الاثنين، 20 يوليو 2009

كيف تصنع من ابنك انسان منحرف وأنت على يقين انك عارف مصلحته وفاهم عنه

الموضوع دة نازل النهاردة علشان خاطر الأزهري (بس بردو أموت وأعرف مين اللي زئني)
بصوا بقى
من الاخر انا جاية اتخانق مع الامهات والابهات
(علشان انا مفقوعة منهم ومن عمايلهم.. بس ما علينا)
(وكالعادة الموضوع طويل وطبعا ليه تكملة فى البوست الجاي)
وممكن نعتبر ان المجتمع دة زي الام والأب.. دايما فاكرين ان كلامهم هو الصح ودايما فاكرين انهم عارفين مصلحة ولادهم
طب انا بقى هوريكوا ازاي الاهل بيطلعوا نشأ منحرف وجيل بايظ.. والغريبة انهم بيجوا يشتكوا فى الاخر
الأم والأب هم اللي بيصنعوا بني ادم وبيشكلوا وجدانه وبيكونوا اساس شخصيته.. هم المتحكمين فيه ماديا وبالتالى متحكمين فى رغباته ووقت فراغه وهواياته.. يعني من الاخر الام والاب هم الاساس فى ان ولادهم يطلعوا منحرفين وفيهم صفات وحشة او ناس محترمة وصفاتهم حميدة.
مش لازم ابدا الاهل يكونوا على حق ومش بالضرورة يكونوا ادرى بمصلحة ولادهم لمجرد انهم اكبر منهم بزعم انهم اكثر خبره او متحكمين فيهم ماديا بمقولة لما تبقى تصرف على نفسك ابقى اعمل اللى انت عاوزه.
1
(دول حرامية يا حبيبتي)
أب أو أم لظيظة وديموكراتية.. بس بتعز الفلوس زي عنيها.. الفلوس هي زادها وزوادها وأمانها وحضنها الدافي.. مش شايفة ان الفلوس تتصرف على ولادها غير في تعليم أو في سبيل الوصول لشغل.. انما الهدوم والاهتمام بالنفس اشباع بعض رغبات النفس المشروعة لأ.. دي بتعتبرهم كمان رفاهية.
عايزة ولادها يشتغلوا زي التيران في الساقية.. وميصرفوش كمان مليم على نفسهم.. لأ يدوها الفلوس في ايديها.. مش مهم ان كانوا شباب عايزين يتجوزوا ولا بنات كادوا ينسوا انوثتهم من كتر ما الام بتعتبرها رفاهية وقلة أدب.. ومش مهم ان كان ربنا مشرع للبنت أنها تكون مسئولية أهلها.. ومش مطلوب منها أساسا تتمرمط في الشغل ولا تتبهدل مع اللي يسوا واللي ميسواش وتضيع رقتها وخجلها وسط صراعات الدنيا (انا مش ضد الشغل.. لكن ضد اني أكون مجبرة اني اشتغل وانا مش عايزة علشان اجيب فلوس وخلاص.. او لان خسارة قعدتي فى البيت).
يا حجة عايشة فى دنيا تانية انتي؟؟.. مش علشان ظروفك كانت بتجبرك تشتغلي وتدي الفلوس لأهلك يبقى ولادك لازم هم كمان يعملوا كدة.
مش علشان الفلوس هي أمانك يبقى الاخرين لازم يعتبروكي حصالة متحركة.. مش علشان انتي شايفة ان كل حاجة في الدنيا رفاهية واللي بيعملوها حرامية يبقى انتي على صح.. لا يا حجة.. احب أبشرك انك بترتكبي ذنب كبير قوي.. لانك بمنتهي السهولة ممكن تدفي ولادك للانحراف.. ممكن من ضيق يدك تحوليهم لمسرفين او تطلعيهم زيك.
2
(انا عندي شغل)
الزوج اللي بيبقى اب ويتعود على طحنة الدنيا ليه ويشيل المسئوليات دايما.. بيتحول الشغل فى حياتة لمرتبة مقدسة.. بدل ما يكون مصدر رزق وأكل عيش.. حياته بتتحول لنغمة واحدة.. وانا بعمل علشان مين.. وانا سايبكم ومشغول علشان مين.. وواحدة فى واحدة بتتحول النغمة لشخط ونطر وكل ما حد يكلمه.. أنا مش فاضي انا ورايا شغل.. ده مش بيت.. دي مش عيشة.
فعلا عندك حق
لما الأب يتشغل بعملة بس وينسى يربي.. لا هيبقى دة بيت ولا هتبقى دي عيشة.. وسلملي على الاستاذ نفيسااااااااااااااااااا (والله معرفه نفيسا دة بس هو يمكن اخو الاستاذ خليفاااا).
3
(مهما عملت بردو قليل الأدب علشان انت مراهق وقاصر وأنا اللي بصرف عليك)
أب بيشتغل وأم متفرغة للبيت.. بتطبخ وتربي على قد ما تقدر.. ولادهم فى مراحل المراهقة.
لما الابن ينزل يلعب كورة وهدومة تتوسخ يبقى صايع وقليل الأدب وكمان موش نضيف.. لما يقعد في البيت ويفتح النت قدامهم يبقى بردو صايع ومعندوش دم.. لما يطلب يشترك في نادي رياضي (انشالله حتى مركز شباب جحر النملة) يبقى هيتعطل عن المذاكرة (مهما كان متفوق فى الدراسة).
طب وحياة طنط طاظا ابقوا خللوا المذاكرة تنفعكم وانتوا بتدفعوه دفع للانحراف.. لما يكون الشاب دة عنده طاقة مهولة.. فى عقله وجسمه.. ازاي متساعدوهوش يخرج الطاقة دي فى الرياضة.. ومن امتى كان لعب الرياضة بيعطل عن المذاكرة.. طب لما يلعب كورة وحيله يتهد فيها واهو بيخرج شوية طاقة.. فيها ايه يعني لما هدومة تتنيل تتوسخ.. هو انتى يعني كنتي بتغسليها على ايدك.. ما ربنا يخليلك الغسالة التوماتيكي.
ياناس اتقوا الله في ولادكم وخللوا في حياتهم منفذ للطاقة مش كل حاجة المذاكرة.. انتوا ليه مش مصدقين انهم لو لعبوا رياضة مع شوية اشراف منكم على أوقات المذاكرة هيكونوا ناس محترمة ومتفوقة وناجحة.
ربنا يهديكم يا عالم لحسن انتوا رفعتولى ضغطى والله.
4
(كوتوموتو يا حلوة يا بطة)
يعني "البكري" اللي مامته بتحطه كده فى مكانة اميتابتشان فى قلوب ستات زمان أو مهند وتامر حوستي في قلوب البنات الوقتي.. لو مكلش تنكد على البيت كله وتعمل أراجوز علشان ياكل.. ومش مهم بقى جوزها اللي جاي من الشغل عايز ياكل لقمة ويريح أو يقعد قعده حلوة مع اسرته.. وايه يعني مش مهم.
لو عمل نفسه زعلان علشان يبتزها بينجح طبعا وبياخد كل اللى هو عايزه وبيعمل كل اللى هو عايزه سواء كان صح او غلط.. مش مهم انها كدة بتمرعة وتنفخه.. ومش مهم لو ليها عيال تانيين مزبولين ومقهورين ومفيش عدل فى المعاملة مع انهم ممكن يبقوا برقبته.
طيب خليكي كدة.. وشوفي المر اللي هتشربيه لما سي كوتوموتو ده يكبر شوية ويبقى دظنانور مش بطة.. وهتكوني انتي أول واحدة يشوطها ويعاملها اسوأ معاملة.
5
(اشمعني انا يا ربي بتعمل فيا كده!!!)
ام بقي يا حلاوتها.. مش فاضية لعيالها اساسا خالص.. مقضية نص اليوم في التليفونات واشي شتايم على كدب على كلام ابيح على وصلة ردح.. ونص اليوم التاني في أي حاجة.. بتأكل ولادها احسن اكل وتلبسهم أحسن لبس.. بس بتعلمهم مع كدة الكذب والشتايم واللؤم وكل الخصال السيئة.. بتسيبهم لخدامة الله اعلم بتعلمهم ايه وللا بتعمل فيهم ايه.. وترجع تعيط وتقول ولادي مش ناقصهم حاجة.. ليه يا ربي بتعمل فيا كدة.
للأسف عمرك ما هتشوفي ليه بيحصلك كدة.. غير لو الدنيا ادتك قلم معتبر فى حد من ولادك علشان تفوقي.. وربنا ما يحكم على حد بالقلم ده.
6
(يا فاشل يا فاشل!!!)
اب بقى مش هنقول فيه عيوب كتيره.. لكن اسلوبة فى دفع ولاده انهم يعملوا حاجة كويسه بانه يحملهم ذنوب الكون.. هم السبب في كل البلاوي.. هم سبب خراب الكون.. كل زمايلهم واللى قدهم ناجحين وحلوين وطعمين.. و هم الفشلة اللي في الدنيا.. وفاكر انه كده بيشجعهم ويحفزهم علشان يتقدموا فى حياتهم.. بينما هو فى الحقيقة بيرسخ جواهم فكرة انهم فشلة وان حتى اقرب الناس ليهم مقتنعين بكده.
بلاااااااااااااااااااش.. لو ليك ابن او بنت بلااااااااش تستخدم معاهم الطريقة دي.. شجعهم وحمسهم لما يعملوا حاجة كويسة.. ونبههم لما يغلطوا وقولهم بمنتهى الهدوء انهم المرة الجاية يتحاشوا الغلط.. ولو كرروا الغلط امنع عنهم حاجة بيحبوها (ماعدا حضنك وحنانك) علشان يتعلموا هتخسر ايه يعني لو عملت كده.. صدقني ولا حاجة.
كفاية كدة النهاردة.. والبوست الجاي هيبقى عن تفاصيل صغيرة فى حياة الامهات والأبهات عن كيفية صنع ابن أو بنت منحرفين.. كدابين.. منافقين.. جبناء.. منعدمي الثقة فى نفسهم.. حاقدين.. كارهي الخير للآخرين..متأنزحين.. مايصين.. وبردو الاهل فاكرين انهم يعرفوا احسن من ولادهم وعارفين مصلحتهم اكتر منهم.
وسبحان الله في خلقه

69 اللي عبروا منوووشة:

بنجاواتى يقول...

ايه ده هو انا أول تعليق؟؟؟؟

الظاهر كده...أفهم من كده ان مصر كلها نايمة ومفيش حد صاحى دلوقت غيرى؟؟؟

هتكلم براحتى شوية

الحاجة اللى عايز اقولها هى ان التفاضل بين الاشخاص له اسباب كتيرة لكن أحيانا الآباء بيختذلوا الأسباب دى فى مجرد السن والخبرة ومن هذا المنطلق يعتبروا ان ولادهم مابيفهموش حاجة ولا عارفين حاجة وانهم هما ما شاء الله اهل العلم والخبرة فى حين ان فى اسباب تانية أولى زى العلم والأخلاق -اللى هى الصورة العملية للعلم- بتكون اهم من السن والخبرة والعلم ده مالهوش سن معين ولا حكر على حد معين دون الآخر

عايز برضه اتكلم عن الآباء اللى انشغلوا عن ولادهم وعن تربيتهم وأقول ان كفى بالمرء إثما أن يضيع من يعول وكمان اقول ان من كانت الدنيا همه فرق الله عليه شمله ومن كانت الاخرة همه جمع الله عليه شمله بما فى ذلك الأبناء أما من اعتقد ان الفلوس والشغل هما اسباب رضا الولاد عنه فهذا مخطئ لان رضا الأولاد هيتحقق بعد ما الاب يرضى ربنا وعمره ما يتحقق مادام ما قدممش لله ما يرضيه

واخيرا علشان ما اطولش عايز اقول ان اى حاجة بيعملها الآباء مع أولادهم بتفضل فى ذاكرتهم وعلى اساسها بتكون معاملتهم لهم فيما بعد والابن اللى مستنى اليوم اللى يخلع فيه من البيت ومن ظلمه أكيد مفيش فى قلبه قدر كبير من الذكريات الطيبة عن والديه

وصباح الخير عليكى

Unknown يقول...

افضل شىء انك تعملى الموضوع على كذا مرة
لأنى ماليش خلق اوووى للمواضيع الطويلة
انا حعلق على جزء جزء
1
ماليش فيه لأنى لسة مشتغلتش
2
بيحصل كثير فى معظم العائلات
3
برده عشان بيبقى التركيز كبير اوووى على ان اهم شىء للواد المذاكرة
4
انا اخر العنقود و ليا اخ واحد اكبر منى و بس
يعنى اتنين و بس
بس مفيش دلع زيادة خالص
5
الحمد لله والدتى مش من النوع ده
النوع ده نوع سىء للغاية
بس الغريب بقى كمان اختفاء نموذج المربية الكلاسيكية
او الدادة زمان كانت الدادة ديه شىء جميل اووووى
بتربى بجد
ليه اختفت
؟!!!
6
بيتقالى كثير
بس انا بقوله لنفسى اكثر
-----
حاجة نفسى تناقشيها
هو ايه اللى فى تربية الأب و الأم لإبنهم
تخليه انطوائى او خجوووول اوووووى
و مش بيحب الإجتماعيات اووى
و غبى اجتماعياً شوية
بعيييييد عنك انا كدة شويتين
:-(
---
حاجة كمان ياريت تناقشى ظاهرة القلق الشديد لما حد يخرج يتفسح
اصل الموقف لسة حاصل معايا من اسبوعين
خرجت لبعد الساعة 2 الصبح
اتفسح
لقيت تليفونات ايه على الموبايل
انت فين و قبضوا عليك
و حتبات فى القسم
ههههههههههههه
:-)

SHAPE YOUR LIFE (ABOALI) يقول...

كيف تصنع اسرة
كيف تصنع اب
كيف تصنع ام
كيف تصنع مجتمع
كيف تصنع قائد
كيف تصنع رجل
كيف تصنع حواء


وكيف وكيف


اسعدنى جدا ان اقرء بوستك
ففيها الكثير من الفوائد
واتمنى ان تكونى عكس كل من ذكرتيهم
حين يهبك الله الزوج الصالح


ولالالالالالالالالالالالالالا ايه

Arsenal Way يقول...

اتفق معاكي في معظم كلامك
الاب والام هما المحرك الاساسي لشخصية الابناء
لكن ربما يكون تأثير الام اكبر لان الابن بيرتبط عاطفيا بالام اكثر من الاب خصوصا اذا كان الاب في الشغل ديما
تقبلي مروري

♥نبع الغرام♥♪≈ يقول...

احجز


مقعد
وارجع تانى

حد عنده مانع

♥نبع الغرام♥♪≈ يقول...

وكمان تعليق للصحبه الجامده االى هتيجى بعدى

طبعآ دى مدونة اختى وحبيبتى منوش المختوقه

ولاذم افك خنقتها يارب قدرنى واقدر افك

هع هع هع

♥نبع الغرام♥♪≈ يقول...

كنت قد اطلعت على أحد البرامج التلفزيونية والذي بث على قناة ART الفضائية والبرنامج بطبيعة الحال يتحدث عن أهمية حماية الأبناء من الانترنت ويتناول جوانب كيفية الحماية والتي لا تتوفر عن طريق منع الانترنت تماما وانما بوضع الضوابط مثل عدم وضع أجهزة الحاسب أو أي أجهزة للدخول على الانترنت داخل الغرفة وانما وضعها في أماكن تجمع العائلة.
وكنت أتساءل عن مدى جدوى هذه الطريقة وهل هي الكافلة لحماية الأبناء من أضرار الانترنت لأن فهم الآباء للانترنت يعد عاملا أساسيا لمعرفة وضمان توجيه الانترنت لما هو في صالح الأسرة والأبناء, وان كان يغلب إلمام الأبناء على الآباء ومن هنا يصعب على الآباء وضع بعض الضوابط الفنية التي يتعذر على الأبناء اختراقها, إلا أن الضوابط المالية هي الأمر الذي بالامكان تطبيقه لدى بعض الأسر فبإمكانهم منع أبنائهم من الاشتراك كليا وعدم امدادهم بالمال لتسديد رسوم اشتراك الانترنت مما قد يحد من استفادتهم من الجوانب الايجابية للانترنت أيضا

♥نبع الغرام♥♪≈ يقول...

ولكن بعض الآباء يرغب في وضع بعض الضوابط لأبنائهم مثل عدم تمكين جميع الأبناء من استخدام الانترنت أو الحاسب الآلي والبعض الآخر قد يرغب في تمكين استخدام الانترنت للأبناء في ساعات معينة فقط ولكن الكثير من الآباء يدرك أهمية الانترنت وفي نفس الوقت يدرك العواقب التي قد تنتج عن استخدام برامج مثل برامج الدردشة على سبيل المثال, فقد يكون هناك صنفان من الآباء: صنف ينادي بعدم استخدام الانترنت كليا وذلك لغرض تجنب المشاكل التي قد تتسبب بها الانترنت وهنا قد يأخذ الأب على عاتقه مخاطر عدم تأهيل الأبناء بشكل يتلاءم مع الثورة التكنولوجية الشائعة وهي استخدام الحاسب الآلي والانترنت وصنف قد يتعامل مع الموقف بانفتاح مما قد يخلق بعض المشاكل للأبناء على المدى الطويل.
والحل هنا ليس بالبعد كليا عن الانترنت وإنما بإيجاد ضوابط فنية للحد من الاستخدام السلبي للانترنت.

♥نبع الغرام♥♪≈ يقول...

والحل هنا ليس بالبعد كليا عن الانترنت وإنما بإيجاد ضوابط فنية للحد من الاستخدام السلبي للانترنت.
الآن بإمكان الآباء وضع بعض البرامج المعروفة باسم Parental Control Software والتي تقوم بمنع الأبناء من استخدام بعض البرامج أو منعهم من زيارة بعض المواقع التي قد تترك بعض الآثار السلبية للأبناء وخاصة في سن مبكرة حيث يمكن الحصول على هذه البرامج بسهولة بزيارة لمواقع مثل Tucows, Cnet وبالامكان تحميل هذه البرامج مجانا لفترة تجريبية أو بالامكان تحميلها كليا بشكل مجاني, كما يمكنك استخدام متصفحات تمتلك خاصية الرقابة خلاف انترنت اكسبلورر أو نت سكيب مثل هيكسابت Hexa Bit Junior والتي كما ذكرت تمكن أولياء الأمور من وضع رقم سري يحد من قدرة مستخدمي الجهاز من زيارة المواقع غير المحبذة, وبالطبع على الآباء أولا خوض تجربة الانترنت والالمام بفوائدها ومضارها قبل اتخاذ قرارهم, ومما لاشك فيه أن أعمال التطوير قائمة وبشكل مستمر لضمان الاستخدام الأمثل للإنترنت,

♥نبع الغرام♥♪≈ يقول...

تسلم ايديكى يامنوش

موضوع فى غاية الاهميه

تعرفى رغم انى كبيره قوووى اهو ومازالت امى بتخاف عليا من النت
وكل شويه نتخانق انا وهى بسبب وبدون سبب
هههههههههههههههه

الحمد لله

خدى بوسه
موووووووووواه
بحبك
انوسه

MǿиY El-Shreef يقول...

بوست جوا الجووووون

والله يابنتي بجد حجات تخنق انا نفسي بواجه بعضها ف البيت :@

نفسي الاب والام يتعلموا ازاي يعاملوا ابنهم من غير مايبصولوا نظره القاصر الي مش بيفهم والي اي حاجه هيعملها اكيد غلط

عالم عجيبه ومش فاهمه انا بيفكروا ازاي

ربنا يهدي

مستنيه الجزء الجديد

وتسلم ايد سعادتك

مووووواه

عمرو يقول...

و الله بوست حلو أوى أوى برافو عليكى ..
بتعجبنى البوستات اللى بتخاطب قضايا مجتمعيه عامه مش بس عن تجارب شخصيه شديدة التلغيز ..
و الله يا مانوش كتير أوى من الببهات و الممهات محتاجين يتربوا هم الأول قبل ما يربوا عيالهم اللى بيطلعوهم مشوهين نفسيا و خربانين عقليا بدون سبب جنوه هؤلاء الصغار البؤساء سوى أنهم طلعوا لقيوا نفسهم بين أب و أم أصلا مش متربيين صح ..
المشكله نص حلها فى أن الآباء و الأمهات يعترفوا بصدق و صراحه بأنهم غير مؤهلين لتربية الصغار ..
يعترفوا لمين و اٍزاى و ايه اللى يخليهم يعترفوا بكده ؟؟
الله و رسوله أعلم ..
بس البوست عجبنى أوى ..
تقبلى تحياتى و تقديرى ..

موناليزا يقول...

تسلمى يابنتى والله

رحلتنا في الحياة يقول...

طيب اقولك حاجة موضوع الشغل دا انا اللى عايزة اشتغل وكل يوم اندب حظى وماما هى اللى بتكسر طموحى كل شوية وتقولى بلا شغل بلا زفت
يمكن الحاجة اللى كانت بتضيقنى فى بيتنا ان ماما مش بتحب تشوف اى حد كبر وبقى مستقل بتزعل جدا لما تحس اننا كبرنا وبقينا شخصيات مستقلة علشان كدا كان دايما دا سبب الخلاف بينى وبينها انها تسيبنى اجرب بنفسى كل حاجة فى الحياة
ولسه فى صراع
ربنا يهدى الاباء والابناء ويهدى كل الناس يااااااااااااارب

Me7'o يقول...

البوست ده فكرته ممتازة
وهاستنى المزيد من الأسباب
ماشى

بس أنا متفق معاكى فى كل حاجة قولتيها
بس فيه حاجة مشتركة بين الأسباب اللى قولتيها واللى لسه إن شاء الله هاتقوليها
عارفة إيه هى؟؟؟

"إن مفيش أب أو أم بيعترف إنه سبب فشل الأبناء"

دايماً يعلقوا فشل الأبناء على الأبناء نفسهم

تحياتى

ذو الوجه المبتسم يقول...

السلام عليكم ورحمة الله
اولا باشكرك على البوست الاجتماعى ده
وبصراحة كلام مفيد جدا للي يفهمه صح
لكن فيه نقطة مهمة عاوز اقولها
الانسان منا بداخله ( نعم ، لا ) ( صح ، غلط ) وكل انسان فينا بيعتبر ان اللي بيعملوه هو الصح مهما كانت آراء الاخرين ده بصفة عامة
وطبعا ده بيولد العند والكبر وحاجات تانية كتير
علشان كده رأيي الشخصي المتواضع ان الاهل عليهم العبء الاكبر فى التربية والتوجيه والمساعدة كمان
مش بفرض الرأى لكن بالثقة وانه يربووووا اولاده على الثقة بالنفس وازاى ياخد قراره بنفسه وبصراحة انا شفت نماذج لاطفال هنا بالمدرسة اللى انا باشتغل فيها اطفال صغيريين وبالرغم من كده تلاقيه بيعرف يتكلم ويعبر عن نفسه كويس
ولما قابل ولى الامر بصراحى اعترفت له ان اسلوبه فى التربية مميز وممتاز
هو ده اللى احنا عاوزينه من كل اب وام
التربية الصح والثقة المتبادلة احتواء كامل شامل

معلش طولت
تقبلى تحياتى

The illusionist يقول...

انا التعليق رقم سبعتاشر
لالالا
كتير عليا
ايه العسل ده
والله موضوع جاى على روحى
عاجبنى جدا جدا
بجد جميل قوى
الفشل وطنط نفيسه
لالالا بدعتى
موضوع جامد

ادم المصرى يقول...

افتكر ان زمان كان تأثر

الام والاب على الابناء كان له اهميه اكبر

فى المجتمع والنتيجه ان مثلا لو بصينا بوجه نظر مختلفه مصر بقلها اد ايه مطلعتش عالم فى اى مجال بقالها نصف قرن وده سبب من اسباب التربيه السلميه دلوقتى والله المستعان متعرفيش مين بيربى مين الاب والام هما الى بيربو اولدهم ولا اولدهم الى بيربوهم

متعرفيش

شلاطة يقول...

انا لسه النهارده عامل بوست عن حاجات شبه دي بس على خفيف
حسيت اني لو كنت طولت الكلام شويه كنت هغلط

المهم نيجي للبوست

اللي انا لاحظته من خلال التعليقات اللي قبلي ومن خلال الناس اللي انا اعرفهم سخسيا واضح ان كل الاهالي بتتعامل مع عيالها معامله واحده

من البوست دا انا طلعت اني عارف اسرة بتمثل كل حاله منهم

ودا ان دل على شيء يدل ان الاباء والامهات مش عارفين يتعاملوا مع عيالهم

وفي حاجة كمان ان كل الاهالي مكنوش بيغلطوا خالص وهما في سننا
كانوا بلسم يا اوختتي يتحطوا عالجرح يولع

ربنا يهدي
سلام
تقبلي مروري

أبو العريف يقول...

منووووووووش

حلو قوي البوست
بس انت بتدني في مالطه
هتفضل المعامله اكده
والطبع بيضرب التطبع بالنار


فعلا لو حد قدر يتعامل مع اولاد بتعاليم دينا
هيطلع جيل ملوش حل


تحياتي

mohamed ghalia يقول...

أوك متفق معاكى تماما فى معظم الحاجات الى قولتيها
بس اسمحيلى أختلف معاكى فى أول سطرين
هو مش دايما كلامهم صح لكن معظمه يكون صح
وأكيد الخبرة فى الحياة بتفرق كتير
على فكرة الكلام ده عن تجارب كتير كنت بمشى ورا ذكائى كتير واضرب بكلام ناس كبيرة عرض الحائط زبعد كده اتأكد أنى هما الى كانوا صح
أكيد مش دايما بس غالبا بيكونوا هما الصح
خالص مودتى

غير معرف يقول...

ازيك يا منووش...
بوست جامد جدا و فعلا امهات و ابهات بيقعوا فى الغلطات دى كتير و انا معاكى فيها كلها


لكن مش معاكى فى أول سطرين من البوست..الأمهات و الابهات برضه عندهم خبرة و إلى حد ما شايفين بعدين عامل إزاى ..فمينفعش نقول إن كل كلامهم غلط و انهم بيتكلموا من وجهة نظرهم اللى عفى عليها..ممكن آه تبقى فى حاجت هما مش مستوعبنها (و على فكرة الحاجات دى مش كتير)لكن فى الغالب كلامهم بيكون هو اللى صح

ولا إيه

Nora 7wades يقول...

هو لسة فى بوست جاى....


ده كنت حالفة ادخل ازعق لماما بعد الموضوع ده
هههههههههههههههه
فعلا كلامك كله صح ياحلوة انتى..

بس اوعى تقولى لأمى انى قريته..
ههههههههههههههه


بجد والله الامهات والابهات دلوقتى مش عادوا القدوة بتاعتنا
كفاية ان همااللى بيغلطوا
متعرفيش بقى من المجتمع ولا من الظروف ولا من الحياة..

بس قوليلى امك عارفة اللى انتى كتبتيه ده ..ولا اروح ءأقلها..؟؟
ههههههههههههههههه

الازهرى يقول...

منذ عام أو يزيد قليلا ذهبت لمشاهدة إحدى بروفات محمد صبحى
وفى الراحة تحدثت معه عن أيام ونيس مسلسله الأشهر
وكانت نفس فكرته هو ما تتحدثين عنه الآن
القدوة
وفى كلمته فى تتر المسلسل أنهم اكتشفوا أنهم يربون أنفسهم مع أولادهم
فليس أى ما بلا أخطاء ويحب علينا جميعا أن نلاحظ أنفسنا وأن نكون قابلين لنقد فلا فضل لأحد على أحد
فالكل يتعلم
والكل لا بد أن ينتبه
والآباء على رأس هؤلاء وخاصة الأم لأنهم الأكثر تأثيرا فى حيا طفل شاب اليوم الذى هو رجل المستقبل والأمل فى النهوض بالوطن كى يكون أفضل من اليوم
وما نعانيه هذه الأيام السبب الرئيسى فيه هو هذه الأسباب

تحياتى دوما
******************************
ألا مين إلخ إلخ إلخ ده ؟

Ahmed يقول...

موضوعك هايل وصورك تحفه
انا اصلا اتخضيت من الست اللي حطه صباعها في عيني ديه

اللي انتي بتقوليه واكتر للأسف موجود في مجتمعنا, أسبابه كتير واحد منها افتقاد لغة حوار بين الأجيال

كل جيل بيحاول يفرض على التاني رأيه, رغم أن كل جيل فيهم اتخلق لعصر وحياه مختلفه

الاختلاف بيكون سبب صدام وعند وده اللي بيخلي العلاقه بين الجيلين علاقه المسيطر علليها الطرف الأقوى

موضوعك رائع

قبل لما انسى عايز اقولك حمدلله على السلامه, كلامك بيوحشنا كتير

mimi يقول...

منش منووووووووش

وحشتيني يا عسولة فينك علي المسنجر؟

بجد تسلم دماغك يا بنت الايه...

بوست يستاهل بوست


هههههههههههههههه

بوستين

تحياتي

mimi يقول...

من غير احتلال ولا حاجة...


حبيت اقوللك ... تصبحي علي خير

mimi يقول...

خلاص خلاص ماشية اهه


سلاااااااام يا سكر

شمس النهار يقول...

مانووووووووش
ازيك وحشتيني
يعني انا جايه اسلم وامشي الاقي ملف قضيه
كلامك مظبوط
وطبعا ليا تعليقات مش تعليق واحد بس مافيش وقت وعايزه ازور الناس كلها
البوست خطير وفي الجون
تسلم ايدك ودماغك
كان في بوست اسمه رساله من ابن لأمه عند م/البنا(من غير عنوان)
كان برضه في نفس الموضوع
**هي تانت طاظا والا ظاظا للعلم بالشئ بس:):)

احساس طفلة محبة للرومانسية بس واقعية يقول...

ساعات الاب والام بينسوا انهم كانوا ابناء وكانوا بيكرهوا اشياء معينة و دلوقتى بيعلموها لابنائهم
لا اراديا بيكونوا نسخة من باباهم ومامتهم واحيانا بيكونوا العكس تمام
ومش دائما الطريقين صح

زائد ان مفيش تقسيم فعلى وواضح للاولويات ودائما مترتبة غلط والابناء ترتيبهم ملخبط لان بجاب كل اللى قلتية فى تناقض فى المعامله شوية اه وشوية لا شوية فاشل وشوية ناجح وشوية صح وشوية غلط بيكون فى تذبذب وعدم استقرار فى نفسية الطفل وبيكون قابل انه يكتسب اى مرض اخلاقى او اجتماعى

جميل البوست يا منوش
تقبلى مرورى

تأثير الفراشة يقول...

السلام عليكم يا منووووش

وحشيتينى و وحشتنى بوستاتك الجميلة

و بالنسبة للبوست ده بجد بجد برافو عليكى، الكلام اللى بتقوليه ده كان فعلا بيدور جوايا و متشوقة جدا جدا انى اقرأ تكملتك للموضوع الجميل ده

موضوع جميل و أسلوب هااايل، إلى الامام

تحياتى ليكى دايما يا أجمل منوووش

Unknown يقول...

فعلا فعلا تسلم ايدك وكلامك
كل كلمة فى موضعها بالضبط
لكن ارجع اقولك فى الاول والاخر
الاب والام بيبقوا عايزين مصلحة الاولاد
يمكن الطريقة غلط يمكن الاسلوب مش مضبوط لكن دايما نيتهم خير
(هذا ان كانوا اسوياء
مش سيكو يعنى ومخلفين
عيال لاجل ما يطلعوا
عقدهم فيهم)

MaNoOoSh يقول...

بنجاواتى
فعلا يا بنجا
اسلوب التربية هو اللي بيكون ليه اكبر تأثير في شخصية الابناء وازاى هيعاملوا اهاليهم لما يكبروا
ربنا يزرع فى قلبنا الرحمة مهما قسيت الدنيا او الناس علينا

*******************
بدراوى
بيتهيئالى الدادة اختفت لان الشغالة حلت محلها
وبعدين فى حاجة مفهمتهاش... ازاي انت اللى بتقنع نفسك انك فاشل؟
دة الواحد لو ملقاش حد يدلعه بيدلع نفسة
موضوع الانطوائية هناقشة اكيد المرة الجاية لانى انا كمان بعاني منه
لكن فى الغالب بيبقى الاهل هم السبب بردو
والقلق كمان اكيد ان شاء الله هناقشة

***************
ABOALI
بس هو الزوج الصالح يجي الاول
وهو ان شاء الله هيكون عون فى تربية سليمة للابناء
وانا شخصيا اتمنى اى عيب فى شخصيتي ميأثرش على تربية اولادي

**************
مصطفى أبوزيد
مهي دي المشكلة
كون الاب فى الشغل دايما دي كارثة فى حد ذاتها
مينفعش ام تربي لوحدها مهما عملت
لازم الاب يربي حتى ولو خصص ساعة او اتنين فى اليوم يقعد فيها مع ولاده يسمعهم او يقضي وقت اسري

*****************
عاشقة الأحزان
الاهل مش فاهمين انهم مهما منعوا حاجة عن الابناء فيعملوا اللى هم عايزينه من وراهم
فالافضل انهم يشاركوهم اهتماماتهم احسن ويكونوا اصدقاء ليهم
وممكن الابناء نفسهم هم اللي يبادروا بموضوع مشاركة الاهتمامات والصداقة

****************
MǿиY El-Shreef
مهم يفضلوا يعاملوه على انه قاصر لغاية ما فى الاخر هو او هي يحسوا فعلا انهم كده لو كانوا شخصيات حساسة
الاب والام لااااااااااااااااااااااااازم يربوا ابناء يقدروا يعتمدوا على نفسهم وياخدوا قرارات ويتحملوا نتيجتها
والله انا كمان ساعات مخي بيلسع ومبعرفش بيفكروا ازاي

***************
عمرو
عارف يا عمرو المشكلة فى الاساس ان الناس بتتجوز بس علشان تكمل نص دينها وتفرح بخلفة العيال
لكن ميعرفوش ازاى يتعاملوا مع بعض صح وللا ازاي هيربوا عيالهم دول لما يخلفوهم
تفتكر ممكن يتشرع قانون باجتياز راغبي الزواج لامتحان في القدرة على تحمل المسئولية؟؟
ممكن تكون أحلامي شاطحة شوية.. بس والله ممكن مش بعيد.

******************
موناليزا
تسلمي انتي يا قمر ونورتيني

*****************
ايوشة
موضوع صراع الشغل دة شغلني وقت طويل قوي يا أيوشة
وفي الاخر قررت اني مش عايزة اشتغل واتبهدل بصراحة.. ووقت ما احب اطلع اجازة افضل اتذل بقى علشان اعرف اخد اجازة
الاهل شايفين ان خسارة التعليم وبعد كده قعدة من غير شغل
بس فى الاخر هي قدرات فردية بتختلف من شخص للتاني
يعني ناس متقدرش تعيش من غير شغل وناس الشغل بيخنقها
لازم الاهل يراعوا الاختلافات الفردية دي ويحطوا رغبات ولادهم فى الحسبان
يناقشوهم ويحاولوا يقنعوهم.. بس فى الاخر دي رغبات شخصية ومينفعش نعمل عكس رغباتنا وقدرتنا

MaNoOoSh يقول...

Me7'o
بالظبط يا ميخو
مفيش لا اب ولا أم بيعترف انه السبب فى عيب معين في شخصية ولاده
بس بردو المفروض الابناء طالما عندهم الوعي.. يصلحوا اى عيب فى شخصيتهم
بس قوللي بقى انت قافل التعليقات لييييييييه.. ومش بتنزل بوست جديد ليييييييييييييه؟؟؟؟

****************
ذو الوجه المبتسم
بالظبط كده
فعلا اهم حاجة الاهل ممكن يعملوها انهم يزرعوا فى ولادهم الثقة بالنفس والقدرة على أخذ القرار وتحمل مسئوليته
بعد كده لو رموهم فى البحر هيعرفوا يتصرفوا
وللاسف كلمتك حزنتي (فى المدرسة اللي انت بتشتغل فيها)
حزينة على بلدي واللي بيحصل فيها.. من كتر ما الواحد شاف نماذج غلط.. مبقاش عارف يلاقى بارقة أمل فى جوازة صح وللا عيال متربية صح.. بقوا عملة نادرة للاسف

*****************
THE illusionist
يااااااااااااااااااااااااااااه
نورتني يا باشا بعد غياب
انا اصلي كنت مخنوقة من ابهات وامهات كتير بشوفهم فى حياتي
فقلت اطلع خنقتي عليهم شوية
وجت بقى فى الاستاذ نفيسااااااااااا
هههههههههههههههه
نورتني

*****************
ادم المصرى
فعلا نقطة اننا معدناش بنطلع علماء دي حاجة خطيرة
بس الاهل اللى ولادهم بيربوهم دول هقولك فيها حاجة
انا فعلا مقتنعة ان لما الواحد يخلف اطفال لازم يبقى قدوة ليهم.. علشان كده بيبقى بيربي نفسه معاهم
ودي حاجة كويسة مش وحشة ابدا

***************
شلاطة
ههههههههههههههههههههههه
هم فعلا كاناو بلسم ومتفوقين وشاطرين وحلوين وبيسمعوا الكلام
فعلا فيه فجوة كبيرة جدا بين الاهل واولادهم.. علشان مفيش حوار ولا تفاهم ولا احترام لرغبات الاخر
ربنا يهدي الاهالي قبل ما ولادهم يبقوا قنابل نووية

*****************
أبو العريف
عاااااااااااااااااااااااااااا
ليه بس كده يا ابو العريف
الواحد اهو عنده امل وبيقول ممكن حد عنده عيال ينتبه ويعمل الصح

****************
mohamed ghalia
هو مش دايما بيبقوا غلط لكن بردو مش دايما بيبقوا صح
اللي بينقطني ان مش علشان الاهل معتقدين انهم صح يبقى يفرضوا رأيهم على ولادهم
انا بعتبر ده تدخل.. ليه ميسيبوش ولادهم يختارو ويتحملوا نتيجة اختيارهم..
مهم لو غلطوا عمرهم ما هيكرروها.. ولو طلعوا صح هيكتسبوا ثقة فى نفسهم

***************
انا ودماغي
هم مش دايما غلط
لكن بردو مش دايما صح
اكيد عنهم خبرة.. بس لازم بردو يسيبوا ولادهم يكتسبوا خبره.. لان دورهم ارشاد مش فرض رأي

MaNoOoSh يقول...

Nora 7wades
لالالالا اوعي تعملى كده
ههههههههههههههه
مش عيب ان الاهل يغلطوا ابدا.. بس المهم انهم يعترفوا بغلطهم وميتكسفوش.. مهم بني ادمين بردوا ولازم هيغلطوا

*************
الازهرى
فعلا مش عيب اننا نغلط ونصلح نفسنا
ومش عيب ان الاهل يربوا نفسهم مع ولادهم.. بالعكس دة انا بعتبرها حاجة جميلة وممكن لو الاهل استغلوها صح يبقوا اصدقاء لولادهم علشان يحموهم من شرور الحياة الكتيرة ومغرياتها
وإلخ إلخ إلخ دة هو اللي زئني
هههههههههههههههههه

***************************
أحمـــــــــــــد أبو العلا
الله يسلمك يا بشمهندس.. والله انا اللي مفتقده الحوار معاكوا
افتقاد الحوار ده أزمة كبيرة.. بتحسس كل جيل انه بيدن فى مالطا
التفاهم هو اللي بيصنع جو أسري وثقة بين الاهل وولادهم.. بس يظهر الناس بتستصعبه قوي مش عارفة ليه؟

*******************
mimi
تسلمي يا ميمي يا قمر
انا مش بفتح المسنجر لقلة وقت قعادي على النت
بس بجد نفسي اكلم ناس كتيييييييير ونفسي اكلمك يا قمر

*******************
شمس النهار
شموسة القمر
كفاية انك نورتيني يا قمر
الموضوع فعلا عامل أزمة للاهل ولولادهم.ز طب ليه ميتفاهموش مش عارفة
ربنا يهدينا ويهديهم

******************************
احساس طفلة محبة للرومانسية بس واقعية
بجد بجد نونو منوراني بعد الغيبة دي
وحشتيني جدااااااااااااااااااااااااااا جدا
موضوع ان الواحد بيبقى نسخة من اهلة ده كارثة.. طب ليه مش بنتطور علشان نربي صح.. ربنا يلهمنا الصواب مع اولادنا ان شاء الله
بس مش المفروض الاهل ابدا يحسسوا ابنهم باى فشل.. دول المفروض اول ناس تساعده يقف على رجليه لو فشل.. وتدعمه وتديله ثقة فى نفسة

*****************
تأثير الفراشة
انتي كمان وحشتيني يا قمر
وهستناكي فى التكملة المرة الجاية ان شاء الله

***************
norahaty
تسلمي يا قمر
وفعلا انا متاكده ان الاهل بيبقوا عايزين مصلحة ولادهم
بس مش بالضرورة ان اللي عايزينه يكون هو فعلا اللى فيه المصلحة لولادهم
يعني نيتهم بتبقى خير اكيد لكن الابن او البنت اكيد ادري بقدراتهم واحلامهم ورغباتهم
الاب والام عليهم النصيحة ونقل الخبرة.. والابن عليه اخذ القرار وتحمل نتيجته
هو ده اللى انا مقتنعه بيه

Sweet Violet يقول...

اتفق معاك فى كلامك
بس تعالى هنا
مااااااااااااله البكرى هه
يااما نفسى اشوف انا اللى بتقولى عليه ده و ان الدنيا تتشال كلها علشان خاطره
بالعكس انا بشوف البكرى ليس الا حقل تجارب للاب و الام v_v
اللى فعلا بشوفه كده هو اخر العنقوووود اللى بجد بيكون متدلع زيادة حبتين تلاته اربعه كده ×_×

غير معرف يقول...

بوووووست راااااااااائع

طبعا الاهل هما المسئولين لو عرفوا يعاملوا اولادهم صح وبحنية هخرجوا ولاد زي الفل

ولو عملوا الحركككات الي قولتيها هيبقوا اولادهم فشلة وصايييعين

يووووووووووه شفت حالات كتيررررة ترفع الضغط وتجلط ربنا يهديهم ويعرفوا يتعاملوا مع اولادهم بطريقة صحيحة

ربنا يباركلك ياحبيبتي عالنصح الرائع

ربنا يوفقك ويسعدك

د. ياسر عمر عبد الفتاح يقول...

أيون
أديهم فوق دماغهم الجماعة الأبهات والأمهات دول
علشان بيحرقوا دمي
لما إنتم مش عارفين لا تربوا ولا تعلموا .. بتخلفوا ليه
كتكم القرف مليتوا البلد

VÖltaa يقول...

بوست جامد على فكرة وكلام زى الفل
وبيحصل اكتر من كده كتير وحياتك

مستنى التكلمة يا انجى

اسف على التأخير

ذكرى رحيل قلم يقول...

السلام عليكم

منوش برفوا عليكي انك فكرتي وتعبتي نفسك في كل الكلام ده شكرا للتنبيه
طبعا عندك حق في كل ما ذكرتي بس ياريت البوست القادم تذكري اسس التربية السليمة
عشان مش كفاية تذكري العيوب فقط

يبقي لاكتمال الموضوع العيوب والصفات الحسنة
او الصح والغلط

ذكرتي الغلط يبقي فاضل الاسس السليمو
سننتظر وبالنجاح ان شاء الله

دمتي

حلم بيعافر يقول...

عندك حق فى كل كلمة قولتيها
كلها اساليب تربية غلط فى غلط فى غلط
وبتطلع انسان مشوش بيدخل مجتمع مشوش هو كمان فبتحصل بلاوى ومصايب كتيرة ومالهاش عدد
وممكن تلاحظى تغير وتبدل المجتمع من اخبار الحوادث اللى مالية الجرايد وحوادث غريبة مكنتش بتحصل قبل كده او قولى مكنتش بتحصل بنفس الكترة اللى بتحصل بيها دللوقتى
البيت عليه اكبر واهم دور فى عملية تخريج فرد صالح للمجتمع
وعملية التربية عملية مشتركة طبعا بين الاب والام وطبعا بياثر فيها بقية العيلة
فلو حد عليه دور فى العملية دى ومعملوش او عمله غلط سواء بقى عمله غلط او معملوش عشان مش فاضى او عشان مش عارف فالبتاكيد هيخرج فرد ناقص او مشوش او فاسد وفيه بلاوى

غير معرف يقول...

بوست جمعتي فيه امراض سوء التربيه المنتشره في مصر
احيكي

ياسر سليم يقول...

انا اعرف ناس .. بيدلعوا ولادهم بألفاظ الواحد بتقزز منها

حاجة بجد عجيبة ..

وما خفي كان أعظم

الآباء عايزين يتربوا عشان يعرفوا يربوا

محمد فوزي يقول...

لو كل بني آدم إقتنع بأنه مش إنسان متكامل وملاك ماشي على الأرض , كان حاول يكتشف عيوبه وفكر دايما يطور من نفسه
وكان ساعتها الأب والأم مش هيعتقدوا انهم نموذج لازم يطبعوا أبنائهم عليه

عجبني موضوعك وخصوصاً نقطة الخوف الهيستيري على المذاكره من الرياضه والأنشطه , حقيقي قتل للإبداع والطاقات والغريب إنه مبيعانيش منها غير الإبن المجتهد فعلا وكأنهم بيعاقبوه , إنما اللعبي بيسيبوه على راحته وبيرموا طوبته

تحياتي

غير معرف يقول...

منوش الحبيبة
انا جاية اسلم عليكى واقولك
وحشتيننننننننننننننننننى
البوست جامد قوى ومفيد قوى
وفيه افادة للاباء كبيرة وفى انتظار
القادم ودمتى بخير

مذكرات زوجة يقول...

بجد بوست جميل جدا
انت قدمتى هنا نماذج كريهة من الآباء وعرضتيها بطريقة شيقة تخلى القارىء يتابع بدون توقف حتى النهاية

مرة قابلت عادل امام فقلت اروح ايلم عليه واتصور معاه وكدة
قلتله انا شفت عمارة يعقوبيان وكان فيلم تحفة

رد وقالى .. طب ايه رايك فى محمد؟
قلتله .. محمد مين؟
قالى : محمد ابنى .. اللى كان طالع طه .. شفتى قد ايه عبقرى فى التمثيل

والله الحوار دة حصل بالنص .. ساعتها قلت لنفسى ان لو كان اهلى يفخروا بية كدة فى اى حاجة باعملها اكيد كنت هبقى احسن حد فى الدنيا

بس دة لو كان بقى
تحياتى

لاسع افندى يقول...

اخيرا تغير مسار الهجوم عن الرجاله
بس برضه هجومك المره دى فى محله

فى انتظار الهجمات القادمه
تحياتى

غير معرف يقول...

ده انت طلعت معلم كبير بأه واحنا مش واخدين بالنا... جايبة الكلام الكبير ده منين يا منوش

جامدة جامدة

مها ميهوووو

شريكة في المطعم يقول...

جامدة جدا بجد..
وكل الكلام ده صحيح .. وبيأثر في اولادهم بشكل كبير
هههههههههه لما البنت تلاقي امها شغالة في التليفون جايبه في سيرة الي راحت والي جت لازم هتطلع زيها..ده حتى في اطفال بقوا كلامهم زي الستات الكبار شوفي دي لابسه ايه ودي بتعمل ايه!!!!
والحجة بتاعت معظم الأبهات انه دايما مشغول
هههههههههههههههههه
اه بالضبط بييجي وقت كل حاجة يقولوا
عليها عيب وغلط..مع ان مفيش حاجة يعني
ولا حكاية فاشل دي كمان
مش كل الناس بتيجي بالتحفيز السلبي ده
ده مضاره اكتر بكتير

بوست رائع وهادف ..ومستنية البوست الجديد

عابرة السبيل يقول...

بصى الموضوع شكله مفيد وللامانة قريت عناوين الكلام وده حقيقةوبيحصل فعلا

بس عذرا لضيق الوقت مش هقدر اقرا البوست كله

لكن احييك

وبرضه ارحمو من فى الارض واكتبو بوستات صغيره ولو الموضوع كبير اكتبيه على اجزاء

سلام عليكم

اقصوصه يقول...

امممم

اتفق معاك فعلا

الاهل احيانا يحتاجون الى اضاءه

لتسلط على حياتهم وافعالهم وتصرفاتهم

وتريهم الخطأ من الصواب :)

اقصوصه يقول...

امممم

اتفق معاك فعلا

الاهل احيانا يحتاجون الى اضاءه

لتسلط على حياتهم وافعالهم وتصرفاتهم

وتريهم الخطأ من الصواب :)

تامر علي يقول...

:)
كلامك متفق مع كلام أساتذة علم التربية العالميين ومع أساليب التربية الحديثة جداً :)

فعلاً إحنا مصيبتنا اننا معندناش منهجية في التعامل أو التربية وكل المسائل عندنا على حسب الظروف لذلك تغلب العشوائية وتربية الزمان على أولادنا وتكون المحصلة مصايب كما نراها :)
تحياتي

الازهرى يقول...

تصدقى بالله ان
الخ الخ الخ

كانت عاجبانى اكتر

اقدم عاصمه فى الحب يقول...

السلام عليكم

احيانا الضغوط والمشاكل والظروف بتحط الواحد فى مواقف بيتصرف فيها بطبيعته كأنسان يعنى حاجه تزعل بيزعل ويعلى صوته بسبب الموقف وبسبب الضغوط وبسبب وبسبب بس الوضع يبقى وحش لو ذاد عن حده بيقلب الدنيا وممكن فعلا الاولاد ينحرفوا بسبب تكرار جمله .......
انا استفدت كتير من البوووووست ده
,
.
.
.
,
تقبلى مرورى
ولكى مودتى:)

ساره يقول...

منووش كل يوم احاول ادخل اقراء وما اقدر عشان البوست طويل وفي الشغل ما عند وقت .. يعني ادخل بسرعه في النت واخرج ما اطول عشان بكون بجد مشغوله

اليوم دخلت وقلت علي وعلى اعداء انا قرايه البوست يعني قرياه ...

الامثله اللي حطيتيها في الصميم ... وبجد مجهود تشكري عليه .. وياسلام على النصايح قويه ونافعه .. الله يجازيك خير يارب

وحشتيني يامنمن :)

Kiara يقول...

مفيش حاجه من دي بتحصلي انا بشتغل ولحد الان ماما وبابا مش عارفين مرتبي كام

منتظرة الجزء التاني بس بوست حلو وفيه كلام بيحصل في اسر كتير

*البت المشمشية *حلوة بس شقية * يقول...

ياريت الاهالى يقروه عشان يرحمونا بقه

Lady E يقول...

فعلا في بهبهات كده ومن غير ما يقصدوا بيحطموا اولادهم

البوست فعلا جميل وواقعي جدا

والكلمة اللي مكتوبه فوق عجبتني اوي

لو أبكتنا كلمات كل من قصد جرحنا.. لما عرفنا طعم الضحكات

بجد تسلم ايدك

Zika يقول...

اناماليش تعليق عالبوست ده غير
الله ينور

سمكه واحده يقول...

لا يا منوش بجد الله ينور
بتجيبي الكلام ده كله منين يو خيبك
لا تسلم ايدك
وعندك حق في حجات كتير جدا موجوده وصح
تحياتي ياقمر

المتبهدلون في الأرض يقول...

بغض البصر عن الشر المكثف اللي في البوست ,إلا إنها بجد رؤية صائبة وشاهدة على كثير من الآباء .. داكتورة من يومك

الازهرى يقول...

تررررررررررررررررررررن
فينك يا عمنا

أنستونا يقول...

موضوع مهم جدا
مشكورة

حـــلـــم كـــان يقول...

منوش
هقولك حاجه لسه حصله وعارفه من حوالى يومين

فى ناس كان عندهم شكله ففى وسط الشكله كده جه الواد ابنهم وارح شال طوبه كبيره وحدفها فى دماغ واحده فى وسط الشكله دى

روح اهل الواد عملو فرح وكان مبسوطين اوى ان الواد خبط البت

تخللى بقا معايا الواد ده لما يكبر هيبقا عامل ازاى ؟

Unknown يقول...

السلام عليكم
تحية طيبة
الزيارة دي مش خاصة قوي متأسف لو مش بتحبي الإعلان جوة التعليقات بس ده أمر مهم وخاص جدا
دي دعوة لمتابعة الإقتتاح الجديد لمجلة رؤية مصرية يوم السبت 1/8/2009
roaua.com
هتنور المجلة بوجودك
محتاج رأيك ومشاركتك معانا ولو عاوزة تنضميلنا تعالي يلا معانا
مستنيكي
خالص تحياتي

Unknown يقول...

السلام عليكم
تحية طيبة
الزيارة دي مش خاصة قوي متأسف لو مش بتحبي الإعلان جوة التعليقات بس ده أمر مهم وخاص جدا
دي دعوة لمتابعة الإقتتاح الجديد لمجلة رؤية مصرية يوم السبت 1/8/2009
roaua.com
هتنور المجلة بوجودك
محتاج رأيك ومشاركتك معانا ولو عاوزة تنضميلنا تعالي يلا معانا
مستنيكي
خالص تحياتي

Unknown يقول...

الله ينور
ده الواحد يبتدي يخاف منك ده أنت حتبقي منافسة جامدة قوي

بارك الله فيك ونفع بك

ويبقى التواصل

ذكرى رحيل قلم يقول...

حبيبتي منوش او مني

الف سلامة علي والدك ربنا يتم شفائه ان شاء الله علي خير
كل سنة وانت طيبة

هتوحشيني
تحياتي