الاثنين، 6 يونيو، 2011

اه يابلد العجايب كلنا فيكي خالد سعيد

النهاردة ذكرى سنة على وفاة خالد سعيد
في السنة اللى اتعذب فيها خالد سعيد حتى الموت
حصلت نفس الحكاية لسيد بلال
وغيرهم وغيرهم
وقامت ثورة.. مقدرش اقول بالظبط ثورة ضد ايه
***
قامت ضد مبارك؟
===========
طب ازاي وهو عايش في نعيم ومتحاسبش على جريمة الخيانة العظمى
***
قامت ضدحبيب العادلي؟
===============
طب ازاي واحنا من اربع شهور مشفناش خلقته في قفص الاتهام حتى
***
قامت ضد الظلم والتعذيب؟
================
طب ازاي ولسة من يومين سواق مات من التعذيب في قسم الشرطة
حتى لو كان مخالف.. حتى لو كان قليل الادب زي ما الداخلية بتقول
المفروض الشرطة تقدمه للعدالة مش للحانوتي
***********
ثورة؟
====
ايوة من اللي بيتحبس بعدها 9000 شاب بأحكام عسكرية دي
***
ثورة؟
====
ايوة من اللي مات فيها 1000 شهيد دي
واهاليهم قلوبهم محروقة
***
ثورة من اللي اتصاب فيها فوق الـ6000 مصاب.. من اللي فقدو عيونهم وأطرافهم دي
ومش لاقيين يتعالجو
ومبارك في مستشفى سبع نجوم في شرم الشيخ
والجابري المحبوس بتهمة قتل المتظاهرين اتنقل لمركز طبي متخصص
*********
واللي هرب هرب
واللى حرق الورق حرق
واللي بياخد افراج بياخد
واللي حول فلوسه حول
واللي بيقترض من البنك الدولي بيقترض
واللي بيمسك السلطة ويدي لنفسه سلطات مطلقة يمسك
واللى يقول الثوار بيقبضو بالدولار ويمارسو الفاحشة يقول
واللي يعمل لمتظاهرات كشف عذرية وهو المفروض بيحمي البلد يعمل
واللي يحول اي حد ينتقد المجلس العسكري للنيابة العسكرية يحول
***
*
***
انا آسفة اني أقول بعد مرور اكتر من اربع شهور على 25 يناير
اننا رجعنا لعصر صلاح نصر والقبضة الحديدية وما وراء الشمس
======================
والنهاردة تحبو تقولو ايه لخالد سعيد وكل ضحية تعذيب على يد الشرطة
وللشهداء وأهلهم والمصابين
المتفائلة ان شاء الله بيوم 23 يوليو القادم
منوووش

2 اللي عبروا منوووشة:

Beram ElMasry يقول...

ابنتي العزيزة منوش
ربنا يقبل دعاكي ويورينا يوم علي امل ان تنطفئ النار المشتعله في قلوبنا من ظلم هذا الفاسد
لك تحياتي والسلام واعتذر عن التوقف عن النشر لمده اسبوعين لما جد في حياتي من ظروف
سلام ولاسلام مع بني اسرائيل

Tears يقول...

معلش ح اعلق فى شىء مالوش علاقه بالموضوع

امبارح فى المصرى اليوم كان فيه مقال هام بعنوان رسالة للمجلس العسكرى للدكتور محمد ابو الغار و وجدت ضمن التعليقات تعليق رقم 21هذا

"ماتقوله يادكتور محمد نحلم به جميعا لكن مصيبة الثورة أن المجلس العسكرى به خمسة اعضاء ينتمون للفكر المتطرف

الشيخ د \مصطفى راشد استاذ شريعة وعضو إتحاد الكتاب الافريقى الاسيوى
خمسة افراد مراكز مهمة فى المجلس العسكرى تنتمى للفكر المتطرف ولدينا الادلة لمن يرغب"

بحثت على النت و فعلا لقيت ايميل و تليفون الشيخ و بعتله رسالة و رد بهذا النص

انا كنت عضو مسئول بالاخوان منذ 28 عاما واعرف خمسة اسماء داخل المجلس العسكرى تحتل مراكز مهمة بالمجلس كانت تنتمى للاخوان قبل دخول الكليات العسكرية وظلوا على علاقة بالاخوة سرا بعد تخرجهم وليس لدى مانع فى نشر هذا الكلام فنحن لانخشى الا الله
الشيخ د مصطفى راشد استاذ الشريعة وعضو اتحاد الكتاب الافريقى الاسيوى وعضو نقابة المحامين المصرية
"

و هنا بياناته
http://www.ahewar.org/m.asp?i=3699

ده معناه ان المجلس مش محايد و اصلا دى فضيحة ان فيهم اخوان و ممنوع عليهم الانضام لاى احزاب فمابالنا بتنظيم سرى

النقطة بقى ايه اللى المفروض يتعمل عشان الناس تعرف ده و تفهم ان ده سبب القوانيين اللى بيعملوها دى و تحالفهم معاهم...هل المفروض نرسل نطلب نسجل فيديو مع الشيخ و ننزلة على يوتيوب مثلا؟