الثلاثاء، 26 مايو، 2009

ميمي والتعلب المكّار

الأول أنا عايزة اشكر كل اللي ردوا فى الموضوع اللى فات.. وبعتذر عن عدم الرد عليه.. وزيزي قرأت الردود كلها.
وموضوع انها استخارت هي فعلا صلت صلاة استخارة.. وأكيد شافت علامات ان الانسان دة مش كويس.. بس زي ما قلت ساعة القدر يعمي البصر.. والمرض اللي كان عند ابن المثقف دة مرض وراثي دة غير إنه ممكن في أي لحظة يصحي يقتلها وللا يعمل فيها حاجة ربنا يسامحة بقى ويرحم امه وأبوه لان ميجوزش عليهم الا الرحمة.
وعموما ربنا يعوضها بالزوج الصالح اللي يسعدها هي وكل البنات (وانا كمان) يااااااااااااااارب.
*****************************
ندخل علطول في القصة الجديدة.. وأنا بحكيها علشان شفت واحدة أعرفها بتسيب بنتها الصغيرة مع الشغالة لوحدهم وقت طويل.. وعدت شغالة وبعدها شغالة تانية.. وعدت سنين.. والبنت سلوكها اتغير جداااااااا.. بقت بتسرق وتكدب وتعمل حركات في منتهى العجب وامها مستغربة قوي هي البنت بتعمل كدة لية مع إن مش ناقصها أي حاجة (غير الحنان ووجود الأم والأب).. فقررت أحكيلكم حكاية ميمي.
**************
ميمي بنوتة صغيرة عندها 7 سنين وردة بيضا مليانة براءة وشقاوة.. وعايشه في بيت صغنون مع بابها ومامتها وأخواتها.. والتعلب المكار ده يبقي خال ميمي اللي بيزورهم في أجازات الجيش في وقتها.. كان أكبر منها بـ12 سنة بس.. وكان أول واحد يعرف ميمي الفروق الجسدية بين الولد والبنت.. وتاني مرة كشف نفسه قدامها وقالها هو بيعمل إيه في نفسه.. وبعد كده لما ميمي كبرت شوية وجسمها كبر شوية بدأ في كل زيارة لبيت ميمي يتحرش بيها هي وأختها مع شوية ضحك ويفهمهم انه بيهزر معاهم.. وإحنا أصحاب ومحدش يعرف هزارنا ده.. وطبعا السذاجة قامت بدورها معاهم هم حاسين إن فيه حاجة غلط.. بس ازاي خالهم اللي أكبر منهم هيغلط؟؟.
وفي يوم وميمي فى المرحلة الإعدادية أختها قرأت شكوى لبنوتة في مجلة أطفال تحت عنوان "زنا المحارم" وكانت البنت بتشتكي في الموضوع من عمها ومضايقاته الجسدية ليها.. والمحررة قالت لها إن ده مش غلط بس لا وحرام كمان.. المهم ميمي وأختها اتفقوا إن لو خالهم قرب من واحدة فيهم وحاول يضايقها تنده على أختها التانية علطول تيجي تلحقها.. وبدءوا يستخدموا العنف معاه بكل ما استطاعوا من أظافر أو أسنان أو ما تيسر تحت أيدهم.. فبدا يستخدم الحيلة علشان يوقع بينهم.. بس معرفش لأنهم كانوا بيحكوا لبعض على كل حاجة.
وكبروا شوية وهو كمان كبر شوية.. وسافر بلد تانية أول ما خلص دراسته المتوسطة.. وقعد خمس سنين.. ربي فيهم دقنه وبقي يصلي الفرض بفرضه ولبس عباية المشيخة.. وفى الوقت ده كانت ميمي نفسها من جوة مجروحة.. مبتطيقش حد يلمسها ولا حتى أمها.. صورة الراجل جواها بقت عبارة عن حيوان يقوده جزء واحد من جسده (وهو ليس بالعقل ولا القلب).. براءتها وأنوثتها اندفنوا تحت حاجات كتيرة قوي هي متدركهاش وقتها.. شخصيتها بقت عدوانية ومتحفزة لأي شر في الناس.. مقدرتش تثق في أي حد.. وقرارات كتير قوي في حياتها اتأثرت بشخصيتها اللي علي السطح دي.
التعلب المكار لما رجع لابس عباية الشيخ وبيصلي الفرض بفرضه.. مع ذلك لم يثنيه أي شيء عن انه يتحرش بميمي وأختها بردو.. أحرجوه في مرة وقالوله أنت مش مكسوف ولا مستحرم انك تعمل حاجة زي كده وبعدين تروح تاخد دش وتصلي؟.. فقالهم انه كده أحسن منهم لأنه على الأقل بيصلي وهم لأ.. فما كان ذلك إلا درسا لميمي لتعرف أن مظهر الإنسان لا يعبر بالضرورة عن شخصيته ولا يعبر بأي شكل عن علاقة الإنسان بربه.. (فقد يلبس الثعلب الغدار عباءة الحمل الوديع فيصدقه الناس ويصدق نفسه بعد حين).
الناس كبرت بقى وفهمت.. وميمي كل مرة عن التانية رد فعلها بيبقى أعنف حتى كادت في مرة إنها تصيبه بالعقم.. ومرت الأيام وبالصدفة البحتة عرفت ميمي وأختها إن التعلب المكار كان بيتحرش بزوجة خال آخر في مقام والدته.. فما كان منهم إلا إنهم يقولوا لوالدتهم على أفعال التعلب المكار.. وكان رد فعلها الصدمة وازاي وامتى وفين!!! ثم الموقف السلبي علشان متخسرش أخوها ومتحصلش مشاكل.. وده كان شرخ كبير قوي في نفس ميمي من مامتها.. قررت بعده انها مش صغيرة علشان حد ياخدلها حقها وهى هتاخده بإيدها أو تسيبه لربنا.
قرر التعلب المكار انه يتجوز.. وبالفعل تزوج طفلة لم تتجاوز حتى نصف عمره.. معرفوش طعم السعادة الزوجية لأسباب كتيره.. وتحرشات التعلب المكار استمرت حتى بعد الجواز.. وقررت ميمي انها مش هتدخل بيته حتى لو أمها بكت بالدموع قدامها.. وإنها تعامل التعلب المكار كما لو كان غير موجود.. سنين طويلة والمرارة مالية قلب ميمي وتطلب من ربنا حقها هي وأختها علشان قلبهم يرتاح.. وفي كل تلك السنين لم يهنأ التعلب المكار مع زوجته مرة واحدة.. ورى زوجته جميع أنواع الإهانات.. وربنا مرزقهوش بأي أطفال.
لغاية يوم معرفش إن زوجته كانت حامل غير لما ربنا قدر للجنين ينزل في أول شهور الحمل.. زوجته فعلا صعبت على ميمي.. وميمي قررت بينها وبين نفسها تسامح التعلب المكار علشان خاطر ربنا يرزق زوجته بطفل يفرحها.. لكن مينفعش تسامح غير لو قلبها ارتاح.. وبالفعل ميمي واجهت التعلب المكار ورمت في وشه كل قذارته.. قالتله انه دمر نفسيتها سنين طويلة بسبب أفعاله.. وانه علشان خان أخته في ولادها فبيخاف على مراته وعايش في شك حتى من أقرب الناس ليه.. وربنا بيعذبه بأفعاله..
وأنها عارفة وهو عارف كويس قوي هو إيه من جواه وهي إيه من جواها فميحاولش يعمل عليا شيخ وينصحها تاني لأن نصيحته دي إهانة كبيرة ليها.. وطبعا قالت الكلام ده وهى أعصابها بايظة.. بس المواجهة وقرارها انها تسامح ادوها في قلبها قوة جامدة قوي.. طول حياتها بعد كده.. مش في الموقف ده بس.
والتعلب المكار عرف حدوده مع ميمي من بعدها.. وميمي كمان سامحته وحاولت تعامله كويس على قد ما تقدر.. وربنا رزقه بعدها بأطفال الله أعلم هيعلمهم إيه في الدنيا.
وأنا حكيت لكم الحكاية دي علشان تاخدوا بالكوا قوي من بناتكم.. وتعرفوا إن الأذى لو ربنا مقدرة علي حد ممكن يدخله من بين أيديه مش لازم يكون من الغريب بس.. وحاولوا توعّوا ولادكم.. لازم تكونوا انتوا مصدر ثقافتهم الجنسية.. بلاش تخلوها تيجي من الجهلة ولا التلفزيون ولا أصدقاء السوء.. خليكم قريبين قوي من ولادكم وتحسسوهم إن انتوا سندهم وضهرهم في الدنيا علشان ميدوروش على الحنان في الشارع.. لو انتوا قريبين منهم هتحسوا بأي تغيير يحصلهم لو لقدر الله حد كان بيتحرش بيهم او بيئذيهم.
وكمان بلاش تدلعوهم زيادة عن اللزوم علشان ميطلعوش زي التعلب المكار (اللى كان بيرضع لغاية ما بقى 6 سنين وبيفتخر بكده قوي).. لأن الدلع الزايد ميفرقش عن الجفاء وبيوصل لنفس النتيجة لكن من طريق تاني.
************
ملحوزة مفعوسة: هجاوب التاج في البوست الجاي واستعدوا بعدها لهجووووووووووووووم الجمعية.
نياهاهاهاهههاهاهاهاهاههاهاهاهاهها

69 اللي عبروا منوووشة:

اسماء واحلام فى وجدانى يقول...

اول

تعليق

للمواطن

الجديد

اسماء واحلام فى وجدانى يقول...

تانى تعليق

انا قلت انشر الفجر براحتى الاقى سيتك عندى

الحمد لله افسد عليكى الخطة

مش قلتلك المكان هنا فى جاسوس تبعى

يلا اى خدمة بس بلاش تحاولى تانى

مفيش فايدة

ستيته حسب الله الحمش يقول...

لما أفوق من النوم والصدمة يمكن اتكلم ويمكن لأ
شوفي الدنيا سمعت البني ادم حاجات كتير
بس كل يوم يتأكد ان الدنيا لا تفرغ عجائبها

وده على اساس ان ابو ميمي وامها بيمتحنوا إمتحانات الآباء "إكسترنر"؟
الناس دي عايشين مع العيال في نفس الشقة؟
كل اللي البنتين قدروا عليه سنين طويلة انهم يكلموا بعض؟
الأم عرفت عادي كده؟
هو بابا عادي؟ عادي
وماما؟ عادي برضه

الله لا يبتلينا احنا وكل الأمة ويطهرنا

اسماء واحلام فى وجدانى يقول...

طبعا الموضوع كبير اوى

انا قلت ارمى السلام واحذر

وان شاء الله هارجع بكرة علشان اشوف ايه حكاية

ميمى دى

MaNoOoSh يقول...

أحمد باشا
نورتني.. بس بردوا انا عايزة القطة اللى بترقص
عااااااااااااااااااااااااا


-----------------

ستوتة
الأب معرفش حاجة.. والأم من جهلها وسلبيتها معرفتش تاخد موقف علشان متخسرش أخوها وميحصلش مشاكل فى العيلة
والبنتين اللى قدروا عليه إنهم سابوا عاهات كتير فى جسمة وكادوا يفقدوه ذكورته فى كذا مرة.. بس من جهلهم وسذاجتهم معرفوش يعملوا أكتر من كدة.

طب انتي رأيك ان الصح اللى كان المفروض يعملوه ايه؟؟؟؟
يمكن حد محطوط فى نفس الموقف يقدر يستفيد يا ستوتة.


-------------------------

حسام غانم يقول...

متفق معاكي مية في المية

بوست جميل

وليا عودة إن شاء الله مع رد أكثر تفصيلا

تامر علي يقول...

أسوء ما في القصة إن البنات دول واجهوا المواقف دي لوحدهم بدون أب أو أم اللي كانوا عايشين في غيبوبة .... طبعاً العلاقة بينهم وبين أهلهم أكيد مقطوعة ولا يوجد بها أي رعاية أو متابعة .... أعتقد إن رد فعل البنات بعد ما كبروا غلط جداً ...مفيش سماح في الكلام ده ... الراجل ده لازم يتاخد ضده موقف صارم وإلا هايشيلوا ذنب ناس تانيه ... مش ممكن يكون مستمر مع أطفال تانين في نفس العائلة أو غيرها ... أعتقد لازم وقفة معاه .... ونصايحك كلها في محلها فعلاً

بوست ائع
تحياتي :)

ستيتة حسب الله الحمش يقول...

اولا البنات مكنش في ايديهم اي شيء يعملوه
هو فيه حد علمهم يعملوا ايه؟

ده ستر ربنا انهم فطريا قدروا ما يخدوش لقب مغتصبات من الفك المفترس ده

البنات لا تثريب عليهن زمان

لكن دلوقت انا مع رأي تامر علي جملة وتفصيلا
هم صدوه يضمنوا منين انه معملش بلوة في بنت تانية في العيلة او الجيران او حتى بناته هو شخصيا
ده كلب مريض ولازم يتحبس في قفص

طيب ها تقولي لي انهم خايفين على سمعتهم اللي هي وللاسف ها تتأثر وسط الأمم بقصة سودة زي دي

يبقى اولا الأب الغافل "اللي معرفش ها يقابل ربنا ازاي" لازم يعرف

الأم مفيش فيها أمل دي مصعبش عليها بناتها وربنا يعافينا ويسترنا انا لو مكانها أخرج كبده وأكله على اللي عمله في بناتي

ازاي الأم دي بتتكلم على صلة الرحم؟ رحم ايه في الكارثة دي

ثالثا كل العيلة لازم تعرف ومش مهم الناس اللي براها لو البنات خايفين على سمعتهم وده حقهم

انا بصقف للبنات دي جدا وهم فخر حقيقي لصدهم الفطري للكلب ده لكن سماح مين

لعلمك هم لم يسامحوا هذا الرجل
لأن ببساطة سماحهم ليه ضد الفطرة السوية

هم بس بيصالحوا نفسهم علشان يقدروا يكملوا عيشة

لكن تقولي لي بيقابلوه ويكلموه؟؟؟؟؟؟؟؟؟؟؟؟
ده يستاهل اللعن في كل مرة يبصوا في وشه

لازم اللي عنده بنات في العيلة يعرف
وكان لازم الناس تعرف من زمان
بس مش من البنات للأسف

لأ من الام الغافلة

ربنا يسترنا فوق الارض وتحت الارض ويوم العرض عليه قولي آمين

حاجات جوايا يقول...

السلام عليكم ورحمة الله وبركاته


موضوع مرعب بجد يا منوشة
بجد الدنيا معدش فيها امان خالص
ولازم نتوقع الشر من كل اللى حوالينا
ومن القريب قبل الغريب

موقف الام مش بس سلبى
ده موقف مقزز ومهين وينم عن جهل

كفانا الله وإياكم شرور الدنيا ومن فيها

-------------

البانرات يا جميل اللى طلبتيها هتلاقيها فى المدونة دى
http://khalekislamyour.blogspot.com/
انا خدت الشعار اللى شوفتيه منها وفيه 2 غيره


نورتى مدونتك بزيارتك يا قمر
فى انتظارك دائما

ام دودو

norahaty يقول...

المثل بيقولك ايه؟حرص ولا تخونش صح؟
لا قالك تحرص من مين ولا فين ولا امتى؟
لكن حرص وكون حريص مع كل انسان
يدخل بيتك ويبقى فيه حرية وسلاسة
فى التعامل مع اهل بيتك.

القمر الساهر يقول...

أول مرور لي في مدونتك الجميلة

انا قلبي وجعني والله من اللي بسمعه وبقراه كل يوم

بس ايه الام الغريبة دي يعنى ايه خايفة تخسر اخوها

وهي مش خايفة على بناتها

احنا في اخز الزمان ربنا يلطف بينا ويسترها معانا

يا اباء يا امهات خدوا بالكم من اولادكم

يا بنات حافظوا على نفسكم

يا ولاد اتقوا الله

جزاك الله الله خيرا

biberss يقول...

موضوع قوى يا مانوش
الناس دى لازم تاخد عقوبه مضاعفه و ف مكان عام كمان
بس هى اللحيه و العبايه ما صدتوش يعنى و لا حركت فيه شعره
سبحان االله
ربنا يحفظ البنات و الاطفال من هؤلاء الوحوش

Sweet Violet يقول...

مش عارفة ليه مش مصدومة من القصة و احداثها
ممكن لاني شوفت قصة اسواء منها و عاصرتها قدام عينى

اللى خلاني أقول ان بطلة القصة بتاعتك محظوظة شوية ..ليه؟؟

لان هى عارفة ان الاب مش عارف حاجة و اكيد حاطه فى دماغها لو عرف هيتصرف و هيمنع
الام لما عرفت اتصرفت بسلبية لكن مش هانتها ولا عقبتها على قول الحقيقة
هى و اختها واجهوا الموقف لوحدهم لكن ممكن يكون فى دماغهم لو مثلا قالوا للعيلة هيحصل مشكلة و هيتعاقب الخال ده

يعنى فى احتمالات لمعاقبة الشخص المقزز ده .. لكن اللى مانع الخوف من المجتمع و الناس و السمعة و الكلام الفاضي ده
اللى دايما بيكون سبب فى كل المصايب

^^^^
اقولك بقى القصة اللى انا شوفتها قدام عينى و لحد الان مش قادرة انساها
و هتعرفى ليه انا مش مصدومة و بقول ان بطلة القصة محظوظة

بنت كانت فى المرحلة الابتدائية عايشة مع امها و زوجها
زوج الام كان دايما بيضايقها و لانها كانت صغيرة مش كانت فاهمة حاجة لكن
لما كبرت و بقت فى المرحلة الاعدادية بدأت تفهم و بدأت توقفه عند حده
و لما لقت انه مافيش فايدة معاه .. قالت للأم "اتصدمت ايوة" لكن بردو اتصرفت بالسلبية فى الاول
و مع السلبية دى زوج الام فضل يضايقها بردو .. لحد ماهى وصلت الموضوع للعيلة و الاب
التصرف كان ايه ؟؟ .. العيلة كلها (من جد لجده لخال ) قالولها لو حاول يضايقك امسكى اى حاجة و على دماغه و دافعى عن نفسك

لكن (و آه من لكن دى )

بلاش تعملي مشكلة لمامتك علشان مش تطلق و اخواتك يبقوا زيك و حرام تخربي البيت !!!!
نيجى بقى لتصرف الاب .. اللي اول لما عرف كلم الام علشان يفهم ازاى يحصل كده و انه هياخد البنت تعيش معاه
تخيلي بقى الام عملت ايه ؟؟ قالت ان كل الكلام ده من وحى خيال البنت و انه مش حقيقي !!!!
الاب صدق الام و كدب البنت .. و كل ماتحاول تقوله يكون رد فعله انه بياخدها على قد عقلها و بس و مافيش اى تصرف منه
و بالتالى مافيش اى احتمال ان الشخص ده يتعاقب
تخيلي بقى البنت دى عايشة ازاى و لما تبص فى وش اى حد منهم بيبقى احساسها ايه ؟؟

عرفتى ليه بقول ان بطلة القصة محظوظة ؟؟

^^^
انتى هنا قولتى نصائح للأهل اللى مقصرين فى حق بناتهم و مش عارفين ايه بيحصل

و طبعا معاكي فى كل كلمة قولتيها

لكن هتقولي ايه بقى للأهل اللى بيبقوا عارفين وياريت بيبقى موقفهم سلبى بس لا و كمان بيتهموهم بالخيال الواسع و يكتموا صوتهم ؟؟!!!

كاتب مصري يقول...

ربنا يكرمك على حكاياتك الي بتبعتي فيها نصايح لخلق ربنا
ربنا يعافينا يعني معرفش يلاقي حد من الشارع معرفش يلاقي غير بنات أخته وأخته دي ايه دي ما تخسره ولا يولع مخافتش على بناتها وخافت عليه
حسبنا الله وربنا يهدي
مودتي
سلام

أم مالك يقول...

لاحول ولاقوة الا بالله
ايه اللى بيحصل ده والله الواحد مش بيلحق
ياخد صدمة يلاقى اللى اصعب منها
ولما العجب ونبأنا بذلك الحبيب صلى الله عليه وسلم
وان الفتن ستتوالى حتى ان الواحدة اكبر من الاخرى
لن اضيف اكثر مما قاله الاخ تامر على
والدكتورة ستيتة فانا مع كل ماقالوه
اللهم ارحمنا برحمتك واخرجنا منها على خير

يوميات شاب منوفى يقول...

بجد حاجة تقرف اية الراجل المقفرف دة توصل لبنات اختة ارحمنا يارب من الناس دى ومستغربين اوى من الامراض الى بنسمع عنها دة اقل انتقام من ربنا اى ام لاازم تحافظ على بناتها من اى حد الزمن دة معدش فيى امان من قريب او غريب

Bondok يقول...

السلام عليكم
والله الواحد من كتر القصص دي بقى بيبص وراه و هو ماشي
فعلا بدأت ثقة الانسان تنعدم في كل الناس
اكيد ده بسبب بعدنا عن ربنا و عن دينا
اسوأ ما في القصه حجتين ان القرف ده طلع من الخال الي هو المفروض في مقام الوالد
وتاني حاجه رد فعل الام انا مش فاهم يعني ايه خايفه تخسر اخوها
هو فين اخوها ده ؛ هي ازاي حاسباه اخ
الغلطه الي عملوها البنتين انهم بعد سلبية امهم كانوا لازم يحكوا لبباهم المفروض (لو مكنش عادي هو راخر) انه هو ده الي ممكن ياخدلهم حقهم
البني آدم(مع الاعتذار للبني ادمين) ده لازم و مع اعتذاري الشديد لازم ينضرب علقه تطلع على جتته القديم و الجديد و ميدخلش البيت تاني و بصراحة الام ما تستاهلش انها تكون ام (آسف لأي حد ينجرح من الكلمة دي)

reem يقول...
أزال المؤلف هذا التعليق.
reem يقول...

منووش ايه القصص اللى توجع القلب دي

بجد الدنيا بقت تخوف

وبعدين انا مستغربة اوي من رد فعل الام يعنىايه صلة رحم مع وحش زى دا ؟

وازاى كان بيدخل البيت ويعمل كدا ؟
الام كانت فين ؟

ولو كان بيجي والام مش موجودة ليه بيدخلوه ؟

لازم كل ام تعرف ولادها انها لو مش موجودة ممنوع دخول اى حد للبيت حتى لو كان مين

لازم الاطفال يعرفو ان جسمهم ممنوع لاى حد يلمسه ولو حصل لازم يعرفو الام بس طبعا الام تكون ايجابية مش تعمل زى الام دي

وبعدين تسامح ليه ؟

عشان يجيب اطفال ؟ حرام اللى زى دا اصلا يكون عنده اطفال

واللى عمله لا يسامح عليه ابدا وحتى لو هى سامحت ودا اشك فيه ربنا بردو مش هايسامحه

يارب احمي بناتنا واولادنا

mimi يقول...

منوش ... الله عليك يوعلي اسلوبك ... الموضوع ده مليان مواعظ ... وبرغم كده ... وبأسلوبك وصلتي رسالة لكل تعلب مكار ...

ربنا يكرمك ... ويكرك ميمي الطفلة البريئة اللي مش ليها ذنب ...

ياتري فيه كام ميمي مرت بنفس الجراح دي ؟؟؟

كتيير جداااااااااااا

والله المنستعان ويهدي عبيده

تسلم ايدك علي كتاباتك ... وربنا يكرمك

تحياتي

mimi يقول...

ملحوظة

===========

هوا الموضوع ده منشور بتعليقاته؟؟؟؟؟؟

لحقوا امتي دول؟

ربنا يزيد من حبايبك واصحابك واخواتك في الله

غير معرف يقول...

انا عايزه اقولك ان الموقف ده كان بيحصل لي دايما من خالي
مع انه كان متجوز وكل حاجه
وده ماثر فيا جدا
وماما شكت في كدا من تصرفاته معايا
بس اللي عملته انها زعقتلي وضربتني جدا جدا
وبابا يقولها اكيد انتي فاهمه غلط الخال والد مهما كان....
المفروض ماما تاخد بالها منه او ماتدخلوش بيتنا تاني
لكن العكس حصل ماما ولا كانها عرفت او شافت حاجه
وكل الللي كانو يعملوه انهم كل مايشوفوا وشي يزعقولي ويضربونيولا كلموه ولا مره
بالمناسبه خالي كان عندنا لمده شهر قاعد في بيتنا
كان ممكن ببساطه يمشوه من عندنا
بس ده ماحصلشي
عشان ماما ماينفغشي تقوله كدا خايفه على زعله
الموضوع مائر فيا جدا
انا عارفه مضايقات كتير بتحصل من الاقرايب
وبسمع كتير اوي
بس ارجع واقول الام والاب عليهم المسؤؤليه الكامله تماما لان اللحاجات دي بتحصللنا في عمر بنبقى مكسوفين فيه نتكلم اصلا ونشكك في نفسنا ياترى ده عيب وغلط فعلا ولا لا ده لاننا مش عارفين الصح من الغلط
وده اللي حصللي فعلا انا ماكنتش عارفه اللي كان بيعمله معايا ده صح ولا لا او حاجه غريبه ولا لا..
بس انا عايزه اقول حاجه اللي بيعمل كدا في بنت اخته مش عشانها صغيره لا حتى لما كبرت بيكمل معاها برضو وده اللي حصل معايا ومن صاحبه القصه بتاعتك
وخالي كمان فتره ربى دقنه وعمل شيخ بس مابطلشي خالص التصرفات اللي بيعملها....
انا لما كبرت وفهمت ايه الصح وايه الغلط وايه الحلال وايه الحرام عرفت اقف قدامه والموضوع انتهى تقريبا ماعادشي غير نظراته بس هي اللي مش قادره اعمل حاجه توقفها....بس اللي حصل ده جرحني اوي
وكرهني في حاجه اسمها راجل وده كان لفتره مؤقته...
اسفه اني طولت عليكم واتمنى ماحدش يتعرض لده ابدا

فتاه من الصعيد يقول...

لا اله الا الله
بصى اصلا المفروض تبلغ عنه.....ومفيش حاجه اسمها خال وفضايح وكده....ومامتهم بصراحه موقفها غير مفهوم
على العموم هما مفيش باديهم شىء كانوا المفروض يعملوه
بالنسبه للثقافه الجنسيه....انا من اشد المتحمسين لتدريسها من القران والسنه وبطريقه علميه....لان بنات كتير بتكون جاهله بجسمها
دمتى بخير......تقبلى مروورى

MaNoOoSh يقول...

حسام غانم
في انتظار عودتك وآرائك يا حسام

------------------------

تامر علي
للامانة الاب والام فعلا كانوا مشغولين بلقمة العيش.. بس كان فيه رعاية ومتابعة دائمة لكن ملهاش دخل بالثقافة الجنسية.. الام والاب لما بيتحرجوا يكلموا ولادهم فى الأمور دي بتبقى غلطة كبيرة منهم.
بس بالنسبة لموقف البنات هم مخدوش قرار السماح دة غير لما حسوا فعلا ان التعلب المكار دة ربنا علمه الأدب والتصرفات دى انتهت.. ولو حسوا بأى رجوع للتصرفات دى مش هيترددوا انهم يفضحوه.
وفعلا هم اللى خلاهم يقولوا لمامتهم احساسهم انهم لو مكنوش سبب فى عقابه وسكتوا هيشيلوا ذنب حد تاني.


---------------------

ستيتة حسب الله الحمش
هم فعلا كان ربنا ساترها معاهم ومديهم القوة.. ومقرروش ينسوا.. بس حاولوا يتناسوا ويعيشوا لما لقوه اتلخم في البلاوى اللى ربنا ابتلاه بيها وشاوفوا ان الطبع دة اختفى منه.. فقرروا ان مفيش داعي يكسروا اسرتهم اللى أصلا مشروخة بانهم يقولوا للأب.
هي الام ممكن تكون مش عارفة تتصرف أصلا ودى كارثة فى حد ذاتها لأن لو بناتها كانوا اتأذوا شوية أكتر من كدة كانت نفسيتهم اتدبحت.. ولولا حبهم ليها مكنوش عرفوا يسامحوها على الموقف دة ابدا اللى مش هيعرفوا ينسوه وهيخلوه حلقة فى ودنهم طول عمرهم لو ربنا رزقهم بأطفال.

وانا معاكي هم فعلا عملوا كدة وواجهوة علشان يعرفوا يعيشوا.. وأخدوا وقت طويل قوى علشان يعرفوا يفكروا فى الراجل بنظرة سوية شوية (ولو انهم فى قرارة نفسهم لسة مجروحين).
بس هم لو معملوش كدة كانت حياتهم هتبقى جحيم.. وهم على الأقل حسّوا ان ربنا نصفهم فى الدنيا شوية ودوق التعلب دة من طعم أفعالة.
ربنا يحفظنا ويحفظ بناتنا وولادنا جميعا.

-------------------

حاجات جوايا
الشر فعلا بقى متوقع حتى من اقرب الناس.. والمفروض اى أم وأب يحافظوا على ولادهم وميسيبهومش مع قريب ولا غريب أصلا.. مش تخوين لكن حفاظا على أطفالهم من شرور الدنيا الوقتى.. والأم فعلا جهلها كان سبب أكبر في شرخ نفسية بناتها.
*************
والف شكر على البانرات يا ام دودو يا قمر
وانا اللى مبسوطة أكتر بزيارتك

----------------------

norahaty
فعلا يا نورا الانسان لازم يحرص من أى حد يدخل بيته وميديلوش حرية مطلقة.. لازم نعرف الاخرين حدود حريتهم فى بيتنا ومع ولادنا.

-------------------

القمر الساهر
سعيدة بزيارتك وأول مرور.. وان شاء الله مش الأخير
والمفروض كل انسان يحافظ على نفسه وأهل بيته لاننا بقينا فى زمن صعب.

--------------------

biberss
اذا كان مستحرمش لمس بنات اخته.. تفتكر الدقن ولبس المشيخة هيمنعوه يا بيبرس
ربنا يحفظنا ويحفظ اولادنا وبناتنا فى الزمن دة بجد.

------------------------

ذكري رحبل قلم يقول...

السلام عليكم
حسبنا الله ونعم الوكيل
تعرفي يا مني ده سببه ايه سببه عدم الوعي الديني في الاهل ومن ثم عدم بثه في الابناء ربنا يرحمنا
اللهم اهدي شباب المسلمين
اللهم حسبنا حسابا يسير
تحياتي

MaNoOoSh يقول...

Sweet Violet
أنا معاكي فعلا ان البنتين دول كانوا محظوظين.
وانا حاسة باحساس البنت دي قوي.. وواثقة انها من جواها مهما كانت بتحب أمها أو أبوها أو حد من عيلتها فهى من جواها فقدت احترامها ليهم.. وحاسة انها بطولها فى الدنيا ملهاش لا ظهر ولا سند.
البنت أكيد معدتش صغيرة.. ولو تقدر تعمل لزوج أمها عاهة مستديمة متترددش.. صحيح فى احتمال يضايقها جامد بس كمان احتمال انها تحس ولو شوية بسيطة أنها ارتاحت علشان تعرف تعيش.. ومتترددش فى كل لحظة انها تحسسة بالدونية اللى هو فيها وتعرفة قدام الناس انه انسان وتحرجة وتكسفة قدام الناس كل ما تقدر.. يمكن موقفها يكسف أهلها قدام نفسهم شوية وياخدوا موقف منه.
والأهل دول مش هقولهم حاجة لأنهم أصلا عارفين انهم مش بس كسروا روح البنت ونفسيتها لكن كمان أخدوا دور الشيطان الأخرس.. يمكن ضميرهم مات.. أو يمكن فى أجازة أو يمكن بيأنبهم من وقت للتاني.. لكن اللى أقدر أقولهم عليه انهم شالوا ذنب البنت على ضهرهم لما سكتوا.
والبنت ان شاء الله ربنا يعوضها الانسان الصالح اللى يتقى الله فيها ويحبها ويحفظها فى عيونه.

--------------------

كاتب مصري
ولا يلاقي حد من الشارع ولا حد من الغيط ولا البيت.... هو بأمارة ايه استباح جسم أى بنت أصلا؟؟؟؟؟
الأم جهلها هو السبب في موقفها وربنا يحفظنا جميعا بنات وبنين

-----------------------

أم مالك
الدنيا مليانة أكتر من كدة يا أم مالك العزيزة
وزى ما سويت قالت فعلا البنتين دول كانوا محظوظين ان الضرر سواء الجسدي أو النفسي مكنش أكبر من كدة.. وعرفوا يتصافوا مع نفسهم علشان يعيشوا حياتهم.
ربنا يلطف بينا فى اخر الزمان

-------------------

يوميات شاب منوفى
كلمة أمان دى دلوقتى بقت حاجة كدة زي القرش والمليم.. نسمع عنهم لكن قليل منا اللى شافهم.
وفعلا ربنا بيبتلينا من أفعالنا

-------------------

Bondok
انت عارف البنتين ممكن شروخ كتيرة فى بيتهم منعتهم انهم يقولوا لباباهم.. وكمان يمكن خافوا انه مياخدش موقف وساعتها نفسهم هتتكسر.
وكلامك فعلا فى عقابة كان كافى وشافى قوى لو كان اتطبق.. دة ابسط حاجة يعنى انه ميدخلش البيت تانى.. والأم جهلها في الموقف دة صحيح لكن هى بردو تعبت فى تربيتهم قوي.

--------------------

reem
بصي يا ريم أى حد عايز يعمل حاجة زي التعلب المكار دة هينتهز أى فرصة وهيعمل كدة.. سواء فى وجود الأهل أو فى عدم وجودهم.
المشكلة أنهم مكنوش مديينه خوانه.
وكلامك صحيح علشان كدة قلت لازم الاولاد يكون عندهم ثقافة جنسية سليمة مصدرها أمهم وأبوهم باسلوب مهذب مش مبتذل يعني..
وانا بقولك هو اطفالة هيربيهم ازاى.. هيعلمهم ايه.. هل أصلا هيكون أمين عليهم وللا لأ؟
ربنا يحمينا جميعا ويحمى بناتنا وولادنا.

-------------------

mimi
انا متأكدة ان فيه زي ميمي كتير وعارفة كويس قوي إحساسهم وان اختلفت أنواع الأذية فبردو الاحساس واحد.
ربنا يحبب فيكي وفينا خلقة يا ميمي ميمايا العثل.

-----------------

فتاه من الصعيد
موضوع تبلغ عنه دة انا معاكي فيه لو كان الضرر أشد من كدة شوية.. لكن مع ذلك مش هتلاقى حد من الأسرة أصلا يقف معاها ودى حاجة صعبة قوي.
وياريت فعلا الاهل يتعلموا الثقافة الجنسية السليمة من دينهم ويعلموها لأولادهم.. دي حاجة هتمنع عنهم أضرار كبيرة جدا في ومن الفتن اللى احنا فيه دة

---------------

غير معرف
موقف مامتك وباباكي كان أصعب اكيد من موقف مامة ميمي.. وربنا يسامحهم وحسابهم عنده.
وصدقيني أنا حاسة بيكي جدا.. وعارفة الموضوع مأثر في نفسيتك ازاى.. بس صدقينى انتى جواكي قوة أكتر مما تتصوري.. هو مهما قلنا عليه حيوان أو مريض فدة لا يمنع انه عارف انه غلطان.. وصدقيني مسيرك هتشوفي في يوم ازاي ربنا هيجيبلك حقك فى الدنيا قبل الأخرة.
ومعاكي حق البنت فعلا في الاول مبتبقاش عارفة ايه اللى بيحصل وللا غلط وللا صح.. ولما بت فهم شوية بتأنب نفسها وتفتكر ان الغلط منها وان هى السبب والمشكلة فيها.. ودة مش حقيقي أبدا
وموقفك ومواجهتك ليه كان أحسن حاجة.. ودقنه بقى والمشيخة يبقى يخليهم ينفعوه لما يقف قدام ربنا وهو محني من تقل ذنوبة وهول ما فعل.. وحتى نظراته احرجيه فيها علشان يتعلم يبص على قده وهو عينه فى الأرض.
انتي موقفك كان ايجابي رغم سلبية موقف أهلك وانا بحييكي جدا عليه..
وبالعكس ياريت تطولي أكتر وتقولى أكتر من كدة وتشرحيلي ازاى كنت بتوقفيه عند حده
ياريت تعملى كدة.. وادى ايميلى ابعتيلى عليه علشان ان شاء الله أعمل موضوع تانى بخطوات تساعد البنات تخرج من الموقف دة
Ma7no2a@yahoo.com

--------------------

MaNoOoSh يقول...

ذكري رحيل قلم
فعلا الاهل أصلا مش عارفين حاجة ينصحوا بيها ولادهم ولا يقفوا جنبهم.. بس اللى مش عارف يتعلم ويعرف
ربنا يلطف بينا

MǿиY El-Shreef يقول...

الناس بقت تخنق بجد

ايه القرف ده وشيخ وبدقن ومش مكسوف من نفسه

بجد انا جالي اشمئزاز وكمان الام صدمتني

هو الناس بقت كده ليه :(

أبو العريف يقول...

منوش
الموضوع مؤثر جدا
وصادم جدا
خصوصا ان كل انسانه
دايما بتبقي واثقة جدا
في اخواتها ومش متخيله
ان اي حاجه زي دي ممكن تحصل
بس المشكله في التربيه
يعني هو اساسا مش متربي كويس
ودا اللي وصله لكده

مش موضوع دلع وبس
لكن بعد عن ربنا
رغم التظاهر بالتدين
بس فعلا لازم كل واحده تكون قريبه قوي من ولادها
وتخاف عليهم قوي
لاننا بقينا في زمن العجايب

رئـيس التحـرير يقول...

أنا مقصدتش يشوف حد بره البيت لا ده فكري أنا قصدت انه ايه الجنان الرسمي ده مع بنات اخته معقول لكن طبعا الفكرة مرفوضة تماما جوه البيت وبرة البيت
ربنا يعافينا ويحرسنا
تحياتي

الشعب لابد له من حكومه تشكمه يقول...

شوفى اولا بالنسبه لموضوع صلاه الاستخاره مش معنى انى اصلى استخاره وان الموضوع يبوظ او ميتمش انى صلاتى مش مقبوله او ان ربنا موقفش معايا ..بس ربنا ليه حكمه فى كده بمعنى ان فى درس ربنا حب انها تتعلمه او تخوض التجربه دى ويمكن مش هتفهم السبب دلوقتى لكن اكيد فى المستقبل هتفهمه...
بالنسبه باه للاخ اللى بيقولوا عليه الخال والد...ده قلة دين وقله تربيه وغلط الام اصلا كبير جداااااااااااااااا اولا لازم تفهم البنات ان جسمنا محدش يقرب منه او يلمسه وال مده يحصل تيجو تقولوا ليا...
ثانيا كان لازم تواجه خوها يعنى ايه خايفه على زعله...اومال ليه المحترم مخافش على زعلها وهو بيعمل كده فى بناتها..كانت لازم تواجهه وتعرفه انها عرفت...

Che يقول...

مش عارف اقول ايه .... بس بجد حاجه قذرة جدا و انا اسف على التعبير ده بس ده احسن تعبير ممكن اقوله و مايكونش خادش للحياء
و بعد كده يجى يقولك البلد باظت و الجيل منيل ، مهو من البلاوى اللى بتحصل دى .... ولا يا ترى البلاوى دى بتحصل عشان البلد باظت و الجيل منيل
الله اعلم

مسدس صغير يقول...

جزاكم الله خيرا على البوست
فعلا لازم التوعية تبدأ من البيت
ولازم الام والاب يصاحبو اولادهم جدا
وميدلعهمش زيادة عن اللزوم
احييكى على البوست
سلام

ABOALI يقول...

طبعا قصة موجعة للقلب بما تحمل من انسداد انابيب الاخلاق
والعزوف الدينى
ومرة ثانية تطرق ناقوس اين الاسرة المترابطة والتفاعل الاسرى بين الاب والام والاولاد
يقينا لم ار اى دور سواء الاب او الام

عندما خلق الله ادم كان يخلقه لمهمته فى رعاية بيته و الانفاق عليه
وعندما خلق الله حواء كانت مهيئه للاهتمام بالبيت و السمو والرقى بالمجتمع من خلال رفع شاءن اطفالها وتربيتهم



المهم

لقد دققتى جرس انذار بالغ الخطورة
وما خفى كان اعظم

الدين ثم الدين ثم الدين ثم الدين
هو المنجى من كل تلك الشوائب


اشكرك على الطرح المميز

doctor1sex يقول...

البوست رائع والقضية فعلا مهمة جدا
ولازم الناس تاخد بالها من الكلام ده
لكن فى الاول وفى الاخر
الغلط على الاهالى نفسها

Jannah يقول...

كلامك صحيح المسؤولية كاملة ع الأهل لازم يكونوا واعيين و يعرفوا كيف يتواصلوا و يتواجدوا و يربوا عيالهم في الزمن هذا

المعتصم يقول...

بسم الله الرحمن الرحيم
السلام عليكم ورحمة الله وبركاته
منووووش هانم
رئيسة الاذاعه والفلافزيون حدانا
تحياتى
انا قلت بما انى هنا يعنى
يبقى لازم اسلم
ومش هعمل زى المرة اللى فاتت فى البوست بتاع زيزى
من الضيق من اللى قريته مقدرتش اعلق
قوم سيادتك فيكِ بركه كبيرة كاتبه بوست انيل منه مليون مرة المرة دى
انا بالذات يااخواننا تخلونى ساكت وبلاش اعلق الله يخليكم
علشان انا لما بتضايق من حاجات زى كده بقول كلام يودى فى داهيه
خلونى مكتوم احسن
حسبى الله ونعم الوكيل
ســــــــــــلام

أحمـــــــــــــد أبو العلا يقول...

لو مشغول ومش فاضي ومعندي وقت, برضه مينفعش اطنش بوست عندك

وخصوصا بأه لما يكون بوست مهم جدا زي اللي ده

انا منكرش اني حسيت بالقرف فعلا
الخسائر في الحاله ديه بتكون كارثيه خصوصا على المستوى النفسي اللي الضحيه بتفقد فيه الثقه بالجميع

هوا مريض ولكن مرضه مش مبرر ليه
كلمة مرض دايما بسمعها في الحالات ديه لكن برفض انها تحول التعلب المكار لضحيه

انا بسميه مريض مذنب يستحق العلاج والعقاب

المشكله ان الصراحه معدومه بين الاباء والابناء
وده اللي بيخلي المصايب تحصل ومحدش حتى يقدر يكشفها

بوست مهم جدا

ELMASRYA - MRS WRITER يقول...

أنا جيت يا أهل البيت

ممكن أدخل؟

بصراحة يا منوش أنا أول مرة أزور مدونتك دي ولقيت إسمها مخنوقة

قلت ياترى بنت صغيرة في عز شبابها مخنوقة من إيه

لقيت الموضوع ده وواضح إنه من ضمن مواضيع متعددة خانقاكي وتخنق اللي يقراها كمان

بجد قرفت وحسيت بغثيان

خال البنات وبيعمل كده ؟

أعوذ بالله ده شيء مقزز جدا

واللي قرفني أكتر موقف الأم

وميمي عجبتني ولو إنها أخدت وقت طويل علشان تواجه وتهاجم وتدافع

ربنا رزقه بزوجة وأطفال لكن لازم هيشوف فيهم إللي عمله في زوجة خاله وبنات أخته

كانت لجين أبو الدهب حبيبتي منزلة موضوع بعنوان
( دقة بدقة ولو زدت لزاد السقا )

لذلك أنا واثقة إن اللي عمله لازم يترد فيه علشان الدقة مقابلها دقة

بس بجد يا منوش أنا اتخنقت من الشر وانعدام الضمير للشخص ده ومن خيبة أخته وسلبيتها

هتابعك بإذن الله وياريتني أقدر أقرا مواضيع أقدم ليكي

دمتي سالمة وتقبلي مروري

رحله البحث يقول...

بصراحه شديده باحييك على انتقائك لموضوعاتك
لانها فعلا بنعيشها فى حياتنا لكن فى معظم الاحيان لا ننقاشها مش عارف ايه السبب
انا معاكى تماما فى موضوع التثقيف
وفعلا لازم الاهل لا تغفل عينيهم ابدا عما يدور
لان اى حاجه صغيره بتحصل لنا فى سن صغير بتأثر كتير فى مستقبلنا سواء ايجابيا او سلبيا

ঔღঔ نـــوارة ঔღঔ يقول...

لا حول ولا قوة الا بالله

للاسف المواقف دي بتحصل كتير جداا

والغلط بيكون من الاهل اساسا

عارفة انا متربية على انه اي حد يبصلي او حتى يلمسني ولو بالمزح كدا ولا كدا

يعتبر تعلب مكار حتى لو كان مين

فعشان هيك دايما بكون ماخدة احتياطاتي من القرررررريب قبل الغريب

والحمد لله المضايقات الي بتحصلي لا تتعدي البصات والنظرات الحقيرة

ربنا ينتقم من كل شخص بيعمل هالافعال الشنيعة

باحييكي على طرحك الرائع وعلى طريقة سردك للمشكلة

ربنا يحمي بنات المسلمين

تسلم ايدك حبيبتي

ادم المصرى يقول...

بجد هيا بقت كدا الدنيا مفيش امان فى اى شيئ وانا

عن نفسى بتوقع اى شيئ من اى

حد حتى لو كان قريب منى

لئن الظروف بتحكم على الانسان انو يفعل اشياء هوا

ملوش رغبه فى فعلها

د. ياسر عمر عبد الفتاح يقول...

فيه حد كده في الدنيا؟؟
أعوذ بالله

والله دي حاجة مقرفة جداً

ساره يقول...

تعرفي يا منووش القصة سببت لي قرف غير طبيعي
لان فعلا الخال والد .. ولما الحركات يجيك من انسان قريب على قلبك يكون اثرها كبير فى النفس
مش قادره اتصور حجم الالم اللي مرت فيه ميمي واختها
وكيف صدمتها فى امها وسلبيتها :(

المتحرش جنسينا فى الاطفال لازم يكون شخص مجرد من الانسايه لانه مستحيل يكون فيه انسان ينظر لطفل او طفله انهم شئ مغري ... نظره الانسان الطبيعي لطفل دائما تكون نطره رحمه وحب وحنينه مافيها اي شعور سيئ ثاني

عمر تطويل اللحيه وتقصير الثوب كانت مقياس على التقوى .. كلها مجرد كماليات للاساس
بس هو ماكان عنده اساس من الاول
ومع الاسف احنا فى مجتمع يصدق المظاهر خصوصا لو كانت مظاهر دينيه

الله يصبر ميمي واختها وحسبي الله على خالها

الله يجزاكي خير على هذا البوست الهادف

كراكيب يقول...

قال انا قريت العنوان ميمي والتعلب المكار
قولا لأخويا الصغير اللي كان قاعد عمال يقولي انا زهقان
استنى في حدوتة اهي طنتك مانوش هتحكيلك حدوتة
استنى هقراهالك بصوت عالي
نياااهااااهااااااا
وبدأت اقرا بصوت يسمعه وفجأة سكت و... امممممم... احمممممم
لا يا سونة -ده اللي هو اخويا- الحدوتة لسة ما اتعملهاش مونتاج
وهو مش فاهم بقى.. اييييييه؟؟ اقرررررررري
عاجبك كدة.. مش كنتي تكتبي ان الحدونة للكبار فقط
:)
المهم سيبك انتي... ازيك بقى ;)

miro el niro kwanirooo

إنترنتاوي يقول...

المواضيع دي عاوزة الحذر جدا جدا
و لابد أن البنات مايبعدوش عن عين أمهاتهم ابدا حتى و لو كانوا مع خالهم

عمرو يقول...

فى اٍعتقادى اٍن أم البنات و أبوهم بيقع برضو عليهم وزر كبير لأنهم من الواضح أنهم كانوا بعيدين عن بناتهم فلا حسوا باللى بيحصل من الخال المريض و لا حتى قدروا يحسوا بالتغير فى سلوكيات البنات الجريحه ..
و على فكره عاوز أضيف بعد اٍذنك أن الحرص لا يكون فقط على البنات و لكن على الصبيان كمان لأننا فى هذا الزمن العجيب يتخاف على الصبيان زى البنات بالظبط ..
تقبلى تحياتى و تقديرى ..

blue-wave يقول...

فعلا معاكى حق
وربنا يلطف بعبادة

تأثير الفراشة يقول...

الحقيقة يا منوووش إن الموضوع ده ، سمعت و قرأت عنه كتييير قبل كده و من زمان ،و القصة بتكون هىّ هىّ بنفس تسلسل الأحداث و بنفس الموقف المتخاذل للأهل، -طبعا إلا من رحمم ربى-

لكن اللى أسعدنى هنا جدااا - إذا جاز التعبير- ، هو موقف البنت و إزاى إنها اعتمدت على الله أولا ثم على نفسها و ما أخدتش موقف سلبى، و إنها كان عندها من القوة و النضج إنها تواجه خالها و تنهره و توقفه عند حده و بعد كده تسامح و ما تسيبش الموضوع ده يدمر حياتها

بجد أنا حاسة إنى فخورة جدا بالبنت دى و بأختها

كلامك و عرضك للموضوع أكثر من ممتاز، ربنا يكرمك و يحميكى ، و يثبت ميمى على الحق و القوة..قوة مواجهة المخطىءو قوة التسامح، و قوة التعلم من التجارب

تحياتى ليكى يا أجمل منووووش

جزاك الله خيرا

mahasen saber يقول...

منوش منوش افضتى وربنا ينور عليكى
اولا موضوع ان الام تسيب اولادها مع الشغاله انا شفت قبل كده جارتى كانت بتخرج وتسيب ابنها مع الشغاله وكنت بشوفه قاعد معاها تحت فى الشارع وطبعا بتضربه وبتشتمه وعادى خالص لما قلت لمامته قالتلى مقدرش ازعلها لتمشى وتسيبنى شفتى الهنا

اما موضوع التعلب المكار ده انا قرفت منه من غير ما اشوفه
وفعلا لازم نصاحب ولادنا ونصاحبهم عشان ميبقاش فيهاى حواجز بينا وبينهم

برافو عليكى يا منوشه خنئتك بطلع منك مواضيع جامده على فكره

د/عرفه يقول...

فعلا قصة مؤثرة أوى

مفيش أحسن من الواحد يلتزم تماما بتعاليم الدين
وان الدين مش مجرد عبادات ومظهر وبس

لا الدين ده حياتنا كلها

وربنا يحمى شبابنا

yoyo يقول...

مسائك سكر يا منوووش

دى اول زيارة ليا عندك وان شاء الله مش هتكون الاخيرة
الموضوع خطير جدا والله
مش فى ثقة ان الام تسيب بناتها واولادها مع الشغالة مهما كان الاطفال بتنقل منها سلوكيات وعادات خاطئة لان الاطفال فى السن دا بيكون متلقى ومقلد لكل الافعال و التصرفات
حتى اقرب الاقارب مش بقى فى ثقة فيهم ودا نابغ من قلة الدين والضمير
مش فى امان ان الام تسيب اولادها باى حال من الاحوال
يعنى مش هيكون فى اقرب من الخال اللى هو مفروض يكون فى مقام الاب

ربنا يحفظنا يارب ويستر علينا والله

تقبلى مرورى للاول وان شاء الله يدوم بينا التواصل
ميرسى لمرورك وتعليقك الرقيق على مدونتى المتواضعة

دمتى بالف خير
تحياتى
يويو

شمس النهار يقول...

الحقيقه القصه صادمه
بس للأسف ده بيحصل
هنقول ايه
حسبي الله ونعم الوكيل
في كل انسان يحاول يطفي برائة اي طفل ويحرمه من حقه في الحياه الطبيعبه

بس الاب والام عليهم عامل كبير جدا
انهم ياخدوا بالهم من اطفالهم شويه كتير

كيــــــــــــارا يقول...

والله معاكي حق

واضح ان الدنيا امانها قل لكن لسه خيرها موجود

وومن يقول...

منوش ازيك ياقمر انا خلصت امتحانات اهو وجيت طوالي قريت حكاية زيزي ربنا يسرلها من أمرها رشداَ يارب وكنت محتاجة أقرا فعلا حكايتها

نيجي لميمي بقي ربنا بجد يكون في عونها جسمي بقشعر كل ما اتخيل أن في ناس معندهاش ضمير والأسواء انهم المفروض اللي يحمونا

احنا في زمن لازم عنينا تبقي في وسط راسنا ونتوقع الشر من كل الناس
ومش فاهمة ازاي مامة ميمي كانت بسيبهم مع خالهم اللي في سن حرجة لوحدهم
انا عن نفسي اتربيت في بيت ابوابة كلها مفتوحة مفيش باب بيتقفل الا لما البيت بيفضي ومفيش حد بيقعد لوحدة حتي اللي بيزورني في بيتي من اصحابي بيستغرب
لكن في الحقيقة دي ميزة اكتر منها عيب لأني لما دخلت بيوت كل واحد فيها قافل علي نفسة عرفت ان ورا الأبواب المقفلة دي بلاوي
لازم يكون في رقابة لازم الصغيرين يحسوا ان عليهم رقابة وبيتحاسبوا
انا اتربيت ان اي اتنين غير راجل ومراته ميصحش يتقفل عليهم باب لا ولدين ولا بنتين ولا ولد وبنت حتي لو كان محرم يعني لا أخين ولاأختين ولا اخ وأخت ولا بنت وخالها ولا ولد وعمة
ربنا يكون في عونها ويهديها للي يريح نفسها وكمان انا متغاظة قوي من مامتها واحدة مكانها كانت طردت اخوها ومعرفتهوش تاني لأنة مراعاش حرمة بناتها ربنا يسامحها بجد

اسماء واحلام فى وجدانى يقول...

حضرتك بردة مصممة انى متهور

طيب من هنا ورايح انا هاكون متهور فعلا
وان شاء الله قريبا ستجدى ما يسرك من التهور الاصلى

التهور بتاع زمان
التهور الابيض واسود

اسماء واحلام فى وجدانى يقول...

اون لاين

ايوا كده الطيب احسن وبعدين انا زعلى وحش اوى

ممكن تلاقى البوست اللى جاى كله كلام زى الرصاص

والمدافع واقلبها حرب احزان وبكى واهات وكلام

من ده كتير

وعلى راى واحد صاحبنا

قد فرفر من زرزر

اسماء واحلام فى وجدانى يقول...

من قدم السبت لاقا الحد

اسماء واحلام فى وجدانى يقول...
أزال المؤلف هذا التعليق.
نجلاء يقول...
أزال المؤلف هذا التعليق.
بنوتة مصرية يقول...

وصل بية الامر انة يجرح براءة ومشاعر اطفال.
وكمان هو يعتبر فى منزلة والدهم لانة خالهم.
انسان لا حيوان اسفة معندوش مشاعر ولا ضمير يعتبة ولا بيخاف ربة واللى زى دة ربنا غضبان عنة
مش عارفة اقول كلام من هاولة الصدمة
وفعلا عندك حق لازم نحافظ على بناتنا الزمن دة ميتأمنش لازم نربيهم على الاسلام ونعلمهم ونور عقلهم بالالتزام ونبعدهم عن الفساد بايدنا عندما نكون لهم الحضن الدافئ الذى يلجأون الية عند الحاجة
والام لازم تكون صاحبة لابناتها وكاتمة اسرارهم ومعرفة اى تغير يحدث لهم فالاطفال الصغار مثل العجينة اللينة يسهل التحكم فيها وعمل لها الشكل المناسب لها ولذلك اناشد كل ام بالحافظ على ابنائها ومصاحبتهم ومعرفة كل ما يفكرون فية دون ضغط
ربنا يحمى كل بنات الاسلام من لم يعرفون الضمير ومن الفتن ويهلك الظالمين من يظلمون اطفال فى عمر البراءة ويموتو فيهم مشاعرهم واحساسهم بالامان وهما مثل الزهرة الجميلة لا تعرف الا النقاء
واخير احتسب عند الله فأنة القادر على كل شئ
ان بطش ربك لشديد العقاب.
حسبى ربى ونعم الوكيل
تحياتى

اسماء واحلام فى وجدانى يقول...

القطة دى جبتيها منين اعترف اوام

الضرب المرة دى فى المليان

ولعلمك تم تغير طقم الحراسة باكلمه

موناليزا يقول...

حسبى الله ونعم الوكيل
انا اعرف ان الضنا اغلى من اى قرابة فى الدنيا

Lady E يقول...

صعبة اوي القصة دي يا منوش والأصعب انها حقيقية

انا مستغربة جدا من الام والأب كانو فين طول السنين دي وبناتهم بتتدمر
واضح ان مكانش في حوار بينهم وبين مامتهم او باباهم

ميمي اتصرفت صح في اخر القصة بس اعتقد ان الجرح اللي حست بيه هيفضل معاها دايما

ربنا يساعدها ويحيمها من اي شر هي وكل بنات المسلمين

MaNoOoSh يقول...

MǿиY El-Shreef
يا موني الدنيا ياما فيها بلااااااااااوي أكتر وأكبر من كدة بكتيييييييييير
ربنا يسترها معاكى ومعانا ومع الناس جميعا دنيا وأخرة

============

أبو العريف
بس احنا بقينا في زمن حتى لو حد واثق من أمه وأبوة مش بس أخواته.. لازم يكون على اتصال معنوي دايما بولاده ولازم يحافظ عليهم قوي.

وجزء كبير من فساد المجتمع بسبب التظاهر بالتدين.

===============

رئـيس التحـرير
فعلا يا ابراهيم الفكر نفسه مرفوض تماما.. مش من حق حد يستبيح جسد حد تاني أساسا

=============

الشعب لابد له من حكومه تشكمه
فعلا زيزي اتعلمت دروس كتيرة قوي من موقفها ده.. وشخصيتها اتغيرت كتير للأحسن.. رغم ان الموقف سايب جواها لسة شرخ كبير صعب يتلم

الأم من الاساس موقفها سلبي.. وكمان جهلها بالتصرف الصحيح في موقف زي دة زود السلبيه.

============

Che
كله سبب لكله يا تشى.. البلد والناس باظوا مع بعض.. ومش هينفع يتصاحوت غير مع بعض بردو

==============

مسدس صغير
فعلا يا صاصا.. صداقة الأهل بتحمي ولادهم من مخاطر كتيرة جدااااااااااا

==============

ABOALI
تصدق يا ابو علي فعلا عندك حق.. ربنا حلق كل من الراجل والست كل واحد فيهم مهيأ لدور معين وجواه امكانيات ومرونة ملهاش حدود.. بس لما الموازين اتقلبت كل واحد بيهرب من دوره وعايز دور التاني.
وحياة ادم وحواء فى الاخر مينفعش تخلو من التفاهم والتعاون علشان يقدروا يربوا ابنائهم صح.

والدين هيخلي حياتنا تستوي.. بس احنا اللى واخدينه مجرد شوية مظاهر.

============

doctor1sex
الغلط على الأهل فعلا لا جدال.

===========

Jannah
للأسف حوار الأهل مع الابناء معدوم.. ياريته يتوجد كانت حاجات كتير هتتغير.

==========

المعتصم
خلاص يا معتصم.. قررت ارحمكم من الاكتئاب شوية
يللا كفاية عليكم مسلسلات الفلافزيوم بتاع النايل سات.

==========

أحمـــــــــــــد أبو العلا
زيارتك غالية جدا يا بشمهندس
وحقيقى انا لو قعدت اوصف واتكلم من هنا لبكره مش هعرف أعبر عن احساس بنت براءتها انتهكت.. وازاى فعلا بتفقد الثقة مش بس في صنف الرجال.. لأ والأهل والمجتمع كله كمان

والتعلب المكار في الحالة دي بالذات مش مريض.. لكن تقريبا مترباش كويس.. ادي عنده استباحة حرمات الغير.. وان كان البشر معاقبهوش فربنا عاقبه كويس جدااااااااااااا

الأهل هنا اكتفوا بالدور السلبي.. ودة نوعا ما أحسن من أهالي كتير بتكدب ولادها وتصدق التعلب المكار وتديلة فرص ذهبية لاستباخة ولادها
ربنا يعافينا ويسترنا جميعا

=============

ELMASRYA - MRS WRITER
دة انتي تنورينى وتنوري المدونة كلها يا قمر
والحياة كلها بقت مليانة مواقف وناس تخنق.. بس متقلقيش.. مش كل المواضيع خنقة كدة
وفعلا موضوع لجين من فتره خلاني أفكر في الموضوع دة.. وان شاء الله لو ربنا قدرني بأفكار أقولها للبنات يعرفوا يتصرفوا فيها في مواقف زي دي.
والخال ده.. ربنا عذبه فعلا كتير فى الدنيا بأفعاله.. وكفايه عليه شيطان نفسة اللى زارع فيه الوسوسة
ربنا يحمينا جميعا من كل شر.

=============

رحله البحث
يااااااااااااااااه.. واي تأثير المواقف دي بتتركه فى حياتنا!!!!!
واحنا ساعات كتير بنسكت عن المواقف دي لاننا بنخاف ونفتكر ان احنا ببس اللى حصلنا المواقف دي.. وبنخاف للناس تغلطنا فننجرح.
لكن معدش ينفع السكوت تاني.

===========

ঔღঔ نـــوارة ঔღঔ
حمد الله علي سلامتك يا نوارة يا سكر
وأهلك أنا بحييهم فعلا.. لأن هو ده الصح.. نفسية الطفل زي البسكوتة.. أى ضغطة ممكن تكسرها
وربنا يحمينا جميعا ويرزقنا واياكي بأطفال نعرف نربيهم صح ببركة ربنا.

=============

ادم المصرى
توقع الشر للأسف بقى سمة الزمن والأخلاق اللى احنا فيها الوقتى
ربنا يحمينا جميعا

============

د. ياسر عمر عبد الفتاح
والله يا د ياسر فيه أكتر من كدة
بس كتير بيسكت وبيخاف يتكلم.

===========

MaNoOoSh يقول...

ساره
فعلا يا سارة الصدمات قصرت فى نفسية ميمي وأختها كتير جداااا.. بس الحمد لله انهم عرفوا يتغلبوا علي كدة ويقووا قلبهم.
والمتحرشين بالأطفال رغم ان مش مرضى لكن أهوائهم سقيمة وغير سوية.. ومع ذلك عقلهم شغال ويستحقوا العقاب.

والمظاهر مش المفروض تخدع أي حد.

=============

كراكيب
بجد بجد يا ميرو انا معملتش حساب النقطة دي خالث مالث.. بس أهي بردو تعتبر نوع من أنواع التوعي
لان مش بس على الفكرة التحرش ممكن بنت تتعرضله.. لا الولاد كمان معرضين لكدة وبقت بتحصل متييييييييييييييييير
ربنا يحمينا من شر نفوس الناس

نورتيني يا ميرو النيرو كوانيرو

============

إنترنتاوي
هو عندك حق.. بس لو الام اضطرت لأي ظرف لشغل أو مسئولية تانية.. المفروض تسيب ابن او بنت واعيين وعارفين الصح من الغلط.. علشان يحذروا ويحترسوا غدر الاخرين.

============

عمرو
فعلا انشغال الاهل فى الدنيا بعدهم عن رؤية تغيير السلوك.
وانت قلت حاجة فعلا فى منتهى الصدق.. الولد دلوقتى بقى يتخاف عليه بردو.. وبيتعرض لتحرش واعتداء واغتصاب كمان
ربنا يرحمنا برحمته فى الزمن ده.

===========

blue-wave
ربنا يلطف بينا وبالزمن اللي هنربي فيه أولادنا كمان.

===========

تأثير الفراشة
نفس الموققف بيحصل في بيوت كتيرة قوي.. بعلم الاهل وعدمم تصديقهم لولادهم أو بدون علمهم
والبنتين دول فعلا محظوظين انهم عرفوا يتغلبوا على الموقف دة.. ربنا ما يحكم بيه على أى حد أبدا.

وكلامك دة انا اعتز بيه جدا.. وانتى الاجمل يا قمر.

=============

mahasen saber
نفس موقف الام اللى انا اتكلمت عليها فى الاول يا محاسن.. والحقيقة اني جوايا حاسة ان البنوتة دي اتعرضت لتحرش من الشغالة.. بس خايفة أقول للأم لتفتكر انى بحسسها بتقصيرها رخامة وحقد.. مش عارفة انا موقفى صح وللا غلط.. بس ربنا يسامحنى بقى.
فعلا الاهل دول يا اما بيبقوا جنه لولادهم يا اما نار.. ربنا يلهم الاهل الصواب دايما فى تربيه ولادهم.. واقل مجهود حتى عمره ما هيضيع هدر.. وهيسيب اثر جامد فى نفس الابناء.
وانا سعيده جدااااااااا ان الموضوع عجبك يا قمر.

============

د/عرفه
مهى المشكله ان الاهل نفسهم واخدين الدين مظهر ومعاملاتهم اسوأ ما يكون فى الحياة.

=============

yoyo
زيارتك خلت المدونة بطعم السكر يا يويو
وفعلا مفيش أمان الوقتى ان الام تسيب ولادها لأى حد قريب أو غريب.. بس للأسف الغالب بيعمل كدة الوقتى.. امال الجيل دة بايظ من شوية.. مهو من قلة التربية.
ربنا يحفظنا ويلطف بينا.

ان شاء الله يدوم التواصل يا يويو.

===========

شمس النهار
الواقع اكثر صدمة بكتيييييييييييير من القصة دي.
يارب الاهل يفوقوا ويربوا صح.. علشان نعرف نشوف جيل صح.

============

كيــــــــــــارا
الخير موجود طبعا.. لكن عايزينة يبقى هو الغالب ان شاء الله.

===========

وومن
حمد الله على السلامة يا قمر وعقبال ما نسمع اخبار حلوة عن النتيجة ان شاء الله.
انتي عارفة ان اللى بتقوليه مهم جدااااااااا.. الابواب المفتوحة دي حماية من شرور كتير
والاجمل لما تكون الرقابة موجودة فى صورة صحوبية وتفاعل مع الابناء
نقطة جميلة اننا نعلم ولادنا ان مفيش باب بيتقفل غير على زوج وزوجه.. علشان يعرفوا فعلا الصح من الغلط ونحميهم من اى حد ممكن يئذيهم.
ربنا يجمي البنات والولاد كلهم ويرحمنا جميعا.

=========

اسماء واحلام فى وجدانى

اممممممممممم.. تم استنساخ القطة بدل الخطف والاذية
هههههههههههههههههههه
وطقم الحراسة الجديد اكيد هيكون احسن من اللى فات الللى رجالتى عرفوا بقتحموا المكان وياخدوا شعراية من القطة علشان استنسخها
هههههههههههه

===========

بنوتة مصرية
غعلا الطفل زي العجينة بالظبط.. وأى تجارب سواء حلوة او سيئة بتتحفر في نفس الطفل.. لو الام والأب محرصوش ان ابنائهم ميتحفرش جواهم تجارب لانتهاك برائتهم هتبقى كارثة.
ربنا يحمينا ويقدرنا نربي جيل سوي بلا نفوس محطمة.

=========

موناليزا
حقيقى الضنا غالى بس الجهل ممكن يوقع الانسان فى سوء التصرف.

=========

Lady E
المشكله يا ليدي ان الحوار كان موجود دايما
لكن الثقافة الجنسية ضعيفة جداااااا.. ودة شىء لازم الاهل يحصنوا بيه أولادهم
جهل الاهل نفسة بيسبب لهم هم مشاكل كتير.. ومبيفكروش ان جهلهم هيبقى ليه تأثير جامد على ولادهم.

ربنا يحمينا ويلطف بينا

===========

ابو المفاصل الواصل يقول...

قال سحتوت كلما اكلت السحت هدأت نفسى وارتحــــت
قلت له انه هدوء مؤقت بل قل ولعت جسمى وسحــــت
فالحرام انتقام من نفسك وخراب لبيتك هكذا قلت وبحت
فلا تخدعك الدنيا فانها دنيه فدعها عنك وقل استرحــــت
ولا تحمل نفسك ذنوب وكروب بما نهبت وبما استبحت
فالناهب منهوب ذات يوم وتبقى الذنوب ذنوب ومقــــت
والمستبيح مستباح ولا ترتاح حتى تسدد ما قد سرقتــــت
فسارع وسدد الحقوق لاصحابها فلم يعد هناك وقـــــــت
وقل للحق والعدل والانسانية نفسى هفت واشتقـــــــــت
===============
ناجح يوسف فهمى

Ramy Wasel يقول...

للاسف كل هذه المشاكل سببها الرئيسى غياب دور الاب والام
وعدم الاهتمام بالاولاد
وغياب التربيه السليمه فى معظم الاسر
والا لما تجرء شخص المفروض انه خال
ويتحرش بأبتاء اخته
لان هذا خلل نفسى فى المقام الاول
وعلى كل اسره ات تربى ابنائها تربيه سليمه
ورعايه الابناء اهم من جمع الاموال من الخليج وترك الابناء للخدم

موضوع مهم جدا
ومدونه ممتازه
وبأذن الله اتابعها دائما

تحياتى

رامى واصل

MaNoOoSh يقول...

ابو المفاصل الواصل
أشكرك على مشاركتك الكلام الجميل دة معانا
وفعلا كل كلمة فيه حقيقة
نورتني ياناجح


===========


Ramy Wasel
كلام حقيقى اللى قلته
مفيش حاجة فى الدنيا هتعوض شرخ علاقة الأهل بالابناء

وأشكرك بجد على رأيك فى مدونتي.. ومتابعتك تشرفني.