الثلاثاء، 3 فبراير، 2009

بنات حواء: رسالة من الحمام.. (النظافة من الإيمان)

أيوة محدش يستغرب.. الموضوع فعلا اسمة رسالة من الحمام
-الكلام ممكن يكون حقيقى وممكن يكون مش حقيقى لكن بيحصل.. بس خلاص-
واللى بيتقرف انا بحذرة من الموضوع اهو علشان مينصدمش ومعنوياتة تتقرف ويغمن عليه.. وقد اذعر من زرزر
(الصورة دى حطيتها رأفة بحالكم من الصور الجاية)
بصوا بقى.. انا كنت ناوية اكتب موضوع عن البنات علشان الرجالة تحاول تفهم البنات بتفكر ازاى
(مجنون اصلا اللى يفكر انه عمرة هيعرف البنات عايزة ايه او بتفكر ازاى.. اذا كنت انا نفسى معرفش)
فكنت هكتب شوية اسئلة كانهم تاج كدة واجاوب عليهم.. بس لقيت الموضوع وسع قوى والاسئلة دى هتاخدلها ييجى عشرتاشر صفحة فقلت لنفسى يا بت يا منوش اول حاجة تضايقك اعملى موضوع عنها
ودى اول رسالة أوجهها للرجالة اللى مش حلوين اللى مسمعوش كلمة "النظافة من الايمان" قبل كدة.. المهم
قوم ايه فى لحظة من ذات اللحظات الحرجة وانا بتمخطر كدة وداخلة التلاويت فتحت الباب فإذ بى تأخذنى الصاعقة وتجحظ عيناى وأرقع بالصوت أن أن أااااااااااااان (ما هذا اللذى ارى وأشم.. التلاويت مش نضيف.. التلاويت مش نضييييييييييييييييييييييييييييييييييف)

وها أنا الان اقف امام باب التلاويت مطأطئة الرأس وذليلة ومنكسرة وقرفانة بعيد عنكم (والزنقة هتموتنى.. بس عليا النعمة ما ادخل التلاويت غير لما اخر واحد كان هنا يدخل يزيل اثار الجريمة الشنعاء دى).
المهم قلت اشغل لنفسى بأى حاجة واحط غسلة فى الغسالة واشغلها فدخلت الم الغسيل اللى مش نضيف من الأوض.. فتهاديت حتى وصلت الى حجرة أخى المصون
المهم دخلت الحجرة فإذ بى تأخذنى الصاعقة مرة اخرى (انا مش عارفة هى الصاعقة دى مستقصدانى وللا ايه) ورأيت المنظر المهبب اخو المنظر اللى فى الصورة دة بعيد عنكم وقلت ربنا يهديه
طبعا انتوا متشوقين تعرفوا حصل ايه (ولا متشوقين ولا حاجة.. دة انتوا تلاقيكوا بتندموا على اللحظة اللى ضغطوا فيها بالماوس على الموضوع ابو ريحة دة)
لو كنتوا فاكرين انى لميت الغسيل دة تبقوا غلطانين.. لانى من اصحاب اسلوب الثواب والعقاب

انا قعدت صابرة ومستحملة ومستنية (وانا مفروسة وبهرى وانكت فى نفسى وعمالة ابرطم بالكلام) لغاية ما وصل ورحت قايلة اللى عندة غسيل يحطة فى سبت الغسيل واللى يدخل الحمام يبقى يفتكر ان النظافة من الايمان ورحت معلقة يافطة على باب الحمام مكتوب عليها "من فضلكم حافظو على نظافة دورة المياه.. واللبيب بالاشارة يفهم"

بس كدة اول رسالة خلصت واوعدكم ان الرسايل الجاية متبقاش مقرفة كدة.. هعهعهعهع منتوا لازم تشموا اللى انا شميتة علشان تحسوا بيا امال اصدقاء بلوجرية على الفاضى يعنى.

30 اللي عبروا منوووشة:

بنوتة يقول...

ههههههههههههههه
معلش انتى الكبيرة برضه
ولا لأ
المهم معلش
بوست جميل
تحياتى ليكى

EmY يقول...

والله انتي عسل بجد

بس الولد اخوكي يستاهل اللافطه التحذيريه دي

طلعتي ولا بتوع المرور المره الجايه اعملي غرامه

أحمد الحيدر يقول...

صحيح مقرفة ..

لكن لو كل حاجو مقرفة منتكلمش عنها حنبقى في النهاية بعالم مقرف ..

أكثر مما هو مقرف !!

تحياتي ..

البت المشمشية حلوة بس شقية يقول...

اهدا كدة يا عباس ومتزعلش نفسك
وكويس انك اتكلمتى عن الموضوع ده لانى كنت هكلم عندو

ادم المصرى يقول...

بوست لزيز وجميل

غير معرف يقول...

الرسايل دية ريحتها وحشة عايزة تتعطر

هههههه

انا لومنك كنت ولعت فى الحمام

ستيته حسب الله الحمش يقول...

فالحة قوي ياختي
انسي ولا ها يعبرك
ده شبه اخويا التؤام حمبوزو لاوي بوزو النسونجي العتيق
كان مطلع بظابيظي تواليتا وبعثرتا وهرجلتا ولم اخلص منه غير بالزواج
تقريبا اتجوزت حسبو علشان ارتاح بس من حمبوزو
بوست ذكرياتي يجنن .. قال يافطة قال

عاشقه الرومانسيه يقول...

حلوه كلمه الموضوع ابو ريحه
عجبتنى
ربنا معاكى بقى ويعينك
انا لو منك اعزل واسيبله البيت
ههههههههههههههههه

MaNoOoSh يقول...

بنوتة
لاااااااااا بقى مش انا الكبيرة
هو اكبر مني ب7 سنين المفترى الجبار وانا بقى وراه والزمن طويل
نورتينى يا عثل



EmY
انتى اللى عثل يا ايمى ونورتينى
والواد اخويا دة مطلع عينى.. دة انا ناقص امشى وراة بيفطى وكل ما يعمل حاجة اطلعلة اليافطة بتاعتها
اما موضوع الغرامة دة جربته وحياتك وفشل فشل ذريييييييييييييع



أحمد الحيدر
نورتنى
هو فعلا الموضوع مقرف ( مش انا طبعا)
هههههههههههه


البت المشمشية حلوة بس شقية
سيبونى.. محدش يحوشنى
آآآآآآآآآآآآآآآآآه يا قلبى يا كتاكت ياللى شايل من المضروب اخويا وساكت
لو كنتى هتتكلمى عن الموضوع اكتبى بردو.. خلينا نكشف للناس حقيقة صنف الرجالة المنحنحين بيبقوا عاملين ازاى مع اخواتهم البنات الثكر اللى زينا


ادم المصرى
كويس ان البوست عجبك واستنى بقى البلاوى القادمة



غير معرف
منا حطيت صورة تمويه فى الاول
هههههههههههه
بس تفتكر اولع فى اوضة اخويا وللا فى الحمام الاول




ستيته حسب الله الحمش
ستوتة حبيبتى.. انا لا اؤمن بالاستسلام
(الاستقلال التام او حبس اخويا فى الحمام)
انا بقى نظام حمبوزو لاوى بوزو دة مينفعش معايا.. اه دة انا فضحية عتيقة ( يعتبر التسييح اقوى اسلحتى البتنجانية النسائية البنفسجية) وعندى استعداد اسيح وخصوصا قدام الجنس اللطتشيف ( وبالذات يعنى اللى بيحط عينه عليهم)
ويبقى بقى يسلملى على جوزة اسماعيل بيه لو مسمعش الكلام




عاشقه الرومانسيه
هههههههههه
طب هى الريحة باينة قوى يعنى
والله صعبتوا عليا
لا انا بردوا مش هستسلم
انا وراه والزمن طويل

mohamed يقول...

أسلوبك ظريف
بس أنا عندى أقتراح تعملى بوابه للحمام الدخول ببلاش
والخروج بفلوس وكمان بعد التفتيش على نظافه الحمام
والا يدفع سعادته غرامه

safa7_karmooz يقول...

ايه البوست ابو ريحة ده ...هههههههههههههههههههه

بصى طالبى بالاستقلال واعمليلك حمام لنفسك فى اوضتك :p

enjy يقول...

دمك بجد خفيف اوى والبوست لذيذ

MaNoOoSh يقول...

mohamed
تسلم
انا جربت موضوع الغرامة دة ومنفعش.. تفتكر اعمل قفل على الباب من برة واحبسة لغاية ما يدفع وللا بلاش لحسن انا اللى اتحبس احسن.. حاكم انا عارفة الواد اخويا دة مهيصدق ينتقم مني


safa7_karmooz
سفحفح نورتنى
بقالك مدة غايب
منا طالبت بالاستقلال وعملنا حمام ضيوف والمفترى جاب ضرفة وبوظ سباكتة.. اعمل ايه بقى
ابقى اقرأ اخر حلقة فى الهبل يا سفحفح.



enjy
تسلمى يا ثكر
نورتينى ويارب تزورينى علطول

فكرة من الزمن ده يقول...

اعملي زيي واللي عمل العملة المهببة دي يتحبس في الحمام لحد ما يقول جاااي ويمحو اثار جريمتة هو احنا لاقيين مناخيرنا؟

semsem يقول...

iههههههههههههههههههههه
واضح انك مزنوقه عى الاخر


تحياتى

biberss222 يقول...

ههههههههههههههه
اصغر منه بسبع سنين و لمضه كده
امال لو كنتى الكبيره كنتى عملتى ايه
سيبي ياخد راحته ف بيته قبل ما يتجوز

انا ودماغي يقول...

ههههههههههههههههه

و الله أنتى فظيعة

صدقينى هو كدة لما يجيلوا نصيبوا و يشرف فى بيت العدل حتلاقيه بيكلم نفسه لوحده


بس انتى جادعة أنا برضه بعمل مع أخويا كدة ....لا و إيه أسخن ماما و أخليها تحكم عليه أنه يوضت أوضتى

هع هع هع هع

غير معرف يقول...

الظاهر مش انا لوحدي اللي بعاني
خلاص بقينا اتنين

كل اللي ليه حالة مشابهة لحالتنا ينضم لينا
و ننشأ جمعية للرفق بينا من العذاب ده و الله

مش عارفة الدنيا وخداني علي فين يقول...

الظاهر مش انا لوحدي اللي بعاني
خلاص بقينا اتنين

كل اللي ليه حالة مشابهة لحالتنا ينضم لينا
و ننشأ جمعية للرفق بينا من العذاب ده و الله

MaNoOoSh يقول...

فكرة من الزمن ده
منا خايفة اعمل كدة لتتردلى واتحبس انا لغاية ما يبانلى اصحاب.
نورتينى يا ثكر




semsem
يا عينى عليا.. دة انا على الحال دة كل يوم والتانى
نورتينى يا سمسمة يا عثل




biberss222
آآآآآآآآآآآآآآآآآآه يا مين كان يطولنى ابقى الكبيرة.. كان زمانه ماشى على عجين ميلخبطوش
وهو يعنى ياخد راحتة وبفترى علينا وبعدين ياخد على دماغة لما يتجوز
لاااااااا طب ما ياخد على دماغة من دلوقتى علشان يتعود (وش بيطلع لسانة)
لا بجد هو صحيح موقف كوميدي وكلة كوم والزنقة كوم بس بجد انا لو جوزى عمل كدة انا هقول على الاقل فى سرى ان مامتة معلمتهوش يعنى ايه نظافة شخصية
شفت بقى انى خايفة على منظرة قدام المأسوفة على شبابها.
سيبك انت من دة كلة.. نورتنى يا باشا



انا ودماغي
هههههههههههههههه
ايوة بكرة ياخد على دماغة ويلاقى اللى تعلمة الادب من غير ما يقدر يفتح بقة
ربنا يخليكى ليا يا ماما
نورتينى يا قمر




مش عارفة الدنيا وخداني علي فين
لا يا اوختشى انا ضد هذا الاستسلام
احنا بدل ما ننشىء جمعية للرفق بينا ننشىء اتحاد لتطفيشهم على اعشاش الزوجية او نعمل مخطط اجرامى مثلا للانتقام منهم نييياهاهاهاهاها
وللا بلاش لحسن دول عقلهم اجرامى خلقة وهيطلع على جتتنا
يلا ربنا كبييييييييييييييييير
نورتينى يا ثكرة

hasona يقول...

السلام عليكم

ايه ده ، اللي أنا شايفة ده ،، أيه اللي أنا شميته ده ،،، أشوف فيك يوم أو أتنين
،،،
غرمات مش نافع - يافطة مش نافع -
قاعدة من أفسد شئ عليه أصلاحه مستمرة
وطبعا مش ينفع تعملي اضراب عن دخول الحمام

والواد شكله واثق من نفسه ومش بيهمه حاجة ولا ايه ؟؟
أنت طبعا بتفكري في الأذية ؟ باين علي ملامحك أهوة
يبقي كاميرا وتصوري المناظر الشنيعة دي؟ وتفضلي تهديده بيها طول العمر؟؟
دي فكرة

،، استني أقدح زناد عبقريتي

ولا أقولك كفاية كده

مش ينفع أقولك علي أسرارنا نحن معاشر الرجال
،،،
أخيرا كنت بأفكر أمسح التعليق
أصل يكون أخوكي له علاقة بالتنظيم اياه
هينتقم منك ومني - ومن كل اللي علق علي هذا الموضوع

وخصوصا بعد ما قفلوا المعتقل اياه

،،،

تحياتي

Eng. Ahmed Abo El-Ella يقول...

بوست جااااااااامد جدا

بس الواحد لازم يخش في البوست ده وهو حاطط mask على وشه
هههههههههه

biberss222 يقول...

اعوذ بالله من الخبث و الخبائث
ابقي ركبى شفات على المدونه

م/ الحسيني لزومي يقول...

اقرأ نص اتفاقية منع تهريب السلاح لغزة
وادعوا الله ان يثبت مصر في عدم التوقيع عليها

إيمان يقول...

هههههههههههههههه
شر البليه مايقرف
الحمد لله إتمنط على إخواتى وعرفت إنهم طبعيين
على فكره كل ماأجى أعلق على الموضوع أبو ريحه ده الكمبيوتر يهنج تفتكرى هنج من الريحه

مش من هنا.... يقول...

حظى النحس انى فتحت البوست ده وانا بتعشى
بعد كده يا ماننوش تحطى تنويه على اول البلوج
عشان الحق نفسى قبل ما ادخل
عموما لذيذ البوست

MaNoOoSh يقول...

Eng. Ahmed Abo El-Ella
خلاص ماسك ماسك.. بس على حسابكم مش على حساب المدونة
هههههههههههه
نورتنى وياريت تزورنى على طول



biberss222
خلاص انا هبتز الواد اخويا واجيب الشفاط علطول بس شوفلى حد يركبة لو سمحت




م/ الحسيني لزومي
ربنا يلطف بينا جميعا



إيمان
لا دة الكمبيوتر بتاعك شكلة هنج تضامنا معايا واعتراضا على الواد اخويا




مش من هنا....
انا حطيت صورة تمويه مش تنويه
ههههههههههههههه

mimi يقول...

كنت بدور علي حاجة ولقيت البوست ده في طريقي ع جوجل

تحفةةةةةةةةةةةةةةةةةةةة

May Ali يقول...

ان من افضل الاشياء التى يجب الاهتمام بها فى حياتنا جدا هى النظافة واذا طلبنا النظافة نطلب شركة تنظيف بالدمام وعندما نطلب نوع معيا من النظافة مثل كشف تسربات المياة نطلب شركة كشف تسربات المياه بالدمام وشركة كشف تسربات المياه بالخبر ايضا من انواع النظافة المهمة جدا مكافحة الحشرات وهى شركة مكافحة حشرات بالدمام ولدينا خدمات اخرى كثيرة مثل افضل شركة نقل عفش بالرياض
وللاتصال وطلب الخدمة 0508400941

شركة تنظيف منازل0550171619 ضي الرحمن يقول...

شركة تسليك مجارى بالخبر
شركة تسليك مجارى بالجبيل
شركة تسليك مجارى بالقطيف