الجمعة، 5 يونيو 2009

النهيبة ومواصفاتها.. والناهب والمنهوب

اكيد كلنا سامعين عن طاعون السرقة اللي داير فى التنترنت اليومين دول ودكهومن كمان. النهيبة...
تتميز النهيبة (اللي هي التدوينة المسروقة يعني) بأنها شعر أو خواطر نثرية في الغالب.. كما تتميز بعدد سطورها القصير نسبيا.
يعني من الاخر اللي بيكتب أشعار وخواطر بيتنهب أكتر من اللي بيكتبوا موضوعات عامة.
ونطلع من الحتة دي بإييييييييييييييه.. اني مش هكتب أشعار تاني غير في مدونة لكَ وحدك اللي انا أساسا قافلاها بالترباس.. هع هع هع.
نيجي بقي لانك ازاي تعرف انت مسروق وللا لأ.. أنا شخصيا بحثت علي عناوين المواضيع بتاعتي.. وحتت من جوة الموضوع.. لقيت بالصدفة ان الشعر الوحيد تقريبا اللي كتبته مسروق.. اتجننت وقعدت أدور على طريقة للحماية.. اكتشفت ان انت مهما حطيت من أكواد مش هتعرف تحمي كلامك.. لأن بسهولة جدا الحرامي هيجيب ورقة وقلم ويكتب.. ناهيك عن انك ممكن تعمل زي سيادتي وتبوظ قالب المدونة وتقعد ساعتين تعدل فيه (منك للي كل دراع مراته يللي سرقتي).
الحل بقي انك تفضل تدور على مواضيعك.. جمل منها أو عناوين.. وتفضل ورا المنتدي اللي موجود فيه المنهوب منك.. لغاية ما يشيلوه.
أو لو مش عايز كدة اقفل مدونتك وخليها لأصحابك اللي تعرفهم بس وابعتلهم دعوات للقراءة.
نيجي بقي للمهم...
المدونة دي هتعلمك شوية حاجات جميلة في محاولة عرقلة جناب الناهب باشا.. واعمل حسابك انك أساسا مش هتقدر تمنعة تماما..
ناس بقي عرفت انهم اتسرقوا غيري كتير من الموضوع اللي في مدونة أحمد (أسماء وأحلام في وجداني).
بعنوان ولا بيهمنا...
اقرأوا الموضوع بتاعة كويس وأقرأوا التعليقات.. هتعرفوا ان انت بالذوق تعرف ان شاء الله تجيب حقك وترتاح.
وانا هقتفس (أقتبس يعني) من موضوعة الجملة دي "كل اللى بيحصل ده مش بيهمنا لسبب بسيط جدا ان الانسان اللى ربنا بيهديه موهبة مش بتخلص زى البحر خد منه على اد ما تقدر.. تفتكر هياثر فيه؟؟ ابدا البحر مش هينتهى الا بيوم القيامة.. واحنا كمان الموهبة مش هتنتهى الا بموتنا.. خلى اللى ياخد ياخد لاننا مش هينفع نبطل كتابة.. ولا هنقدر نوقف الناس دى ابدا.. لان مفيش رقابة من اى نوع فياريت اللى اتسرق منه حاجة يقول يارب واكيد ربنا مش بيرضى بالظلم مهما طال الزمن"
واللي يعرف ومتأكد من أي مواضيع مسروقة يحطها لأحمد في التعليقات في موضوعه ربنا يجزي احمد كل خير على تعبه واهتمامه بالناس.
نيجي بقى لإحساس طفلة محبة للرومانسية بس واقعية هي الصراحة تعبت كتير قوي واتنهبت بالهبل تقريبا كل مواضيعها.. وبتشرح للناس فى الموضوع ده..
تجربتها في سرقة مواضيعها وازاي الناس تحاول تعرف هي اتسرقت وللا لأ.. وكما ربنا يجزيها كل خير هي كمان ويوفقها شارحة للناس الأكواد والطرق اللي بتحاول تمنع السرقة بيها.
والحقيقة هي اللي دخلت المنتدي اللي كان مسروق فيه موضوعي وكلمت الادارة علشان يحذفوه.
وأنا ليه تحفظ على كلمة نقل.. انا مصممة إنها سرقة مش نقل.. لإني أساسا مش عايزة حد ينقل أشعاري وخواطري الخاصة من مدونتي.. أنا بشارك فيها ناس بحبهم من البلوجارية ومش عايزاهم يبقوا مشاع على النت.
المهم يا جماعة ان أي حد اتسرق ميكتئبش بقى ويقفل مدونتة وكلام من دة..
لأ.. اكتب ان انت اتسرقت وروح للمكان اللي اتسرقت فيه وكلم الإدارة بكل ذوق.. وان شاء الله ربنا مش هيضيع حقك..
وبجد بجد حسبنا الله ونعم الوكيل في كل ناهب.. وأحب أقول للناهبين.. أوعوا تفتكروا انكم تفرقوا حاجة عن الحرامية.. مش علشان سرقتوا كلام يبقى حاجة هايفة.. مش علشان صاحب الكلام مشارك أصدقاءه فيه على النت يبقى تفتكر انه مشاع ومن حقك تاخده.. انت يللي بتسرق أي حد تبقى مجرم وحسابك عند ربنا.. اوعي تستتفه جرمك أبدا...
وبس كدة كفاية عليكم بقى كل الرغي دة.
اه نسيت أقول ان البنت اللي سرقت موضوعي سرقت كمان الموضوع دة.. اعلى درجات العشق
اللي هو أعتقد بتاع المدونة شباك موارب.. وموضوع شباك موارب أهه.. واللي نازل في نفس يومها بس الصبح.
وكمان موضوع اسمه.. الحب و الكره وجهان لعملة واحدة
النسخة المسروقة هنا
النسخة الأساسية على ما أعتقد هنا ولو اني معرفش صاحب أو صاحبة المدونة دي.

35 اللي عبروا منوووشة:

ستيتة يقول...

العجب في بلاد العرب
عنوان كتاب مزق قلوب العذارى والمساكين

جف نبع الموهبة والعطاء لدرجة سرقة خواطر ادبية؟
والله شيء يعر ويخجل

كده كده متتعبوش نفسكم قوي كده
الحرامي ها يجي من غير ما تدوروا عليه
اثبتت التجارب ان زي الكذب ملوش رجلين
الحرامي حمار بودنين

لكن غلق المدونات دي فكرة زفت
يعني كأننا مجموعة وممنوع مدون جديد في عالم التدوين
نتعرف عليه او يتعرف علينا

انت ونونو الرومانسية جبتوا الخلاصة
لما نكتشف حد سارق حاجة نبلغ ادارة المنتدى
وبعدين نرجع ع المدونات نصيح له ودمتم

سلامتك من السرقة يا اوختشي

Unknown يقول...

يعنى اول مرة اجى اعلق عند حضرتك
الاقيكى كاتبة عن السرقة
مع تحياتى
انا ضفت مدونة حضرتك فى رول المدونات
و ان شاء الله اسرقها قصدى ان شاء الله اتابعها
:-)

د/على خميس يقول...

السلام عليكم و رحمة الله و بركاته
الأخت الكريمة
أنا كمان ....اهئ اهئ اهئ اتسرقت
بس الحمد لله موضوع واحد بس ...انا كل اللى عملته 7 أو 8
بس الجديد عن اللى انت قلته ان موضوعى كان تعليق على آية قرآنية...آه و الله الراجل سرق تعليق على آية و حطها على صفحته فى مكتوب و الراجل ايه بياناته على الصفحة ...شيخ ....منصر.
اهتماماته... الدين .
بيقرأ ..لإبن القيم (مش دى كمان غشها منى و لا ايه؟؟؟)
بس ابن الذين مش عارف احط تعليق عنده...
المهم أنا فعلا شكلى كده مش هحط المواضيع اللى أنا حاسس انها جامدة...



كل سرقة و احنا طيبين
شكرا لمجهودك
تقبلى تحياتى

ادم المصرى يقول...

انا وضعت حل ممكن يعم بفائده ولكن الرأى لكم فى الاول والاخر

غير معرف يقول...

مش قادرة اقول غير ربنا يرحمنا برحمته
سرقة وبلاوى سودة
بس برضه انا ضد غلق المدونات
فالخير هو اللى حينتصر
وواضح ان الاخ ادم المصرى شاف لكم حل
المهم كمان لانتحرم من مواضيعكم المميزة
تحياتى

غير معرف يقول...

مش قادرة اقول غير ربنا يرحمنا برحمته
سرقة وبلاوى سودة
بس برضه انا ضد غلق المدونات
فالخير هو اللى حينتصر
وواضح ان الاخ ادم المصرى شاف لكم حل
المهم كمان لانتحرم من مواضيعكم المميزة
تحياتى

منــار فايد يقول...

ايه ده يامنوش
حرام عليكي زعلتيني
بجد منهم لله اللي بيسرقوا مواضيعنا
وربنا كل اللي في المدونه عندي من كتاباتي انا...
طيب اعمل ايه بس دلوقتي
هيحرموني اكتب حاجه على المدونه....
منوش قوليلي رايك ايه بجد
نعمل ايه ونتصرف ازاي.....

مستنيه ردك


والف شكر ليكي على اهتمامك


منار فايد

لاسع افندى يقول...

السارق لا يسرق الا الاشياء القيمه


تحياتى

yoyo يقول...

صباحك سكر يا مننوش

و الله تسلم ايدك
انا شفت الموضوع عند أحمد
وبجد حاجة صعبة اوى علينا لما تحس انك بتسرقى ومش عارفة ترجعى حقك ازاى او حتى تحمى نفسك

و الله الاشخاص اللى بتعتمد على السرقة دى ناس مريضة بجد ومش عنده اى اخلاق عالم النت كله مش بيتحكم فيه غير الضمير و الاخلاق
بس اهى محاولة اننا على الاقل نبلغ المشرفين على المدونة عشان كل انسان ياخد حقة

ربنا يحفظنا يارب
دمتى اختى بالف خير وصحة
تحياتى
يويو

تامر علي يقول...

بالمناسبة أنا لسه مبلغ د/ ستيته إن موضوع لها وموضوع ليا متاخد في موقع صحيفة اسمعا العربي الناصري بس منزلينه بأسمائنا علشان الحق حق :) لكن نشروه بلا استئذان

السارق مفلس فكرياً طبعاً لكن لازم اللي يتسرق يبلغ

وأنا أطالب بقطع رأس السارق وتعليقها على باب جوجل

تحياتي :)

د. ياسر عمر عبد الفتاح يقول...

أنا عن نفسي مش بعتبر النقل سرقة
ولو حد نقل مني حاجة وكتب عليها إسمي مش هعتبرها سرقة خالص

المشكلة إنه بمنتها البجاحة بيقول إنها بتاعته
حاجة تحرق الدم
ولما دخلت مره وقلت دي بتاعتي أنا
محدش عبرني ...!!
ربنا يهديهم

احساس طفلة محبة للرومانسية بس واقعية يقول...

انعدمت الضمائر وضاع معنى الامانة
ما هم لو يعرفوا معنى ان يكون عندك موهبة ومعنى انك تعبر عن احساسك وافكارك وتشارك اصدقائك فيها
ومدى اهمية دا لينا
يمكن كانوا معملوش كدا
انتى تقريبا جبتى المضمون

بس با منوش انت قافلة مدونتك التانية ومش هتكتبى شعر تانى انا وورردة وفراشة واحمد والناس اللى مش بتعرف تكتب غير خواطر او شعر او كلام بالشكل دا :(
معناه اننا منكتبش تانى
انا فكرت فى كدا وكنت هقفل احساس طفلة وبعدين لغاية دلوقتى مش قادرة حتى اسيب المدونة واخلى مدونة تانية مدونتى الاساسية

عامة اهو احنا وراء الناس دول لغاية لما نشوف حل
تقبلى مرورى

The illusionist يقول...

صح والله
دى سرقه علنى
هو لازم يعنى اخد فلوس عشان تبقى سرقه
اسؤا شئ السرقه الفكريه
اللى بيسرق الفكر بيبقى عاجز وفاشل ومعندوش موهبه
ده غير لو لاحظتى نص المواضيع المسروقه محدش رد عليها
وفعلا زى ما قالوا
الموهبه فعلا طالما مش بتخلص
عادى
بالعكس كمان
ده يدل على ان كلامك رائع لدرجه ان الناس نسبته لنفسهم
بس

أم أحمد المصرية يقول...

حسبنا الله و نعم الوكيل
ما تزعليش نفسك يا قمر
ده معناه ان كلامك جميل وموهبتك واضحة خذيها بهذا المنطق عشان ما تزعليش
و ربنا مش بتضيع عنده الحقوق

غير معرف يقول...

حسبنا الله ونعم الوكيل

مش مكسوفين من نفسهم بالرغم من انكم مش محللين النقل

بينقلوا وبينهبوا برضوا ايه قلة الزوق دي

فكرتك كويسة وانا لاحظت انه شكوى محبة للرومنسية جابت نتيجة ومدير المنتدى حذف الموضوع ^ـ*

وبالنسبة لقفل المدونة او حتى حذف البوستات القديمة دا غلط مش هيجبرونا نعمل حاجة احنا مش عاوزينها

ربنا يحميكم من السرقة

دي بالف خير حبيبتي

ELMASRYA - MRS WRITER يقول...

أنا بقيت مخنوقه

إشمعنى انتي يا منوش

الموضوع ده عرفته من نونو الرومانسية اللي هي إحساس طفلة محبة للرومانسية

وبجد دمي اتحرق

أنا ياختي في كل مدوناتي لو بكتب فيها مواضيع منقوله أصلا عاملة رساله متحركه أول المدونة إن فيه مواضيع منقوله للأهمية

وأصلا مش عارفه أصحابها لأنها بتجيلي في إيميلات مكتوب فيها إنها منقولة بدون ذكر منقولة من مين

لازم نكتب لما الموضوع مش يكون بتاعنا

لكن مدونتي بقى حبيبتي بنات أفكاري كل كلامها من جوايا يعني بنتي لا يمكن أقبل إن حد يقرب منها

وبعدين بقى من انعدام الأخلاق ده؟

تصدقي يا منوش خايفة ادور على مواضيعي علشان مازعلش واتخنق أكتر

ربنا يسامحهم وحسبنا الله ونعم الوكيل

دمتي سالمة بحفظ الرحمن

أبو العريف يقول...

منوش
انا بقي ليه تجربه في موضوع السرقه ده مختلفه جداااا
لان انا اللي كنت بسرق مش بتسرق
الفكره جات لما لقيت السرقه انتشرت
وقلت اكيد اللي بيسرق ده بيسرق حاجه قيمه
فعملت مدونه اسمها
امسك حرامي
وكانت لسرقه كل ما هو نفيس وغالي بس بشرط
اولا اني لازم استأذن المسروق
وتقريبا كل الناس اللي سرقتهم
كانوا مبسوطين جدااااا بالسرقه دي
وتقدري تشوفي التعليقات
ثانيا
اني القي الضوء علي صاحب الموضوع
وعلي مدونته واسيب اللينكات
كمان كنت بتكلم هن التعليقات واجمل تعليق جاله
ورد عليه ازاي
كمان الموضوع كان بيتعمل بشكل دمه خفيف

بس لقيته محتاج وقت واضطررت اقفل المدونه
واسرح العصابه
وادي المدونه للي مش عارف يتوب عن السرقه
وعايز يكمل بس بشكل مشروع
( سرقه مشروعه )
انا مستعد اديله المدونه

www.emsekharamy.blogspot.com

Ahmed يقول...

MaNoOosh
هيا السرقه وصلت للمدونات بالشكل ده

بصراحه الموضوع ده مقرف
يعني الناس ديه مش كفايه انهم حراميه لأ واغبيه كمان
في دنيا الانترنت سهل جدا ان الحرامي يتكشف

الناس ديه لازم تحاكم بتهمة الغباء التدويني

عجبني اوي يامنوش انك مش من الناس اللي بترمي الموضوع بسهوله وتقفل الباب وتقول انا منسحب

SHAPE YOUR LIFE (ABOALI) يقول...

اسرق وانهب
السرقة لذيذة
واللى مش عجبه
ياخد بريزة
اسرق وانهب يا مان
ايه يعنى لما مايكونش عندك ايمان
يلا بينا نسرق بعضينا
ونحط الحرف جنب الحرف
وناكل على النيل لبان
اسرق وانهب
بكره السرقة تبقى عنوان
ولما تكون حرامى يشاورا عليك بالبنان
ايه يعنى كلمة وضمة وكسرة و فتحة كمان
جت علينا طب خلاص قولوا علينا رجال اعمال
اسرق وانهب
وفى النهاية النار هاتحسسك بالامان



السرقات التدوينة
لا تختلف عن السرقات الاخرى
والتدوين صورة لمجتمع وما فيه من سمو اخلاقى
اللهم حسن اخلاقنا



تحياتى

romansy يقول...

متزعليش نفسك
يا منوش
الكلام مهما اتسرق واتكتب
مش هيبقى بنفس اسوبك

Lady E يقول...

شوفتي يا منوش انا ببحث عن موضوع من مواضيعي بعد كلامك لقيته نازل بالنص على منتدى من المنتديات

والله اتحرق دمي

حسبي الله ونعم الوكيل بجد

غير معرف يقول...

اتصلى بمباحث المدونات هعهعهع
طبعا لازم تتسرقى يل بتاعت الثأثاه يا بطاطا

Jannah يقول...

معلش :)ماتهتميش

حاجات جوايا يقول...

هههههههههههههههههه
عااااااااااااااااا
والله منا عارفة اضحك ولا اعيط
شوفت موضوعك قلت اما ادور على مواضيعى فى جوجل
واذ بى الاقى اشعارى فى المنتديات زى منتدى يا ميلودى .. ومنتديات خليجى وما خفى كان اعظم

المصيبة الكبيرة بقى ان الافى كلامى مسروق فى مدونة
المدونين كمان بيسرقوا
ياللهووووول


على فكرة انا لاقيت مدونتك عنده فى الريدر
بس معندوش ولا زيارة يا عينى
شكله حرامى مبتدئ
معلش
بكره يكبر ويبقى حرامى كبيررررررررر
ههههههههههههههههههه


اللى يسرق يسرق
هو اللى هيروح النار مش احنا
يارب انا مش مسامحه اى حد يسرقنى
يارب ادينى حقى منه يوم القيامة

انا مش هقول اسم مدونته
عشان ربنا امر بالستر
ومن ستر مسلما فى الدنيا ستره الله يوم القيامة
انا بحكى على موقف بس

منوووش
كبرى الجى وروقى الدى
ههههههههههههههههه

سلام يا قمر

عمرو يقول...

السرقات الفكريه موجوده منذ القدم حتى بين فطاحل الشعراء العرب و فيه دراسات كتيره بتحلل هذه الظاهره الغريبه و أنتهت جميعا اٍلى أنه لا حل نهائى و جذرى لموضوع السرقات الفكريه لأنها لو ماكنتش منقوله بالنص فحتكون منقوله بالفكره يعنى اٍقتباس فكرى يعنى حتبقى مجرد توارد خواطر :)
تقبلى تحياتى و تقديرى و ربنا يعوض عليكى ..

Unknown يقول...

فعلا دي مشكلة واجهتني رغم أني مبكتبش شعر
كل ما أكتب مقالة أو استشارة ألقيها منشورة في كل حتة مشكلة فعلا ملقتش ليها حل
بس ياريت لو تقولي لي كود اللي بيمنع النسخ من المدونة يبقى جزاك الله خير

ويبقى التواصل

MǿиY El-Shreef يقول...

مش عارفه اقولك ايه والله

اكتر حاجه تحرق الدم

وحصلتلي انا وصحابي كتير الناس الي بتصمم بالذات حجاتهم يتتسرق ف المنتديات بشكل عجيب

انا مش بعمل غير اني مش بحلل وربنا هو الي بياخد الحقوق

وحشاني (L)

غير معرف يقول...

اتنشلتى...طيب
انا بقا ما افتكرش حد هينشلنى...... ايش ياخد الحرامى من المدونه
دمتى بخير......تقبلى مرورى

!!! عارفة ... مش عارف ليه يقول...

الموضوع زي ما قولتي ان الواحد يريح باله علشان ببساطة

هي دي قواعد اللعبة يا نقبل بيها يا نقعد في بيوتنا ونقفل على افكارنا جوا اجينداتنا

واللي بتقولي عليه ده حصل معيا في موضوع بعيد عن الشعر كل البعد

وكانت الواقعة بخصوص موضوع عن نقد سينمائي لفيلم كان منشور لي على موقع محيط وبعد فترة كده عملت سيرش عليه مثلما ذكرتي

والمفاجأة أني لقيته منشور في مواقع يفترض إنها محترمة وتتبع لمؤسسات وطبعا الموضوع منقول بالحرف حتى بالتشكيل والله

والحاجة الوحيدة المحذوفه منه هي اسمي وطبعا اسم الموقع اللي كنت ناشر فيه الموضوع

وبالرغم من كده الحمد لله متقوقعتش جوه نفسي والحاجات دي
تقبلت الموقف والحمد لله لسه عايش اهوووو

وشكراً جزيلاً على تنويهك عن كيفية الحماية قدر الإمكان


تحياتي
وليد

z!zOoOo يقول...

السلام عليكم

يارب تكوني بخير

انا اخدت بالي بإن فيه سرقه لكن مش بالعدد ده ومأخدش بالي اصلا إن فيه حد منزل موضوعات عن الكلام ده الموضوع بتاعي اصلا قديم عن السرقه ديه قرب يكمل سنه بس افتكرت بمناسبه الموجه وقلت انزله

طيب دلوقتي فيه حاجه

نسيتي تحطيني في قايمه المسروقين :)

انتي بتتكلمي عن كده

طيب شوفي البجاحه بقي :

واحد سارق قصيده من صديقه عزيزه وحورها وعمل ميكس ما بين كلام هو حطه ولا الله اعلم سرقه منين وبين القصيده بتاعتها اول ما شوفتها قولت يالهوي هو للدرجه ديه

شوفتيش بجاحه اكتر من كده

وياعيني علي صديقتي ديه لو عرفت ( هتموت بحسرتها ) هههههه

فعلا شيء مالوش حل وانا اصلا مقل في نزول الاشعار

بنزل بس الي مستغني عنه ههههههه

ربنا يلطف بينا بس هي حلها حقوق ملكيه فكريه

وحسبنا الله ونعم الوكيل

نورتيني بالزياره وأتمني دايما تفتكريني وتنوريني


( انا خايف التعليق ده يتسرق انا هربطه في عامود النور ) :)

تحياتي

MaNoOoSh يقول...

ستوتة
*******
فعلا يا ستوتة.. احنا بقى عندنا مش بس جفاف فى الأفكار والخيال والأخلاق.. لأ الجفاف بقى كمان فى الاحساس

وانا منكرش انى اول ما اكتشفت ان كلامي اتسرق راودتنى نفسي انى أقفل المدونة أساسا والغيها.. بس لقيت اني مقدرش أبعد عن ناس بحبهم وبستمد منهم شىء من قدرتي على الاستمرار فى الحياة رغم انى معرفش حد فيهم شخصيا.

=========



بدراوي
*******
انا سعيدة جدا بزيارة حضرتك.. ويشرفنى جدا وجود مدونتى فى الريدر عندك

=========



د على خميس
**********
والله انت صدمتنى.. تعليق على آية قرآنية؟؟؟؟؟
مهو هو دة اللى ناقص فعلا.. انارأيي سيحلة فى مدونتك وحاول تعلق عنده بردو بأي طريقة

وبعدين انا مش معاك انك متنزلش مواضيع تحس انها كويسة.. والا يبقى ايه الفايدة من التدوين أساسا

===========



ادم المصري
*********
انا قرأت الحل اللى انت قلت عليه.. ولما جيت أرجع اشوف آراء الناس التانية لقيت الموضوع اتمسح.. ياترى ايه السبب؟؟؟؟؟

=============

أم مالك
*****
انا كمان معاكي يا ام مالك.. لو قفلنا مدوناتنا وبطلنا نطلع اللى جوانا هنتقهر
والحرامي مسيره هياخد جزاءه فى الدنيا والاخره كمان.. اصل جرمه مش هين رغم انه فاكر كده.


==========

شباك موارب
*********
بصي يا منار.. مفيش حاجة اسمها يحرموكى تدونى.. اكتبى علطول ولا يهمك
ممكن تحطي بعض وسائل الحماية فى المدونة.. رغم عدم فعاليتها التامة
وفى الاخر ولا يهمك من العالم دي.. شرديهم وسيحلهم وافضحيهم.. وخدي حقك من بق الاسد.


============

لاسع أفندي
********
انتى بتدينى كدة أمل فى نفسي والله
ههههههههههههههه

نورتني.

==========

يويو
****
فعلا يا يويو.. احساس صعب قوى.. والاصعب العجز عن الردع التام
ومع ذلك فيه حلول كتير

ورأيي ان فى الاخر لا يضيع حق وراءه مطالب


==========

تامر علي
******
النشر بلا استئذان نوع اخر من أنواع التعدي على الاخرين والسرقة
بس لو علقنا رؤوس السارقين على باب جوجل.. كدة هيقع وللا يتقفل وللا يولع من كترهم

انا بقول نعلقهم فى القصر اللى فى مصر الجديدة دكهون

===========

د. ياسر
*****
حتى لو حد نقل بدون استئذان وأخذ للموافقة فده بردو سرقة وتعدي على الحقوق
وبردو هقول انه لا يضيع حق وراءه مطالب
متسيبش حقك
اشتكي للاداره
نزل موضوع فى الشكاوى
كلم المشرفين
اعمل كل اللى تقدر عليه ومتفرطش ففى حقك

=========

احساس طفلة
********
انا تراجعت عن كلامى يا نونو.. وهكتب أشعار وخواطر وهنشرها هنا
انا مش هستسلم علشان خاطر حد غاصب وسارق ومعندوش ضمير
وانا معاكي.. احنا وراهم لغاية ما ان شاء الله ربنا يلهمنا الحل

=========

The Illusionist
**************
فعلا السارق ده عاجز عن الابداع أو حتى الخيال
بس ربنا يعيننا عليهم بقى وعلى التدوير ورا كتاباتنا.

ووالله الكلام اللى اتسرق مكنش فظيع يعنى ولا خطير
دة كان شوية كلام طالع من القلب.

نورتني

==========


ام أحمد المصرية
***********
ان شاء الله مفيش زعل ولا حاجة.. واهو درس علشان الواحد يبقى يدور على حاجتة على طول ويطالب بحقه بلا كلل ولا ملل
وفعلا ربنا مش بيضيع حق حد

==========

نوارة
****
هم فعلا يا نواره مش بيتكسفوا
اذا كانوا متكسفوش من ربنا.. يبقى هيتكسفوا من الناس؟؟؟

وان شاء الله مفيش لا حذف ولا قفل مدونات.. ربنا يحمينا جميعا ومن نحب

==========


المصرية
*****
لا يا مصرية مش عايزين حد من المدونين يتخنق
احنا عاوزيم نخنق الحرامية ونضيق عليهم سبل السرقة
وبعدين نقل حاجة غير معلومة المصدر أساسا وذكر انه منقول يختلف عن نقل حاجة مصردها موجود وعدم استئذان صاحبها واخذ موافقتة قبل النقل

وانا مش معاكي
لازم تدوري على مواضيعك وتطالبي بحقك لو لقدر الله لقيتى حاجة مسروقة
وربنا ان شاء الله يقدملنا الخير جميعا

=============

أبو العريف
********

ياريت فكرة السرقة بتاعتك دي تكون هى السرقة
دة المسروق يتبسط ويفرح

وانا زعلانة فعلا ان مدونة امسك حرامي مقفولة
يا ريتها تستمر ويبقى ليها تواجد تانى


وانا معاك فى النداء للى قادر يستمر فى السرقة المشروعة فى المدونة دي


=========

أحمد أبو العلا
*********
دة مش غباء يا بشمهندس
دة استهتار بعقول الناس.. او محاولة للتمحك فى الابداع

مش عارفة اللي يتسرق يتهنى على ان كلامة ليه قيمة وللا يتعزي فى السرق
بس انت طلعت معانا فى جانب المسروقين انت كمان اهو.. وان شاء الله محدش مننا يزعل ولا ينسحب ابدا

===========

MaNoOoSh يقول...

أبو علي
******
كلامك جميل فعلا يا ابو علي
هو حرامي الكلمات والافكار فاكره انه غلبان وجرمه هين.. بس مفيش جرم يهون على خالق العباد
ان شاء الله حقوقنا محفوظة عند اللى خلقنا
واحنا هنسعى وراها من غير ما نزهق

===========

رومنسي
******
فعلا يا رومنسي الكام اتسرق واتحذف منه يمكن كلمتين.. بقى ليه معنى تاني خالص ووزن تاني خالص
بس بردو مش هنسيب حقوقنا

=========

ليدي
***
متحرقيش دمك ابدا يا ليدي.. خلصى بس امتحاناتك ودوري على كل مواضيعك واحتفظى باللينكات وسجلى فى كل المنتديا وطالبي بحقك فى حذف المواضيع المسروقة
وان شاء الله ربنا مش هيضيع حقك

==========


بيبرس
*****

هي فين بس مباحث المدونات دي
طب هاتلى تليفونها وانا ابطل ثأثأة
عااااااااااااااااااااااا

==========

جنه
***
ان شاء الله ربنا مش هيسيب حق المنهوب يا جنه

========


حاجات جوايا
********
بصي.. انا رأيي متسيبيش حقك


بس انتى غيظتينى كدة
يعنى احنا هنستنى عليه لما يبقى حرامي كبير يعنى وللا ايه؟؟؟؟
لا يا بنتى مينفعش.. لازم نقول على مكان الحرامي علشان ميسرقش حد تانى.. هو صحيح ربنا أمر بالستر
بس كمان أمرنا منفرطش فى حق نفوسنا علشان الجانى علينا ميجورش على غيرنا كمان

==========

عمرو
****
للأسف فعلا كلامك صحيح
مفيش حل جذري للموضوع دة
ربنا يعوض علينا فعلا
عاااااااااااااااا


==========

معتز شاهين
*******
انا اسفة انى اتأخرت عليك.. وباذن الله الأكواد كلها اللى عرفتها هنشرها حالا فى موضوع جديد أول م أخلص رد على التعليقات

وان شاء الله يدوم التواصل

=========


موني العثولة
********
فعلا سرقة الشعارات حاجة كمان متعبة للنفسية قوي

وللأسف على رأي عمرو مفيش حل جذري
وربنا يعوض عليكي زينا


انتى اللى وحشانا كلنا.. وربنا يعدي الامتحانات على خير يا قمر ويحقق لك كل أحلامك باذن الله

==========

فتاة من الصعيد
**********
يا بنتى منا كنت بقول زيك كدة لغاية ما دورت واتصدمت
عااااااااااااااااااااااااااااااااااا


==========


عارفة.... مش عارف ليه
***************
انا بصراحة مكنتش أتخيل ان حتى النقد يتسرق
ده ايه اللى احنا فيه دة
لا وكمان مواقع تبع مؤسسات.. دي تبقى خيبة قوية

ربنا يرحمنا برحمته بقى

وفعلا الانسحاب عمره ما كان حل
احنا هنفضل زي محنا ومش هنسيب حقنا
وهم يمكن ربنا يهديهم

نورتني يا وليد

===========


زيزووو
******
فعلا السرقة دي حاجة قديمة جدااااااااااااااا
بس الواحد لما اول مرة يتسرق بيحس باحساس غريب وبانه اول حد يتسرق لانة متوقعش اساسا
ان شوية كلام بسيط يتسرقوا

انا زعلت قوي على صديقتك اللى بتقول عليها دي
وزعلت اكتر ان الحرامي يفضل كدة من غير ما يتفضح

انا كنت هبطل انزل أشعار أو خواطر فى المدونة دي.. لكن رجعت فى كلامة وان شاء الله هنزل (مع انى مكنتش بنزل أساسا)
هههههههههههه

انت اللي نورتني
ومتقلقش أنا مكهربة سور المدونة علشان الحرامي يتلسوع لو فكر يهرب بحاجة.


===========

Arsenal Way يقول...

السلام عليكم
دي اول زياره لمدونتك يافندم
مدونه ظريفه وجميله
اتمنى تزوريني وتنوريني
وبخصوص موضوع السرقه ده انا باقترح نعمل حمله محترمه وكبيره ع الحراميه دول ونفضحهم ونكشفهم ونذكر امثله للسرقوه
ايه رأيك ودي ممكن تجيب نتيجه
تحياتي

Arsenal Way يقول...

حاجه تانيه
بعد إذنك طبعا انا حطيت مدونتك في الريدر عندي

MaNoOoSh يقول...

مصطفي أبو زيد
*************

أشكرك على رأيك فى مدونتى
ورأيك فعلا كويس
وياريت كل اللي يتسرق يعلن عن سرقته ويفضح السارق

ويسعدنى وجود مدونتى عندك طبعا

ان شاء الله يدوم التواصل

=============