الأربعاء، 18 مارس 2009

عبدة أنزحة وتشفيدة زوفاش: الحلقة الأولى

تحديث علشان خاطر بيبرس..
الشخصيات الرئيسية..
عبده أنزحة: البطل.
تشفيدة زوفاش: البطلة.
منوش: متفرجة.
أوشا: أخت منوش ومتفرجة.
أما الزمان بقى فهو من زماااااااااااااااااااااان يعنى أيام ما كنت أنا فى 2 اعدادى كدة.
.---------------------.
..عبدة أنزحة وتشفيدة زوفاش..
مفيش حاجة هتقدر تفرق بينهم ومفيش كلمات توصف حكايتهم اللى ابتدت من صغر سنهم.. عصافير يا خواتشى.. الاتنين ولاد عم بس هو عاش لغاية ثانوى فى السعودية وهى عايشة فى محافظة مصرية يعنى كل واحد فيهم ليه دماغ (دمغتهم الاتنين عايزة الحرق اساسا.. بس ما علينا)
عبده اوسم اخواتة الصبيان وتشفيدة أوحش من أخواتها الصبيان وملهاش اخوات بنات اساسا والحكاية دى بتخليه يحس بنفسة قوى وبتخليها عندها زعزعة فى معاميك احساساتها المتشئلطة المهم. بدأت شرارة الحب فى المرحلة الابتدائية وكنت أنا فى نهايات الاعدادية
وكان اول مشهد مع أول شرارة حب فرقعت فى القلوب وشخرمتها.
تشفيدة: أنا مصدحة (مصدعة يعنى) قوى يا جماحة.
عبدة: بحد الشر حليكي يا تشفدفد.
تشفيدة: لا بكد الصداح حيموتني.
عبدة: طب تحالي كدة.
وعليها الواد مسك راس البت وقعد يحسس ويفعص بحركات دائرية ملتوية (الحركات مش نيتة اللى ملتوية.. متخلوش مخكم يروح لبعيد لسة التقيل جاى ورا).
وتانى مشهد فى يوم من الايام الصيفية.. فى أحدى المصائف العائلية.. ذات التجمعات المسلية.. بعد ما الجميع دخل ينام.. ويغطس فى الأحلام.. فضل عبده وتشفيدة سهرانين فى الغرام على ضوء القمر وطعم المنجة اللى خلصوها (حسبى الله ونعم الوكيل دة انا ملحقتش أدوقها حتي.. عاااااااااااااااااااااا).. وفى لحظة غريبة ومريبة قالت تفيدة لسى عبدة لا والنبي يا عبده.. لالا ايه اللى انا بقولة دة.. قالتلة انت لو متكوثتنيش انا هموت نفثى (واخدنليش بالكو انتوا من الناس اللى عارفة طريقها وهى فى اللفة).. وطبعا الكلمة رشقت فى قلب سى عبدة كالسهام الحارقة الخارقة وبقى كل أجازة ييجى بعيون مسبلة وتصرفات مدهولة ومقندلة وحالتة متنيلة.
وطبعا فى نفس ذاك الوقت كانت تشفيدة بدأت تحس انها بنت وبتدلع (كتنا نيلة في خيبتنا القوية.. اللى وصلنا لسن اليأس اهو ومش عارفين نحس اننا بنات).
واتعلمت تشفيدة ازاي تنعم صوتها الجحوشى.. قصدى الجعورى..يوووه قصدى الجامد يعنى, واتعلمت ازاي تظهر قطة بتتمسح فى صاحبها.
زي بالظبط ما بدأت تحس انها لازم تلفت نظر الناس علشان يفضل الاحساس دة ومينتهيش أبدا.
وأكيد فى نفس ذاك الوقت بردو كان عبده بحكم حبة لقعدات الستات مع مامتة فى السعودية او تصنتة الدائم عليهم بيزيد فضولة للعالم النسائى اللى هو محروم منه.
زي بالظبط ما خلاة يكتسب أسوأ عادات النساء (اللت والعجن وكتر الكلام اللى بيعمل مشاكل).
ومع بداية الشرارة حدثت تشفيدة زوفاش نفسها قائلة (وهى فى ابتدائى بردو) انا حتكوزة.. (ناس عارفة طريقها مش خايبين زينا).
وكان عبده أنزحة مازال مزغلل العينين مبهورا بالنعومة واللين الباديان على تشفيدة زوفاش الحب الأولي وبالطبع كانت اللقاءات تتم بين عصافير المحمودية فى ايام الأجازة السنوية ومن ثم الوداع وقت السفر على انغام اغانى الوداع الملهلبة.
لحد هنا وتمام.. قشطة.. واخر فللي.
أنن أن آآآآآآآآآآآآآآآآآآآآن.
ثم انتهت مرحلة الطفولة البريئة وتفنجرت انوثة تشفيدة وتعلمت بعض المصطلحات الأجنبية (لزوم البرستيج.. أمال ايييييه) وكان اولها يااااااي زوفااااااااااااش الذى اصبح لقبا لها بعد ذلك, بينما كان عبده يكتسب المزيد والمزيد من أسوأ خصال النساء بالأضافة الى العديد من الصفات الاخرى الشبيهة للأنزحة.
وظل عصافير المحمودية بضع سنوات ينامون ويحلمون بأغانى الغرام والهيام.. ويكتبون اسامى بعضهم والذكريات على الحيطان.. حتى وصلوا الى نهاية المرحلة الاعدادية الحافلة بالآلام.
وهنعرف فى الحلقة الجاية ازاي تشفيدة ارتشبطت بالواد حكشه ودعني وانسي هواك ابن الجيران.. وايه اللى حصل لعبدة أثناء ذلك.

22 اللي عبروا منوووشة:

عاشقه الرومانسيه يقول...

اووووول تعليق
ل
عاشقه الرومانسيه

احجز وارجع

عاشقه الرومانسيه يقول...

هههههههههههههههه
اولا الالوان اللى فى البوست جامده
ثانيا دمك شربات
ثالثا عايزه اضربك
علشان علقتينى ومش كملتى
بس ده على كده انتى هتغنى
حكاية غرامى حكايه طويله
ههههههههههههههه

مستنيه الباقى
اوعى تتاخرى يامنوش يامخنوقه
علشان ما اتخنقش انا منك
ماشى؟

Sweet Violet يقول...

استنى امارس هوياتى الاول و بعدين ارد

اعترااااااااااااااااااااااااااااااااااااااااااااااااااض

البوست صغير اووووى و كمان انتى علقتى فى جزء مهم ايه التشويق ده بقى عااااااااااااااااااااااااااااااااااااا

خلاص خلاص ماتزوقيش هعلق اهو على البوست عاااااااااااااااااااااااا

الواحد مايعرفش يتفك فى المدونة دى خالص كده

لالالا بجد ياقمر جباااااااااااارة

و طبعا لازم تسيب عبده و تحب حوكشه (اصل ده اسم الدلع اللى بحب اقوله لخالى الصغيرD: )

منتظرة الباقى بس بالله عليكى كبرى شويه بطلوا بخل بقى ياساتر على دى الناس

romansy يقول...

ايه قصه الحب اللى ولعت دى من ايام الابتدائى
دا انت حبيب قوى يا عبده
وكمان البت تعرف تحب من صغرها
دى قصه الحب التى هزت التاريخ
ايوه كده يا منوش
غيرى بقى اسم المدونه
خليكى بقى زى مانتى كده بتضحكى

غير معرف يقول...

ايه العظمه دى يا مانوش

بس السخصيات دخلت ف بعضيها مش عارف انتى فين من الحدوته موقعك ايه من القصه
و فين الاسمر ف الموضوع
ازاى هو ف اولى ابتدائى
بس عسل و الله
قوليلنا الشخصيات ف المسلسل ممكن

تامر علي يقول...

فعلاً الحب الغامر اللي واضح من بداية القصة ينبيء ان فعلاً البنت دي متفتحة ولازم تخوض كل تجربة تقابلها ابتداء من ابن الجيران حتى الميكانيكي وبتاع العيش

وطبعاً عبده لازم يدافع عن حبه ضد الغزو الخارجي :)

لجين أبو الدهب يقول...

بتأثر اوى من قصص الحب اللى هى كانوا اتنين صغنين بيحبوا بعض ..

ومخلصين لبعض ومش عارفة ايه ..

بس اسلوبك فى الكتابة ظريف اوى ..

متابعة ان شاء الله علشان نشوف اخرة الهلبة دى D: ..

Ahmed يقول...

هههههههههه
بوست جااااااااااااااااااامد جدا
هههههههه

بس ايه الحب ده كله؟ من اللفه كده على طول

طب دانا لغاية دلوقتي معرفش اعمل زيهم كده
ههههههههههه

لا لا بجد عيال جامده أوي

MaNoOoSh يقول...

عاشقه الرومانسيه
أول تعليق يا باشا ولا يهمك
بس كويس ان الالوان عجبتك اصلى الصراحة توعوبت فيها
هههههههههههههههه
واوعى تتخنقى مني.. اصل حكاية الغرام الملتهبة دى طويلة يا عاشقة وبعدين دول دلوقتى خلاص فى اخر سنة فى الجامعة والحكاية بادئة من ابتدائى
صبركوا بس عليا يا جودعاااااااان



ستيته حسب الله الحمش
ولسة يا ستوتة ولسة دة بس اول الثقافة
وكمان علشان متقولوش اني حرمتكوا من حاجة
خنقة وخنقت.. ثقافة وثقفت..
ههههههههههههههههه
ان شاء الله الجاى مسخررررررررررررررررررررة



Sweet Violet
مارسى هوايتك زى منتى عايزة يا شقيقتى فى الاعتراض
بس انا مبحبش اطول فى الاحداث علشان اللى عينة بتوجعة زى حالاتى يعرف يكمل للاخر
ولسة يا بنتى ولسة ليس حكشة وحده فقط



romansy
ايوة هى من نحية هزت فهى هزت انما ايه تحديدا معرفش
ههههههههههههههههههههههه
بس انا مش عارفة اغير اسم المدونة علشان محتارة اسميها ايه.. بس بمال انى بتخنق بسرعة فسميتها مخنوقة يعنى



biberss222
علشان خاطرك بس يا بيبرس عملت تحديث
وبعدين انا مش متأكدة هو اولى وللا تانية وللا تالتة ابتدائى تحديدا
ههههههههههههههه
يا سيدى اعمل نفسك مش واخد بالك
ههههههههههههههههه



تامر علي
ايه دة انت عرفت منين انها وصلت للموكانيكى وبتاع العيش
ايوة هى فعلا متفتحة ومتفنيخة ومستفصطائية كمان ولسانها شبرين
ههههههههههههههههههه




لجين أبو الدهب
بيحبوا بعض!!! مخلصين!!!
لالالالالالالالا
دى البداية بس يا لوجين.. اوعى تفهمينى صح ابدا
ههههههههههههههههه




أحمـــــــــــــد أبو العلا
ولا انا كمان يا بشمهندس عارفة اعمل زيهم كدة لغاية دلوقتى
عاااااااااااااااااااااااااا
آه يا خيبتى القوية يآنا
يللا الحمد لله على كل شىء
بس دول عيال مخلصة وداخلة شمال فى الدنيا
بس العبرة بالنهاية أكييييييييييييييييد

MǿиY El-Shreef يقول...

هههههههههههههههه

لا بكد ( بجد يعني ) :D

دمك عسسسسسل

وبلاش تبقي تطعيف النص كده

متابعه ياقمر

الجواز و سنينه يقول...

الهوى كل ده لعيان نغننه
بس الصراحه عارفه طريقها مش زى نـــــــــاس
هههههههههههههههههههههههه
اتعلمى بقى حاجه
و لا خلاص انتى عديتى اعدادى و راحت عليكى
ههههههههههههههههههه

MaNoOoSh يقول...

MǿиY El-Shreef
مهو مسلسل بقى يا مونى يعنى لازم اشوقكم واخليكم تستنوا الاحداث
هههههههههههههههههههههههه
نورتينى يا عثل



الجواز و سنينه
يااااااااااااااااااااااه الجواز وسنينة رجعت تانى اخيرا ونورتنى ونورت مدونتها
يللا بقى بسسرعة عايزين بوست جديد
وبعدين انتشى ئثدك اية ان انا خايبة يعنى ومش عارفة اعمل زيهم (وش متشحتف على الاخر)
طب منا عارفة عاااااااااااااااااااااااااا
ههههههههههههههههههههه
لالا يا ستى ان شاء الله مش هتروح علينا ولا حاجة
بس ربنا يفرجها من عندة ان شاء الله
وحشتينى قوى يا عثل

سمكه واحده يقول...

جتنا نيله في حظنا الهباب الا محد عبر الواحد بشوفاز واحد
مستنين اللي حصل
ابتدائي يا عالم يا
اوقل ايه
حسبنا الله ونعم الوكيل

امل يقول...

ياختى على الحب اللى عارف طريقه
منتظره بقية الحكايه
ومنتظره رايك فى حكايتى مع الزمان

Beram ElMasry يقول...

السلام عليكم ورحمة الله وبركاته
عزيزتى الغالية ،انت ام اليوم او غدا ، فكل عام وانت بخير فى عيد الام ، وان كنت تتمنين لطفلك ان يحيا امنا فلقنيه ان الاسرائيلى شر كله ، فلا يامنه برهة ، ولا يسالمه مدى الحياة

يهودى يعنى حنش احسن دوا تقطعوا راسه
كلام نقوله لنسلنا نطبعوا فى كتابه وكراسه
لك تحياتى والسلام عليكم ، ولا سلام مع اليهود
بيرم المصرى

mahasen saber يقول...

ده اسمه ايه ده حب من اول واء

من الحب ما فرح صحيح
بس عجبانى قوى سلسلة عبده وسيتوفاج دى

blue-wave يقول...

ههههههههههههههههههههه
ايه البوست الجامد دا؟؟؟
عجبنى بجد

غير معرف يقول...

تسلمي يا ست البنات

أبو العريف يقول...

والنحمه المتشكله متش في الكنصه اللي انت حكتشيها دي المتشكله في اسلوبك اللي سي العسسسسسسسسسسسسسل
بيس

MaNoOoSh يقول...

سمكه واحده
نورتينى يا سمكمك
لما القارئين بيقولوا كتنا نيلة فى حظنا الهباب
امال المشاهدين بقى يقولوا ايه
عاااااااااااااااااااا



ماما
نورتينى
ايوة عارفين طريقهم من قبل ما يقولوا وااااااااء
جايالك طوالى



Beram ElMasry
شرفتنى يا بيرم ولو انى زعلت ان تعليقك ملوش علاقة لا بتشفيدة ولا حتى سى عبده



mahasen saber
ايه دة محاسن العثل شرفتنى
ايوة هو فعلا دة الحب من اول مااااء.. قصدى واء
نياهاهاههاهاها
وبعدين سيتوفاج دة لو سم فيران يبقى هم.. ممكن بردو
هههههههههههههههههههه



blue-wave
نورتنيى يا عمرو باشا
وعلى فكرة انا متابعاك بس على الصامت كدة




biberss222
تسلم يا بيبرس يا سكرة




أبو العريف
نورتنى يا بو العريف
تسلم يا مدربك حلل المطبخ وجايبلها لخمة
هههههههههههههههه
تسلم على ذوقك يا باشا وفى انتظار مصير صنية البطاطس المؤلم
ههههههههههههههه

أبو العريف يقول...

انا قريتموضوع البرغوت الي بيستهبل ده
بقي كده
انت قاصداني انا بقي
عموما انا علقت هناك
وربنا عالظالم
بس هه

ادم المصرى يقول...

قولى لماما كل عام وهى بخير وبجد اسف كتير على تأخير

الفتره دى ولكن والله كانت ظروف عمل واعظرينى

وبجد بوست جميل مع انو فقرى كتير فى قصه الحب الغريبه دى

لئنى دحكت كتير وانا صدر تعبان اصلا بس كويس لئنى نسيت الدحك