الأحد، 5 أبريل، 2009

عبده أنزحة وتشفيدة زوفاش: الحلقة الرابعة

ازيكم جميعا...
طبعا انا قلتلكم فى البوست اللى فات ان جالى جدرى..
طبعا كل شىء بقدر ربنا...
بس انا فعلا هموت من الست اللى جابت ابنها من المدرسة على بيتنا عدل وهو عندة الجدرى ومقالتش الا وهى ماشية.. (لا دة جدرى مش حساسية.. ومبيجيش للكبار.. اهو جه ياام العريف).
"مع الاعتذار للأستاذ أبو العريف باشا طبعا"..
ولانها اهملت ابنها عدى اخواته.. وبتوديهم الدروس وعند الحلاق عادي جدااااااااا يعنى فعلا منها لله هو اللى هيجيبلى انا والناس اللى عمالة تعديهم حقنا
وأحب أطمنكم ان حالة الهرش قلت شوية وبعد ان كان منظرى هكذا

فقد اصبح منظرى هكذا

منك للى كل دراع مراتة ياللى فى بالى

عااااااااااااااااااااااااااااااااااا

المهم ندخل بقى على حلقتنا الرابعة
عبده أنزحة وتشفيدة زوفاش (يختشي شبابو حلو.. يختشى جمالو حلو)

الشخصيات..

عبده أنزحة: البطل.

تشفيدة زوفاش: البطلة.

سكمنص شعللة: أخو تشفيدة.

منوش: قريبة عبدة وتشفيدة.

أوشا: أخت منوش.

عكرمة: زميل تشفيدة فى الجامعة.

أبو طويلة: زميل تشفيدة فى الجامعة.

شيكو أنتيكو: زميل تشفيدة فى الجامعة.

ممتوح شخاليل: زميل تشفيدة بردو.

معلش للى بيتعبوا من المواضيع الطويلة والله انا بحط صور علشان اريح عنيكوا شوية وتاخدوا فاصل قصير.

اتفق العصافير فى المية على الحب والأيام الهنية.. والمشاعر المستخبية.. الله يرحم حكشة وبطيخاااااااا وحنتوس وفلتوس ومنحوس.. (دة مكنش ناقص الا عفركوش يا تشفيدة).. ولأنهم طبعا داخلين على كامعة.. فقرر العصافير انهم ميقفوش قدام مستقبل بعضيهم ويجربوا سنة يعيشوا حياتهم من غير ارتشيباط ولا خنقة.

وهام سي عبده فى كليه أبو قردان يسلف كشكول للقمورة دى.. ويساعد العسولة دى.. ويقف جنب الكتكوتة دى.. وينقذ السفروتة دي.. بس متظلمهوش يا ناس.. طب دة حتى كان بيقولى انا وأوشا انه ماشى على الطريق المستقيييييييم.. ومكانش مصاحب الا أولاد بس ومساعدتة للبنات دى علشان هو كان واد ذوق ذوق ذوق الثراحة يعنى.

فأما عن تشفدفد نقوووووووووول.. (دة احنا هنقول قوالة)

تشفدفد يا حينى راحت الكامعة اول يوم وهى حاطة بلاستر على مراخيرها (تقريبا اثر لكمية معتبرة من سكمونس.. نياهاهاهههههاع) وأكسبتها قطعة البلاستر شعبية بتنجانية جهنمية حيث أصبحت صديكة لكل الطلبة.. وسكمونس طبعا بقى واخد جنب.. ومن البيت للمحاضرة ومن المحاضرة للبيت (الواد اتفرس من اختة وعمايلها ومكنش عايز حد يعرف انهم اخوات اساسا).. والبت تشفدفد صاحبت من البشر أشكال وأصناف.. وكان عكرمة أول من صادفت من الزملاء (وطبعا معجب بيها وبطعامتها وبحلاوتها وبشقاوتها وبلذاذتها وكل حاكة فيها.. يختشى عليها وعلى حلاوتشها).. بس عكرمة كان الحقيقة ولد متدين شوية وكل شوية ينصحها تغير دهان السايبس اللى بتحط منه وتحاول توسع البناطيل وترفعها على وسطها شوية.. دة غير انه طلع ابن بنت خالة ابن عم جوز اخت بنت خال واحد صاحب باباها (يعنى من الاخر هيقرفها وكل تحركاتها هتوصلهم فى البيت وفضيحتها هتبقى دولى دولى) فقررت تحلقلة وتنفضلة بدرى بدرى بدرى.(طب دى حتى فى كامعة يا ناس وعايزة تعيش حياتها).

المهم معداش وقت طويل.. (ييجى ساعتين او تلاتة كدة).. الى ان قابلت تشفدفد الواد ابو طويلة.. قمر ياناس قمررررررررر وحتى شبة الواد المطرش دة اللى اسمة تامر اقرصنى بس على طشويل شويتين تلاتة كدة.. واعجبت تشفدفد بأبو طويلة قوى خالص موت أخر حاجة (يخراشتى علية وعلى تشقاتشيعة).. وخصوصا انه انكذ حياتها قبل كدة... حيث كانت تشفدفد ببتبص عكس الطريق وهى بتعدى والعربية الكارو ماشية فى طريقها عاتشى فالسوارس كانت هتصدمها قام ابو طويلة مسك ايدها وآل ايه بيعديييييييييييييييييييييها.. (ياراجل حرام عليك كنت سيبها وانقذ الحمار المسكين اللى كان هيجيلة تسمم لو كان اتخبط فيها).ولكن شاء القدر أن ابو طويلة يغلط ويلعب فى عداد عمره مرة لما قالها: على فكرة بويات سايبس اللى انتى بتحطيها دى فاتحة قوى على لون وشك.. مجربتيش تغيري قبل كدة وتستخدمى باكين!!!.. وطبعا الكلمتين دول جرحوا زوفاشها وبرستيشها.. (كيف يجرؤ هذا الحكير انه يهين برستيشها) وعليه فقد اخد كارت احمر واتفلسع.

وقابلت تشفيدة بعدها شيكو انتيكو وطبعا بعد التجربتشين المؤلمين اللى فاتو دول قررت انها تتقل على الناس بعد كدة.. لكن على مين دة شيكو يا جماعة.. ودخلت تشفدفد على شيكو تتقل شوية وتنعم شوية وكانت معذباه الثراحة خالث لدرجة انها مكنتش راضية تقولة آي لوف يو.. (آآآآآه يانا يا امة) والواد المثكين من كتر عذابة ادمن اغنية (الواد قلبة بيوجعوووووووو وعايز حد يدلعووووووووو).. ومن كتر ما سمعها لتشفدفد (طبعا هو بيسمع فى سماعة وهى فى سماعة.. سماعة حبنا يا خواتشى) صعب عليها وقررت تدلعة شوية وقالتلة آى لوف يو يا حياتشى.. ولكن.. وااااااااااااااااااآسفاه.. لم يمهل القدر وقتا لشيكو يتدلع ويتشخلع فيه بضمير.. فقد اصابه مس من الجنون.. حين قال لتشفيدة ابقى جربى باكين مرة.. اصل سايبس مش حلوة عليكى خالث يا حياتشى.وقد وقعت الكلمات كالصاعقة على اذن تشفدفد وجرحت زوفاشها فى مكتل فقررت تفلسع شيكو انتيكو.

بس الحق يقال كانت تشفيدة مبتخسرش حد حتى لو اتفلسع (متنسوش زوفاشها وبرستيشها والامتحانات ولازم تجيب تقدير وابقى افتكرنى بكلمة اخر السنة.. دة احنا اخوات وكدة يعنى).

وكان اخر من قابلتهم فى العام الأول هو ممتوح شخاليل.. كان مزغلل عنيها بمامى ودادى والحاجات والمحتاجات.. وعربيتى الفحلقى.. وتروسكلى المحمحى.. ومامى نفسها تشوفك من كتر ما بحكيلها عنك.. (متقلقوش مش هتوصل لدرجة انها تروح معاه وتطلع مامى مش موجودة ويشربها حاجة اصفرا). ممتوح كان داخل دماغ تشفدفد قوى وكانت بتتكلم عنه وهى مستكنيصة على الاخر..(ايوة هى نفس الكلمة المجعلصة بتاعة الحلقة اللى فاتت وبردو محدش يسألنى يعنى ايه علشان معرفش اساسا) ولكن لم يمهله القدر فرصة هو الاخر.. حيث انه تجرأ وتجاسر وقال لتشفدفد: هو انتى مبتستخدميش باكين ليه؟؟ اصل سايبس مش لونك خالث ياتشفدفد يا حياتشى.. وطبعا بعد ما بعزء زوفاشها ومرمطة كانت لازم تبقى دى نهايتة مع تشفدفد.وآل على رأى المثل.. اللى يشوف بوسى سمير ونجلا يقول فين أيامك يا هايفة انتى واليصا.

آآآآآآآآآآآآآآآه يا قلبى ياكتاكت.. خليك كدة افضل عبي جواك وانت ساكت.

وأما عن سر سايبس وباكين فما كان الا ان تشفدفد لما شافت حد بيستخدم سايبس ولونها حلو عليه مفرقتش بين لونها ولون الحد دة.

المهم...

تشفدفد فى وقتها كانت مسكفة مسكفة يعنى الصراحة.. وكانت استاذة فى المستفصطائية.. وعالمة فى الردود.. وضكطورة فى فرش الملاية.. (مع الاعتذار لكل صاحب لقب بجد).

فقد كانت طوال اليوم تنام.. وتفتح نصف جفن على رائحة الطعام.. وتنهض مع صوت الصحون.. والجميع يأكلون.. فتنهض من وسط الجمع.. لتنام كتمثال الشمع.. ولا تساعد أحد.. فتقوم أمها بكل الجهد.. وتظل طوال اليوم تقول من الألم آآآه.. فنغفل عنها لنجدها ترقص أمام المرآة.. وقد أخبرها حمار أنها تشبه أصالة.. فتظل تغنى بعلو حسها فى الصالة.. وتتلقى المكالمات الطوال.. فى سواد الليالي.. وعندما ينصحها أحد.. تقول: أنا زيي زي الولد.. فأقول لها بصراحة.. ان ردك لفي منتهى الوقاحة.. فعندما تستضيفون ضيوف.. من الوقاحة ان تنامى وتتحدثي كالخروف.. فجمال الفتاة أن يكون طبعها رقيق.. وليس ان تضع على وجهها كيلو دقيق.. ولا أن ترد بصوت البعير.. لتثبت أنها على حق كبير.

وكنت قررت قبل كدة ان اللى بينى وبين تشفدفد هيكون مجرد نصيحة لوجه الله مش أكتر.

فكنت أراها تقل أدبها مع أمها.. وأحاول ردها لعقلها.. فأكبس على نفسها.. حتى تقول من الألم جاااااااااي.. ويطلب منها والدي الشاي.. فتصنعه وهي متأففة.. وتقول كيف أصنع الشاي وأنا مُسكفة.. فأرد عليها وأقول اتوكسى يا موكوسة.. وانهضى لتطبخى الكوسة.. فلا تفعل شيئا أبدا.. ولنموت نحن كمدا.. فهى حبيبة أمها وأبوها.. وأوعوا تزعلوها.

وبس..

على كدة طول السنة الى أن انتهت الدراسة.. وجاء وقت المصيف والأجازة.. والمرة دى المصيف هيبقى تجمع عائلي.. يعنى دماغى هيجيلها حالة ترللللي..

تفتكروا ليييييييييييييييييييييييييه.. طبعا هنعرف الحلقة الجاية.

29 اللي عبروا منوووشة:

الأسمرني يقول...

والله زي العثل بس طولي شوية عشان أنا جالي حالة(ههئ)
ههههههههههههههههههههههههههههههههههههههههه متخدوش بالكم أصلي لسة شارب حاجة أصفرا وكمان المصطلحات اللي كتبتيها المرادي عاجباني قوي والصور كمان بصراحة يعني موضوع يجنن.

ستيته حسب الله الحمش يقول...

ألا قولي لي ياأوختشي
هو انتي اللي بترسمي الصور التحفة دي؟
الصور عسل عسل

وكان الله في عونك على عشرة تشفيدة زوفاش
دي قطر يامه وبدون محطات

اربعه فيي سنة واحده
لأ والله بت يعني ومحصلتش

كملي كملي
الا موش عاوزة اديكي عنوان مجرم قراري يعلم تشفيدة الإيحيرااااااااااااااام

متفهمنيش صح

الازهرى يقول...

انا تهت تهت تهت تهت
تهت كتييييير
ايه كل ده وكمان الصور تحفة جدا
بجد الموضوع جميل
والف سلامة من كل الامراض

MaNoOoSh يقول...

الأسمرني
تسلم يا اسمرانى يا عثل

---------------------------

ستيته حسب الله الحمش
الثراحة يعنى موش انا اللى برسم الصور بس بحب اعدل عليها واعمل فيها شوية حركات كدة

وبالنوسبة لموضوع المجرم القراري دة.. انا أفضل قاتل محترف علشان يتاوى جتة تشفيدة بعد ما يكتلها أحسن
شششششششششششششششششششششششششش
لحسن الحيطان ليها ودان

---------------------------

الازهرى
ايه اللى توهك بس ياباشا!!!
دة انا حتى كشكشت الحلقة النهاردة على قد ما اقدر
ههههههههههههه

لجين أبو الدهب يقول...

ياخرابى على تشفيدة وسنينها ..

جباااااارة ..

دى بتبدل فيهم زى الهدوم ..

بس فعلا شكل البوايات اللى بتستمعلها حاجة نيلة أخرحاجة مادام كله كانت فشل العلاقة بسبب البوية D:

متابعاكى ياجميل ..

وسلامتك الف سلامة ..

وما تتأخريش علينا ..

دمتِ بخير ..

إيمان يقول...

سلامتك من الجديرى
بصراحه انا كنت بقرا البوست وانا خايف اتعدى
بس افتكرت انه جالى قبل كده مرتين ربنا يستر
وكمان جه للولاد فمفيش مشكله
البوست تحففففففففففففففففه وأسلوبك اتحف
والصور مجرمه جدا
أما تفيده حبيبتنا نفسى أعرف هى مزعلاكى فى ايه
دى بتعيش جياتها وثابته فى مبدأها من حيث السايبس والباكين
عسسسسسسسسسسسسسل يا منوش
كملى يا حبيبتشى كملى
كلامك سكر والله

أمبارح كان عمرى عشرين!!! يقول...

هههههههههههههههههههههههههه
هههههههههههههههه
كا العادة حلقة تحفة
دمك خفيف بطريقة مش معقوله والله
انا حبيت تشفيدة خلاص وصعبت على كمان كل دى كبسات
دى لو صنم كان مات
بس ايه سر ان كلة بيكطع احساساتها الجوانية بموضوع دهانات باكين :D

الصور دى من رسمك ؟؟؟ صور جامدة اوووى وتشفيدة عسل اوى ههههههههه

سلام ومنتظرين نشوف حلقة المصيف

أمبارح كان عمرى عشرين!!! يقول...

نسيت اقول كمان
قابلى بقى التاج هو جاى فى الطريق :D

MaNoOoSh يقول...

لجين أبو الدهب
هم الشيباب بيروحوا ويجوا بالنسبالها لكن سايبس هى صديك المرأة المفضل
هههههههههههههههههههههه

------------------------------

إيمان
متخافيش يا ايمي الجدرى شكلة مستقنصدنى انا لوحدى.. يعنى جاي منشن عليا وعارف طريقة
وتشفدفد دى تزعلنى؟؟؟؟؟ فشر دى حبيبتشى.. طب دى حتى توأنى الملتصق
ههههههههههههههههههههه

------------------------------

أمبارح كان عمرى عشرين!!!
متقلقش.. تشفدفد مبيفرقش معاها الاوشاعات المغرضة الدنيئة اللى الشيباب دول بيطلعوها عليها.. هى ثابتة على مبدأ (سايبس سايبس يا شيباب.. بردو هيثبت بالهباب)
ههههههههههههههههههه
وتم استلام التاج ياباشا

-------------------------------

MǿиY El-Shreef يقول...

هههههههههههههه

يالهوي عليكي يامنوو

عليكي عقل كوميدي مالوش حل

دايما بتعجبني الحته الي فيها قفشات كده وسجع

تسلم اديكي

والف الف حمدلله ع سلامتك

ومستنيين الجديد ياحبي

مممممووووووواه

هارمونى يقول...

الحلقة جميلة جدا وعلى الرغم من معرفتى لأحداث القصة الا انى استمتعت جدا بالكتابه وباسلوبك الكوميدى الرائع وياريت تبقى تعملى قصه حياتى مسلسل أنا كمان اشمعى تفيده

MaNoOoSh يقول...

MǿиY El-Shreef
الله يسلمك يا قمر
ويارب الحلقات الجاية كمان تعجبك
ممممممممممواه

------------------------------------
هارمونى
صديقتى وتوأمى اللى مش راضية تعمل مدونة...
وفعلا انتى الوحيدة انتى واوشا اللى انا اكلت ودانهم بسبب تشفيدة وعمايلها
بس بعد كل التسييح دة عايزانى اكتب قصة حياتك انتى كمان
طب هكتبها بس على شرط... تعملى مدونة وتريحينى.. قلتى ايييييييييييييييييه؟

romansy يقول...

الف الف سلامه عليكى يا منوشه
انتى دمك زى العسل وشكلك عسل قوى وانتى تعبانه
انا بينى وبينك بح اسلوبك الساخر فى سرد قصه الاخ عبده وتشفيده هانم بس خدى بالك الحب ولع فى الده والحسد نازل على ودنه

تامر علي يقول...

ألف سلامة من الجديري وجميع الأمراض المستوطنة :)

تشفيده دي بنت واعيه وعارفة من أين تؤكل الكتف ...بس ياينها آخرتها هتكون زي فتكات ... الله يرحمك يا فتكات :)

أبو العريف يقول...

اولا الف سلامه عليكي
ايه هي حكايه الهرش دي مطوله
لو كده استخدمي ديشيتول

ثانيا
مين بقي ام العريف دي يا حجه
احنا هنلبخ في الكلام عيب

رابعا
هي الحاجه تشفيده مش راضيه تسمع الكلام ليه وتجرب باكين
دا حتي النقاشين بيشكرو فيها اوي
اسأليني انا

biberss222 يقول...

ايه الابداع الرهيب ده يا استاذه
الاحداث ساخنه و خايف عليكي من سخونتها
كفايه اللاوان الحمرا دي اللى ف وشك
الف سلامه يا رب تكون الفسافيس راحت
و ترجعى للونك الطبيعى ولاهاتديها سايبس برضه ههههههههههههههه

مسدس صغير يقول...

والله انتى كارثة
ايه القصص الجامده اخر حاجة دى
دى قصه نار
خيال ماشاء الله عليكى.
انتى تكتبى مسلسلات وافلام بس منصحكيش.
...
تشفدفد يا حينى راحت الكامعة اول يوم وهى حاطة بلاستر على مراخيرها (تقريبا اثر لكمية معتبرة من سكمونس.. نياهاهاهههههاع) وأكسبتها قطعة البلاستر شعبية بتنجانية جهنمية حيث أصبحت صديكة لكل الطلبة..
ههههههههههههه
مش بقولك كارثة.
احييكى على روعة وجمال البوست

MaNoOoSh يقول...

romansy
نورتني
وطبعا الرومانسيات المشتعلة دى قد تسبب لى الاحتراق فى النهاية
وربنا ما يوقع حد فى ايد تشفيده ولا سي عبده
هههههههههههههههه

-----------------------------

تامر علي
الله يسلمك يا استاذ تامر
انا بس مش عايزة احرق القصة بس تشفدفد هتتمنى مصير فتكات
(ضحكات شريرة طويلة ومتقطعة نياهاهاهههههاهاهاهههاهاهعهعهعهع هع)

--------------------------------------

أبو العريف
الله يسلمك
تم تصحيح الحاجات والمحتاجات وام العريفات
وانا والله قلت لتشفدفد ان باكين بنت ناس وهى لامونكن ابدا
وراسها والف سيف سايبس سايبس
يللا لما نشوف اخرتها ايه مع ست زيتوفاش هانم دى

----------------------------------

biberss222
الله يسلمك يا بيبرس
الحمد لله الهرش بدا يقل والفسافيس بتنشف اهى
وفعلا الاحداث جابتلى سخونية جامدة
بس عندا فى تشفدفد وغيظا فيها سايبس وباكين.. حلوين عليا الاتنين
احم احم.. شوية دلع من نفسى كدة.

-----------------------------------

مسدس صغير
تسلم ياباشا
وللأحداث بقية
بس سؤال.. متنصحنيش اكتب ليييييييييه؟

--------------------------

عاشقه الرومانسيه يقول...

هى ايه تشفيدة دى يااختى؟
عامله جمعيه وبتلم لها انفار؟
ايه الغلب ده؟
دى تقريبا حبت نص سكان مصر
ولما كلهم اجمعوا على ان سايبس مش حلوه يبقى مصره على باكين ليييييييييه؟

Tamer Diab يقول...

ما شاء الله علي تشيفدة دي
حبوبة وبتحب علي روحها تقريباً
نايس بوست يا افندم
اول زيارة ليا :)
تقبلي مروري
انا عارف متقبلاه :p

مـجـنـووون يقول...

ألف سلامه عليكي وان شاء الله الهرش ينتهي خالص ههههههههههههههههههههههههه


والله ينور علي الأسلوب الأكثر من رائع


تقبلي مروري
مجنووون

حسام غانم يقول...

سلامتك !!

MaNoOoSh يقول...

عاشقه الرومانسيه
تشفيدة مصرة على سايبس لانها مسالة مبدأ يا دودو
وبعدين الشيباب بيجوا ويروحوا لكن سايبس صديكة تشفيدة

-------------------------------

Tamer Diab
نورتنى يافندم
ومتقبلاه طبعا.. بس طب كنت تدى للواحد شوية ثكة فى نفسة كدة وللا حاجة
احم احم

------------------------------

مـجـنـووون
الحمد لله الهرش خف كتييييييييييييير عن الاول
نورتنى يافند

-------------------------------

حسام غانم
الله يسلمك يا باشا
نورتنى

biberss222 يقول...

فين سوفاج مختفيه ليه يا سوفاج

؟؟؟؟؟؟؟؟؟؟؟؟؟؟

أهلاويه طحن من يوم ماقولت وااااا يقول...

hhhhhhhhhhhhhhhhh
عسسسسسسسسسسسل عسل hhhhhhhhh
يا ختشتى قطع الحب وسنينه
بوست كميل خالص خالص
انا هقرا بقية المدونه شكلها تحفة
عايزة هدوء بقى والشباب تخرج برة علشان اقعد براحتى

بس ليه صورتك بنوته بتعيط مع ان المدونة دمها خفيف وجميله اوى

blue-wave يقول...

ههههههههههههههههههههههههههههههههههههههههههه
بقالى فترة ماضحكتش كدا
ربنا يكرمك بجد

شباك موارب يقول...

اولا الف الف سلامه عليكي
الموضوع معليشي بيطول شويه في الكبار
اهم حاجه لو في حبوب في وشك حطي عليها مرهم مضاد حيوي
ضروري ياقمر
تاني حاجه عاجبني اوي المواضيع بتاعتك
دمك عسل وشربات كمان...

تقبلي مروري
شباك موارب

بـسـمـــة صـــــلاح يقول...

عسسسسسسسسسسسسل يامنوش انا قريت نصه وهكمله بس مش دلوقتي ماما بتنادي وااااااااااااء
بس بجد عسوله اوي وانا اتبسطت بزيارتك وياريت تحكيلي عن جامعتك لان بجد بتمنى ادخل الجامعه دي واتخصص بقى وزاكون فنانه يانااااااااااااااااس
تقبلي مروري
مودتي(:

MaNoOoSh يقول...

biberss222
اهى نزلت خلاص يا بيبرس

-----------------------------------

أهلاويه طحن من يوم ماقولت وااااا
نورتيننى يا عثل
ويارب المدونة تعجبك
والبنوتة دى بحبها علشان عبيطة زيي وحساسة زيي

-------------------------------

blue-wave
منور يا د عمرو
ويارب البسمة ما تفارق وشك ابدا

---------------------------------

شباك موارب
نورتينى يا قمر
والحمد لله الجدري قرب يروح خالص

-------------------------------

بـسـمـــة صـــــلاح
نورتينى يا بسومة
وان شاء الله هعملك بوست مخصوص عن الكلية

----