الثلاثاء، 24 مارس، 2009

عبده أنزحة وتشفيدة زوفاش: الحلقة الثانية

ــــ
ــــ
أنا غيرتلكوا الصورة بتاعة المدونة اهو بناء على طلب الجماهير
يللا بقى اسيبكم مع عبدة وتشفدفد
عبده أنزحة وتشفيدة زوفاش (وقت مستقطع).
شخصيات الحلقة.
عبده أنزحة: البطل.
تشفيدة زوفاش: البطلة.
سكمنص شعللة: أخو تشفيدة.
حكشة ودعنى وانسى هواك: جار تشفيدة وزميلها فى الدراسة.
ريما اللئيمة: جارة تشفيدة وحكشة ومرسال الغرام ذات الخمسة أعوام.
أوشا: بردو متفرجة.
منوش: لا بقى انا هتدخل فى الموكف الحلقة دى.

بعد ما شرارة الحب بدأت واستمرت شوية وصل العصافير لنهاية المرحلة الاعدادية..
وكان عبده مشغول فى مراهقتة فى الغربة وتشفيدة كانت انوثتها تفنجرت..
وتميزت بشعبيتها وشخصيتها الاجتماعية كصديكة لكل الناس وشافت البنات قدامها بتعمل وتقندل وتصاحب وتخرج وتيجى.. وهى مش أقل منهم يعنى..
وبعدين هى عملت الواجب وزيادة مع سى عبده وكتبت اسمة فى ركن على السرير جنب اسمها فى انسجام وباللون الاحمر كمان.. ولكن تأتى الرياح بما لا تشتهى السفن ويظهر شرارة الحب حد تف عليها قشرة لب سوبر من النوع المفتخر وهو بيقزقز (نياهاههاهاهاهع.. ضحكة شريرة متقطعة)...
المهم تشفيدة كانت بتشغل نفسها بالمذاكرة وخصوصا دى اعدادية يا ناس يعنى مسألة ثانوية عامة أو صنايع وهى برستيجها لا يونكن يسمحلها ابدا بالصنايع ولا الزراعة حتى.. وانتظمت تشفيدة فى الدروس (سيبكوا من المذاكرة الوقتى خلونا فى الدروس) وكانت تذهب بانتظام وتعود سعيدة ومنشكحة كدة والبسمة من الودن للودن..
واختكم منوشا (اللى هى انا يعنى) الفار بيلعب فى عبها وحدثت نفسها قائلة...
منوش: الضحكة دى أكيد وراها إنَ وكان وأمسى وأضحى وبلاوى تانية كتير.
منوش بردو: يابنتى بلاش وسوسة وبعدين انتى مال اهلك اساسا.
منوش: لا دى بردو زى اختى ولازم افهمها لحسن دى عبيطة وممكن حد يضحك عليها (آل عبيطة آل.. ههيييء).
منوش بردو: انتى حرة يكش تولعى اعملى اللى انتى عايزاه.. ما انتى مخك صرمة قديمة اساسا.
المهم حضرت طقم الحنية واديتها رغى لغاية ما عرفت ان الدرس يشتمل واد مسبل بعيون تكنن (تجنن يعنى)..
وأتارية طلع الواد حكشة ودعنى وانسى هواك ابن الجيران..
وهوب تاك تيك شرارة حب تانية ولعت (اخربيت الولاعة اللى عمالة تولع الشرارة دى).. ودرس رااااااايح ودرس جاااااااى.. وهوب تاك تيك بوسطة غرام جت لتشفدفد فى الكشكول.. وكشكول رااااااايح وكشكول جاااااااى.. وهوب تاك تيك الكشاكيل دابت والمراسيل اتغيرت وتحولت من الكشاكيل لريما الئيمة اللى اتفطمت على النميمة.. وجواب راااااااايح وجواب جاااااااى.. وهوب تاك تيك محلاها خروجات الشلة فى الاعياد والهدايا وكل الاحبة اتنين اتنين والحب الحب.. الشوق الشوق.. وخروجة رااااااايحة وخروجة جااااااااية.. (متقلقوش مش هقول هوب تانى لحسن كدة انا اللى هيجيلى الهوبة يا ولاد).
المهم منوش بتسمع الكلام دة وتقولها يا تشفدفد لمي الدور لحسن كدة كفاية كدة تجريح.. وتشفدفد المستفصطائية نائحة عليها وتقول ما كل البنات بيعملوا كدة.. عاتشى.. خليكى فريش احنا فى رحلة.
ودخلت تشفيدة الثانوية العامة.. وأصبحت بأمور الزينة والمكياش مهتمة.. وتعلمت الضحكات الرنانة.. واتقنت الخطوات الفتانة.. وكيف تكون فى طلباتها زنانة.. وكيف تتحدث بصوت عذوب.. لتجعل القلوب تذوب.. وتقضى على ما فى الجيوب.. (الله يسامحك يا أمى ربيتى عساكر مش بنات).
الى ان اتى يوم.. لم تظهر فيه شمس ولا نجوم.. وكانت السماء ملبدة بالغيوم.. عندما علم سكمونص بالخبر المشئوم.. الا وهو خروج الواد حكشة مع اختة المصون.. فقرر ان يخبر والده فى اقرب ما يكون.. ليعطى اخته المهموز المضمون.. (وش بيغمز وضحكة شريرة قوى.. نياهاهاههها هااااااع).. علشان تبطل حركات الهبل والجنون.
قوم اييييييييه.. تشفيدة عرفت وقالت لاااااااااااااااااااااا انا متاخدش على خوانة كدة ابداااااااااااااا..
انا بقى هقول لبابا واللى يكون يكون.. ودخلت تشفدفد على باباها فى لحظة سكون.. وقالتلة بابا انا بحب حكشة ابن الجيران.. وباباها معرفش يقول ايه فضحك وقالها روحى يا بنت التيييييييييييييييييييت.. وخرجت من الحجرة واحساس الانشكاح يملأ تعبيرات وشها.. (ضاع عليك المهموز يا سكمونص.. بس معلش الجايات اكتر من الرايحات).
وطبعا حكاية تشفيدة وحكشة بقت عاتشى والأهل عارفين.. وأوشا ومنوشا مكنوش مقتنعين بالجوابات والمراسيل وعلشان منوش بتحب تشفيدة كانت كل شوية تقولها ما بلااااااااااش.. كلها سنة وللا اتنين وهتنسى الواد حكشة.. وهتتمنى تضربية بعصاية المقشة.. وتشفيدة ولا هى هنا.. بينما كانت أوشا مكتفية بالنصيحة فقط من بعيد لبعيد.
ومرت السنة ورا التانية.. وبقت تشفيدة فى سنة تانية.. وحست ان الدنيا غير الدنيا.. عبده مسافر.. وحكشة بيذاكر.. وتشفيدة مشاعرها بدأت تتقفل من ناحية حكشة وتحن لعبده..
وبحكم فترة المراهكة (المراهقة يعنى) تشفيدة كانت بتنجذب للجنس الأخر.. وطرف عين يوقع دة يدوبه.. ورمش يجرح دكهوة يقتله.. وبسمة تسحر دهوة تشنكله ( دة ودكهوة ودهوة ضحايا تشفيدة زوفاش من صنف الرجال).. وطبعا انتوا عارفين اختكم منوش الفضحية (اللى هى انا.. نياههاهع) مبتسكتش ابدااااااااااااا.. كنت باللمحة بشوف تشفدفد بتبص لمين وأعرفة فى ثانية.. وأطلقت على أحد الضحايا المكلبظين أبو عربية بيضا اسم بطيخة وكنت كل شوية انده على تشفدفد اول ما تطلع البلكونة اقولها بطيخاااااااااااا.. وكذلك الضحايا الاخرين عصعوص ومنحوس وحنتوس وفلتوس.
المهم تشفيدة زهقت وتصادف وقت بداية سنة تالتة ثانوى دخول تكنولوبيا الكمبيوطر الى منزلها وثورة الانترنت اللى هتقرب العصفور المسافر.. ولكن.. وآآآآه من كلمة لكن.. أن أن أأاااااااااااااااااااااااااااان....
تشفدفد كانت لسة مرتشبطة بحكشة رسميا والموضوع احتمال يدخل على خطوبة.. وتقع الطوبة فى المعطوبة.. وحكشة جيبة ميحتكمش حتى على طوبةٍ..
ياترى تعمل اييييييه!؟! ياترى تعمل ايييييييييييييييييه!؟!....
دة بقى اللى هنعرفة في الحلقة الجاية.

25 اللي عبروا منوووشة:

أبو العريف يقول...

الحق اول تعليق
وبعدين اقرا

أبو العريف يقول...

انا جييييييييييييييييييت
تاني

أبو العريف يقول...

منوووووش


مخنوقه ايه بس
دانت حكايه
المفرود البلوج يبقي اسمه
حكايات شهر زاد
وريمه اللئيمه ومشكاح
اسلوبك خرافه
بيفطس من الضحك

يا سلام علي الشراره اللي كل شويه تضرب دي
قصدي الولاعه
دمتي بكل خير

MaNoOoSh يقول...

أبو العريف

خلصت على أول 3 تعليقات
هههههههههههههه
ماشى يا سيدى المدوتة مدونتك وعلق براحتك
ايوة من كتر ما الولاعة بتضرب أنا خايفة لتولع فى المشاهدين
ههههههههههههههه

MǿиY El-Shreef يقول...

هههههههههههههههه

وربنا عسسسسسل هههههه ضحكت اوي اوي هنا

ودخلت تشفيدة الثانوية العامة.. وأصبحت بأمور الزينة والمكياش مهتمة.. وتعلمت الضحكات الرنانة.. واتقنت الخطوات الفتانة.. وكيف تكون فى طلباتها زنانة.. وكيف تتحدث بصوت عذوب.. لتجعل القلوب تذوب.. وتقضى على ما فى الجيوب

هههههههههه

بجد فنااااانه ف الكويديا يا منووش

تسلم ايدك يا حبيبتي

مستنيه الباقي ع احر من الجمر

و ع فكرة لو الخنقه كده انا نفسي اكون مخنوقه زيك :D

بس سؤال هو ايه صله القرابه بينك وبين زوفاااش :D

MaNoOoSh يقول...

MǿиY El-Shreef
تسلمى يا ثكر
وبعد الشر علينا من الخنقة
وبعدين بلاش الاسئلة المحرجة دى خللى الطابق مستور احسن
ههههههههههههههه

مسدس صغير يقول...

قصة روعة روعة.
ايه الجمال ده؟


المهم تشفيدة كانت بتشغل نفسها بالمذاكرة وخصوصا دى اعدادية يا ناس يعنى مسألة ثانوية عامة أو صنايع وهى برستيجها لا يونكن يسمحلها ابدا بالصنايع ولا الزراعة حتى..

مش بقولك روعة
هههههه
احييكى عليها

أمبارح كان عمرى عشرين!!! يقول...

ههههههههههههههههههههه
ضحك ملوش حل هههههههههه

أسلوبك جميل اووووى والكوميديا على أخرها :d

تسلم ايدك
ومتابع علشان لازم اعرف تشفيدة الأمورة هتعمل اية

سلااااااااااااام

biberss222 يقول...

جامده جدا و خطيره و عسسسسسل

انا افتتحت مدونه جديده يلا تعالى زورينا

إيمان يقول...

يخريبت خفة دمك
بجد اسلوبك تحفه ودمك شربات
انتى طلعتى حكايه والله العظيم
ماش يا ستى احنا قاعدين ملمومين حواليكى
بجد فطصت من الضوحك

MaNoOoSh يقول...

مسدس صغير
نورت يا باشا
وبعدين ايوة طبعا لا يونكن تقدر تشفيدة تتحمل زراعة وللا صنايع.. انت بتتريق على برستيشها وللا ايه
هههههههههههههههههه




أمبارح كان عمرى عشرين!!!
نورتنى
تسلم يا باشا.. وبعدين تشفيدة"أمورة" كايز بردو.. ينكن وانا معرفش
ههههههههههههه



biberss222
منور يا بيبرس
ومبروك على المدونة بس خللى بالك.. أعضاء جمعية المرأة المتوحشة بيدوروا عليك بعد البوست اللى انت كتبتة



إيمان
منورة يا منمن
ويارب البسمة تفضل علطول منورة وشك يا عثل

لجين أبو الدهب يقول...

هو تشفيدة ايه اللى حصلها بس ؟؟

ليه كل البوظان ده ..

ده انا قلت المرة دى الجواز يقوم يحصل كل ده :(

اخس عليكى ياتشفيدة ما كنش العشم ..

اسلوبك عسل يامنوش ياعسل ..

متابعاكى ..

david santos يقول...

Really great work!!!
Congratulations!!!
Happy Day!!!!

أحمـــــــــــــد أبو العلا يقول...

كده؟ ايه النداله ديه؟
ازاي يعني؟
يعني عبده ياعيني ملوش ديه
وتبدله بحكشه

صحيح ملهاش أمان

MaNoOoSh يقول...

لجين أبو الدهب
منورانى يا لوجى
تشفدفد لسة عندها تزعزع فى مشاعرها المتشئلطة
يعنى مش راسية على بر لسة
ههههههههههههه



david santos
thanks.. have a nice day
اى دونت سبيك عنجليزي
ههههههههههههه



أحمـــــــــــــد أبو العلا
منور يا بشمهندس
وبعدين يعنى انت مش صعبان عليك غير سي عبدة
امال المشاهدين اللى هيجيلهم شحار دول مش صعبانين عليك يعنى
ههههههههههههه

ستيته حسب الله الحمش يقول...

اعمل فيكي ايه
انتي نفوخك كارثة
ربنا يسامحك يا ماما ربيتي عساكر
ويسامح امي كمان ياختي

بقى تشفيدة زوفاش توقع البلاوي دول كلهم
وانتي فاضلة لينا كده مستنية الأسمراني

القصة تحفة
ياترى روح امها الحونينة عملت ايه بالكامبيوطر
مستنية

يــوم جــديد يقول...

ههههههههههههههههههه
يا نهارك أبيض
انتي بتجيبي الكلام ده منين
مش عارفة أبطل ضحك الله يسامحك

البوست بتاع الحمام دا كمان حكاية لوحده
أنا عندي نفس ذات الفيرجن دي
بس فكرة جامدة موت حكاية حافظوا على نظافة دورة المياه دي
مستنيين الحلقة القادمة يا سكرة

رئـيس التحـرير يقول...

السلام عليكم
الصراحة انا مش جاي النهاردة زيارة عادية أقرأ وأعلق لا أنا جي أدعوكي دعوة خاصة عشان تشاركي معانا في مجلة رؤية مصرية التي سيصدر عددها الأول يوم السبت الي هو بعد بكرة ده
من متابعتي لكي الفترة الي فاتت لقيت انك لازم تشاركي في المجلة ممكن تدخلي على المجلة وتشوفي الأقسام الي فيها هي متنوعة تختاري هتكتبي في ايه أو حتى لو عندك حاجة قريتيها عجبتك تنفع لأي قسم أو غرائب طرائف على زوقك بس تكون حاجة ذات قيمة وطبعا أنا متأكد من ذوقك وإلا مكنتش دعيتك للمجلة..أنا بفضل إنك تكتبي انتي بنفسك في أي موضوع ولو عندك حجات تفيد المجلة أنا موجود إقتراحات مشاركات رأي نقد حتى أكيد أنا موجود

معلش طولت مستني ردك

لينك المجلة
http://roayahmg.blogspot.com/
والميل بتاع المراسلة لو عندك مشاركة
ibrahemaladawy@gmail.com

مودتي

شفقة هانم واحسان بك يقول...

حلوة اوى اوى ودمك خفيف جدا بس مفيش اسماء اعقد واصعب من كده
ارحمينا بقى اتكلكع

MaNoOoSh يقول...

ستيته حسب الله الحمش
منورانى يا دكتورة يا مثكرة
ايوة ادينى قاعدة مستنية اهو يا ستوتة
عاااااااااااااااا
والكمبيوطر حكايتة حكااااااية




يــوم جــديد
نورتينى يا عثل
وطالما عندك نفس ذات الفيرجن نبقى شقيقات الكفاح
وياريت ينفع معاهم اى حاجة
ههههههههههههه
وانا كمان هستناكى الخلقة الجاية





رئـيس التحـرير
نورتنى يا ابراهيم
وطبعا هيسعدنى اشارك معاكم




شفقة هانم واحسان بك
نورتونى يا عثاثيل
والاسماء كدة فى الحونين.. هى لسة مش هتتكلكع قبل الحلقة الرابعة
ههههههههههههههه

تامر علي يقول...

تفيده دي مش هاتجيبها البر ولا حتى البحر ... وعلى رأي سلطان ...انتي بتلعبي بالنار يا سمارة .... الولاعه دي مش هاتفضى خالص شكلها :)

عاشقه الرومانسيه يقول...

ماشى ياستى
خلينا وراكى
لما نشوف اخرتها
والله يابنتى انا قلت انك لسعتى محدش صدقنى
منتظره الباقى يازلابيه

MaNoOoSh يقول...

تامر علي
الولاعة دى جاية متعبية جاز من جهنم والعياذ بالله
ههههههههههههههههههههههه
والله يا تامر اول تعليق يفطسنى من الضحك (انتى بتلعبى بالنار يا سمارة)



عاشقه الرومانسيه
ماشى يا عاشقة
انا بردو زحلانة منك ومخاثماكى
آل زلابية آل
انا بحب الرز بلبن بس على فكرة
ولو انتى فاكرة انى كدة لسعت
لااااااااااااااااا
زورونا الحلقة القادمة تجدو ما يسركم
هع هع هع

المعتصم يقول...

بسم الله الرحمن الرحيم
السلام عليكم ورحمة الله وبركاته
منوووووووش
تحياتى
انا قلت ابص بصه كده على اخبار تشفيده وعبده
وقعدت فتحت المدونة وابتديت اقرا
لقيت نفسى بقول لاااااا ماينفعش كده
روحت قايم
مغير هدوم الخروج اللى كنت لابسها ولابس لبس البيت وقاعد قدام المدونة قريت الحلقتين وهاتك ياضحك
يخرب بيت شيطانك يابنتى
ايه ده ؟؟ دا انتى طلعتى مجرمة حرب
وتقوليلى مخنوقه ومكتئبه ومش عارف ايه
انتى تنزلى الجزء التالت بتاع الكامبيوطر بسرعه انا بقولك اهه والا










برضو هفضل مستنى وادعى ربنا انك تنزليه
هههههههههههههه
تحياتى ودمتى بكل خير وود
والسلام عليكم ورحمة الله وبركاته

مها العباسى يقول...

اسلوب جميل جدا وفعلا ضحكت اوى