الاثنين، 18 يناير 2010

أولا.. وثانيا.. و"ثالثا" عن الرجل أتحدث

أولا يعني أنا حابة أعترف اني كليلة الأدب وبغيب كتير بس والله في احتلال في بيتنا ومبعرفش اقعد براحتشي عالكمبيوتر
ثانيا سمعت اوشاعات ان في لقاء مدونين وان شاء الله كل الصحاب الحلوين يتلمو فيه ويكون فيه جو سعادة بعيد عن اكتئاب البلد ومعاااااااااكو في اللوقاء المرة دي... وبعدين يعني انتى مش ناقصين حكد زي المرة اللى فاتت
ثالثا بقى موضوع النهاردة طوييييييييل وممنوع لأصحاب النفس القصير... دة غير انه للكبار فقط كمان
ببساطة الموضوع عن الأباحة

لأ مقصدش السلوك يعني... أقصد الأفلام الأبيحة اللي الناس بتتفرج عليها واللي شفته بعيني ان اللي بيتفرج على الأفلام دي مش المراهقين المحرومين من الجواز بس لأ... دة من أول الأطفال اللى في ابتدائي مرورا بالمراهقة والشباب ومنتصف العمر وانتهاء للمراهقة المتأخرة (اللي بتوصل لسن التسعين عند الرجالة ويمكن أكتر لو ربنا اداهم عمر أطول من كده)
العيل من دول بيبقى لسة مطلعش من البيضة وفاهم كل حاجة وعارف كل حاجة وبيتفرج كمان مع الكبار على كل حاجة والمصيبة انه بيشوف ابوه أو أخوه وبيتعلم منهم ان الحاجات دي ممتعه ويبتدي يركز معاها علشان هيتعلم منها الرجولة طبعا

يوصل بقى لسن البلوغ والمراهقة ويبتدي يحتك بالبنات في المجتمع الحقيقى مش ورا الشاشة... لو عايش في مجتمع مفتوح هيعرف يصاحب ويمشي مع بنات ويسرقله بوسه من هنا وحضن من هنا (دة كان على أيام الناس القديمة دلوقتي بيقصرو ويتجوزو عرفي)
دة غير الجيل اللي طالع من الشباب مستبيح أي أنثي في الشارع أو وسط أهله وبيدي لنفسه أي مبرر علشان ميحسش بالذنب
ولو المراهق بقى عايش في مجتمع مقفول... مهما وصفتلكو عمر ما حد هيتخيل أنواع الشذوذ اللي في المجتمعات المقفولة غير لو عاش وسط المجتمع دة وشاف بعينه الشذوذ بين الشباب من نفس الجنس

وخصوصا ان اهتمام الشباب بنفسهم بقي زايد عن الوصف اليومين دول ... اشي جل واشي سبايكي واشي تظبيط حواجب ... وكله كوووووووم وشعر الصدر دة كوم تاني... شوية يحلقوه وشوية يربوه... وللا ايديهم اللي أنعم من الحرير (مش فاهماهم انا... دة ربنا خلق الراجل مخشوشن وصلب علشان يحتاج لرقة الست والست تحتاج لخشونته... شباب تجيب الشلل وربنا... يللا يكش يولعوا)
أم هند ... نرجع لموضوعنا الأهل طبعا مبيحسوش بموضوع الشذوذ لا فى الولاد ولا فى البنات ... وبيسيبوا لولادهم الحرية مع اصحاب من نفس جنسهم بدون أى نوع من انواع الرقابة
نيجي كمان لنقطة تانية مرتبطة جدا بالفرجة على الأفلام الأبيحة دي وهي العادة البتنجانية كتير قوي من الشباب بيتفرج على الأفلام الأبيحة دي ومبيلاقيش طريقة يخرج بيها طاقته (الجنسية تحديدا) غير بالعادة البتنجانية... اتجادل الشيوخ في الحكم علي حرمانيتها أو تحليلها كأخف الضررين... بس في أي حال كل الشيوخ حرموا المثيرات اللي بتصاحبها... يعني ميجيش واحد بيتفرج على الأفلام المقندلة الأبيحة ويسبب لنفسه الإثارة ويقول انه مش عارف يقلع عن العادة البتنجانية।
انت بتحس بشهوة ماشي... طبيعي يعني منت بني ادم... لكن اللي مش طبيعي انك تتفرج علي بلاوي زرقة تسببلك إثارة وترجع تشتكي من المجتمع وانك مش لاقى تتجوز ومش قادر تسيطر على شهوتك ومش عارف ايه يبقى الحل انك تسيطر علي المؤثرات اللي حواليك ... متوسخش عينك ومخك بالأفلام المهببة دي... ارفضها وامتنع عنها وشوف ازاي ربنا هيساعدك توصل للحلال...
طبعا ناس هتقولي مهي البنات بقت هي كمان بتتفرج على الحاجات دي... هقولهم انها يا اما ليها أخ أو أب مبيتقوش الله في حرمة بيوتهم واتعرضت لانها تشوف الحاجات دي بالصدفة البحتة وقالت اشمعني هم وبقت تقلدهم هي كمان... يا اما بنت زيرو ثقافة جنسية وفاكرة انها هتتعلم من الحاجات دي علشان ترضي جوزها لما تتجوز... يا اما بنت يا ماشاء الله يا ما شاء الله بتتعلم وتتنور علشان تتقن فنون الاغراء وتوقيع الشيباب
نيجي بقي لحبايبي بتوع منتصف العمر و"المراهكة المتأخرة"...دول فى الغالب بيبقوا أبهات... ورغم انهم متجوزين بس من كتر الـ...(هنقول مجازا المزز) اللي شافوهم في الأفلام عمر مراتهم ما بتملا عينهم... يا اما بتملى عينهم بس هم خلاص اتعودوا ميحسوش بمتعة غير مع الأفلام المهببة دي।والحقيقة النوع ده أثر علي الستات وخللوا كتير من مراتاتهم بقت تتفرج على البلاوي دي علشان تتعلم منها (تقولش بيعلمها الأخلاق الحميدة...)ومنهم اللي بيبقى مش سعيد في بيته فبيدور على السعادة فى الأفلام دي।
الحقيقة انا أكتر حاجة بتفقع مرارتي احساسي ان الموضوع بقى أمر مسلم بيه... والناس كلها ستات ورجالة بقت بتعتبره حاجه عادية।
طب ازاي ابقى شاب ليا أخوات بنات واتجمع انا واصحابى نتفرج على طين البِرك دة ومعملش حساب لحرمة بيتي.
ازاي أبقى راجل متجوز ولو حسيت بملل فى العلاقة الزوجية اخد ثقافتي الجنسية من شوية ممثلين ذوي مواصفات خاصة... ليه متعلمش من مصدر علمي صحيح... ليه أصغر نفسي قدام عيالي وأخلي احترامهم ليا يقل (طب منا بعلمهم طول الوقت ان الجنس عيب وكخة وغلط وحرام وفى الاخر يكتشفوا انى مدمن افلام جنسية)
طبعا مستنيين حل!!!
بس الحل بيبقى فى ايد الانسان نفسه... لو محسش بمدى جرمه فى الفرجة على الحاجات دي يبقى عمره ما هيحس بحاجة اساسا... ولو حس بذنب ومع ذلك بردو بيتفرج يبقى أحب أبشره ان ضميرة فى طريقة الى الانقراض... ولو معملش حساب لحرمة بيته وأهله... يبقى عليه العوض في الرجالة وفي الدنيا
أنا عايزة أوصل للراجل ازاي البنت بتحس بالضرر والمهانة من فرجتة على الأفلام الأبيحة... ازاي بيفضل ينزل من نظرها شوية بشوية لغاية ما يختفي ويبقي قزم
أيها الرجل...

أعلن لك أنني أنثى ... لست ملاكا ولكنني مازلت صافية النفس والقلب ... عقلي مازال نضرا... لم تلوثني أفعالك المشينة... مازلت أحتفظ ببراءتي... مازلت متمسكة بأحلامي وحقي في الحياة السعيدة... حقي أن أجدك خاليا من التلوث كما تحلم بي صافية كالصفحة البيضاء... من حقي أن يكون خيالك خصبا لم يتلوث برؤية نساء رخيصات... من حقي أن أرى نفسي فقط في عيونك وليس أجساد تلك النساء... من حقي أن أكون أول أنثى في حياتك كما أنك ستكون لي أول رجل... من حقي أن أعلن غيرتي على براءتك... من حقي أن أنظر لك نظرة إجلال واحترام لا تشوبها شائبة
فهل أنت هذا الرجل؟

38 اللي عبروا منوووشة:

Tears يقول...

اعتقد ان لديهم فضول و مرحلة و تمر

ستيتة يقول...

الحل بإيد الإنسان نفسه
وتقوى الله مش بتتباع ولا تتشرى يا تقر في القلب يا كل عام وانتم بخير
ولما تتكلمي من هنا لبكره
ياراجل ها يقول لك معاذ الله هو انا وش ذالوكا
يا ها يشيد بالبوست اللوزعي بتاعك
لكن ان حد فعلا فعلا يشرح لك النفسيات المصاحبة لشيء زي كده
مفيش
محدش بيتكلم بحرية وفضفضة على بلوج سبوت الا الستات بس
جتنا الهنا ملينا البلد :)
مستنياكي في اللوكاء

القدر و انا يقول...

منووووووووش
والله كله كوم وعواجيز الفرح كوم
ليل نهار يتكلموا عن امجادهم التى لن تنتهى ابدا
ده بالاضافة الى المراهقة المستمرة من فرجة ومعاكسات ونظرات حيوانية
وهم اساسا منتهى صلاحيتهم والكحة والروماتيزم مخلصين عليهم
تحياتى يا قمر

SHAPE YOUR LIFE (ABOALI) يقول...

منووووووووووووش باشا
كيف حالك يا فندم
تغيب تغيب وترجع بموضوع محير

ليييييييييه بقى محير
لان فيه حالة فراغ وعدم تقدير قيمة الوقت كلنا نعانى منها
كمان فيه جسد عارى يعنى جسد بلا قلب مش عارى عارى
الانسان اذا نام فيه نور ايمانه ويقينه بربنا اصبح انسان عارى
واذا وجد اناس مثله عراه يبقى يبتدى يشتغل ضميره اكتر
وياءتى بالمبرر كما قولتى

كلنا بلاش معظمنا بلاش معظمنا قلة بلاش قلة البعض شاهد افلام
واكيد ده مستورد من الخارج لان حياء البنت العربية الشرقية كان عالى فكان وضع الافلام دى شاذ نسبيا
غير كده دخل البعض فى المشاهدة بحجة مشاهدة اوضاع مختلفه
ونسيوا انى بره لجؤا لكده علشان سهل عليهم فى اى وقت ممارسة الجنس
علشان كده لم يكتفوا بما حثت عليه الفطرة

احنا بقى غيبنا الفطرة وبقت ملونة
فبداءنا نقلد تقليد اعمى
ولم نجد الحاكم المؤمن الواثق فى ان القرب من الله هو النجاه
فترك المسؤلين الحبل
لظهور الانثى بشكل حيوانى فظ وتم عرضها عرض سافر فى مناطق معروفة والامن يعرف

فكانت اللامبالاة

الحل هو الرفض لكل الاخلاقيات دى
وزيادة اضاءة شمعة الدين لانه هو المهذب لكل حالة التفلت الموجودة


كنت سعيد يا منوش وانا اقرء فكر بنت بالشكل ده
وعجبنى احساسك بشفافية ونقاء حواء فيكى
ورفضها ان تنزل الى مستوى حيوانى

تحياتى الراقية لقلمك

eltorky_4ever يقول...

السلام عليكم ورحمه الله وبركاته
أولا أحب أشكرك على الموضوع الجميل اللى أنا شخصيا هسميه الضمير المتحدث
وثانيا احب اقول ان تقريبا نصف الشباب أذا مكنش 3/4 من الجنسين بيتفرجو على الأفلام ديه وكمان بيمرسو العاده الهبابيه ديه
وعلى فكره وبدون مبالغه فى ستات متجوزين بتتفرج وكمان بتمارس العاده بطرق مساعده وحجتها ان جوزها مسافر وغايب عنها وهى كده بتعف نفسها عن الخطيأه
والنصيبه ان جوز نفس الست ديه اللى هو مسافر ومتغرب بيتفرج هو كمان علشان مراته بعيد عنه وبيمارس برضو بيعف نفسه
ههههههههه والله الواحد احتار
وتلاقي البنات بتتفرج وتبعت بالبلوتوس لبعض وعادى جدا
لاهى لقت بالصدفه على تليفون اخوها ولا كمبيوتر ابوها لالا بالعكس هى بتدور وتبحث على النت وعند الصحاب اللى بيفسدو بعض
ممكن احكى موقف حصلى فى الكليه انى كنت مع مجموعه من الشباب والبنات وبالصدفه اتفتح الموضوع ده واتفقنا اننا نتكلم بصرحه وبدون خجل
وكنا حوالى 3 شباب و 5 بنات وكان للأسف احنا الشباب مكسوفين من نفسنا لما وحده منهم سألت سؤال لينا كلنا بنات وشباب كل واحد معاه كام فلم على تليفونه
عارف النصيب كانت ايه ان اقل واحد فى البنات كان معاها 10 افلام
واجعص واحد فى الشباب كان معاه 3 افلام
سعتها الواحد فقد الثقه فى كل اللى حوليه وحتى فى نفسى
بس بعد وقت ليس بالبعيد قدرت اسيطر على الوضع شئ بشئ
وانا احب أطمئن الشباب والبنات ان المفروض تحت لنفسك قاعده لا تتعداها
ان الموضوع ده بالنسبالكم موضوع وقت مش أكتر
وربنا يعفكم ويعفنا ولازم نتقرب من ربنا أكتر وانا بنصح نفسى قبل اى حد
وألوم نفسى قبل اى حد ياريت نفكر شويه وأعقلها وتوكل
واخيرا انا اسف على الأطاله واحب اشكر صاحب المدونه ديه على جمالها ومواضيعها الشيقه
محمد التركى

اقدم عاصمه فى الحب يقول...

السلام عليكم

بتتكلمى عن منطقه حساسه النهارده وتقريبا الجميع عارف جوانبها كلها
لان حاليا مافيش مجتمع منغلق
كلها بقت منفده على بعضها
ومابقاش فى اطفال كمان عمر الطفوله عندهم بيطول
لان اللى بيتقال عليه طفل اتحدد سنه حتى يدخل المدرسه وبعدين مش بيبقى اسمه طفل .. هى حاجه تانيه غير الطفل وخلاص
اول لما يدخل المدرسه كل سنه وانتى طيبه كل شىء بيتفهم وكل شىء بيتعرف وما حدش طبعا بيراقب حد
واصلا اصلا النصيبه الكبيره جوى جوى يا ابوى التلفزيون الملون ...
اللى عنده تليفزيون فى بيته هو وحظه بقه .. اما يطلعوا عيالوا أذكياء بأدب .. او عندهم دهاء شديد بقله ادب .. والله يهدى من يشاء ..
..
واحب اذكر حاجه صغنطوته أد كـــــده
انا ليا حق عند بابا
انه يختارلى ام كويسه
انه يختارلى اسم كويس
انه يحفظنى جزء من القرآن الكريم
ويسيبها على الله بقه واكيد اللى هيعمل كده ابنه هيطلع اكيد اكيد كويس
.
ودى واحترامى :)

صاحب رأى يقول...

انا شايف انك بتحاولى تبررى للمرأة ليه بتتفرج هى كمان على حاجه زى دى بانها عايزة تسعد جوزها او حاجات زى كدا

السبب اللى بيخلى الولد بيتفرج على حاجه زى دى هو نفس السبب بتاع البنت
الشهوة

مفيش مبررات للولد ولا للبنت

ذكرى رحيل قلم يقول...

السلام عليكم
طيب ده في الدش مثلا طيب تقولي ايه عن الافلام المصرية اللي في السنما اليومين دول واعلانتها في التليفزيون اخر مسخرة

نسأل الله العفو والعافية
علي فكرة في كتير من مدونات منتهي الاباحية خصوصا المثليات مع بعضها ربنا يرحمنا الواحد بيخاف يدخل علي مدونات غريبة بصراحة انا اقتصرت علي اللي عندي والحمد لله

دمتي يا قمر

Unknown يقول...

يمكن عشان كدة الحب
اسمى شىء فى المشاعر
و اللى بيفسدوه لو تحول لمجرد علاقة جنسية

موضوع جميل

Remas يقول...

منوووووووش اخيرا المدونة فتحت معايا

انا مبسوطة اوى انك هاتيجى اللقاء وهاشوفك ان شاء الله

موضوع البوست حلو اوى اوى وعجبنى اوى رد ستيتة

ان فعلا مش في حد هايقولك انا بتفرج على افلام من دى

لكن الحقيقة غير كدا

شمس النهار يقول...

بوست قوي يامخنوقه

والحقيقه ماعنديش تعليق

لكن انتي كاتباه حلو اوي

ربنا يكرمك

لاسع افندى يقول...

ربنا يصلح الحال


تحياتى

الازهرى يقول...

اممممممممممم

شكل الموضوع كبير
اسلم
والليل ان شاء الله راجع نتناقش فيه

اتفقنا ؟

عاشقه الرومانسيه يقول...

البوست مكتوب باسلوب اكتر من رائع تسلم ايدك
بس الاروع من البوست انى هاشوفك فى اللقاء
هتوحشينى

حلم بيعافر يقول...

هى الحكاية عرض مرضى لاشياء كتيرة اصابت المجتع ككل
اولها واهمها انحدار الثقافة وقيمتها للحضيض
وتحول الدين لشكليات

هي وظروفها يقول...

بنسبه 95 في الميه من معارفنا بيتفرجوا انا عن نفسي في مرحله معينه بدون انكار شدني حب الفضول والتقليد لكده

بس بعد شيء من النضوج صفصفت في معارفي علي نسبه بسطه والحمد لله النسبقه قلت كتيييييييييييييييييييير وبقت 90 في الميه مع ان اغلبنا اتجوز والغريبه ان صحابنا المجوزين هما الأكثر مشاهده

يمكن لأنه مش قادر يحصل تفاهم بينه وبين مراته ومش قادر يوصل لنس المتعه اللي بيوشفها ادامه بتحصل فبيعمل اسقاط نفسي ويشوفها اكنه بيمارسها
ويمكن قله دين الحمد لله انا واحد من الناس اللي فعلا بطلت اشوف الكلام ده انتي متعرفنيش عشان اكدب دي الحقيقه وهي في الأول وفي الأخر قله دين وبعد كدخ حطي اش شيء تاني

مش بمزاجى يقول...

عندك حق فى كل كلمة قولتيها
بس ده بيرجه لكذا عامل
اهمها نسبة ايمان الشخص ده
والبيئة والتربية كمان عامل مهم
ونسبة سيطرته على نفسه وتحكمه فى شهواته
اول مرة اشوف حد بيتكلم بحرية كدا وب احترام فى اساخدام الالفاظ فى موضوع زى ده
مدونتك جميلة جداااااا

الازهرى يقول...

شوفى يا ست الناس

من سنين تقريبا وانا فى تالته اعدادى حاول اصحابى معايا فى الموضوع ده
وفى النهايه رحت معاهم وبكل بساطه خليك كل القاعدين يسيبوا الفيلم ويمشوا
مش عارف رجعوا له تانى والا لأ بس انا خليت الكل يقرف من المناظر وانا باكلمهم عن امتهان الجسد البشرى واتكلم عن الفر الكبير بين كلمة ثقافة جنسية وكل تلك الخزعبلات التى يتفرجون عليها
طبعا اتغضب على وقتها وضاعت متعتهم من الفيلم لانى قلت رأيي فيه بصراحه

اما موضوع ان الكل اصبح تفرج فده ببساطه لان الكل اصبح حخاويا من الداخل سواء من الالتزام الدينى ا و حتى الالتزام بالاعراف السليمة التى كانت تقيد المجتمع وتحفظ توازنه فى السابق طبعا الا من رحم ربى

والحل ببساطة هو الرجوع الى الاسس الصحيحة
وتلك الافعال بالمناسبة يجرمها كل الأديان سواء الالهية او الوضعية ولا يوجد دين يبيح مشاهدة او ممارسة الرذيله
كما ان العرف معروف لكل الناس ولو تجاهلوه

تحياتى دوما وخالص مودتى

لجين أبو الدهب يقول...

الدين هو اللى بيظبط الحياة كلها

لو حط ربنا قصاد عينه هايخاف وهايخاف قبل ما يزعل اى حد انه يزعل ربنا منه

سواء ولد صغير او لو شاب او متجوز او عجوز حتى ..

ومهما كبر الانسان الشيطان بيفضل فى ودانه وهو شاب طب انت معكش تتجوز تروح تزنى لا يبقى بص واعمل اللى انت عايزه ..
لما يتجوز طب ينفع حالك كه يعينى تروح تتجوز عليها وتهد اسرتك لا اتفرجوا سوا علشان تتعلم ..

حاجة تسد النفس بجد:(

ربنا يحمينا واولادنا وازواجنا وسائر المسلمين ..

جزاكِ الله خير على البوست ياجميل ..

ومش تطولى فى الغياب كده

لانى بجد بحب اقرأ بوستاتك جدا ..

دمتِ بخير ..

حروف يقول...

وانتي كمان وحشاااااااااني ياقمر

البوست دة قنبلة موقوتة حعلق عليه بعد الامتحان بتاع بكرة ان شاء الله
دمتي بخير

غير معرف يقول...

حبيبتى منوش
ليكى وحشة كبيرررررررررررررررررررة
وجزاكى الله خير على سؤالك عنى

ياحبيبتى المقولة بتقول
اذا لم تستحى فافعل ماشئت
وطالما بعدنا عن الدين وقل الحياء من
الله وجعلناه اهون الناظرين الينا
سنجد الكثير من هذا العبث اللااخلاقى
وانتى بقا عاوزاة الرجالة تفضفض
وتقولك هما بيتفرجوا ولا لا
حشا لله دول ملايكة ومتدينين
مش معقول يعملوا كده
تحياتى

غير معرف يقول...

اخبارك ايه

وحشاني مووت ياقمر

بووست جامد

اتكلمتي عن نقاط مهمة جدا

الكهربة هتقطع حالا

هرجع اتكلم براحتي

غير معرف يقول...

الفرجة عالافلام بالاول ممكن تكون فضول لكن بعد كدا بيحصل ادمان عليها بشكل كبير وبالتالي الادمان عالعادة السرية

هما معتبرين انه الفرجة شي عادي واننا بقينا منفتحين عالاخر ماشاءالله علينا بيتناسوا انه دا حرام اساسا

مش بيفكروا بعواقب الفرجة والاثارة الزايدة دي وخصوصا انه الافلام بتكون غير الواقع وكلها تمثيل والممثلين بمواصفات معينة

تلاقيه بعد الجواز انصدم وعاوز من الي كان بيشوفه عاوز ست خبرة من اول يوم وتعمل زي الي اتعود عليه من الافلام ودا مستحيل

غير انه غالبا مش هيعجبه جمالها ولا جسمها حتى فيتقلب الجواز لنكد ويقول خلينا عالافلام احسن

دي حالة وحدة من الحالات الموجودة

ربنا يصلح الحال

اقصوصه يقول...

الموضوع اللي تناولتيه في هالتدوينه

موضوع جدا مهم وخطير

ومنتشر فعلا بين مختلف الفئات

العمريه مثل ما قلتي

الله يهدينا ويهدي المسلمين!

Diyaa' يقول...

التعليق كان طويل جداً :) بعتهولك في ميل واختاري اللي يعجبك منه ونزليه في تعليق مجهول بإسمي :)

romansy يقول...

كنت سعيد قوى باللقاء وسعيد جدا جدا انى اتعرفت عليكى
وبعدين نرجع للبوست
يبقى كداب اللى يقولك ان الواحد فينا سواء الراجل او الست حب الفضول خلاهم يشوفوا الافلام دى ولو للحظات بس الموضوع بقى خطير دلوقتى لان اللى كان بيشوف الافلام د بيخاف دلوقتى بقت على الملا لاسف وبقت من الطفل الصغير للكبير وطبعا يخرب بيت التكنولوجيا اللى تعمل كده
بس احنا اللى بنوظفها غلط
تحياتى
وربنا يبعد عنك الاحتلال

غير معرف يقول...

ساقية الحياة وقلة الخبرة قبل بناء الأسرة.خطيئة أزلية بيتكرر جيل بعد جيل

البراءة دي لو اتكسرت وبشكل مستمر زي ما بيحصل مع الغالبية
لو محصلتش المعجزة المرض ده بيبقى المتعة الأساسية
لأن معروف الراجل مفتاح متعته الأساسي النظر وعشان كده في قاعدة ( لا يشف ولا يصف ) في لبس الأنثى ..عكس الأنثى اللي الحياء عندها أعلى بكتير وكمان مفتاحها الكلمات والمعاملة اللطيفة مش الشكل الجميل في الأساس
وبما إن الخبرة الأولى بالموضوع بتبقى في فيلم زي ده.فالمناعة المنعدمة في السن الصغيرة.
على جيلي كان السن ده 13-16 سنة
بس من 5 سنين كنت بشتغل في نت كافيه
شفت عينات 7-6 سنين الولد شاف أخوه بيتخانق برضه عشان اتقفله الجهاز في موقف مشابه..فبقى عنده اعتقاد إن أخوه هو القدوة وإن ده حق مكتسب والحرمان منه إهانة
الولد لا يفقه شيء ولو اتكلم للصبح.مش هيحس بأي متعة ولو اتفرج لحد ما يكمل 12 سنة لأن الهرمونات بكل بساطة بتكونش لسه اشتغلت
والطفل الصغير مش بيعمل كده إلا لأنه شايف الأكبر منه بيعمل كده وعايز يكبر زيه وميبقاش صايع وجدع وراجل ومساير لقدوته إلا بكده..ومع الوقت بيتعود والصدمة بتقلب بحب وتفنن وخبرة في الهراء الشديد الوقاحة :) اللي نجح اليهود في تصديره للعامة من سكان الكرة الأرضية ببراعة منقطعة النظير لتغييبهم واستغلال سيطرة الشهوة عليهم وفراغهم الزمني والروحاني

شباب مصري وخليجي بينزل كميات مهولة من الأفلام دي سألت واحد فيهم
قلتله ليه بتنزل كل ده بتشوفه إمتى؟
قال لأ بفتح أوله بشوفه لو شدني أو فيه جديد بكمله وإلا بشوف غيره
طيب وبتسيبه ليه على الجهاز وفي مكان حتى مش مستخبي ده في فولدر لعبة بيفتحها الكل
قال محدش هيمسح الناس كلها جعانة !!
وقال كمان إنه ممكن مزاجه يختلف النهاردة فيعتبر اللي معجبهوش إمبارح عجبه النهاردة
فالموضوع بالنسبة لهم مش بس مرض بيلعب على وتر الإثارة بالنظر
لأ ده هواية ومزاج .زي النسكافيه أشربه بلبن النهاردة وبكره من غير
سكره 2 النهاردة وبكره 3
وهكذا
وكمان عشان عايش في وسط مبيشوفش غير جسد الأنثى وبس.وللأسف الواقع الحقير مساعده
سواء دين مشوه أو تربية منعدمة أو مفرغة من مضمونها
أو عري وبورنو في الكليبات أو في الأفلام تحت ستار الفن.وحتى الفيلم الغربي الكويس أو الرائع.غالباً بيتحط فيه 20 بوسة ومنظر ولا 2 ..والبدع اللي بتعملها البنات عشان الهابلة فاكرة نفسها هتتجوز كده.أو مجرد تقليد
كل ما سبق
بيخلي المرض عند الولد فيهم أسلوب حياة
والمفتاح..للتخلص من اللعنة دي
زيها زي لعنة السجاير في رأيي مع اختلاف النطاق
إن المفتاح من الأول بيكون في أول مرة
في التفاحة الفاسدة
يعني مش عشان أخاطب وأقول امنع يبقى أخاطب بس الشاب .لأ أخاطب اللي بيربي
خدوا بالكم كويس أوي
النيات الحسنة لن تكفي للتربية الصالحة:)
مفرمة الحياة بتخلي فرص التفرغ للتربية قليلة أوي فبرجاء نسيان نفسكم والإنهماك في دوركم اللي تصديتوا ليه
لأن كله بيفتكر نفسه بعيد وولاده محصنين لحد ما يتلسع
يوفر موبايل وكمبيوتر ونت من غير تربية كاملة ومن غير رقابة من وراء الستار :)
يغيب عن البيت من غير تفكير أصلاً في البلاوي اللي ممكن تحصل مش بس أفلام وصور مش كويسة.لأ ممكن مخدرات واسوأ
يبقى الحل من تحت في التربية
الحل التاني.في الدين اللي بيوصل للناس
نحاول الدين يرجع لأصله وقيمه اللي وضعه لينا ربنا عشانها :)
قيم الإصلاح والإعمار والإختبار :)
مش التجارة والإفساد والإختيار :)
سواء بقى وسائل الإعلام العادية أو التدوين أو المساجد أو الأنشطة المدرسية والجامعية والنوادي :)
وطبعاً ده حلم بس ندعي ربنا :) ليه لأ ؟
والقنوات العاهرة المسماة بقنوات الأغاني والفيديو كليب :) تتقفل أو تتمسح مع باص وورد للريسيفرات في البيوت :)
الأفلام تتشاف ممكن بس يبقى في أب أو أم موجودين للنصح مش لقفل التلفزيون فوراً لأن الممنوع مرغوب والإقناع الحازم قبل المنع بيخلي المبدأ يترسخ جوه الطفل :)

مواقع تقديم الأفلام اللعينة دي تتحجب من شركات النت :)
وكذلك القنوات اللي جاية لنا من الغرب :)
لما نسد كل ده :)
معتقدش هيبقى في شباب كتير من الجيل الجديد فاقدين للبراءة :)
وإن كان الجيل الحالي فيهم فئة من رحم ربي سواء بتجنيبهم شر زي ده
أو بتعرضهم ليه وخروجهم سالمين :)
ندعي ربنا يكتر من أمثالهم

MaNoOoSh يقول...

قرأت جميع الردود بتأني
واحساسي ان الرد عليهم أكبر من انه يتلخص في المناقشة في التعليقات

الرد هيكون في بوست جديد ان شاء الله
رغم ان على رأي ستوتة قليل جدا من أبناء آدم اللي اتكلم بصراحة
مع انى مش عايزة مجرد الكلام بصراحة
انا عايزة ادخل جوة نفس آدم علشان اعرف ليه وازاي وامتى وكل علامات الاستفهام

وحوا انا عمرى ما هبررلها أي خطيئة
ومنكرش انها مليانة أخطاء وذنوب لكن في ا لبوست دة مقابلتش ولا اتكلمت مع حد من بنات حوا اتفرج على أفلام من دي لمجرد المتعة الخالصة اللي رأيتها في عيون الشباب اللي بيتفرجو على حاجات زي دي

أحاسيس بنات حوا هتكلم عنها باستفاضة في بوست طويل بعد بوست آخر عن اللقاء التدويني

MaNoOoSh يقول...

وكمان ناس كتير قوي اول مرة اشوفهم وأقرأ تعليقاتهم لازم ازورهم

الأرمـوطــي يقول...

انا معجب بجرأتك وانك تطرقتى لموضوع مهم زى دة وبصراحة انتى جيتى على الجرح بصى مش كل الشباب زى مبتقولى كل واحد لية نقطة ضعف فية الى نقطة ضعفة المخدرات وفية النصب وفية حجات تانى بس برضة فى النوع دة بتاع الافلام والعادة البتنجانية ودة كتير ودة بيرجع لنفسية الشاب وقدرتة الجنسية وانا اعرف ناس بتصلى وبتعرف ربنا بس مش قدرة تبطل افلام ولا بتنجان والحل هوا التمسك بالدين بس دة صعب جدا والحل الحقيقى فى وجهة نظرى هوا تيسير الجواز بس نقول لمين يالله ربنا يصلح الحال ويتوب علينا

همس الاحباب يقول...

سعدت جدا جدا بمعرفتك
بالرغم من هدؤك لكن الواضح انك دماغ جبارة
طبعا داخل اسلم لقيت موضوع جامد جدا
يحتاج الى بوستات وليس تعليق
وانا الليلة مشغول هههههههههه
جزاكى الله خيرا على جراتك وطرحك لتلك الموضوع
تحياتى

تأثير الفراشة يقول...

منوش، الحمد لله على سلامتك

بالنسبة للموضوع ، قوى جدا و واقعى جدا ،- مع إن الحمد لله يوجد ناس كثير كويسة و مش كده -، و لكن اللى ذكرتيه موجود ،و من أكثر أسبابه هو الفراغ لأن (من لم تشغله نفسه بالحق شغلته بالباطل) ، و سبب كمان علمى و نفسى و هو ضعف تقدير الذات ، إزاى؟ ، لأن زى ما كنت بتقولى إن الرجل اللى بيعمل كده بينزل من نظر البنت ، فأؤكد لك إن هو أووول واحد بينزل من نظر نفسه و هو نفسه بيبدأ يحتقر نفسه و يلاقيها لا تستحق إنها تتصرف بشكل أفضل من كده ، و يبدأ يزيد من التصرفات المخجلة لإنه بيقول لنفسه إن ده مستواه اللى ما ينفعش يعلى عنه

فبجد الحل العملى و العلمى و النفسى لحاجة زى كده ، هو حاجتين ، الأولى إن الإنسان يجتهد ليزيد تقديره الإيجابى لنفسه و إنه هو أحسن و أسمى من إنه يرتكب هذه الأشياء، و كنت عمل بوست قريب عن التقدير الإيجابى للنفس و هو

اصنع (نوبل) الخاصة بك

http://a-butterflyeffect.blogspot.com/2010/01/blog-post.html


و الحل الثانى اللى يكون على التوازى مع الأول وهو إنه يلاقى شىء بديل حلال يشغل تفكيره و وقته سواء كان شغل أو هواية أو هدف فى الحياة ، لأن المخ ببساطة لا يعمل بنظام الإلغاء ، يعنى ما ينفعش يكون فيه سلوك معين يقرر الشخص يلغيه ، و لكن ... و لله الحمد ، المخ بيعمل بنظام التبديل ، يعنى علشان الإنسان يتوقف عن فعل شىء سىء لااااازم يضع مكانه شىء آخر يكون جيد، و علشان الشىء الآخر ده يستمر لازم تكون حاجة بيحبها حتى يقترب المخ منها أكثر و أكثر

أتمنى إن كل شخص يطبق ذلك ، و بإذن الله ستتغير سلوكياته تدريجيا للأفضل ، المهم هو التدرج و الإستمرارية و الإيمان بالنجاح

شكرا يا منووش على موضوعك

ربنا يوفقك لكل خير

Remas يقول...

منوووش

ازيك ياقمر

وحشانى جدا جدا جداااااااااااا

فرحت اوى اوى لما شفتك يوم الجمعة وطلعتى بنوتة زى العسل زى ما كنت متخيلاطى بس طلعتى اجمل واحلى

ربنا يحميكى يارب

-_- يقول...

رغم ما في البوست من افكار رائعة الا ان طريقة عرضه اضحكتني
( اعذريني لا اقصد الاساءة مطلقا )

ما استفادتك ان تعرفي ان كان القراء الرجال يشاهدون الافلام الخلاعية ام لا ؟؟


سأرد من منطلق عملي كطبيب

عموما لا تفزعي اذا قلت لك .. ان نسبة 87 في المائة من الذكور المصريين فوق 15 سنة شاهدوا افلام خلاعية

64 في المائة منهم مداومون على المشاهدة

100 في المائة ممن شاهدوا افلام مارسوا العادة السرية

6 في المائة مارسوا الجنس قبل الزواج

18 في المائة مارسوا الجنس بعد الزواج مع اناث غير زوجاتهم

( المركز المصري للاحصاء على 12000 شاب في عام 2004-2005-2006)

لا اريد ان اصدمك بنتائج الفتيات , لانها حقا صادمة للغاية


سأوضح لك .. الذكر عندما يصل لحالة هياج يحدث له احتقان في البروستاتا و هذا هو سبب القذف فإن لم يمارس العادة او الجنس او اي طريقة تجعله يفرغ المني سيحدث له الم رهيب قد يصل الى التهاب البروستاتا المزمن او تضخم البروستاتا او سرطان البروستاتا
لهذا فكل من يشاهد الخلاعة يمارس العادة

SHAPE YOUR LIFE (ABOALI) يقول...

مختفية ليه يا فندم

مش قولنا نعيش الحياه

طمنينا عليكى

ghada mOhsen يقول...

منوووووش العسوله ...

اما جييييت اخيرا زوغت من المذاكره شويه وقولت اعدى على حبايبى ...

بجد الموضوع بتاعك ده فظيييع وبجد بحييكى على طرحك اياه ...

لانه بجد بيفرسنى انا كمان الموضوع ده ...
دول ناس عايزين يتعالجوا نفسيا بس ياريت هما يوافقوا
المصيبه انهم حابيين اللى هما فيه ...
دى بجد بقت حاجه من المخدرات والممنوعات اللى بيدمنوها ...

بس فى النهايه كل واحد ليه ضمير وعارف ان فى ربنا .. الحل ضرورى يبدأ من جوه قبل بره ..

بجد تسلمى يامنوش ..

وبجد مبسوطه كتير انى اتعرفت عليكى وبجد دماغك عجبتنى ربنا يحفظك ...

... ;) ,,, ;) ...

ذو الوجه المبتسم يقول...

السلام عليكم
البوست ممتاز واسلوبك الحوارى مميز ورائع وسلس جدا

الحل بايدينا ليس بايد الاخريين !!
-----
أعلن لك أنني أنثى ... لست ملاكا ولكنني مازلت صافية النفس والقلب ... عقلي مازال نضرا... لم تلوثني أفعالك المشينة... مازلت أحتفظ ببراءتي... مازلت متمسكة بأحلامي وحقي في الحياة السعيدة... حقي أن أجدك خاليا من التلوث كما تحلم بي صافية كالصفحة البيضاء... من حقي أن يكون خيالك خصبا لم يتلوث برؤية نساء رخيصات... من حقي أن أرى نفسي فقط في عيونك وليس أجساد تلك النساء... من حقي أن أكون أول أنثى في حياتك كما أنك ستكون لي أول رجل... من حقي أن أعلن غيرتي على براءتك... من حقي أن أنظر لك نظرة إجلال واحترام لا تشوبها شائبة فهل أنت هذا الرجل؟

اعجبتنى هذه الكلمات

لكن السؤال وبصراحة

هل تعتقدين ان نسبة الفتيات التى تشاهد هذه الافلام اصبحت نسبتهن اكبر من نسبة الشباب ؟


تحياتى لفكرك العالى

غير معرف يقول...

eih ya manoosh el 3azama dee
mabrook 3ala el 3awda el hamida

ana gay aslam bas ama el mawdoo3 fa dah 3omry ma shoft aflam keda

mostahil

salam ya ostaza

taheyaty

biberss