الأربعاء، 20 مايو، 2009

حكاية زيزي.. وكلام للأهل والبنانيت

مبدأيا كدة الموضوع المردي طويل شوية
القصة دى انا اترددت كتير فى كتابتها.. ولكن تشجعت لما استأذنت صاحبتها وكمان علشان تقرأ تعليقاتكم ورأيكم.
زيزي.. بنت عادية جدا.. اتربت فى زمن مش بتاعها.. عمرها ما حبت مش لأن قلبها صلب ولا انها معقده.. لكن علشان محدش شاف قلبها بجد.. اتعلمت مبادىء الناس بقت بتعتبرها ضعف وسذاجة.
وهى عندها حوالى 21 سنة اتقدملها ابن عمتها.. وهى وافقت لانه مكنش شخص وحش وعارفينه.. لكن زيه زي معظم شباب مصر (وعفوا سأحتفظ بلقب رجل للرجال فقط).. بيصيع مع اصحابه وبيشربوا بانجو من ورا أهلهم (دة على اساس انه بقى عادى يعني وانه طيش شباب وهيعدى).. وبيتفرجوا على أفلام أبيحة (من غير أى اعتبار لحرمة بيوتهم وأخواتهم البنات وأمهاتهم.. وبقي عادى يعنى مهم بيشوفوا أبهاتهم كمان فاتحين القمر الأوروبى فى الخباثة ـ يكش يارب كل اللى بيعمل كدة يجيلة زغطة مزمنة ـ).. "وعموما جايالكوا ياشباب مصر فى بوست تانى افشششش غللى المكبوت منكم ومن عمايلكم السودة المهببة ـ كتكوا البلاوى مليتوا البلد ـ".
المهم انها قعدت سنة مخطوبة كل يوم عن التانى مشاعر البغض بدأت تظهر وتزيد.. لغاية ما اتفقوا انهم يفسخوا الخطوبة "وطبعا مامتة اللى هى عمتها اللى لما يشوفها حد لأول وهلة يقول انها بتاعة ربنا وحقانية شالت الموقف فى قلبها ولم تترك اى فرصة لتلئيح الكلام أو الشماته أو عدم صلة الرحم فيما عدا المصلحة إلا وانتهزت الفرصة دى".
فضلت زيزي خالية القلب لغاية سن 24 سنة تقريبا.. والدها ووالدتها كان ليهم صديق مقرب من المثقفين.. وكان ماسك الصفحة الأدبية فى جردية قومية فى يوم من الأيام.. والصديق دة مات من فتره وكان له ابن وبنت.
وشاءت الظروف ان احدى الوسيطات تتدخل فى تعارف زيزي على ابن المرحوم المثقف.. اتكلم فى البيت.. وقال ان نيته الجواز وحابب يكلم "مهمة كلمة يكلم مش يشوف" زيزي علشان يتعرفوا على بعض أكتر.. لحد هنا وفل واخر تمام.
نظرا لأن زيزي وأسرتها جاهلين بخصوص الأعراف الاجتماعية.. وبيعاملوا الناس على أساس أنهم متفتحين ومثقفين وعقلهم كبير.. واتفقوا على اللقاء فى نادى قريب جدا من منزل ابن المثقف.. وحصل قبول وتم كذا لقاء تانى فى وجود الأسرة وتقرر ميعاد الخطوبة.. وزيزي لأن طبع بيتهم كدة فقد اتفقت هى وابن المثقف على ترتيبات حياتهم واتكلمت بكل صراحة فقالتله انها مبتحبش الدهب ولو هو عايز يجيب شبكة فبراحته وهى مش هيفرق معاها.. وان الفيللا اللى بتتعمل فى أكتوبر مش مشكلة وهى ممكن تسكن معاه فى شقة مامته لغاية ما ربنا يسهل.. وبالفعل جاب شبكة أقل من متواضعة مع ان امكانياته مرتاحة جدا وميسور الحال جدا جدا.. وتمت الخطوبة وتحدد ميعاد مبدئى للفرح فى خلال سنة أو اتنين.
فى خلال كل المقابلات العائلية والاتصالات كان يبدو على مراة المثقف انها بخيلة شويتين تلاتة وكلامها دايما ان ابنها نفسيتة بقت حساسة قوي من بعد وفاة باباه المثقف.. وكان ابن المثقف فعلا سيرة باباه بتخليه فى حالة عصبيه وتحفز عجيبة ودفاع عن عبقرية أبوه الوحيد اللى كان ليه فى الدنيا واللى كان مكتشف "عبقريته" هو شخصيا.
وبعد حوالى اسبوعين من الخطوبة أعلن ابن المثقف انه ابتدا تجهيز فيللا اكتوبر وهتنتهى كمان 6 شهور وطالما كدة يبقى نعجل الفرح.. واتحجج لوالد زيزي انه مش عايز يفك الوديعة واداله 12 الف علشان العفش وتجهيز البيت وقاله العروسة تنزل تنقى على ذوقها وان المكان عبارة عن حجرتين وصالة كبيرة وسفرة وأودة مكتب "والحدء يفهم".
وفى وسط كل الأمور دى كانت أم زيزي عارفة ان زوجها توسط لصديقة المثقف ده علشان يودى ابنه "اللى هو العريس يعنى" لطبيب نفسي مشهور صديق لوالد زيزي.. وطلبت ام زيزي من زوجها يروح للطبيب النفسي دة يعرف هو كان رايح ليه.. فرد أبو زيزي وقالها انه راح بالفعل.. وان ابن المثقف كان رايح علشان مر بأزمة نفسية فى الجامعة قبل كدة مش أكتر.
وبدأت عصبية العريس تبان وكان دايما بيعتذر وبيقول انه كان بياخد أدوية ومنعها علشان يعمل رجيم فالحكاية دى ماثرة عليه.. وحركات تانية كتير حصلت ونظرا لسذاجة زيزي وقتها فهى مستوعبتش الوضع.. دة غير انها كانت متصورة انها بتحبه ولازم تضحى علشانه بينما فى الحقيقة هو كان صعبان عليها حالتة النفسية بعد وفاة والده مش أكتر.
ميعاد كتب الكتاب اتحدد بعد فتره لا تزيد عن شهرين.. ونزلت زيزي وأسرتها يجيبوا العفش "بدون ما العريس يخطي معاهم خطوة واحدة فى أى مشوار.. ولا ليه أهل بانوا ولا كبير غير ابن عم واحد.. والحجة انهم متخانقين على ورث".. وأثناء اللف والفرجة راح العريس كلم العروسة فى التليفون وقالها انه متردد فهى قررت انها تفشكل الموضوع.. فباباها ومامتها قعدوا يقولولها احنا اشترينا العفش خلاص وفكري كويس ومش أى حاجة تزعلى منها وكل الكلام الاقرع دة.. وحصل بعدها مشادة ما بين اخو زيزي وباباها تم على اثرها تعجيل كتب الكتاب "بعد اسبوع من المشادة دي" بناء على قرار باباها عندا فى أخوها.
حاولت زيزي ومامتها وأختها تأجيل الميعاد لعدم راحة قلبهم وعدم راحتهم من التسرع ده.. وكان رد فعل بابا زيزي عنيف قوى وانه ادى كلمة للناس وعيب قوى يطلع عيل قدامهم وان ابنه مش هيمشى كلامه عليه.
انكتب الكتاب واتحدد معاد الفرح بعد شهر ونص منه.. شافت زيزي فى الشهر ونص ده عذاب لا يوصف سواء بدنى فى شراء ما امكن من مستلزمات البيت.. أو نفسي حيث ان ابن الـ......"مثقف" بدأت تصرفاته تبقى غريبة وعجيبة وقال انه عنده حالة نفسية من بعد وفاة باباه وبياخد أدوية ولما بيمنعها بيتعب.
كل ده وبابا زيزي ومامتها فين؟.. ملخومين مصدومين مذبهلين مش فاضيين.. الله أعلم.. ولكن الاكيد يا جماعة ان ساعة القدر بيعمى البصر.. وخلاص فاضل يومين على ميعاد الفرح.. وابن المثقف ليلة الفرح قال لزيزي ان عنده مرض اسمه الفصام أو الذهان.. "والمرض دة للى ميعرفوش مرض من الأمراض العصبية اللى بيتغير فيها كيمياء المخ بحيث ان المريض بتجيله حالات هياج بيبقى خطر فيها على نفسه وعلى اللى حواليه.. ولما بياخد ادوية معينة بيبقى طبيعى".
زيزي انهارت وقالت لمامتها ومع ذلك الفرح استمر وكان يوم ما يعلم بيه الا خالق الخلق.
17 يوم قعدتهم زيزي فى بيت غريب.. وابن المثقف ينزل معاها يجيب حاجات وينساها فى الشارع فى نص الليل فى منطقة نائية.. ينزل يصلى فى الجامع ويطلع مش طايق نفسة علشان الناس بيطالبوه يبقى إمام الأمة الإسلامية.. يمشي بالعربية فى الشارع وكل العربيات السودة بتطاردة لأنها تبع المخابرات الروسية اللى بتطاردة علشان تستفيد بعبقريته لحسابها.. يحلل اسمة فيتوصل لان هو المهدي المنتظر.. 17 يوم يهدوا جبل انتهوا علي حالة انهيار عصبي فى الفجر وتانى يوم رجعت بيتها.. وبرحمة ربنا رجعت "بنت" بردوا بس بنت منهارة نفسيا وعصبيا.. لغاية ما عرفت تاخد ورقة طلاق بعد عذاب ومثبت فيها انه زواج صوري فقط وليس زواج كامل.
زيزي الوقتى الحمد لله استردت كتيييييير من نفسها.. عندها 27 سنة بس قلبها واحساسها لسة يدوب 11 او 12 سنة بالكتير "واديها بتلسوع زى الدب القطبى لما بتضرب"..وطبعا لم تسلم هى أو مامتها من شماتة عمتها فى كل موقف وكل مناسبة أو بدون مناسبة حتى.
زيزي الحمد لله ثابته على رأيها انها لو ملقتش حد كويس ومناسب ليها يبقى فى ستين داهية الجواز وقلته أحسن وبلا وكسة وخيبة قوية على رأيها.. وكمان مصرة انها لو لقت الشخص المناسب هتقوله على الحكاية والرواية بينما الناس بتنصحها تقول انها اتكتب كتابها وبس "وانتوا رأيكوا إيه؟".
وانا عايزة الوقتى أقول لكل الأبهات ان اللى يسأل ميتوهش.. مش هتموت لو سألت كويس عن اللى بيتقدم لبنتك حتى لو كان ابن أعز أصدقائك.. اسأل عليه فى شغله وفى بيته وفى اى خرم إبرة ممكن تسأل عليه حد فيه.. وبعدين كلمتك لو تعارضت مع مصلحة ولادك تنزل ونص كمان.. مش عند هو يعني.
وأقول لكل الأمهات بلاش سلبية بقى.. فى ستين داهية كلام الناس اللى "هتقول ايه لو لغينا الفرح بعد ما عزمنا الناس".. ما يولعوا الناس.. طب انتى أخدتى منهم ايه الوقتى؟.
وعايزة أقول لكل بنت ابسط حقوقك انك تكوني معززة وان الراجل يتعب ويتمرمط فى فرش بيته "بغض النظر عن الامكانيات المادية".. وعلى الأقل ينزل معاكى فى كل المشاوير.. وانتبهى قوى لكلامه ومتسمحيلوش يغلط فيكي بأى شكل من الأشكال.. فرقى بين الحب الحقيقي وأى نوع تانى من أنواع الانجذاب سواء شفقة أو اعجاب أو اى حاجة تانية مفيهاش احترام وتفاهم ومودة.. اتأكدى انه عنده القدرة الجسدية والعقلية والروحية انه يتحمل مسؤولية بيت.. متسيبيش نفسك لماما وبابا يكونوا أصحاب الرأى فى اختيارك ولا تسمحيلهم يضغطوا عليكي لو انتى مش مستريحة للى قدامك.. حتى لو قالولك "السكافة مبتأكلش عيش".. لأنك انتى اللى هتتحملى نتيجة اختيارك فى الاخر.
وفى الاخر.. قول رأيك من غير ما تجرح حد من اللى فى القصة.. بس كده.

45 اللي عبروا منوووشة:

3abratalsabeel يقول...

السلام عليكم

بصراحة الكل غلطان
والكل غمض عينيه ومشى وكمل المشوار
والحمد لله هى تعتبر لسه عروسة حقها تحب وتتحب
والحمد لله كمان انها اتعلمت الدرس

العند طبعا اكبر غلط فى الزواج لان الزواج ده مشروع العمر كله

كلامك كله صح محتاجة راينا فى ايه ؟
تبدا صفحة جديدة وتتعلم من الدرس وربنا يرزقها ا شاء الله بالزوج الصالح
بس ما ينفعش ما تقولش للزوج المستقبلى ان شاء الله انها ما اتجوزتش
تحكيله بس بعد ما تتطمن ان هو ده شريك الحياة المناسب ليها وتحكى بصدق
قدر وفهم كان بها ما قدرش يبقى لسه النصيب ما جاش

وهو مين ما بيشمتش دلوقتى ؟
ده الاخ بيشمت فى اخوه وبيحقد عليه
مش عايزة حماتها تشمت فيها ولاى عمتها
بلا وكسة

سلام عليكم

3abratalsabeel يقول...
أزال المؤلف هذا التعليق.
Sweet Violet يقول...

ماهو الخوف من كلام الناس او العند او الخواطر دايما عواقبهم بتكون مش كويسة

بس المهم انها الحمدلله خرجت من التجربة بسلام و اتعلمت الدرس علشان مش تكرره

اما موضوع الناس اللى بيقولوا لو جه الشخص المناسب مش تقول الحقيقة و تكتفى انه كتب كتاب

ده كده يبقى اكبر غلط لان ده اسمه غش و خداع حتى و ان كانت لسه بنت هو بردو من حقه يعرف الحقيقة و عليه الاختيار بعد كده

و كمان يعرف منها و تكون البداية بينهم مبنية على الوضوح و الصراحة افضل من انه يعرف من بره "لان الحقيقة دايما بتظهر مهما طال الوقت " ووقتها العواقب هتكون غير حميدة

فــاتن يقول...

اكيد اللي حصلها صعب وفعلا كويس انها طلعت منه باقل خساير ممكنة... انا شايفة ان الوضع كان ممكن يكون اسوأ لولا ربنا لطف بيها...
تحمد ربنا .. وتحاول ما تكتئبش... يعني ما تقسيش علي نفسك.. هو قضاء وقدر..

وبالنسبة لأنها تقول لزوج المستقبل والا لأ..

أنا رأيي انها تقول طبعا.. لأنها ماليهاش ذنب في اللي حصل.. وده حاجة ممكن تحصل لأني حد ثاني..

واكيد لازم يكون الزوج شخص متفهم كفاية..

وربنا يوفقها ويقويها

عاشقة الأحزان يقول...

السلام عليكم
بصراحه الكل غلطان
ده من وجهة نظرى هو فى لسه ناس كده
المهم الحمد لله على قد كده
وكفايه الخسائر
وهى بقا تبتدى حياتها من جديد
ربنا يوفقها يارب ويصلح حالها
دمتى بألف خير
وجزاك الله كل الخير
انوسه

قلب ارهقته الاحلام يقول...

اززيك ياقمرر الاول ووحشاني

بصي هو الغلطان الاساسي في الموضوع الاهل طبعا

لان كان فيه علامات كتيرة جدا مقلقة وتخوف من الاول وصمموا انهم يكملوا الموضوع

تاني حاجه زيزي كمان غلطانه لاني دي حياتها وكانت لازم تصمم علي اختيارها

سواء كان بقبول او رفض ازاي واحدة توافق في الزمن ال احنا فيه ده ويتكتب كتابها غصب ؟؟

انا افضل ان الواحدة تفضل ف بيت اهلها بعيدا عن اي تجارب محتمله الفشل زي مازيزي قررت ف الاخر

الغرض الاساسي من الجواز هو الاستقرار والامان ولو دول مبدئيا مفقودين يبقي ليه الجواز ؟؟

ورايي برضه انها لازم تقول لشريك حياتها ال هييجي ان شاء الله ويكون جدير بيها

لما تطمن له وتحس بالامان معاه لان لازم يكون فيه صراحة من الاول ف كل حاجه انا مقدرش اطالب طرف بأنه يكون صريح معايا وانا بخبي حاجات

وربنا يارب يوفقها ويرزقها بالي يستاهلها ويقدرها

وربنا يوفق الجميع

تحياتي ,,,,

akeed يقول...

اولاً تحياتى الحارة على القصة الجميلة التى تحتوى على عبر كثيرة جداً.

ومنها ان الاب لا يجب ان يتنازل عن معرفة العريس معرفة تامه وان يسأل عليه حتى ولو يعرفه معرف سطحيه وان يرى عمله وان يرى شهادته ايضاً واحواله مع الناس ولتكن لفتره يحددها والد البنت لأن الله سبحانه وتعالى سوف يحاسبه على ذلك لان الله جعل الزواج بولى و فى الغالب يكون الاب فيجب الا يظلم ابنته ولا يتسرع حتى ولو كبر عمرها سوف يأتى لها رزقها لا محاله فلا نتعجل بالزواج و بعد ذلك تأتى مطلقة او معها اولاد و تحدث مشاكل لا حصر لها .

فنصيحتى الى الاباء ان يتقوا الله فى بناتهم و ان يعلموا احوال الخاطب و خاصة فى العبادات و الدين لان الايمان هو اساس الشخصية السليمة ، الى البنات : اختى لا تتسرعى فى اختيار شريك حياتك لانك سوف تعيشين معه باقى عمرك و لو كان لا يوجد توافق بعد الزواج ووجدت طفال سوف تضحين من اجل اطفالك و تعيشين تعيسه و انصحك ان تقتربى من الله اكثر واكثر لكى يرزقك بالزوج الصالح .

تحياتى على البوست الرائع

مسدس صغير يقول...
أزال المؤلف هذا التعليق.
احساس طفلة محبة للرومانسية بس واقعية يقول...

الجواز عايز مجتمع صريح عندة اخلاق مش بيهتم بالمظاهر بيقدر الظروف والاخلاق صح

اصل ممكن الاب يسال وبرضو يكون كل اللى شافه وعرفة وسال عنه مجرد مظاهر العريس يضحك بيها علية زى ما بيضحك على كل المحيطين بية مظاهر مش هتكلفة حاجة

بس فى القصة العريس مخدعش بس وهو الطرف المخطئ
لا كمان اهل البنت وهى نفسها عليهم لوم
لانهم مأخدوش بالاسباب وفكروا صح فى تصرفات الشخص دا واهلة

عندها حق فى انفصالها عن ابن عمتها ومهما كان كلام الناس ارحم بكتير من عذاب اضافى ربنا كان هو وحدة اللى عالم بية

الحمد لله هى وضعها افضل بكتير من غيرها وهى مبدائها صح استفادت من اللى حصل وعرفت ازاى تأخد قرارات صح

اخر حاجة جت على بالى جملة ستيتة
لو كانت الظروف المادية متيسرة فى اى زواج
ورغم كدا حصل مشاكل ولقيت ان فى حاجة غلط
فاهرب من الجوازة دى لان ربنا بيدينا امارات

بتهيالى دا اللى حصل مع زيزي واهلها
ربنا يوفقها وييسرلها طريقها
ويرزقها على صبرها خيرا

تقبلى مرورى
تقبلى مرورى

ستيته حسب الله الحمش يقول...

شوفي مش انا بربنط اصلا

بس قصص زي دي بتجيبني لمس اكتاف

بلاقي نفسي خرساء وعلى وشي علامات البله المغولي

هو قدر طبعا بلا شك
بس فيه شيء اقوله لزيزي

شوفي يا بونيتي فيه شيء اسمه ابتلاء
ابتليت بأب وأم حلوين وبيحبوكي وعاوزين يشوفوكي في بيت العدل
بس المشكلة انهم ما أتأكدوش انه عدل أو عوج

كونهم رضيوا بكل الظروف وداخوا في الجهاز ده معناه انهم متفانين بس للأسف معندهمش حسن تقدير

انا اسفة يا منوش مقدرش مغلطش فيهم اسفة جدا ليكي ولزيزي

شوفي اقدار ربنا ان ابو زيزي شخصيا وبشكل شخصي يعرف عنوان الدكتور النفسي اللي الواد راح له ومع هذا مخفش ولا سأل ولا أهتم بأن الواد دفع فيها تمن اوضة واحدة وهو عنده فيلا

الأم زي كتييييييييييييييير من امهات مصر اهم شيء عندهم الناس ها تقول ايه .. أهي قالت بس البنت اتعقدت

برضه يا زيزي انتي كبيرة يعني هم ما جوزوكيش وانتي 18 سنة لأ ده انتي ست كبيرة ومؤكد جامعية يعني كنت تقدري في اي مرحلة تقولي لع بس مقلتيش

المهم والخلاصة ان كل ابتلاء بيأتي بعده ما يسمى بجوائز الصبر على الابتلاء

دي جوائز حلوة قوي قوي من رب العالمين
ممكن تيجي على هيئة نجاح في العمل والحياة
ممكن تيجي على هيئة رجل حقيقي يعوض الصبر اللي فات
ممكن تيجي سكينة للنفس المتعبة المتألمة

لا تتزوجي اطلااااااااااااقا الا رجل وقد اصبحت ذات خبرة بالاصناف الزفت التانية

ولما يجي راجل حقيقي "بالمناسبة انتي مش ممكن والله اعلم تتجوزي جواز صالونات" لأن اللي يشوفك صح لازم فعلا يحسك ويعرفك .. ساعتها ها تقولي له الكلام كله وهو ها يحضنك حضنك كبير قوي وها تحسي انك مشفتيش قبله حد

اصبري واحتسبي وخليكي على صدقك واسألي الكريم اللي عطاءه ما له من نفاد

اكرمك الله انت وكل بنات المسلمين

تحياتي

فتاه من الصعيد يقول...

بصى....ربنا معاها....وهى ضحيه الاهل لانها كانت لسه صغيره
المهم....بصى اهم شىء السؤال على الانسان فى مكان عمله ثم سؤال الجيران ثم المقربين.....ولازم اهل العروسه يقعدوا مع العريس اطول فتره لانهم ليهم نظره
دى اهم طرق السؤال....وبجد ربنا معاها....بس ساعات قله الخبره بتكون هى السبب
بس ليه اهلها اصلا وافقوا فى الاول على الولد البايظ ...وبعدين المريض العقلى....والفصام ده اعراضه بتكون واضحه ولازم كانوا يقعدوا معاه وبلاش سلقق البيض ده
يلا ساعه القدر....بس لازم تحذر من المره القادمه....بس ما تفقدش الثقه وتلتزم بالخطوات المعروفه لمعرفه سلوك اى عريس لاى بنت
ددمتى بخير....تقبلى مرورى

ABOALI يقول...

اولا احييكى على نقلك الرائع والمميز للموضوع
ثانيا احيى فيكى الفكر الراقى الواعى وهما دول البنات اللى محتاجنهم دلوقتى بدل بنات توتو وميزو

ثالثا
لب المشكلة فى الاستعجال من جانب اسرة العروس فى ستر ابنتهم
وحينما يسطر هذا الشعور على اسرة فعلا تتغافل الاعين عن كثير من الامور التى يجب ان نكون واعيين لها

رابعا
اختيار الزوج له كثير من المواصفات فى الدين
اهمها الصلاح الدين
وليس صلاح دينى فقط ولكن ان يكون كيس فطن مش كيس قطن ولخمه
قوامة الرجل على حواء لم تاءتى باءمور المهر والشقة
وانما لها دلالات رجوله واضحه من حماية اهل بيته ورعاياتهم

خامسا" اذا تقدم عريس مرة ثانية له الحق فى ان تحكى له ما تم لاءنه ليس فيه ما يشينها
فاءن كان رجل بجد مثلما قولتى سيعرف ويدرك عظمة تلك البنت ومعدنها الطيب
ولكن

لى عتاب على صاحبة تلك البوست

عدم الزواج ليس نهاية الحياه
فنحن لنا حياه اخرى هى الحياه الحقيقه
فاءنتى لؤلؤه لا تعطى نفسك الا لمن يصونها


تحياتى لك دائما

ايوشة يقول...

كوكتيل غلط من اول البنت ابوها ومامتها وكل الناس اللى فى القصة دى هى كانت سلبية اوى وراضية ومعرفش هى كانت مستعجلة ليه على جواز مش مضمون من اول شاب اتقدم لها عارفة انه بيشرب بانجو وومعرفش ايه كان طبيعى ترفض ولما عرفوا انه مرض التانى مزمن ازاى يكملوا للاخر ده اللى بيسموه جوازة والسلام
ان شاء الله ربنا هيكرمها بانسان كويس باذن الله يقدرها بص انا شايفة انها تصارحه بكل شئ لو حد اتقدم وتقوله انا كانت متجوزة مش كتب كتاب بس وهو لو انسان كويس هيقدر ومش هيفرق معاه الكلام ده كله

شمس النهار يقول...

الحقيقه
القصه دي بتتكرر كتير جدا عشان كده نسبة الطلاق في ارتفاع
والحقيقه البنيه عانت كل الاسباب اللي تؤدي للطلاق
من افتقار للمنطق في الاختيار لعند وتكبر من الوالد لتسرع
لمشي ورا كلام الناس
لمنطق ظل راجل والا ظل حيطه
لا كده الحيطه احسن
المهم العايط علي الفايت نقصان عقل ودين
هي تحتسب ماحدث
وتخللي بالها المره الجايه واعتقد ان والديها اخدوا درس
وهي كمان تبطل سلبيه شويه

اخطر زواج هو المبني علي عند

حنعيش يعنى حنعيش يقول...

فستين الف داهية كلام الناس ...يا عالم ارحما بناتكم ...ياعالم روحوا ربوا نفسكوا الاول وبعدين انصحوا اللى عايزين تنصحوة ...وبعدين ماتزعليش قوى من الشباب ....دى الابهات العن

ادم المصرى يقول...

على فكره انا شايف انك قلتى كل المفيد وكل كلامك كان صحيح وافتكر رأينا اتقال وانا اضم كلامى وصوتى لصوتك

أم مالك يقول...

على فكرةيامنوشة
ده اصبح حال كثير من الاهالى دلوقت
على مسمع ومرئى منى
الغلاطات واضحة والاهل بتغمض عيتها
اما علشان كلام الناس واماعلشان خايفين
من العنوسة لبنتهم واللى حتسمعهم ايضا
كلام من الناس
انا رايى انها لو جه حد كويس وباذن الله
ربنا حيعوضها خير تقوله قصتها
وهى كده كده زى كتب الكتاب
ربنا يعف بنات وشباب المسلمين
ويكتب لهم الخير
تحياتى

أبو العريف يقول...

بصراحه
الاهل غلطانين
لانهم لازم يسألو كويس عن العريس
والبنت كان لازم تاخد الوقت الكافي لحد ما تعرفه كويس

تحيايتي

mimi يقول...

ايه ده ... ايه ده

انتي أبدعتي ... ونصايح إيه .. في مقتل

قولي لزيزي أن ربنا مع الصابرين ... وتتفائل وتحمد ربنا انها جت علي أد كده

تحياتي يا سكر

وحشتيني اوي

مسدس صغير يقول...

فاظفر بذات الدين تربت يداك واظفرى بذى الدين تربت يداكى.
فعلا لازم الاختيار يكون على اساس الدين زى النبى ما قال.
ولازم الام والاب ميأثروش على الابناء فى الاختيار لان دى حياتهم
بس يكون ليهم دور ارشادى طبعا
لان وجودهم وبحكم خبرتهم يفرق طبعا.
بالنسبة لموضوع انها متقولش للى جاى يتجوزها على موضوع الجوازة الاولى دى. ده غلط لازم تقول عشان هوه لو عرف من برة ممكن يقطع علاقتهم دى. والصراحة راحة على رأى وحدة..
هههههههه
احييكى على البوست الجميل

تامر علي يقول...

تجربة انسانية معقدة كالعادة في زمن أصبح الإنسان السوي فيه عملة نادرة ..... دلوقتي أصبح واجب على كل شخص داخل مرحلة جديدة في حياته انه يتأكد أولاً وقبل أي شيء وقبل أي مواصفات إذا كان الشخص المرشح ده إنسان سوي أصلاً ؟؟؟؟ معظم الحالات اللي عاصرتها وانتهت بالطلاق كالعادة كان أحد الأطراف (غالباً العريس ) شخص غير سوي (خُلل أو الصراحة راحة أو عنده فصام أو برانويا أو هسهس ) وكان واضح جداً وفيه ألف علامة في السكة ومع ذلك وبإصرار من البنت أو الأهل تقع الفاجعة المتكررة ..... طبعاً مش قدر ...سوء الإختيار مش قدر ....

أما عن الوضع الحالي فطبعاً البنت صح وتفكيرها صحيح وإن لم تجد شخص مناسب (وستجد إن شاء الله كما هو مشاهد) فرأيها صحيح ولا تستعجل ولا تلتفت لشماتة الأعداء (مع ثقلها على النفس الحساسة جداً) ولتتصبر بالدعاء والشكوى إلى الله حتى يأتيها الفرج قريباً بعون الله

تحياتي :)

تأثير الفراشة يقول...

السلام عليكم و رحمة الله و بركاته

أحييكى أولا على أسلوبك فى العرض و على آرائك

و للأسف الموقف ده فيه منه كتير و بأشكال مختلفة،...ربنا يأجر زيزى على ما أصابها و يخلفها خيرا منه، و بإذن الله ربنا هيعوضها كل خير، و مهم تكون صريحة مع الشخص اللى هترتبط بيه، و لو هو إنسان كويس فبإذن الله هيقدّر

نسأل الله صلاح الحال للجميع

تحياتى لكِ

تقبلى مرورى

MǿиY El-Shreef يقول...

ربنا يصبرها يارب

ان بعد العسر يسرا خليها تزود ايمانها بربنا

القصه صعبه اوي والتجربه اصعب بس الحمدلله طلعنا منها بفوايد

انا بجد مصدومه من القصه وسلبيه الاهل

بس الحمدلله ع كل شئ

ربنا يقدم الي فيه الخير

وحشتيني يا منووو

يوميات شاب منوفى يقول...

تجربة صعبة بس الكل مشترك فى الخطاء البنت بسلبيتها والاب بعصبيتة والام بخوفها من كلام الناس بس ربنا معاها ويرزقها بابن الحلال الى يعوضها خير

بـسـمـــة صـــــلاح يقول...

ياااااااااااااه ربنا يعينها بس الحمد لله انها عدت الحمد لله
بس انا شايفه بجد ان كل واحد غلطان من ناحيه

من ناحيه تقول للي هيتقدملها ان شاء الله دي مش عارفاها
بحكم اني لسه صغننه ومليش خبره في الحياه
بس انا اللي اعرفه اني بجد هدعيلها دايما
ربنا يسعدها
تقبلي مروري يامنوش العثوله المثكره

ساره يقول...

صاحبتك لازم تعرف ان الحياة تجارب
بس لا تخلى نفسها على طول فار تجار ل اهلها (اسفه على الكلمه)

هم طبعا المفروض يسئلوا عنه لانها حياة بنتهم
وهي صبوره كثير لانها بعد كم حركه من حركاتة زوجها السابق كان لازم تاخذ موقف وتفكر فى نفسها وكيف بتقدر تعيش وتخلف من انسان زيه

اما عمتها صاحبه وصلة الردح والشماتة
فتطلب من الله لها الهدايه لانها ما تستاهل انها تفكر فيها

ولازم وضروري تقول للعريس الجديد عن ماضيها لانه لا غبار عليه ... مجرد نصيب وامتحان من الله
لا تخجل من اللي حصل معاها لانه ربي كاتبه
الزوج الجديد ضروري يعرف انها كانت متزوجه وانفصلت بسبب حاله الزوج السابق النفسيه والعقليه
اذا عجبه الحال اهلا وسهلا اما اذا ماعجبه فى امان الله .. مش احسن مايعرف من احد ثاني بطريق الصدفه او القصد

الله يوفقها ويرزقها الزوج الصالح اللي يقدرها ويعوضها
ويرقنى ويرزقك يا منوش العووووووووووو اقصد يا منوش العسل :)

norahaty يقول...

السلام عليكم ورحمة الله تعالى وبركاته
يازين ما قلتى ونصحتى حقيقى.كل كلمة وكل حرف فى مكانه ومهما تكون الضغوط على الاموالابن او البنت
وحتى الابن لازم يقاموا .الزواج مسئولية كبيرة اوى اوى اوى .مهما عرفت انسان مش ممكن حتعرفيه الا لما تعاشريه بس على الاقل الحاجات الواضحة بتدينا مؤشر على حاجات اكتر مستخبية: فرضاً انفعال
شديد فى موقف ما يستحقش او التلفظ بالفاظ
جارحة فى وسط الكلام العادى وهكذا يعنى
كل ده بيدينا إشارة على خبايا هذا
الشخص.

فشكووول يقول...

منوش الحلوه .. ازيك
شباب اليومين دول يا منوش مش عارف ايه اللى جراله
بس هما معذورين لا عندهم قدوه ولا عندهم امل فى اى حاجه والدنيا مقفله قدامهم
بس صاحبتك عندها حق على رأى المثل
قعدت الخزانه ولا جوازة الندامه ... كلام ستات
تحياتى

الفراشه الحائره يقول...

علامات استفهام حول علاقات الشات من هنا http://frasha7a2ra.blogspot.com/ من ابداعى يا رب يعجبك

عمرو يقول...

و الله قلبى وجعنى على الصبح يا منوش لأنى حسيت بوجع البنت اللى حظها ملخبط كده ..
بس الحقيقه أن زيزى بيقع عليها الخطأ برضو يمكن أكتر من أهلها لأنها مش صغيره يعنى و لا طفله و لا جاهله علشان تسمح بهذه المهازل أن تحدث فى حياتها ..
المرض النفسى مش عيب و لا حرام لأنه مرض من عند ربنا بيبتلى بيه عبده زيه زى أى مرض لكن مش فرض علينا أننا نرتبط بمريض نفسى و حالته مش سهله و لا هينه زى ما حكيتى و لو ماكنش علشانا يبقى علشان عيالنا اللى حنخلفهم منه ..
لابد من التأنى الشديد و السؤال مرتين و تلاته و عشره عن العريس و النبش فى حياته و أسرارها بدقه متناهيه و ده مش عيب لأن ده جواز و عائله بتكون و مستقبل و حياه و عيال و شغلانه كبيره و لازم الأهل ما يتسرعوش أبدا و لا يضغطوا على بنتهم فى جواز أو خطوبه ..
ربنا معاها و الله زيزى و أرجو أنها تكون أتعلمت الدرس و مش حتقع تانى الوقعات الصعبه دى ..
تقبلى تحياتى و تقديرى ..

أحمـــــــــــــد أبو العلا يقول...

هههههههههههههه
MaNoOoSh
زغطة مزمنة؟
هههههههههههههه

جبتيها منين ديه بس؟

بصي يامنوووش
هيا انسانه رائعه بجد لو فضلت مصممه على موقفها انها لما تقابل الشخص المناسب (وده ان شاء الله هيحصل) انها تحكيله على كل حاجه
لسببين:
الأول عشان ميكونش فيه اي مجال للخداع
والتاني لأنه ببساطه لو يستاهلها بجد هيفهم, لكن لو مسيتاهلهاش هيمشي وهيا اللي هتكون كسبانه. هتكسب نفسها قبل اي شئ

انا مش هعيب في حد زي مانتي طلبتي
بس انا مستغرب من موقف الأهل
هل ممكن التضحيه بسهوله كده بالبنت عشان العند أو العيب؟
شئ غريب جدا


انا كنت غايب بس رجعتلكم تاني اهوه
مين هنااااااااااااااااااااك؟

د. ياسر عمر عبد الفتاح يقول...

أنا دمي محروق من أبوها
ولو اكلمت أكثر من كده ممكن أغلط فيه
ربنا يسامحه
ويهدي كل اولياء الأمور

أم أحمد المصرية يقول...

كده بردوا اول مرة ازورك اجد القصة اللي تزعل دي لاحول و لا قوة الا بالله
لو عايزة رأي بجد زيزي و اسرتها غلطانين و في الغال قلقهم من شماتةعمتها هو اللي خلاهم يستعجلوا
و عندي سؤال لزيزي هل صلت استخارة قل الموافقة عليه ؟
اما الخطأ الكبير فهو خطأ والدها سامحه الله يعني عارف ان العريس كان بيتعالج و هو قالهم انا اخد ادوية و ردوا لم يشك و يذهب للطيب ؟؟!!!
ربنا يجعل المحنة دي في ميزان حسناتها و اكيد ربنا حيعوضها خير في حياتها بزواج او غيره لأن الله لا يظلم احدا لو وثقت في كده اكيد حترتاح

النسبة بقي لو جالها عريس انا اؤيد الصراحة التامة لأنه لو اكتشف انها خبت عنه حاجة زي دي حيبقي هدم للثقة بينهم

dody يقول...

بجد أغلب الناس دلوقتي بيتصرفوا طبقا للمثل ...ظل راجل ولا ظل حيط... وقليل جدا ما تلاقي حد بيتصرف طبقا للمثل قعدة الخزانة ولا جوازة الندامى ... وللأسف هما لو حسبوها صح هيلاقوا إن قعدة الخزاني أحسن لأن جوازة الندامى هتسبب في القعدة نفسها بس مع عيل واثنين وثلاثة... غير الكلام الي هيطلع من الناس ...بجد ربنا يعين زيزي ويسعدها ويرزقها بابن الحلال الي يستهلها ولو تأملتي في حالة البلد هتلاقي الوضع دا كتير جدا....تحياتي على البوست الرائع بتاعك وهو فعلا تناول حاجة موجودة جدا وإحنا ضاربين طناش عنها جدا......

اسماء واحلام فى وجدانى يقول...

بقى انا متهور

الجواز و سنينه يقول...

و الله علقت على الموضوع ده مريتن و رغيت فيهم و مش عارفه الرغى راح فين؟

ذكري رحبل قلم يقول...

السلا عليكم
ابن المثقفلو حب واتحب الحب الحقيقي مش كانت زوجته هاتستحمله وتاخد الاجر والثواب مضاعف
طيب صحبتك زيها زي كل البنات عايزة تتزوج وبس عملت استخارة قبل الزواج قبل متحدد موافقة او غير موافقة
طيب استشارت حد كبير له ثقة
اشتارت قلبها
معتقدش
لانها قبلت من خطوبتها لابن عمتها وهو سوري فاسد ميصلحش اب لاولاده ده معناه انها بتفكر في نفسها وبس وعندهاش بعد نظر
انا مش هحمل عليها بالكلام انا عايزة اقول لها انها تتمهل ولا تستعجل مرة اخري واهم ما في الموضوع لا تبالي بكلام الناس وتخرج للعمل ان امكن عمل محترم موثوق به حتي لا تندرج الي حفرة اخري وتتقرب من الله عز وجل قادر ان يهيء لها الصالح
ربنا معاها

اسماء واحلام فى وجدانى يقول...

فى تعليقات بتخلى الواحد يخرج من صمته

زى تعليقك حضرتك

اولا المكان عندى كله متامن والامن مستطب ونوبات الحراسة شغالة 24 ساعة يعنى الحمد لله اى محاولة كده ولا كده الخربشة هتكون فى المليان
وانا مش باهدد لا سمح الله انا باحذر خوفا من حدوث حرب اهلية بين المدونات لان زى ما حضرتك عارفة انا ورايا رجالة جامدة اوى وخدى بالك ان مدونتك اصبحت تحت المراقبة بمعنى ان فيها جاسوس تبعى وكل تحركاتك انا على علم بها
اللهم بلغت اللهم فاشهد

beautiful mind يقول...

علي فكره الحكاية دي بتحصل لكتير جدا من البنات اللي بيرغموا علي الجواز لمجرد فكرة الجواز او للخوف من شبح العنوسه وقطر الجواز اللي اسرع من الصاروخ
الموضوع اللي كتبتيه بجد يستاهل اننا نتامل فيه شوية والبنت ان شاء الله ربنا هيكرمها باللي هيحول حياتها لجنه بس هي تصبر وتحتسب الايام اللي فاتت من عمرها
والحمد لله انها مازلت بنت زي ما بتقولي يعني مخسرتش كتير

صيدلانيه طالعه نازله يقول...

الاهالى دلوقتى بقى كل همهم انهم يجوزوا بناتهم قال ايه عشان يطمنوا عليهم مع انها بالمنظر اللى فى الحكايه دى لو قعدت معاهم العمر كله كان احسن لها بلا جواز بلا نيله
عشان يعاندوا فى عمتها يضيعوا بنتهم
المفروض نسأل و نفضل نسأل لغايه يوم الفرح و لو طلع فيه حاجه غلط مش عيب اننا نلغى الفرح
يعنى مش احسن من الطلاق و العذاب بعد كده
و ربنا يسهل لها فى اللى يعوضها خير عوض

اسماء واحلام فى وجدانى يقول...

قليل هم من يجبرون الاخرون على التحدث

اولا اشكرك على تهنئة الاهلى بالدورى وانا فرحان جدا لاسباب كتير لكن اهمهم ان تقريبا كل فرق مصر كانت بتشجع الاسماعيلى وبيقولوا اتنين على واحد حرام فما بالك بكل الحشد ده
الحمد لله على كل حال فالاهلى جدير بكل تاكيد ويتسحق الفوز بكل ثقة الحمد لله على كل شىء
ثانيا وده الاهم خبر خطف القطة ده اشاعة الغرض منها زعزعة الامن فى المدونة ونشر الفزع بين القطط والحمد لله القطط اللى عندى على اعلى درجة من الشجاعة والفدائية وانا واثق فيهم تمام الثقة
فياريت سيتك تشوفى اشاعة ممكن القط يصدقها لانك من ساعة ما كنتى عندى والقطط عندها هيستريا الضحك من كلامك وسبق وقلتلك انى ليا جواسيس عندك
بس خلاص
يلا باى

اقصوصه يقول...

اللي يعيش يشوف:)

امـنــيــتــي يقول...

بجد بجد رغايه كتيييير

انا من ناحيتي مبحبش اقرا الكلام الكتير
ربنا يحقق امانيكي ويوفقك

ياريت تدخل مدونه وتستمري بالمراسله بالمدونه

Bondok يقول...

السلام عليكم
مش عارف انا متأخر في التعليق ولا لأ
بس حعلق كده كده
اولا ربنا يكون في عون زيزي و انشاء الله ربنا يرزقها بالانسان المناسب
هو انا عاوز بس اقلها يا زيزي انت فين في كل ده
انت بتنسي انك انسانه ليها رأي و ليها عقل و ليها اراده و ان مفيش حاجه في الدنيا دي تتم من غير موافقتك حتى لو كانت رغبه والدك (مع الاحتفاظ بكامل احترامي ليه)
بس مفيش حاجه اسمها انا اديت كلمه للناس
يعني كلمة ولا حياة بنتي
انا من انصار المقولة بتاعت ان الغلطات دائما بتقوي الانسان و كل ما الانسان مر بمشكلة لازم يخرج منها متعلم حاجة جديدة
انت دلوقتي لو فكرتي بايجابيه في كل الي حصلك حتلاقي انك اصبحتي انسانه قادرة تماما على انها تختار صح وتقول رأيها بصوت عالي من غير متخاف من حاجه
ده في حد ذاته انجاز عظيم ليكي
نقطة اخيرة الراجل الي يستهلك مينفعش تخبي عليه حاجه لانه حيشوف الايجابيات في قصتك مش السلبيات خصوصا لو كانت الايجابيات دي موجوده في شخصيتك دلوقتي لو مشفش يبقى مش هو ده الراجل المناسب بكل بساطة و منبكيش عليه
"اذا امنتم للرجل دينه فزوجوه"
و دينه دي مش معناها دقن طويلة و صلاة و صوم و بس
لا دي اخلاق كامله
بروزيها دي و فكري فيها كويس و قوليلي رأيك

mosooz يقول...

السلام عليكم بداية ..بالنسبة للى فى القصة ..فالكل رد عليكى اعتقد اجابات شافية ..
ولكن انا معترض على حاجة معينة اولها..ان مش كل شباب مصر زى ما انتى بتقولى كدة...فية الوحش وفية الكويس..وانا مبحبش حكاية التعميم دى خالص..
تانى حاجة..كلماتك الاخيرة والنصايح الجميلة دى..فيها مبالغة اوى ..يعنى متفتحيش ولا تقفل اوى..متسبيش زى اللى فى القصة كدة...وتقدمى حاجات على حاجات..والتعامل بطيبة اوى..ولا تتشدى اوى ..انا عارف ان البنت مش ملزم منها انها تجيب عفش ولا حاجة فى البيت ...الا فى الوقت الحالى ..الظروف بتحتم عليها كدة..انها تجيب حاجات وتساعد الزوج فى زمن قل فية الرجالة ..

وانا تعاطفت جدا مع زيزى ومع خطيبها..فزيزى كان المفروض يبقى ليها رأى صارم..علشان هى عارفة مصلحتها فين..ورغم المرض اللى كان فى خطيبها...انة كان المفروض المصارحة من الاول ..وربنا يشفية ويعافية يارب

تحياتى لاسلوبك التى سردتى بة القصة