الأحد، 18 أبريل 2010

تتبربر بالحرارة وتنكمش بالبرورة

(الصورة دي بس علشان تثبتلكم اني الحمد لله كويسة ومش مكتئبة ولا حاجة بس عندي حالة زي اللي في الصورة بالظبط... وان شاء الله تروح لحالها)

من زمان قوي نفسي أكتب بوست جديد ومش عارفة

ونفسي أتابع كتاباتكم وبردو مش عارفة

مع ان الاحتلال انتهى من فترة

بس مش عارفة فيه ايه

****
**
****

ساعات لما بفكر بحس ان الدنيا كل شوية بتنكمش مع ان الحر بيزيد

والناس بتنكمش مع انهم بيزيدو ويكترو بردو

حنيتنا بتنكمش... وصبرنا بينكمش... وأخلاقنا الحلوة بتنكمش... والرحمة في معاملتنا بتنكمش... حتى ضحكتنا في وش بعضنا بتنكمش... حتى أحلامنا وطموحنا كل يوم عن التاني بتنكمش

في نفس الوقت اللي بقينا فيه أساتذة في الفشخرة الكدابة والدوس على مشاعر بعضنا وأنانيتنا اللي ملهاش مثيل

ومع اني واثقة اننا مش ملايكة ومحدش في الدنيا دي ملاك

بس الشياطين جوانا وحوالينا كترت قوي

ملحوظة بقى

معنديش اي فكرة انا كتبت الكلام دة ليه غير انى فعلا حاسة اننا منكمشين بالزيادة

وانا الحمد لله بخير ياستوتة ياواحشاني قوووووووووي

واللحمة هتبقى بمتين جنيه وكان نفسي أشتغل شغلانة بكرامتى وبمرتب على قد تعبي فى الشغل مش أكتر من غير بهدلة مواصلات ولا قلة كرامة مع زملاء العمل... وكان نفسي أكمل الدراسات العليا بردو من غير بهدلة مواصلات ولا سف التراب ولا آلافات أدفعها في أبحاث ومصاريف ولا حد أقل مني مستوى علمي ياخد مكاني أو مكان غيري علشان واسطة... وكان نفسي أعيش وأختار وأتحمل نتيجة اختياري وانا وضميري بقى مني لربنا من غير كلام سم الأفاعي من القرايب ولا اني أهتم بيه... وكان نفسي ناس كتير خفت عليهم من قلبي وعاملتهم زي أخواتي يعاملوني بالمثل... وكان نفسي على كتر عيلتي وقرايبي اني أحس ان ليا ظهر اتسند عليه

بس الدنيا بتنكمش ومبتديش كل حاجة

علشان كده الواحد مش لازم يستناها... واللي ليه حق ياخده بإيده... واللي بيعمل خير أو شر هيلاقيه

ومفيش حد في الدنيا هيجبرني اعمل شىء رغما عن إرادتي ودي الحاجة الوحيدة جوايا اللي مصبراني على الدنيا اني عايشة بإرادتي الحرة رغم كل العوائق والسموم

وبجد محدش يزعل مني على التقصير في الزيارة أو الرد على التعليقات لاني على سفر مستمر

16 اللي عبروا منوووشة:

ستيتة يقول...

بعد ما شفت الصورة
اطمنت عليكي تمام :)
كده انتي منوش التي اعرفها
ربنا ييسر لك كل عسير
ومتشكرة جدا إنك طمنتيني عليكي
وكوننا ننكمش بالبرورة
فدي مؤكدة
النهاردة قلت لزميلي فاكر لما كانوا بيقولوا زمان اسرائيل ها تضرب العمق في مصر
احنا انضربنا في العمق يا عزيزي
كل شيء حوالينا بيضرب عمق الإنسان
علشان كده حسيت بكلمة
اننا انكمشنا بالبرورة :)
بس الحمد لله الحمد لله
اننا بنرجع تاني نتبربر بالبرارة

غير معرف يقول...

ربنا يطمنا عليكي كمان

بس حاولي ماتبعديش كتير :)

تحياتي

سمع هوص (Abo 3li) يقول...

يارب نتبربر علي قد منقدر..
وكل الحاجات القلتي انها بتنكمش... ترجع تتبربر...


ربنا يسعدك ويوفقك للخير..

romansy يقول...

مخنوقه بقى هنعمل ايه فيكى عرفناكى مخنوقه بس بقى نصيحه خليكى كده على طول خليكى حره اعملى اللى انتى شايفاه صح سيبك من كلام الناس ومن ناحيه الانكماش احنا انكماشنا من زماااااااان
من جديد علينا الانكماش تعرفى لما تختلفى مع واحد فى شغلك زميل ليكى وفاكرك طيبه ومش يتتكلمى ولا بتهشى معاه
وفجاه لما تعلى صوتك عليه يرجع مارشيدين لورا بقينا كلنا كده يا منوش سيبك انتى
حمد الله على سلامتك

ميرا ( وومن ) يقول...

حمد الله علي السلامة ومنورة يا منوش

والله عندك حق كل حاجة فعلا بتنكمش وعندك حق في كل كلمة قولتيها

بس هانقعد نقول كان نفسنا وبيحصل وخايفين لا يحصل

لازم نشوف حل أكيد في حل ربنا يكرمنا بحل

Ms Venus يقول...

حمد لله على السلامة نورتى التدويين من تانى يا قمراية

بقالك فترة كبيرررة مختفية


الحمد لله انك بخير

حنيتنا بتنكمش... وصبرنا بينكمش... وأخلاقنا الحلوة بتنكمش... والرحمة في معاملتنا بتنكمش... حتى ضحكتنا في وش بعضنا بتنكمش... حتى أحلامنا وطموحنا كل يوم عن التاني بتنكمش


للاسف صح جدا

دمتى دايما بخير

وردة لعيونك

د/على خميس يقول...

السلام عليكم و رحمة الله و بركاته
عجبنى جدا ختام حضرتك للموضوع و ذكرتينى بقول الرسول الكريم صلى الله عليه و سلم فيما معناه :
لا يكونن أحدكم إمعة إذا أحسن الناس أحسن و إذا أساءوا أساء و ثكن وطنوا لأنفسكم
فيجب على الإنسان أن يحسن فى كل الأحوال و لا يسير مع الناس حيث ساروا و لكن يجب أن يختار بإرادة حرة طريقه على نور من الله و لو كل واحد اهتم بنفسه و كأنه عايش فى الدنيا لوحده هنلاقى الدنيا كلها ( متبربرة ) حتى فى عز البرد بالخير و اليمن
بارك الله فيك و ثبتك

شمس النهار يقول...

ازيك
يارب تكوني بخير
ولوان البوست بيقول انك مش مبسوطة ولا حتي بالجلاء عن بيتكم العامر
:))

الناس اتغيرت والتغيير بقا عدوي
الاول الامهات كانت تقول ماتعاملش حد بمعاملته عامله من منطلقك انت وتربيتك ماتنزلش بمستواك مهما كان لا الاخلاقي ولا العقلي
دلوقتي كله نزل لكله
حتي الفن اللي هو مرايةالمجتمع سيطر عليه مي؟
امثال ابو الليف
يبقا لازم ننكمش وننكمش اوي مش بس ابلبروده وبالحرارة كمان
سلامي

الأرمـوطــي يقول...

حمد الله على السلامة وان شاء الله تتمددى ونتمدد كلنا معاكى
سلام

شبـــاك موارب يقول...

منوش الشقية وحشااااااااااااااني
انت تقريبا بتتكلمي عن الموجود في قلبي
انا حتي بطلت اكتب في مدونتي علشان محدش يكتئب من كلامي
عايزة اتغير و مش عارفة
المهم انك طمنتيني عليكي
سلاااااااااااام يا قمر

Remas يقول...

منووووووش

وحشانى جدا جدا

الحمد لله اتطمنت انك بخير مع ان كلامك قلقنى عليكى
بس تفتكرة ان دا مش العادى ؟

دا العادى دلوقتى ان الاقل علما ياخد مكان الاعلى

ان اللى بيتعب مش بياخد على اد تعبة مع ان اللى مش بيتعب خالص بياخد تعب غيره

انكمشنا باالبرورة تعبير حلو اوى عجبنى لانه صح اوى اوى

أبو العريف يقول...

هو انت لسه مخنوووووقه

بقالي كتير مجتش هنا

ومجتش ف اي حته

بس زمان رغم ان اسمك مخنوقه

كنت من اكتر الناس اللي بيضحكوني

وبيغيروا مودي

اعتقد كلنا منكمشين

بس لا علاقه للبروده

ولا حراره بانكماشنا

الازهرى يقول...

واضح انى راجع والدنيا مغيمه

اسلم وارجع وقت تانى

اسماء واحلام فى وجدانى يقول...

منووووووووووووووووووووووش
صباح الخنقة
فينك من زمااااااااااااااااااااااان

حلم بيعافر يقول...

مسااااااااء الانكماش والتبربر

فارس عبدالفتاح يقول...

هذه هي الحياة الدنيا هذه هي الحقيقة المجردة