الاثنين، 26 أكتوبر 2009

جيت أصدعكم من تاني

طبعا يعني اكيد مش محتاجة كلام ان كل المدونين وحشوني جدا
وحشني زيارتهم والدخول جوه دماغهم وأفكارهم
ووحشني التدوين واني اصدعكم برغيي
بقالي شهر كل كام يوم افتح تدوينة جديدة واقوم قافلاها تاني
واقوم قافة المدونة بحالها رغم اني مريت باحداث كتيرة جدا فى الفترة اللي فاتت ومواقف وحشة ومواقف موتتني من الضحك كان نفسي احكيلكم عليها (متقلقوش انا رغاية والتدوينات جاية كتير)
ومازلت بعتذر عن عدم الرد على التعليقات عندي لو متوفرليش الوقت
او التعليق عندكم رغم انى بتابعكم كلكم في صمت
كنت محتاجة اكلم واحدة واقولها اللى في قلبي نحيتها
................
............
...
عايزة اقولها
وجعتيني ووجعتي قلبي
كل ما بحلم بتكسري مئاديفي
كل ما يطلع لحلمي جناحات بتقصيها
كل ما ادور على الحب بتحطي قدامي عاهات على شكل رجالة

وناس اشوفهم طول عمري ملايكة وفي لحظة يطلعلهم انياب
وناس بديهم اسرار روحي واكتشف انهم حاطين اسوار حواليهم
ساعات بيأس ومببقاش عايزة اشوف وشك ولا اشوف وش حد من اللى عايشين فيكي
وساعات قلبي بيتكسر وروحي بتروح

وعلشان كل اللي فات يا دنيا بقولك طظ فيكي
طظ فى السنين اللي حطتيهم بيني وبين اللي بحبه
وطظ في اى حد يقول ان اتنين بيحبو بعض مينفعش يتجوزو لأي سبب كان
وطظ في كل حد فكرته ملاك وطلع وحش بأنياب
وطظ في كل عاهة دكر وقعني حظي فى معرفته او كان مشروع جواز فاشل لاي واحدة ست
وطظ في أي ام ربت ولد وطلعته عاهة من العاهات دي
وطظ فى كل ست نكدية مبتحاولش تسعد جوزها
وطظ في كل راجل فاكر مراته خدامة وعبد لمتعته فى الفندق بتاعه
وطظ فى كل اب بيربي ولاده على رعب ان محدش يكلمه وهو بيشتغل ولو اتقدم لبنته واحد معاه "دبلون" يقولها "السكافة مبتأكلش عيش" علشان يخلص من العار لو متجوزتش
وطظ فى كل ام بتكسر مئاديف بنتها وتحسسها انها هم على قلبها ولو متجوزتش الدنيا هتتهد علي دماغها وتبقى عجوز شمطاء وحيدة
وطظ في كل اللى اتجوزو وهم مش قد الجواز
وطظ في كل اللي خلفوا وهم مش عارفين يربو اصلا وبيسيبو الشارع يربي عيالهم
وطظ في اي كلب اتحرش ببنت اخته او اخوه او اي انثي فى الشارع حتى لو كانت انثي البطريق
وطظ في أي ام واب يعرفو ان ولادهم اتعرضو لتحرش ومخدولهمش حقهم من الكلب اللي اتحرش بيهم
وطظ فى البلد اللي ولادها مش عارفين يحلموا فيها لا بحب ولا نجاح ولا بيت ولا أي حاجة حلوة
وطظ في اى حد فاكر نفسه وصي على اللي حواليه وعامل نفسة عارف مصلحتهم او عامل نفسه قاضي وبيحاسبهم
طظ طظ طظ

طظ فيكي يا دنيا بالقوي
ومهما بكيت او قلبي نزف منك ومن اللي عايشين فيكي مش هيهمني طول ما "هو" حسه معايا
(ملحوسة صغنونة: انا "كنت" مخنوقة جامد فعلا من الدنيا الفترة اللي فاتت.. بس الوقتي حاسة ان ملهاش عندي هي او أي حد ضايقني أو خذلني غير طظ كبيرة جدا "ودي تبقى الطظ ال20 فى البوست").. هع هع هع هع

60 اللي عبروا منوووشة:

Unknown يقول...

اول تعليق
حمد الله على سلامتك
اقرا و ارجع تانى

اسماء واحلام فى وجدانى يقول...

كان نفسى اكون اول تعليق

بس مش مشكلة احمد بردوا مننا وعلينا

وهيتنازل عنه

اسماء واحلام فى وجدانى يقول...

الف حمدلله على سلامتك يا
منوووووووووووووووووووووووووووووووش
والله واحشتنا غلاستك وصداعك اوى
يلا بقى عايز كرتونة كيتوفان
وروبالجين ومجرنيل
وكل الاحتياطات اللازمة لعودة منوش
ربنا يستر يارب

اسماء واحلام فى وجدانى يقول...

ايه ده يا منوش

18 طظ فى البوست

اللى اعرفه ان منوش دايما بتقابل المشكلة بضحكة وتفائل وبتعدى منها بفضل ربنا لكن دى منوش تانية متغيرة اوى كده ليه كل شىء فى الدنيا قسمة ونصيب ومفيش حد هياخد اكتر من نصيبه
ايه رايك خدى من عندى 18 طظ على اللى عندك للمذكورين فى البوست
يبقى المجموع 36 طظ وبكده فاضل 14 طظ من اى متبرع وندخل موسوعة طظ العالمية

romansy يقول...

الف حمد الله على سلامتك يا منوش
اخبارك ايه
واضح ان الدنيا ضايقتك قوى قوى
بس النهارده بالذات حسيت باسم مدونتك
واد ايه انتى كنتى مخنوقه بجد
بس خلاص بقى انتى فى وسطنا
يعنى ارغى براحتك

romansy يقول...

الف حمد الله على سلامتك يا منوش
اخبارك ايه
واضح ان الدنيا ضايقتك قوى قوى
بس النهارده بالذات حسيت باسم مدونتك
واد ايه انتى كنتى مخنوقه بجد
بس خلاص بقى انتى فى وسطنا
يعنى ارغى براحتك

Unknown يقول...

واضح انك مضايقة اوووى
و حد جرحك
فانا بفضل انى مقولش تعليق ممكن يضايقك
اكثر خاصة ان حاسس ان الموضوع شخصى اووووى
و انا كمان معرفكيش كفاية عشان اعلق
على الكلام ده

بس اللى اقدر اقوله و لا تزعلى نفسك مفيش حاجة تستاهل

MaNoOoSh يقول...

بدراوي
نورتني طبعا فى المدونة وفي أول تعليق
وانا فعلا كنت متضايقة ومجروحة من الدنيا والناس اللى فيها حتى اهلى اللي المفروض بيبقوا اقرب حد للانسان

بس علق براحتك ولا يهمك
معظم الطظ اللي قلتهم مش مواقف شخصية



=============
أحمد
ولا يهمك المرة الجاية تبقى اول تعليق
والكيتوفان هدية لكل اللى يزور المدونة ومعاه كباية شاي مظبوطة كمان

ومتقلقش منوووش حتى لو الدنيا خنقتها بردو هتطلع للدنيا لسانها وتقولها طظ
"دي الطظ ال21 على فكرة"
ههههههههههههههه



=============
رومانسي
والله ليك وحشة يا رومنسي وافتقدت اشعارك وكلامك الرقيق
وهي الدنيا مش مضايقة مين!!!
بس احنا ولا يهمنا بردو دحنا ناس جامدة مش اى كلام يعني

Selfmeaning يقول...

حمد لله على سلامتك يا جميلة

و لا يهمك من كل اللى حصل

اعتبريها فترة و عدت

و اديكى رجعتى تنورينا من جديد

donya يقول...

اول زياره للمدونه
بجد المدونه جميله والبوستات كلها تجنن

والبوست ده جميل اوي


وانا معاكي في كل طوز اوتوز

قلتيها


ربنا يسعدك


*تحياتي

mimi يقول...

أحلي 20 طظ

في أحلي بوست

نورتي يا عثل أنتي يا سكرررررررر

mimi يقول...

مش عارفة محدش بيحتل هنا لأيه؟؟؟؟؟؟

أعتزلوا؟

الشعب لابد له من حكومه تشكمه يقول...

اولا وحشااااااااامى والله ووحشنى كومنتاتك:) وكلامك ووحشننى بوستاتك اللى حضرتك كنتىق فله تعليقاتها:(

ثانيا والله ما انا الواحده دى مش انا ولا جيت جمبك..

ثالثا احب انضم معاكى لحركة طظ دى واقول معاكى طظ فى اى حاجه تزعلك ياجميله...
وانا هتبرعلكوا بالطظ الباقى وندخل مع بعضينا موسوعه جينيس اهو نباه اسمنا دخلنا حاجه ههههههههههه..
اضحكى وروقى اكتر من كده وبيعدى وكله فى الاخر بيعدى:)

فى لقاء حدانا فى المنصوره متيجى نغير جو مع بعضينا واهو نقعد على النيل عندنا انتى تقولى طظ وانا اقولك طظ وبعدين نلاقى حد حوالينا يقولنا طظ.وننظم حركة طظ العظمى :)

Ahmed يقول...

عندك غياب يااستاذه
عندك غياب والأعذار كلها مش مقبوله
يعني ايه يعني تسيبينا كده وتنسحبي ولا كأننا هنا أصلا
لا لا لا ده لامنكن ابدا وغير مسموح به على الاطلاق

حمدلله على سلامتك وربنا يسعد ايامك

لو عندك لسه مساحه في البوست ياريت تكتبيلي عندك 50 طظ زياده
50 طظ بعترف اني معنديش الشجاعه اكتبهم والناس تقراهم
50 طظ للي اتكسر واللي بيتكسر واللي لسه هيتكسر
50 طظ لناس كتير بقابلهم مهماش ناس مفيش احساس

يلا كفايه طظ كده عشان شرطة المدونات متلمناش كلنا

حمدلله على السلامه ومش مسموح بالغياب تاني

الفراغ يقول...

صباح الفل يا عسل

احيكى والله
وماحدش فى الدنيا دى يستاهل غير كدا

ربنا يخليلك اللى طبطب على جرحك وغسل روحك من الاحزان
لو طلعتى من الدنيا بواحد بس انسان
يبقى اسجدى لله شكرا
واوعى تدورى على اى حد فاكر نفسه بنى ادم
ابحثى فقط عن الملايكه فى السماء

إيمان يقول...

فضلك طظين وتحطمى الرقم القياسى
ده غير انك حطمتى الرقم القياسى فى الغياب أصلا
انا معاكى فى كل البوست من أوله لأخره صحيح هو خوفنى عليكى جدااا
لكن بجد ربنا معاكى ويهون عليكى اى صعب ومفيش مشكله اننا نتجرح من أقرب الناس بس المشكله اننا نسيب الجراح دى تعلم فى روحنا
داوى نفسك اول بأول وكله فى الاخر بيعدى
وحشانى جداا
وربنا يجعلها أخر الغيابات

SHAPE YOUR LIFE (ABOALI) يقول...

كان زمان المماليك بياخدوا على كل حاجة ضرايب الا الملح
فلكان المصريين يغطوا بضاعتهم بالملح
ولما يشفوا المماليك البضاعة لا ياخذوا عليها كده ضرايب

وكان الملح وقتها يسمى طظ
يعنى الحاجة اللى لا يدفعوا عليها ضرايب
اسمها طظ يعنى مالهاش لازمة

واظن كده عرفنا معنى طظ

وسمعنيى احلى طظ فى الدينا من اللى هتخنق وناوى يتخنق


وحشاااااااانا مهما قولتى من طظ

غير معرف يقول...

منووووووووش ياقمر

ازيك ياجميل

وحشاني موووت والله

الحمد لله على سلامتك نورتني البلوجر

اموووووووووووواه

غير معرف يقول...

نيجي بقى للبوست

ايه كمية الطظ الي رجعالنا بيها يابت انتي

شكلك مخنووقة وعلى اخرك

مش شرط تكون كل القرارات الي اخدتيها صح ومش شرط تكون غلط

التجربة خير برهان ومحدش ضامن حاجة من الدنيا الوحشة دي

ربنا ياقلبي يفرحك ويحققلك احلامك وتكوني صح مليووووون في المية

دمتي بحفظ الرحمن

yoyo يقول...

صباحك سكر

حمد لله على سلامتك يا سكرة
انت وحشتينا اوى اوى اوى
مش تغيب عنا تانى يا قمر

yoyo يقول...

طظ كبيرة اوى لكل اللى زعل يا قمر
مش تخلى حاجة مهما كانت تزعلك ولا حتى تضايقك مهما كانت
الحمد لله ان المرحلة دى عدت و اعتقد انك اتكلمتى عن واقع اغلبنا عايشه يبقى طظ كبير جنب ال 20 طظ بتوعك

yoyo يقول...

يالا بقى انا مستنية صدعك يووووووه قصدى جديدك
عشان اعرف احتلك احتلال صغنن كده على ادى

دمتى اختى بالف خير وسعادة
تحياتى
يويو

mohamed ghalia يقول...

حمدا لله على السلامة
البلوجر نور واتخنق من جديدهههههههههههه
نورتى بجد

احساس طفلة محبة للرومانسية بس واقعية يقول...

منوووووووووووووووووووووووووش
واضح ان الدنيا خبطت فيكى اوى وانك كنتى بتضحكى وانتى مخنوقة منها بس كويس انك قولتى اللى جواكى عشان ترتاحى وخلاص بقت متهمكيش
ربنا يخليلك اللى بتحبيهم
ودائما يخلوا الدنيا فى عنيكى بلا قيمة
ودائما يخلصوكى من اى الم فيها

متغبيش تانى حتى لو مش هتعلقى على تعليقتنا المهم تكتبى دا انتى لسة قيلها بيوحشنا الدخول جوة العقول والافكار للاخرين اللى بنقدر ارئهم وطريقة تفكيرهم

دمتى بكل خير يا قمر
تقبلى مرورى

Sweet Violet يقول...

منوووووووووووووووووووووووش
وحشانى مووووت
حمدلله على السلامة ياجميلة
بجد فرحانة ان توأمتى فى الاعتراض رجعت تانى
ايوة كده وياستى طظ فى اى حد يزعلك اصلا
اما بقى عن الدنيا كبرى دماغك منها وهى اللى هتجرى وراك تقولك ارضى عنى
^_^

غير معرف يقول...

وحشتينا يا وحشه :)

على فكره طبعا الدنيا ماتستاهلش .... بس 8 سنين موش فرق ابدا يا بنتي

انا افتكرتهم 28 سنه

المهم بقولك انك اضربي همومك بالنار ولا يهمك

تحياتي

Unknown يقول...

(كنت مخنوقة)
انا متهيأللى
بكل الطظات دى
خلصتى الخنقة بتاعة
السنة الجايةإن شاء الله.
المهم انك رجعتى بالسلامة
ومنتظرين تدويناتك من
(غير طظ)ربنا يخليكى.

بنت الأسلام يقول...

ياااااه حمد الله على السلامة .وحشتينا بجد بس إحنا زعلانين لأنك مشيتى من غير ما تقولى . بس بوست تحفة بجد خصوصا العشرين طظ .ربنا يسعدك ويوفقك دايما .
همسة سابقا وبنت الإسلام حاليا

ساره يقول...

منمن وحشششششششششتتتتييينننى
حمدلله على سلامتك
ياريت اشوفك اون لين قريب عشان نتكلم عن كم طظ من البوست عندك :)

الله يسعدك ويبعد عنك الهم وفعلا طظ في كل اللي حطيتهم في البوست

:)

ستيتة يقول...

وحشتييييييييييييييييييييييييييني

طظ طظ وماله ياختي على رأي دكتور شديد
اديها طظ للصبح بس مش بعد ما نديكي موافقة على كل الطظ دي تروحي شهرين

لو انتي راجل تغيبي تاني :)
وحشتييييييييييييييييييييييييييني

سمكه واحده يقول...

وحشتيني يا مخنوقه
اذيك يابنتي
فينك من زمان
انا لما لقيتك عامله حاجه جديده جريت اسلم واشوفك عشان كنتي وحشاني
حمدالله علي السلامه مقرتش حاجه
حبيت اسلم وهبقي ارجعلك تاني ياقمر

mahasen saber يقول...

انتى رجعتى بكمية من الالم والطوزات كبيره قوى

لعل وعسى يكون ده تنفيس عن اليى جواكى

المعتصم يقول...

منوووووووووش
حمدالله على السلامه ياباشا
عوداً احمد ومحمد ومحمود وسيد وحسانين كمان
طب ماكنتى تسمى البوست طظ وتريحى نفسك وتريحينا
ههههههههههههههههه
ماشى ياستى مواقون على كل طظ فى البوست
وربنا يبعد عنك الضيق
ويارب بعد كمية الطظ الفظيعه دى بقيتى احسن والدنيا ابتدت ترجع معاكى زى الاول
حمدالله على السلامه مرة تانيه
ومستنيين الجديد

تامر علي يقول...

احلى حاجه في البوست (بخلاف ال20 طظ طبعاً ) صورة البنت اللي مطلعة لسانها دي شكلها بيفكرني بشخصية قابلتها بس مش فاكرها :)))

احييك على كل طظ في هذا البوست :)

Lady E يقول...

نورتي مدونتك يا منوووووووش

طظ في كل دول وفي اي حاجه تزعلك يا سكرة

عابرة السبيل يقول...

سلام عليكم

طظ طظ طظ

ياستى ولا يهمك
ياما دقت على الراس طبوووووووول

احسن حاجة تقولى

انا لله وانااليه راجعون

واكيد ربنا هيعوضك
وقولى لا حول ولا قوة الا بالله عشان الهم يتزاح من على قلبك والخنقة

تحياتى

رئيس منظمة الهكر يقول...

لا والنبي مش ناقص صداع

أم أحمد المصرية يقول...

اولا وحشتينا يا بنتي
ثانيا ما تسمحيش لحاجة في الدنيا تحبطك
شايفة مين اللي بينصحك
ههههههه
ما تغبيش عننا

ذكرى رحيل قلم يقول...

بشعةةةةةةةةةةةةةةةةةةةةةةةة
يا بشعة ايه طظطظطظطظطظطظطظطظ

يا بنتي لا تبالي منتهي القسوة انك مش تردي بل تسكتس ولا تبالي

وبعدين مين اللي يقدر يضحك عل منوش

طب كلمينا نتكلم نقول ونحكي

ع العموم الدنيا مش بس للناس الي ذكرتيهم وطظيتي فيهم
الدنيا حلوة وجميلة بس احنا نحبها وهي ملهاش اي ذنب

ع العموم متزعليش وربنا يعوضك كل خير في كل حاجة

وحشتيني




والله
بجد






يلي بقي اكتبي
وحكي
يا قمر

Zika يقول...

والله كام طظ بالدنيا
كام طظ يحلوا من على حبل المشنقه

غير معرف يقول...

منوش ياحبيبتى
عودة حميدة ويارب لاتتكرر
انا جاية اسلم واقولك نورتى ياقمر
تحياتى

م/ الحسيني لزومي يقول...

حمد الله علي السلامه
اكيد وحشتي اصدقئك
---------------

من اجل
وطن آمن مستقر...حياة افضل.
من اجل
محاربة الفساد....مقاومة التزوير
من اجل
ان تكون مقدرات هذا الوطن بأيدينا
شارك في الحملة الشعبيه للقيد بالجداول الانتخابية
ضع شعار الحملة علي مدونتك
عذرا علي عدم التعليق علي البوست

النسر المهاجر يقول...

الحمد لله إنك بخير ووده حميده للتدوين مرة أخرى منتظرين إبدعاتك

اسماء واحلام فى وجدانى يقول...

قلت هتصدعينا

وشكلك صدعتى مننا

ايه يا منووووووووووووووووووووووش

روحتى فين

يارب تكونى بخير دايما يارب

حلم بيعافر يقول...

هههههههههههههههههه
اهلا بالصداع من تانى
وحشتنا كتاباتك
وبعدين متضايقيش نفسك ومتعديش على نفسك الطظات تانى

حلم بيعافر يقول...

هههههههههههههههههه
اهلا بالصداع من تانى
وحشتنا كتاباتك
وبعدين متضايقيش نفسك ومتعديش على نفسك الطظات تانى

غير معرف يقول...

تصدقى انى استريحت لما قريت البوست بتاعك
حمد لله على السلامه الاول
وتحياتى على كل الطظات الرائعه والالف طظ اللى انتى مقلتيهمشى
وانا معاكى قلبا وقالبا فى كل طظ
وباهديكى الحته دى

وإيه يعنى
مجروح وجرحى بيوجعنى
ما أنا لسه باتحمل
وإيه يعنى
محدش راضى يسمعنى
م أنا برضه هاتكلم
وإيه يعنى
فيه ناس كتير بتخدعنى
ماانا لازم أتعلم
وإيه يعنى
حاجات كتير بتمنعنى
ما أنا عمرى ما استسلم
وإيه يعنى
لو سكتى هترجعنى
هبدأها تانى وأكمل

غير معرف يقول...

اييييه ياقمر

فين هتصدعينا ومعرفش ايه

اختفيتي فين تاني

وحشتيني

امووووووواه

singamaraja يقول...

Reading and visiting your blog

تأثير الفراشة يقول...

أولا الحمد لله على سلامتك

ثانيا ، البوست واضح فيه المرارة اللى حستيها من الوضع الحالى ، لكن أجمل ما فيه إن بالرغم من كل العيوب و المواقف اللى ذكرتيها إلا إنك بتتحديها و مش بتتكلمى بضعف و تقوقع و لكن بتتكلمى بقوة و تحدى

أحييكى على القوة اللى حسيتها فى كلامك و يارب تفضلى بالقوة دى و استعينى بالله على كل الأفعال اللى فعلا ماترضيش أى حد

ربنا يوفقك دايما لكل خير

تحياتى ليكى يا منوووش

Sweet Violet يقول...

يااااااااااه تخيلى الدكاترة كلهم مش عارفين يعالجوا الصداع اللى انتى عملتيه @_@

فينك بقى ؟؟؟
ياريت تطمنينى عليك لو حتى بميل
v_v

Ahmed يقول...

في ناس بقالها كتير مكتبتش ولا شفناها في اي مكان

مفتدقينهم بشده
الغياب ده ملوش اخر ولا ايه يعني

SHAPE YOUR LIFE (ABOALI) يقول...

ايه يا باشا
انا وافقت على الصداع وانتى تهربى كده

طمنينا عليكى كفاية خنقة بقى

غير معرف يقول...

و الله أجدع رد فعل ممكن حد ياخده ..
المهم .. حمد الله على السلامة

نـــــور يقول...

كل سنه وانتى طيبه يامنوش ياجميله
وطظ على ال20بتوعك يبقوا كده 21 بالتمام والكمال :)

عسل يامنوش حتى وانتى متنرفزة

عيدك سعيد انتى وحبيبك ياجميله وربنا يجمع بينكوا قريب ان شاء الله على سنته وسنة رسوله :)

غير معرف يقول...

كل سنه وانتى طيبه
وعيد سعيد عليك وعلى الاسره الكريمه

Unknown يقول...

كل سنة وأنتِ
بخير حال طمنينا
عليكِ :ليه الغيبة؟

اسماء واحلام فى وجدانى يقول...

كل سنة وانتى طيبة يا منووووش
وبالمناسبة دى هاقولك حكمة اليوم

مرة حد قال لحد هارجع و مش رجع
وطبعا انا مشعارف مين هو الحد الاول ولا حتى الحد التانى

ما علينا ممكن بقى تطمنينا عليكى ضرورى يعنى بدل ما اسحب تراخيص القطة اللى على المدونة برة دى

shoshta_ joker يقول...

السلام عليكم.......
اول زيارة ليا عندك وان شاء الله يدوم التواصل.....الخنقة لما بتطلع بتريح اووووى الانسان فعلا الدنيا مش ليها لازمة طوال محنا مخنوقين منها .......ولازم نطلع كل الى جوانا....دومتى بخير ...وتفكى الخنقة دى ان شاء الله .....فى رعاية الله.
shemo

غير معرف يقول...

كووووول سنة وانتي طيبة ياقمر

عيد سعيد عليكي وعلى حبايبك

:)