الاثنين، 4 مايو، 2009

نسمات برج الددي+ تحدييييييييييييييييييث

بصوا بقى انا منمتش بقالى يومين وكمان معرفتش اقعد على الكمبيوطر براحتشى فمهيبرة ومهيسة على الاخر.. وكمان كلها ييجى ساعتين تلاتة واسافر الدلاقهية علشان اشوف مريم أحدث بنات العمومة أو الخلولة "مش هقول انهى فيهم رخامة بقى" هههههههههههههههههه
عندها اسبوع بالتمام وانا بحب العيال الصغننة دى جدااااااااااا
وكمان
أن أن اااااااااااااااااااااااااااااااااااان
اما اجى يوم السبت سأوافايكم بأهم الانباء بخصوص سي عبده أنزحة بيه وست تشفيدة زوفاش هانم.
اة وكمان اوعى تبدأو الشات بوكس من غيري..عااااااااااااااااااااااااااااااا
ومعلش للناس اللى ملحقتش اشوف مواضيعهم الجديدة واعلق عليها وكمان التعليقات الاخيرة عندى هرد عليهم لما اجى.
واخر حاجة بقى انى هشيل الحصار من على التعليقات لغاية ما اجى تانى
سلاااااااااااااااااااااام بقى دلوقتى علشان اقوم اجهز نفسى واسيبلكم وصلة للكف اللى مبفتحش اليوتيوب الا ولااااااااااااااااااااااااااازم اتفرج عليه
النسمات (جمع نسمة) سيدات برج الددي (الجدي يعنى ما تصحصحوا معايا بقى)
من الاخر.. وبما انى سيحت لتشفدفد كتير يا جماعة وحاسة بالذنب فقلت اتسلي على نفسي شوية.. وطبعا انا هقول على العيوب بس ومش شرط تبقى موجودة فى كل ستات برج الددي زيي ومش دى بس كل العيوب كمان.. فمحدش من برج الددي يزعل لان انا اصلاً من برج الددي برديك.
تاريخ الميلاد: مش لازم تعرف (دة ايه الفضول والحشرية دول)
العنصر: ترابي (طينة يعنى من الاخر على دماغ اللى يخنقها)
أسعد أيامها: اليوم اللى تنكد فيه على حد مفترى ورخم وقارفها فى عيشتها.
اللون المفضل: لون الدم طبعا.. نياههاهاهاههههااهاهاها.
الحجر المفضل: الزلط اكييييد.. (ودة من أسلحتها المفضلة.. ولو انها تفضل الساطور والسكاكين الحامية عن اى شىء اخر).
الكوكب الذي يتحكم فى برجها: زحل (واخدلى بالك انت.. مش اى كوكب يعنى.. دة احنا بتوع الشبورة والنكد السوبر المفتخر).
هوايتها المفضلة: (غير القتل طبعا وشرب الدم على غيار ريق وعمل كوكتيل صوابع وأعضاء بشرية فى الخلاط).. طبعا بيبقى ليها هوايات كتير وخصوصا الهوايات الفنية.. ولكنها بتعشق التأمل فى خلق الله وأحوالهم وبتحب قوى تبص فى عنين الناس علشان تحس بمدى صدقهم من كدبهم وتعرف نقط ضعفهم.
مخها: شفت الفولاذ.. ايوة ايوة اللى بيستخدموه فى عمل صواريخ الفضاء دة هو دة.. اهو مخها بقى انشف من الفولاذ دة..( نصيحة أخوية.. احذر من العند معاها لانها مبتشوفش قدامها ساعتها وممكن تشوطك).
كرامتها: بتنئح عليها قوى وممكن تتهور على اللى قدامها وبما انها زي ما قلنا بتحب تتأمل فى خلق الله.. فهى بتحس بنقط الضعف فى الناس ولو حد داس على كرامتها أو كرامة حد من أهلها مش هتتردد انها تدوس على نقط ضعفة (ومفيش مانع لو نطت فى كرشة وطلعت كبده شوحته بالبصل والفلفل وعملته كبدة اسكندراني لظيظة).
التريقة: متحاولش تتريق عليها ولا تعمل فيها مقالب لو خايف على نفسك.. ممكن تعمل فيك مقلب مميت علشان تخليك تبطل الحركات دى.. (تحطلك فلفل اسمر على ملح على شطة فى القهوة أو الشاي مثلا.. تحطلك الصرصور المحمى فى سيخ ودنك.. تنكش شعرها وتطلعلك فى الضلمة تسرعك بسكتة قلبية.. فبلاش يبنى ارحم نفسك وانفد بجلدك احسنلك).
الذكاء: ايوة طبعا ذكية (ومتصطدش فى الميه العكرة).. بس هى ساعات كدة بيجيلها حالة من التبليم والتناحة او بتبقى مركزة فى حاجة تانية الله أعلم.. فممكن تفهمك غلط وتقلب عليك قلبة سودة بعيد عنك وتلاقها اتئمصت بقى ووش الرخامة والتناحة ظهرلك.
البرود: لما تقرر انها تبقى باردة مع حد.. عندها استعداد تبقى أبرد من القطب الجنوبى بذات نفسيته.. لا وبتستلذ كدة بأنها تتنح مع السخص دة وترخم عليه وتعمل اى نشاط جماعى وتقوم بقى مطنشة نفس ذات السخص اللى بتتبارد عليه وتنبسط بقى قوى وتستمخمخ من نفسها لما تعمل كدة.
الكزوووووف (الكسوف يعني): (شايفاك ياللى بتتريق وهتتجاب من قفاك وانت نايم فى حلم مفتخر فى قسم البوليس مع الشاويش سلومة الاقرع وكفه المتين).. ايوة بتتكسف بغباء لدرجة الخنقة.. من اى حاجة ومن اقل حاجة ومن اتفه حاجة.. ممكن تتكسف حتى تطلب حقها وممكن تتكسف فى قعدة فيها ناس متعرفهمش.. ولما تتكسف بقى متفتكرش يعنى انك هتشوف خدودها احمرت بقى وكلام من دة.. لااااااااااا يبنى فوووق.. هى الحقيقة ودنها اللى بتحمر يعني.. شفت الطماطم.. (لما بتتعمل صلصة بقى.. وتقعد تغلى وتعمل بقاليل كدة وتبربق... يا عم انت صدقت.. هو احنا هنطبخ كوسة وللا ايه).
الوسوسة: ايوة موسوسة جدااااااا.. رغم انها فى كتير من الاحيان بتستشف الصدق من الكذب لكن بردو موسوسة حتى مع الناس اللى بتحبهم.. (ايه؟ عندك اعتراض وللا حاجة؟؟ اندهلك الشاويش سلومة الاقرع يسجل اعتراضك؟)
ونطلع من كل الكلام دة بإيييييييييييييييييييييية!!!!!!!
نطلع بأن ستات برج الجدي طبعا عثاثيل وقمر وحلوين وطيبين وزي النسسسسسسسسسمة.. وصحيح وقت الروقان سندريللا.. بس لما حد يخنقها بتقلب جودزيللا.
هااااااااااااااااااااااااا.. مين هناااااااااااااااك.

49 اللي عبروا منوووشة:

قلب ارهقته الاحلام يقول...

أووووووووووول :)

COMMING SOON

مسدس صغير يقول...

بالمنظر اللى انا شايفه ده
ستات برج الددى ناقصهم بندقية ويبقو غفر.
ههههههه
اما النسمة والطيبة والعثل والكلام ده ميجيش بعد اللى شفناه.
الواحد اول ما يروح يخطب يسأل ابوها بنتك جدى؟؟ اقصد برج الجدى؟؟ لو قال اة اقوله ابوس ايدك سيبنى اخرج من هنا ومتقولهاش ان انا جيت.
ههههه
سلام بسرعة.

قلب ارهقته الاحلام يقول...

هههههههههههههههههههههههههه

هههههههههههههههههه

لا يستي خلينا ف وقت الروقان

ده انابموت فيكي والله بس بلاش الوش التاني ده :)

يالهوييييي دة انتي طلعتي دراكولايه دموية

وكمااان عصير صوابع :-p

ايوشة يقول...

هههههههه على فكرة انا من برج الدد ده ههههههه واغلب الصفات دى فيا فعلا بوست جميل اوى تسلم الايادى

Sweet Violet يقول...

ههههههههههههههههههههههههه

انا قولت انك شريرة و نظرتى دايما صح

بس شريرة عسولة على فكرة (:

يااااااااااه مش قادرة اقولك البوست ده عمل فيا ايه

انا كده اطمنت ان الاسمرانى راح فى الباى باى و هقدر افرح فيه بافترا نيهاهاهاهاهاهاهاهاها

عاشقه وغلبانه يقول...

ماتشوفيلنا الجوزاء كده ياختي

الأسمراني يقول...

ههئ فعلااااااااااااااااا عثاثيل قوي طب وبرج الناااااااااااب ؟
قصدي الأسد يا ربي ؟
:)

الأسمراني يقول...

ههئ من ناحية نسسسسسسسسسسسسسسسسسسسمة فأنا مت من النوسومية بتاعتك.
ومن ناحية العثلللللللللللللل النمل غرقنا (:
كدة يا بنت الايه شمتي الناس فيا عااااااااااااااا.
ماشي ماشي
بس بردة الأسد أحسن من الددي دة .
برج معفن :P

koketa يقول...

نيهاااااااااا هااااااااااا هااااااااا
ايييييييييييييييه يابنتى ده
انا اترعبت اصلا من الكلام ومن الصور
بس بجد ضحكت نمن قلبى

حسام غانم يقول...

ياااه

الأبراج والفلك والكلام ده

مفيش بيني وبينهم عمار


بس حبيت أسلم بس

تامر علي يقول...

ممكن تحليل لمواليد برج بيزا المائل ؟؟:)

إيه ده كله ده .... دي مؤسسة إجرامية مش صفات مواليد برج معين ... ربنا يعينه الاسمراني :)

MaNoOoSh يقول...

قلب ارهقته الاحلام
مبروك يا ستى اول وتالت كمان
هههههههههههههههه
وانا مش دراكولاية وربنا دة انا غلبااااااااااااااااانة (هى كباية الكوكتيل بتاع الصوابع بس)
هههههههههههه

---------------------------

مسدس صغير
صدقنى هتعرف حتى لو ابوها خبى عليها.. متحاولش دول عندهم حاسة سادسة وسابعة وتامنة والتاسعة كمان جابوها فى الاكازيون
هههههههههههههههههههههه
نورت يا باشا

-----------------------------

ايوشة
نورتى يا قمر
برج الددي زيي.. اجدع ناس

--------------------------------

Sweet Violet
ماشى يا ضد.. طب دة انا عثل وثكر وموش شوريرة خاااااااااااااااالث والله
هههههههههههه

------------------------------

عاشقه وغلبانه
والله يا اوختشى لو اعرف حد من برج الدوزاء كويس كمن فضحتة زى ما فضحت نفسى بالظبط.

-------------------------------

الأسمراني
برج الاسد اجدع ناس... وانا اقدر اقول حاجة عنهم؟؟؟
ايوة انا نسمة.. بس قالبة على عاصفة شوية
هههههههههههههه
وبالنوسبة للنمل بقى.. اوعى وشك للنمل يعضك.. مش هيبقى النمل وواحدة صاحبتى معرفهاش كمان
هههههههههههههههههه
وبالنوسبة للبرج بقى (اللى بتقول عليه معفن.. ماشى ماشى).. يا وييييييييلك من صاحبة البرج لما تشوف وشك (بعد سنة ونص.. عاااااااااااااااااااااااا)
اسكت بقى علشان انت جبتلى اكتئاب من الخبر المقندل دة
عاااااااااااااااااااااااااااااااا

-----------------------------

koketa
ههههههههههههههههه
ايوة الصور لظيظة قوى وتشرح كدة
ههههههههههه
نورتينى يا قمر

--------------------------

حسام غانم
انت لو قريت الكلام كنت هتحب الابراج والله من صفات برج الددي دة (دة كمبن على فكرة)
ههههههههههههههههههههه
نورتنى ياباشا

-------------------------------

تامر علي
وفى كمان تحليل لصفات برج القاهرة لو عايز
هههههههههههههههه
فعلا بصراحة الاسمرانى ربنا يكون فى عونة.. بس مؤسسة اجرامية لية .. طب دة حتى برج الددي دة نسسسسسسسسسسسسسسسسسمة.
منورنى دايما

---------------------------------

ساره يقول...

برج الددي عبقري
وصحباتي كلهم من الابراج الترابيه :)
بين برجي وابراجهم توافقك راهيب ..

انا برج الميزو (الميزان)

MaNoOoSh يقول...

ساره
ربنا يخليكي يا قمر
انتى كلك ذوق واحساسك عالى دائما
نورتينى يا ارق سارة

بنجاواتى يقول...

صباح الخير

انا ما كنتش اعرف ان برج الددى شرير كده

الحمد لله انى مش ددى

تصدقى ان انا ددى صغير -لسه حمل يا عينى-

هوايتها المفضلة: (غير القتل طبعا وشرب الدم على غيار ريق وعمل كوكتيل صوابع وأعضاء بشرية فى الخلاط)...كنت لسه ما فطرتش

مرسى اوى على الفطار اللذيذ ده

حاسس ان نفسى قلبت عليا وهههرررررججججج.......هىىىىء

انا فى الحمام برجّع

بوست حلو ع الصبح

إيمان يقول...

ده انتى شحورتى الستات الددى خالص على فكره

سكاكين ايه ودم ايه يا كدابه

دول حنيينين جدااااااا وهى دى اكبر مشكله فى حياتهم بعد الكزووووووووف

انا ددى وافهم الحركات دى كويس

لكن بخلاف السكاكين وشرب الدم كل اللى قلتيه قريب

جدا من الواقع

biberss يقول...

برج الددى ده احلى برج
بس الصفات دى صفات قطط الجمعيه
حاسس كده من كلامك و اسلوبك فيه تهديد لسخص ما
خصوصا اللى بين الاقواس مرعب جدا
لدرجه انى قاعد اقرا و عمال اتلفت حواليا لتتطلعى من ورا اى كرسى جنبى
ااااتغيرتى يا مانوش

أمبارح كان عمرى عشرين يقول...

السلام عليكم

ايه البرج الجامد اوى دة :D
انا برج الدلو الحمد لله :D:D
بس مواصفات جامده خصوصا الزكاء والهوايات الفنيه انتى هتقولينا بردو :D

الصورة الأخيرة دى جامده اوى

ABOALI يقول...

برج الددى قال
مال المعزة ايه
ياااااااااااااااقلبى
بس شكلك كده سهل التعامل معاك
وسيبك انتى من الصفات اللى قولتيها دى

ساعات وراء الصفات انسان جميل محب للحياه نفسه بس فى امان و صفاء يحيا فيه وينعم
مع هدووووووووووووء

ادعو من خلق وقدر وفعل وانعم واعطى
ان يهبك راحة البال والطمائنينه وحب الخير والسكينه
وان يمتعك الله بالقرب منه والظل بظلاله يوم لا ظل الا
ظله


شكرى مع خالص دعواتى

يوميات شاب منوفى يقول...

ايه دة بقى دة الواحد يبعد عن ستات البرج دة للمحافظة على عمرة

momken يقول...

انا مليش فى الابراج الحقيقه
بس سمعت انى حوت

ياترى دى حاجه حلوة ولا وحشه
امتا بالنسبه للدادى

الواضح ان الكلام يدينك جداً

انتى مطلعه نفسك شريره فى البرج ده
ونصحك تغيريه

خدى فى برج النشارتى

تحياتى

MǿиY El-Shreef يقول...

هههههههههههه

الحمدلله مش ددي ولا خروف

انا عقرب :D

بس ايه ده في صفات فاجأتني ثراحه

ههههههههه مش هقولك انها الكسوف يعني ههههههههههههههه

بهزر ياقمره

ع فكره انتي عسوله اوي والددي يفحر بيكي :))

سلام ياحبي

لجين أبو الدهب يقول...

ههههههههههههههه

يابنتى انتى عسل والله العظيم ..

عارفة لما بقرأ بوست عندك بحس كأنى بتفرج على التلفزيون بجد من كتر ما البوست حى ..

والستات دول طلعوا حلويين خالص ومالص وبالص ..

وربنا يستر على رجالتهم ..

دمتِ بخير حبيبتى ..

ادم المصرى يقول...

ياااااااااه دا كلو فى برج الجدى يا حول الله

على كدا الصعيد كلها من برج الجدى رجال واناس الا من رحم الله

فتاه من الصعيد يقول...

منوووش...انتى متاكده ان دى مميزات برج الجدى....يعنى ماينفعش الميزان.....اصلى بشبه ....بس بجد ايوه زى العثل كل مواليد برج الجدى لو زيك كده
دمت بخير....تقبلى مرورى

MaNoOoSh يقول...

بنجاواتى
جرى ايه يا بنجا.. ما تجمد قلبك كدة شوية امال.. دة اقل كوكتيل عندى على فكرة
هههههههههههههههه

-----------------------------------

إيمان
ايمي ددي زيي.. هيييييييييييييييييييييييييييه
خلى الحنية والكزوووووووف والحاجات دى فى سرك بس يا ايمى بلاش فوضايح
اااااااااااااه لو كان الكسوف رجلا لقتلته (وعملته كوكتيل مع الصوابع)
عاااااااااااااااااااااااااااااا
وحشتينى يا ايمى وان شاء الله ربنا يعوضك عن الاجازة الفشنك دى باجازة ممتعة مع حبايبك ان شاء الله

----------------------------------------

biberss
اه والله يا بيبرس دة الددي عثللللللللللللللللللللللللللل
ونسسسسسسسسسسسمة.. وبعدين انا مطلعش من ورا الكرسى على فكرة.. انا هخليك بتتلفت واطلعلك من الشاشة نفسها
هههههههههههههههههههههه..شوريرة بقى
وبعدين بالنوسبة للجمعية بقى انتظر نشاطها قريبا باذن الله.. نياههههاهاهاهاههاهاهاههههاهاهاهااااااااااا

---------------------------------------------

أمبارح كان عمرى عشرين
ايوة ايوة يا حودة.. الددي دة برج فزييييييييييييييييع ربنا ما بحكم بيه على حد
وللا الذكاء.. ربنا ما يوري لحد لحات الذكا بتاعتهم دى.. دة انا نفسى مبطقنيش ساعتها يا جودعاان
ههههههههههههههههههههههه
منورنى يا حودة

------------------------------------------

ABOALI
هو التعامل سهل والله يابو على بس مش قويييييي يعنييييييييييييييييييييي
ههههههههههههههههه
ومين فينا مهما كان فيه من عيوب مبيدورش على الصفاء والحدوووووووووووء الجميل والحنية
وتسلم بجد على دعوتك الجميلة ولك افضل منها
بجد تعليقاتك بتسعدنى

------------------------------------------------

يوميات شاب منوفى
بص هو انت تاخد احتياطاتك افضل.. دة برج لاسع بعيد عنك
هههههههههههههههههههههه
نورتني يا باشا.. عساها متكونش اخر زيارة

------------------------------------------

momken
لا لو حوت هتعيش متقلقش
ههههههههههههههه
بس انت ادينى عنوان النشرتى دة وانا اغير البرج لحسن دة انا خنقتنى والنيعمة
نورت يا باشا وابقى تعالى تانى وانا اغير البرج الدموي دة

-------------------------------------

MǿиY El-Shreef
تسلمى يا موني يا قمر.. بس الددي اتخنق مني وربنا
ههههههههههههههه
يارب يكون الاكتئاب راح.. يعنى يا ستى والله الاهلى هيبقى احسن من الاول وهتشوفى.. هم اللعيبة تلاقيهم مرهقين شوية بس.
بس الاغنية بتاعتك جااااااااااااااااااااااامدة.. يا بتاع المواهب المستخبية انت يا عثل

--------------------------------------

لجين أبو الدهب
انتى اللى عثل والله يا لوجى
والستات الددي رجالتهم ليهم الجنة اكييييييييييييييد
نورتي يا قمر.. وانا مبسوطة جدا بتعليقك.. جابلى حالة انشكاح
هههههههههههههههههههههه

-----------------------------------

ادم المصرى
طب والله دة برج الددي هادي.. امال لو اتعاملت مع الثور بقى هتقول ايه
ههههههههههههههههههههه
منورنى يا ادم


--------------------------------------

فتاه من الصعيد
ميزان وفيه الصفات المجندلة دى؟؟ طب ازاااااااااااااااااااااااي
بس عموما يعنى الصفات دى لو فى ددي وللا ميزان.. ربنا يكون فى عون الماسوف على شيبابة اللى بيتعامل معاهم
هههههههههههههههههههههه
نورتى يا قمر

------------------------------

mahasen saber يقول...

اعتقد ان الهديه المناسبه لمولودة برج الجدى وبعد الصفات الحميده دى
هيا انها تتجوز مولود برج التور عشان يتعاملوا مع بعض بحكمه ودماغ
شوفوا الجوزاء ملايكه وعايزين قصقصة ريشهم يا منوش

بـسـمـــة صـــــلاح يقول...

لا لا لا برج الددي بالبشاعه دي اصدي بالجمال والرقه دي
ياخواتشي صغننه البت منوش وعثله ومثكره
ابقي اعملي بحث عن برج الدلو الجردل يابنتي احنا برج الجردل
ربنا يكفيكي الشر

بس انتي شريرة ومصاصة دماء يعني ولا الكوكتيل دا

ابقى اعزميني على واحد عشان اقولك رايي
هههههههههههههه

بجد دمك شربات خاااااالث مااااالث


تقبلي مروري يامنوشو

سلام

ستيتة هانم حسبو يقول...

بما اني ددي صديق فكل الكلام مضبوووووووووووووووط الا الوسوسة
طالما بصيت في عين الانسان وعرفته وحبيته او كرهته تبقى قضيت يا معلمة

وتسلم ايدك
نيهااااااااااااي ددي صديق

عاشقه الرومانسيه يقول...

انتى شردتى البرج
واللى من البرج
خاااالص
شكلك كده هتنضربى
ماتعرفيش حاجه عن برج القوس يااختشى؟

صيدلانيه طالعه نازله يقول...

ههههههههههههههه انتى بعد اللى قلتيه ده لسه معتبره نساء برج الجدى دول ستات جايز برضه يعنى برود و ذكااااااااااااااااااااء و كسووووف
كلها مواهب و الله و انا من مكانى هذا بوجه نداء الى كل الرجال لا تتزوجوا نساء برج الجدى لانهم سم قاااااااااااااتل
هههههههههههههههه

mimi يقول...

أنا برج الميزان

مش هسألك عنه أكمني عارفاه وحافظاه وفاهماه وفاقساه

بس إيه رأيك في الأبراج الصيني ؟
اشمعني دي كمان مش هيعملوها اللي خلي كل حاجة
"ميد إن تشاينا "

فشكووول يقول...

ازيك يا منوش
فيه حاجه ما قلتيش عليها فى مواليد برج الددى اللى هو انا منهم
اذا كانوا كدا انا متبرى منهم خالص وهما كدا يبقى ناقصهم جردل سم عشان يرشوه على الاكل والناس كلها تروح فى داهيه.
ربينا يكفينا شرهم ...الله انا من برج الددى
تحياتى

Bondoka يقول...

انتى بتجيبى الكلام ده منين يا بنتى
عسل عسل والله

وايه الكلام مظبوط تماااااااااااااااام

ههههههههههههههههههههههههه

norahaty يقول...

ايه ده ؟مش ممكن ؟ مش معقول ؟
وصحيح وقت الروقان سندريللا
بس لما حد يخنقها بتقلب جودزيللا.
وصف بتاع واحدة اعرفها بشوفها كل يوم
فى المراية بس الاكادة بقى مش برج الددى ده!

Bondoka يقول...

عارفه بقى رغم كل العبر دى
بس انا بمووووووووت فى البرج بتاعى
انا برج الجدى وافتخر واللى خايف يروح
ههههههههههههههه

ذكري رحبل قلم يقول...

السلام عليكم
ازيك يا منوش عاملة ايه
هو يا حبيبتي مفيش بستفه اكتر من حبه لبرج الجد علي العموم نسيتي تقولي انهم بيحبوا المصلحة قوي وبعد كدة مبيعرفكيش
ياختي الحمد لله ان انا برج العذراء وبحبه قوي عشان صفاته كلها بالظبط عليا
ومبروك النونو الجديد
ترجعلنا بالسلامة ان شاء الله

أحمـــــــــــــد أبو العلا يقول...

دستووووووووووووووووور
يارب ياساتر
انا داخل برجلي اليمين ورافع رايه بيضاء وربنا يستر
ههههههههه
انتي كده بتوصفي كائن هلامي دموي مؤذي بالسليقه

هههههه

بس برضه واضح انه من جوه طيب بس عوامل التعريه بأه بتعمل أكتر من كده

بجد بجد بجد بجد
دم خفيف جدا جدا جدا
ضحكتيني ومن زمان مضحكتش كده

Sweet Violet يقول...

ترجعى بالسلامة ياتوتا (:

Appy يقول...

على فكره هما برج هادى نوعا ما انا خالتى الجدى اصلها بس هى عمليه وبتحب الفلوس ههههههههههه يعنى اى حاجه تجيب لها فلوس بيزنس بقى صغير كبير معندهاش مشكله

عمك ياض يقول...

ماشاء الله مبارك المولولده الجديده :)
ربنا يحفظها ويبارك فيها
بحب اسم مريم ده اووووووووووووووووووووووي

بقالي كتير اوووووي كمان ممسكتش عيال صغيره وشلتهم وكده :)
حاجه جميله بجد ماشاء الله

Lady E يقول...

مبروووووك ربنا يبارك في مريم يارب انا كمان عندي بنت الخلولة اسمها مريم ولسه مكملتش اسبوعين :)

تروحي وترجعي بالسلامه يا قمرايا
بجد وحشتيني

mimi يقول...

الحمد لله
الحمد لله انا برج اليافطة ... وده برج جديد ... جنب برج العرب ...

شمس النهار يقول...

:)
يارب اللي يزعلك يطق

بجد حسيت انك بتتكلمي علي ريا وسكينه:)

بس ده فيه شبه من نساء برج السرطان:)

shabfa2re يقول...

برج الثور هو افضل برج فى العالم وافضل من برج بيزا وايفل

أبو العريف يقول...

منوووووووووش

ايه المواهب دي
انت حببتيني في البرج ده
بس كرهتيني في اي حد يعدي من جمبه
دا ايه التطرف في كل حاجه ده

بيس

الفراشه الحائره يقول...

هههههههههههههههههههههه و الله انتى سكر

MaNoOoSh يقول...

mahasen saber
فعلا يا عثل احسن حاجة للجدي هو الثور (يفضلوا ينطحوا بعض بقى لما يبانلهم اصحاب)
هههههههههههههههه
والجوزاء عثل والله ومهيبرين وبموت فيهم
نورتيني يا قمر

----------------------------

بـسـمـــة صـــــلاح
انا بابايا برج الدردل يا بوسي ولذيذ جدااااااااااا
والكوكتيل منصحكيش بيه يا اوختشى اصلة بيجيب استبحس
ههههههههههههههههه
نورتي يا قمر

-------------------------------

ستيتة هانم حسبو
ستوتة ددي زيي.. يا حلوللى يا حلوللي
هههههههههههههههه
الوسوسة دى سببها عقد بعيد عنك يا ستوتة.. وفى حالات قليلة كمان يعنى بس انا قلت اقولها بقى وخلاص.. منا ياما فضحت البت تشفدفد
ههههههههههههههههههههههه
مممممممممممممواه

-------------------------------

عاشقه الرومانسيه
لالالا يا دودو دة أحلى برج برج الددي كلهن عثاثيل ونسمات
بس ساعات بيبقوا متوحشين شوية
ههههههههههههههههه
اختشى أوشا برج القوس.. بلاش فضايح بقى.. مش هقول على الصفات اللى بتضايقنى فى برج القوس بدل ما اتضرب
نورتينى يا قمر

-------------------------------

صيدلانيه طالعه نازله
لالا يا صيدلانية دول ستات قمر وربنا وزي العثل بس بيحبوا التفاااااااااااااااااااهم بالعقل
ارجعى فى النداء بقى الله يخليكى لحسن يصدقوا بجد ويطفشوا
عاااااااااااااااااااااااااا طخة بس متعوروش يابوي
نورتينى يا قمر ويارب تنوريني علطول

--------------------------------

mimi
ما تثبتى يا ميمي.. انتى برج الميزان وللا برج اليافطة؟
ههههههههههههههههههه
مامتشى برج الميزان.. وبلاش فضايح برديك لحسن تديني بالقفا
ههههههههههه
نورتي يا عثل

---------------------------

فشكووول
عمو فشكول كمان من برج الددي زيينا
هيييييييييييييييييييييه
طب والله دة برج عثل يا عمو.. بس لما يكون هادى وبلاش حد يستفزة
نورتني يا عمو يارب علطول

------------------------------------

Bondoka
بندقة كمان من برج الددي.. احنا نعمل حلف برج الددي بقى
ههههههههههههههههههه
ايوة والله برج عثل.. انا مش عارفة هم مش مصدقين ليه.. طب وايه يعنى شوية دموية كدة ع الماشي ينفعوا الواحد فى خناقة وللا حاجة
ههههههههههههههههه
نورتي يا قمر

--------------------------------

norahaty
انا بيتهيئلى كل الستات كدة يا نور
طب ولية بقى الرجالة مش بيريحوهم وخلوهم فى روقان علطول؟
مهو اللى يستفزها ويخليها جودزيللا يستاهل بقى
ههههههههههههههههه
نورتينى

----------------------------------

MaNoOoSh يقول...

ذكري رحبل قلم
لا والله يا ذكري هم مش كلهم بتوع مصالح بس منكرش اني شفت منهم نوعيات كدة فعلا
وعلى فكرة انا اعز صديقاتى من برج العذراء بس كتير من صفات البرج مش فيها
الله يبارك فيكي يا قمر وعقبالك

-------------------------------------

أحمـــــــــــــد أبو العلا
هههههههههههههههههههههههه
دة برج هادي خاااااااااااااااااااااااااااااااالث يا احمد.. دة نسسسسسسسسسسسمة
لكن لما حد بيستفزة بيبقى دموى حبتين
بس متقلقش يعنى هو مبيستفزش بسهولة
ههههههههههههههههههه
ربنا يهنيك بالضحك والصحة علكول يا رب

--------------------------------

Sweet Violet
ربنا يخليكي يا قمر.. ولما افوق هحكيلكم على البلاوي اللى حصلت فى موضوع تشفدفد
مممممممممممممممممواه

----------------------------------------

Appy
طب ومين بس مش بيحب الفلوس يا ابي.. بس الفكرة هى الفلوس هى اللى بتحب مين
ههههههههههههههههههههههه
نورتي يا قمر

----------------------------------------

عمك ياض
عقبال ما تشوف أولادك ان شاء الله ويقعدوا يجروا حواليك ويقولولك بابا بابا بابا بابا بابا بابا بابا بابا بابا
ههههههههههههههههههههههههه
ربنا يكرمك يا باشا

--------------------------------------

Lady E
ربنا يبارك فى المريمين
ههههههههههه
بس لسة بقى شكلهم مش بيبان دلوقتى
عقبالنا يااااااااااااااااااااااااااااااااااااااااااااااااارب

-------------------------

شمس النهار
ايوة يا شموسة.. ريا وسكينا دة الاسم الحركي بتاعى انا واختى أوشا فى العائلة
هههههههههههههههههههههه
ياسلام على ستات برج السرطان بقى أميرات الرومانسية
نورتيني يا قمر ويارب علطول تنوريني

---------------------------

shabfa2re
برج الثور مفيش فى عنده ولا نشوفية دماغية.. وحتى فاق برج الددي فى عنده.. لكن طبعا طبعا احسن من برج بيزا وايفل
ههههههههههههههههههههههههه
نورتني ياباشا

--------------------------------

أبو العريف
هههههههههههههههههههه
دة برج مسالم قويييييييييييييييي يا ابو العريف والله... متصدقش الاوشاعات المغرضة اللى انا بطلعها علية دى
نورت يا باشا وربنا يعينك على الغربة ويقويك عليها

-------------------------------

الفراشه الحائره
والله يا قمر انتى اللى ثكر وعثل كمان
مممممممممممممواه

---------------------------