الأحد، 7 يونيو، 2009

أكواد لمحاولة عرقلة جناب الناهب

بعد السلام وأحلي كلام
أعلن عن تراجعي عن كلامي.. وإني لما اكتب خواطر أو أشعار هنشرها هنا فى المدونة دي وأشارك أصدقائي البلوجارية فيها.
مش أنا يا سي حرامي أو يا ست حرامية اللي أبطل أعمل حاجة بحبها بسببكم
مش أنا اللي هفضيلكم عالم المدونات تبرطعوا فيه
اللي عنده ضمير عنده.. واللي معندوش ربنا بإذن الله منتقم جبار.. بيدي لأصحاب الحقوق حقهم في الدنيا والأخرة كمان.
ندخل بقى على الأكواد
طريقة منع التحديد اللى أنا عاملاها.. عرفتها من مدونة احترف التدوين.. اللي بعتلي وصلتها ضد التيار (سويت فيوليت) وإحساس طفلة وكمان (المصرية مسز رايتر) محدش اتاخر فيهم عليا بصراحة.
بس قبل ما تعمل اى تعديل لازم تتأكد انك معرب المدونة علشان مدونتك متعملش قلبان وتبهدلك زي ما مدونتى بهدلتني يا غلبان.
علشان تفهم التعريب وطريقة التعديل كويس ادخل هنا
شرحي العبيط بقى للتعريب اهو
احنا هنروح الأول على تخصيص.. ثم تحرير HTML
*****
وبعدين هننزل على كلمة تحرير القالب
*****
هنلاقى مربع مليان طلاسم عنجليزي كدة.. معلش اتعب نفسك شوية وحاول تركز فى الكلام لغاية ما توصل لجزء معين فى قالب المدونة لتعديله واللى هو اسمة
Variable definitions
*****
بيبقى تحتها كذا بند بيحدد الألوان للنص والخلفية والفونت والكلام دة
احنا بقى عاوزين نوصل للجزء دة
<Variable name="startSide" description="Side where text starts in blog language"type="automatic" default="left" value="left">
نخلي left تبقى right
وتحتها الجزء دة بردو
<Variable name="endSide" description="Side where text ends in blog language"type="automatic" default="right" value="right">
نخلي right تبقى left
****
وبكدة تبقى عربت المدونة ومتقلقش لاتجاهها يتشقلب مع أي تعديل ومتنساش تعمل حفظ...
*******
***
نيجي بقى لطريقة منع التحديد على الكلام
هنرجع تاني لتحرير قالب المدونة
ندور على الكلمة دي
body

ونخليها كدة
body ondragstart="return false" onselectstart="return false
(ومتقلقوش هحط الكلمة اللى فوق دي فى الشات بوكس علشان تبقوا تعلموا عليها وتنسخوها)
وبكدة نبقي منعنا التحديد على الكلام.. بس متفرحوش قوي لان بردو فيه حرامية بتقدر تتحايل على الحكاية دي.
ومتنسوش ان الحرامي أسهل ما عليه يجيب ورقة ويكتب اللى هيسرقه.. بس ادينا بنحاول نمنعه.
*******
***
اما بقى الكود اللي بيمنع الكليك يمين.. فده احساس طفلة بعتتهولى.. وأنا رفعته عى موقع رفع وحطاهولكم هنا..
مع اني مش حاطاه لاني بحب استخدم الكليك يمين.
***
يللا بقى كفاية رغي.. واللي محتاج اي مساعدة يقول ولو انا معرفتش أساعده فى اعدادات البلوج والحاجات دي يروح على موقع احترف التدوين اللى وصلته عندي علي الشمال وانت داخل كدة من باب المدونة.
المرة الجاية ان شاء الله شعر أو خاطرة من خواطري (هيبقى بوست قصير يعني)
وهأجل هجوم الجمعية علشان خاطر الناس اللي بتمتحن.

23 اللي عبروا منوووشة:

د. ياسر عمر عبد الفتاح يقول...

بس يارب الحاجات دي توقفهم شوية
علشان ده الموضوع كبر
وبقيت كل ما أدخل علي مدونة الاقي صاحبها زعلان من السرقة

جزاكِ الله خيراً علي الإفادة

Lady E يقول...

حلوين اوي يا منوش
ربنا يكرمك

ايوشة يقول...

اتمنى بجد الحاجات دى تمنعهم شوية من محاولات الاقتباس دى لان فعلا كل شوية حد يشتكى من سرقة كتابته

بدراوى يقول...

ممكن سؤال
؟

انا مفهمتش تعريب المدونة ده
؟!!

اصلى انا عملت الكود اللى حضرتك حطيتيه فى الشات بوكس
لما لقيته فى التعليقات عند مدونة احترف التدوين
و مضطرتش اعمل تعريب و لا تخريب و لا اى حاجة
و المدونة مقلبتش
فعايز افهم الخطوة ديه لزمتها ايه ؟!
--
هل الأمان كفاية و لا لازم الغى الكليك يمين كمان
؟!!

MaNoOoSh يقول...

د. ياسر
ان شاء الله نعرقلهم شوية حتى لو مقدرناش نوقفهم خالص

==========

ليدي
نسلمي يا قمر

============

ايوشة
ان شاء الله نوقفهم حتى شوية (بس اللي ينسب لنفسة كلام مش بتاعة تبقى سرقة مش اقتباس سا اسوشة).. وللا ايه؟.

===========

بدراوي

فى مدونات قوالبها بتبقى معربة أساسا فمش هتحتاج الخطوة دي
وفي مدونات عمود البوستات اساسا بيبقى شمال زي مدونتك فمش هيحتاج خطوة التعريب بردو

لكن لو أخدن بالك أنا مدونتى عمود البوستات على اليمين فلما عملت كود عد التحديد المدونة اتجاهها اتقلب.. فحبيت اشرح خطوة التعريب علشان لو حد حصله زيي.

فى الحقيقة لا الأمان ولا كليك يمين مع بعض كفاية.. لان الطريقتين فى وسائل للتحايل عليهم.. بس مش هقولهم طبعا علشان مديش أفكار لجناب الناهب.
لو حبيت تحط الاتنين مع بعض عادي.. بس انا محطيتش كليك يمين لانى بحتاجة كتير.

===========

تأثير الفراشة يقول...

ربنا يحفظ مدونتك يا منوووشة و يحفظ كل المدونات من السرقة

شكرا ليكى جدااا على المعلومات ،و معاكى حق، الحرص واجب

تحياتى ليكى

mahasen saber يقول...

الله ينور عليكى

انا هحاول افهم الكلام ده
واحاول انفذه فى مدونتى

ربنا يستر بس والدنيا متبضش معايا

فتاه من الصعيد يقول...

شكرا على النصايح.......بس والله موش هعملها لان تانى..... ايش ياخد الحرامى الحمار من مدونتى

الشعب لابد له من حكومه تشكمه يقول...

بصى هو احساس السطو المسلح ده وحش بس انا شايفه ان ده معناه انك وصلتى وعديتى وبداتى تاثرى فمش حاجه وحشه بالعكس ده يخليكى تفكرى تتشجعى اكتر لان فى ناس معجبه ءبيكى:)
وربنا يهدى الجميع

كيــــــــــــارا يقول...

ما اانتي قولتيها ممكن يجيب ورقة وينقل ويكتبهم تاني

بس ميرسي للشرح يقمرايا

أحمـــــــــــــد أبو العلا يقول...

منووووش
مساء شريف عفيف بالعند في الحرامي اللي بيسرق الرغيف

انا فرحان عشان منووش مطلعتش من الناس اللي تسيب مكانها عشان خاطر حرامي بنص لبه

مستني اقرا ندك الجديد دايما

Sweet Violet يقول...

منوووووووووووووووش

الحمدلله ان فعلا هترجعى تكتبى و مش قولتى لأ و الكلام الغريب ده

ويابنتى اللى بيسرق بيبقى عارف انه حراااااااااااامى كفاية بقى دى .. ربنا يهديهم يارب


منتظرة بقى الخواطر

بس بردو زعلانة منك هه بس

بقى بحبك لبرعى بس و انا لأ

امشى من هنا مش تكلمينى تانى هه بس ):

maha zein يقول...

طيب ما تسي اللى عاوز يسرق يسرق ويتبسط
ده انتي هتاخدي منه حسنات اد كده
وكمان ده دليلي علي اعجابه بمدونتك
وكمان اصلا الموضوع مش هيوصل للسرقة يعني والنشر في كتب ولا جرايد
سبيها علي ربك
اللى يسرق يسرق
واللى يعمل الحرام يعمل
وفي النهاية اللى ليكي تاخديه عند ربنا
بس طبعا الحرص حلو
مفيش مشاكل خالص

ربنا يبارك فيكي علي النصايح الغالية

الحرامي يقول...

كده يا منوش
وكمان جايبه اكواد
وحاجات غريبه
دانت ناويه تقطعي عيشي بقي
طب افرض الواحد ضربت في نافوخه
وحب يرجع للاجرام تاني
دانتي كده بتضيعي مستقبلي
بس علي مين
طاب اوعدك اني لو رجعت للاجرام
انك تكوني من اول المسرقين
اه هسرقك
وابقي شوفي بقي اكوادك دي هتعمل ايه



ابو العريف
( الحرامي سابقا )

z!zOoOo يقول...

السلام عليكم

ارجو الرجوع الي اخر موضوع عندي

لرؤيه التحديث في اخر الصفحه للأهميه

وعذرا للإزعاج

ادم المصرى يقول...

ميرسى على الشرح وتعبك الكبير بس على فكره ممكن يلاقلهم حل بردو

ههههههههههههههههه

دا يبقه رخم اوى صح
ههههههههههه

لاسع افندى يقول...

يعنى جات على دماغنا احنا
صحيح يعملوها الصغار ويقعوا فيها الكبار

طيب الناس اللى زى حالاتى وعندهم استجماتزم لازم اظلل على السطر قبل ما اقراه علشان اشوفه واميزه عن السطور اللى مرصوصه فوق بعض..كده انا ممكن اقرا من كل سطر كلمه ههههه
وبعدين احنا كلنا بنستخدم سرعه256 ومشترك فيها 500واحد يعنى الصفحه علشان تفتح محتاجه عشرين ريفريش
طيب اعمل ريفريش ازاى لما تقفلوا الكليك يمين

وبعدين فيه مدونين رخمين زى حالاتى بيكتبوا بلون الخط نفس لون خلفية الصفحه(اه والله عملتها مره فى مدونتى)مش لازم نظلل على الكتابه علشان نقرا
عموما انا مقدر خوف كل واحد على مدونته لان سرقة الافكار حاجه تغيظ بجد ورغم كده هنفضل نكتب ونفضل نتسرق وارجع تانى اقول ان الحرامى بيسرق الحاجات اللى ليها قيمه

تقبلوا تحياتى ومرورى

المعتصم يقول...

ماتحاوليش يامنى
ايه يعنى كل الكلام اللى انتِ كاتباه ده ؟؟
سهل جدا انه ياخد من المدونة اللى هو عاوزة من غير مايعمل اى افتكاسات
مش عاوز اقول ازاى
بس صدقينى سهل
سيبك من الموضوع ده
واقعدى ادعى عليهم وربنا يخلصلك حقك
يااما ماتنشريش حاجه فى المدونه
ههههههههههههههههههههههههههههههههههه
سلام

GiGi worled يقول...

ميرسي على اهم معلومات علشان السرقه
بس يارب تنفع بجد
تحياتى ووحشانى القمر

ذكري رحبل قلم يقول...

السلام عليكم
شاطورة يا مونمش برافو عليكي انا هاعمل كده بس انا اخدت كود الماوس يمين من مونا ليزا ووضعته في المدونتين بس ممكن تعملي للصفحة save asوتنقلي عادي
تحياتي
انا هاحاول اعمل عدم التحديد

عمرو يقول...

طبعا جهد و تعب تشكرين عليه جدا .. بس زى ما أنتى قلتى الحراميه مش حيعدموا طريقه للسرقه و يمكن ييجى يوم يتكسفوا فيه من نفسهم و يخلوا عندهم شىء من الأمانه ..
تقبلى تحياتى و تقديرى ..

MaNoOoSh يقول...

تأثير فراشة
العفو يا قمر وفعلا الحرص واجب


محاسن
ان شاء الله ربنا يستر يا قمر.. بس انتى مدونتك اصلا اتجاهها شمال يعني مش لازم خطوة التعريب دي علشان اتجاهها ميبقاش زي مدونتى كدة


فتاة من الصعيد
والله يا قمر انا كنت بقول زيك كدة.. بس بردو الحرص واجب


الشعب
ممكن يكون احساس ان الواحد حاجته ليها قيمة دة حلو.. بس احساس ان الواحد اتنهب مش حلو ابدا
عااااااااااااااااااااااااا


كيارا
فعلا يا كيارا.. السرقة سهلة.. بس اهو الواحد يحرص وخلاص


أحمد ابو العلا
لالالا الحمد لله الواحد مش هيفضي مكانه لشوية حرامية.. وان شاء الله اطلع الخواطر من الكشاكيل المدفونة


سويت
ولا تزعلي يا قمر
والله انا بحبك جداااااااااا جدا يا عثل
وادي مثاثاية كمان دليل حبي
هههههههههههه
موووووووووووواه


مها زين
هو صحيح فعلا يا مها اللي هيسرق هاخد منه حسنات
بس ربنا حثنا اننا نحرص ومنفرطش فى حقوقنا


الحرامي
لو انت بالذات بقى انا هفرح من السرقة
هيييييييييييييييييييه وهتبقى أول واحدة الحرامي يرجع للاجرام على ايدك يا منوش



زيزو
جيتلك يا باشا وشفت التحديث



ادم المصري
فعلا يا ادم الحرامية مش بتغلب.. بس ادينا بنعمل أي حاجة تريحنا وخلاص


لاسع افندي
علي فكرة انا زيك بالظبط
علشان كدة بخلي كل كام سطر لون مختلف علشان انا نفسي اعرف اقرأه
وموضوع الريفريش دة بيبقى ليه زرار فى المتصفح
انا عارفة ان الحاجات دي بتضايق
وانا نفسي مبقتش اعرف انسخ أسامي الناس اللي بتعلق علشان ارد عليها
هههههههههههههههه

بس ادينا بنحاول نزهق الحرامية .. اصلهم زودوها قوي وكتروا كمان قوي قوي



المعتصم
انت جاي تغيظني يا معتصم
عااااااااااااااااااا
منا عارفة انهم مش هيغلبوا بس لما يلاقوا ناس كتير بيرخموا عليهم هيزهقوا ويخفوا السرقة شوية
وكدة كدة انا بدعي عليهم
منهم للي كلت دراع جوزها


جيجي
انتي اللي ليكي وحشة يا قمر
وان شاء الله نزهق الحرامية لما يلاقونا كلنا قارفينهم


ذكرى رحيل قلم
مهو للأسف يا ذكرى الحرامي مش هيغلب.. بس احنا مش عايزين نديهم أفكار
احنا عاوزين نزهقهم.. وباذن الله يزهقوا


عمرو
احنا بنحاول نزهقهم لغاية ما يتكسفوا على دمهم فعلا
وربنا يعيننا

safa7_karmooz يقول...

على فكرة لو حد عمل حفظ للصفحة كل التعب بتاعك راح :D