الأحد، 21 يونيو، 2009

الأول.. (البانجو مش بتاعي.. والله برىء يا بيه)

توضيحا اكتر لموضوع الهجوم ده
انا قصدي منه اني هفصص الاسباب اللي من وجهة نظري شايفاها بتكون أهم الاسباب فى ان الذكر بقى مجرد ذكر.. والرجولة قربت تنقرض مع اللي انقرضوا.. وبأكد اكتر ان لسة فيه رجالة بجد يمكن بيقعوا فى ناس وحشة بتغير من نظرتهم للدنيا.. بس انا بردو مش بهاجم الرجالة دول..لأ.. انا بهاجم اى صفة وحشة بلاقيها فى اى ذكر قابلته فى حياتي او سمعت عنه.. (اى صفة وحشة بتنتقص من رجولة اللي قدامي من وجهة نظري هكتبها.)
نبدأ بقى بحته رومانسي كده على ما تفرج قبل الهجوم
أنت!!!!
نعم أنت.. ايها الكائن الليلي المتحشرج كخفافيش الظلام الزاحفة في أعماق الامبريالية المتزندقة فى عتامات الكون.
أنت!!!
نعم أنت.. يا مقندل على عينك.. يا حيلتهم يا خيبة بالويبة.
أنت!!!
ياااااااااااااااااااااااااااااااااه
أممكن!!!!!!!
أنت!!!
لا متخافوش كفاية عليكوا كدة.. هع هع هع
المهم.. قبل ما تناموا مني يعني ومن قصيدة أممكن دي
(صنف أشباه الرجال بتاع البانجو والكيف والحشيش والحاجات دي.. وبردو وجهة نظري بتضم السجاير معاهم.. لانها عاملة زي الرضعة بتاعة الطفل كده.. مبعرفش استرجل اللي بيشربها للاسف)
للأسف صنف الشباب اللي بيشرب سواء بانجو أو حشيش أو منكر أو أي حاجة تانية.. أو حتى من وجهة نظري (المتشدده شوية) سجاير كمان.. بقى موجود بشده وكمان للأسف بقى منتشر جداااااااا.. منهم اللي اهلهم عارفين ومطنشين.. ومنهم اللي اهلهم فاكرينهم ملايكة وولا داريانين بحاجة اساسا.
من أول الولد اللي لسة فى مرحلة الطفولة.. اللي بيجرب السجاير لما بيشوف باباه او مامته أو حتى حد من اخواته بيشربوها.. وبيقلدهم علشان يبقى راجل أو على الاقل يحس انه كبر زيهم (مش عارفة مستعجلين يكبروا على ايه.. بلا خيبة).
طب هنا ده هضطر اقول انه اساسا ملقاش حد يعلمه الصح من الغلط.. والذنب عليه مش كبير.. هو بس مجرد بيقلد.. الذنب على اللي خلفوه ورموه في الشارع من غير ما يعلموه أي حاجة.. عملوا زي الأرانب بالظبط.
وده كبيره لو معرفناش نبقى قدوه ليه اننا بنديه على قفاه علشان يبطل.. بس يا فرحتى.. مش لما يبقى اللي خلفه اساسا يبطل الأول.
مرورا بالشاب اللي شايف كل الشباب بيشربوا سجاير أو حشيش أوبانجو أوحاجات تانية كتير.. وعايز يبقى زيهم ويعيش شبابه.. عايز الحشيش يخليه راجل ويبقي سبع البرمبة هارون الرشيد محطم قلوب العذارى.. حتة الفسلة من الشباب السيس دول بيتفنن في شرب الحاجة اللي بيعمل بيه دماغ (دماغ قطران بعيد عنكم.. دمغة عايزة الحرق أساسا).
واللي يقول مشبره واللي يلف سوجارة.. وبعدها يشوف الناس حواليه أقزااااااااااام.. وحاسس انه أسد.. حاسس انه فحل (تقريبا فحل بصل بس الترجمة جتله غلط).
طب دة معلش بقى لازم الوم عليه.. لانه بالفعل اكيد عارف ان ده غلط.. وهو بيعمل كدة علشان عايز يحس بقدرات وهمية هتحصلة لما يشرب الهباب اللي بيشربه.
احب أقوله انك موهوم يا فننس.. الحاجات دي هتجيبك الارض.. وهتبقى قطة من غير ديل كمان.. دة لو حصلت القطة ومبقتش فار أصلا يا كوتوموتو (والحدق يفهم).
مهو لو انت اصلا كان عندك دماغ مكنتش ضيعتها بشرب الحاجات دي.. وللا محدش علمك ان الراجل اعز ما يملك هو (لأ لأ مش الولاعة.. شوفتوا نيتكوا راحت فين.. هع هع هع).. دماغة اللي بيفكر بيها.. اللي فيها الحكمة ورجاحة العقل.. اللي ربنا كرمه بمسئولية القوامة فى الحياة علشانها.
معذور يا فننس.. مهى بدل المخيخ اتقلبت بالوظة بالمكسرات من وانت صغير يخويا.
طب والرجالة بقى.. اللي المفروض خلاص وصلوا لمرحلة الخبره فى الحياة.. اللي عرف انه اتخدع ومطلعش أسد وطلع ........... (وللا بلاش استروا على ولاياكم احسن).. انت بتفضل تشربها ليه؟؟
الصونف ده بقى لاني مش لاقية كلام كفاية يوصف خيبته القوية.. أحب اقوله يا خسارة الرجالة اللي بينقرضوا انقراض الديناصور آكل العشب المبلول.. مش لاقية يا موكوس انت أي كلام يوصف خيبتك القوية الواضحة ومش مستخبيه.. أدعي عليك بإيه وانت فيك كل العبر.
وحسبى الله ونعم الوكيل
وليكم ربنا يا بنات مصر (والعالم العربي).. عااااااااااااااااااااااااااااا
ليه؟؟ ليه الذكور بيعملوا هلليلة على شرف الست وهم مبعزئين شرفهم (عقلهم يعني.. قلنا بلاش النية المهببة دي يا جودعان) مع شوية دخان بينفخوهم؟؟؟.. بيضيعوا حتة من عقلهم مع كل نفخة دخان.
ليه الذكور دول بيستهتروا بأكبر نعمة ربنا أنعم عليهم بيها (العقل والحكمة والرزانة).. النعمة اللي هي السبب فى انه يتولي القوامة.. ويخوض عراك الحياة؟
وليه بيضيعوا القوة الجسدية اللي ربنا ميزهم بيها عن الست.. اللي المفروض بيها يقدروا يدافعوا عن شرفهم.. وطنهم.. وأرضهم وعرضهم؟؟

أيها الرجل.. لقد شانتي افعالك.. حينما قررت قتل عقلك وتخديره.. حينما لم أجد سندي واعيا ليحميني. حينما نفخت ذلك الدخان من فمك وتطاير مع الهواء.. تطاير معه جزء كبير من احترامي لك.. لم تعد نظرتي لك تحمل ذلك الانبهار بقوتك.. لم تعد في تلك المكانة المهيبة في قلبي.. لم تعد قادرا علي حمايتي.. لا يمكنني الوثوق في قرارك الآن.. لا يمكنني الأخذ برأيك.. أين أنت لتحتويني.. لتتحمل تقلباتي.. لتشعرني بالأمان.. وأي أمان ذلك الذي اتخيله وأنت مغيب في عالم آخر (أو ممسكا بسيجارة ومتمسكا بها.. لا يهمك ان كانت تضرني أو تؤذيني.. ومازلت متمسكا بها لأنها عادة).

عفوا يا أنت (ايوة انت بردو بتاع أممكن اللي فوق خالص.. الحليوة اللي في أول صورة).. فليس لك مكان في حياتي بعد الآن.. لست ابن ولا أخ ولا أب ولا حبيب.

وإلى اللقاء في صفة تانية نهاجمكم فيها.. وأي خناقة يا جودعان ومتقلقوش يا بنات.. كل الصفات اللي بتضايقكم بجهز فيها بوستات.. ده هجوم يا جودعان مش أي كلام يعني.

56 اللي عبروا منوووشة:

ايوشة يقول...

ههههههههه بداتى الهجوم عليهم بااممكن ليه بس كده كنتى فهميهم بالتدريج بس والله حلوة قصيدة اممكن دى
اضم صوتى لصوتك وصوتى بعشر اصوات على فكرة :)
واقولك والله كلامك صح جاد وخصوصا الجملة الاخيرة انا نفسى البنات تفكر صح وتفرض الشاب اللى يتقدمها وهو بيشري الحاجات دى ساعتها هيفكر الف مرة قبل ما يشربها
تسلم ايديكى على البوست يامنووووشة

ايوشة يقول...

هيييييييييييه اول تعليق ولاول مرة لينا جايزة ومش هتنازل عنها :)

Bola 7elmi يقول...

مممم صباح الفل :)
بدايه موفقه يا أختشي
وبدايه رومنسيه كمان .. مشوفتش دلع زي كدا قبل كدا
عن الحاجات المهببه اللي بيشربوها معرفش لازمتها ايه أصلا وتلاقي الولد لما يتعصب يجيب همو د سجاره << أموت وأعرف بتفيدو فـ ايه يعني هو كدا بيستريح ..!!
تانيا وحهة نظري زيك تمام .. مبحبش الراجل اللي بيدخن أصل شكلو وهو ماسك السيجاره مبيعحبنيش نع العلم ان أخويا بيدخن :S وياما نصحتو بس ودن من طين وودن من ايه .... من دخان أيوت
وكمان بقى أنا مش هتجوز حد بيدخن هه بس :| عشان عندي حساسيه منها :(
لا للسجاااااااااااااااااااره
و من هنا بهدي اغنيه شعبان عبد الرحيم اللي انا مش فاكره اسمها .. بس كان مضمونها انو من اول يناير هيشيل حديد ويبطل سجاير
يعني هو شعبولا أحسن منك انت وهو ياد انت X(

سلااااااااامي ليكي :)

احساس طفلة محبة للرومانسية بس واقعية يقول...

يارومانسياتك ولغتك العربية يا منوش
اوجزتى وانجزتى

فى مرحلة الطفولة والشباب ممكن يكون فى عذر مقبول
والعيب فى الاهل اللى كانوا شباب برضو قبل كدا وكان العيب فى اهلهم برضو بس ما هو لو فضل الحال كدا هنستمر من سئ لاسواء يعنى الاول كان نوع مخدرات واحد ومنه بقى فية عشروميت نوع ويعالى بكرة هيبقول كام
والشباب بيجرب

بس لو حد تخطى الشباب بسنوات وسنوات دا عذرة اية لسة اخلاقة متعدلتش ولا عرف الصح من الغلط اتعود يمكن مش عايز يغير حياتة راضى كدا طيب اية الميزة اللى تخلية متمسك بيها لهذا الحد

دى المشكلة تعلق الناس بالمخدرات والسجاير
بسبب ان مفيش اخلاق ولا تربية ولا دين
طيب اخدنا اية منها
اخدناوطن بلا روح ولا جسد

مش كلة طبعا بس الاغلبية السيئة هى اللى ظهرة
استمرى فى الهجوم ومستنين نشوف البوست اللى جى عن اية

تقبلى مرورى

ستيته حسب الله الحمش يقول...

اظن يا منوش
مفيش مخلوق
دكر او نتاية
يقبل ان يهاجم هذا البوست
ايه يا بنتي الجمال ده
أممكن
فعلا حكاية المفاهيم اللي بتتزرع في عقل الشاب الصغير عن الرجولة شيء معيب جدا جدا
اشرب سيجارة والا خايف من بابا
يا ننوس عين ماما
ماهو انت لو راجل تجرب
استرجل واشرب برسيم

انا عارفة ان فيه بيوت كتير بتحارب في التربية
بس المجتمع ضاغط جدا وبلاويه فعلا بقت كتيرة
ودي خطة من زمان لأن البلد دي لما يكتر فيها الرجالة فيه ناس بتخاف
والناس دي لازم تخاف
يبقى عاوزين رجالة
أممكن


بالمناسبة
أممكن تعملي التعليقات في صفحة منفصلة لأن بيطلع عينا في التعليق لما بيكون في نفس صفحة البوست
أممكن؟

MǿиY El-Shreef يقول...

ياجامد انت ياجااااامد

والله يا منو كل مره بحس ان فيا منك شويه

اشباه الرجاله الي بيشربوا سجاير دول بكررررههم اوي بحسهم ناقصين حجات كتير جدا

كلامك كله حكم وعجبتني اوي نقطه تربيه الاهل دي

وصورة الولد الصغير الي بيدخن اثرت فيا مش عارفه لييه

حمدلله ع السلامه ياقمرتي وربنااا يكرمك ياااارب بكل الي فبالك ;)

Sweet Violet يقول...

ههههههههههههههههههههه

لا جامده أممكن ..صحيح هى دى الرومانسية ولا بلاش ^_^

بس مين قالك يامنوش ان اللى بيشرب حشيش او بانجو عارف انه غلط ؟؟

لالالا ده فى شباب عارفين ان الحشيش مفيد و حلو كمان زى الشوكولاته ده حتى الشوكولاته ليها اضرار لكن الحشيش لأ D:

بس بردو يامنوش مش معاك ان اللى بيشرب الحاجات دى مش بيبقى راجل لان فى ناس بيكونوا خلاص دخلوا فى مرحلة العادة و الادمان "وده لان فى البداية خالص ماحدش وجهه للصح زى ماانتى قولتى " و الراجل بردو انسان من الصعب جداا انه يتخلص من عادة بسهولة مش سوبر مان اصله ولا ايه ؟؟

لكن اللوم فعلا على اللى بيشرب على كبر يعنى طووول عمره مابيشرب اى دخان و اول لما يكبر و يدخل مثلا على التلاتين تلاقى نفسه هفت عليه يجرب الحاجات دى و بعد كده تتحول من تجربة لادمان بردو و عادة ^_^

ABOALI يقول...

اولا
انا عن شخصى باحييكى على فهمك الوعى
انى رجال المستقبل المفروض يعنى
حدث ليهم تهتك فى عقولهم
واكيد موضوع المواد المخدرة مهم
بس لو فتكرتى معايا شوية
هاتجدى ان ده بيحدث نيتجة حالة الفراغ واللاهدف
سواء كان فراغ دينى او دنيوى
وكمان الشباب محتاجين اللى يرتقى بمستواهم فكريا و خططيا"
وكمان احنا محتاجين نكون عندنا واعى ازاى نخاطب الفئه دى
ونساعدهم لاءنهم فى النهاية جزء من مجتمعنا

ثانيا
العقاد عندما سألوه وقالوا ان البعض لا يفهم كتبك
قال لهم
الكاتب يرتقى ويسمو بمن حوله ويرتفع بلغتهم

وها انا ارى اننا قد نزلنا بمستوى اللغة واستعملنا نفس لغتهم الحواريه
ادرك ان هذا يفسره البعض على انه قرب منهم ومحاولة توصيل المعلومة

ولكن

انتشال اللغة من براثن هذا التواضع اللغوى مطلوب

لاءننا سنصبح يوما"
لا نجد مفردات لغوية سوى تلك اللغة الهابطة
ولن نجد الجيل القادم يقرء قراءن لاءنه سوف يستغرب معانيه و كلماته

كونى على ثقة ان الكلام ليس موجهك الى شخصك

ولكن هذه ظاهرة اخذت تنتشر
واصبحت تؤثر فينا سواء انا وانتى وهم ونحن ونحتاج ان نعاتب انفسنا لحظة حتى نرتقى بغيرنا


اشكرك على هذا الطرح الرائع ذو الاجراس المنبة

تحياتى

يوميات شاب منوفى يقول...

ةبدء الهجوم وربنا يستر علينا من منوش
انا الحمد لله مش بشرب سجاير واحب اقولك ان الى عندة ارادة مش هيشرب سجاير ولا بانجو وحشيش حتى لو قاعد مع شلة كلها بتشرب
انا زمايلى فى الثانوية كنا بنزوغ وهما يشربوا قدامى سجاير وبانجو وانا عمرى ماعملتها
والادهى يوم وقفة العيد اخر يوم فى رمضان يعملو قاعدة فيها حشيش وبانجو وبيرة واهلا بالشياطين انا كنت بعتز عن الحفلة السودة دى بقى اضيع رمضان كلة فى ساعتين
بس فى اعتراف انا شربت نفس من سجارة بريئة مرة واحدة وانا فى تالتة ابتدائى كنت لوحدى فى البيت وابويا نسى علبة السجاير وقعدت اكح لحد ماكنت هموت ومن ساعتها حرمت

عمرو يقول...

الله ينور عليكى و على جمعيتك لو ستتبنى مثل هذه القضايا البناءه ..
أتمنى من كل قلبى بصراحه و بدون مواربه أن يموت كل من يتعامل مع المخدرات سواء بالاٍتجار أو الاٍستهلاك .. بجد ربنا ياخدهم كلهم اٍلا من يرجع لطريق الصواب لأن حقيقى مافيش منهم فائده أبدا و لكن منهم ضرر جسيم لأنهم بيجروا لسكتهم المقندله ناس تانيين بيهووا معاهم للحضيض زيهم ..
ده غير أنهم سبب قوى لخراب البيوت و تشريد و ضياع العيال ..
خساره فيهم الحقيقه شربة الميه اللى بيشربوها و اللقمه اللى بياكلوها بل و نسمة الهواء اللى بيتنفسوها لأنه يوجد ناس غيرهم أولى بهذه النعم اللى أنعم بها الله على خلقه المستقيمين النافعين ..
تقبلى تحياتى و تقديرى و شكرى على هذه البدايه الرائعه و بالتوفيق اٍن شاء الله ..
كنت قلقان أنا من الجمعيه بتاعتكم دى بس الحمد لله أطمنت أنا كده :)

mimi يقول...

الناس دي بايته هنا ولا أيه؟؟؟؟؟؟؟؟؟

صيدلانيه طالعه نازله يقول...

و الله انا اما بيجيلى ولد صغير فى الصيدليه يبقى عايز برشام من المخدرات بامسح بيه البلاط سواء البرشام ليه او لحد تانى باعته الولد يبقى داخل مسطول و بيتطوح و هو يدوب 13 سنه و بيعلى صوته عشان يورى اللى معاه انه راجل و بيدخل يشترى مخدرات بنفسه يا شيخ اتنيل و روح اقلع البامبرز الاول لان فى السن ده اخرك ببرونه لبن فعلا كارثه لان اللى بيطلع متعود على الزفت ده بيخسر عقله و رجولته و صحته لان معظم المدمنيين عاجزين جنسيا لانه بيأثر على المخ اللى هو اساس الاثاره

اسماء واحلام فى وجدانى يقول...

انا جاى اسلم بس وراجع تانى لانى بقالى فترة غايب
ولو ما رجعت وصيتك القطط

ساره يقول...

والله شبابنا عندهم قوه وعزم
تقدر تحول الرمل الي ذهب
لكن الكل استسهل الطريق
والتواكل علي الله وليس التوكل عليه
لو كل واحد بدل ما يدفع فلوس عشان يضيع عقله وصحته واحترام اللي يحبوه .. حط فلوسه في شئ مفيد احسن له

مع انه ممكن يكون مش لاقي ياكل بس عنده يجيب حشيش!!

كيف انت بتحميني؟
كيف بتكون سندي؟
كيف انا بفتخر بيك؟
كيف بتربي اولادك ... علي الحشيش؟؟ ولا على الصلاه؟
كيف تقدر تجاري العالم وانت اصلا غايب عن العالم
ومليون كيف؟؟

الله يهدي شبابنا يارب

Ramy Wasel يقول...

يا اما توفروا بيئه نظيف للمواطنين
و توفروا الكوله والبرشام
يعن الناس تعمل ايه
تنتحر يعنى

بس بوست هايل

وانا معاكى ان السجاير زى المخدرات
مفيش فرق غير فى السعر
وان الناس بتشربها عادى
داهيه تاخد السجاير والمخدرات
والكل كليله

blue-wave يقول...

مممممممممممممممممممم
بتصطادينا يعنى؟؟
طيب بقى ايه قولك فى الستات اللى بتدخن برضه؟؟؟؟؟

بنجاواتى يقول...

ذكر بيدخن....يععععععععع

عيل بيشرب بانجو واشباهه....مخه تعبان

عيل سيس بيشرب او يحقن او يشم حاجات اكبر م البانجو بشوية واغلى.....اقولهم ...



ليلتكم جلللة متعاصة جلللة

ايه الالفاظ دى يا بنى آدم؟؟؟؟

امشى يا بنجا ..خسئت

عندك حق فى كل كلمة

تحياتى

عاشقه الرومانسيه يقول...

أممكن؟
يالهووووووووى على الجمال
لا والشعر تحفففففه
جبتيه منين ده
انا بقراه وبرقت وازبهليت وبعد كده هلكت من الضحك

اما عن التدخين بقى فهو عاده منيله بستين نيله
اخويا بيدخن
بابا الله يرحمه كان بيدخن
خطيبى بيدخن
خلونى بقيت عامله شبهه السيجاره من كتر الدخان
بس على مين
ده انا من جمعيه المرأه المتوحشه
معلماهم الادب وحياتك
محدش يقدر يدخن فى وجودى
لانى عندى حساسيه صدريه
والله اموت لهم فيها
هو هزار ولا ايه؟

ربنا يتوب عليهم ويعافيهم
اما عن البانجو واولاد عمه فده مش لهم فيه الحمد لله

هما لاقين ياكلوا علشان يصرفوا فلوسهم فى الكلام ده؟
بقولك ايه يامنوشه
انا هامشى بقى علشان لو قعدت اكتر من كده
هتخلينى اجيب عصايا واطيح فيهم
متغاااااااااااظه


استمرى حلو الهجوم ده

بدراوى يقول...

مفيش بوست اطول من كدة

انتوا ايه حكايتكوا اليومين دووول

كله بيكتبلى صفحتين ثلاثة
هههههههههههههههه

دونت ووورى اى ويل اقراه سوووون
:-)

احنا يقول...

ههههههههه
بوست كوميدى جدا ... بس برضه عميق وعاوز يهاجم بجد ، لأننا أصبحنا فى عصر ( دماغى بتاكلنى , شارب سيجارة بنى ) ..وشكرا ..تقبلى مرورى
وبانتظار مرورك الكريم
--------------------------------------------
مع تحياتنا / حازم و هانى

د. ياسر عمر عبد الفتاح يقول...

طيب والله العظيم أنا رديت قبل كده
أحلف تاني
لالا أنا متأكد المره دي
أصله كان رد طويل وعريض ..
أكيد يعني مش هعيده تاني


علي العموم الهجوم لو كان علي الحاجات دي
فأنا أول واحد بدعمه .. وممكن كمان أشارك فيه

وبقول لكل واحد بيضرب سؤال
نفسي يجاوبني عليه
إيه الممتع في إنك تبقي عبيط وأهبل ومسطول؟

حلم بيعافر يقول...

احم احم
طب مافيه بنات بيشربوا
جوزة وشيشة ع القهاوى
اتكلمى عن دول ودول
طبعا طبعا يعنى السجاير والشيشة والبانجو وكل الكلام ده محدش يقدر يقول عليه حاجة غير سفه وكلام فاضى وقلة ادب
وفعلا تبديد لثروة ربنا اداهلنا وبنضيعها
بس العادة دى بتيجى منين داهية؟
تقليد
تقليد الواد لابوه وتلاقى الاب اللى بيشرب سجاير لو عرف ان ابنه بيشرب سجاير بيبقى هيتجنن
مانت اللى معلمه يا حج
او تقليد الطالب لمدرسه اللى مفروض يكون قدوة
النصح يتوجه للكبار قبل مايتوجه للعيال

الشعب لابد له من حكومه تشكمه يقول...

بيقولو عليا محبكاها شويه اصلى من الحجات اللى لازم تكون فى زوج المستقبل ان شاء الله انه يكون شم مدخن.اصلى بقرف من ريحة السجاير فمش معقوله اتجوز واحد قرفانه منه..
والعجيب ان تلاقى ناس تقولك انتى غريبه ومحبكاها :)))

فتاه من الصعيد يقول...

والله عندك حق يا منوووووش ....... اللي يضيع صحته بايده يبقى عنده مشكله في فهم الدنيا ...... بس موش لدرجه يفرط في اعز ما يملك ..... لا موش لدرجه الولاعه يا منوش :)
ربنا يحمي كل اخواتنا من اخطار البانجو والحشيش ...... ويا رب كل اللي بيدخن يبطل يا رب

فتاه من الصعيد يقول...

بس هجوم حا وعنيف ....... دي حرب بجد بقا

أحمـــــــــــــد أبو العلا يقول...

ماشي يامنوشه
بصراحه الهجوم ده مزجني على الآخر ودخل انفوخي من جوا

انا معاكي في كل كلمه وحرف كتبتيها

اللي بيعمل كده معتقد انه بيضيف رجوله لنفسه لازم يحاكم بتهمة الغباء السياسي على رأي السادات

انا كنت قلقان من الهجوم بس ياريت يكمل الهجوم على كده, يكمل بالعقل مش بالنوع


شاكرين مهللين متمزجين

ادم المصرى يقول...

يااااااااااااه انتى بجد توحه

هههههههههههههه
ايوه كده اديهم على دمغهم

تخيلى كنت قاعد مع صديق ليا فى النادى قبل كده فكان جى مدايق جدا بقولو مالك فقال انا كنت حاطت حتت حشيش فى الدلاب بتاعى ودخلت الوليه مراتى هيه واخوها قعدو فى الاوضه وانا كنت فى مشوار رجعت ملقتهاش سئلتها قالتلى ادتها لى اخويا...

شيفه التعاون المشترك فى الحشيش مع الازواج
هههههههههههههههههههههه

حاجه يضرب بيها المثل

Che يقول...

انا الحق استخبى قبل مايجى فيا صاروخ ولا طلقه من الهجوم ده ... على فكره انا مش عارف اعلق كويس بعد الماتش ... هافوق و ارجع تانى

المعتصم يقول...

اممكن !!!!
ههههههههههههههههههههههههه
هو ده الهجوم ؟؟؟؟
ده على كده ممكن تعملوا قسم للرجاله المتوحشين معاكم فى الجمعيه
ههههههههههههههههههههههه
وانا هنضم له
ههههههههههه
هو فيه حد ممكن يهاجم هجومك ده
للاسف مش فايق انى اكتبلك خطه هجوميه فظيعه فى الموضوع ده
بس ربنا يسهل بعدين يمكن اقدر
انما مش هقولك غير الى الامام ياروميل
ههههههههههههههههههههه
ســــــــــــــــــلام

بنت اسكندرانية يقول...

ماشي انتي نستيني اوك اغيب اغيب ملاقيش سؤال ولا جاوب عليا
يالا حقرا واتابع بئا
يالا سلام

dr aly khamis يقول...

السلام عليكم و رحمة الله و بركاته
هو لو الهجوم كده ....
فأنا معاكى من المهاجمين ...
بس المصيبة ان ( الحريم) كمان بقوا يشربوا سجاير و بانجو و .. و ..
فالمفروض يكون الهجوم مزدوج ..

اسلوبك شيق و اسلوب لذيذ للنصيحة
ربنا يبارك فيك
و عجبنى اوى الكلام اللى بالأزرق من بعد( أيها الرجل )
و معجبنيش ( هارون الرشيد )و ( و النبى )

بارك الله فيك
و مش عارف بتقبلوا اعضاء فى الجمعية دى من الأعداء المسالمين و لا ايه ؟؟

تقبلى تحياتى

قلب ارهقته الاحلام يقول...

ايوة يامدمراهم انتي

لا بجد بوست توحفة وعندك حق طبعا

كلنا معاكي الي الامااااام يافندم


تششششششششششششششششششششش :)

راسبوتين يقول...

المشكلة كلها فى البيئة اللى بيخرج منها البنى أدم سواء كان راجل أو ست
وتربية ماما وبابا واللى ممكن فى كتير من الأوقات تخرج ربع راجل وربع ست
البوست جامد ودمه خفيف قوى
تابعى الهجوم ...شكرا
أرجو قبول مرورى

!!! عارفة ... مش عارف ليه يقول...

كلام جميل

وكلام معقول

مقدرش أقول

حاجة عنه ..


وليد

أم مالك يقول...

منوش ايه اللى بيحصل ده
الموضوع جايب نتيجة عكسية ولا ايه
الرجالة كلها بقيت هادية وبتستنكر
وبتشجب وبتشجع كمان
عاوزين يضربوا الهجوم بتاعك
اوعى تقعى فى الفخ وتسلمى
الهجوم مستمر ولا ايه
سلم ايدك على الهجوم قصدى على البوست
تحياتى

مصطفى أبوزيد يقول...

يا اهلا بالمعارك
بدايه جيده ومنطقيه
اتفق معاكي تماما

ذكري رحيل قلم يقول...

السلام عليكم

عندك حق يا مشمش
السجائر وغيرها من مفسدات العقل محرمة شرعا
واخلاقيا وياريت يعرفوا قمة اضرارها وكيف تؤدي بهم الي الموت
علي فكرةياقمر مش بس الرجل لا والانثي كمان انا بستغرب طيب الولد عايز يبقي رجل وهو في سته ابتدائي والبنت بتشرب ليه
نزلتي قهوة الفشاوي في الحسين طيب اتفرجي عل البنات ف المهندسين
وعلي افعالهم والله هتكسفي لهن
سيبك من الرجالة شوية وهجميهم
الشواذ من الاناث انا لو ليا في الهجوم كنت هجمت بس هاحاول معاكي جاهدة

كل ما نملكه لهم هو الدعاء بالهداية لهم ربنا يهديهم
تحياتي

ذكري رحيل قلم يقول...

منوشششششة اجمل حاجة انك خلتي التعليقات صفحة كاملة
الطريقة الاولي كانت بتعذبنا
ربنا يخليكي يا قمر

أبو العريف يقول...

يا ستي وانا معاكي في الهجوم ده

فعلا كل اللي انت قلتيه تمااااام
والرداله اللي مش رداله دول
وبينفخواااا
اكيد بيضيعو اغلي ما يملكوااا
العقل

بقولك
معاكيش قرش حشيش بقي
اصلي عايز اظبط الطاسه

شمس النهار يقول...

انا لا اعتقد

يامنوش ده مش هجوم ده بوست نصيحه لوجه الله
والدين النصيحه والا ايه
مين يقرا ومين يسمع:)

إيمان يقول...

بجد بوست جامد موت أخر حاجه

الموضوع شغل عقلى وقلبى لفتره من الزمن

لحد ما قلبى قالى الناس دى مصطوله اصلا

مينفعش تفكر فيهم

زى مقولتى تمام هم لو فى عقل اصلا مكنوش ضيعوه فى مثل هذه الدماغات
على العموم انا عملت دماغ تمام بالبوست بتاعك
وتسلم ايدك

حاسوباتيه يقول...

كلامك جامد جدا بجد فعلا بقت الحاجات دي عادي وتسالي حد يقولك مخنوق بطل خنقتي فيهم عندهم اسباب غريبه ومش عارفه ليه بقت منتشره كده كبار وصغيرين بجد في ايه ماعرفش والله بحس انها بقت بتجاب اسهل من كيس الشيبسي ماعرفش بقت سهله كده ليه والحكومه فين ماعرفش
بصي الحل الوحيد التربيه والدين الي بقوا نادرين جدا

وربنا يسلمها يارب

hasona يقول...

السلام عليكم

كلامك كويس جداً
بس ليه حضرتك وجهتيه للرجال فقط - مع العلم أن فيه بنات وستات (أعوذ بالله ) بتشرب كل أنواع المنيلات اللي انت ذكرتيها


هو يمكن زي ما حضرتك أشرتي مجرد تقليد أعمي ومفهوم قاصر وغير منطقي
ذكرني بقصة القرود والموز (تجربة التقليد)وغباء مستبد

ويمكن يكون السبب الاكثر أهمية البعد عن الله والسير في طريق الشيطان
لو ملئ حب الله أي قلب ما قادته يديه ولا رجليه لأي نوع من هذه المنيلات والمهببات

سلمت يداك
ولكن احذري من تلك الشركات واللي بتقول توليفة جيدة - صاحبة المصلحة في أن يكون الشعب كله بيدخن ويشم

وللأسف كمان ساعات بأحس أن الحاجات دي بتكون خطة موضوعة للشعب للسير علي طريق الضياع ولا يبحث عن حقه
أو يضيع حقه ويتبعثر مع دخان كل سيجارة ونفس شيشة

تحياتي

*البت المشمشية *حلوة بس شقية * يقول...

اذا كان من حقك ان تدخلن فان امن حقى ان استنشق هوا نقيا
ههههههههههههههه
اضحكى اضحكى

المهاجر يقول...

انا فى رايى كل المكيفات يمكن العلاج منها ولكن الاراده فرق كل شئ

المهاجر يقول...

المدمن يحسب ان هذه رجوله ولا يعلم انها تدمير وافناء

جريدة الصباح العربي يقول...

انتهينا من اختيار الفائزين في مجالي الشعر والقصة القصيرة وذلك لعددنا الأول ولكن مازلنا نرحب بكل الأعمال لأن المسابقة دورية , من يريد أن تصل أعماله من مدّونته الى جمهور القراء فى مصر والوطن العربي , ارسل لنا أعمالك من قصة وشعر وخواطر الى البريد الألكتروني التالي
arabicsabah@yahoo.com
كما نرحب بمقالاتكم التي ستنشر فور ارسالها على جروب الجريدة وستصبح مفتوحة لمناقشتها بين القراء ... تابعونا على جروب الجريدة
http://www.facebook.com/group.php?gid=78080770039
انتظرونا قريباً في الاسواق
تحياتي
الصباح العربي

لجين أبو الدهب يقول...

ده انتِ شكلك كنتى راكبة ورا واحد بيدخن وطلع عينيك فجيتى هنا بدم حامى هههههه

لا بجد بوست والله رائع ياريت يتوجه لكل الشباب واللى مفكر ان التخدين رجولة وشطارة ..

ومتابعة معاكِ فى باقية الصفات ان شاء الله

وحشتينى جدا على فكرة ووحشتينى بوستاتك العسل

دمتِ بخير ..

mosooz يقول...

مساء الخيييييييييييييييييير
اتفضل يامعلمة

حشيش وبانجو وسجاير من اولها
على العموم انا معاكى فى الموضوع دة بتاع السجاير..اللى اكتر نسبة بيشربوا شجاير فى العالم فى مصر..وهو افقر شعب على وجه ة الرض فى نفس الوقت

بس للعلم ...ان بقى فى حريييييم كتير جدا بقوا بيشربوا سجاير ..وياخدوا حقن وزفت ...ودى مصيبة كبرى.

على العموم ...البانجو مش بتاعى برضة

اسماء واحلام فى وجدانى يقول...

منوووووووووووووووووووووووووووووووش

ازيــــــــــــــــــــــــــــــك

ايه الهجوم الشديد اوى ده

انا حاسس ان الرجالة بس هى اللى بتلوث الجو وبتخرب الدنيا قال يعنى مفيش انثوية بتشرب
لا يا منوووووووش انا مش معاكى انا اينعم والحمد لله والفضل ربنا مش باشرب اى مكيفات غير الشاى ولو حطينا عليه نعناع ممكن اهلوث بحاجات غريبة

بس لاحظى انك بكده هتحاربى نصف المدونين لانهم رجالة صح الصح وهما كمان اخواتك مهما حصل وكان اكيد هيغيروا على اى كلمة على اى راجل حتى لو منعرفهوش يعنى هى فعلا حرب اصلى
ربنا معاكى يا منووووووووووووووش
وقلبى معاكى يا اختى الحرب مش سهلة
انا فاكر انى جيت هنا قبل كدا بس ازاى ماقلتش رايى دى غريبة شوية

اسماء واحلام فى وجدانى يقول...

تقريبا لامة جيت اول مرة كنت شارب شاى بنعناع اكيد
علشان كده مش فاكر حاجة
ياريت تطمنينى عليكى دايما
دمت فى رعاية الله وحفظه

فشكووول يقول...

يا منوش يا حلوه
ليه بقى بتحدفينى بالطوب
الحقيقه يا منوش كل الصفات اللى انت قلتى عليها دى فعلا صفات مش كويسه خالص وتجيب اجدع راجل الارض
انا مكسوف منك خالص عشان انا باشرب سجاير مهببه بهباب وبقيت اقرأ وانا مستحمل هجومك على الرجاله اللى بيشربوا سجاير
بس هى سجاير وخلاص يا منوش ويعنى بلاش تهاجمى عمك فشكول قوى كدا
هى يا بنتى بلوه ربنا بيصيب بيها اللى ما لوش عقل او فكر بس ما علهش بقى فوتى حكاية السجاير بس وخلاص
تحياتى يا اللى خلتينى مكسوف من نفسى

ياسر سليم يقول...

بص ياريت بعد ما تخلصى الهجوم فى الصفات الوحشة .. تخشي بقه بالدفاع بالصفات الكويسة

ما هو ما يبقاش كله ضرب ضرب

لاسع افندى يقول...

انا مش مدخن

غير معرف يقول...

مممكن سيجاره من عندكم علشان ثجايري خلصت
وثكرا

ABOALI يقول...

الجميل غايب ليه

الاسمرانى برضوا

ولالالالالالالالالالالاايه

معلش السمر فى الحر عصبيين شوية

طمنينا عليكى