الاثنين، 13 أبريل 2009

عبده أنزحة وتشفيدة زوفاش: الحلقة الخامسة "2"

بعد ما رجعنا البيت من الخروجة غريبة الملامح دى كان الكل بوزة شبرين ما عدا تشفدفد التى كانت تبدو عليها ملامح الانشكاح واضحة.. وكانت القعدة مربكة وأوشا دخلت تنام وهى بتعيط بينما تشفدفد غارقة فى الانشكاح والليالي الملاح مع عصفورها بعد ما اتصافوا واتصالحوا.
ولكن رغم الخنقة والجو الـياحلاوة ياحلاوة على الاخر قررالشيباب اننا نخرج تانى يوم ونروح السينما.. وأنا أقولهم ما بلااااااااااش ومع ذلك.. ورغم كل أنواع الاحذية اللى اتكلمت عنها المرة اللى فاتت بس قررت اخرج علشان خاطر أوشا فقط لا غير.. بس قعدت اقول لتشفدفد انى مش خارجة وهخلى ليلتكوا برنجان مخلل بقى طالما مبتعملوش احترام لحد.. راحت تشفدفد قعدت تتحايل عليا.. فانا اصطدتها كالصقر (هو نفسه البرىء الحليوة المقطقط بردو) ومسكتها على جنب وقعدت ازل فيها شوية واقولها هتحترمي نفسك؟.. هتلمى الدور؟.. مفيش نظام اتنين اتنين؟.. وهى زى البتاعة دة بتقولى حاضر والله هبقى ماسكة فى ايدك انتى وأوشا.
ثم خرجنا والحمد لله لقينا السينما قافلة (اصل اللى يجي عليا ميكسبش ابتااااا.. نياهاهاهههاهاه).. فقلنا نتمشى بقى شوية فى السوق.
وكل واحد بقى ماشى فى جنب.. واللى بيشترى حاجات.. واللى بيركب مراجيح.. واللى بيتخانق.. وتشفدفد ماشية مع سي عبدة قدامى أنا وأوشا بينما الدم يستمر فى التصاعد الى نوفوخى بانتظام.. فلقيت بتاع غزل البنات ولسة بهمس لأوشا اقولها ماتيجى نجيب.. لقيت الكل اتلم علينا وتشفدفد تصيح وتطرقع أيديها كـ"قطة" البحر كعلامة أنها عايزة هى كمان.. قلت ومالو يابت يا منوش طنشي خاااااااااالث لغاية ما نشوف اخرتها ايه.. ولقينا العصافير قاعدين يتعازمو مع ان الاتنين معاهم.. قلت ومالو يابت يامنوش طنشي خااااااااااااااالث لغاية مانشوف اخرتها ايه.. واذ فجأة نبص نلاقى العصافير بيأكلو بعض فى منقارهم.. قصدى فى خياشيمهم.. يووووووووه قصدى فى بق بعتشيهم يعنى.. قلت ومالو يابت...أآآآى.. لالالا مينفعش تطنيش المرة دى خاااااااالث.. فرحت ناغزة لتشفيدة وقلتلها أنا بقول كفاية كدة ويللا نروح نعمل شوية برنجان مخلل احسن.
وبالفعل بدأنا مشوار الرجوع وطبعا العصافير يا إما سابقينا يا إما ورانا بكام كيلو. وخلاص روحنا البيت.. استوريحنا وأكلنا ولعبنا وهرجنا.. واذ بي اسمع طنط 1 وطنط 2 يتحدثون أمامي مع بعتشيهم على تشفدفد وهم بيقولوا بلا جواز قرايب بلا هم.. دة كفاية ميسا لوحدها.. دي هتبقى حمى معتبرة بنت ومتدلعة وكلمتها على الكل مسموعة.. وماتزال على وجهي علامات الاشمئزاز والامتعاض اثر الخروجة السابقة والتحفز لأى هجمات جديدة من العدو.. يوووووووة قصدى من العصافير.
ورغم ذلك قرر الشيباب يروحوا اللسان بعد الفجر وبدأوا فى الاستعداد الذي استمر وكأنه قرن من الزمان.. حيث أن تشفدفد تضع من المساحيق والبودرة أطنان.. وقد لمع فى رأسها فكرة خبيثه.. حيث قررت ارتداء ملابس ميسا.. فبدت عليها وكأنها ملابس نملة على جسد بُريصه.. وعندما حذرتها من ارتداء تلك الملابس المشبوهة.. كبستنى فقد وافق على ذلك أمها وأبوها.
وطبعا بعد قراطيس الجوافة المتتالية اللى كنا بنلبسها فى كل خروجة قلت يابت يا منوشا اقعدى ناميلك شوية فى الهدوء الجميل لما الشيباب يمشوا.. وقد كان.
فطيت على السرير وانا منشكحة بقى بعد ما مشيوا ونمت شوية.. واذ فجأة اسمع أصوات زعابيب وشحتفة وصراخ وعويل على السلالم.. حيث ان كل واحد كان جاى وهو ماسك فى خناق اللى جنبة.. وقد سمعت من أوشا أن العصافير تركوا الجمع عند الفنارة وقعدوا فى انسجام الغرام عند الصخور وهم ساندين رؤوسهم على بعتشيهم.. والمية بتطس فى قفاهم وعنيهم.
وحدث فى المنزل حدث جلل (حلوة حدث جلل دى كانت واقفة فى زورى من أول المسلسل الصراحة).. حيث بدأت مناقشة بين سي عبده من جهة وأوشا ومنوش من جهة.. وكنا بننصحة ان التصرفات اللى بتحصل دى متصحش غير لناس متجوزين كمان مش مخطوبين.. وفجأة عيونه تسمرت وجحظت نص متر كدة لقدام وقال: آآآآآآآآه دة انتوا مقسيمنها ومتفقين بقاااااااااا.. هى تقوللى كدة امبارح وانتوا تقولولي كدة النهاردة.. علشان كدة بقاااااااااا احنا مبنتخانقش مع بعض غير وانتوا موجودين.. وفجأة
أن أن أأأأأأأأأأأأأأأأأأن
لقيتنى بهب فى الجرع وأقولة انت واحد قليل الأدب ومبتعرفش تحترم حد اساسا فمش هتوقع منك تحترمني ولذلك اعتبر من هنا ورايح انك متعرفنيش وانك بالنسبالي مجرد شوية هوا.

ومع ذلك تاني يوم بالليل رحنا كلنا نقعد على البحر ووافقت اروح علشان طنط007 كانت هتقعد معانا.. وقعدنا نتمشى لغاية ما لقينا مكان هادي نقعد فية.. وكل واحد سحب كرسي يقعد علية وطبعا العصافيير اختاروا كراسى "متلاسكة".. وبينما كانت تشفدفد قعدة تحرك وتفرك وتعدل فى الكرسي بتاعها.. واذ بها تنطس فى نغاشيشها وتدوس على صوبع رجلى الكبير (أيوة هو الصوبع الكبير اللى كنت لسة شايلة ضوفرة اللى حكيتلكم عنه فى الاول).. ثم...

أن أن أأأأأأأأأأأأأأأأأأأأأن
لقد ضخت تلك الحركة الدماء من الصوبع اللى بيوجعنى الى نوفوخى مباشرة فأيقظت المارد الكامن بداخلى منذ عدة أيام وأطلقته من فمى.. حيث وجدتنى أصرخ فى وجه تشفدفد وتنطلق من فمي صواريخ: انتى اتعمشتي وللا ايه.. مش تفتحي وتشوفى الناس اللى حواليكى.. منتى طبعا مش مركزة معانا.. منتى لو بتعملى اعتبار للى حوايكى كنتى هتخدي بالك.. منتى مش فالحة غير فى الهيء والميء ومش ناقص غير طبلة وشخليلة.. والعديد والعديد من الصواريخ الأخري اللى مش فاكراها الصراحة.
وعندما ادى المارد الذي انطلق واجبة واختفى مرة اخرى.. وجدت تشفدفد فاغرة فاها.. وعلامات الصدمة تعلو وجهها وهى غير قادرة على النطق.. فطنشت ورحت فى النوم.
ولما صحيت لقيت طنط 007 قامت والأطفال قاعدة تلعب على الشط والكل نايم ماعادا العصافير المفنجلين ورؤوسهم "متلاسكة" على نفس "الكراسى المتلاسكة".. فقمت لأمدد ذراعي كالصقر(بردو البرىء الحليوة المقطقط) وأنا أقول (بصوت واتى خااااااااااااالث مالث) أحــــــــــــــــــــــــــم أحــــــــــم.. مش عارفة ساعتها العثافير اتنفضوا من مكانهم واتسرعوا لييييييييييية؟؟؟
فقام سي عبده وقرر النزول الى الميه.. بينما كانت تشفدفد فى التلاويت.. وعندما أتت تشفدفد قالت أوشا فى كلمات (برييييييييئة خاااااالث ماااالث).. دة سي عبدة هيعوم للصخور.. فظلت تشفدفد تحووم و تزوووم.. وهى تصرخ على سي عبده علشان يطلع من المية.. وفضلت رااااااايحة جاااااااية.. واحنا كلنا قاعدين نـــــــــــــضحك.. لغاية ما زهقت وقالت لأ أنا اعثابى تشعبت خالث.. أنا مش قاترة اتحمل.. لما يطلع قولوله انى مشيت.. وقد بلغنا لسي عبده الرسالة بمنتهى البرااائة لما طلع فراح يجرى علشان يلحقها (ونحن جميعا غارقين فى ضحكاتنا الشريرة.. نياهاههههاهاهاهاهاهههاهاهاهاها)
وقمنا أخدنا احنا بعتشينا أنا وأوشا وديدو وسكمونص ورحنا قعدنا فى الشوفي كوب وجبنا فطير وقعدنا نلعب دومينو ونضحك ونهيص ونقطع فى فروة العثافير.. وكان دة أخر يوم.
و فى طريق العودة كنا قاعدين فى صمت رهيييييييييب.. ومحدش بيكلم حد.. وقعدت اسرة منوش ييجى سنتين متروحش المحمودية غير فى مناسبات قليلة جداااا.. وسافرت اسرة عبده وهو معاهم بعد ما سقط فى كلية أبو قردان.. ودخل معهد فى البلد الى فيها اسرته.
ومنوش قعدت ييجي سنة متكلمش عبده لغاية ما حست من كلامة مع أوشا على النت انه اتغير شوية وقررت تسامحة.. وياريتها ما سامحتة.. وكل دة عشااااااااااااااااان...
طبعا برخماتى كالعادة هقولكم هنعرف الحلقة الجاية.

11 اللي عبروا منوووشة:

ادم المصرى يقول...

مرسى جدا على سؤالك الجميل جدا عليا

بجد مرسى وربنا يعلم معزتكو زادت عندى قد ايه

مرسى كتير

ومرسى على الفكاهه دى كتير مش غريب عليكى لئنك خفيفه جدا ودى موهبه

غير معرف يقول...

الف سلامه على صوباعه الكبير

هههههههههه جميل اوى الجزء ده و مستنييين الباقى ان شاء الله

♥♥♥♥♥ Jennifer™® ♥♥♥♥♥ يقول...

أحب بلوق الخاص بك

لجين أبو الدهب يقول...

هى العيال دول عايشين ايام عبد الحليم ولا ايه ..

وكل ده حصل دلوقتى امال سابوا للمتجوزين ايه ..

ده المخطوبين ما بيعملوش كده حتى ..

الدم اللى وصل لنافوخك من صوبعك وصل لنافوخى دلوقتى D:

موتبعة معاكى ياقمرية ..

شاب كــ طخين ـــــا يقول...

ههههههههههههه
تشفيدة عاتفية عاتفية اوى هى وسى الاستاذ عبدة الصراحه
الحلقة جامده اووووى
حلقتين فى يومان احمدك يارب مش حرمنا من حاجة يا منوش

الصور كمان جاااااااااااامده بغباء

بس مش المفروض قبل الأخيرة وهما على اللسان ده يبقى العكس تشفيدة القمر بتفكر فى عبده وعبده بيفكر فى تشفيدة هههههههههههههههه

دمت بكل خير
سلااااااام

MǿиY El-Shreef يقول...

هههههههههههههه

الحب انوااااااااااع

بجد كوميديا عاليه اوي يا منوش

سلامه صباعك يا اوختشي

المره الجايه خدوني معاكو كل دي فسح وانا وحدي كده :D

الرسمات دي حلووه اوي هو ده من رسمك ؟

ومستنين الجديد يا جااامد

امـنــيــتــي يقول...

اهلا بيكي ربنا ربنا يبعد عند الخناق ويبسطك ويهنيكي

ويسعد ايامك

شكرا ليكي اتمني لكي زياره مدونتي وشكرا

ستيتة يقول...

يا مصبر الوحش ع الجحش
يا مصبر الوحش ع الجحححححححححححش
يا مصبر الوحش ع الجحححححححححححححححححش

الله يعني طنط 1 لحد طنط مية مفيش واحدة قررت في اي مرحلة تدي عصافير المحمودية على قفاهم
طب فهميني انتي ليه؟
لييييييييه؟
لييييييييييييييييييه؟

قطيعة من عبده انزحة لتشفيدة زوفاش
يارب يكونوا اتكوزوا لأن عبده وتشفيدة يستاهلوا بعضيتهم قوي

كملي يا مستبدة

MaNoOoSh يقول...

ادم المصرى
دة اقل واجب يا ادم
ومسي جدا على ذوقك

------------------------

biberss222
الله يسلمك يابيبرس
الصوبع الوقتى تمام الحمد لله وخف من زماااااااان

------------------------

♥♥♥♥♥ Jennifer™® ♥♥♥♥♥
شكرا

-------------------------

لجين أبو الدهب
فعلا يا لوجى هم مكنش ناقصلهم الا فصطان وبضله ويعيشوا فيها اغنية يا خلي القلب (مع الاعتذار طبعا لاغانى حليم اللى بحبها جدااااااا)
ههههههههههههههه

--------------------------

أمبارح كان عمرى عشرين
تسلم يا باشا
ايوة انا قلت انزلهم ورا بعض بدل منا قارفاكم كل مرة كدة
ههههههههههههههههههه

--------------------------

MǿиY El-Shreef
تسلمى يا موني يا قمر
المرة الجاية ابقى تعالى معانا يا ستى ولا تزعلى.. بس اصبرى عليا لما اغتال عصافير المحمودية علشان نعرف نتفسح براحتنا
ههههههههههههههههه

--------------------------

امـنــيــتــي
شكرا لزيارتك ومدونتك جميلة فعلا وأشعارك رقيقة جدااااااا

---------------------------

ستيته حسب الله الحمش
طنط 1 وطنط 2 عاتشى خالث مالث.. واللى انا اموت وافهمة لغاية دلوقتى ان طنط 2 كانت بتقعد تشعلل وتسخن فيا لييييييييييييه مع انها اكبر مني واقدر على التصرف.
اما طنط 007 فالعصافير بياخدوا بالهم قوى من تصرفاتهم قدامها على قد ما يقدروا
وفعلا فعلا العصفورين دول احسن عقاب الهى لبعتشيهم
ويارب يتكوموا.. يووووووه قصدى يتكوزوا ونخلص منهم

Ahmed يقول...

MaNoOoSh
الدم طار في نفوخي انا
انا حاسس اني -ومعلش في اللفظ- بتفرج على فيلم سهوكه من الأربعينات والخمسينات
فيلم الناس اللي فيه مش حاسه انهم بايخين والناس بتتفرج عليهم

على فكره البوست ده وجعلي صباعي وحاسس انه ورم

MaNoOoSh يقول...

أحمـــــــــــــد أبو العلا
فعلا يا بشمهندس انت عندك حق جدا.. وهو دة اللى استفزنى وخلانى اكتب المسلسل اساسا
بس لسة ان شاء الله اخر استفزاز هيكون فى حلقة الزلانطين وبعدها هنعرف العبرة من المسلسل
مش قلتلكم من الاول انة مسلسل عاتشفى عاتشفى اصاب المشاهدين بحالة من الشحار المفسفس
هههههههههههههههههه
وسلامة صباعك.. بس دة علاجه الوحيد شختطين فى تشفدفد.. اجيبهالك ازاى انا بقى ؟
ههههههههه