الأربعاء، 1 يونيو 2011

مين اللي بيبيع الضمير.. ويشتري بيه الدمار؟؟؟

بالنسبة للمجلس العسكري

انا بمنتهى البساطة عاوزة اعرف انتماءاته الفكرية والسياسية ايه.. فرد فرد وعسكور عسكور.. من اول المشير لغاية اصغر لواء فيهم؟

ومش عايزة ننسى ابدا ايه سلطات المجلس العسكري
(مـــــادة 56)
يتولى المجلس الأعلى للقوات المسلحة إدارة شئون البلاد، ولـه فى سبيل ذلك مباشرة السلطات الآتية :
1ـ التشريع .
2ـ إقرار السياسة العامة للدولة والموازنة العامة ومراقبة تنفيذها .
3ـ تعيين الأعضاء المعينين فى مجلس الشعب .
4ـ دعوة مجلسى الشعب والشورى لانعقاد دورته العادية وفضها والدعوة لإجتماع غير عادى وفضه .
5ـ حق إصدار القوانين أو الاعتراض عليها .
6ـ تمثيل الدولة فى الداخل والخارج، وإبرام المعاهدات والاتفاقيات الدولية ، وتعتبر جزءاً من النظام القانونى فى الدولة.
7ـ تعيين رئيس مجلس الوزراء ونوابه والوزراء ونوابهم وإعفاؤهم من مناصبهم .
8ـ تعيين الموظفين المدنيين والعسكريين والممثلين السياسيين وعزلهم على الوجه المبين فى القانون، واعتماد ممثلى الدول الأجنبية السياسيين .
9ـ العفو عن العقوبة أو تخفيفها أما العفو الشامل فلا يكون إلا بقانون .
10ـ السلطات والاختصاصات الأخرى المقررة لرئيس الجمهورية بمقتضى القوانين واللوائح .
وللمجلس أن يفوض رئيسه أو أحد أعضائه فى أى من اختصاصاته .

وقالت الصناديق للمجلس العسكري نعمممممممممممممممممممممممممممممممم

بالنسبة للانتهاكات والتباطؤ والتواطؤ

وهقول ايه يعني جديد

هو انا مهما قلت هقدر اشرح دمعة ام مقهورة على ابنها المظلوم اللى اتسجن في محاكمة عسكرية علشان خرج يطالب بحق مصر؟

هو انا مهما قلت هقدر اشرح احساس بنت جسمها كله اتكشف واتعملها كشف عذرية علشان خرجت تطالب بحق مصر.. على ايدين الجنود اللى المفروض يحموها ويحمو عرضها؟

واللى هيجي يتكلم ويقولي هو في بنت محترمة تبات في الشارع او تحكي كلام زي ده حتى لو حصلها فعلا.. هقولة ايوة.. في بنات كده وارجل من ذكور كتير قوي فيكي يا بلد بتسيب بناتها يتهتك عرضها.. يابلد الذكر فيكي بيقف في عربية السيدات فى المترو ويجعر بعلو صوته ويقول الدكر يجي يخرجني من العربية

يا بلد البنت نزلت تطالب بحقك والذكور قاعدين في بيوتهم يتكلمو على شرف وعرض البنت دي

راجع اللينكات دي

الخبر على السي ان ان

انتهاكات المجلس العسكري

فيديو

فيديو من قناة سي ان ان

هقول ايه عن المصابين اللى مش لاقيين يتعالجو.. ومبارك بيتعالج على نفقة الدولة وبيتعالج كمان من الاكتئاب

هقول ايه عن أهالي الشهداء اللي بيتهددو؟

حد فيكو يقولي انا لو مكان حد من دول هعمل ايه والناس نسيتني ونسيت حقي؟؟؟

ياريت كل واحد فينا يبص في صور الناس دي.. وبعدين يقولى مين اللى بدمه حمى الثورة ومين اللي بقراراته بيضيعها

حد يقدر يصبر الست دي؟
حد يقدر يبص للست دي ويقولها ابنك حقه رجع؟
حد عنده الشجاعة يبص في عين الست دي ويقولها دلوقتي تقدري تاخدي عزا ابنك؟
(طبعا كلنا فاكرين العربية دي.. الى كانت بتمد قوات الشرطة بذخيرة بعد ما نفذت الذخيرة بتاعتها)
(وطبعا كلنا فاكرين الامن المركزي وبعض ظباط الجيش اللى سحلو شبابنا قدامسفارة الكيان الصهيوني)
****************
نقطة ومن أول السطر
*
(هو ده الجيش اللى ايد واحدة مع الشعب)
(هو ده الجيش اللي ايد واحدة مع الشعب)
(هو ده الجيش اللى ايد واحدة مع الشعب.. وبالمناسبة ياترى الراجل ده فين؟؟ اللى مظهرش على الجزيرة ولا اعرف اسمه للأسف)
وفي النهاية هننتصر.. تبيعو ضميركو.. تعيشونا في دمار بردو هننتصر.. بإذن الله هننتصر.. ده وعد الله للحق انه ينتصر.. والحق معانا مش مع اللى بيبيع الضمير ويشتري بيه الدمار
والله الموفق
منوووش

4 اللي عبروا منوووشة:

Tears يقول...

سنة 52 الجيش عمل انقلاب و فى نفس الوقت او بعدها على طول الناس انضمت فبقت ثورة و بالتالى حصل تغيير فعلا

دلوقتى الشعب عمل ثورة بس الجيش لسه هو نفس القيادات القديمة و حزء من النظام اللى ثورنا ضده و دلوقتى بقى بيحكمنا و بالتالى عمره ما يقدر يعبر عن ارادتنا

الثورة محتاجة جناحيين...احنا جناح واحد و التانى مكسور

شمس النهار يقول...

البوووووووووست جامد جامد

وخصوصا انك جيبتي نص الدستور اللي يخص المجلس العسكري
بس في حاجة
الصورة نمرة اتنين دي ليها قصة غريبة حبتين
هحكيهالك
كنا بنزور الجرحي في القصر العيني وطبعا حالتهم كانت مزرية كل اتنين علي سرير وبزوارهم
طبعا مادول الجرحي الغلابة
المهم فااااااااجأة وعلي حين غرة بعد ماكنا بنتخانق مع التمرجي يديهم بطانية لاقينا نفس التمرجي داخل ومعاه بطاطين جديدة وملاايات نضيفة ومخدات لييييييييه؟
اصل التلفزيون جاي يصور
قلنا لاااااااااا
ياالتليفزيون يصور كده يابلاش ووقفنالهم زي العقلة في الزور
اوم ايه لما مشينا وافتكرنا اننا نجحنا همه راهحوا لهم تاني يوم بدري جدااااااااااا
وعملوا اللي في نفسهم والفديوهات والصور تحسي ان المريض من جرحي سويسرا اسكت انا بقا نوووووو
رحت عاملة بوست هنا وعلي الفيس وفضحتهم علشان نفس المريض انا مسجلة معاه ورافعة الفيديو علي اليوتيوب
وده كان برنامج 48 ساعة بتاع سي سيد وست هناء
http://www.youtube.com/watch?v=pkBJWuWWDr8
=========
http://www.youtube.com/watch?v=SNCKVtNdUqM
دول لينكين لحوارتي هناك ابقي شوفي الباقي همه 25 حوار

غير معرف يقول...

زي ماقلتي هنفضل على العهد مع الشهداء والمصابين ومش هنسيب حقهم ابدا ..

واي حد هيحاول يستهبلنا مش هيقدر ..

واي حد هيقف او وقف جنبنا برضو مش هننسهاله

تامر علي يقول...

المعادلة صعبة جداً .. تباطوء وأخطاء المجلس الجيش تتزايد وفي نفس الوقت الصدام معه مكلف لدرجة باهظة والشعب لسه مش قادر يوحد كلمته ويحشد نفسه للضغط على المجلس العسكري بشكل سلمي منظم

معادلة تبحث عن حلول عاجله