الثلاثاء، 9 فبراير، 2010

كلاكيت تاني مرة (عن الرجل أيضا)

الحقيقة مكنتش ناوية اكمل كلام فى الموضوع دة تاني
لكن بعض التعليقات فى الموضوع اللى فات دة استفزتني استفزاز من النوع السوبر المفتخر
فقلت مش هعرف اسكت ومردش
أول حاجة
اني مش موافقة ان معدش في مجتمعات مغلقة
مين اللى قال كده
أيوة التليفزيون والأقمار الصناعية فتحت الدنيا على بعضها
بس الأسرة نفسها عبارة عن جزر متباعدة... كل شخص عايش في أوضة
محدش يعرف التاني حاسس بإيه... سعيد وللا عيونه بتدمع... نايم وللا صاحي... أطفال وشباب وبنات كتير نسيو طعم حضن أمهم وأبوهم
مع ان الحضن دة هو المناعة النفسية للطفل ضد الخطر
احنا مجتمع منغلق بنسبة مليون فى المية... مخبيين أخطائنا جوانا... عايزين نبان فى أحسن صورة... ومع ذلك بنحشر مناخيرنا في حياة الآخرين علشان نثبت لنفسنا ان ناس كتير وحشين وأوحش مننا كمان... فبالتالي ذنوبنا وأخطائنا تصغر في عيوننا ونمسك في عيوب الآخرين
مجتمع منغلق في مشاعرة مع اننا اكتر الشعوب عاطفية... بس من نظري عاطفة مسرحية... طلقات فشنك مضروبة إلا من رحم ربي
تاني حاجة رد استفزني جدا وكان موجهلى تعليق وسؤال
ما استفادتك ان تعرفي ان كان القراء الرجال يشاهدون الافلام الخلاعية ام لا ؟؟
عزيزي طارح السؤال
الحقيقة أولا مش فاهمة طريقة عرض الموضوع ضحكتك فى ايه؟
ورغم ذلك هجاوب على سؤالك
كل النسب اللى حضرتك ذكرتها فى الإحصائية أنا أثق انها أضئل من الواقع بكثيييييييييييير
والحقيقة نسب البنات مش هتصدمني نهائي لانى عايشة فى المجتمع وشايفاه بعيني بما فيه من شباب وبنات
أما عن استفادتي
أعتقد دة واجبى إني أفهم نفسية الراجل
بما انه أبويا وأخويا وزوج المستقبل وجزء لا ينفصل من حياتي
بما انى لو ربنا رزقنى فى المستقبل بإبن فمش عايزة حالة يبقى مايل زي السواد الأعظم من الأطفال الذكور والشباب وما يطلق عليهم بالخطأ رجالة الوقتى
عايزة أحميه من شرور نفسه
حقة عليا أختارلة أب يكون ليه مثل أعلى بجد مش صورة هتتهد مع أول زلزال
وحق زوجي عليا أحترمه مش اقرف واشمئز منه
حقى الاقى انسان نضيف أقدر أثق فيه ويكون حكمى عليه صحيح نابع عن فهم وحكمة
ميهمنيش اعرف اذا كان القراء الرجال الأفاضل بيشاهدو وللا لا
لكن كان يهمنى أوصل لأي حد مدمن على مشاهدة الأفلام الابيحة حاجات ذكرتها فى الموضوع
(ان الحكاية دي بتنزله من نظر زوجة المستقبل... ان مخه هيربط المتعة بالأفلام دي وحياتة الزوجية هتتاثر... ان شهوته مش ذنب لكن سعية للبحث عن الإثارة هو الذنب)
أما سؤالي لسيادتك... هل الحقائق العلمية اللى قلتها بصفتك طبيب هي مبرر للرجل لمشاهدة الأفلام الأبيحة أو "الإدمان" على العادة السرية؟
آخر حاجة هقولها عن الموضوع
اني لم يكن القصد من كلامي بتاتا اني أبرر لحواء
وأعترف ان بنات حواء المصريات شوهو صورتها
لكن تعالو نبص جوة النفوس شوية بدون زيف ولا منافقة
البنات بقى لبسهم مسخرة وتصرفاتهم لعنة... والولاد كذلك
بس مش الولاد بردو هم اللى بينجذبو للمناظر دي ويغازلوهم ويعاكسوهم ويسعو ويفتخرو بمعرفتهم؟
مش الأبهات والأمهات هم اللى بيشجعو بناتهم يعملو كده علشان فرصهم فى الجواز تزيد ويتجوزو بدري وميعنسوش؟
يعني بمنتهى البساطة لما يكون المجتمع فيه نسبة 50% من البنات محترمين فى لبسهم وأخلاقهم ويلاقو ان البنات المسخرة هم اللى حياتهم "مظهرها" السعادة... هم اللى بيتجوزو بدري ومحدش بيلئح عليهم كلام يسم البدن بمناسبة وبدون مناسبة... هم اللى أهلهم مبسوطين منهم ومش محسسينهم انهم قاعدين في أرابيزهم... هم اللى الشباب منجذب ليهم... هم اللى بيلفتو النظر
متتوقعوش أبدا ان نسبة 50% دي هتفضل على حالها... هتقل كتيييييييييييييييييييييييييير... دة اذا ما أوشكتش على الانقراض
ويا آدم.... لو كنت تبحث عن حواء طاهرة القلب فلتبدأ بنفسك أولا وثق أنك ستجدها
لا أحاسبك ولا تحاسبني... فلنفهم أخطائنا سويًا

11 اللي عبروا منوووشة:

SHAPE YOUR LIFE (ABOALI) يقول...

امممممممممممممممممم

عن الرجل ايضا

طيب ده تعليق اول

SHAPE YOUR LIFE (ABOALI) يقول...

اممممممممممممممممم

بعد القراءة
الموضوع محير شوية
بس موضوع القاء اللوم على طرف دون الاخر

مش مهم اووووووووى حتى لو كان الالقاء على ادم لوحده

لاءن ادم هو رب الاسرة الذى يسمح فى النهاية بخروج الابنة او الزوجة بالشكل الذى يكون والذى حدث

وعلشان لا يكون الكلام فى حلقات مفرغة

ويكون عملى

الالتقاء فى نقطة اتفاق يعتبر علامة على النضوج لكلا الجانبين
ف الاعتراف اننا وصلنا الى حالة من الهذيان الاخلاقى
هو اولى الخطوات فى الوصول الى نقط الحل

بعد الاعتراف ياءتى الجانب التطبيقى للحل

وهو رفع حالة السمو الروحى لدينا
ورفض ذلك العتة الذى يتغلل مثل السوس فينا
الرقابة الامنة للابناء والحرص على الاستماع لهم ومحاوراتهم واستخدام المهارات المختلفة ومحاولة اشغال اوقات الفراغ
ورفع اعمدة النور داخل النفوس لترتقى


ان كان الكلام مس الرجل فقد مس حواء
لاءنها من ضلع ذلك الرجل فما يمسه يمسها
بل ويتفق الكيانان على رفض ذلك الخلل الذى حدث

الموضوع كبير نعم
ولكنه يبدء باءن يصحصح كل منا مساره


تحياااااااااااااااات كبيرة لكى يا ماااااااااانوش على ذلك النضج الذى تتمتعين به
وثقى ان الريحان سيبقى ريحان واللؤلؤ سيظل لؤلؤ

والغراب سيظل غراب وان طلب ان يكون نسرا


ولك تصفيق حااااااااااد

romansy يقول...

من حقك تعرفى يا منوش زى ما من حقنا نعرف سيكولوجيه البنت اللى برضه هى امى وحبيبتى واختى وبنتى مشكله العنوسه والبنات المسخره والشباب الصايع دى بقت ظاهره وسببها الاساسى ديننا ااننا فرطنا فيه دلوتى البنت بتعرى جسمعها علشان تتجوز وكمان نفسها تكون مرغوبه قوى قوى
بس يا منوش مش قولك ان الاهل سبب والدنيا سبب وقله الضمير سبب فى كل مشاكلنا دى
احنا الطيبين لينا الجنه

سمكه واحده يقول...

اولا
اذيك يامنوش ليكي وحشه والله اخبراتك ايه؟
ثانيا بقي
موضوع الاشمئزاز ده والقرف انا معاكي فيه جدا طبعا ناس هتقلك البنات دلوقتي مبقتش بنات وبقت كمان العن من الولاد والادب والاخلاق ومعرفش ايه هقول لاء البنات لسه بنات وكتير اوي والوحش هو الي ظاهر عشان كده مخبي علي الحلو النقي
عارفه فعلا يا منوش الواحد والله بيقرف لو تصور ان ناس كتير كده ازاي يعني وليه ولو تصور ان العدد بيذيد والموضوع ذاد حاجه والله العظيم مقززه بكل المعاني مش عارفه اقول ايه
ازاي محفظش علي نظري واحافظ علي سمعي واحفظهم, بقي عيني اللي بتشوف كل حاجه جميله وتقري قران
وسمعي اللي بيسمع كل حاجه حلوه وكلام ربنا الوثهم بحقارات زي دي ربنا محرمها سبنا من كل ده
كفايه ان ربنا محرمها
احافظ علي نظري واحافظ علي سمعي لانها نعمه كبيره الواحد مش بيعرف النعمه غير لما تزول

بصي من الاول عارفه هي ايه؟
تربيه في البيت ام واب بيتقوا الله بيخافوا ربنا مربين صح اخلاقيا ودينيا
ام واب ينصح الولد والبنت
تربيه سليمه من الصغر
علي وعي وفهم وثقافه علميه ودينيه صحيحه من مصادر دينيه وعلميه مش حجات رخصيه وتعرفهم ايه الحلال والحرام
ايه الصح وايه الغلط ويحافظ علي صحته وعلي جسمه وعلي نظره وسمعه يعرف امتي وفين والوقت اللي يبدا يوظف كل حاجه فيه صح وللشخص الصح والمكان الصح والوقت المناسب بكده مش هيكون في مشاكل سواء للرجل او الست لانه اتربي دينيا واخلاقيا كويس
ومفيش اي مشاكل نفسيه
ويجي الدور التاني المجتمع نفسه والمدرسه والحكومه جتها الارف بردو لها دور
ليه ميمنعوش الزفت القنوات دي ليه ميمنعوش الحجات دي اصلا من دخولها البلد ليه متبقاش في قوانين رادعه حلوه رادعه دي؟ تطبق علي اللي يجيب الحجات دي يتحكم عليه حكم مثلا يضرب علي دماغه ولا يتكرهب بسلك عريان ولا يحلقوله عشان كل الناس تعرف ان فلان كان ابيح بيتفرج علي اباحه والعيال تجري وراه بالطوب وتغني ليه
اسكتي بجد الواحد والله بيتنرفز بجد
شاطرين بس في اربط الحزام
بصي الموضوع كبير عاوزه اهتمام من الاسره والمجتمع والمدرسه والحكومه نفسها كله يبقي ايد واحده
منوش بقلك ايه
مسكوني حكم البلد دي وهتتفرجي علي اللي هيحصل ليكي يابلد من سمكمك
اه وربنا
تحياتي

سمكه واحده يقول...

اه نسيت اقلك علي موضوع جواز البنات دي

كنت في الشغل ومن كام يوم كنا بنتناقش وواحد زميله في الشغل بس هي ست كبيره متجوزه ومعاها بنات بس في ثانوي واعدادي المهم بيتكلموا لقتها بتقول انا والله عاوزه اجوز بناتي من دلوقت مش شيفين بمقاش في جواز ضحكت وقلتلها ياستي ده نصيب واللي ربنا كاتبه هيكون وثم انتي خايفه من دلوقت وهما لسه ثااانوي سبيها علي الله
ومش حاجه عدله اوي يعني اصبري علي علي الهم يعني اصبري علي رزقك
قالتلي لا مشوفتيش البنات اللي بتجوز وبتعرف تصطاد كويس وتلبس محذق وملذق وتلفت نظر الولاد وتشاغل الواحد لحد ما تجيبه
هي اللي بتتجوز لكن اللي مقفوله علي نفسها بتفضل قاعده والله
لكن في بنات ناصحه وشاطره وتعرف تصطاد لا انا بس بناتي تكبر اه والله ادب ايه وبتاع ايه
انا اتصدمت من الكلام والله العظيم
انا كنت مفكرها بتهزر
روحت قلتلها يعني ايه
لا مع احترامي لرأي حضرتك
ان كان كده ده اسمه عرض سلعه وحاجه مهينه وحاجه رخصيه
لا انا افضل تولع وتتلقح في بيت ابوها وامها معززه مكرمه بدل قله الكرامه دي
ان شالله عن اهلها ما اتجوز تتلقح في بيت ابوها لحد ما يجي لحد عندها ذي ما متعودين وذي الصح وزي ما ربنا ما امرنا لحد باب بيتها
ان شالله ماجاش ولا توعي تتنيل ياستي
وكلام كتير بس بجد انا لاحظت ان بقي في عقليات وتفكير اولياء امور بقت كده مفيش دين ولاايمان ولا ثقه في ربنا ان نصيبي متشال وبطريقه افضل من كده وطريقه بتحفظ كرامه المراه
بس بس انا رغيت كتير في حجات كلها تنرفز

ستيته حسب الله الحمش يقول...

كلامك صح جدااااااااا
في كل نقطة
لدرجة العجب ان ينتقد أحد هذا الكلام بالموافقة او الإختلاف
دفن الرأس في الرمال ليس هو الحل أبدا

النهاردة براقب على اتنين ستات قد والدتي
الإتنين عاوزين يغشوا
مش مهم الفعل
بس تعالي حللي الفعل
دي الأم اللي ربت بنت كبيرة وولد شحط
ياترى علمتهم ايه؟
اللي تكسب به ألعب به طبعا

يبقى الوكسة والنكسة والتخلف العقلي في معايير الزواج
وغيره من امور حياتنا
عادي جداااااااااااااااااااا

هي وظروفها يقول...

عن الرجل وعن الست وعن المجتمع

اعرفي ومن حقك تعرفي وياريت كل زوجه تعرف اللي يوصلها انها تبقي الأم اللي تخلللي ابنها يفتخر بيها

احنا مجتمع بيمارس الحريه بمفهوم اوعي تييجي ناحيتي ماشي يا عم بس اوعي انت كمان تمس شيء يمس حريتي

انما لو هتعمل شيء هيضرني يبقي بعيد عنا بقي الله يخليك عشان المشرحه مش ناقصه قتله

حقك بس انا اذا كنت بلوم اي حد ممكن يقع ويتفرج او حتي سوري يمارس العلاقه
فهو ضحيه ابين وامين ابوه وامه وابو اللي يعرفها وامها والعكس طبعا

ياريت كلنا نبطل ندفن راسنا لان الطوفان جاي ومينفعش احط ابني ولا ابنك ولا ابن اي حد محترم تحت رجلين اي حد
لازم باذن الله نعرف اللي يخلللي عيالنا رجاله وقادره تواجه طوفان الفساد وانهيار الاخلاق بتعيلمهم ومراقبتهم وقيادتهم لبر الأمان وياااااااارب نقدر نطلع لبلدنا شباب وبنات زي الورد اخلاق ودين وعلم وحب واحترام ويارب نفرح بيكي قريب جدا ونفرح بولادك يااااااااارب

عايش... ولكن !!!! يقول...

الموضوع يخنق يا مخنوقه :)
مش قصدى يخنق يعنى وحش لا بجد جامد
بس انا نفسى كنت لسه بتكلم فى جزء من الموضوع ده مع اصحابى انهارده
كانوا بيقولولى ان البنات بقت شبه بعض :))) الميك اب والشعر واللبس الضيق يعنى

اعتقد ان ده التطور الطبيعى للحاجه الساقعه
ايوه يعنى افلام عماله كل يوم بتحكى حاجات متتحكيش ونت مليان بلاوى
وبرامج بتروج للمشاكل اكتر ما بتحل وحاجات كتير متتعدش
اعتقد ان الموضوع مش فى الراجل بس لا ده فى الست كمان والبيت والمجتمع وممكن تقولى كمان الهوا اللى بنتنفسه :)
الموضوع كبيييييييييير وللاسف محدش بيرضى يعترف بغلطه

ذكري رحيل قلم يقول...

السلام عليكم
ازيم يا منوشة

عندك حق يا قمر
الحضن دة هو المناعة النفسية للطفل ضد الخطر

هو اللي بيحسسنا بالمان
وكمان حال البنات زي حال الشباب زي ما فيه الخير فيه الشر ومتنسيش بردة الشيشة عامل مشترك وعيني عينك
والماظر الخليعة ومدونات المثليات
يا ختي حاجة قرف

دمتي

شمس النهار يقول...

الرجوع للدين والتربية

والفضيلة

الام تربي بنتها صح

وماتسمحش لها تعمل اللي هي عيزاة كده علي الاطلاق

الولد يحافظ علي اختة واخت صاحبة وبنات الجيران

والولد علشان يفسد عايز بنت فاسدة يفسد معاها

وصدقيني غلط ان البنت اللي وصفطيها دي هي اللي بتتجوز

الشاب الشرقي لما يجي يتجوز بيتجوز البنت المتربية الحشمة

البوست قوي وعايز يترد علي نقاط كتير فيه ببوست

::))

سلامي

نهر الحب يقول...

بوست موضوعى جدا
وبه الكثير من الحقائق التى نحاول تجاهلها او غض الطفر عنه لعدم قدرتنا على حل المشكلة من جذورها وهى ان نربى صح وبطريقة سوية واخلاقية
فنرتقى بأطفالنا وحياتنا كلها


تحياتى لك واحترامى مدونة جميلة