الثلاثاء، 10 فبراير 2009

قملة الأفكار والبرغوت عمار اللى نط اتحرق فى النار

وحشتونى جدا جدا, وانا كنت ناوية اكتب خواطر واشعار.. بس قلت لازم احكيلكم الأول على حكاية قملة الافكار.. والبرغوت عمار اللى نط اتحرق فى النار.
ودى طبعا رسالة تانية من رسايل بنات حوا.. بس المرة دى لأدم الرخم اللى بيتأمر وهو قاعد مأنتخ على كرسى العررررررررررررش بتاعة.. والقصة دى بقى عبرة (لمن لا يعتبر من المأنتخين منكم يا صنف الرجال وقاعد يتأمر فى الولايا ليل ونهار).. - قملة الأفكار والبرغوت عمار اللى نط اتحرق فى النار -
كان ياما كان.. يا سعد يا اكرام.. ولا يحلى الكلام.. الا بذكر النبى "عليه الصلاة والسلام"

فى يوم من الايام.. فى سالف العصر والاوان.. كان فيه قملة اسمها قملة الافكار.. وبرغوت اسمة البرغوت عمار.. كان بينهم قصة حب مشعللة واتجوزوا.. وفي يوم من ذات الايام البرغوت الهمام عمار.. قال لحبيبة قلبة قملة الافكار.. ما تيللا بقى اعملى الاكل وحطيه على النار.. انا جعان ومش قادر على الانتظار.. وطبيخك بيقعد يتطبخ ليالي طوال.. ومبيطلعش جميل.. وغيرك على كفوف الراحة يتمنانى يشيل.. والصبايا منتظرينى فى طابور طويل.. وظل على هذا الموال الطويل.. فوضعت قملة الافكار صينية البطاطس على النار قبل ان يفيض بها الكيل.. وخرجت تشترى باقى الخضار.. وقالت للبرغوت المنكوت "ابقى خللى بالك من اللى على النار" فلم يقدر البرغوت الفلحوص على الانتظار.. وكعادة صنف البراغيت.. بمصهم للدماء المقيت.. عندما يدخلون الى المطبخ ويخلوها بزرميط.. دخل الى المطبخ عمار الغتيت.. فلم يستطع التفريق بين الخيار أوالبسكويت.. وبعد كثير من العناء.. فى البحث عن البطاطس بين الجزر والبازلاء.. وجد عمار صينية البطاطس.. وبكثير من الطفاسة راح فيها غاطس..

فتصاعد الكثير من البخار اثر احتراق البرغوت عمار.. بعدما نط واتحرق فى النار.. وكان هذا عندما عادت من الخارج قملة الأفكار.. وفى كلتا يديها شنط الخضار.. وقليل من اللحمة من عند الجزار.. وقالت اين انت يا زوجى المغوار.. فاننى اشم رائحة الحريق.. منذ ان كنت على اول الطريق.. ولم تجد قملة الافكار.. اى اثر لزوجها البرغوت عمار.. وذهبت لتقلب الطعام على النار.. فوجدت ما يلفت الانظار.. حيث ان زوجها العزيز البرغوت عمار.. يتلوى من الآلام الحارقة للنار.. فأزاحت كل ما كان فى الطريق.. لتطفىء الحريق.. وتنقذ زوجها قبل ان يصبح من الماء بعد النار غريق.. وبعدما افاق.. وحاول ان يخفى وقعتة السودة بالخناق.. لم يجد عن الشكر بديل.. بعدما اصبح ذليل.. أمام شجاعة زوجته الباسلة.. فى انقاذ أحواله المائلة.
وبس كدة خلصت حكاية قملة الافكار والبرغوت عمار اللى نط اتحرق فى النار.. ونطلع منها برسالة بسيطة.. لأصدقائى الرجالة اللى دايما عاملين زيطة.. ياريت تبطلوا تأمير وامشوا جنب الحيطة.. لحسن تقعوا فى زوجة عبيطة.. وتحاولوا التخلص منها بمحاولات مستميتة.. فمينوبكوش الا الغرامة.. وتفيقوا فى ندامة.. بعد تصرفاتكوا الهدامة.

اصحى يابنى انت وهو بقى وبطلو تأمير فى خلق الله لحسن يطلع على عنيكوا من الاخر واللى مش عاجباه مراته او خطيبتة يهز (طولة) كدة شوية ويساعدها علشان ميقلبهاش حريقة ودمار زى الواد البرغوت عمار وفى الاخر ياخد على دماغة. اه وحاجة كمان ياريت تتعلم منك له شوية فى المطبخ علشان على الاقل تأكلوا نفسكوا فى غياب بنات حوا.. مش كل ما المودام أو الماما تخرج أو تسافر ترجع تلاقى الشقة بزرميط.. وانت قاعد عامللى فيها عم العبيط.

وبلهجة اخرى...
حسس زوجتك او اهل بيتك انك بتحرص على عدم تعبهم وبينلهم دايما تقديرك للمجهود الجبار اللى هم بيعملوة وياريت لو تساعدهم شوف ساعتها هتكبر فى نظرهم قد ايه, وكمان كونك راجل بيعرف يطبخ دى حاجة عمرها ما كانت عيبة وصدقنى هتنقذك فى مواقف كتير.. بس كدة خلصت الرسالة.

30 اللي عبروا منوووشة:

إيمان يقول...

ههههههههههههه
عثل وسكر عثل يا منوش ... مش علشان دمك خفيف بس
لأ أبسلوتلى ده عشان كمان ... بتفوقى النايم والنعسان .. واللى عملى فيها عم الزهقان ... وعمال يتأمر على صنف النسوان ... الصنف الرقيق الغلبان...اللى نص حياته مقضيها فى تقشير البدجان ...
يارب الرجاله يحسوا على دمهم ..يارب يارب يارب

Ahmed يقول...

مخنوقه
بوست جااااااااامد جدا

بس بصراحه في حاجه مهمه لازم تعرفيها
احنا لما بنخش المطبخ دايما بنخشه واحنا لوحدنا عشان محدش يشوف مصايبنا جواه
أصل المطبخ بالنسبه لينا عالم مبهم وفيه تحدي وفي نفس الوقت بننتقده دايما وننتقد كل اللي يطلع منه

عشان كده بنحاول نخترق المجهول بس دايما ودائما وأبدا النتيجه أن عم برغوت بتحرق في النار
هههههههههههه

سلااااااااام

hasona يقول...

السلام عليكم

حلوة حلوة حلوة
بس مش كل الرجال عمار وليس كل النساء أفكار

فيه ده وفيه ده

وبعدين فيه رجالة بيطبخوا أفضل وأحسن من الستات

ويمكن يدخل يساعدها في المطبخ ( واسئلي الشيف اسامة)

ويلاقيها ( ماسكة كتاب أبلة نظيرة -صفحة الوفيات ) علي رأي سمير غانم

ايه يا لينا الفرخة تحطيها في الحلة وعليها شوية ماية تبقي شوربة
،،،،
فيه نوعية من الرجال فعلا مش بتحاول تستمتع بما في يديها - وبيختلق المشاكل وكل حاجة يعيب عليها
ويزهق نفسه ويزهق زوجته حبيبته - ولما تروح مشوار يعرف أن الله حق - ويقضيها دلفيري وخلاص

الحياة مليئة بكل الاشكال والالوان

تحياتي

غير معرف يقول...

البوست معدى بجد
فشطة عليكى عشان ينبطوا شوية
و الله يا أخوتشى وجودهم فى البين ماله أى لزمة دول بينزلوا من هنا البيت يبقى فى هدوء و مرتب و حاجة كدة راحة بال إنما اللى بيحصل ده أوفر كتييييييييييير

Sweet Violet يقول...

حلوة قوى القصه دى

لا و الكتابه و الاسلوب و لا الف ليله و ليله

المفروض بقى انتى شهرزاد مش مخنوقه خااااااااااااالص

ربنا يهدى الرجاله اللى من نوع عمار ده

تحياتى ليك ياقمر (:

شبـــاك موارب يقول...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههه
يخرب بيت عقلك انت طلعتي تحفة
و الله ضحكتيني
علي فكرة بالرغم إن القصة تفطس الواحد من الضحك
بس و الله معبره و فيها نصايح يا ريت الرجالة يتعلموا

لما اشوفك يا منوش لما تتجوزي هتعملي ايه مع جوزك؟

شكلك كده هتخنقيه اكتر
ههههههههههههه
بس يبقي اكتبي ساعتها عملتي ايه
و الله اعلم يمكن تنسينا و تنسي انك عملتي مدونة

ذو الوجه المبتسم يقول...

هههههههههههههههههههههه
ههههههههههههههههه
مرحبا مخنوقة با اللى مش مخنوقة
ههههههههههه
اعمل ايه
ماهو انتى السبب فى الضحك
اسلوبك لذيذ وجميل
واكيد اكلك الذ واجمل
هنيجى نتغدى عندك امتى
اعملى حسابك فى اللحم يكون كتير
وكمان مكرونة بشملة .. هى مش اسمها كده
هههههههههههههههههه
تقبلى مرورى

romansy يقول...

ايه القصص اللى احنا كان نفسنا نسمعها من زمان دى
بس بقى قصصك بالطريقه الحديثه

yoyo يقول...

هههههههههههههههههههههههه
هههههههههههههههههههههههه
زى السكر والله
اسلوب جميل جدا

بس يارب الرجالة تاخد بالها والا هتلاقى مصير عمار اللى اتحرق فى النار
هههههههههههههههههه
تقبلى مرورى فى اولى زيارتى لك
تحياتى
يويو

ادم المصرى يقول...

قصه جميله

يا بتاعت القصص الجمده انتى

بس ياريت بلله عليكى انا بطلب طلب صغير

التغيير مطلوب

تامر علي يقول...

أنا أعرف واحد كان بيساعد مراته وفضل يكبر في عينها لحد ما وصل للسقف :)

أسلوب سرد شيق ورائع ...تحياتي

بنوتة يقول...

السلام عليكم
أنا الحمدلله مش حاسة أوى بالموضوع ده عشان كلنا بناااااااات
مفيش غير بابا في البيت مسكين أحيانا بيصعب عليا
ربنا يعينه والله أصله طيب أوى اوى
المهم متشليش في نفسك اوى كده
انا عايزة اقولك بجد عدم دخولهم رحمة
ايللي بيعرف ماشي يدخل وهو من نفسه بيدخل
لكن ايللي ميعرفش تبقى كارثة لو دخل المطبخ وكمان بيبقى صعب يتعلم وهو كبير
أولا هيتفزلك ويعمل فيها خبير وهيعدل على ايللي واقفين وهو مش فاهم حاجة او هيصرف نفسه بس لازم هيسب بصمة وما أدراكى
المهم
بوست لذيذ جدا
تحياتى ليكى

Unknown يقول...

وادى جزاء
اللى مايسمعش كلمة
(ماما قمووووووولة)
تقولها!اى! اى! اى !
هههههههههههههههه

عاشقه الرومانسيه يقول...

عجبنى البوست قوى
واسلوب السجع اللى فيه روعه
بس ليه الاسامى التيييت دى
قمله وبرغوت
يااااااااشيخه حرام عليكى
هههههههههه
بس بجد تحفه
الله ينور
ياريت بقى الرجاله تفهم

تحياتى

Unknown يقول...

بجد انتي عسل و معاكي حق جدا جدا لازم الراجل يساعد مراته و ميبقاش بيدي اوامر و طلبات و بس
مش عاجبه يتكتم و مايطلبش اي حااااجه

رجالة اخر زمن

*قـــمــــر* يقول...

جميييييييييييله القصه جدا
ودمك شربات
أنا قريت البوستات اللي فاتت وبجد انتي زي العسل
كنت هموت من الضحك استمتعت جدا بطريقة كتباتك اللي مش متكلفه
ابقي شرفيني في مدونتي اللي لسا بيبي
لكي مني كل الود

ستيتة يقول...

يالهوي
امتى نزل هاذوة البوست من ورايا؟
ده تسريب لنتايج التمتحانات؟ وها ابلغ فيكم الكنترول

تجنن حدوتة القملة والبرغوت
احسن يستاهل يتلسع علشان يعرف قيمة القملة اللي طفحانه الكوتة بره وجوا

شوفي تعليقي عند ايمان على بوست امبارح وانتي تشوفي مساعدة سبع الرجال ودت السقف فين؟
بس ولو طول عمره لازم من وقت للتاني يدلعني ويعملي غدوة او عشوة وانا مطحونة ومش شايفة قدامي

بس الآثار التدميرية للمعركة المطبخية بتكون جسيمة

وعلى رأي الشاعر
لو مكنتش انت تدلعني مين ها يدلعني؟ ياسلام شعر هتاف صحيح

سوري ع التأخير بس هاو كاو فاو مشفتش البوست؟

MaNoOoSh يقول...

انا اول مرة اتاخر فى الرد على التعليقات كدة بس اعمل ايه الكمبيوتر شكلة كدة بيطلع فى الروح وكارهنى مش عارفة ليه
اهىء اهىء اهىء


إيمان
انتى اللى عثل والله
واحنا ستات غلبانين.. ومع الرجال مساكين.. ونشرح القلب الحزين.. وبسطاء وطيبين.. ومع الغدارين.. يكون كيدنا عظيم.
هههههههههههه
استنينى كمان فى بقية مواضيع بنات حواء


Eng. Ahmed Abo El-Ella
كويس انك اعترفت بالحقيقة المرة
بس والله شكلكوا كدة يا رجالة عقلكوا اجرامى عتيق متعمق وبتعملوا زى البرغوت عمار علشان مفيش اى افكار تفكر تطلب منكم مساعدة



hasona
نورتنى
وفعلا فى ستات مليانة بلاوى ما يعلم بيها الا ربنا
صبرك بس عليا لما اخلص من الرجالة الاول وانا امسك الستات افضح البلاوى اللى فيهم
بس يارب صديقاتشى فى جمعية المرأة المتوحشة ميشموا خبر




انا ودماغي
اه والله يا اوختشى الواد اخويا بينزل من هنا والبيت يبقى نسمة واخر روقان
صحيح رجالة زى القطط تاكل وتنكر وتتأمر وبس
اصبرى عليا والله لاطلعلك القطط الفطسانة فيهم
هههههههههههههه




ضد التيار
نورتينى يا ضد يا ضد
بس بلاش حكاية شهرزاد.. لحسن الراجل ابو سيف يلف البلاد.. ويأتى الى بالعتاد.. ويطلب رأسى للجلاد.
يارب متكونش اخر زيارة




مش عارفة الدنيا وخداني علي فين
بس انتى ادعيلى اتجوز الاول يا اوختشى
وانا اقدر اخنقة بردو.. دة انا عثل (وش بيضحك ضحكة شريرة)
هههههههههههههههه
ازاى بس انسى مدونتى حبيبتى؟.. دة لاممكن ابدا ابدا
بس اتجوووووووووووووووز الاول بقى



ذو الوجه المبتسم
نورتنى يابو وش بيضحك ويارب متكونش اخر زيارة
وبعدين انتوا تشرفونى للغدا فى اى وقت وهعملكم اللحم من عنيا بس البرغوت عمار هو اللى هيعمل المكرونة بالبشمل
ها هترضوا تاكلو من ايدة وللا تجيبوا الغدا معاكم اسهل؟
هههههههههههههههه




romansy
انا مبسوطة ان القصة عجبتك
وان شاء الله القصص الجاية تعجبك كمان



yoyo
نورتينى فى اول زيارة يا عثل ويارب متكونش الاخيرة
والرجالة لو مسمعوش الكلام واتعظوا فعلا هيبقى مصيرهم النار.. او السواطير.. او دراعهم يتاكل
ههههههههههههههههه
اصل الستات بتحب التنويع علشان بتزهق بسرعة
ههههههههههههه



ادم المصرى
كويس ان القصة عجبتك
بس انا مفهمتش طلبك.. هو انت تقصد التغيير من ناحية ايه؟



تامر علي
نورتنى
طيب دة صاحبك دة يحمد ربنا انه وصل للسقف لانة كدة عمرة ما هينط ويتحرق فى النار.. دة بس يدوس على البوتجاز يبططة
هههههههههههههههههه



بنوتة
نورتينى يا ثكر
بس تقولى ايه بقى فى اللى ميعرفش يعمل حاجة ولما يدخل المطبخ يقلبها صفحة وفيات ومع ذلك يقعد يتأمر على اخواتة البنات العثاثيل اللى زينا
ههههههههههههههه




norahaty
ايوة يستاهل البرغوت المنكوت دة
ههههههههههههههه
نورتينى يا عثل



عاشقه الرومانسيه
ايوة لازم يبقى برغوت.. علشان من طمعة ينط وفى النار يموت.. وهى لازم تبقى قملة.. وتعلن عليه الحرب شاملة.
هههههههههههههههههه



EmY
نورتينى ويارب تزورينى على طول
عندك حق هم لازم يسمعوا الكلام.. هم هيعرفوا يعنى احسن مننا ولا اييييييييييييييه
هههههههههههههه



*قـــمــــر*
نورتينى
تسلمى يا عثل على ذوقك
واكيد هروح حالا ازور مدونتك النونو

فتــافيت (رحاب الخضري) يقول...

والله انك عثثثثثثثثل

حلوة اوي القصة يا على العبر والموعظة انغظ يا برعوت افني بدل ما تبقى زي عمار اللي نط زي الحمار واتحرق بالنار من كتر تطيطه على الست ام الافكار

هانط هنا كتير بس مش زي عمار اوكيشن

اتمنى نتواصل يا جميلة انا لاقيت اسم القصة عند ستيتة قولت لايونكن ابدتشن ماقراهاش

سلااااااااموز

غير معرف يقول...

ربنا يخليكي علي سؤاللك يارب
كنت تعبانة بس الحمد لله متشكرة بجد
ويارب تكون الاغنية عجبتك

حسام غانم يقول...

جااااااااااامدة جدا

انتي اللي كاتباها ؟

MaNoOoSh يقول...

ستيته حسب الله الحمش
انتى بتنورينى فى اى وقت يا ستوتة يا عثل
قريت تعليقك فى مدونة ايمان وقلت الحمد لله انها موصلتش عندنا للسقف لحسن كانت هتقلب دندرة وحيزبون.. واخلى اخويا المصون.. يا ينضف السقف يا يغسل الصحون
ههههههههههههه




فتافيت
نورتينى يا عثل ويارب تنطيلى فى المدونة على طول
وياريت الرجالة صحيح يتعظوا




حروف
ربنا يديكى الصحة وترجعى للتعليق وتكتبى موضوعات اجمد من الاول كمان


حسام غانم
نورتنى
والله انا اللى كاتباها يا بيه
بس الحق يقال كان فى قصة اطفال سمعتها زمااااااااااااان وانا صغيرة بنفس الاسم بس مختلفة خالص اللى هى بتنتهى بـ.. البيضة عند الفرخة والفرخة عايزة قمحة.. وكدة يعنى.

غير معرف يقول...

اصعب شيء دخو ل المطبخ

هاتى هاتى و لا حياه لمن تنادى

صبرني يارب يقول...

مانوش

عايزاكي تقري تاني جزء فى قلب ايمان بيتكلم عن نفس الموضوع تقريبا


وبعيد عنك يا اختي دخولهم المطبخ الله لا يوريكى اولا هايقعد خمس ساعات يشتغل شغل ممكن تخلصيه انتى فى نص ساعه

ويخرج من المطبخ وهو محتاج منك شغل لمدة خمس ساعات عشان يرجع مطبخ تاني بعد ما بقى زي مطبخ الهبل

تحياااتي ليكى
ونورتينى بالزياره

Heba Sayed يقول...

مدونة جميلة اوى واسلوبك رائع

بس واخدة على خاطرى منك

حد يسمى نفسه مخنوقة

انتى شكلك عسولة خالص

دمتى بخير

MaNoOoSh يقول...

biberss222
اممممممممممممممم
يعنى انتوا عاملين نفسكوا فيها عباقرة فى كل حاجة فى الدنيا يا رجالة وبتقفوا فى المطبخ تحتاسوا؟
بس بردو مش هيأس انا وراكو والزمن طويييييييييييييل.
نورتنى يا استاذ بيبرس


صبرني يارب
يالهوتي.. خمس ساعات؟.. خمس ساعات فى عينة هو هيخترع الذرة وللا ايه..
وبعدين اوعاك يفتكر يعنى انه هيطلع منها كدة زى الشعرة من العجين لاااااااااااا دة لازم يصلح معايا ما افسده فى المطبخ.. احنا بنلعب وللا اييييييييييه
انتى اللى نورتينى يا عثل



Heba Sayed
نورتينى يا ثكر والله انتى اللى عثولة
هو انا اسمى منوووش بس اسم المدونة مخنوقة.. يمكن علشان مبعرفش اطلع اللى جوايا من حاجة غير لما مخنوقة لاقصى درجة حتى الاحاسيس الحلوة مبتخرجش غير لما تتخنق جوايا
هههههههههههههههه
فقرية بقى ولمضة هنعمل ايه.

نـــــور يقول...

اشطه وكله تمام وحلو الكلام
بس اللى مش عجبنى ان البرغوت وقع فى صنيه البطاطس لانها خساره والمصحف انما البرغوت يروح فى داهيه مش مشكله :)

MaNoOoSh يقول...

*البت المشمشية *حلوة بس شقية *
انا دخلت على الرابط عندى لقيتة تمام يا عثل
بس يا ترى عجبك موضوع قملة الافكار وللا ايييييييييه؟


Habiba
والله يا اوختشى انا كمان صينية البطاطس طالعة من عينى.. يللا ربنا يسامحة البرغوت الغتيت المنكوت دة
ههههههههههههه

Soooo يقول...

اولا .. الجوازه دي ماتنفعش
برغوت قد الدنيا وزي القمر - زي حالاتي في موضوع مجرد تشبيه - يتجوز حتة قلمة ؟؟؟

ثانيا .. انتي حاطه صينية فراخ بالبطاطس .. والبراغيت اللي زي حالاتي بيعشقو الفراخ .. يبقى الغلط على مراته القملة هانم انها نزلت وسابته مع الفرخه .. والشيطان شاطر

وبعدين مالهم الرجاله .. دي حلاوة الراجل وهو بيزعق ويخط وينطر كده
اه طبعا
راجل يعمل بقى يعمل اللي يعملو

وعلى رأي المثل .. من بره وجوا فرشتلك .. وايش تعمل الماشطه من الوش العكر
!!!!!!

ايه اللي دخل المثل في الحوار ده اصلا ؟؟
وهو في مثل كده اساسا؟؟؟؟؟





سلاموووووووووووووز

أبو العريف يقول...

مخنوقه
تقصدي مين بالبرغوت عمار
ماشي يا ستي
انا لولا متأنكد ان البوست دا قبل ما اغمل البطاطس
كنت قولت انك متقصداني
بس موما ادينا بنتعلم
من غير مساعدة الماما ولا المودااام