الاثنين، 1 يونيو 2009

تاج نمبر تو+++ تحديث هاااام

يا جماعة احب ابشركم ان انا كمان اتسرقت.. اة والله قلت بمناسبة هوجة السرقة دي ابص اشوف حاجتى
لقيتني مسروقة
شعر مهدى للأسمراني وقالبين إهدائي محل حلويات.. بشكل غبي
حسبي الله ونعم الوكيل في اللي سرق أو سرقت
الموضوع المسروق فى منتدى هنا
طبعا ايميلي مكتوب فى البروفايل
اللى يعرف طريقة تمنع التعليم حتى على الكلام يبعتلى الكود بتاعها لو سمحتوا
سلام بقى لما اشوف بقيت المواضيع
*******
انا عرفت موضوع السرقة بإني دورت عشوائي فى جوجل علي جمل من مواضيعي للي حابب يكتشف هو كمان بيتسرق وللا لأ علشان مينفعش نسكت على الكلام دة
*****************
علي فكرة انا بعتذر للناس الحلوين اللى أهدوني التاج على التأخير
بس اديني بجاوب علشان خاطرهم
وبقول لكوكيتا يارب تكوني بخير
وحودة امبارح كان عمره عشرين يارب تكون امتحاناتك سهلة
ويارب كل اللى بيمتحنوا وخصوصا موني تكون امتحاناتهم سهلة
ودرجاتهم نهائية
وكل اللى ولادهم بيمتحنوا وخصوصا ستوتة.. يارب تقضوا بعد الامتحانات اجمل وأمتع أجازة في الدنيا
وكل المشغولين.. ربنا معاكم
******
****
**
*
نبدأ التاج بقي
من أنت ؟
منوش العفركوش..
وما الذى تفعله هنا ؟
بطلع خنقتي عليكم.. ليكم ربنا بقى يا مثاكين..
هع هع هع.
إسرائيل تقصف كل جنوب ممكن بحثا عنك، أى شمال ستقصد؟
(اذا كنت كابسة على نفس المدونين الغلابة وبطلع خنقتي عليهم.. هسيب اسرائيل تنفد بجلدها مني يعني!!!).. هفضل قاعدة فى مكاني اقعد اقرف فيها ويا اموتها يا تموتني.
أنت مكلف بحذف حرف من حروف اللغة العربية.. أيها ستختار ولماذا؟
ازاي احذف حرف من لغة القرآن؟.. لكن أحب امسح معاني كلمات كتييييييييييير.. زي (عادي- خليكي فريش احنا فى رحلة- الاستعباط- الاستهبال- المياصة- المرقعة- الأنزحة- الافتراء- البلادة- الظلم- القهر.. معاني كتير بتفرس منها عايزاها تختفي من حياتنا)
لو قدر لك أن تدخل السجن فما هي القضية التي تتمنى ان تدخل بها إليه؟
اممممممممممممممممم..
ولو اني مش هستحمل غلوة فى السجن.. بس لو اتسجنت ممكن تبقى قضية دفاع عن الشرف لان دى الحالة الوحيدة اللى ممكن اقتل فيها فعلا.
بالمناسبة.. منذ متى اكتشفت نفسك؟
هفضل اكتشف فى نفسي لغاية ما افلسع من الدنيا.
على مفترق طريق لافتتان، اليمنى تقول (إلى حلمك) واليسرى تقول: (إلى مالم يحلم به البشر)، أي الطرق ستسلك؟
لا دي ولا دي..
هفضل ادور على الطريق اللى فيه السعادة لاني مضمنش أي طريق فيهم فيه السعادة.
نحن لا نعيش حياتنا بل نتعلم فيها كيف نعيش ما تعليقك؟
احنا بنعيش حياتنا وبنتكعبل وبنتعلم وبنحاول تاني نعيش أحسن من الأول.
بجملة واحدة فقط أكتب تعريفاً لكل كلمة من الكلمات التالية:
الوطن
كلمة تحمل أجمل النغمات.. لكن للأسف تحولت فى الواقع الى لحن نشاز
الأم
عطاء بلا مقابل وحضن دافئ افتقده بشدة
الليل
هدوء استمتع بالسهر فيه
الحب
لو كانت الحياة زهرة فهو بالتأكيد رحيقها
أمريكا
زيها زي غيرها.. كان ليها بداية.. وبقى ليها سطوة.. وهييجي اليوم اللى تنتهي فيه
المرأة
لا تستوي حياة الرجل بدونها وكذلك لا تستوي حياتها بدون الرجل.
الصمت
التزمه وقت الغضب حتي لا أقذف الناس بكلمات جارحة.. أو حينما تعجز الكلمات عن ازاحة همي.
الانترنت
الطبيعي يعني.. بقى ادمان.
اختر منصبا واتخذ قرارا؟
امممممممممممم..
مش عارفة انا أصلا أخاف أمسك منصب لحسن استحلى الكرسى واتغرغر بيه..
بس ممكن أخترع منصب اسمة قاضى الشباب علشان أطلع غلّلي من الشباب والبنات المستهبلين اليومين دول يمكن ربنا ينفخ في صورتهم ويبقوا رجالة وستات بجد.
قيس، عنترة، جميل، هم الذين يقولون شعرا، وليلى وعبلة وعزة «صموت» لماذا هذا التغييب للمرأة؟
الست فى الغالب بتحب تبقى معززة ومرغوبة.. لكن دة لا يمنع انها بتعبر عن احساسها بالكلمات بردو.. لو بصيت كويس فى التاريخ والحاضر هتلاقي كلمات الأنثى وتعبيرها يملأ الكون.
(حتة توحش بقى من نفسي) »»»
هو فى الغالب الراجل المستفصطائي بيحب يبين ان الراجل انفرد بعلامات العبقرية كلها وهيقعد يقول ان عظماء التاريخ كلهم رجالة واعظم موسيقيين رجالة وأعظم رسامين رجالة وأعظم شعراء رجالة وان حتى الطباخين رجالة.. والسخص اللى بالشكل دة أحب اقولة (يخى روح اتوكس اكتر منت موكوس.. ويعني هدعي عليك بإييييييييييييييييه وانت فيك كل العبر.. يافرحة مامتك بيك يا كوتوموتو).
أن تكون مطلوبا لارتكابك جريمة، خير لك من ألا تكون مطلوباً مطلقاً، هل تتفق مع هذه العبارة ؟علل
لا أنا متفقش مع نظام أنا مجرم إذن أنا موجود.. وبعدين هى البلد ناقصة مجرمين وحرامية.
إلى أين تمضي كلمات الحب .. بعد أن نقولها؟
تخرج من القلوب لتستقر في قلوب أخرى.. وحتى إذا مراحتش للي يستاهلها فهي بتفضل في قلبنا إحنا.
هل تجد علاقة بشكل أو بآخر بين المرأة وقطاع الطرق؟
سيبوووووووووووووووووووني..
محدش يحوشني يا جماعة..
عجبت لمن يشبه قاطع الطريق "الغاصب السارق" بمن يسلمها (بكامل إرادته ووعيه) حصون قلبه وشرفه وسمعته واسمه وبيته وأمواله وفلذات أكباده وتكون له حضن رقيق حنون وبلسم لجراح الحياة.

(أنا راضية ذمتكم.. حد يشبه الحرامي الشرير أبو مسدس ده.. بالوردة دي؟؟؟؟)

هذا فراق بيني وبينك .. متى ولمن تقولها؟
لا أتردد فى قولها لمن يهينني أو يكسرني.
كيف هو غداً؟
في علم الغيب ورحمة الخالق.
لمن تمرر التاج؟
لكل اللي في الريدر عندي وكل اللي مش في الريدر وهيعلق على الموضوع.. مش هدبس حد بالاسم تاني منعا للزعل والاحراجات مع إن التاجات دي جميلة والله بس مش عارفة المدونين بيهربوا منها ليه.
وانتظروا فى المواضيع القادمة.. هجوووووووووووووووووووووووووم الجمعية الموقرة علي كل مفتري وفي أهله مش سائل.. ان كان ست وللا راجل..
بس خلاص.

47 اللي عبروا منوووشة:

غير معرف يقول...

جميله يا بتاعت الثأثأه انتى

قلب ارهقته الاحلام يقول...

حجززز وجاايه :)

قلب ارهقته الاحلام يقول...

ايه بس الاجابات الجاااااامدة دي

مدمراهم علطول كده :)

ياقوية انتي ال فيهم والله ^^

ربنا يوفقك ويكرمك يارب

دمتي بألف خيرر

د. ياسر عمر عبد الفتاح يقول...

ههههههههه
إجابات جميلة وعاقلة .. وبرضه فيها حتت دمها خفيف
أنا جاوبت علي التاج ده قبل كده علي فكرة
ومش ناوي بصراحة أجاوب تاني

ستيتة يقول...

يا قوي يا مفتري يا رافع راس الجمعية لفووووووووووووووق

نعلن نحن "شفت التواضع" سوتيتة بأن هذه المنوش مش اي اي ولا زي زي ولا كل قط يتقال له يا منوش يا عسول

بس انا بحب تشبيه الستات بقطاع الطرق

ايوة وسيلة ردع عاااااااااااااااااا
سمعيني زئير سي الأستاذ الأسد

غير معرف يقول...

ههههههههههههههههههه

يخرب عقلك عليكي شوية كلام يجنن :)

كله كوووم وصورة الست الشرية الي بتفقع عين الراجل كووووم ههههههههههههه

بس طبعا معك حق عند الشرف البنت بتبقى قتالة قتلى :)

ههههههههههههه

وربي انك عسووووووولة مووووت

ربنا يوفقك ويحققلك كل امنياتك

امووووووووووواه

يوميات شاب منوفى يقول...

اجابات جميلة تدل عن الشراسة الكامنة الواحد يخاف منك بقى ويستخبة

غير معرف يقول...

عثل كالعاده.....التاج ده اصلا صعب محدش بيحبه وكتير بيتهرب منه......بس انت جامد.....واجاباتك هايله
دمتى بخير....تقبلى مرورى

مسدس صغير يقول...

اجابات جميلة
تعبر عن قوة شخصية اعتقد ذلك
بوست هايل
احييكى عليه

mimi يقول...

التاااااااااج هينطق عليكي .... ايه يا سكر العقل والرزانة دي ... لا لا مش مصدقة ..

" حد يشبه المسدس بالوردة دي ...هههههههه" كلها رومانسية الاجابة دي ... تحفة والله

منووووووووووش .. القطة اللي بترقص دي جميلة مع انك مش بتحبي القطط

انا هروح أبلغ عنك ... انا عرفت مصدرها...

احساس طفلة محبة للرومانسية بس واقعية يقول...

تخرج من القلوب لتستقر في قلوب أخرى.. وحتى إذا مراحتش للي يستاهلها فهي بتفضل في قلبنا إحنا.

هو دا الكلام والاحساس التعبير

أنا راضية ذمتكم.. حد يشبه الحرامي الشرير أبو مسدس ده.. بالوردة دي؟

وهى دى احلى اجابة انا موافقة معاكى وبشدة

الله عليكى يا منوش
عجبتنى اجابتك

تقبلى مرورى

امـنــيــتــي يقول...

شرانيه دنتي بتكرهي الشباب اوي وانا اكره البنات اوي

عبد من عباد الله يقول...

بس انتي لو قتلتي و انتي بتدافعي عن شرف ما اعتقدش انك حتدخلي السجن ....

على فكره زي ما فيه قاطع طريق طيب و ابن حلال برده فيه ست مفتريه و قويه و مستقويه اما النسب بقى في قد ايه فيه قطاع طرق اشرار و قد ايه فيه ستات طيبين و عندهم حنان اعتقد متساويه ههههههههههههههههههههه

بالتوفيق و نتمنى ان التاج يكون جه على قدك .

تامر علي يقول...

مفيش عقاب شرعي أو قانوني في القتل دفاعاً عن النفس ...يبقى كل عضوات الجمعية يشيلوا مطاوي قرن غزال .... لوزم الدفاع عن النفس :)))

VÖltaa يقول...
أزال المؤلف هذا التعليق.
VÖltaa يقول...

اهلا يامنوش
ايه الجمال ده

انتى خليتى التاج بقى زعبوط
ههههههههه

وخصوصا الصورة اللى فى سؤال السجن
ده انتى مش كده ؟
^_^

Bola 7elmi يقول...

لولولولولولولوي
جميل التاج عليكي اووووووي
اولا دي اول زياره ليا هنا
بس كنتير حلوه فـ التاج
واجاباتك حلوه :)



>> بولا :)

الشعب لابد له من حكومه تشكمه يقول...

ياجامد انت ياحونين وورده وحد بيسلبك بارداتك ايه الجمال ده دنا حسيت ان فى نسمات من الحونيه هبطت عليا وانا قاعده:)
اجاباتك كميله زيك:)

mahasen saber يقول...

طالما الحاله الوحيده اليى ممكن ترتكبى فيها جنايه هيا الدفاع عن الشرف يبقى منوش
حسك عينك تركبى اتوبيس يا حبيبتى
بيقولوا بيبقى فيه تحرش وتهرش هناك

بس عجبتنى قوى قوى بسابشرك هتاخدى فيها تأبيده لان عندنا فى مجتمعنا الست تدافع عن شرفها شئ والراجل يدافع عنشرفه شئ تانى خالص مالص

SHAPE YOUR LIFE (ABOALI) يقول...

البحث لا زال جارى
والتاج ومن ازاح عنه الستار
لا زال قلبه من الصفاء يشع نور وحنين
انا هنا بكل المعانى
اقف عالية الهامة
لى بصمة
لى طلة
لى بسمة
لى رؤية

لذا البحث جارى

مش عارف ليه حاسس ان تعليقى فلسفى شوية

بس ممكن يكون ليه معنى


تحياتى وشكرى

ملحوظة

الشرف كل ما يذم ويمدح
وليس كل ما يتعلق بالاهانة الجسدية

المعتصم يقول...

ايه الافترا ده ؟؟
كده بجد الواحد يقلق منكم
لا انا بقولك ايه
انا هرجع اعتصم تانى واغير رأيى احسن
انا مش قد الجماعه بتوع المرأة المستوحشه
وستوته كل شوية تقولك زئير الاسد
قاعدين فى فيلم رعب احنا
ماشى ماشى
بس يعنى
هى الاجابات اممممممممممم يعنى
حلوة
بس مش حلوة قووى يعنى
(غيظ بقى وورينى هتعملى ايه هه)
هههههههههههههههههههههههههههههههه
وعلى فكرة فيه علاقه وطيده بين قطاع الطرق والمرأة واللى اكتشف العلاقه دى
رامى الشاب المنوفى
وانا مؤيده جدا خالص مالص
ههههههههههههههههههههههه
ســــــــــــــــلام يامفتريه

د/على خميس يقول...

السلام عليكم و رحمة الله و بركاته
هو التاج ده لف على الدنيا كلها..؟؟؟!!!!
و الله انا بتفق معاكى فى استغرابك من اللى بيهربوا من التاجات دى ..
هو انا دخلت على طول كده ..مفيش شوية رسمى الأول ...
احم احم

الأخت الكريمة ( مانوش )
و الله تاج جميل و اجابات حلوة ...تجمع ما بين الخفة و العمق ...

الأم
عطاء بلا مقابل وحضن دافئ افتقده بشدة

حلوة أوى

فى أول زيارة أعلن إعجابى بهذه المدونة...
و شكرا

بارك الله فيك
تقبلى تحياتى

اسماء واحلام فى وجدانى يقول...

انا لسة جاى

بس للاسف مش لاقى كلام اقوله

لانى متبنج من كلامك الثكر ومن القطقوطة اللى

تم انتشالها من عندى بمساعدة اصدقاء مقربين جدا

كل واحد وله يوم

انا النهاردة جبت قط انما ايه شرس جدا ومنحرف جدا

وهو ده اللى هيوقفك عند المترو

كل ساعة ويظهر على الساحة لانى لسة بادربه

أبو العريف يقول...

ايه دااااااااه
هي التعليقات بتروح فين
انا بهيس يا جدعان
انا فاكر اني علقت قبل كده
عموما
تاج تاج يعني
اجاباتك دمها خفيف جدا
وتودي في داهيه


تحياتي

Jannah يقول...

يله منتظرة الهجوم الموقر :D
انت عاملة مدونة تربوية أشوف
:)

ساره يقول...

حلو تاجك يا موونوش :)

حبيت صورت البنت اللي لابسه التاج اتجنن :)

فشكووول يقول...

منوش العفركوش
ازيك
بس انت عامله صورتين يخوفوا واحده عفركوش زيك كدا وبتخنق الناس والتانيه حرامى بمسدس وبينهم ورده زى العسل برضه زيك
تحياتى

تأثير الفراشة يقول...

D: D:

إجابات جمييييلة جداااا يا منوش، فيها معانى جميلة و خفة دم فى نفس الوقت

ربنا يحميكى

تحياتى ليكى يا نصيرة المرأة
:) :) :)

شبـــاك موارب يقول...

مانوش الشقية
وحشااااااااااااااني موووووووت
الحمد لله أنا خلصت الامتحانات أخيرا
بس كويس ان الناس بيحدفوا عليكي بالتاجات الكتير
علشان كل مرة بنعرفك أكتر و أكتر
و بنعرف شخصيتك

تحياتي ليكي

شمس النهار يقول...

طول عمري اقول منوش دي قطه وديعه

:)

بجد اجابات جميله

safa7_karmooz يقول...

حلو التاج ده ...هلطشه واعمله ان شاء الله ^_^

MaNoOoSh يقول...

غير معرف
نورتني ياغير معرف.. بس طالما قلت الثأثأة تبقى بيبرس اكيييييييييد
ماشي ماشى هربت انت من التاج.

============

قلب ارهقته الاحلام
هم لسة شافوا حاجة يا غادة!!!
طب بس صبرهم عليا لبوستات الجمعية بس
ههههههههههههه
نورتيني يا غادة يا قمر

==========

د. ياسر عمر عبد الفتاح
يارب بس الواحد يكون فيه شوية عقل بصحيح يا د. ياسر.

=========

ستيته حسب الله الحمش
يا رافعة معنوياتي انت يا ستوتة يا عثل
ولسة دة انا هطلع غللي فى الفقرات القادمة..
بس الواحد ممكن يردعهم بمليون طريقة.. مش لازم نشمتهم فينا يعني بقطاع الطرق دول.. وللا ايه؟

==========

ঔღঔ نـــوارة ঔღঔ
والله يا نوارة انتى اللي عسل وكلك رقة وذوق.

========

يوميات شاب منوفى
شراسة.. بجد بجد؟
هييييييييييييييييييييييييييييه
انا بفرح قوي لما احس اني شرسة
نياهاهاهاهاهههاهاهاهاها

===========

فتاه من الصعيد
انا مش عارفة الناس بتهرب من التاج ليه بس؟
وانتى اللى عثل والله

==========

مسدس صغير
اممممممممممممممم
قوة شخصية؟؟؟
مش عارفة.. قد تكون كذلك.. لكن الاكتر انها بتعبر عن قهر بعيد عنك يا صاصا
انني مقهورة واعترف بذلك
عاااااااااااااااااااااااااااااا

===========

mimi
والله يا ميمي انتى اللى كلك رقة بجد
وبعدين الرجالة المفتريين دول بيحبوا يشبهوا الورد الصافي الابيض دة بالمسدسات علشان يطلعوا نفسهم غلابة
يللا ربنا يهديهم

بس القطة منورة مش كدة
ههههههههه

=========

احساس طفلة محبة للرومانسية بس واقعية
نونو الرومانسية.. لازم تلقط الكلام الرومانسي المستخبي وسط الحروف
نورتيني يا قمر الرومانسية

=========

امـنــيــتــي
انا شرانية ومفترية وشرسة ومفترسة
نياههاهاهاهاهاهاهاهاها
بس والله مش بكرههم
عبد من عباد الله
بص هو انت عندك حق.. فيه ستات قوية ومفترية.. ولكنها من الشواذ عن القاعدة العامة
بس قول الحق بذمتك.. بقى فيه قاطع طريق طيب وابن حلال؟؟
هه؟؟ هه؟؟

=========

تامر علي
المشكلة اننا لو شيلنا مطاوي احنا اللى هنتقتل
عاااااااااااااااااااااااااا
بس فيه أسلحة ربناية.. ضوافر.. أسنان.. الضرب في مقتل.. أى أدوات حادة متوفرة.. وهنتصرف يعني
هههههههههههههه

=========

Mo7ammed
ايوة حلو الزعبوط واهو احبى من التاج
هههههههههههه
بس مش انا والله مش انا الست دي
عااااااااااااااااااا

==========

Bola 7elmi
بولا منوراني وان شاء الله علطول التواصل
وانتى اللى احلى يا قمر

============

الشعب لابد له من حكومه تشكمه
خللى موضوع الحونية دة في سرك بس.. الواحد بردو لازمن يبان شرز فى البلد دي
هههههههههههههه

==========

mahasen saber
للاسف فعلا الحكم فى الست بيختلف عن الحكم فى الراجل
وموضوع الاتوبيسات دة الحمد لله ان ربنا تاب علينا منه بعد الجامعة
ولا مكيف نافع ولا مميز نافع ولا ميكروباص نافع ولا توك توك نافع
والواحد مش هيكفى تاكسيات.. امال نعمل ايه بس
لينا ربنا.

=========

ABOALI
والله يا ابو على كلامك جميل جدا وياريتني استحق ربعه حتي

وبالنسبة للملحوظة.. شرفي هو أنا (عقلي وروحي وجسدي ومن أحب).. مش محصورة فى موضوع الجسد فقط

===========

المعتصم
طب وحياة طنط طاظا ما هعترف تعتصم يا معتصم ومسيرك هتتكعبل ان مكنش بمزاجك فهيبقى غصب عنك
هو حد بيعرف ينفد من بنات حواء الرقيقات المتوحشات فى نفس ذاك الوقت على التوازي

وبعدين ماله زئير الأسد يعني
نيااااااااااااااااااااااااااااااااااااااااااااااااااا
ههههههههههههههه

على العموم ربنا يرزقك بوردة مش مستوحشة ان شاء الله.

==========

MaNoOoSh يقول...

dr aly khamis
انت شرفتني بزيارتك وان شاء الله يكون فيه تواصل بيننا
وانا سعيدة ان اجاباتي عجبتك

==========

اسماء واحلام فى وجدانى
ماشي يا أحمد كويس بردو انك هتبتدي تغير طقم الحراسة
لحسن الواحد يطمع فى قطقوطة تانية
ههههههههههههه

===========

أبو العريف
عااااااااااااااااااااا
انا مباكلش الاجابات والله يا ابو العريف
وبعدين تودي فى داهية ليه بس.. طب دي حتي مش متوحشة ولا حاكة
هع هع هع

===========

Jannah
العد التنازلي للهجوم الموقر ابتدي يا جنه
بنااااااااااااات استعدواااااااااااااا

=========

ساره
ايوة يا سارة القمرة.. البنوتة عثولة بس مش اكتر منك يا قمر

========

فشكووول
عمووو فشكووول.. محنا لازمن نخوف الناس برديك علشان نشوف معدنهم.. وللا اييييييييييه
هههههههههههه

==========

تأثير الفراشة
ايوة يا قمر لازم نناصر المرأة ونقف جنبها.. وللا هنبقى احنا والرجالة والزمن عليهم
عااااااااااااااااااااااااااا

===========

مش عارفة الدنيا وخداني علي فين
يااااااااااااااااااااااااااااااااااااااااه
حمدا لله على السلامة يا قمر
انتى اللى وحشتيني جدااااااااااااااااااااااااااااااا
والتاج عليكي اجباري لا مفر طالما خلصتى امتحانات بقى.

============

شمس النهار
انا قطة وديعة (وش مكثوف)
ربنا يخليكي يا شموستى

==========

safa7_karmooz
انا يسعدني انك تلطش التاج يا سفاح.. عايزة اشوف اجابات السفاح هتبقى عاملة ازاي.

=========

Kiara يقول...

ياجاباتتتتتتتتك

بس الصوره دمويه اوي

انا خفت منهاااااااا الصراحه

Sweet Violet يقول...

ياجاااااااااااااااااامد يامنوووووووووشة

ايوة كده عايزين العين البنفسجى ال المرأة وقطاع الطرق ال

عايزة اعرف مين اللى حاطط الاسئلة دى ؟!!!

لا بجد كل الاجابات جامدة مووووت جدا خالص قوووووووووووى

و على فكرة انا عارفة و الله ان فى تاج عليا و عارفة انى متاخرة و على فكرة مش التاج بتاعك بس ده فى تاج تانى من سوووول .. يعنى فاكرة اهو

لكن اول فرصه بجد هجاوب

بوسة ليك ياقمر بقى

امممممممممممموة

د/على خميس يقول...

السلام عليكم
كلاكيت تانى مرة
ايه حكاية السرقة دى يا جماعة ...
انتم بتعرفوا ازاى انكم اتسرقتم؟؟؟
انا عديت فلوسى لقيتها تمام و المحفظة و الشراب ميه ميه؟؟؟
فدينى يا أختى الكريمة الله يبارك فيك

Sweet Violet يقول...

بصى انا الصراحة عارفة انها حاجة تضايق و عارفة انك مش طايقة نفسك

بس بجد مش قادرة امسك نفسى من الضحك لما شوفت ردود العضوة ... ده على اساس انها هى اللى كاتبة و عارفة الاسمرانى .. بجد انا لما بشوف كده بضحك على "الهبل " اللى هما فيه ربنا يشفى

و كمان مااحنا ياما اتسرق منا مواضيع ايام المدونة التانية .. يابنتى ده دليل انك فعلا بتكتبى حاجات حلوة

اما عن الكود ممكن ابعتلك كود منع استخدام كليك يمين .. لكن ده اعتقد ينفع بس للصور .. لان ممكن بالكيبورد يتاخد كوبى بردو

عموما هبعته و جربى

و بلاش تضايقى ياقمر


ده انا كنت لسه بقول ياجامد هزعل كده ):

Sweet Violet يقول...

توتا انا بعت الاميل

ابقى طمنينى وصل ولا لأ

لان انا عارفة ميلى اوقات كده بيخرف ):

د. ياسر عمر عبد الفتاح يقول...

أعلق تاني بقي علي موضوع السرقة
ده أنا دمي محروق من الموضوع ده بشكل
هوه هيخسر إيه الحرامي ده لو قال إنه منقول ويكتب أسامينا عليه
حصلت معايا كثير
فيه قصيدة كنت كتبتها قبل كده
والله اتسرقت أكثر من 20 مره
وكل واحد بيقول إنها بتاعته
لدرجة إني بدأت أشك وأسأل ..
هوه مين اللي كاتبها أصلاً؟

MaNoOoSh يقول...

كيــــــــــــارا

ايوة يا كيارا لازم الصورة تبقى دموية علشان يخافوا


=================


سوييييييييييييت فيوليت
ايوة يا سويت لازم نوريهم العين البنفسجى والبرتقالى كمان لو لزم الأمر
هههههههههه
التاج حليه براحتك ووقت ما تفضي يا قمر

--------------------
وموضوع السرقة دة مضايقنيي فعلا بس مش هستني لغاية ما دمي ينحرق يعنى
ان شاء الله اعرف أتصرف.. وعلى فكرة المدونة فيها منع السرقة والواحد لسه بيكتب الموضوع.. بس ان شاء الله استخدمها فى أى مواضيع جديدة.. وبجد ألف شكر ليكي يا قمر


================

د. على خميس
انا بحثت فى جوجل بالصدفة على كلمات من مواضيعي أو عناوين واكتشفت ان الموضوع في منتدي مسروق
دور وان شاء الله متلاقيش حاجة مسروقة.

============

د ياسر
لا أنا الحمد لله مشكيتش فى نفسي
اصل الشعر اللى على قده اللى انا كاتباه كان اهداء مخصوص لانسان عزيز عليا..

ووالله لو كانت كتبت منقول حتى ما كنت هتضايق بالشكل دة.. هتتعب صوابعهم قوي أصلها بعد السرقة الكلمة دي.

==================

yoyo يقول...

صباحك سكر يا منووش

اخبارك ايه يا قمر ؟؟ يارب تكونى بالف خير

هاتكلم الاول عن التحديث بصراحة موضوع سرقة المواضيع صعب التحكم فيه وطيب حتى لو عرفنا ممكن نجيب حقوقنا ازاى؟! االانترنت عالم مفتوح بس المفروض يكون فيه ضمير واخلاق

التاج اجابته حلوة اوى ايوه كدا يا كبير وريهم العين الحمرا هو احنا شوية ولا ايه
ههههههههههههه
عسل يا و الله
انا طبعا معاكى قلبا وقالبا اية خدمه يا ريسة
ههههههههههههههههه

ربنا يسعدك ويسعد قلبك يارب
دمتى اختى بالف خير
تحياتى
يويو

ذكرى رحيل قلم يقول...

السلام عليكم

ربنا يسعدك يا منوشا ويرزقك بتاجات علي طول
اجابات الكلمة الوحدة جميلة الام الوطن الحب
تحياتي

غير معرف يقول...

إزيك يا ست منوووش ؟
طب تصدقي، أنا برضك فوجئت بشعار المدونة مسروق من منتدى تاني "الشعشعة غايتنا و التهييس و سيلتنا و مستشفي المجانين آخرتنا إن شاء الله" .. هو المنتدى ماراحش بعيد يعني .. اسمه منتدى مسخرة :)) .. بس اللي فارسني قال يعني علشان ما يبقاش سارق، كاتب بدل مستشفى المجانين السرايا الصفرا :))

بس أحلي حاجة حتة العشرا دي .. أنت مش واخدة بالك إن عنتر و قيس و جميل كتبوا الشعر في مين ؟ .. يعني هما ما كانوش صوامت بقدر ما كانوا منبع إلهام و وحي، و لولاهم مكناش عرفنا أي حد من دول ..

سلام يا منووش

الازهرى يقول...

بخصوص السرقة فهى موجودة ومن زمن وبنحاول نمنعها لكن مع الاسف صعب

اما بخصوص التاج فالاجابات حلوة وخصوصا الصمت

اما بخصوص الاهداء فبعد اللى حصل فى التاج اللى فات
انا اسمى فى القايمة ولا لأ ؟

ELMASRYA - MRS WRITER يقول...

ردودك دمها خفيف خالص

يا منوش إنتي ممكن تكتبي قصص ناقدة بشكل كوميدي ساخر

حاولي ولو نجحتي إبقي إدعي لأختك المصرية

موضوع السرقات ممكن تواجهيه بإنك تحطي كود يمنع أي حد يعمل كوبي من مواضيعك

أنا عندي الكود ده ولو عايزاه ابعتيلي على إيميلي بس عرفيني إنك منوش المخنوقة لأني مش بضيف أي دعوة من غير ماعرف صاحبتها

eegychamp@hotlail.com

دمتي سالمة

اسماء واحلام فى وجدانى يقول...

بانتظارك يا منووووووش خبر حلو من الطفلة الرومانسية فى مدونتى
يلا تعالى

MaNoOoSh يقول...

يويو
ايوة يا يويو.. دة أنا هوريهم لسة كل الالوان وحياتك بس صبرهم عليا ان شاء الله
هههههههههههههه

وموضوع السرقة نقدر نحاول نفضح الحرامية.. لكن صعب نمنعهم



==================

ذكرى رحيل قلم
نورتيني يا قمر.. ونفسي اشوف اجابتك على التاج مرة

==================

الدائخ

الحرامية دول بقوا زي السرطان فى النت.. وللأسف لما شعار يتسرق.. هيبقى صعب جدا تشتكي للإدارة أساسا.. لانها هي اللي سارقة الشعار.

وفعلا الست وحي عظيم للمعاني الجميلة.. بس بردو هي بتكتب وبنعبر عم كشاعرها مش صامته ولا حاجة.

===================

الأزهري

السرقة فعلا صعب نمنعها.. لكن بنحاول نفضح الحرامي على الاقل علشان نحافظ على تعبنا

والتاج بقي زي ما قلتلك.. انت بالذات السؤال اجباري يا فندم ومفيش وسائل مساعدة
ههههههههههههه

==================

المصرية
ربنا يكرمك يا قمر.. وانا بحاول اكتب ساخر في بعض المواضيع الطويلة.. وان شاء الله هجوم الجمعية هيكون نقد لاااااااااااااذع قوي.. باذنك يارب ياذنك يارب هستمسخر بكل اللى قاهرني.
ههههههههههههه

وبالنسبة لموضوع السرقة فانا اكتشف ان كل الأكواد فيه طرق للتحايل عليها.. بس احنا بنحاول على قد ما نقدر
انا ضفت ايميلك الوقتي والف شكر يا قمر على مساعدتك

===================

أسماء وأحلام في وجداني
الخبر فعلا يا احمد فرحتي جداااااااااا ورفع معنوياتشي كتيييييييييييير

وحتى شوف القطة كمان زقطتت ازاى
هههههههههههههه

===================