الاثنين، 30 مارس 2009

المرة دى اسم على مسمى

اعذرونى يا جماعة.. انا اسفة
انا النهاردة دمى مش خفيف ولا قادرة حتى اضحك لانى بجد مخنوقة
وكل دة علشان والدى حطنى فى مزنق قدام امر واقع انى ارسم قصة...
ــــــــ ـــــــــــــــــ
"كان صرحا فى خيالى وهوى"
لما تكون مثلى الاعلى وقدوتى وتنهار بسرعة كدة وبالشكل دة.. يبقى فيه حاجة غلط.
لما تحشرنى انت وامى فى مشاكل بينكم وكل واحد فاكر انه الضحية وانى هختار صفة.. يبقى فيه حاجة غلط.
لما تعرضنى للموقف اللى عرضتنى ليه وتخلينى اروح معاك بيت ام قويق وفاكر انى هحبها.. يبقى فيه حاجة غلط.
لما تهمل بيتك واهل بيتك على حساب الشغل اللى بتقدسة طول الوقت.. يبقى فيه حاجة غلط.
لما نبقى انا واختى فى اخر قائمة الاولويات دايما وكون كل ما سبق مش مخلينى قادرة ابص فى وشك بصة صافية.. يبقى فيه حاجة غلط.
لما الناس كلها تقولى انى خسرانة كتير ببعدى عن موهبتى اللى معدتش بلاقى فيها اى متعة علشان ابعد عن طريقك.. يبقى فيه حاجة غلط.
لما تفتكر انى همشى مشوار حياتك وابقى الحلم اللى الظروف منعتك عنه بطيب خاطر او حب لمجرد انى كان عندى فى يوم نفس الموهبة.. مينفعش.
لما تفتكر ان البيت أساسة يستحمل فكرة أو خيال رجوعك لأم قويق بدون ما نحس.. تبقى غلطان.
وانتى يا امى.. احنا حاسين بيكى بس انتى كمان مقصرة... ايوة استحملتيه كتير والبيت دة قام على حساب صحتك وسعادتك وتعبك.. بس هو كمان بنى ادم.
انا تعبت واتخنقت
ــــــــ ـــــــــــــــــ
مش عايزة حد يحشرنى تانى فى المشاكل بينكم.
مش عايزة حد يلف ويدور عليا تانى علشان ارسم واشتغل مع بابا فى نفس مجاله... ومع ذلك جوايا خوف كبير
خايفة لحسن فى لحظة البيت يتهد على دماغنا.. خايفة لأندم انى خليت مشاعر ناحية والدي تبعدنى عن الرسم مع اني معدتش بلاقى اى متعة فيه.. خايفة لأخسر امى وابويا اكتر ام واب بحترمهم فى الدنيا مهما حصل.. خايفة لأبعت رسالة لام قويق اعرفها فيها مقامها لحسن تكبر فى دماغها ويبقى الموضوع تحدي.
ـــــــــــ
ـــــــــــــــــ
كفاية عليكم خنقة.. بس كان لازم اخرج اللى فى قلبى لحسن أطرشق.. واللى عندة نصيحة ميبخلش عليا بيها.
هرد على مواضيعكم الجديدة أول ما أخلص المزنق اللى ابويا حطنى فيه.. دة لو عرفت ارسم أصلا.
وهنزل الحلقة التالتة من المسلسل فى اقرب فرصة علشان اعوضكم الاكتئاب دة.

21 اللي عبروا منوووشة:

عاشقه الرومانسيه يقول...

ربنا يخفف عنك ويقدر لك الخير ويرضيكى بيه
مفيش بيت مفيهوش مشاكل
الجائى لربنا وادعيه يألف بين قلوبهم علشانك
مهما حصل ده ابوكى ودى امك
مفيش حد فيهم اهم من التانى
لازم تحبى الاتنين وتحترمى الاتنين وتحاولى تكونى حمامه السلام بينهم
وربنا يهديهم لما يحب ويرضى

لجين أبو الدهب يقول...

والله مش عارفة اقولك ايه يامنوش .. :(

بس انتى عليكِ بالدعاء ان ربنا يصلح الأحوال ويبعد الشيطان ..

ويدبر لك أمرك ..

ربنا هايكتبلك ثواب كبير ببرك ليهم وتحملك لاى شئ ..

واكيد هايعود لك فى اولادك ان شاء الله ..

ربنا ييسر لك امرك حبيبتى ..

ستيتة يقول...

انتي عارفة اني احب ارد بمزاج عالي
اشألط قصتك في نوفوخي على ما اروح اسعى في ارض الله
ثم اعود وهي مستوية
وارزعك رد بالشفا ان شاء الله
ربنا يعينك واللي انتي فيه عادي بشكل او بآخر مرينا بيه في بيوتنا او بيوت حبايبنا
صبرك علي يا ام قويق ان ما فلسعت اهلك مكونش ستيتة
هاهاهاهاااااااااااااا مدوباهم كتشير كتشير يا اوختشي
ايوه كده اضحكي
صباحو قشطة

إيمان يقول...

بصى يا منوش

انا بس هحكيلك حكايتى مع الكتابه والشعر وانتى احكمى

اول قصه كتبتها فى حياتى كان عندى 7 سنين والقصه

عجبت كل اللى قرأها تقريبا وخاصة بالنسبه لبنت

عندها سبع سنين

وانا عندى 9 سنين أخدت جايزه عن أفضل بحث فى السيره النبويه

وكل اللى يعرفنى كان متأكد إنى هكون كاتبه معروفه

ومشهوره .. سواء أهلى أو المدرسين أو حتى اللى ميعرفونيش

الحلم كبر فى دماغ ماما وفضلت تضغط عليا أقرأ

وتحشرنى فى كل مسابقه أدبيه أو شعريه أو مكرونه

قلبى وجعنى وحسيت إن موهبتى اللى بحبها وبموت فيها

إتحولت لبروش جميل ماما بتتمنظر بيه فى كل مناسبه

قدام صاحباتها

كان عمرى 17 سنه يوم لما قررت إنى أبطل أشترك فى أى مسابقه أو حتى أكتب حاجه

وشويه وبطلت أكتب أى حاجه حتى الخواطر

وشويه كمان وبطلت حتى القرايه

وفضلت وقت طويل فرحانه إنى عرفت أخد حقى من ماما

وإنى خيبت أملها !!!!!!!وش مكسوف وزعلان من نفسه

دلوقتى بعد ما أصبح عمرى 29 سنه

حاسه إنى فرطت فى نعمه كبييييييييييييره ربنا وهبهالى وكان قدامى فرصه كبيره إنى أعبر عن نفسى
بس العند ركبنى وخلانى أضيع نفسى
بجد ندماااااااااااااااااااااااااانه جدا
ونفسى متعمليش فى نفسك كده أبدا
لو هتستفيدى من الشغل مع والدك يبقى طظ فى كل حاجه مستقبلك هو الأهم وحياتك ونجاحك هو اللى فاضلك

بالنسبه لأم قويق وباباكى ومامتك والقصه دى سيبك وكبرى تعرفى ليه لأنهم ناس كبيره ومسؤله عن أفعالها وانتى متعرفيش أسرار العلاقات اللى بينهم ربنا يهدى الجميع ومحدش بيضيع بضياع حد وكل شئ نصيب والمستقبل بأيد ربنا فى الموضوع ده بالذات فكرى إنهم بنى أدمين بيحبوا ويكرهوا زىنا كلنا
مش هطول عليكى بقه ...قولى طولى..وأنا هقولك مش هطول علشان قلبى وجعنى وخايفه عليكى تضيعى موهبتك
بحبك والبوست مكتوب حلوووووووووووووووووو جدا
ربنا يهديلك الحال

*** حور- نور*** يقول...

ربنا معاكى يا حبيبة قلبى ويصبرك ويخفف خنقتك
المشاكل دى متكررة دايما فى كل بيت فمتشغليش بالك هى خنقة وهتروح لحاها وارجعى تانى لموهبتك ومتركنيش كتير علشان تجددى من نفسك
ربنا يوفقك
تقبلى مرورى
صحافية حرة
ملحوظة:ياريت تشاركى معانا فى جمهورية شباب مصر دى جريدة جديدة وان شاء اللة تحسى بالمتعة وتفيدينا بموهبتك
زورى مدونتى لتعرفى اكثر عن الموضوع

MǿиY El-Shreef يقول...

ربنا معاكي يا منوش ياجميله

معلش ياحببتي كل العائلات بيحصل فيها مشاكل

معلش لو كانت كبيره شويه ده باتلاء ربنا

وربنا لما بيبتلينا يبقى بيحبنا لان الابتلائات بتكفر الذنوب ولو صبرتي ليكي ثواب كمان من عند ربنا

يعني انا مش فاهمه الموضوع من الاول ومعرفش مين ام قويق

بس ركزي ف حكايه باباكي عشان رضاه مش اكتر

وربنا يصلح الاحوال ياااارب

ماتضايقيش نفسك يامنووش

بلسم المعرفة يقول...

غيرك كتير جدا بيمروا بنفس المشكلة وللأسف بيحاولوا يهربوا منها عن طريق إسقاطات نفسية وبيحسوا بمرور الوقت إنهم عايشين حياه عادية لكن للأسف بيحصل إنكسار نفسي رهيب

حزين لحزنك وحزن الآخرين

Che يقول...

مالك بس يا منوش .. هى الخنقه و الاكتئاب اللى عندى بهتوا عليكى ولا ايه .. بصى انا بصراحه مش هاقدر اديكى رأى فى البوست عشان انا عارف ان اللى كابش النار بس هو بس اللى حاسس بيها ، و مش هاديكى نصايح بالصبر و كده عشان دى فى الغالب بتكون مسكنات ، انما انا هاقولك ان مش كل حاجه تاخديها على اعصابك عشان انتى بجد مخنوقه أوى المره دى و اهم حاجه تعملى اللى يريحك انتى مش اللى يريح الناس عشان الناس عمرها ما هترتاح حتى لو ولعتى فى نفسك مش فى صوابعك بس ... و اخيرا و ليس اخرا ربنا معاكى يا رب

المعتصم يقول...

ربنا يفك ضيقك ويبعد عنك الشيطان
وييسرلك امورك ويحللك كل المشاكل اللى انتى فيها
وربنا سبحانه وتعالى قادر بين لجظة والتانيه انه يرجع الميه لمجاريها بين والدك ووالدتك
انتى بس ادعى وقولى يارب
مش عارف اعلق اقولك ايه غير انك تدعى ربنا وهو اللى هيساعدك

القدر و انا يقول...

منوش تقبلى مرورى
انا حاسة بيك جدا
البوست الجاى بتاعى عن حاجة شبيهه بس اصعب شوية
للاسف الوالدين لايدركون كم الحيرة التى يضعون فيها اولادهم بنزاعاتهم المستمرة
لازم تتماسكى واسمعى نصيحة ايمان حتى لا تندمى
وفقكك الله واهمك الصواب

Ahmed يقول...

مالك بس ياMaNoOoSh
انتي من الناس اللي مينفعوش يبقوا مكتئبين كده
طب ديه مدونتك دايما رمز للتفاؤل والابتسام
مينفعش كده

بصي ياستي

انا مش عايز أكون حشري واحشر منخيري في خصوصياتك
بس انا نفسي اقدر اساعدك

اتعملي مع الأمور ببساطه
يعني لما تحسي أن هترقبي لحد على حساب التاني أرفضي بأدب وحب ومن غير متزعلي حد

معنديش نصايح أكتر ليكي
بس بجد أتمنالك تعدي من الأزمات ديه ان شاء الله

أبو العريف يقول...

منوش
الحقيقه اكتر حد يقدر يساعدك هي منوش نفسها
لان هي اللي لازم تواجه المشكله وتتغلب عليها
ومهما كانت المشكله
اكيد منوش اللي عرفناها اقوي منها
كمان مش لازم تستسلمي
ويا ريت تقدري تتابعي موهبتك اللي بتحبيها
بالعكس دي هي اللي هتقدر نخرجك من اللي انت فيه

يا ريت تعتمدي علي نفسك في حاجتين
اول حاجه موهبتك
تاني حاجه شغلك

ربنا يفك كربك

Unknown يقول...

ياااااااااااااااه
ربنا يهدي الأحوال
بجد مش عارف أقولك ايه كنت جايبلك دعوة للمجلة بس شكلك مش طايقة خالص ومخنوقة فعلا
ربنا يصلح الحال والامور تهدى وتروق وتفضلي تحترمي بابا وماما علطول
بجد اتلخبطت ولا عارف اقول ايه
مودتي

ستيتة يقول...

اتكلم
اتكلمي يا ستيتة ومتوجعيش قلبي
خلاص متزقيش


انتي موهوبة والموهبة شيء مزاجي بحت وعلشان توصلي للإحتراف لازم المزاج يتم تنحيته جانبا
حاسة ان موهبتك خسارة ادخلي على سكة الأحتراف وألغي المزاج
مش حاسة اديها طناش
بس خدي بالك لحسن تكوني مش حابة لمجرد العند في حد جارحك وقارفك في المرحلة دي من حياتك وترجعي تلاقي العند وداكي سكة فعلا فعلا مش بتحبيها

فيه ناس ممكن تدمر حاجات جميلة جواها لمجرد انها تثبت للي جارحها اني انا بتحداك
واسألي ستيتة عن الموضوع ده لأنها خبيرة تدمير ذات


نيجي لأم قويق
شوفي يا منوش
صلي ع النبي
انا قلت لك اني ها أشألط الموضوع طول النهار في نفوخي
وطبعا أنتي استوليتي على عقلي طول اليوم وماشية اكلم نفسي زي المجانين وانا سايقة

بابا وماما عاشوا مع بعض العمر ده كله لوجود نظرية اضحي بنفسي في سبيل ان العيال تتربى بين اب وام
لو بينهم تفاهم حقيقي كانت لا أم قويق ولا أم اربعة واربعين تعرف تجيب الوالد

النهاردة الوالد دخل الميدل ايدج كريسس
ومشكلته انه حاسس ان العمر ولى وراح والعيال كبرت وانا والست مفيش بينا لغة مشتركة

تعالي نكون ناس متمدنين على غير العادة ونقول الآتي

بابا كتر خيره انه عاش عمر علشان بناته يبقوا في حضنه

ماما ضحت باللي مش ممكن يرجع تاني من شباب وصحة وجمال وبرضه استحملت ممكن حبا فيه وممكن حبا فيكم انتم

هل تعتقدي الأتنين في سن اي خناق فيه ممكن يوقع واحد من طوله لازم يفضلوا مع بعض لحد ما يخلصوا على بعض بشكل نهائي؟

السيد الوالد راجل والسوق طالبه بشده وان ما كنتش ام قويق ها تبقى ام شلاطة
وهو لما خدك عندها هو كده كده ها يتكحرت معاها بس امنيته وهو بيسعد نفسه ميخسركوش انتم ولاده

لو كنا شعب بمفاهيم تانية
كان هو قال كفاية نكد
وماما كمان قالت بلا هم اللي خدته القارعة تاخده ام شعر

بس احنا شعب مأساوي نهوى النكد ونعشقه عشق الفتة والهوبر


مش عاوزة تشتغلي مع بابا متشتغليش "بس خدي بالك من اللي انا قلته فوق"

بابا ها يروح لأم قويق متخسريش صاحبك ومتتجاوزيش معاه واصلا انتي متعرفيش يعني ايه اتنين يعيشوا غرباء تحت سقف واحد "اعاذك الله"

ماما اهم ما في الليلة "تحسسي جدا على مشاعرها واوعي هي تحس ان العمر راح على سراب"

ام قويق رغم انها اصبحت شيء شبه واقع في حياتكم .. بالجزمة .. تعرفي يعني ايه بالجزمة
مش علشان هي وحشة وسرقت الراجل والهبل بتاع الأفلام العربي ده .. لأ .. لأجل خاطر مامتك وجبر خاطرها بس .. لأن مفيش راجل بيتسرق .. إلا لما تكون مراته باعته في السوق من زمان

يارب اكون قلت لك كلمة تريحك او حتى تنور ليكي شيء

من فضلك طمنيني عليكي

ربنا ييسر لك كل عسير ولا يحرمك صحبة ماما وبابا ورضاهم

*البت المشمشية *حلوة بس شقية * يقول...

ولا يهمك يا جميل وربنا معاكى
وتبقى مبسوطة وكويسة

الشموع البيضاء يقول...

مش عارفه اقولك ايه يارب يهديلك الامور للافضل وينورلك الطريق ويفك كل كرب ويصرف كل سوء عن بيتكم
الموضوع واضح انه تراكمات من سنين وظهرت ام قويق ولقت مكان ياترى هل من الممكن اصلاح الفجوة دى ولا كده خلاص جابت الاخر؟ طيب انتى الى تحكمى لو جابت الاخر يبقا كان فى احداث وسنين وتضحيه من الطرفين زى ماستيته قالت لحد ماتكبروا ويطمنوا عليكو ومفيش مجال انهم يكملوا تانى فى الحاله دى يبقا فى رايى بلاش عند وبلاش كل الضغوط النفسيه دى وهمه كبار كفايه فى قرارتهم وشوفى مستقبلك وموهبتك واكيد وقت ما الامور هتهدا
اما لو فى مجال ممكن اصلاحه بين والديك بس فرصة حقيقيه يعنى وعاوزه صبر وفى امل يبقا خير ومش بعيده ابدا على ربنا بس عاوزه حاجات كتير عشان تنجح
ربنا يقد الخير وطمنينا عليكى

MaNoOoSh يقول...

عاشقه الرومانسيه
ربنا يهديهم يا اوختشى ويهدينا معاهم قبل ماالسلك اللى فاضل فى يأفوحى يلمس وتحثل بلاوى بقى فى المخيخ


لجين أبو الدهب
ربنا يكتبلنا الخير جميعا يا لوجى ويلهمنا الصبر بحكمتة


إيمان
انتى طلعتى عندية زيي بقى
امممممممممممم
بس والله يا ايمان مش عند قد ما هى اسباب كتير مفيش مجال لذكرها
لكن مش هنكر انه فى الاول كان عند شوية
-----------
وهم فعلا كبار وليهم حياتهم وهم ادرى بيها.. انا بس كان نفسى الكبار ميدخلوش الصغار فى حياتهم الخاصة علشان دة ميأثرش على نظرة الأبناء لأهلهم





*** حور- نور***
نورتينى يا عثل فى اول زيارة
وان شاء الله اكون معاكم اول ما النفسويات تستتب




MǿиY El-Shreef
ربنا يصلح احوالنا جميعا ويلهمنا الصبر لانن احنا ساعات نفسنا بيبقى قصير شوية




بلسم الجراح
ان شاء الله ميحصلش لا اسقاط ولا انكسارات ولا حاجات من الكبيرة دى
هى بس شوية خنقة وتروح لحالها ان شاء الله





Che
فعلا عندك حق انا لما بعمل اللى على مزاجى بستوريح
بس ساعات الواحد مبيبقاش عارف يعمل ايه اصلا



المعتصم
هو الواحد ملوش غير ربنا يا معتصم يناجيه باللى فى نفسه
بس انا اصلى اعصابى خفيفة حبتين ويدوبك لو صوت حد على قدامى ممكن يجيلى انهويار عصبى واقعد اعيط لما يبانلى اصحاب




القدر و انا
ربنا يكرمك يا قمر
وانا قريت البوست بتاعك ووجعلى قلبى
ربنا يهدى خلقة ويزرع فى قلوبهم الرحمة




أحمـــــــــــــد أبو العلا
اتحشر براحتك يا بشمهندس ولا يهمك
الحقيقة انا فعلا مش عايزة اجى على حد على حساب التانى وعلشان كدة مش عايزة ادخل فى المشاكل من الاساس
وربنا يهديهم ويهدينى ويهدينا جميعا للخير




أبو العريف
ربنا يكرمك يارب
وانا مش خايفة غير من منوش لانها ساعات بتتغابى وتنطح اللى قدامها (برج الجدي بقى)
هههههههههههههه




كاتب مصري
ان شاء الله الخنقة دى تاخد قرار ازالة
وانتظر مشاركتى معاكم طبعا بدون تردد يا ابراهيم



ستيته حسب الله الحمش
ستوتة حبيبة القلب وبلسم الروح
أنا فى الاساس انسانة مزاجية فما بالك بالرسم بقى
معدش فيه فى روحى او مزاج الصراحة للرسم دة غير انى قرفانة من المجتمع اللى والدى مش متخيلنى بشتغل غير فيه
فعلا فعلا انا كلمتك قلتها بالحرف لوالدى "انى مش عايزة احترف الرسم"
ومرحلة تدمير الذات كانت اخر سنة فى الكلية والحمد لله راحت لحالها وعموما انا بجاهد نفسى فى موضوع العند دة


بالنوسبة بقى لموضوع ام قويق فهى متفرقش معايا ببصلة غير فى زعل ماما
يعنى لو هو اتفاهم مع ماما علشان كل واحد يطلع بأقل الخساير انا هستريح
انا نفسى الاتنين يعيشوا فى سعادة بس مش عايزاهم يدخلونى فى اى مشاكل لانى اعصابى خفيفة ومش عايزة صورة حد فيهم تتهز فى عينى
مش عارفة اقولك ايه تانى غير مممممممممممممممواه




*البت المشمشية *حلوة بس شقية *
تسلمى على الدعوة يا قمر



الشموع البيضاء
نورتينى يا ثكر وان شاء الله ربنا يقدم الخير
والحقيقة حتى انا كمان مقدرش احكم على الموضوع دة لانى شايفة القشور بس واكيد الوالد والوالدة هم اللى ادرى باحساسهم وأقدر على الحكم
وربنا يلهمنا جميعا الخير

تامر علي يقول...

من وجهة نظري ان الغلطة اللي هم عملوها انهم دخلوكي في النوع ده من المشاكل ... اللي ميناسبش أبداً الأولاد ولا نفسيتهم وممكن يصيبهم بالتمزق النفسي لو معندهمش ايمان ... لكن مفيش مشكلة ملهاش حل ... آخر كلمة
"لا تتخلي عن حلمك "

تحياتي

غير معرف يقول...

قلبى عندك و الله يا مانوش
حد يبقى عنده موهبه جميله كده و يضيعها
لا حرام عليكي
ان اهملت الموهبه دى و بندم انى ضيعتها و زى ما كنتى متبعانى ف المفقوده المدونه اللى فاتت بحاول ايقظ الموهبه تانى
اما حكايه القدوة و انها تنهار فانى برضه مريت بيها و لم ينقذنى من الانهيا الا انى لجأت لربنا بكل كيانى و كنت لوحدى ف غربتى و لم ادع لليأس يمتلكنى و انه لا سبيل للخلاص من الانهيار التام الا ربنا و فعلا مرت ازمه لو حكيتها ممكن شعر راسك يشيب
و لا منجى منها الا الله فعلا و مرت و الحمد لله بسلاسه رهيبه و لا اصدق حتى الان انها مرت الخلاصه لا تهملى موهبتك و مش لازم تشتغلى بها و لكن لا تتركيها
امورك مع والدك و الست ام قويق لمذا لا تواجهيها و تقفى جنب وادتك و تحاولى تواجى الموقف بشجاعه و لا تتركى والدك ينجرف مثلا و تقفى جنب والدتك و تردي لها الجميل
انتى لكى مطلق الحريه ف الاختيار و لكن لا تهربى من مواجهه مشكلاتك و معلش

اعذرينى على التأخير ف الرد

MaNoOoSh يقول...

تامر علي
فعلا يا تامر انا مكنتش اتمنى ابدا انى اعرف المشاكل دى
وان شاء الله مش هتخلى عن حلمى.. بس اول ما اعرف ايه هو الأول
ههههههههههههههه



biberss222
والله يا بيبرس انا مأهملتش موهبتى بس هى اللى مخاصمانى
اما انهيار القدوة دى فكانت أيام ربنا ما يرجعها تانى
لكن انا الوقتى خلاص ادركت ان كلنا بشر ومفيش حاجة اسمها انسان مثالى وعليا انى احاول اقبل عيوب اللى قدامى زي ما بتبسط من مميزاتة
اما موضوع والدتى فهى كمان مقصرة وانا اتمنى انها هى وهو اللى يحلوا المشكلة بنفسهم وربنا يلهمنا جميعا الصواب

ذكرى رحيل قلم يقول...

السلام عليكم
انا اول مرة ادخل المدونة وان شاء الله مش هتبقي اخر مرة بس انتي سيبك من الخنقة وتعالي نبص ع الدنيا من شباك سعاد حسني بمبي بمبي

نور هل تعرفين شيء عن بريد الجمعة كان ملييء بقصص كتيرة في كتير من مشاكل الحياة ادعوكي الي رؤيته
في مدونة ذكريات ناس مجهولة