الأربعاء، 19 مايو 2010

إنها عدالة السماء

طبعا بقالي زمن منكمشة حتى عن التدوين
كتير مكنتش بلاقي كلام أقولة
وكتير كنت بلاقي كلام مبحسش اني عايزة اقولة
وكلام كتير قوي النهاردة عايزة أقولة
====
==========
هي رقم واحد عندها 35 سنة
هو رقم واحد عنده 55 سنة ومطلق بلا رجعة مع ولد و3 بنات في سن الجامعة وثانوي
طبعا هي دي اتجوزت هو دة علشان متاخدش لقب عانس ولان هو دة السن اللي بيتقدملها وكان أفضل المتاح
هي دي ربنا رزقها ببنوتة وهو مراتة الاولانية اديتله ابنه بعد ما كنت حارماه منه بعد انفصالهم
هو معدش عنده أي اهتمام بهي... زوجين على الورق بس وبخل وذل ومشروع طلاق
===
هي رقم 2 عندها 26 سنة ومطلقة ومعاها طفل 6 سنين
هو رقم 2 عنده 63 سنة ومطلق ولا ينجب (وبصحته)
جيران وهو حبها وبيعامل ابنها أحسن معاملة
وهي شافت فيه الحنية اللي ملقتهاش في أبو ابنها ولا في أهلها
شخصياتهم متوافقة جدا وصمموا على الجواز رغم رفض الأهل واقنعوهم في النهاية
ربنا يوفقهم
======
لو كان كلام الناس نفع غيرهم كان نفعهم
سعادتنا بإيد رب العالمين واحنا منقدرش غير نختار اللي مقتنعين انه هيرضي ربنا ويسعدنا مش يرضي الناس
====
زوزون الحيزبون
عندها 18 سنة وتمثل لي كل ما يمكن أن امقته في شخصية أي بنت
من حيث الملابس الفاضحة
وحركات المياصة الواضحة
والتقاربات الجسدية للشباب السايحة
والمعاكسات الهاتفية للشيباب
بالإضافة للنظرات والهمسات وجميع أنواع الهباب
وللأسف دي مجرد نموذج لشريحة أصبحت كبيييييييييييييييييييييررة من البنات الوقتي
وأكثر ما كان بيستفزني الحقيقة ولن أنكر انه كان بيزعزع ثقتي في أفكاري ومبادئي
ان الشباب مش مجرد بيتهافت انه يقرب منها... لأ دة الشباب بيتقدمولها للجواز
يعني الست اللي يفترض تصون بيتهم في غيابهم وتحافظ عليه
والست اللي هتكون أم أطفاهم
لو عالجمال مبيدومش
لو عالأنوثة عمرك ما هتكتشف أنوثة الست الحقة غير بعد الجواز
ولو ساذجة تقدر تساعدها علشان تتعلم تسعدك
انما الأخلاق عمرك ما هتعرف تساعد حد يتعلمها
ومع ذلك ربنا كذب زعزعتي في مبادئي لما زوزون اترفضت من شاب رغم اعجابه بيها
وقال بالنص مش هي دي اللي هسيبها في بيتي وانا مطمن
وبأي حال ربنا يهدينا جميعا ويرزق بنات المسلمين بالأزواج الصالحين
ملحوظة (متابعة لعقولكم في صمت فعذراااااا)

18 اللي عبروا منوووشة:

هوبتي يقول...

ههههههههههههههههههههههههههههههههههههههههههههههههه

مش عارفه اقولك ايه بجد
بس حوار زوزون دا بقي الي فارسني بجد

انا كان من فتره في شاب عايز يتقدم ليا والواد دا رفضني وقالها لي باللفظ
ال ايه عشان انا مش بتسهوك في التليفون ولا بحسسه باني انثي وهو مش عايز يتجوز واحد صحبه ......هو عايز يتجوز انثي .

اما نموذج رقم 2 انا معاها قوي قوي مادام هي موافقه وحاسه بالامان والحنيه

اما نموذج رقم 1 فا دول بيصعبوا عليا لان بسبب العنوسه والخطر بتعها هي بتبيع نفسها لاي واحد والسلام ودا الغللللللللللللط

والي اليوم مش قدره اففففففهم ليه مجتمعنا بيبص للعانس انها موصومه او معطوبه
مش قدره افهم بجد ليه بنبص ليها ان هي جربه او خطر لالالالازم نتخلص منها

غير معرف يقول...

العنوان بيحسس الواحد بأن واحد اجرم فى حق واحد فعدالة السماء اخدتلة حقة

بس كل شىء قسمة ونصيب اللى مقسمولوة حاجة بياخدها محدش بيهرب من نصيبة

غير معرف يقول...

العنوان بيحسس الواحد بأن واحد اجرم فى حق واحد فعدالة السماء اخدتلة حقة

بس كل شىء قسمة ونصيب اللى مقسمولوة حاجة بياخدها محدش بيهرب من نصيبة

P A S H A يقول...

لولا أن الكلام يعاد لنفد

علي ابن أبي طلب كرم الله وجه ورضى عنه

:)

تشرفت بالمرور

خالص تحياتي وعميق احترامي وتقديري

(ست* جنى* الحسن) يقول...

سلامو عليكو منوشة..
انت اديتى نماذج بنقابلها فى حياتنا كل يوم فيها الصح وفيها الغلط ودورنا تجاههم هو التشجيع او الانكار. والله المستعان.
ياريت تقبلينى صديقة للمدونة

غير معرف يقول...

السلام عليكم

نماذج بنشوفها ونقابلها فى حياتنا كتير

زى النموذج الاول البنت 35 يعنى نظره الناس ليها انها اصبحت عانس وكل اللى عيزاه انها تلحق تتجوز قبل ما يفوت عمرها ,كان ممكن يكون اختيارها صح او غلط بس كل دا نصيب مكتوب عند الله

الواحد بيتجوز وميعرفش الحياه هيكون شكلها ايه لان كل واحد فينا بيتجمل ويحاول يدارى مسوأه ودا اكبر غلط عشان كدا زيجات كتيره بتفشل فى النهايه

النموذج التانى هى حاسه بالحب والامان وهو بين لها مدى صدقه وحبه فى ابنها ونصيبها الكويس ان الزيجه نجحت لان كل واحد فيهم محتاج شىء من التانى الزوج محتاج ابنها وهالزوجه محتاجاه ليكون سند له فى الحياه

اما زونزون دى بقا فربنا يهديها

لو الشاب بص للأنوثه وترك الصفات الاخلاقيه جانبا يبقه اكيد فى النهايه هيعرف انه اخطاء من الاول واكيد هتكون نهاية الزيجه بالفشل

اهم شىء فى الطرفين الاخلاق والمعامله الحسنه ومراعاة الله فى التعامل

معليش طولت عليكى محستش بنفسى وانا بكتب

مدونه جميله الى الامام دائما

وياريت تزورينى فى المدونه ودوام التواصل

كل الحب والخير

فاتيما يقول...

منوووووووش

ازيك يا حبيبتى

اولا
وحشتينااااا كلنا

ثانيا
عندنا لقاء تدوينى ف اسكندرية يوم 29 و اتصرفى لازم تيجى معانا


ثالثاً
انا روخرا اتخنقت من زوزون دى بس لو حطتى قصتها مع القصتين اللى فوق دول عتلاقى ان النصيب بيحكم على كل شخص بحاجات يمكن متركبش مع اخلاقه او شخصيته او طباعه

بس ربنا بيسبب الأسباب
و يوقع ناس ف طريق ناس
و يكتب سعادة لناس
و تعاسة لناس
و مبيبقاش ليها دعوة قوى
بالمجتمع و العرفو التقاليد


دايما اقول الجملة دى و مقتنعة بيها جدا
خصوصا بعد تجربتى الشخصية و حياتى كلها من اولها لآخرها

هيا حياة واحدة وحيدة
محدش هيعيشها مرتين
يبقى اختار راحتى فين
و اعملها .. ما لم تكن غلط او حرام

و بس

بوسات و حضونات
يا منوشى يا قمر

غير معرف يقول...

حكايات الناس كتير

واهم شيء في الجواز التوافق وانه مايكنش جوازه والسلام

ولازم الراجل والست يدوروا على الاخلاق في شريك الحياه

تحياتي

شبـــاك موارب يقول...

منوش الشقية
عاملة ايه يا جميل؟
انتي تلاقيكي نسيتيني خلاص
بصي النوع اللي زي زوزن للأسف كتيييييييييييييييييير جدا, و في شباب بيفكر في الشكل بس و الاخلاق بتكون بعد كده لللأسف
النوع الاول الصراحة بيصعبوا عليا بحس ان حياتهم عاملة زي الحبل اللي فيه عقدة مش راضية تنفك
اما النوع التاني بيكون في اختلاف كتير في السن و الطباع
عموما في الاخر الجواز فعلا قسمة و نصيب

لجين أبو الدهب يقول...

طبعا الطيبون للطيبات ..

عمر اللى بتدلع وما بتتقى الله ربنا ما هايكون معاها ..

حتى لو اجوزت هايتردلها افعالها ولو بع حين ..

منووووش وحشتينى ومفتقدة بوستاتك جدا ..

يارب تكونى بخير

صحيح هو انتى اسمك منوش على الفيس بوك برده ؟؟

د/على خميس يقول...

السلام عليكم و رحمة الله و بركاته
على رأى المثل :
كل فولة و لها كيال
يعنى أنا بشجع جدا أى أخت تأخر بها الزواج أن تتنازل قليلاو لكن ليس فى الدين بالطبع
و برده يعنى ان زوزون دى هتلاقى اللى يتزوجها بس أكيد هيكون ديوث و يبقى بيتهم كباريه و هياخدوا بإيد بعض على غضب الله
ربنا يهدينا جميعا
بارك الله فيك
تحياتى

الازهرى يقول...

انا جه وماشى تانى بعد ساعتين يعنى لا باتابع فى صمت ولا دياولوا
طبعا دا ميزة مرعبة انى استريحت من الحزب واعضاؤه خاااااااااااالص


نيجى بقى للعدالة
لله سبحانه وتعالى حمة لا ندريها نحن البشر بعقلنا البسيط والله تعالى يعلم من يحرم من ماذا ولأى سبب وربما كان ما يصيب انسانا هو اختبار من الله تعالى له فليصبر وليحتسب
تعلمت تلك الحكمة منذ تعلمت كيف يفقد الإنسان كل شىء وتنهار الدنيا من حله فى لحظات

الإختيار فى الزواج لا بد أن يكون على أسس ولكن تختلف تلك الأسس من انسان لآخر فمن يرفض تلك يتمنى هذه والعكس بالعكس
وهو من رزق الانسان الذى حدده الله تعالى له من قبل ميلاده المهم أن يصبر ويتمك بمادئه لا يحيد عنها مهما حدث

تحياتى دوما

مذكرات زوجة يقول...

البوست حلو بيقول حاجة كويسة

الشباب فعلا عايزين يتجوزوا البنت المايصة اللى بتعرف تاكل عقلهم والعجيب بقى انهم بعد الجواز بيحجبوها ويقعدوها فى البيت ويروحوا يصاحبوا واحدة برضه مايصة
وعجبى

تحياتى لأنك أثرت موضوع هام

غير معرف يقول...

ايميل يجعلك من اصحاب الملايين

بقلم الدكتور محسن الصفار

جلس سعيد أمام جهاز الكمبيوتر اللذي اشتراه حديثا وتعرف للتو على عالم الانترنت الواسع , اخذ يقرا بريده الالكتروني وأخذ يتفحص الرسائل الواحدة تلو الأخرى حتى وصل إلى رسالة باللغة الانجليزية عنوانها (شخصي وسري للغاية) فتح سعيد الرسالة وقرأ نصها فكان مضمونه أن المرسل هو ابن لرئيس أفريقي سابق خلع من السلطة وأن والده أودع مبلغاً وقدره 100 مليون دولار في أحد البنوك وأن الأسرة لا تستطيع استخراج المبلغ إلا عن طريق حساب مصرفي لشخص ثالث ويعرض مرسل الرسالة على سعيد أن يعطيه 40% من المبلغ أي 40 مليون دولار فقط إن كان هو مستعداً لتقبل هذا المبلغ على حسابه الشخصي. لم يعر سعيد أهمية كبيرة للرسالة في باديء الأمر ولكن الفكرة في امتلاك 40 مليون دولار دون أي جهد بدأت تحلو له شيئاً فشيئاً واخذ الطمع يتغلغل في نفسه , أرسل سعيد رسالة رد إلى المرسل وسأله: - هل هنك من مخاطر في هذه العملية؟ جاء الرد بسرعة: - لا لا أبداً ليس هناك من مخاطر أبداً أبداً ولكنك يجب ان تحافظ على السرية الكاملة ضمانا لنجاح العملية . ردّ سعيد على الرسالة: - هل من مصاريف يجب أن أدفعها؟ جاءه الرد: - لا لا أبداً فنحن نتكفل بكل شيء أرجوك يا سيدي ساعدنا وستصبح أنت أيضاً من أصحاب الملايين. من أصحاب الملايين!! كم هي جميلة هذه الكلمة وأخذ سعيد يحلم بأنه يسكن قصراً ويركب أفخم السيارات ويمتلك طائرة خاصة وو...... وفجأة وجد سعيد نفسه وقد أرسل رسالة فيها رقم حسابه المصرفي واسم البنك، وبعد يومين جاءه بريد الكتروني مرفقة به رسالة عليها أختام حكومية تفيد بأن وزارة المالية في ذلك البلد الأفريقي لا تمانع من تحويل المبلغ إلى حساب سعيد.... باقى القصة و المزيد من مقالات الدكتور محسن الصفار الهادفة الخفيفة الظل موجودة بالرابط التالى

www.ouregypt.us

و لا يفوتك الذهاب لمقالات ثقافة الهزيمة وصفحة من الشرق و الغرب بنفس الرابط و فيها الكثير من المقالات الجيدة.

فشكووول يقول...

السلام عليكم مخنوقه
من زمان ما جيتش هنا
تحياتى
اللى قلتى عليهم فى الاول نماذج بتكمل ايامها وخلاص
واللى فى الاخر .. ربنا يهدى الناس ويهدى البنات والشباب .. وكل واحد بيشيل قربه مخرومه بتخر على دماغه
تحياتى

غير معرف يقول...

يا نهار كوكتيل؟!!!!

منوش.... دمتي منوّعة متألقة

^_^

مها ميهوووو

Me7'o يقول...

نموذج رقم 1

هى لحقت آآآآآآآآآخر عربية فى القطر علشان إتأخرت وطبعاً آخر عربية بتكون درجة تالتة ومهملة ومش مكيفة

نموذج رقم 2

هى ركبت قطر ونزلت منه وبعد كده أخدت المترو أنضف وأسرع وفيه محطات تحت الأرض ومحطات على الأرض ومحطات فوق الأرض (على الكوبرى) وآهى ماشية

نموذج رقم 3

هى القطر

فى أوله بيبقى الجرار
فى نصه بيبقى المكيف
وفى أخره بيبقى السبنسة

تحياتى

أبو العريف يقول...

من زمان مجتش هنا

ولا رحت اي حته

ولا حضرت مناقشاتك

ولا اي حاجه من اللي بتخنقك

النماذج اللي اتكلمتي عنها موجوده فعلا وبشده

وكل حي له ظروفه اللي بتجبره احيانا انه يقبل اللي لا يمكن يقبله ف الظروف العاديه

فبالتالي

فلنلقي اللوم علي الظروف حتي لا نموت