى ساعتها ما بيحسش بفرق السن وإنها أصغر منه

بس الشطارة بقى من الراجل أولاً ومن الست ثانياً إن كل واحد فيهم لازم يكون أب وأم للتانى

عمركيش شفتى واحد أكبر من أبوه ولا واحدة أكبر من أمها؟؟؟

تحياتى

عاشقه الرومانسيه يقول...

دى تقاليد ومفاهيم مجتمع ذكورى بحت
ان الراجل لازم يكون اكبر من البنت
عموما هو وهى بس اللى يقدروا يرسموا حياتهم
ويفكروا فى بكره شكله ايه
مش الاهل
لان مش دايما نظره الاهل بتكون صح
لان فى اختلاف كبير فى الثقافات
والاجيال
ربنا يوفق هو وهى للخير يارب

معتز شاهين - باحث تربوي يقول...

فعلا مشكلة فكر وعقلية غريبة مسيطرة على المجتمع

يعني هما اللي فوق التلاتين مش ستات

خنقتيني والله بالكلام ده بس للأسف هو ده الواقع

ويبقى التواصل

فتاه من الصعيد يقول...

هو العرف جرى ان الست تكون اصغر ..... لكن في ناس بتوافق عادي
المهم الراجل يكون مقتنع وميدايقهاش بعد الارتباط بالموضع ده

ذو الوجه المبتسم يقول...

السلام عليكم
اولا حمدلله على السلامة
ثانيا انا من عشاق الفضفضة
وبخاصة لما بتكون بتلقائية وارتجاية
باحس انها طالعة من القلب
علشان كده بتوصل للقلب مباشرة بدون اى حواجز

البوست بجد جميل
تقبلى تحياتى

أبو كريم يقول...
أزال المؤلف هذا التعليق.
عايش... ولكن !!!! يقول...

مجتمعنا عادة بيفرض علينا حاجات
لو هربنا منها
هتطاردنا وقت طويل
فينا اللى بيكبر دماغه
وفينا اللى بيركز فى الكلام والكلام بيضايقه وينغص حياته
لكن قليل جدا ان الراجل يتجوز حد اكبر منه
ده اللى بيتجوز حد قده بيقولوا كانى ومانى :)
دمتى بكل الود

blue-wave يقول...

يا سلام يا ولاد
ايه كل الكلام الكبير دا؟؟؟
عموما انا بس عايز اعقم على فرق السن
بصى بقى ومن غير زعل
فرق السن لو زاد على 7 سنين بقى فيه مشاكل
الرسول استثناء دا الرسول عليه اشرف الصلاة والسلام
لكن الناس العاديه بيكون فيه فرق تفكير وفرق تعامل وفرق تصرفات وفرق اجيال
من الأخر مش نافعه
تحياتى

عمرو يقول...

الحمد لله على سلامتك
طبعا اللى يفكر بالشكل ده يبقى محدود النظر و الأفق و العقل و الضمير لأن فرق السن مش عقبه و لا مشكله بين الأتنين اللى مرتبطين ببعض عاطفيا و كتير جدا من الجوازات اللى مافيهاش فرق سن بتفشل و بتروح فى أبو نكله و بتبقى الجوازات اللى فيها فرق سن ..
بس بعد اٍذنك ليا ملحوظه صغيره خاصخ بزواج البنات برجال يكبروهن بكثير من الستوات ..
هنا دى محتاجه تأنى شويه و تفكير عميق من البنت قبل الاٍرتباط برجل أكبر منها مثلا بعشرين أو تلاتين سنه رغم المغريات الكتيره اللى غالبا بتكون السبب فى موافقة البنت على هذه الزيجه ..
بوست جميل و قوى ..
تقبلى تحياتى و تقديرى ..

أحمـــــــــــــد أبو العلا يقول...

عشان اجاوب عليكي عايزك تتخيلي منظر الناس وهما قاعدين مربيين دقنهم وفي صلاة الجمعه بيسمعوا للامام وهوا بيقول يسروا في الزواج واختاروا ذات الدين
وكله يهز دماغه ويقول طبعا لازم نعمل كده

بس اللي على الشط عويم
أول لما ييجي الجد, ايه ده؟ ده الفرق بينكم في السن كبير وازاي اصلا متكونش انت اكبر منها, وكلام كتير

الدين في مرحلة الزواج يتسأل عنه سؤال عابر لكن المهر والعفش والامكانيات والجمال والحسب والنسب والعيله والمستقبل والشقه والأولاد والعيشه واللي عاشينها واللي عايزين يعيشوها أمور مهمه لازم نناقشها بالتفصيل الممل

انما الدين والاصل في الختيار, مسأله فرعيه هتبان مع الوقت

mosooz يقول...

اممممممممم
سواء اكبر او اصغر بس الفكرة اهم يتقبلوا بعض ويقدروا يعيشوا مش بعض

بس فى حاجة
_______________--
اللي الست فيه بتقوم بدور الراجل والست وتتحمل المسئولية جوة البيت وبره البيت وفى كل حته لوحدها وجوزها مش فاضي غير لشغله وبس
----------------------

هما البنات اللى بيعملوا فى نفسهم كدة ..وبيعجزوا نفسهم بدرى ..يعنى لو كل واحدة قعدت فى البيت واهتمت بنفسها..مش هتعجز بدرى..بس ياعينى على الستات اللى بيشتغلوا كل يوم ..وطقم مكياج كل يوم مخصوص...بتبقى قلبت على راجل فى التليتنات..وبالذات لو شغالة فى وظيفة حكومية

نورتى المدونة من تانى بعد الغيبة الطويلللللللللللة اوى دى

تحياتى

ذو الوجه المبتسم يقول...

السلام عليكم
موضوع فرق السن بين الازواج
بيختلف من شخص لاخر
بخصوص البنت لما بتكون اكبر
بتفرق ؟؟؟
لاسباب منها
احساس الرجل بعد الزواج بفرق السن
احساس الست نفسها بفرق السن فى مواقف معينة بيخليها تتعب نفسيا
الحب ممكن يكون موجود بالفعل
ومفيش مانع تحبى واحد اصغر منك
لكن خلى بالك
علشان الصدمة ممكن تكون كبيرة بعدين
مش عاوزك تبعدى عنه
لكن فكرى بعقلك قبل قلبك
الحب مش بايدينا لكن نفكر بعقولنا برده

طبعا انا باتكلم لو انتى صاحبة الموضوع
ولو اى بنت تانية طبعا لازم تفكر

الازهرى يقول...

ممكن لو سمحتى تبعتى لى عناوين الناس اللى قالوا لك ارجعى علشان ابعت لهم طرود متفجرة زى العلماء الامان كد
يعنى انا يا دوب راجع وباقول زمانهم ماوتا واستريحنا الاقيكم كلكم كده بربطة المعلم موجودين ؟

الامر لله نستحملكم للاخر

صحيح اتمنى تكونى بخير وان يكون سبب الزعل انتهى صحيح انا مش فاهم لكن بادعى بصدق ان مهما كان يكون خير


وبخصوص الزواج مع فرق العمر فانا محاط بعدد من الاصحاب ممن ينوون الزوان بمن تكبر عنهم والمشاكل حولهم بسبب ذلك كثيرة وان كنت اقف معهم الا انى متحير هل هم على حق ام لا
على الرغم من اننى اوافقك فى كل ما قلت
وايضا ان الرسول صلى الله عليه وسلم لم يضع ضمن شروط اختيار الزوجة السن وهذا على حد علمى البسيط

وهناك العديد من الامثلة لزيجات من هذا النوع وناجحة جداجداجدا

اما بخصوص توم كروز وشلته ففكرتينى بقولة قديمة عندما سئل احدهم لم لم تتزوج حتى الان ؟
قال كان شرطى ان اجد المراة الفاضلة وعندما وجدتها كانت للاسف تبحث عن الرجل الفاضل

تحياتى دوما ودعائى

الازهرى يقول...

اه نسيت اقول لك

انى موافقك برضه فى موضوع انك رغاية ده

الشعب لابد له من حكومه تشكمه يقول...

شوفى احنا فى مجتمع بيسمح للرجل انه يتفرج ويختار من الفاترينه الهانم اللى تعجبه ويتأمر ويتشرط,ليه مش عارفه!!
انا واحده صاحبتى عندها 27 سنه واتقدملها واحد عنده 38 سنه ولما عرف انها كانت مخطوبه قال سورى انا مش عاوز واحده يوزد(مستعمله يعنى) تردى تقولى ايه بأه عن العقليه السكر دى؟ ننوس عين ماما اللى داخل على الاربعين بيقولها كده وهى اصلا مكنتش موافقه لفارق السن.
النسبه ان البنت تكون اكبر من الولد,ده يرجع للبنت نفسها وللشاب كمان.
لكن انا شخصيا وعن نفسى عمرى مفكر ارتبط بواحد اصغر منى بيوم واحد.

متغيبيش تانى لو سمحتى.

حلم بيعافر يقول...

هى بجد نظرة متخلفة جدا
ويمكن تبان اكتر عندنا فى الريف
افسرهالك بقى
الواد لو عنده مثلا 30 سنة بيحب برضه يتجوز واحدة عندها 18 سنة عشان ايه بقى؟
عشان هو لما يكبر شوية هى ماتبقاش كبرت قوى يعنى بس هى دى كل الحكاية
انا لو بحب واحدة ان شالله اكبر منى عادى لان الحكاية مش منظر من بره وخلاص دى قلوب بتتفق وبترتاح لبعضها

ABOALI يقول...

الحياه كبد ومعاناة وجهد يعطى من الطرفين سواء رجل او انثى

نظرة الحياه بين ادم وحواء هى نظرة اكتمال

الكل يكمل الاخر

هناك وجهة نظر تقول اذا تزوج ادم من تشابه فى السن
سيكون صعبا فى بعض الاحيان تشكيل وجدان الاخر لاء كلاهما اخذ قالب وشكل معين

لذا الفارق السنى مستحب

لاءن العواطف ليست فى كل الاحيان القاطرة التى تسير بالعربة


الدين اساس دعوته الواسطية
فلا هناك ميل ناحية الفرق الواضح ولا ميل ناحية اللافرق


ضغوط الحياه كما قولتيها تشكل تعاريج فى قسمات الوجة

لذا عوامل كتيرة تتدخل للمحافظة على البسمة حتى نستمر

منها التلاقى بين الطرفين وفهم مسئوليات الاخر


اختصارا

فارق السن بين حواء وادم
مطلوب على وجة العموم

لا يدرك ذلك الا من تزوج ومرت به السنون
واراد فى يوم ان يتكأ على وليفه
فينظر اليه فيجده هو من يبحث عن من يتكأ عليه


من خارج الاسوار نكتب كما نشاء
بفعل الضغط العاطفى

ولكن من خلف الاسوار الرؤية مختلفة


موضوع مميز مميز
ويعبر عن حالة الاختناق بجد

Sweet Violet يقول...

هما بينظروا ليها على حسب العرف السائد مش على حسب الدين

بس على فكرة بقى انا دماغى لفت بسبب حوار هو و هى
انا كنت فاهمة بس لما جيت عند الجزء ده مش عارفة توهت
او ممكن اكون انا اللى تايهة اصلا v_v
ماعلينا

سيبك بقى من اللى فوق

حمدلله على السلامة ياهانم
و ياريت مش تتكرر تانى بدل ماضد تطلع على توأها تقتله

ঔღঔ نـــوارة ঔღঔ يقول...

وحشتني ياقمراية

بصي ياحبيبتي الموضوع مش بالبساطة الي بتتكلمي فيها انتي لسه مجربتيش الزواج ومعرفتيش ازاي علاقة الحب بتكون بعد الزواج

الازواج بعد الزواج بتكون متطلباتهم كتيرة الحب موجود وعلى العين والراس لكن تفكيرههم بيكون بالجنس والجسم المثير والكلام دا ومفيش راجل يكره انه مراته تكون موزة طول الوقت وفرق السن بينهم هيكون مصيبة انا برأيي يكون الزوج اكبر من الزوجة مالايقل عن 5 سنوات

ايه الي يجبر الراجل يتجوز وحدة اكبر منه هي البنات خلصت

المفروض البنت الي ترفض لانه بعد كام سنة جواز هتبقى كبيرة عليه وهيتقل منها ودا بيحصل كتير

انا عن نفسي مقبلش اتجوز شاب اصغر مني ولو بشهر ازاي البنات ترضى بكدا

ومتقليش الحب و القبول زي مالقت القبول عند الشاب دا هتلاقيه عند غيره

مشكلة البنات انهم بيتكلموا وبيحلموا باحلام وردية مش في قلب الحدث :] عايشين بتحلموا بالحب والسعادة المطلقة وناسيين انه المشاكل والضغوطات بعد الزواج كتيرة وبتقابل الجميع سواء متجوزين على حب ولا من غير حب

خلاصة الكلام السن عامل معهم ومنقدرش نتغاضى عنه

تحياتي ياقمراية

Che يقول...

منوووووووووش .... انا تعليقى صغير جدا المره دى عشان مش قادر اكتب
الرجاله عندنا فى مصر غالبا مش بتحب تتجوز بنات فوق التلاتين لسببين .. يا اما الراجل يكون جد و عايز يعمل اسرة و بيحس ان البنت فوق التلاتين فرصتها بتقل فى الانجاب ... يا اما رجاله هلس و دول بيقولوا ان البنت فوق التلاتين مش هتفضل حلوة كتير
الحوار اللى انتى حكتيه انا مش هاعلق عليه

أم أحمد المصرية يقول...

حمد لله علي السلامة النت نور :)
اما حكاية السن دي فأنا مش شايفاها مشكلة بشرط ان الطرفين يكونوا مقتنعين مش امهاتهم انا شخصيا مامتي اكبر من بابايا سنتين و متزوجين بقالهم 47 سنة ربنا يديهم الصحة و العمر شفت بقي مخهم متفتح من امتي

كيكى عوووووو يقول...

ممممممممم انا رأى مفيش حاجة اسمها فرق سن بين اى 2 بيحبوا بعض اشمعنى لو كان العكس كان عادى
بس طبعا الكلام دة مش مع اى حد
ع فكرة هو مكنش بيحب هى!!

همسة يقول...

إزيك يا قمر .قلقتينا عليكى يارب تكونى بخير. بس بصراحة بوست جامد جداجداجدا وانتى لخصتى فية حاجات كتيرة. وبعدين أنا أعرف واحدة أكبر من زوجها ب 3 سنين وما شاء الله متفامين وسعداء فى حياتهم .
بس إحنا مجتمع فية مفاهيم كتير غلط
ومش مسهل نغيرها

تامر علي يقول...

قصة فروق السن دي في الأصل مسألة نسبية لكن الحقيقة إن الأعراف حولتها لمسألة مصيرية بفعل الأهل اللي بيعارضوا الموضوع بشكل عنيف جداً بدون أسباب عقلية ... لكن أعتقد إن القرار يحتاج لكثير من التريث فعلاً ...لأن الكثير من حالات الزواج "العادية " تفشل بسبب اختلافات الطبائع بعد الزواج والفشل في ال"التطبيع" وفي هذه الحالة ستكون الخسائر فادحة "بالنسبة للزوجة" حيث ستنعدم فرصتها تماماً في الحياة مرة أخرى .

تحياتي :)

ساره يقول...

تعرفي يا منووش كل يوم ادخل عندك
وماكنت عارفه ايش اعلق

يعني فى هذي الامور بالذات ماحد يقدر يدخل لاني ببساطه مش عايش ظروف البنت ولا الولد .. ولا اساس العلاقه وجديتها

بس اقدر اجاوب من منطلق اني وحده اشوف الصوره من بعيد ... هنا العقل اللي يحكم مش العواطف ... اكيد الرسول صلي الله عليه وسلم تزوج خديجه رضي الله عنها وهى اكبر منه بعشرين سنه .. بس مين الحين يعمل زي افضل الخلق ... الشباب الحين يلحق ورا الصغيره وعمري مافهمت الهدف ولا الفرق
بس اكيد هم عارفين

فى النهايه .. اذا كان نصيبها بتاخذه غصب عن الكل

اشوفك على الماسنجر قريب ان شاء الله
ابوسك :)

آفشنا حرامي يقول...

نحن فى انتظار زيارتك

لامر هام

يختص بينا كأسرة واحدة

اقدم عاصمه فى الحب يقول...

إحم إحم
يا اهل الله ياللى هنا

انا اول مره ادخل هنا وبجد مدونتك رائعه وعجبتنى كتير

نيجى بقه لموضوعنا
بصى يا ستى
هو الواحد لما يكون له رأى فى شىء بيبقى مجرد رأى نحترمه ونسمعله لكن اسمحيلى اتناقش معاكى فيه
فى حجات كتير بتحصل من الكلام ده بس بجد الرجاله عنده حق
علشان شايفين قدمهم بنات كتير اوى لازم الشاب يتعوج ويحط رجل على رجل وهو بيختار
ما هو الرسول عليه الصلاه والسلام ماكنش متجوز واحده بس
وكمان الخلفاء الراشديين
وكمان الناس اللى كانوا معاهم فلوس وحالهم متيسر ماكنوش متجوزين واحده بس ولا حتى اربعه بس دول كانوا بيتجوزوا اربعه وكان بيبقى عنده اكتر من عشرين ست اسمهم ممن ملكت يمينه
لكن دلوقت فى عنوسه كتير احنا احولنا مش متيسره علشان نتجوز واحده بس ولا حتى البنات معاهم اصلا علشان يجهزوا نفسهم فاللى بيبقى معاه قرشيين بيبقى طالع عينيه بيهم وحاسس انه جاب الديب من ديله وشقى عمره والشعارات المفيده دى
فلازم بقى يوم لما يختار واحده تشاركه فى كل ده وتشاركه فى كل حياته لازم تكون فيها كل المميزات من اخلاق ومن دين ومن اهل ونسب وجمال والحجات دى
ثم مش كل الشباب تفكيرهم فى ((الزوجه الجنسيه اوى دى))
فى كل مجتمع فى الناس الحلوه والوحشه ومش معنى كده ان الناس الحلوه مش بتبقى فى دماغها الكلام ده لا بالعكس دى غريزه فينا ثم يعنى البنت لو عندها 30 او أكتر من السنين وطلع العريس بتاعها ده مش حلو شكلا مثلا (( قرفانه منه )) والله العظيم لو هتعنس ده لو حتى لو معاه مال قارون واخلاقه دى ايه مش هتتجوزه فلازم يكون من شروط الموافقه من الطرفيين الجمال ولا انتوا ايه رأيكوا يا جماعه
ما هو بارضه البنات اللى بتفضل شاغله دماغها بقيل وقال وهو وهى لازم يكونوا شكلهم أكبر من سنهم
ولازم ما حدش يبصلهم علشان فى غيرهم اجمل واحلى وحجات كده..

يا رب ما كنش بوظت الدنيا
بس انا مدون بقول رأى من وجهه نظرى
ويا رب مايكونش حد مختلف معايا ويزعل منى
..
.
.
..
بجد اسعدنى الوجود هنا
اوعدك بالتواصل ما دامت الاحوال ميسره
كونى كما تحبى

MaNoOoSh يقول...

ذكري رحيل قلم
تمام يا قمر
الاحترام والاحتواء من أهم أركان الحياة الزوجية حتى لو اختلف العمر
والامثلة الناجحة كتيرة بس احنا اللي ساعات بنعمي عنينا عنها علشان نتمسك بأفكار اكل عليها الزمن وشرب
نورتيني يا قمر


***********

yoyo
انتى نوري يا يويو حتى لو احتليتي المدونة كلها
بس ايه صحيح الاوشاعات المغرضة اللي طالعة عليكي دي
هههههههههههههههههههه
وبعدين انا لا يونكن ابدا افكر حتى مجرد تفيكر في خيالي انى اتنازل عن الهجوم

انا معاكي فعلا ان الفرق الكبير مش مستحب
لكن فى الاساس التفاهم والاحتواء هو المطلوب مش فرق السن
يعني الواحد لما بيدور على شريك حياة بيدور على حد يلاقى معاه الموده والرحمة وحد يتقى الله فيه
ولما الانسان يلاقى الشخص ده المفروض يتمسك بيه حتى لو كان فيه فرق فى السن.. وللا ايه؟
وبعدين على رأيك يعنى هى هتعجز وهو هيكون عنتر بن شداد
ما الراجل كمان قدرته الجسدية بتكون بدأت تقل كتير لما بيبتدي يدخل على الاربعينات والخمسينات
وفعلا المجتمع بيستنكر فرق السن (لما تكون الست أكبر) ده رغم الامثلة الكتير اللي بتبقى انجح من فرق السن اللي بيكون فيه الراجل أكبر.
وده بيأكد ان الست محتاجة احتواء ومعاملة طيبه مش واحد عمره اكبر منها وفاكر انه مجاش قبله ولا هييجي بعده.
ومتقلقيش يا قمر
انا مش هغيب تانى
وان شاء الله هطلع غللي كله فى الرجالة المواضيع اللي جاية وهسيب الستات شوية كده

************

لاسع افندى
طب مقولتليش الواحد يبقى يعمل موضوع الصيانة ده فين.. وياريت تدلنا على مكان التوكيل
رجالة مصر هيجروا على التوكيل ده كلهم
ههههههههههههههه

*************

mohamed ghalia
فعلا يا محمد
التكافؤ العقلي والأخلاق الطيبة فى المعاملة ملهمش دعوة بسن
لان العقل ده فروق فردية بين البشر ومش معنى ان حد كبير يبقى حكيم يعني ولا فيلسوف.. ممكن يكون عقله اصغر من طفل

*************

المهاجر
فعلا
الحقيقة عقول الرجال وطريقة تفكيرهم الوقتى بقت بتستعصى على تفكيري
مش عارفة الاقيلهم منطق سليم بيفكروا فيه
يظهر الخيالات (اللي لا تمت للواقع بصلة) اللي طول عمرهم بيتصوروها عن الجنس الاخر بيكون ليها دور كبير فى تفكيرهم.

*****************

مصطفى أبوزيد
الله يسلمك يا مصطفى
وفعلا العقل لازم يكون فلتر لمشاعرنا وتعدي عليه قبل ما ناخد قراراتنا

***************

hasona
اتمنى اكون فعلا قدرت اراجع نفسي
وربنا يلهمني الصواب

***************

Me7'o
الاول نورتني فى اول زياره
بس يظهر انك فهمت الموضوع غلط
هي مش مراته
دول اتنين قرايب لقوا فى بعض صورة الزوج الصالح والزوجة الصالحة
بس هو لسة فى مرحلة الدراسة
وهى اكبر من ب8 سنين
والطبيعي ان ممكن الاهل يستنكروا الموضوع ده
وانا مسحت الكلمة لان ظروف الاتنين هم اعلم بيها ومكنش يصح احطها اصلا
طب انت كده لخبطنى
انت بتقول ان الاصح يبقى فرق السن لصالح الراجل
وبعدين رجعت تقول ان الراجل لما بيعيط فى حضن مراته بيحس انه عيل ومبيحسش بفرق السن.. طب ماهو الراجل لما تكون مراته حنينة وبتحتويه هيحس الاحساس ده حتى لو هى اكبر منه.. وللا ايه؟

****************

عاشقه الرومانسيه
فعلا يا دودو الاهل مش دايما نظرتهم للامور صح
وهي اكتر واحدة المفروض تكون عارفة كده
بس كلمة مامة هو جرحتها قوي رغم انها كانت متوقعاها
وطلعته على هو طبعا.. بس هو استحملها بردو
وربنا يقدملهم الخير
ويوفقك يا قمر دايما للسعادة

****************

MaNoOoSh يقول...

معتز شاهين - باحث تربوي
فعلا هو ده الواقع
بس المفروض الجيل الجديد يغيره
بس ده لو كان جيل ناضج اصلا
نورتني

**************

فتاه من الصعيد
فعلا المهم ان الراجل يكون مقتنع والست كمان
لان هم اللي هيعيشوا مش المجتمع

***************

ذو الوجه المبتسم
طيب انت مقلتش الاحساس ده هيفرق بعدين ازاى؟
بالنسبة للست اهم شىء عندها الاحساس بالامان والاحتواء
وان الراجل يكون قد المسئولية ويعتمد عليه
بعد كده السن مبيفرقش معاها
وصحيح الراجل بيهمه احتواء زوجته ليه بردو لكن من اهم الحاجات عنده ان زوجته تكون جميله وترضيه جسديا (مع ان الموضوع ده بردو السن مبيبقاش فيه عامل كبير)
وعلى العموم كل واحد بيبقى ليه اساسيات معينه مبيستغناش عنها.. زناس بيفرق معاها السن وناس مش بيفرق
وياريت بردو تقوللى احساس فرق السن هيفرق بعدين ازاى.

******************

عايش... ولكن !!!!
انا رأيي ان مجتمعنا فيه كل حاجة
واحنا اللي ساعات بنتمسك بافكار ملهاش أي اساس
ولو الواحد حاول يرضى الناس كلها فى الاخر مش هيدوق غير التعاسة

*************

blue-wave
بص انا معاك ان فرق السن لو زاد قوي هيبقى صعب
(لكن فرق 7 من 8 ايه بقى؟؟ هه؟ هه؟)
لكن موضوع فرق اجيال ده مش لازم لان مش كل الى متربيين فى نفس الجيل ليهم نفس الدماغ والافكار واسلوب التفكير
فيه ناس عقلها ناضح ورزينة حتى لو فى سن المراهقة.. وفى ناس شعرها بيشيب وهم عقلهم عمره ما خرج من مرحلة المراهقة.. صح وللا ايه

****************

عمرو
حقيقى انا مستغربه جدا لاني شفت بعيني جوازات الست اكبر من الراجل وناجحة جدا وفيها تفاهم وود نادر جدا بين الاتنين اللي فى نفس العمر
والملحوظة اللي بتقول عليها فعلا مهمة جدا
البنت بتنبهر بالاغراءات وفى الاخر بتندم وبتعيش تعيسة ما بين غيره وشك وحاجات تانية كتير
والواحد بيفضل يقول لنفسه ويذكرها فى الاخر ان اهم شىء التفاهم والود وان الاتنين يستعدوا للمسئولية وميسيبوهاش تنغص عليهم عيشتهم.
بتسعدنى جدا ردودك وبستناها دايما

*********************

أحمـــــــــــــد أبو العلا
طب واتخيل ليه يا بشمهندس.. ما هو ده اللي احنا عايشينه فعلا
احنا حلوين قوي فى الكلام.. لكن وقت الفعل المادة هى الحكم الاول والاخير
وطول ما احنا كده هنفضل ورا وعمرنا ما هندوق طعم السعادة.. ونبقى بقى نخللى المادة وللا كلام الناس ينفعونا
انا بستغرب دايما.. ليه السعادة بتبقى قدامنا ونفرط فيها وبعدين نرجع نعيط
ليه لما بنلاقى حد يستاهل مع مشكله بسيطة زي ماديات او فرق فى السن او اى حاجة تانية بنعمل اعتبار لاى حاجة تانية الا اننا نسعى للسعادة.. ونرجع نندم فى الاخر
يمكن بفكر نفسي علشان معملش كده فى يوم

*****************

MaNoOoSh يقول...

mosooz
ماشي انا معاك ان البنات هم اللي بيسعوا لكده
بس صدقني لانهم ملقوش قدامهم مثال للراجل اللي قد المسئولية بجد وبيريح اهل بيته
وبيفضل جوة البنت رعب طب لو سابنى فى يوم هعمل ايه.. وهعيش ازاى.. فبتاخدها من قصيرها وتتحمل مسئولية نفسها
وبعدين لو شغل الست علشان حاجة بتحبها فعلا وتقدر تفيد الناس فيها ميهاش حاجة ابدا لو زوجها كان ليها عون فى كده زى ما هى بتبقى ليه عون فى حياته كلها
بس بردو هقولك انى معاك فى ان الست لما بتتبهدل فى طاحونة الحياة وتنسي نفسها بتقلب على راجل وحتى هى نفسها بتزعل.

******************

الازهرى
ايه ده يا ازهري ده بقى بس
عاااااااااااااااااااااااااااااا
على العموم ماشي ماشي
انا مش هديلك عناوينهم خالث على فكرة
نفسك تفنجر الحزب بتاعنا انا عارفة
هههههههههههههه
انا بخير الحمد لله وزي الـ (العثل طبعا)
بالظبط انت نبهتني لنقطة انا كمان مكنتش واخده بالي منها
ان الرسول لما اتكلم على شروط الزوجه مذكرش فيها العمر خالص
وشدد على ان الاهم هى ذات الدين.. بس انا مش عارفة الناس بيفكروا ازاى.. ويرجعوا فى الاخر يقولوا الدنيا مبقاش فيها بركة ولا خير
وبخصوص المثل اللى انت قلته
انا عايزة اقولك انه عجبني جداااااااااا جدا يعني
وبعدين خللي موضوع الرغي ده فى سرك بقى وبلاش فضايح
ان الله ستار حليم
امال هتعمل ايه فى المواضيع الجاية

********************

الشعب لابد له من حكومه تشكمه
الننوس ده بقى من الامثلة اللي بتجيبلى تربنه فى النوفوخ
ومبيبقاش فى لساني غير كلمة بأمارة ايه.. دة خلاص قرب يوصل لمنتصف العمر أساسا.
هو فعلا بيرجع للبنت والولد نفسهم
بس انتى مقولتيش يا ترى عمرك ما تفكرى فى كده ليه؟
يا بنتى هنا اصلا موطن الرغي
تعالى ارغى براحتك معايا


******************

حلم بيعافر
والله والحكاية دي مش فى الريف بس
انا ليا كذا حد من القرايب بيوصل ويعدي سن ال30 وبيدور على بنت ال15 و16 سنة
ال يعني علشان يربيها ويطبعها على طبعه
مع ان بنت ال16 سنة دلوقتى تمشي بلد بحالها على عجين ميلخبطهوش.

******************

ABOALI
بص يا ابو على كلامك فعلا معليهوش اى اعتراض
احنا دين الوسطية.. واهم ما فى الزواج هو التفاهم وتقدير مسئوليات كل طرف للطرف الاخر
ساعتها هيكون فيه كل ود ورحمة وسكن ومش هيكون فيه اى اعتبار لفرق السن
وصحيح ان الانسان ميقدرش ينكر ان الجانب الحميمي من الزواج بيكون عليه عامل كبير جدا لكن بردو الجانب ده اساسه التفاهم والصراحة بين الزوجين وليس فرق العمر
وفى الاخر بعد ما الاجساد بتنهكها الحياة والعمر يتقدم بالاتنين التفاهم والود والاحترام هو اللي بيفضل.. مش أى حاجة تانية
بس مش عارفة ليه الناس مبقاش فى دماغها غير الجنس وبيخلوه أساس كل حاجة
صحيح منقدرش ننكر اهميته ولكن ليس هو الاساس ابداااااااااااااااااااا

*************

Sweet Violet
ايوة يا سويت بس العرف السائد دة مش لازم ابدا يبقى صح
دي مهما كان القلوب والعقول اختلافات فردية بين الناس وفى ايد ربنا
والحوار ده زي ما تقولي كده حوار سخسى وهو سبب الخنقة وقفل المدونة
وكتابة الموضوع ده كمان
بس خلاص يا توأمتي مش هغيب تانى
وههريكوا رغي من هنا ورايح


*****************
****************

MaNoOoSh يقول...

ঔღঔ نـــوارة ঔღঔ
ازيك يا نوارة يا عثل
صحيح انا لسة مجربتش الجواز لكن بشوف حواليا كل الامثلة وبتأمل فيها وبيصادف انى بدخل جوة كتير من تفاصيل حياتها
لا يا نوارة فرق السن فى الحياة الجنسية بين الزوجين مش هيكون مصيبة ولا حاجة.. وخصوصا ان المرأة الشرقية بتكون خجولة وكل ما يمر الوقت فى الحياة الزوجية اكيد بتكتسب الخبرة فى اسعاد زوجها
وخصوصا لو هى من الانوع اللي بيهتم بنفسه.. لكن حتى فى الحياة الجنسية التفاهم والود هو اللي بيخليهم هم الاتنين يقدروا يسعدوا بعض.. ولو التفاهم ده مش موجود هيعيشوا فى مشاكل قاتلة حتى لو هم فى سن بعض او هو اكبر منها

وبعدين مفيش حاجة تجبر الولد او البنت يعملوا حاجة هم مش مقتنعين بيها
الحب والقبول صحيح مطلوبين لكن حتى لو فيه حب وقبول ومفيش قدرة على التفاهم والتواصل يبقى الحب هيقول مع السلامة

وعلى فكرة انتى عندك حق ان اللي يحلم احلام وردية ومتصور ان الحياة مفيهاش مشاكل يبقى غلطان
نورتيني يا قمر

************

Che
ماشي يا تشي متعلقش على الحوار ولا يهمك
اول نقطة صحيح فيها شىء من الصحة لكن الوهم بردو بيلعب فى دماغ الشباب
يعني من فوق التلاتين البنت عندها حوالي 15 سنة للانجاب يعني 15 طفل ..(دة على اعتبار ان الراجل يعني عايز يخلف فريق كورة؟)
النقطة التانية بتاعة الراجل الهلاس فدي ليا فيها كلام كتير قوي بس فى بوست كامل طويل عريض
المهم ان الراجل بيبقى واهم
لان الست جمالها مبيقلش ولا حاجة ولا قدرتها الجسدية بتقل (دى مجرد اوهام فى دماغ الشباب)
لكن فعلا الحاجة الوحيدة اللي بترهق الست جسديا وبتعجزه انها تكون متحملة مسئوليات فوق طاقتها.

****************

أم أحمد المصرية
ربنا يباركلم فى مامتك وباباكي يارب
وحتى لو الاتنين مقتنعين ببعض مهم انهم يستعدوا للمسئولية ويقنعوا الاهل.. صحيح الاهل مش دايما قراراتهم وتفكيرهم صحيح بس بدون رضاهم مفيش بركة فى اى جوازة
بتسعدني زيارتك دايما يا قمر

*****************

كيكى عوووووو
ايوة صحيح فعلا
بس مقلتيش يا كيكي ليه بتقولى ان هو مكنش بيحب هي؟


*************


همسة
احنا فعلا اللي بنتمسك بمفاهيم غلط من الاساس
ومش لازم كل الناس يناسبها نفس الحاجة.. ولا ايه

******************

تامر علي
فعلا الجوازات اللي الناس بتعتبرها عادية ومفيهاش ما يستنكره المجتمع بتفشل بسبب عدم وجود تفاهم وعدم القدرة على التاقلم على طبايع كل طرف
يبقى من الاول نختار الزوج او الزوجة على اساس صح مش اى جواز والسلام بغض النظر عن السن

*******************
****************

Me7'o يقول...

آآآآآآآه
لسه ما أتجوزوش
أنا قريت البوست تانى كان المفروض أقول فى التعليق الأول
"علشان يقول لواحدة ممكن تبقى مراته كلمة زى دى"

مع الاحتفاظ بباقى التعليق زى ما هو

---------------

إنما بقى على حكاية السن دى فى التعليق التانى
فأنا نفسى مش فاهمنى
هههههههههه

بس انا كنت عاوز أقول
إن لازم الراجل يحس إنه كبير واكبر من مراته لإن المجتمع نفسه مش هايرحمه لدرجة ممكن توصل إنهم يعتزلوا المجتمع كله وده طبعاً مستحيل
والزن على الودان أقوى من السحر

وبعدين الواحد ساعات بيحب تكون مراته حنينة عليه ولما يحب يعيط مش هايلاقى غير حضن مراته يعيط فيه ساعتها بس بيحس إنه صغير..

تحياتى

أنا كتبت نبذة مختصرة عن مدونتك الجميلة دى عندى فى آخر بوست
أوك

MaNoOoSh يقول...

ساره
هو يا سارة الشباب بيجري ورا البنت الصغيرة لسببين (والاتنين مجرد وهم فى دماغ الشباب)
اول حاجة بيفكر انه هيقدر يطبعها بطبعة علشان تبقى مطيعة.. لكن البنات الصغيرة اليومين دول لهم من المكر فى عقولهم اللي يخليهم يقدروا يمشوا بلد بحالها على عجين متلخبطوش.
تاني حاجة انهم بيفتكروا البنت الصغيرة هيبقى عندها قدرة ورغبة جنسية اعلى وهتعمر فى الموضوع ده بشكل اكبر.. لكن الحكاية دي بالذات بعد شوية سنين جواز بتقل اهميتها لما (بتقل مبتنتهيش ابدا) وبيكون الود والتفاهم لو منعدمين الزوجين بيعذبوا بعض
دة حتى الحكاية دي لو مفيهاش ود وتفاهم بين الزوجين عمرهم ما هيحسوا بسعادة
يبقى لية ميدوروش على التفاهم من الاول.. حقيقى سواء اهل او شباب حالهم يحير
وفعلا النصيب فى الاخر هو اللي بنشوفه مهما عملنا او عمل الاخرين
ابقى قوليلي فى اى وقت فاضية وابعتيلى هنا فى الردود هفتح المسنجر علطول يا قمر

******************
آفشنا حرامي
ان شاء الله الزيارة فى اقرب فرصة

****************

اقدم عاصمه فى الحب
نورتني فى اول زيارة وان شاء الله يدوم التواصل
طب ما الذكور بردو مترصصين بدون زواج او تعساء فى زيجاتهم
العنوسة مش فى البنات بس.. لا دي فى البنات والولاد
لكن مش معنى كدا ان اى طرف يتأمر.. لا دة جواز يا ناس يعني حياة وبيترتب عليها وجود اطفال
والرسول عليه الصلاة والسلام قال تخيروا لنطفكم.. مش تأمروا
وبعدين ايوة من حق الراجل يختار زوجة فيها المواصفات المناسبة ليه.. وكمان من حق الست تختار المواصفات المناسبة ليها بغض النظر يعني عن السن بقى ولا الاعراف التعبانة اللي لا بتقدم ولا بتأخر فى حياة حد دي.
وعلى فكرة مش علشان الجنس بيشغل تفكير معظم الشباب او كلهم تبقى حاجة عيب يعني وللا حاجة
لا دى حاجة مهمة ومهم ان الانسان يدور على الحلال علشان يفرغ طاقته فيه
والحاجة دي بتشغل تفكير البنات زي الولاد بردو
لكن اعتراضي على الشباب انهم بيطلقوا احكام اساسها أوهام جنسية خيالهم الجامح او معلوماتهم اللي من مصادر غلط وبيترتب على كده وجود ظلم فى المجتمع كله
وبعدين انت نورتني ويسعدني رأيك سواء اتفقنا او اختلفنا
احنا بنتناقش علشان نقدر نفهم بعض حاجات ممكن تكون غايبة عن تفكيرنا

***********************
*****************

MaNoOoSh يقول...

Me7'o
بص انا مختلفة معاك فى حكاية الكلمة دي شوية
يمكن علشان الموقف شخصى واصحابه أدري بظروفهم
وكمان علشان انا محطتش غير الجزء ده من المحادثة علشان ابين فكر الاهل اللي ممكن يبقى عقيم احيانا ويمنعوا ولادهم عن السعادة وهم فاكرين انهم عارفين مصلحتهم
وبعدين طب منا كمان لو اتحطيت فى نفس الموقف كبنت هعمل عبيطة لغاية ما اقدر اواجه الموقف بقلب جامد

اما بقى موضوع الاحساس بالسن ده فانا معاك جداااااااااااااااااا
وعلى فكرة حتى الست لما الدنيا تضيق بيها بتدور على حضن جوزها وتعيط فيه وتتمنى بوسة على راسها تحس فيها بالحنية وبتحس ساعتها انه ابوها وحضنها وسندها وكل حاجة ليها فى الدنيا
بس كده بردو هنرجع ونقول ان السن ملوش علاقة بالاحساس ده
لو الاحساس دة موجود عند الاتنين يبقى السن مش مهم ساعتها

وحكاية ان الراجل لازم يحس انه اكبر من مراته بردو ملهاش دعوة بالسن فعلا
اسالنى ليه؟
هقولك حتى لو مسالتش علشان انا رغاية اصلا
ههههههههههههههه
كرامة الراجل وشموخة أهم حاجة بتميز شخصيته
والست لازم تكون فاهمة كده
لو الراجل فيه الحكمة والرزانة حتى لو اصغر منها فى العمر الست بتحس انه هو امانها وبتدور على سعادتة وبتشجعة فى كل خطوات حياته
مبترفضلوش طلب وبتعمل اللي يريحة على قد ما تقدر

وطبعا مفيش اى زوجين فى الدنيا يقدروا ينفصلوا عن المجتمع ولا عن اهلهم
بس المهم انهم يكونوا شخصيات متفاهمة ويقفوا المتدخلين والفضوليين عند حدودهم
ويعرفوا انهم بيرضوا ربنا مش بيرضوا الناس

وانا سعيدة جدا بالمناقشة معاك
وسعيدة بالنبذه اللي كتبتها دي
وجاية ازورك علطول.. واوعى تزعل لو اتاخرت شوية
اصل اختك عاملة زي السلحفاه
بس والله هاجى علطول

MǿиY El-Shreef يقول...

وحشتيييييييييييني يامنووو اوووي

انا خلاص خلصت انهارده الحمدلله

نيجي بقى للبوست انا الحمدلله متفقه معاكي جدا ف كل كلمه

اما رأيي ف هو وهي انا نفسي تخلص ع خير زي ماهي عايزه بالظبط

..

بحبك

سمكه واحده يقول...

اذيك يا مخنوقه وحشااااني جدا جدا جدا
والله اخبارك ايه
عجبني كلام اللي في الاول كله وانا معاكي الف الميه

بالنسبه لهي
عاوزه اقلها حاجه واحده
سواء كده او كده
كله بتاع ربنا وكله مكتوب ومحدش بياخد غير نصيه واللي مكتوب علي الجبين لازم ايه؟

تشوفه العين
ولا ايه
في الاول وفي الاخر كله نصييييييييييب

نـــــــــــــور يقول...

:) انتى بقيتى عاقله كده ليه يامنوش؟

والله وحشنى كلامك ياعثل

كيــــــــــــارا يقول...

مش عارفه اقول ايه
المهم قفل المدونة مش يتكرر تاني وكل حاجه هتتحل باذن الله بس مش عارفه حوار هو وهيا خلاني بلمت :(

كراكيب يقول...

طول ما انتي بتتكلمي حاسة انك مكشرة مخنوقة مدايقة قرفانة وبتدوسي على زراير الكيبورد بزهق
ايه كمية الزعل اللي انا حسيتها اول ما دخلت البلوج دي؟؟؟
مانوووووووش .. يارب يا اوختشي تكوني كويسة وفل الفل واكون حاساكي غلط
;)
وبالنسبة لحوار السن فدي حاجة بتخنقني اوي,, الموضوع مبقاش زي زمان
لا ظروف ولا شغل ولا مصاريف ولا تكاليف جواز كل حاجة اتغيرت وللأسوأ
يعني من الطبيعي ان سن الجواز يبقى متأخر وانا عن نفسي علطول بفضل اقول اني عايزة اتجوز بعد ما احقق لنفسي حاجات كتير اوي وده اكيد هياخد من سنين عمري..

ماعلينا.. ربنا يستر.. اهي قسمة ونصيب يا اووختشي
:)

miro el niro kwaniro

miro el niro kwaniro

شمس النهار يقول...

ازيك
ايه الكلام الكبير ده
علي فكره دي اصبحت ظاهره انه الرجال عايزين يتزوجوا من الصغيرات فقط

انت عامله ايه

وعايزه اقول لك انك مش رغايه وياريت كل الرغي مفيد كده ياستي

ارغي زي ماانتي عايزه
بس اوعي تسيبي المدونه خااااااالص

!!! عارفة ... مش عارف ليه يقول...

الموضوع كله لا يخضع لمعايير ثابته

يعني مفيش شرط أنه يكون أكبر بكذا سنة أو لأ

وموافقك طبعاً على أن الزوجة بتتحمل الجزء الأكبر من متاعب البيت

وعلى فكرة انا مش مقيم في مصر وبشوف الزوجات الخليجيات مثلا مرفهين على الأخر وحياتهم أخر دلع وبالرغم من كده مش عاجبهم

على عكس الزوجة المصرية والله جببببل
وربنا يقويها علينا


تحياتي
وليد

*البت المشمشية *حلوة بس شقية * يقول...

ده كلو كلام فاضى
ايه الرغى ده كلو
هههههههههههههه
حمد لله ع السلامة ياريس

أبو العريف يقول...

منووووووووووووش

اخبارك عامله ايه
انا جاي اسلم اصلي مجتش من زمان

تحياتي

ايوشة يقول...

ازيك يامنوووش اخبارك ايه ياقمر
اول البوست بتقولى كنتى مضايقة ليييييييه كده ازعل انا مش عارفة حالة الملل اللى بتيجى لكل المدونين وراء بعض دى ايه حكايتها المهم انك دلوقتى بقيتى احسن ورجعتى تانى لينا
بخصوص البوست تعرفى ثقافة المجتمع المصرى فى الزاوج او العربى عموما مش بتتغير اه والله تقولى وتعدى وتحاول تغيرى سلبيات وعقليات متحجرة وبردو مفيش فايدة ممكن يجى يقولك كلامك صح 100 فى 100 بس بردو مش ينفذه
ربنا يصلح الاحوال محدش بياخد اكتر من نصيبه فى الدنيا دى

عاشقة الأحزان يقول...

يالهووووووووووووىى
اتاريكى زعلانه منى يا منوشه ياحبيبتى ومش بتزورينى فتحت المدونه امته الف مليون مبروك ياعمرى


بجد نورتى الدنيا كلها
طب بصى الكلام كتير قوووى بينا ها

بس انا خارجه كده وهرجع بليل فى زيارة اول ما ارجع هحتل المدونه

بحبك قوووى
اختك
ايناس

الشعب لابد له من حكومه تشكمه يقول...

انا جيت بس طبعا متأخره كعادتى سورى:(
عاوزه تعرفى ليه انا محبش ارتبط بواحد اصغر منى بيوم واحد..
اقولك وطبعا انا بتكلم عن حاجه شخصيه بحته يعنى حاجه شخصيتى تتسم بيها.
اولا انا مقتنعه بالبحث العلمى اللى بيقول ان البنت بتسبق الولد اللى فى سنها بسنتين من حيث النمو العقلى والجسمانى.متفقين.فتخيلى لو هو اصغر منى ب8 سنين:))
هتقوليلى فى ولاد عاقلين وتحسيهم اكبر من سنهم.اقولك انا كشيماء بطبيعتى عاقله جدااا وتفكيرى سابق سنى اصلا يعنى وانا فى اعدادى كان تفكيرى تفكير حدفى جامعه فنوووو واى انى اعرف اتعامل مع تفكير حد اصغر منى ب8 سنين. دا غير انى اتعاملت فعلا مع ناس كده فى الشغل وصدقينى فى فرق فظيييع فى الفكر والعمر عامل مؤثر.
دا غير بعد الجواز انا محبش احس ان جوزى اصغر منى احساسى انا.دا غير ان على المدى البعيد الحياه هتكون سخيفه وخصوصا لما تكبر شويه ومهما تكون محتفظه بجمالها الست لو ظهرت ليها تجعيده هتعمل مناحه فما بالك لما تكون هى فى الاربعين والباشا فى عز التلاتينات:))
فانسى ياعمرو الفكره مش بحبها انا:)

kimo يقول...

السلام عليكم ورحمه الله وبركاته
موضوع اصبح اكثر تداول
في حياتنا اليوميه
واصبح ملموس
بس انا من رائي ان
الزوجه لازم تكون
اصغر من الزوج
مش عشان دلوقتي
بعدين حتكون هي تعبيت
والزوج في كامل شبابه
ويريد الانطلاق
وعشان كده نلاقي الحب بيموت
تحياتي لقلمك

بدراوى يقول...

معلش اتأخرت فى التعليق
عندك حق فى كل كلمة قولتيها

انا ليا صديق كان بيتكلم مع بنت
و كان بيقولى انها يعنى بتفكر ترتبط بيه
و لما عرفت انه اصغر منها
قالتله لو سمحت انسى انك عرفتنى قبل كدة ، و ياريت تمسح نمرتى من عندك كمان
!!!!
بنات غريبة اوووووى

بدراوى يقول...

اه و ده الفرق بينهم سنتين بس
ّّّ!!!!

MaNoOoSh يقول...

MǿиY El-Shreef
انتى اللي وحشتيني جدااااااااااااااااا يا موني
بس للأسف حكاية هي وهو حصل فيها حاجات خلت هي على الاقل تحس انها تستاهل حد مش هو بس يعرف قيمتها لا اهله كمان يعرفوا قيمتها مش يقولوا انها هتكون عجزت.
ربنا يعوضها ويعوض كل بنوتة رقيقة بالزوج الصالح يا رب ويرزقك الزوج الصالح يا منمن.

******************

سمكه واحده
فعلا يا سمكمك كلة نصيب وقدر ربنا
وربنا يرزق كل البنانيت بالزوج الصالح
انتى اللي وحشتيني جدا جدا يا سمكمك

*****************

نـــــــــــــور
للاسف دة مش عقل يا نور
دي خنقة من الناس الجاهلة والمجتمع اللي عايز الحرق

******************

كيــــــــــــارا
لما الحوار خلاكي بلمتى
امال هي تعمل ايه
يللا حصل خير اهي هي سابت هو وربنا يرزقها بالزوج الصالح

*****************

كراكيب
فعلا يا ميرو
انا كنت بكتب وانا مخنوقة
ومازلت مخنوقة
صحيح كل شىء بقدر ربنا
بس ربنا بيسيبلنا اختياراتنا علشان يحاسبنا عليها فى الاخرة
واحنا بقى بنختار نعذب بعضنا
الاهل بيعذبوا ولادهم بحجة انهم ادرى بمصلحتهم
والناس بتعذب بعضها بحجة انها بتدور على السعادة
وارتفاع سن الزواج ده بجد أزمة محدش بيحس بيها الا اللي ابتدى يمر بيها فعلا

***********

شمس النهار يقول...
نورتيني يا شموسة
طيب ايه الحل فى الرجالة دول
اصلهم بجد موهومين
وبيدوروا على متعة وقتية
وفى طريقهم ناس كتير بتتأذي
يلا ربنا يهديهم او يحط فى طريقهم اللى يعلمهم

MaNoOoSh يقول...

!!! عارفة ... مش عارف ليه
الزوجة المصرية جبل
والام المصرية جبل
والبنت المصرية كمان جبل
والراجل المصري بقى اكتر من يتفنن فى الهروب من المسئولية
طب ايه الحل يا ناس؟

**********************

*البت المشمشية *حلوة بس شقية *
لالالا يا مشمشية
أل انا رغاية أل!!!!!!!!
ههههههههههههه

******************

أبو العريف
الله يسلمك يا ابو العريف
انت اللى ليك وحشة

************

ايوشة
فعلا يا ايوشة
احنا شعب بق على الفاضي
انما افعال فشنك وعقول أصنام
وانا مش زهقانة ولا حاجة
دنا مخنووووووووووووووووووووووقة بس
هههههههههههههههه

*****************

عاشقة الأحزان
لالالا يا أنوس انا مش زعلانة ولا حاجة
دنا بس اللي مقصرة فى زيارة الناس كتييييييييير

**************

الشعب لابد له من حكومه تشكمه
انا محترمة رأيك طبعا
وكنت مقتنعة بيه ايام الجامعة
بس مع احتكاكى اكتر بحياة الناس ومشاكلهم بعد الجامعة
اكتشفت ان عقل الراجل الحقيقى لا يمت لعمره بصله
ولكن مدى نضجه وتربيته ورجاحة عقلة هم اللي يحكموا على عقل الراجل
اصلي شفت تقريبا الغالبية العظمى من الرجال الا من رحم ربي مهما وصلت من العمر بتفضل بعقول المراهقة وبتفضل بتفكير المراهقةة مهما بلغت من العمر وحتى ارذله
بس بردو مش هقدر انكر اهتمام الست قوي بشكلها والراجل كمان.. لكن الست يهمها اكتر احتواء الراجل ليها واحساسها بالامان معاه اكتر من العمر او فرق العمر.

*******************

kimo
طيب ما احساس ان الست كبرت والحب مات دة بيحصل حتى لو الزوجة اصغر من الزوج فى العمر
وانا ذكرت ان ده نظرا لتحملها مسئولية اكبر من قدرتها جوة وبره البيت وان الراجل بيهرب من مسئولياته ويرجع فى الاخر يدور على البنت اللي لسة فى شبابها علشان يمتص شبابها هى كمان
رجالة ملهمش امان
ههههههههههههههههه

***********************

بدراوى
تنورني فى اى وقت يا بدراوي
والبنت دي ينقصها التفكير المنطقى
بس هى طالما حاسة انه اصغر منها يبقى مشروع الزواج ده مكنش هينجح
اصل الحق بقى ان الزوجة لازم وحتما ولابد يكون فى تواصل بينها وبين الزوج
تكون بتديله ثقة فى نفسه وتحسسه انها دايما فى احتياج له وانه هو اللي يقدر يحميها ويوفرلها الامان
فى بنات بمجرد ما تعرف ان الولد اصغر منها مش هتقدر تديله الاحساس ده فيبقى الاحسن ان الارتباط ده ميكملش
لكن طالما الاحاسيس دي موجودة والتفاهم بين الطرفين موجود
عليهم انهم يتمسكوا بمشروع زواجهم مش يستسلموا مع اول خبطة الدنيا تديهالهم من اهل او ظروف او اى معوقات.

ذو الوجه المبتسم يقول...

ذو الوجه المبتسم
طيب انت مقلتش الاحساس ده هيفرق بعدين ازاى؟
بالنسبة للست اهم شىء عندها الاحساس بالامان والاحتواء
وان الراجل يكون قد المسئولية ويعتمد عليه
بعد كده السن مبيفرقش معاها
وصحيح الراجل بيهمه احتواء زوجته ليه بردو لكن من اهم الحاجات عنده ان زوجته تكون جميله وترضيه جسديا (مع ان الموضوع ده بردو السن مبيبقاش فيه عامل كبير)
وعلى العموم كل واحد بيبقى ليه اساسيات معينه مبيستغناش عنها.. ناس بيفرق معاها السن وناس مش بيفرق
وياريت بردو تقوللى احساس فرق السن هيفرق بعدين ازاى

اختى الصغيرة

اولا فيه شئ احب اذكرك به
من فوائد عالم التدوين هو اكتساب صداقات والاستفادة من اراء البعض والاهم اننا نحاول نفكر بالتعديل او الاضافة لشخصيتنا
وده مش عيب ابدا
انا نفسي باحاول اعمل كده

بخصوص الاحساس ؟؟
بصي يا اختى وبدون زعل وارجو بجد تفهمينى

لما الشاب بيتزوج بنت اكبر منه
اول شئ بيكون بين اهله هو والسؤال التقليدي
ايه يا ابنى
دى اكبر منك .. انتى هتاخد واحدة قد امك
المشكلة مش فى الكلام
المشكلة هتكون فيكى انتى
هتحسي بايه وقتها
هتضايقي...اكيد هتزعلى .. اكيد .. يمكن تسيبى البيت وترجع لاهلك .. ممكن

ثانيا: هو نفسه
بعد مرور كم سنة زواج
هيبص لبنت اصغر منه وده هيكون شئ طبيعي جدا ... حتى لو بيحبك
وبيعترف لك بحبه كل لحظة

ثالثا : العلاقة الزوجية
احتواء ..امان ... حنان
حاجات كتير بتحسها الزوجة مع زوجها
الطبيعى ان عمر الزوجة بيكون اقل من الزوج او على الاقل نفس السن علشان يحسو بلذة ومتعة الزواج
لان العلاقة الزوجية قبل ان تكون جسدية فهي نفسية والعوامل النفسية تلعب دور كبير فيها
علشان مطولش عليكى
فيه امور كتير لازم تحكمى عقلك قبل قلبك فيها
حتى لو كنتى بتحبيه الان
انتظرى ؟؟؟ بلاش تتعجلى الامور وخلى الحياة تسير فى طريقها
ولو فيه نصيب لك فيه او له نصيب فيكى
محدش هيقدر يمنع النصيب
ده شئ بيد الله
وباتمنى لك ولك المحبين حياة مليئة بالسعادة والهنا
فيه طبعا تفاصيل مقدرش اوضحعا عبر المدونة ؟ تقدرى تدخلى مدونة نوارة او بعبعة وتشوفى بعض الامور والتساؤلات هناك
تقبلى تحياتى اختى الصغيرة

Nora 7wades يقول...

طيب بس عهد الرسول ((صلى الله عليه وسلم))
يختلف عن دلوقتى بكتيييير

Appy يقول...

المواضيع اتغيرت دلوقتى لان اصلا اللى عنده تلاتين سنه مبيعرفش يتجوز فى ظل الظروف دى فبيكتفى باى مصيبه وخلاص

الجواز و سنينه يقول...

منوش حبيبى
بعبعى براحتك يا قمر
عجبنى موضوعك جدااا و تحليلك للامور
خصوصا اننا فعلا بنعجز لاننا شايلين قد الراجل مليون مره
مشكلتنا اننا جونا اننا احنا اللى لازم نتحمل و لازم نشيل البيت علشان الرجاله الامامير يراتاحوا
بس مع الاسف عمر ما بيرتاحوا و لا بيقدروا
فعلا الراجل عندنا بيبقى كفايه عليه شغله و هيه شغلها و بيتها و عيالها و لو لقت وقت تاكل يبقى خير و بركه
اخدين ايه من الجواز بالذمه غير اللقب ؟
لاء و الناس هاتتهبل عليه
بلا نيله
و عجبى

Dr.A.S. black armor يقول...

اول زيارة ان شاء الله مش الاخيرة
بجد موضوع مهم جدا وانا معاكى فى كل كلامك بس نقطة ان الست تكون اكبر من الراجل بكتير زى السيدة خديجة رضى الله عنها
ممكن اكبر ب3 او 5 سنين على اقصى تقدير
وانتى فعلا عندك حق ان البنات بتنضج فكريا بدرى عن الصبيان اللى فى نفس السن
دمتى بخير

elsha3er يقول...

السلام عليكم


ليس كل الناس سواء فى ذات العقلية اللى تقدر وفى الل لا

انكى فى مجتمع شرقى


تحياتى احمد الشاعر

حارة سد يقول...

لا أظن أن مسئلة الزواج والسن بها قاعدة معينة أن نتبعها..ومثال الرسول الكريم الذي تزوج خيدة برغم فرق السن فهو تزوجها كمحمد الانسان لا محمد النبي والا لكانت سنة..هذا رايكي ويؤخذ بعين الاحترام والجدية...ولكن الزواج يجب ان يتم باقتناع تام بين الطرفين بصرف النظر عن سن او جنس او لون

الحارة سد

mimi يقول...

منوش أنوش ...


وحشتينيييييييييييييييييي

انتي فين علي المسنجر ببعتلك كتير

هاه رحتي مني فين ؟؟؟؟؟؟؟؟؟


اظهر وبان عليك الأمان

mimi يقول...

موضوعك حلو وجرئ أهنيكي عليه

برافوووووووووووووووووو

mahasen saber يقول...

انتى جميله قوى مش رغايه ابدا

الجزء اليى اتكلمت فيه بخصوص عدم موافقة الاهل لجواز البنت فوق التلاتين مهم جدا جدا

انا بعتذرلك عن تغيبى عنك وعن مدونتك بس انا بعيد عنكوا جميعا كنت فى غيبوبه باين

المهم ليكى وحشه جامده يا منوشه

صدفة جميلة يقول...

اهلا بيكى وانا سعيد انى هنا على الرغم انى حزين لانى ملقتش مدونتى بين المدونات المحببه ليكى بس بقول يمكن مكنتيش تعرفى مدونتى ولكن بعد زيارتى اكيد هاتعرفيها ويارب تعجبك وتضميها لقائمة المدونات المحبوبه ليكى

فشكووول يقول...

ازيك يامنوشه
تحياتى
اسمعى بقى يا منوشه
الزواج اساسه التكافؤ فى كل شيئ فى السن والعقل والمال والتعليم وكل شيئ تقريبا

بس يا منوش الراجل بيحب يبص للبت الصغيره .. مش بيبص يبحلق يعنى ويبقى حرام عليه ... لأ يحب يعنى يتجوز بنت اصغر منه ... طبيعى يا منوش .. اصل يا بنتى دى فطره وليست فكره ... يعنى ربنا خلقه كدا وهوا مش بيحاول يعمل كدا ويفكر صح ولا غلط ... دى فطره خلق عليها الرجل ولا ذنب له فيها ... يعنى واحد زى فشكول اللى عنده 100 سنه نفسه يتجوز واحده عندها 17 سنه ويقعد جنبها هى تصوت وتلطم وتندب حظها وهو يعيط ويخبط دماغه فى الحيط.. واهوا جواز وخلاص ايه المشكله؟

عاشقة الأحزان يقول...

جايا اسلم


واطمن على اجمل منوشه

وحشتينى قووووووووووووووووووووى

MaNoOoSh يقول...

ذو الوجه المبتسم
بخصوص أولا
البوستين الجايين هيكونوا عن الاهل
مش دايما بيكونو على حق ومش دايما صح ومش لازم نسمع كلامهم فى كل حاجة
وبخصوص ثانيا انا قلت فعلا ان دة طبع فى الرجالة
من عاداتهم اللى مش هتنتهي انهم يبصوا للستات حتى لو متجوزين حد اكبر او اصغر منهم

وثالثا بقى اللى هى العلاقة الزوجية
اعتقد ان محدش يقدر ينكر ان حتى المتجوزين جداد بيحصل بينهم مشاكل
ولذلك اهم شيء بين الازواج هو التفاهم والصراحة لان دول هم اللى بيتغلبوا على المشاكل

****************
Nora 7wades
ايوة عهد الرسول بيختلف عن دلوقتى طبعا
بس أخلاق الرسول ياريت نقتدي بيها.. انه كان حنين مع اهله.. وكان بيساعدهم ويرحمهم ويحتويهم
والرسول زيجاته المفروض نتعلم منها ان العلاقة الزوجية لا هي بالسن ولا باللون ولا بالجنسية ولا الديانة
هي بالتفاهم والود والرحمة والسكينة بين الزوجين
هو ده اللى المفروض نتعلمه من زيجات الرسول عليه اطيب الصلاة والسلام


******************
Appy
تصدقى فعلا يا ابي دى مصيبة فى حد ذاتها
بس انا شفت شباب كتير بيبقوا فوق التلاتين وبيتأمروا جامد وعايزينها اقل من العشرين او يا دوب فى اوائل العشرينات

********************
الجواز و سنينه
الست هي اللى عملت فى نفسها كده بايدها
اولا لانها اختارت راجل مش بيتحمل مسئولياته كاملة وثانيا لانها ربت راجل مش قد انه يتحمل المسئولية

****************
Dr.A.S. black armor
انا مش بقول لازم يعني يبقى فرق السن فوق الخمستاشر سنة
لكن بقول ان مع التفاهم والاحترام ومعرفة كل واحد لدوره كويس فرق السن ده ملوش
وموضوع ان البنت بتنضج قبل الولد دة انا مش معاه خالص
لكن البنت اهتماماتها بتبقى غير اهتمامات الولد فى وقت المراهقة وبتبقى اكثر هدوءا علشان كده بنعتقد انها اعقل منه او بتنضج قبله.. لكن فى الحقيقة مش كده خالص

***************
elsha3er
ايوة احنا فى مجتمع شرقي.. بس مش لازم نخضع لافكار متخلفة طالما كبرنا لقيناها وخلاص

*****************
حارة سد
انا باخد الفكرة نفسها.. ان النبي عليه الصلاة والسلام كإنسان وبشر زينا تزوج من هي اكبر منه ولم يخجل ولم يقل كما يقول الاهالى الآن
ومش لازم ناخدها سنة.. لكن لما نلاقى انسان مناسب ومتفاهم وفيه صفات الزوج الصالح وفيه فرق السن

****************
mimi
والله يا ميمي انا مش بفتح المسنجر ولا المدونة اثلا غير كل فين وفين
وانتى اللي واحشاني اكتر يا قمر
نورتي مصر تاني يا عثل

*************
mahasen saber
من غير اعتذار يا ماسي
انتى تنوري فى اى وقت يا قمر

************
صدفة جميلة
حضرتك اللى نورتني وان شاء الله يدوم التواصل

***************
فشكووول
فعلا يا عمو فشكول الزواج اساسه التفاهم كمان قبل التكافؤ
وانا مش بقول ان الراجل ميفكرش يتجوز اصغر منه.. لأ
انا بقول ان الناس اصلا تدور على التفاهم قبل كل شيء.. لان مع التفاهم والمودة فرق السن مبيبقالوش اعتبار واى مشاكل زوجية بتنتج عن فرق السن لما الزوجة بتبقى اكبر شوية بيبقى ليها حلول كتيرة وكمان اساسا بتقابل الازواج الجداد

*************
عاشقة الأحزان
تنوري يا أنوسة.. المدونة مدونتك يا قمر
وانتى اللى واحشاني يا عثل