الأربعاء، 29 أبريل، 2009

رأيت مسخاً.. ما أقبحه

انظر فى حياتك جيدا.. وفكر فى تلك القلوب الحانية التى عرفتها.. هل حقا اعطيتها قدرها وكنت بجانبها وقت الشدة؟..
بابا وماما..
ساعات زعلى منهم بيعمينى عن حبهم ليا ومبشوفش الا لحظات القسوة..
بس انا لو لفيت الدنيا فعلا مش هلاقى زيهم.. صحيح فيهم حاجات نفسى يغيروها فى نفسهم.. لكن مين فينا مش مليان نواقص وعيوب!!!.
بجد يا بابا انا اسفة انى مش قادرة اضحك فى وشك واقعد معاك زي زمان..
وأسفة يا امى على اى موقف زعلتك فيه أو مقدرتش احتويكي.
واتمنى ربنا يساعدنا ويرجع فى بيتنا المحبة والضحكة زى زمان.
أفكر لو أخذنى اليأس من بلادة مشاعر الأخرين.. وغرقت فى حزنى على نفسى ورثائى على حالى.. ترى الى اين ستأخذنى الرياح؟؟
فرأيت مسخاً.. وارتعبت من هول ما رأيت..
متى أصبحت ذلك الكائن عديم الشعور.. الذي لا يشعر بأحد سوي نفسه..
متى فقدت أذناي التي كنت استمع بهما لذلك الإنسان الحزين واجبر خاطره بكلمة..
متى فقدت عيناي التي كنت أري بهما دموعه وأحزانه..
ومتى فقدت يدي لمستها الحانية على كتفه المقوس وملامحه الكسيرة..
ومتى.. ومتى.. ومتى..
متى أصبحت ذلك الكائن المتبلد الأناني...
سيولد المسخ يوم أقرر أن أقول نفسي ثم نفسي ثم نفسي وفقط نفسي.. وليحترق الآخرون في الجحيم..
يوم يحترق الآخرون واسعد قليلا ثم اجدنى وحدي في الكون بلا حبيب ولا صديق يرشدني ويأخذ بيدي في ظلام الوجود.
حياة هشة تلك التي نعيشها لأنفسنا فقط.. تماما كتلك القصور التي نبنيها من الرمال فتأتي موجة واحدة صغيرة لتهدمها.. ونري ما صنعنا من أوهام بأنفسنا.. ومن خسرنا من قلوب طيبة..
فنبكي...
ولكن هل حقا نبكى على جرح من خسرناهم.. أم نبكي على أنفسنا وخسارتنا نحن؟؟؟
(دى لوحة الصرخة.. من اشهر واغلى اللوحات فى العالم.. من الفن التعبيري بعد الحرب العالمية التانية علطول.. للفنان النرويجي ادوارد مونش.. تمنها حوالى 80 مليون دولار.. بس اتسرقت من متحف مونش بالنرويج قريب ولسة مظهرتش)
تخيلوا لو كل واحد ربنا كرمه بقلب حنين اتصدم في بشر قليلة الأصل أو ملقاش حضن يترمي فيه لحظة وجع قال "وانا احس بالناس ليه واوجع دماغى بهمومهم.. منا فيا اللي مكفيني ويلا نفسي" الدنيا هيبقى شكلها عامل إيه؟؟؟
تخيلوا لما الدنيا تخسر شوية القلوب الحنينة اللي فاضلة وسطنا هيبقى شكلها عامل ازاى؟؟
هتبقى وحشة قوي قوي وماسخة.. دة احنا اصلا قادرين نعيش فى الدنيا برحمة ربنا والحنية اللى فى قلب الناس الطيبة اللى بنقابلهم فى طريقنا.

52 اللي عبروا منوووشة:

ادم المصرى يقول...

اوقات بنندم على اشياء قد نكون مدنهاش التقدير المناسب لها ونندم عليها

..
البكاء على الاشياء او الاشخاص الذين قد لا نعوض مثلهم شيئ ثمين فى حياتنا فلبكاء فى كلتا الحالتين

انا بجد مش عارف اعبر عن مدا اعجابى بهذا البوست الهائل بجد جمعتى كل شيئ وهذا قد يكون اجمل بوست رأيتو عندك فى كل ما مضى اهنيكى على فكرك العالى جدا

ستيته حسب الله الحمش يقول...

اولا لازم اعلق على لوحة مونش وخدت بالي من حاجتين
ان اسمه مونش قريب قوي من منوش
ثانيا العبط في نعيم بقى دي لوحة ب 80 مليون سبحان الله فعلا اصحاب العقول في راحة ولولا اختلاف الأذواق لما أغتنى الهطل

نيجي بقى للب الموضوع اللي هو الجنة من غير ناس ما تنداس
ولو ان الصدر الحنين بقى نادر
واللي يحب يواسي بقى نادر
واللي يحس بهموم الناس بقى نادر
بس برضه لسه عندنا أمل ودايما بندور على ناس
مش اي ناس
ناس مش خالية من الإحساس
ناس الطبطبة على جروح الناس في حياتهم أساس

ومش ها نبطل
ولا يمكن نتبلد
لأننا مش ها نفقد الناس
لأ ها نفقد انفسنا الغالية الجميلة اللي شبه الؤلؤ والألماظ

بوست راااااااااااااااائع
تسلم ايدك وحساكي قوي

MǿиY El-Shreef يقول...

والله يابنتي في لحظات كده الانسان غصب عنه بيقول كده

بس الطيب قلبه عمره مابيتحول لحاجه تاني

بيغضب شويتين ويرجع

وعمر ما الطيبه والحنيه والقلوب الطيبه تخلص طول مافي رحمة من ربنا

ولو كل قلوب الدنيا الطيبه خلصت كفايه قلبك ياجميل

كلامك بجد مؤثر اوي يا منوش

تسلم اديكي

..

ملحوظه ع جمب : انا بعتلك ميل

ضرووووووري بتاعك الياهو اوكي

mimi يقول...

اللوحة دي عندي و هطلب فيها مش أقل من خمستاشر جنية

Bant El7ag Dracula يقول...

عندك حق يا منوش والله

لما الدنيا عامله كدا ولسه فيها شويه قلوب كويسه

امال لما يختفه خالص ايه الا هيحص

ربك مووووجود

ويارب تخرجى ومن الحاله دى يارب

الشموع البيضاء يقول...

منوش ايه البوست الفظيع ده الكلام من جوة اووووى يامنوش وحسيت بيه اوى لانى فى الفترة الى فاتت كنت حاسه ومازلت ان الناس بقت قاسيه اوى على بعض وكمية الانانيه حتى الانانيه السلميه مش المؤذيه بقت زياده اوى
رغم ان كلامك صح الا ان الواحد بيفضل يتمنى وجود واحد ولا اتنين فى حياته يبقوا مصدر الحنان والتفهم والاحتواء ويحمد ربنا اوى انه لقاهم فى زمن زى ده
تحياااتى لكى

عاشقه الرومانسيه يقول...

لا استحق ان يولد من عاش لنفسه فقط

الكلمه دى نطت فى نوفوخى وانا بنقرا البوست بتاعك
تسلم ايدك ياام القلب الكبير
بحبك

قلب ارهقته الاحلام يقول...

بوست جمييييل جداً بجد يامننوش

ولكن للأسف لقد تحولنا وكل من حولنا الي مسوخ تهاجم فتنتزع القلب بلارحمة

تحياتي ياقمر,,,

koketa يقول...

عارفة يا منوش البوست ده جه فى وقته
جه فى وقت اناكنت محتاجة اقرا كلام زى ده

إيمان يقول...

جميل كلامك يا منوش كلام جميل قوى
بجد حسيت بيه
ومش قادره اعلق تعرفى ليه لان كلامك بجد فوقنى
وفكرنى بحاجات كانت بدأت تغيب عنى
بجد بوست راااااااااااااااااااااائع
تسلم ايدك ولو اى حاجه حلوه عملتها النهارده للناس اللى بحبه ان شاء الله هيكون ليكى نصيب فى حسناتها
بحبك يابت انتى
وبعدين ايه اللوحه الهبله ام 80 مليون دى
يعنى مع احترامى للفن التعبيرى
بس انا حاسه ان دى تعبيرى من غير فن

ABOALI يقول...

ربى انى انا الضعيف خلقتنى وتعرفى ضعفى
من يجمع شتات نفسى الا انت
من يعيد اليها سكونها الا انت
من يفرج كربى الا انت
من يقوينى الا انت
من يضئ حياتى الا انت
فيا من كتبت على نفسك الرحمة لا تطردنى منها واعف عنى



موضوع جميل له نظرة ثاقبة
وواقع نعيشه ونحياه
ولكننا نقع تحت وطأة اللامبالاه

تحياتى على طرحه
وان شاء الله لن نكون مسخ
بل انسان له ثوابت واصول
يعرف ان لها عنوان ومدلول

أمبارح كان عمرى عشرين يقول...

كلنا فى اوقات كتير اوى مش بنشوف غير نفسنا وبنسى الناس الابتتعب لتعبنا وبتفرح لفرحنا زى الأب والأم او اى انسان تانى
انا الايام بقيت احاول اشوف الميزة فى كل واحد وابعد عن عيوبه اصلنا من الاخر كلنا عيوب

والانسان الحنين الابتلاقيه فى وقت الشده معاكى وتحسى انك مسنوده على حاجه جامده مش ضهرك عريان زى ما بيتقال بقى نادر
ولوموجوده همسك فيه بأيدى وسنانى :D

اللوحه جامده اووى يا منوش وكمان كائيبه اوووى :D
وفلوسها حرام علشان كده اتسرقت

بوست جميل اووووووى يا منوش

مش عارفة الدنيا وخداني علي فين يقول...

منوش الشقية عاملة ايه؟
كلامك مؤثر جدا
انتي انسانة حساسة جدا و عندك شعور الحنية و العاطفية


ملحوظة انتي دبستيني في تاج المفروض انزلة
انا هاستسلم و ارفع الراية البيضاء خلاص
و هاعمله بس بعد الامتحانات ان شاء الله
دعواااااااااااتك

أحمـــــــــــــد أبو العلا يقول...

لو حصل ده مش هنبقا بني ادمين في الدنيا
هنبقى وحوش ملهاش قلب معندناش مشكله ننهش في بعض

بس ده مش هيحصل ا شاء الله

لأن الرحمه اللي في القلوب وهبه من ربنا لينا ونعمه ان شاء الله مستمره

ساره يقول...

منوش الحبيبه

قبل ما اعلق على البوست ... وقف في حلقي سعر الوحه
هذا الشخابيط ب 80 مليون .. لييييييييييه
احم احم اقصد يا بلاش :)

...........

نجي للبوست :)

انا اتكلم زيك واعاتب نفسي بقسوه
واندم كثير وابكي لما ازعل امي ..
اشوف نفسي سيئه
واحيانا قاسيه وماعندي احساس
اشتم نفسي .. اعنفها والومها ساعات طول الليل

وما اصالحها بسرعه مع اني اتمني اني احبها زي ماغيري يحبها (اقصد نفسي)

مشاعرك مليئه بالحب والرحمه يا منوش

الله يسعدك

فشكووول يقول...

اهلا ننوشه..
تحياتى
بابا وماما ما حدش يقدر ينكر فضلهم واللى ما يديهمش حقهم يبقى مخالف للشرع والدين بنص القرأن والسنه
بس الصوره اللى فوق دى صعب قوى يا ننوش
تحياتى

MaNoOoSh يقول...

ادم المصرى
ميرسي جدا يا ادم.. وفعلا ملبكاء على الثمين غالى.. لكن الافضل اننا نحاول منفقدش الثمين دة من الاساس.

----------------------------------

ستيته حسب الله الحمش
والله يا ستوتة رغم ان انا المفروض دارسة قيمة الحاجات دى وعارفة هى غالية كدة ليه.. بس بردو 80 مليون زرار كتشير قوى على عقلى يستوعبة
هههههههههههههه
وفعلا يا ستوتة الصدر الحنين بقى نااااااااادر واللى يلاقيه يبقى فعلا ربنا بيحبه
ولو بطلنا مش هنخسر غير نفسنا فعلا
تسلمى يا قمر وانتى اللى أروع من مليون بوست عندي.

-----------------------------

MǿиY El-Shreef
ان شاء الله القلوب الطيبة مش هتنتهى برحمة ربنا
احنا اصلا ملناش الا رحمة ربنا
ربنا يخليكي يا منمن
والله انتى عثل وطيوبة وزى القمر

------------------------

mimi
طب نقسم البلد نصين.. وانا عندى استعداد اضيع فيها تحويشة عمر.. ايه رأيك فى 8 جنيه ونص؟؟ هم اللى حيلتى.. ها اتفقنا وللا ايه؟؟؟؟؟

-------------------------

Bant El7ag Dracula
ده احنا لو خسرنا حنية الناس دى هنبقى فى غابة بنى ادمين حتى مفيهاش الحب اللى فى الحيوانات
ربنا موجود على رأيك يا قمر.. هو حسيبنا ومنجينا.

-----------------------

الشموع البيضاء
الانانية طبع فينا كبشر.. لكن مينفعش نخنق بعضنا بيها
واللى يلاقى فى حياتة مصدر حنان لازم يعرف ان ربنا بيحبة لاننا فى زمن الحنان يكاد يتلاشى فيه
نورتينى يا قمر

---------------------------

عاشقه الرومانسيه
فعلا يا دودو انا كنت بكتب الكلام دة والكلمة دى فى بالى
بس انا رغاية قوى بقى
ههههههههههههه
بحبك يا عثل

-----------------------------

قلب ارهقته الاحلام
لا لسة باقى ناس بترحم وبتحب تحتوى احبابها.. لكن يظهر الزمن عايزها تتحول
وحتى لو اتحولنا شوية.. نقدر نفوق بس احنا اللى بنستسهل نفكر فى نفسنا وبس
تحياتى يا قمر

-----------------------------

koketa
كلنا لازم نفكر نفسنا فى كل وقت علشان منسيبش تلطيش الدنيا يغيرنا

-------------------------------

إيمان
ربنا ما يبعدك عن طريق رحمته ابدا يا ايمى
وتسلمى ياقمر
اما ال80 مليون زرار دول طالعين من عينى الصراحة مع انى بحب اللوحة دى قوى بس هنقول ايه بقى فى الافترى بتاع العالم دى
نورتى وأجازة سعيدة يا قمر ان شاء الله

---------------------------

ABOALI
ياريت نذكر نفسنا علطول ان رحمة ربنا اوسع من قلوب البشر بكتيييييييييييييييييير
وفعلا ضعفنا بيخلينا نخضع للامبالاه.. بس علينا أن نستدرك الامر حتى لا نخسر من نحبهم
ونتمنى من ربنا يرحمنا من أن نكون مسوخ
تحياتى يا أبو على وربنا ما يحرمنا من زيارتك

-----------------------------

أمبارح كان عمرى عشرين
اهى الكلمة اللى انت قلتها دى هى اللى بتعصرنى "السند" الانسان اللى نقدر نتسند عليه دة بقى فعلا عملة نادرة
ويمكن الست بتحس بالاحتياج لسند أكتر.
واللوحة انا بحبها قوى.. وخسارة فى جتة اللى سرقها.. طب مش كان يقوللى وانا كنت اروح الظشها انا
هههههههههههههه
نورت يا حودة

---------------------------

مش عارفة الدنيا وخداني علي فين
نورتينى بعد غيبة يا قمر
والحساسية دى هى اللى هتجيب داغى والله.. بسببها بزعل بسرعة قوى من حاجات تافهة
والتاج جاوبية على مهلك وربنا معاكى فى الامتحانات ان شاء الله

--------------------------

أحمـــــــــــــد أبو العلا
الدنيا بالفعل اتملت وحوش يا بشمهندس
بس لسة فيها شوية بنى ادمين عندهم احساس.. ربنا ما ينزع الرحمة من قلوبهم ابدا.
تحياتى يا بشمهندس

-------------------------

سارة
دول 80 مليون زرار يا سارة متتخضيش
حار ونار فى جتة المتحف (يللا اهى اتسرقت وهى مش متأمن عليها.. يستاهلوا)
ههههههههههههههه
بس لا تعنفى نفسك يا سارة
حاولى تكونى ارحم على نفسك.. مش كفاية الناس ما بترحم
تسلمى يا قمر وربنا يعدك ويبعد الزعل من بينك انتى واحبابك

-----------------------------

فشكووول
محدش فى الدنيا يا عمو يقدر ينكر فضل امة وأبوه بس ساعات الظروف بتخلى الناس تبعد عن بعضها والود يقل ما بين القلوب
والصورة دى بحس فيها ازاى آدميتنا بتتسرب مننا.. ولو انتهت خالص هنبقى فعلا مسوخ ملهاش ملامح
نورتنى يا عمو فشكوول

القدر و انا يقول...

منوووووش
ليه لمسة الحزن اللى جواك دى
تفاءلى وتفاءلى
والله بلدنا مليانة قلوب رحيمة وناس بتخدم وتساعد بدون سؤال ..
وناس خيرة كتير وده يمكن الحاجة الحلوة الوحيدة فى شعبنا الطيب
وده يمكن اللى معوض الناس على الفقر والتخلف وكل السلبيات اللى مالية البلد
ومن غير قلوب رحيمة تحس لا يصبح الانسان انسان
لك كل حبى

لجين أبو الدهب يقول...

عندك حق يامنوش ..

اوحش حاجة لما الانسان يقسى ويقسى قلبه على الناس ..

لما يتعرض لموقف من ناس ما تستاهلش يحس ان الدنيا كلها كده ..

طب لما ده يحصل معاه موقف وده يحصل معاه موقف وده قلبه يقسى وده قلبه يقسى ..

الدنيا هاتبقى شكلها ايه ..

هاتبقى غابة مش دنيا ..

وهى قاسية لوحدها فحبة الحنية اللى فاضلة مش عايزين نضيعهم !!

تسلمى على البوست يامنوش ياام قلب حنين ..

دمتِ بخير ..

كيــــــــــــارا يقول...

والله برافو عليكي بوست جامد

ربنا مايجعلنا من من قست قلوبهم

mimi يقول...

معلش يا منوش
أتعرض عليا فيها تسعة جنية
معلش ... انتي عارفة توابع الأزمة الاقتصادية

فتاه من الصعيد يقول...

منوش
عندك حق ساعات بنقسو على غيرنا ....يظهر اننا بنكتسب قسوتنا من العالم القاسى اللى حولينا
يا ريت نحاول نكون افضل على الاقل مع اهلينا
دمتى بخير....تقبلى مرورى

assafo anaroze يقول...

سيدتي
اول زيارة لك و اتمنى تقبليني ضيف عندك
سيدتي لو انت فعلا زي ما قلت فقدت الاحساس بالاخرين و باحزانهم و فقدت الرحمة اللي هي اساس قلوبنا يبقى قولي على نفسك السلام لاك اكيد حتندمي بعد فوات الاوان
الرحمة سيدتي و المودة بين البشر هي التي مازالت تمنح قيمة لهذه الدنيا التي اضمحلت فيها كل القيم الجميلة و اصبح العالم حاليا عالم مادي لا يهتم بالانسان بقدر ما يهتم بماذا قدم هذا الانسان من ارباح مادية ولو انه ليس له دور انتاجي يبقى عليه السلام نستغني عنه
العالم بدا يتعامل مع الكل من منطلق الربح و لو باي وسائل دنيئة المهم اني اربح
تقبلي مروري سيدتي

Sweet Violet يقول...

الحياة من غير الناس الطيبه مش هتكون حياة اصلا

لكن الواحد لسه بيدور عليها لانها بقت نادرة علشان كده احنا بقينا فى شبه غابه

مش هقول الطيبه هتختفى لان المعدن دايما بينتصر

و ياما ناس قالت انها بقت قاسيه و انها خلاص هتعيش لنفسها لكن فى اقرب موقف تلاقيها واقفه مع الغير

و ياما ناس قالت انها عايشة للغير و فى اول موقف تلاقيهم بيقولوا يلا نفسى و بس

يعنى من الاخر مش كلمة الواحد هى اللى فعلا هينفذها حتى لو فضل فعلا يتخبط فى ناس قليلة اصل طوووول ماهو ماشى

الانسان مش بس بكلمته الانسان بمعدنه و افعاله

ماتقوليش انك بتشبهى على المقولة ولا مثلا مثلا انها مسروقه من اعلان وزارة الصحه و متحرفه خالص نوهاااائى ((:

biberss222 يقول...

ربنا يباركلك يا منوش على احساسك العالى قوى قوى قوى ده الله يباركلك........
و تعملى لوحه كده زى اللوحه دى و ابقى اجى اخطفها منك و ابعها انا و يبقى جميلك ده منشهولكش يا مانووووش
يا اختشى

Bant El7ag Dracula يقول...

http://7abebyyarasolalah.blogspot.com/

نـــــــــــــور يقول...

ازيك يامنوش
مااعتقدش ان الحياه حياه من غير قلوب حنينه
دى تبقى جحيم
صحيح لقيتى الاسمرانى ولا لسه؟ :)

متشكره اوى على اهداء التاج بس والله انا زعلت ناس كتير منى بسبب الموضوع ده علشان بجد مش عايزة اجاوب تاجات خلاص انا جاوبت يجى 50 تاج فى بلوجر ده :)

متشكره اوى ليكى

عمك ياض يقول...

التدوينه دي رهيييييييييييييييبه بجد :(
وفيها نقاط كتير.. الاهل وتقصيرنا اللانهائي واللي مهما عملنا اصلا مش حنوفيهم نفسهم..
بجد التدوينه دي جميله جدا :(

وكمان اول مره اعرف اللوحه دي.. معلومه جديده وسط الكلام :)

مره تالته ماشاء الله التدوينه رائعه

عمك ياض يقول...

test

فشكووول يقول...

كنت فايت على الماشى كدا قلت احود واسلم على ننوشه واقول لها السلام عليكم

MaNoOoSh يقول...

القدر و انا
فعلا لولا القلوب الطيبة اللى لسة موجودة دى مكناش هنعرف نعيش.. بس المشكلة لما القلوب دى تحتاج حضن حنين ومتلاقيهوش ولما تحتاج سند يحميها ومتلاقيهوش ادميتها بتتسرسب منها غصب عنها
نورتينى يا حبي

-------------------------

لجين أبو الدهب
فعلا يا لوجى لو فضلنا نقسى على بعض هنبقى عايشين فى غابة.. ربنا ما يحكم علينا بقسوة القلوب ولا يقسى قلوبنا ابدا
بتنورينى علطول يا لوجي


-------------------------------

كيــــــــــــارا
يسمع منك ربنا يا كيارا.. ربنا يلطف بينا ولا يجعل قلوبنا قاسية ابدا ولا يوقع فى طريقنا من قست قلوبهم
تحياتى يا قمر

------------------------

mimi
لا يا ميمي بقى طب انا مستعدة ادفع 9 جنيه و35 قرش.. امرى لله هعمل قرض من البنك بال35 قرش دول بقى وخلاص.

-------------------------

فتاه من الصعيد
فعلا قسوة العالم حوالينا بتخلينا نقسى ساعات
تنورينى علطول يا قمر

--------------------------

assafo anaroze
نورتنى فى اول زيارة وان شاء الله متكونش الاخيرة
هى المشكلة فعلا ان المودة والرحمة اصبحت شىء نادر ويملكها فقط من رحمه ربى.. ولو اصحاب القلوب الحنينة هم كمان اتعلموا القسوة ممن حولهم يبقى فعلا نقول على دنيتنا يا رحمن يا رحيم.
تحياتى

--------------------------------

Sweet Violet
فعلا معدن الانسان بيبان وقت الشدة
بس يا خوفى لحرارة ونار القسوة تدوب كل المعادن الصافية
وفعلا الجملة مفكرتنيش بحاجة خاااااااااالث ولا باعلانات التلافسيون ابتااااااا
ههههههههههههههههه

---------------------------

biberss222
تسلم يا بيبرس.. بس اللوحة اللى يبيع اللوحة لوحده يزور يا بيبرس.
وبعدين لو لوحتى جابت اكتر من 80 مليون مليم ابقى خدها
هههههههههههههههههههههه

----------------------------

Bant El7ag Dracula
جارى زيارة الموقع يا دراكولاية

-----------------------------

نـــــــــــــور
للاسف يا نور الحياة فعلا قربت تبقى جحيم لان القلوب الحنينة بتنقرض كما الديناصورات.
وانا مش هزعل لو مجاوبتيش على التاج.. بس انا كان نفسى تجاوبيه
نورتينى يا قمر

------------------------------

عمك ياض
الله يخليك يا (الا هو انت اسمك ايه؟ بالظبط.. انا والله ما اعرف)
وفعلا احنا بنقصر مع الاهل وبنرد القسوة بقسوة مع انهم اتحملونا كتيييييييير قوى لغاية ما ربونا وكبرونا.
نورتنى ويا رب تتابعنى علطول كدة

-------------------------

فشكووول
وعليكم السلام ورحمة الله وبركاته
انت تنورنى فى اى وقت يا عمو فشكووول.

------------------------

هههههههههههههههههههه

أبو العريف يقول...

تصدقي كل واحد مننا محتاج وقفه مع نفسه كل فتره
يقيمها
يشوف هو فعلا عايش لنفسه ولا للي حواليه

اجمل حاجه ان الانسان يقدر يسعد اللي حواليه

مسدس صغير يقول...

يعنى اللوحة اللى عندى دى طلعت مسروقه؟؟
انا شاريها ب 2 جنيه
يدووووب
ههههههه
بوست هايل
بس بلاش النظرة التشاؤمية دى
ربنا يرفع عنك الحزن والغم والهم
ويرجع الفرحة لبيتكم بصفه مستمرة ولجميع بيوت المسلمين.

mimi يقول...

عجبك موضوعي ... إيه رأيك .. يهمني اعرف

المعتصم يقول...

بسم الله الرحمن الرحيم
السلام عليكم ورحمة الله وبركاته
منووووووش
تحياتى
البوست جميل ومعبر
وربنا مايجعلنا من اصحاب القلوب القاسيه
بس انا متضايق قووووووووووووى










من اللوحه اللى بـ80000000دولار دى
ده انا عندى لوحه ست ستها لطبق فاكهه وارخص من كده بكتير
ع العموم اللى سرقها عمل معروف فى الناس
ههههههههههههههههههههه
تحياتى ودمتى بكل خير وود
والسلام عليكم ورحمة الله وبركاته

تامر علي يقول...

لايمكن لإنسان لا يفهم ويقدر معاناة الآخرين إلا أن يكون أنانياً لايعبأ بمشاعر الآخرين وهذا النوع يعامله الناس بالمثل ولا شك ... أما الندم على مساندة الآخرين والتعاطف معهم فلا يأتي من انسان حكيم لأن تجارب الآخرين تمثل مثال وخبرة حية تفيد الإنسان في حياته وثصقله بلا خسائر مع زيادة رصيدنا الانساني لدى الآخرين ... فالإنسان الحكيم يجدها مكسب من جميع الجهات :)

تحياتي وتقديري

biberss222 يقول...

هوا الاسمرانى خطفها و لا ايه؟؟؟؟؟
فين الشغل يا مانوشه

بنجاواتى يقول...

منوش :
سلامى

نقول بقى ان الانسان اللى هو اصلا قلبه طيب وعايش بيتعامل بالقلب الطيب ده مع الناس لو قابل طيابة ووفاء بيبقى طاير من السعادة..ولو قابل غدر بيبقى محبط وحزين

والانسان اللى هو اصلا قلبه طيب لكنه قرر يعيش لنفسه فقط نتيجة لقسوة الاخرين ده للاسف بيبقى عايش لا هو طيب ولا هو مش طيب ..واللى بيزيد الامور سوءا هو انه بيبقى عايش فى صراع داخلى كبير هل انا طيب ولا مش طيب؟؟؟؟؟

وانا شايف انه علشان يريح نفسه من الهم والحيرة دى يبقى مفيش قدامه غير انه يعيش طيب ..هو قدره كده

مش عارف اعمل ايه فى طيابتى اللى مطمعة الناس فيا دى؟؟!!!!!

تحياتى

الفقيرة إلى الله أم البنات يقول...

وحشتينى يا منوشه

رزقك الله يا ابنتى الفهم عليه وجعلك من الصالحات

اذا خسرنا شوية القلوب الطيبه اللى مصبرانا على العيشه هنكون إحنا الخسرانين
علشان كده لازم نحافظ عليهم لان من غيرهم ..عيشه بلاطعم
وتأكدى يا صغيرتى المسخ لا يرى نفسه ..انما يرى نفسه ويحاسبها اصحاب النفوس اللوامه
واحسبك على خير ولا ازكيك على الله

بخصوص الصورة
تصدقى الحمد لله انها اتسرقت

Lady E يقول...

ولكن هل حقا نبكى على جرح من خسرناهم.. أم نبكي على أنفسنا وخسارتنا نحن؟؟؟

لو عرفتي الاجابة قوليلي عليها يا منوش

البوست بتاعك جاي عالجرح
تسلم ايدك

MaNoOoSh يقول...

أبو العريف
فعلا احنا لازم نحاسب نفسنا من وقت للتانى ونشوف قصرنا فى حق مين
نورتنى.

-----------------------------

مسدس صغير
ربنا يسمع منك ويرجع فى بيوتنا جميعا الفرحة
هى مش نظرة تشاؤمية قد ما الواحد بيحاول يفوق نفسه من الانانية قبل ما يفوت الاوان
واللوحة بقى الديا بتدور عليها وانت معلقها عندكوا فى الصالة؟
ههههههههههههههههههههه
نورتنى

--------------------------------

mimi
انا رحتلك يا قمر على المدونة

-------------------------------

المعتصم
ههههههههههههههههههههههههه
طيب حط اللوحة اللى عندك فى ايوتها متحف ونسرقها واهو نطلعلنا بقرشين حلوين
نورت يا معتصم

---------------------------------

تامر علي
ليس الندم على مساعدة الاخرين ولكنها الوحدة وقت الاحتياج لسند او صدر حنون هى ما يجعلنا نشعر بقسوة الحياة وقد نفقد ادميتنا فى الطريق لو اعتدنا على القسوة.
بتنورنى دايما.


------------------------------

biberss222
لا الاسمرانى قاعد فى بيتهم وربنا ما راح النرويج خاااااااااالث..

-------------------------------

بنجاواتى
للاسف فعلا الانسان الطيب بجد قدرة ان يفضل طيب.. واكيد فى يوم هيلاقى السعادة.
نورتنى يا بنجا
ناماستي

-----------------------------

الفقيرة إلى الله أم البنات
فعلا العيشة من غير القلوب الطيبة ملهاش طعم
وياريتنا جميعا نحافظ على قلوب بعض بالرحمة
واللوحة تمنها مبالغ فيه فعلا بس انا بحبها جدااااا
نورتينى يا ام البنات والله لك وحشة

----------------------------------

MaNoOoSh يقول...

Lady E
الاجابة على السؤال دة صعبة قوى.. بس علشان الواحد ميكدبش هى دموعة بتبقى ندم على الغلط مخلوطة بانانية مقنعة فى انه خسر قلوب كانت حنينة عليه وهو فى احتياج ليها.

--------------------------------

الازهرى يقول...

سيولد المسخ يوم أقرر أن أقول نفسي ثم نفسي ثم نفسي وفقط نفسي

صدقت فى هذا جدا
ولكن لم يسمح الناس لهذا المسخ بالظهور
فلنعالج انفسنا
ولنرجع الى اوامر الله لنا

المتبهـدلـون فـي الأرض يقول...

السلام عليكم

يا منوش

أود (يعني أريد)أن أعبر عن إعجابي بتلك اللوحات التجريدية المبدعة ..أنا عارف \إنك مش عندك وقت ترسميها ..وطبعن رسمك حيكون أحلى ..بمرااحل
بس زقها حلو ... وإياكي وعقود الوالدين ...

الفراشه الحائره يقول...

صح يا بنتى عندك حق ع فكره مدونتك حلوه اوى اللهم لا حسد

انت تسال والكمبيوتر يجيب يقول...

دعوه
الأخت العزيزه
تحيه طيبه
برنامجنا الأذاعى عن النت والمدونات من الأذاعه الرئيسيه لمصر اى اذاعة البرنامج العام يذاع يوميا التاسعه وعشر دقائق صباحا عدا الجمعه
ندعوك لزيارة مدونتنا والتعليق على ما نطرحه من موضوعات وهذه التعليقات تذاع باسماء اصحابها فى حلقات برنامجنا

وبموقعنا رابط بالضغط عليه والأتنتظار قليلا وقت أذاعة البرنامج يمكنك الأستماع الينا
المدونه
http://netonradio.blogspot.com
الموقع
http://stop.to/cairo

ذكري رحبل قلم يقول...

السلام عليكم
بشكرك علي الموضوع
هناك الكثير من من يقول نفسي وبعدي الطوفان بس ده طبيعي ببساطة انظري الي الدنيا التي اصبحن نعيشها
بس الكلام ده اتولد في ايامنا بس انما ايام زمان كانت كلها خير لا كل خير

شمس النهار يقول...

انت عارفه ان زمان الدكاتره النفسيين ماكنش لهم لزمه كانوا بيعلجوا المجانين بس
دلوقتي ماشاء الله شغالين الله ينور
عارفه ليه
عشان كل اللي اللي في البوست ده
فقدنا الصديق الحق اللي بيسمعنا
فقدنا الحضن اللي بيضمنا نشعر بالامان
فقدنا القلوب اللي همها علي هم بعض
الطبيب النفسي صديق يسمع باجر

اما موضوع الوالدين ده مشكله مع ان لو عملنا زي ربنا مابيقول مش هيبقا مشكله
الواحد لما كبر وخلف حس يعني ايه ام واب
ساعات القسوه علي الابناء بتكون في الصالح
ماهو مافيش حاجه تخللي الاب او الام يقسوا علي اولادهم الا مصلحتهم

GiGi يقول...

تعرفى انك رقيقه قوى
وانسانه فنانه وحساسه بجد ربنا يكرمك وسعيده بدخول المدونه
بس حبيتك من قبل كده

MaNoOoSh يقول...

الازهرى
صدقنى يا ازهرى حتى اصفى القلوب فى الدنيا هتتعب لو احتاجت قلب حنين وبصت حواليها لقت نفسها لوحدها.. قدرتها على العطاء هتقل ونفوسها هتدبل من الوحدة.. وساعات كتير القلوب دى بتبقى حوالينا ومبنوفيهاش حقها.

-----------------------------

المتبهـدلـون فـي الأرض
يا مرحبا يا مرحبا
(نورتنى يعنى)
وبعدين وربنا دة الوالدين هم اللى عقديني (معقدينى يعنى)
بس يللا بقى اهو نستحملهم شوية مش هيجرى حاجة وربنا يستر لحسن الواحد يبقى شكلة فى الاخر زى اللوحة ام 80 مليون زرار دى

-----------------------------

الفراشه الحائره
مرسي سا قمر
ونورتينى

----------------------------

انت تسال والكمبيوتر يجيب
ان شاء الله اتابع المدونة واحاول اتابع الاذاعة كمان ولو انى بكون فى سااااااااابع نومة فى الوقت دة

---------------------------

ذكري رحبل قلم
الانانية موجودة من بداية الخلق.. ولكن دلوقتى انتشرت بشكل رهيب.. لدرجة تجرح وتئلم جداااااااااااااا
منورانى يا قمر

---------------------------

شمس النهار
فعلا الدكاترة النفسيين صاحب بفلوس
وياريتهم حتى ينفعوا الواحد باى نصيحة


وطبعا الاهل بيعملوا اللى فيه مصلحة أبنائهم بس ساعات بردوا بتاخدهم الدنيا وبيحتاجوا يفكروا فى نفسهم شوية.. وانا كنت بفكر نفسى ان دة حقهم بردو.. انا ياما شفت معاهم خير وسعادة وياما ضحوا كتير علشانا.. من حقهم اننا نكون جمبهم بردوا وقت الشدة.
منورانى يا قمر

-----------------------------------

GiGi
تسلمى يا قمر
كلك ذوق وانتى أرق وانا اسعد بزيارتك الجميلة.

---------------------------

Sonnet يقول...

تحياتى لك و لمدونتك الجميلة
ادعوك لزيارة مدونتى
http://shayunbiqalbi.blogspot.com/

الفراشه الحائره يقول...

يا قمر مرسي لتعليقك و رديت عليكى هناك