الثلاثاء، 31 مارس، 2009

عبده أنزحة وتشفيدة زوفاش: الحلقة الثالثة+تحديييييث

نحيط السادة قراء المدونة علما وننوه ان صاحبة المدونة منوش المخنوقة قد اصيبت بمرض الجدري المائى وهى شحطة كدة وكبيرة ومش هقولكم عندى كام سنة (علشان الحسد طبعا)
هههههههههههههههههههه
وكل دة بسبب ام جاهلة ربنا يسامحها اثر تواجدى مع ابنها المصاب طوال النهار (الهى يورينى فيها يوم من اللى الزمالك بيوريه لجمهوره)
وعلى كل ولله الحمد محدش فى بيتنا جاله الجدرى قبل كدة واللى يضايقنى ذنبة على جنبة وملوش عندى غير اغنية
بالأحضاااااااااااااااااااااااااان (ضحكات شريرة طويلة)
نياهاهاهاهاهاههههههههههاهاهاهاهاهاهاهاهههع
فأعذرونى اذا اتاخرت فى الرد على اى حد فيكم
لأنها ظروف قهرية والله
صباح الخير عليكم يا عثاثيل
الأول لازم اشكر كل اللى رفع من معنوياتى فى الموضوع الكئيب اللى فات أو دعالى دعوة جميلة
ومن قدم شىء بيداه التقاه.. وهنيالك يا فاعل الخير.. ايه دة انا هشحت عليا وللا ايه.
المهم
احب اطمنكم انى بحاول اقضى على الخنقة المهببة دى ورسمت قصة واحدة من الاتنين
وهقول لوالدى لحد هنا كويس قوى وانى مش ناوية ارسم غير لما نوفوخى ينئح عليا ويقولى ارسمى.
والحمد لله ان حالة الشحار المفسفس اضرارها ضئيلة حتى الآن (وش وارم شوية وعين مبئللة من العياط وشعر منكوش ومفعكش ـ طبيعى يعنى واحدة قعدت يومين متغسلش وشها تفتكروا هتسرح الفوعكيشة؟؟ ـ)
(غسلتة غسلتة متبرئليش وبعدين انا مبخافش)
انا بس حساسة شوية وأعصابى خفيفة ومبستحملش زعيق ولا صوت عالى ولا جو اللبش بتاع المشاكل دة
ندخل بقى على موضوعنا عدل
عصافير المحمودية.. يعنى الحب والحنية.. يعنى مييييييييييييييييييين؟؟؟
بتقولوا مين؟؟
معلش بقى برزل عليكم شوية (واحدة مجنونة اصلا هتعملولها ايه يعنى)
هتستحملونى وأمركم لله
عبده أنزحة وتشفيدة زوفاش (ويشهد البحر على عهود الهوى)
الشخصيات..
عبده أنزحة: البطل.
تشفيدة زوفاش: البطلة.
سكمنص شعللة: أخو تشفيدة الكبير.
طنط 1: مامة تشفدفد.
طنط2: خالة تشفدفد.
ديدو: أخو عبدة.
أوشا: أخت منوش.
منوش: قريبة تشفيدة وعبده.
حكشة ودعنى وانسى هواك: جار تشفيدة وزميلها فى الدراسة.
(أنا بحذركم ان الحلقة دى طويلة ومعاميك نفسوياتى هتدخل فيها كتير).
ــــــــــ
ــــــــــــــــــ
المهم.. ندخل فى الموضوع
فى تالتة ثانوي تشفدفد بدأت تحس ان الواد حكشة بيهدد برستيشها وزوفاشها فى المستقبل.. وخصوصا انها داخلة على كامعة (مش محتاجين افسرلكوا انها جامعة يعنى) وهتقابل من الشباب والبشر أصناف.. وبدأت تطنش حكشة شوية فى شوية وهى جواها احساس دفين ان اللى بتعملة دة هيطلع على جتتها أشكال وألوان.. وخصوصا ان حكشة كان طيب معاها قوي وبيتمنالها الرضى وكان بجد بيتعب فى المذاكرة علشان يدخل كلية كويسة لدرجة ان مامة تشفدفد بتقولها متخليهوش يعطلك عن المذاكرة.. أهو بيعطلك ويروح يذاكر هو. وطبعا كان الكمبيوطر اجتاح المنزل والنت اخترق المسافات.
والعصفورة اكيد بالتغيير مبهورة..
ويا عينى عليك يا عصفور الرومانسية.. يا روميو يابو الحنية لما تكلم عصفورتك تشفدفد وتقفل على نفسك الاوضة وتطرد اخواتك منها شر طردة (وآل خير اللهم اجعلة خير العصافير فى ثانوية عامة وكمان اخو تشفدفد كان فى ثانوية عامة). عبده كان مأخوذ بالاختراع اللى قرب منه عصفورته وهو فى الغربة.. كان بيسرح ويشوف صورتها فى الكتاب وأول ما ياخد باله من معادلات الكيمياء يقفل الكتاب ويستعد للنوم.. طول اليوم.. ويردد مثله المذموم.. ناااام وارتاح يأتيك النجاااااح.
وعبده قعد سنين مشغول.. بيتعلم الكلام المعسول.. وتشفدفد كان ليها منه نصيب الغول.
كلام العصافير نساه المذاكرة ونساه يبقى حنين مع اخواتة.. ونساه انه عليه واجبات فى البيت ونساه كل الدنيا.. مبقاش فى عقله غير العصفورة (وعصافير تانية كتير وحياتكم بس فى خياله).
وتشفيده بصراحة كانت بتتقطع من جواها.. عقلها متوول من الكلام الجميل.. وعايزة تخلع من حكشة.. وبتحلم بكلية الاستعلام علشان تبقى صوحفية.. وتظل دائما وأبدا تردد (دة انا حواليا كتشييييييييييييير.. تيرااا.. أرجوك اوعى تشغير) من أصدقاء وأقارب ومعارف وزملاء ونظرات كدة على الطياري بردو ميضرش.. لدرجة انها نصحت اختكم الغلبانة منوش ازاي توقعهم برمش عين (بصيلة وأول ما يبصلك ودى وشك النحية التانية أو بصى فى الأرض وأقعدى كدة لغاية ما تروشية وتطيريلة عكله)...
وكان شعوري وقتها......
خيالات وكلمات وأغنية تظل تطن فى أذنى...
ـ انزل من البيت راكبة التاكسى ـ
ـ لابسة قصير لابسة ماكسي (بفتحة مترين طبعا) ـ
ـ والكل يقول انتى الســـ (السافلة طبعا.. هنمشيها السافلة علشان الرقابة) ـ
ثم تأتى ضحكة ركيييييييييعة جدا.. ثم....
ـ ياحلاوة.. آآه.. ياحلاوة.. ياحلاوة.. آآه.. ياحلاوة ـ
ثم تنتابنى حالة من البلاهة المنغولية.. ثم انظر لنفسى فى المرآة وأظل أقول يا حلاوة ياحلاوة وأنا أرقص رقصة المجنونة يابا يابا ع المجنونة.
(ده منظري ساعتها.. قمر يا خواتشى قمرررر)
(آآآآآآآآآآآآآآآآآآآه يا قلبى يا كتاكت يللى معبى جواك وساكت) بغض النظر عن الأغنية أو البنت السـ ـ ـ ـافلة اللى بتغنيها.. فأنا مش بشبه تشفدفد بالسيدة المطرشة ملك.. أبدا لكن كان احساسى بعد القعدة مع تشفدفد هو نفس احساسى لما بسمع أغنية يا حلاوة ياحلاوة فى الفترة دى من حياة تشفيدة زوفاش.
المهم...
خلصت تالتة ثانوي وحكشة جاب مجموع عالى وكويس بس معرفش يدخل بردو غير كلية تجارة.. وتشفدفد دخلت ما يشابه المعهد وسكمونس كان معاها فى نفس المعهد.. وبمجرد ظهور النتيجة أخد حكشة الكارت الأحمر وتقرر خروجه النوهائى من ملاعب قلب تشفيده.
أما سي عبده..
فمقولكومش على سى عبده.. جاب مجموع (من جوة يعه يعه ومن برة يعه يعه بردو) بس على الاقل كان يدخله كلية أبو قردان المنيلة أو حتى معهد تكنولوبيا الكمبيوطر وهو كان شاطر فى المجال دة.. ومامتة ومنوش وأوشا قالولة ادخل معهد التكنولوبيا مش هتندم.
ولكن.. وآآآآآآآآه منها كلمة لكن.. الجرع سلم ودنة لتشفدفد زوفاش وناس قرايبها..(يا سي عبده مش مشكلة أبو قردان أبو قردان بس أهي اسمها كلية ويبقى اسمك متخرج من كلييييييه مش معهد)
وبعد ما الناس اتهد حيلها فى تقديم الورق للمعهد رجع سي عبدة قال يا ابو قردان يابلاش.. وبصراحة اختكم كانت هتتدبس فى تحويل الورق لكلية أبو قردان بس عملت فيها عم العبيط ومرضيتش.. فقامت والدة تشفيدة بالتطوع فى تلك المسألة وارسال سكمونص لكايرو لتحويل الورق مع سي عبدة.. وطبعا أوشا علشان قلبها أحن من منوش شوية راحت هى المشوار دة. المهم سيبكوا من النفساويات اللى كنت هطق لو مقلتهاش دى.. خلينا نرجع للشرارة تانى..
اثناء كل الاحداث دى كانت الامور فى قلب تشفدفد لسة مستكنيصتش (ومحدش يسألنى يعنى ايه الكلمة المجعلصة دى لانى معرفش أساسا).. بس هى كانت حاسة براحة نفساوية انها قدامها اختيارات كتير (تقدر تنقى أجعصها شنب وتوقعة بغمزة واحدة) رغم ان موضوع المعهد دة كان نائح على زوفاشها قوى قوى بس كان أملها ان بعد سنتين لو جابت مجموع هتقدر تحول لكلية وزوفاشها يخف ويرجع تانى أحسن من الأول.
وخلصت حوارات التقديم للجامعات.. وكانت فى نفس الفترة دى أوشا ومنوش بيمروا بأصعب ظروف فى حياتهم.. ومن خوفهم دايما على تشفيدة وحبهم ليها أفتكروا انها اختهم التالتة.. وفى اخر الاجازة منوش ومامتها مكنوش قادرين يتحملوا الضغط وعلشان منوش صعبت على مامتها قالتلها تعالى نروح نغير جو فى أي مصيف.. وكمان تيجى معانا اسرة تشفدفد وخالتها..
وطلعنا على البحر وديدو العثل جة معانا.. بس كانت أول مرة فى حياتى الظروف متخليش أوشا تبقى معانا.. وكانت فى أزمة لوحدها.. يعنى حالتى بالبلاء والبلا.. بس ما علينا.
تشفدفد كانت وقتها فيييييييييييييين!؟؟؟؟؟؟؟؟؟؟؟!.. تشفدفد سابت الكون.. وتحامقت بجنون.. ونزلت الى الطريق.. مع ديدو الرقيق.. لتركب التروسكل الخطير.. وتطلق من الخوف صيحات الجعير.. وركبت التروسكل وراء ديدو فى حماقة.. بلا أى اعتبار ولا لياقة.. وأثارت حنق الجميع.. من الشيخ الى الرضيع.. كما ارتدت الملابس الكاشفة.. غير نادمة أوآسفة.. ووضعت من الألوان فى وجهها أشكال وأصناف.. بمنتهى قلة الذوق والإسفاف.. ولم تضع اى اعتبار ولا حساب.. لأي أصول أو عتاب.. حتى اتى يوووم.. كان أسوأ من الجمر المحموم.. حين اتى عبده مع باقى الأسرة.. ولم تحلو أى سهرة.. سوى لعصافير الحب.. الذين انفردوا وحدهم وتركوني فى كرب.. ولم يأتى من ورائهم سوى تعب القلب.
عبدة جه يوم واحد بس مع سكمونص من الفجر.. ومن الفجر لغاية ما النور اختفى وعصافير المحمودية قاعدين لوحدهم فى المية بيكتبوا عهود الهوى (ويشهد البحر على عهود الهوى).. واختكم دمها سخن وخالة تشفدفد عمالة تشعلل فيا اكتر وتقوللى ينفع الكلام دة!!!.. دة ميصحش!!!.. طب الناس تقول ايه!!!.. دول معندهمش دم!!!.. دة حتى المية وحشة النهاردة والموج عالى!!!.. ولما خرج العصافير من المية.. كانت وجوههم من الملح كأنهم واكلين خمسين لكمية.. ولما قلتلهم الملح وررم جتتكوا ووشكم.. وبعدين الانفراد دة كله كتير..
قالولى دة حتى البحر النهاردة ختشييييييييييير.. فمسكت نفسى وعدى اليوم لحد هنا على خير.. وقرر الكل يخرج في جمع غفير.. ووصلنا لنصف الطريق.. وحسيت ان حد ضربنى بمنجنيق.. طنط 1 وطنط2 فى جنب, وسكمونص وباباه والأطفال فى جنب, وعصافير المحمودية فى دنيا غير الدنيا.. ولقيت نفسى عاملة زى النخلة اليتيمة فى الصحرا.. ومقدرتش امسك نفسى ورحت كلمت أوشا وانهرت من العياط.. وقتها بس عرفت أنا ايه بالنسبة لتشفيدة (طبعا ولا حاجة).
( كفاية عليكوا نفسويات كدة)...
عبدة وتشفدفد صارحوا بعض بالحب المكنون.. واللى عايز يمشيها مجنون مش هقولة لأ.. (ضحكة شريرة نييياههههاهاهاهع).. واتفق العصافير ان قدامهم مستقبل خطيييييييير.. وقعدوا يرسموا فى المية احتمالات المستقبل ده.
ياترى ايه هي!؟!.. يا ترى اييييييييييييييه هي؟
دة اللى هنعرفة بقى فى الحلقة الجاية.

26 اللي عبروا منوووشة:

مسدس صغير يقول...

عبدة جه يوم واحد بس مع سكمونص من الفجر.. ومن الفجر لغاية ما النور اختفى وعصافير المحمودية قاعدين لوحدهم فى المية بيكتبوا عهود الهوى (ويشهد البحر على عهود الهوى).. واختكم دمها سخن وخالة تشفدفد عمالة تشعلل فيا اكتر وتقوللى ينفع الكلام دة!!!.. دة ميصحش!!!..


هههههههههه
بجد تشفيده وسكمنص والمحمودية وطنط 1 طنط2 كفاية الاسماء دى
قصة ولا اروع
احييكى على انتقاء المفردات.
تقبلى مرورى

MǿиY El-Shreef يقول...

هههههههههههههه

وربنا انتي حتة شربات

كل ده ومخنوقه .. امال لو كان دمك صافي كنتي عملتي فينا ايه

موتينا ضوحك :D

حمستيني والله .. عايزه اعرف ايه الي هيحصل بعد كده

مش تتأخري يامنوش يلاااا

ستيته حسب الله الحمش يقول...

هههههههههههههههههههههههههههه

الحقيقة عبدو انزحه بتاع كلية القطن اللي ها يطلع دودة قد الدنيا
يستاهل تماما تشفيدة زوفاش بتاعة معهد اديني سنتين وجوزيني والنبي يا امه
ههههههههههههههههههههههههه

كملي كملي

بس ملحوظة على جنب
الاتنين اللي خللوا في المية وبقوا ملوحة دول محدش قال لهم اخرج يا خرنج منك ليها من المية ليه
عندكم نقص شباشب؟؟؟؟؟؟؟؟؟؟؟؟؟؟

mohamed يقول...

ههههههههههههههههههههههههههههههههههههه:D:D:D:D

المعتصم يقول...

بسم الله الرحمن الرحيم
السلام عليكم ورحمة الله وبركاته
منوووووووووووش
تحياتى
ايه الابداع ده
ايه الحلاوة دى
ايه العيال البايظة دى
لالالالالالالالالالالالا
انتى لازم ماتسكتيش
لازم تاخدى موقف (خديه وشيليه علشان انا سمعت انه هيغلى)
هههههههههههههههههههه
ربنا يسعدك ويضحكك كده على طول زى مابتسعدينا وتضحكينا
مستنى باقى الليلة دى لما اشوف اخرتهم فين
هههههههههههههه
تحياتى ودمتى بكل خير وود
والسلام عليكم ورحمة الله وبركاته

biberss222 يقول...

هههههههههههههههههههههه

البحر ولع يا مانوش

ازاى تسكتى على الحريقه دى

و الكمبيوطر عندى شاط من سخونه القصه

اكملى اكملى ربنا يستر

MǿиY El-Shreef يقول...

منووو

انا حطيت دي عندي ف المدونه

http://i659.photobucket.com/albums/uu316/mony-the_cicker007/manoosh.gif

عشان القصه تحفه بجد

وقلت اديهالك تحطيها عندك كاعلان يعني (فيس مكسوف)

أبو العريف يقول...

ههههههههههههههههههه
مين دا يا حجه
شهرزاد
ايه الالوب الجامد ده
بصراحه الواحد بيستكنيس
اول ما ييجي هنا

اسلوبك خرافه

أحمـــــــــــــد أبو العلا يقول...

ايه السجع ده
هههه

كلامك وطريقه ألقائك للقصه راااااااااائع

تامر علي يقول...

القصة مليانة إثارة وتشويق وعواطف جياشة لدرجة إني بتخيل نفسي البطل عبده انزحة وتقمصت شخصيته :)

اسلوب جميل وشيق وفي انتظار الباقي :)

لجين أبو الدهب يقول...

تشفيدة دة فظييييييييعة ..

لها قدرة على التبديل والتحكم فى قلبها تحسد عليها ..

ربنا بس يسترها معاها للاخر ..

متابعة معاكِ حبيبتى ..

طريقتك عسل اخر حاجة ..

خطي تائهة يقول...

اضحك الله سنك يا قمر هههههههههههههههههههه
بجد انتي موهوبة جدااااا
وضحكت علي الاسلوب الرائع بتاعك
ربنا يكرمك ويسعدك :)

أبو العريف يقول...

منوش
ليكي مني تاج هديه
اوعي ترفضيه

ازعل
وانا زعلي وحش
فيه تهديد ليكي في المدونه عندي

MǿиY El-Shreef يقول...
أزال المؤلف هذا التعليق.
MǿиY El-Shreef يقول...

ايه ده ايه ده

الف الف سلااااااااامه يامنوش

بعد الشر عنك

يااارب تقومي بالسلامه

Bondoka يقول...

هههههههههههههه
يابنت الايه
بتفطسينى من الضحك

ليكى عندى تاج بعد اليوميات الفظيعه دى

المعتصم يقول...

بسم الله الرحمن الرحيم
ياخراااااااااااااااااابى
يالهووووووووووووووووووى
حسدوكى ياصغيرة
حسدوكى ياكميلة
حسدوكى ياحلوة
النبى انتى محسوده
ههههههههههههههههههههههههه
جدرى مائى
هو فيه حد بعد الاربعين بيجيله جدرى مائى برضو
دى اعراض الشيخوخه بس انتى مش عاوزة تقولى
ههههههههههههههههههههههههه
(اوعى تزعلى انا بهزر)
ربنا يعجلك الشفا يارب
تحياتى ودمتى بكل خير وود
والسلام عليكم ورحمة الله وبركاته

عاشقه الرومانسيه يقول...

اولا طبعا
الف الف سلامه عليكى
زعلت علشانك جدا
ربنا يشفيكى
خلاص؟ خلصنا طقم الحنيه
نيجى بقى للزعيق والضرب
انا مش قلت قبل كده قصرى البوست شويه؟
يابنتى انا باتوهه وانا تايهه اصلا
ارحمينى حرام عليكى

ملحوظه رفيعه
انا مش بحب اقرا بوستات طويله الا عندك وعند ستيته ياريت بقى ترحمينى وتقصرى البوست شويه

بحبك

biberss222 يقول...

الف الف سلامه يا مانووش
بلاش هرش كتييير بقي علشان ما يكترش انتى اتحسدتى و لا ايه
تشفيده ليها علاقه بالموضوع و لا ايه
عموما الف سلامه عليكى يا جميل

لجين أبو الدهب يقول...

منوووووووووشة حبيبتى ..

ألف سلامة ياجميل ..

وما تغيبيش علينا ..

شباك موارب يقول...

الف سلامه عليكي يارب
معليشي بس ان شاء الله مش هيطول
بس خلي بالك جدا لو حد في البيت ماجالوش قبل كدا احتمال كبير اوي ياخده
وكمان لو عندكم عيال صغيره ابعدي عنهم عشان مناعتهم ضعيفه

والف سلامه مره تانيه

تحياتي/شباك موارب

تامر علي يقول...

الجديري المائي ده حاجه بسيطة ... بس متاكليش ولا كافيار ولا سيمون فيميه لمدة 3 أيام وكل حاجه هاتتظبط :)

أمبارح كان عمرى عشرين!!! يقول...

اولا الف سلامة عليكى وان شاء الله تبقى تمام
________________

بعد كدة بقى لازم اعترف انك ملكيش حل هههههههههههه
بجد دمك خفيف بطريقه مش معقوله
انا كنت داخل المدونةوالله وانا مودى فى التعبان اوى ضحكت ضحك مضحكتوش من اسبوعين :D

تسلم ايدك
بس انتى شكلك بتبدعى وانتى تعبانة مش عارف بقى ادعى اقول ايه :D
ربنا يشفيكى وتقومى على خير


سلاااااااام

MaNoOoSh يقول...

مسدس صغير
تسلم ياباشا
واستنى لسة اسامى الحلقة القادمة

------------------------------------


MǿиY El-Shreef
تسلمى يا مونى يا عثل على سؤالك وتسلم ايدك على الاعلان اللذيذ جدا دة
وان شاء الله ربنا يشفينى ويوقع فى ايدي الظالمة الجبااااااااارة اللى عملت فيا العملة دى
عااااااااااااااااااااااااااا

----------------------------------

ستيته حسب الله الحمش
ستوتة العثل
معهد سنتين؟
توء توء توء توء
انتى كدة بتخلتشى فى برستيشها يا ستوتة
اما بقى بالنوسبة لموضوع الشباشب دة فيظهر ان الموضة بقت صنادل

-----------------------

mohamed
نورتنى

---------------------

المعتصم
انت بتتكلم جد؟؟؟؟؟؟ المواقف هتغلى؟؟؟
لاااااااااااااااااااااا
شيخوخة ايه بس يا معتصم..
تكونش ازمة منتصف الطريق وانا معرفش
ربنا يستر ومتشوهش بقى
عاااااااااااااااااااااااااا

---------------------------------

biberss222
مش البحر اللى ولع يا بيبرس دة انا اللى كنت بولع
ويظهر تشفيدة لعنتها حلت عليا وجتتى هى كمان بتولع
عاااااااااااااااااااااااااا
وبعدين هو بينتشر لوحد مش محتاج هرش اساسا
وكمان عااااااااااااااااااااااااا

------------------------------------

أبو العريف
طيب بما انك بتستكنيص لما تيجى هنا
اعمل فيا ثواب وقوللى يعنى ايه الكلمة المجعلصة دى
هههههههههههههههههههه

واما بالنوسبة لموضوع التهديد دة
فكنت قوللى هجيبلك تشفيدة زيارة.. كنت هقر واعترف بكل حاجى علطول
----------------------------------

أحمـــــــــــــد أبو العلا
تسلم يا بشمهندس.. كلك ذوق والله

---------------------------------

تامر علي
بتتخيل نفسك البطل!!! اوعى لحسن ازعل منك
وبعدين مين سيمون فيليه دة؟؟؟؟
اوعى تكون شتيمة
ههههههههه

------------------------------

لجين أبو الدهب
تسلمى يا لوجى يا عثل

-----------------------------

خطي تائهة
تسلمى يا ثكر ونورتينى

------------------------------
Bondoka
تسلمى يا عثل ومن عيونى هحل التاج فور انتهاء عبدة وتشفدفد

----------------------------

MaNoOoSh يقول...

عاشقه الرومانسيه
الله يسلمك يا قمر وانا والله بحاول اقصر البوستات بس هى اللى مش راضية تكش

-----------------------------

شباك موارب
نورتينى يا قمر
واخد بالى ايه بس
دة انا نفسى انتقم منهم واطلع الشر اللى جوايا شوية
ههههههههههههه

---------------------------------

أمبارح كان عمرى عشرين!!!
الله يسلمك يا محمود
ويارب الضحكة متفارقش وشك
بس الله يخليك يا خويا ادعيلى اخلص من حالة الجرب اللى انا فيها دى
هم سموة جدرى ليه؟؟ ما كانوا سموه جرب متنكر احسن
عااااااااااااااااااااااااا

----------------------------------

واخر حاجة يارب مكونش نسيت ارد على اى تعليق ولو نسيت سامحونى لاني قاعدة على الكمبيوطر وانا حالتى صعبة خالث مالث ياناس يا عثل
واللى لسة مزرتهوش هزورة فى اقرب فرصة
سلام مؤقت لغاية ما انزل الحلقة الجديدة من عبده وتشفدفد

biberss222 يقول...

ازى الصحه دلوقتى بعد ما اخدتى الدوا
الفسافيس قلت و لا لسه؟؟؟؟؟؟؟؟؟